About Bible Thianghlim | ©

BibleThianghlim – TITA

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

TITA

123

• A ngantu: Paul
• A siartu: Tita
• Ngan kum: A.D. 65

Zentel-mi Tita hi Paul-ih rawngbawlnak ruangih zumtu ih cang mi a si men thei (1:4). Anih cu Antiok le Jerusalem ah Paul thawn an thlunaw dah (Gal 2:1-3). Anih hi Paul in Galatia ramṭhen pálin a vei khatnak missionary khual a tlawn laiah a tel ding ti zum a si. Paul ih missionary khualtlawn a vei thumnak khalah a tel ih, Korinth khua ih thubuai tifel dingah Paul ih a hril mi a si (2 Korinth Thuhmaihruai siar aw). Tita-ih hmin hi 2 Korinth sungah vei tampi a lang (2:13; 7:6, 13-15; 8:6, 16, 23; 12:18). Cumi in amah hi nun dik nei mi le rawngbawlnak ah rintlak a si ti a langter. Cuvek minung a si ruangah Khirit kawhhran pitlingter dingah Paul in a hril hi mangbang ding a um lo (Tit 1:5).

Mediterranean Tifinriat ih Khirit tikulh kaupi hi Rom in a rak uk mi a si. Hi tikulhmipawl hi nuncan lam le tlanlendan lamah an hmin a rak sia (1:12), asinan thuthangṭha cun an nun a thleng. Khirit mipawl in Pentikos ni ah Peter ih thusim mi an ngainak ihsin an hnenah thuthangṭha a rak thleng thăwk a si men thei (Apo 2:11). Hi tikulh hi Paul in thawngtla dinhmun in Rom khawpi a pan tikah a pál phah (Apo 27:7-13). Rom ralkappawl in Paul an thlah hnuah (1 Timothy Thuhmaihruai siar aw), Tita thawn Khirit ah a tlawngsal. Cumi ṭum ah rei deuh a cambang. Khirit a suahsan tikah cutawk ih rawngbawlnak hlĕnsuak dingin Tita a ruat (1:5). Paul in Efesa le Masidonia a tlawn hnuah Tita hnenah, a hrangih lamhmuhtu ah, cakuat a ngan. Cuih kum cu A.D. 65 hrawng a si.

Tita cakuat hin thurin dik thawn milawin hna ṭha kan ṭuan ih, nundān dikin kan nun le kan tlanlēn theinak dingah, Khrih in in rundam thu in zirh. Sikhalsehla cumi dawnkhamtu thil pathum Paul in a buaipi, cupawl cu zirhnak diklo, Pathian ngaihsaklonak le leitlun câkhiarnak tla an si. Dawnkhamtu a pakhatnak cu bung khatnak ah a buaipi ih, a tling mi elder-pawl nĕmhngeh a pawimawhzia a sim. Bung 2-3 ah dawnkhamtu dang pahnih thu a buaipi ih, kawhhran sungih zumtupawl cu an kum izirih kăwmdan ding le pehtlaihdān ding pawl a rel.

Pathian zangfahnak in rundamnak ah in hruai ih, sual nehdān le hnaṭuan ṭha hrangih ṭhahnemngaidan ding thupawl in zirh (2:11-14).

1

Cibaibûknak

1 Pathian hril mipawlih zumnak le Pathian ngaihsak zawngih thutak theihnak famkim zulhih Pathian ṭemṭawn sál le Jesu Khrih-ih apostol Paul in, 2 thuphan per thei lo Pathian in leilung sēm hlanin sankhuk nunnak ruahsannak a rak tiam. 3 Asinan in rundamtu Pathian thupek bangtukin ka hnenih ap mi cu, thusimnak thawngin a kamsuakthu cu a tikcu teah a langter.

4 Zumnak hmunkhatih ka fapa taktak Tita hnenah:

Pa Pathian le in Rundamtu Bawi Jesu Khrih hnen ihsin zangfahnak, zahngainak le hnangamdaihnak um hram seh.

Elder Tlinnak

5 Khirit tikulh ih ka lo tān tanak săn cu thu ka lo pek vekin, thil tifel thluh lo mipawl tifel dingin le khaw tin ah elder-pawl ruat dingin a si. 6 Bishop si dingah mi pakhat cu sawihnăwm kâi lo, nupi pakhat nei, a fātepawl zumtu si mi, pawisaklonak nun ah simaw, luhlulnak thu ah simaw sawisel ding um lo a si ding a si. 7 Ziangahtile Bishop cu Pathian sumkiltu a si vekin, sawihnăwm kâi lo a si tengteng ding a si. Mai thu duh, thinheng áwl, sabitzu phâm, mihrohrang, paisa duham mi a si lo ding a si. 8 Cuhnakin mikhual duhtu, thil ṭha duhtu, sūpaw thei, midingfel, mithianghlim, mah le mah thununaw thei mi a si sawn ding a si. 9 Zirh a rak si zo bangin rintlak kamsuakthu kaihngettu a si ding a si, cutin zirhnak ziktluak hmangin tha mi a pe thei ding ih, dokalhtupawl a êl thei hai ding.

Elder Ṭuanvo

10 Ziangahtile thunun harsapawl, thulolak men ṭawngtupawl le mi bumhmangpawl tampi an um, a hleicein cupawl cu serh zim tanpawl lak ihsin an si. 11 Cupawlih kâ cu huhsak tengteng ding a si, diklo zetih hlawk duh ruangah zirh lo ding mi thilpawl an zirh ih, sungkurûn in mi an siatsuah. 12 Anmai lakih mi pakhat, anmai profet rori hman in, «Khirit tikulhmipawl cu thuphan per, sahrang sual, mizê rawl phâm an si,» tiah a ti. 13 Hi theihternak cu a dik a si. Curuangah zumnak lamah an ziktluak theinak dingah, Khirit tikulhmipawl cu na zetin kawk hai aw. 14 Jew-pawlih phuahcawp thuanthupawl le thutak dungtuntu minungpawlih thupekpawl cu ngaihsak hlah. 15 Mithiangpawl hrangah cun thil ziangkim hi an thiang. Asinan mibawrhbang le zumlotu pawl hrangah cun a thiang mi zianghman a um lo. An lungthin le an sia le ṭha theihnak khal a bawrhhlawh ṭheh. 16 Pathian kan thei tiah an phuang nân, an hnaṭuannak in amah an phatsan. Annih cu Pathian huat mi tuahtu, thulung lo le hna ṭha ṭuannak tinkim ih santlailo an si.

2

Kawhhran Dik Tlinnak

1 Sikhalsehla nang cun zirhnak ziktluak thawi milaw mi thupawl sim aw: 2 cutin kum upa mipapawl cu sūpawin, mizahum, thununaw thei mi, zumnak le duhdawtnak le tuarfainak ah ziktluak dingin zirh hai aw.

3 Cutivek thothoin, kum upa nunaupawl khal mi relsiathmang lo, sabitzu phâm lo, thil ṭha zirhtu si sawnin, an nundān cu zahum zetih um dingin thape aw. 4 Cutin annih in nupinu no lai deuhpawl cu sūpaw thei dingin, an pasal duhdaw dingin, an fāte duhdaw dingin, 5 thinlung fel zet pu dingin, thianghlim dingin, innsang kilkhawitu si dingin, ṭha zetih um dingin, an pasal thu ngai dingin nun an zirh thei ding. Cutin Pathian kamsuakthu cu thangsiatin a um lo ding.

6 Cutivek thothoin, tlangvalpawl cu sūpaw dingin fawrh hai aw. 7 Thil ziangkim ah thil ṭha tuahnak in zohṭhim ding mi ah tuahaw aw; zirhnak ah na takzia, na zahumzia, na dikzia, 8 thiamlo coter theih lo na thusim ziktluak pawl langter aw. Cuticun a lo dodaltu in na thuhla ah thil ṭhalo zianghman sim ding a neih lo ruangah a ning a zak ding.

9 Sálpawl cu an bawipawlih ṭawng sawnkir loin, an thulung sawn dingin le thil ziangkim ah an lungawiter dingin fawrh hai aw. 10 In Rundamtu Pathian thuhla zirhnak cu thil ziangkim ah duhum zetih an lăngter theinak dingah, an bawipawlih thil rûksak loin rinumnak ṭha hmuahhmuah langter sawn dingin fawrh hai aw.

11 Ziangahtile rundamnak thlentu Pathian zangfahnak cu mi hmuahhmuah hnenah a rung lang zo. 12 Cuih Pathian zangfahnak cun Pathian ngaihsaklonak le khawvel câkhiarnak pawl tlansanin tulai san ah sūpaw le dingfel zet le Pathian ngaihsakih nung ding kan si ti in zirh. 13 Ruahsannak lungawium kan hngah laiah hin cutivekih nung ding kan si, cuih ruahsannak cu Pathian ropi, in Rundamtu Jesu Khrih-ih rung lăngnak sunglawi zet cu a si. 14 Anih cun dān loih nunnak hmuahhmuah sung ihsin in tlen theinak dingah le amah hnenih thenfai mi, amai mihleice, hnaṭuan ṭha hrangih ṭhahnemngai mi kan si theinak dingah kan hrangah amah le amah a peaw.

15 Hi thilpawl cu thuneihnak hmuahhmuah thawn sim aw, fawrh awla, kawk aw. Zohman in lo nautat hlah hai seh.

3

Thil Ṭha Ti

1 Uktupawl le thuneitupawl hnenah tlulut dingin, an thu ngai dingin, thil ṭha tinkim tuah dingih tiar cia dingin zumtupawl cu theihtersal hai aw. 2 Zo hnen hmanah ṭawng sia ṭawng lo le mielbuaihmang si loin, zaidam le mi hmuahhmuah hnenah nunnemnak langter sawn dingin anmah cu theihtersal hai aw.

3 Ziangahtile kanmah rori khal hi hlanah atnak ah, thulunlonak ah, bumnak ah, câkhiarnak a phunphun le năwmnak a phunphun rianin, mi dang parah lungput siava le iksiknak, huatthlala le pakhat le pakhat huaawtăwnin kan rak um dah. 4 Asinan Rundamtu Pathian-ih ngilneihnak le duhdawtnak cu minung hnenah a rung lang zo. 5 Dingfelnak hnaṭuan kan rak ṭuan mi ruangah si loin, a zahngainak zulh sawnin hrinsalnak hmangih khawlhfainak le Thlarau Thianghlim hmangih titharsalnak cun in rundam a si. 6 Cuih Thlarau Thianghlim cu in Rundamtu Jesu Khrih hmangin nasazetin kan parah Pathian in a run burh. 7 Cuticun kan ruahsan mi sankhuk nunnak zulhin ro cotu ih tuah kan si theinak dingah, a zangfahnak in thiam coter kan si. 8 Pathian rak zum zotupawl cu hnaṭuan ṭha ṭuan vivo dingin ralring hai seh, ti thu hi milai hrangah a ṭha ih a hlawk a si. Hih ṭawngkam hi rinsantlak a si. Hi thilpawl hi nasazetin phuang awla ka duh.

9 Sikhalsehla atthlak thusuhnakpawl, cithlahsâwngawknak zâwtsalnak, tawhawknakpawl le Dān thu ih elawknakpawl cu hrial aw; ziangahtile cupawl cu hlawknak um lo le ṭhathnemnak nei lo an si. 10 Ṭhenṭhekawknak tuah ṭheutu cu vei khat nunsim aw, a vei hnihnak nunsim leh awla, cuih hnu cun hnáwng aw. 11 Cutivek minung cu amah le amah thiamlo coawterin a rak fehpêng ih, thilsual a tuah a si ti nan thei.

Thucah le Cibaibûknak

12 Arṭemas asilole Ṭaikikas kha na hnenih ka rak thlah tikah, Nikopolis khua ah ka hnenah rat hramhram tum aw, ziangahtile thlatang sung cutawk ih um ka tum. 13 Dānthiam Zenas le Apollos in an khualtlawn vivo nak ah zianghman an tlaksămlonak dingah, ṭhahnemngai zetin rak bawm hai aw. 14 Cule kanmai mipawl khal in rah nei loih an umlonak dingah, ṭulpawinak ih hman dingah hnaṭuan ṭha ṭuan vivo zir hai seh.

15 Ka hnenih um hmuahhmuah in cibai an lo bûk. Zumnak ih in duhdawtupawl kha cibai in rak bûksak aw.

Nan zate hnenah zangfahnak um hram seh. Amen.