About Bible Thianghlim | ©

BibleThianghlim – THUFIM

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

THUFIM

12345678910
11121314151617181920
21222324252627282930
31

• A ngantu: Solomon (le mi dangpawl)
• Ngan kum: B.C. 971 le 931 karlak

Thufim bu cu mifim hrekkhat in ngan cia mi an lakkhawm mi a si. A tamsawn cu Solomon in a ngan (1:1; 10:1; 25:1; 1Sp 4:29-34 zoh aw), asinan hi cabu ah hin mi dang thufim khal a tel (30:1; 31:1). Thufim hin a hleicein mino, pitling lo, hmuhtawn mi nei lo pawl nun zirh ding a tumtah. Solomon in a ṭawngkam tampi ah «ka fapa» ti a hmang. Asinan kan fimnak dingih Pathian in Solomon a pek mi fimnak hi mi kip in kan zir thei.

A câng hmaisabikpawl in hi cabu-ih tumtah mi in sim: a siartu hnenih fimnak zirh dingah a si (1:2-7). Hebru ṭawngfáng ih «fimnak» ti mi cu «thil thiamnak,» asilole «titheinak» tinak a si ih, thil thiamnak phun tampi a sawhkhih thei. Thufim in «Pathian thurawnpek mi thawi milaw fimnakpawl» a uar. Thufimpawl hi khuahlan pipu ruahdān diklo le milai ruahdān menmenih ṭhumaw an si lo ti kan hmusuak. Leitlun thuhla Bible ih a rel mi theihthiamnak parah an ṭhumaw. (Ṭhimnakah, Semtirnak ihsin Dān Peksalnak sungih kan hmuh mi thutakpawl tampi Thufim cabu ah an langsal). Bible in Pathian hnen lawngin fimnak taktak a ra ti in zirh (Job 28:12, 20-23), cutin Pathian ṭihzah ding a theihngah tikah milai cu mifim taktak ah a cang (Job 28:28; Sam 111:10; Thf 1:7; 9:10). Bible ih in zirhdān ah cun, Pathian ṭihzah ti mi cu a thusim mi thungaithlakih lâk hi a si.

Thufim cabu hi a tlangpiin ṭhen hnih ih ṭhen theih a si. Bung 1 ihsin bung 9 cu nun zirhnak thu a si bik. Bung 10 ihsin bung 31 cu a tambik in tawifel zetzet ih ngan mi thufim le thu har an si. Thufimpawl cu thutiamkam an si lo (12:21), asinan nun ih kan hmuhtawn mi a tlangpiih dik mi an si. Thufimpawl cu leitlun pumpi ah milai hmuahhmuah hrangih dik ringring mi thu an si lo (10:27), a tlangpithuih dik mi lawng an si. Sikhalsehla, Pathian thuhla tarlăngnak thufimpawl cu an dik thluh ringring (15:3), ziangruangahtile Pathian in amai thuhla a phuansuah mi an si.

Miphun hmuahhmuah in anmai thufim an nei ve cio. Asinan Bible-ih thufimpawl cu Pathian phuansuahawknak parih ṭhumaw mi an si ruangah Bible lengih thufim dangpawl thawn an bangaw lo. Khua kan ruahdān ding le kan nun kan hmandān ding in bawmtu dingah Pathian thurawnpek mipawl hi Thufim cabu sungah kan hmu.

1

Fimnak Tawthawhnak

1 Israel siangpahrang, David fapa, Solomon-ih thufimpawl:

2 Fimnak le nun zirhnak thei dingah,
Theihthiamnak ṭawngkampawl theithiam dingah,
3 Fimnak, dik zetih thuṭhennak, thuṭhennak le thu lairelnak ih nun zirhnak cohlang dingah,
4 Mimâwlpawl hnenah khawruahthiamnak pe dingah,
Mino hnenah theihnak le remtheihnak pe dingah a si.
5 Mifim in hna in a thei ding ih a zirnak a karh ding,
Cule theihthiamnak neitu in thurawnpeknak fim a neingah ding,
6 Thufim le tahṭhimnak, mifim ṭawngkampawl le,
An thupawlhpawl theithiam dingah a si.
7 Jehovah ṭihzah cu theihnakih hramthăwknak a si,
Mi-âpawl cun fimnak le nun zirhnak ziang an siar lo.

Thurawn ṭhalo Ngaihsak Hlah

8 Ka fapa, na paih nun zirhnak hi ngaithla awla,
Na nuih dān tansan hlah.
9 Ziangahtile cupawl cu na lu parah ceiawknak duhnung an si ding ih,
Na hngawng hrangah ṭhi duhnung an si ding.
10 Ka fapa, misualpawl in an lo lēm asile,
Lungkimpi hai hlah.
11 Annih in, «Kan zawngah ra aw,
Thisen suah dingah mi bawh uhsi;
Săn um loin mawh nei lo mi kha a thuptein bawhthup uhsi.
12 Sheol bangin an nungcung in anmahpawl dawlh uhsi,
Cule an pumhlum in, khur thûk sungih a suk mipawl bangin;
13 Neih thilri mankhung phun zakip hmuahhmuah kan hmusuak ding ih,
Kan innpawl kha ralthillawn in kan khatter ding;
14 Kan lakah na camcawhfung zuk ve awla,
Kan zaten paisa bawm pakhat neitlang uhsi,» an lo ti asile,
15 Ka fapa, anmah zawngah lamzin ah feh hlah,
An zin ihsin na ke sūp aw;
16 Ziangahtile an ke cu thil ṭhalo lamah an tlân ih,
Thisen suah dingah an manhlap.
17 Thungaiten, ^avate pakhat khat hmuh ih sûr zar cu,
Zianghman a ṭhahnem lo;
18 Asinan annih cun anmai thisen hrangah an bawhaw ih,
Anmai nunnak hrangah an bawhthup a si.
19 Hlawknak hrangih miduhham pauhpauh ih lamzinpawl cu cuvekin a si;
Cumi cun duhhamnak neitupawlih nunnak a laksak ṭheu.

1:17^a vate: A ṭawng hrampi ah cun, «thla bawipa» ti a si (Ths 10:20 zoh aw).

Fimnak in a Ko

20 Fimnak cu lengah ringpin a au;
Mualpawl ah a aw a suah.
21 Mipi pungkhawm tambiknak hmun ah a ausuak,
Khawpikulh kăwtkapawl luhnakpawl ah a ṭawngkampawl a relsuak:
22 «Nannih mimâwlpawl, ziang tik tiang so mawlnak hi nan duh ding?
Ziang tik tiang so mihmuhsuamtupawl in an mi hmuhsuamnak ah nuam an ti ding ih,
Mi-âpawl in theihnak an huat ding?
23 Ka simhrinnak lamah hawi aw,
Ngai hnik, na parah ka thlarau ka burh ding;
Ka ṭawngkampawl ka lo theihter ding.
24 Ziangruangahtile ka rak lo ko ih nan êl,
Ka kut ka rak lo san ih, zohman in thupi ah nan ruat lo,
25 Ka thurawnpek hmuahhmuah nan ngaihsak lo ih,
Ka simhrinnak pakhat hman nan duh lo.
26 Kei khal in nan vanduainak ah ka hni ve ding;
Nan ṭihphannak a thlen tikah ka lo hnihsan ding.
27 Thlipi bangin nan ṭihphannak a thlen ih,
Phusîng bangin nan siatnak a thlen tikah,
Vansannak le thinnatnak nan parih a thlen tikah,
28 «Cun annih in in ko ding nân, ka sâng hai lo ding.
Taima zetin in hawl ding nân, in táwng lo ding.
29 Ziangruangahtile annih in theihnak an hua ih,
Jehovah ṭihzah an hril lo,
30 Ka thurawnpek pakhat hman an duh lo ih,
Ka simhrinnak hmuahhmuah ziang an siar lo.
31 Curuangah anmai nundān rah an ei ding ih,
Anmai khawkhannak in an khăwpkham ding.
32 Ziangahtile mimâwlpawl cu anmai lampialnak in a that hai ding ih,
Mi-âpawl cu anmai ngaihsamnak in a siatralter hai ding;
33 Asinan zokhal keimah i ngaithlatu cun himten a cêng ding ih,
Thil ṭhalo ṭih loin thlangamten a um ding,» tiin.

2

Fimnak Mankhunzia

1 Ka fapa, ka ṭawngkampawl na cohlang ih,
Ka thupekpawl na sungih na thuh asile,
2 Cutin fimnak lamah na hna na thawng thei ding ih,
Theihthiamnak lamah na thinlung na hmang thei ding.
3 A si, thuṭhenfelthiamnak na ko ih,
Theihthiamnak cu aw in napin na auh asile,
4 Ngun vekih amah na hawl ih,
Hlawnthil thuh mipawl vekih na zăwi asile,
5 Jehovah ṭihzahhna na theithiam ding ih,
Pathian theihnak na hmusuak ding.
6 Ziangahtile Jehovah in fimnak a pe;
Amai kâ ihsin theihnak le theihthiamnak an ra suak.
7 Mifel hrangah fimnak ziktluak a khawlsak;
Fel zetih a fehtu hrangah anih cu ralphaw a si;
8 Diknak zinpawl kha a kil ih,
A mithianghlimpawlih lamzin kha a humhim.
9 Cun dingfelnak le diknak,
Thu lairelnak le zin ṭha kip in na theithiam ding.
10 Na thinlung ih fimnak a luh ih,
Na thinlung in theihnak kha nuam a ti asile,
11 Khimkhuahnak in a lo humhim ding;
Theihthiamnak in a lo kilhim ding,
12 Thil ṭhalo lamzin ihsin lo runsuak dingah,
Thu merhkawi hmangpa hnen ihsin,
13 Lamzin thim ih feh dingah felnak zin tlansantupawl hnen ihsin;
14 Annih cu thil ṭhalo tuahnak ah lungawiaipuangin an um ih,
Misualrálih thu merhkawinak ah an nuamaw,
15 An lamzinpawl a kĕl ih,
An zinpawl a kâwi a si.
16 Nunau ṭhalo lak ihsin lo runsuak dingah,
A ṭawngkampawl ih mibumtu uirenu hnen ihsin,
17 A no laiih a kăwppi tansan in,
A Pathian thukham a hngilh.
18 Ziangahtile a inn cun thihnak ah a hruaisuk ih,
A zinpawl cun mithi hnenah;
19 A hnenih fehtu zohman an kirsal lo ih,
Nunnak zin khal an ngahsal fawn lo.
20 Cutin nang cu miṭha lamzin na zawh ding ih,
Midingfel zin na thlun ding.
21 Ziangahtile mifelpawl cu cuih ram ah an cêng ding ih,
Cumi ah sawihnăwm kâi lo pawl cu an tāng ding.
22 Asinan misualrálpawl cu leilung ihsin ṭhencat an si ding ih,
Mirinumlopawl cu cumi ihsin phăwngsuak an si ding.

3

Minopawl hrang Thupek

1 Ka fapa, ka dān hngilh hlah aw,
Cuhnakin na thinlung in ka thupekpawl thlun sawn seh.
2 Ziangahtile cupawl cun na parah nunkhaw saunak le
Damreinak le hnangamdaihnak an lo bêt ding.
3 Zahngainak le thudik cun lo tansan hlah seh;
Cupawl cu na hngawng kimvelah ngerh aw,
Na thinlung tlep ah ngan hai aw.
4 Cutin Pathian le milai mithmuhah duhsaknak le hminṭhatnak na hmu ding.
5 Na thinlung zaten Jehovah rinsan awla,
Nangmai theihthiamnak ah ṭhum aw hlah;
6 Na lamzinpawl hmuahhmuah kha a hnenah ap awla,
Amah in na zinpawl a dĭngter ding.
7 Nangmai mithmuhah fimawter hlah;
Jehovah ṭihzah awla thil ṭhalo tlansan aw.
8 Cumi cu na titsa hrangah harhdamnak a si ding ih,
Na ruhpawl hrangah cahnak a si ding.
9 Na neih mipawl le,
Na thlairah hmaisabik hmuahhmuah in Jehovah upat aw.
10 Cutin na cuampawl an khatliam ding ih,
Na sabit sawrnak khurpawl cu sabitzu thar in an khatliam ding.
11 Ka fapa, Jehovah nunsimnak kha nautat hlah awla,
A nunrĕmnak khal ning fawn hlah.
12 Ziangahtile pa in a lungsinak fapa a simhrin vekin,
Jehovah in a duhdawt mi cu a simhring a si.
13 Fimnak a táwngtu milai le,
Theihthiamnak a hmungahtu milai cu mithlawsuak a si.
14 Ziangahtile cumiih a hlawkpi mi cu ngun hlawknak hnakin le,
Cumiih a ngah mi cu sui hlirhlăng hnakin a ṭhasawn.
15 Anih cu keplungpawl hnakin a man a khungsawn ih,
Na duhthusam mi thil hmuahhmuah in amah cu an khīng thei lo.
16 A vawrh lam kut ah nunkhaw saunak a um ih,
A keh lam kut ah lennak le upatnak a um.
17 A lamzinpawl cu nunkhawnăwmnak lamzinpawl an si ih,
A zinpawl hmuahhmuah cu hnangamdaihnak an si.
18 Amah a pawkhngettupawl hrangah nunnak thingkung a si ih,
Amah a pawmbĕttu hmuahhmuah cu mithlawsuak an si.
19 Jehovah in fimnak in leilung a dĭnsuak;
Theihthiamnak in vanpawl a dĭnhnget.
20 A theihnak in thûknakpawl a khuai ih,
Van ihsin dai a tla ṭheu.
21 Ka fapa, annih in na mit suahsan hlah hai seh,
Fimnak ziktluak le remtheihnak ziktluak kha fingkhawi aw.
22 Cutin annih cu na thlarau hrangah nunnak an si ding ih,
Na hngawng hrangah ceimawinak an si ding.
23 Cun na lamzin ah himten na feh ding ih,
Na ke na sit lo ding.
24 Na zau tikah, na thla a phâng lo ding;
A si, na zau ding ih, na ihhmuh a thaw zet ding.
25 Rinloparalih ṭihnunnak in a lo thlaphângter lo ding ih,
Misualrálpawl hnen ihsin buainak a rat tik khalah a lo thlaphangter lo ding.
26 Ziangahtile Jehovah cu na lamah a ṭang ih,
Thang in na ke awkngah lo dingin a lo kilhim ding.
27 Ti theinak na neih tikah,
Băwm ṭul mipawl hrangah thil ṭha sūp hlah.
28 Cumi na neih tikah, na innhnenpa hnenah,
«Feh awla ra kirsal aw,
Cule thaisun ah ka lo pe ding,» tiah ti hlah.
29 Na innhnen parah thil ṭhalo khuakhâng hlah,
Anih cu na hnenah hnangamten a cêng a si.
30 Zianghman a lo tuahmawh lo a si ahcun,
Săn um loin mi va to hlah.
31 Minunrâwngpa iksik hlah awla,
A lamzinpawl pakhat hman hril hlah;
32 Ziangahtile thu merhkawihmang cu Jehovah hrangah fihnungza a si,
Asinan a thurawn thuthup cu mifel hnenah a um.
33 Jehovah-ih camsiatnak cu misualrálpawl inn ah a um,
Asinan midik cēnnak cu a thlawsuah.
34 Anih in mizawmtaihmangpawl cu a zawmtai hai,
Asinan mităngdawrpawl hnenah zangfahnak a pe.
35 Mifim cun ropitnak ro a co ding,
Asinan mi-â cun mualphonak a pharhsuak ding.

4

Nu le Pa ih Thurawnpek

1 Ka faletla, paih nun zirhnak cu ngaithla uhla,
Theihthiamnak thei dingah ṭhaten ngai uh.
2 Ziangahtile zirhnak ṭha ka lo pe hai a si:
Ka nun zirhnak tlansan hlah uh.
3 Ka paih fapa le,
Ka nuih mithmuhah a fapa duhnung le neihsŭn ka si laiah,
4 Anih in i rak zirh fawn ih, ka hnenah,
«Na thinlung in ka ṭawngkampawl pawmbĕt aw.
Ka thupekpawl thlun awla, nungdam aw.
5 Fimnak cu nei aw! Theihthiamnak cu nei aw!
Hngilh hlah awla, ka kamsuak ṭawngkampawl ihsin pial fawn hlah.
6 Amah cu tlansan hlah awla, anih in a lo humhim ding;
Amah cu duhdaw awla, anih in a lo kilhim ding.
7 Fimnak cu thil thupibik a si.
Curuangah fimnak cu nei aw.
Cule na neih zât hmuahhmuah in theihthiamnak nei aw.
8 Amah cu khaisâng awla, a lo khaisâng ding;
Amah na pawm tikah, anih in upatnak a lo sum ding.
9 Anih in na lu parah ceiawknak duhnung a ret ding;
Anih in lallukhum mawi a lo hlan ding,» tiah i ti.
10 Ka fapa, ka ṭawngkampawl cohlang aw,
Cule na damsung kumpawl a tam ding.
11 Fimnak lamzin ah ka lo zirh ih,
A dik mi zinpawl ah ka lo hruai.
12 Na veivah tikah na kekar buaiter an si lo ding ih,
Na tlān tikah, na bah lo ding.
13 Nun zirhnak kha fekten kai aw, fehsuakter hlah;
Amah cu kilhim aw, ziangahtile anih cu na nunnak a si.
14 Misualrálpawlih zin ah lut hlah awla,
Miṭha lo lamzin ah veivak hlah.
15 Cumi cu hrial aw, cuih zin zawh hlah;
Cuih zin cu pialsan awla, lan aw.
16 Ziangahtile annih cu thil ṭhalo an tuah lole an itthat thei lo.
Cule mi pakhat khat an tlukter lo ah cun an itthat thei lo.
17 Ziangahtile sualralnak sang an ei ih,
Nunrawnnak sabitzu an in.
18 Asinan midikpawlih zin cu khawfingcat êng vek a si,
Cumi cu sun laifang tiangin a tle sinsin.
19 Misualrálpawlih lamzin cu khawthim vek a si.
Ziang in a bahter hai ti an thei lo.
20 Ka fapa, ka ṭawngkampawl ṭhaten ngai aw.
Ka thusim mipawl ah na hna tháwng aw.
21 Cupawl cu na mithmuh ihsin fehhloter hai hlah;
Na thinlung sungah ret hai aw.
22 Ziangahtile cupawl cu a hmusuaktupawl hrangah nunnak an si ih,
An titsa hmuahhmuah hrangah harhdamnak a si.
23 Na thinlung cu ṭhahnemngainak hmuahhmuah thawn kilhim aw,
Ziangahtile cutawk ihsin nun ih thil thleng mipawl a ra suak a si.
24 Mibumhmang kâ cu na hnen ihsin hlăwnhlo awla,
Thu merhkawihmang hmurkâ kha na hnen ihsin hlapi ah ret aw.
25 Na mit in hmai lam dĭngten zoh sehla,
Na hmai lamah ding zetin hâwi seh.
26 Na zin kilkhawi ṭha awla,
Na lamzin hmuahhmuah dĭnhngeh si hai seh.
27 Vawrh lam asilole keh lamah pial hlah;
Thil ṭhalo lak ihsin na ke ṭhawn aw.

5

Uirenu Ṭih a Nunzia

1 Ka fapa, ka fimnak ṭhaten ngai aw;
Ka theihthiamnak ah na hna tháwng aw,
2 Cutin remtheihnak na humhim ding ih,
Na hmurkâ in theihnak a kilhim ding.
3 Ziangahtile nunau ṭhalo hmurkâ ihsin khuaitizu a fawr ih,
A kâ cu hriak hnakin a nâlsawn.
4 Asinan a netnakah cun cu nu cu hnîtkhâ vekin a khâ,
Ralnâm kap hnih hriam vekin a hriam.
5 A ke cu thihnak lamah a suk,
A kekarpawl in Sheol lam a pan.
6 Anih cun nunnak zin a ruat lo,
A lamzinpawl an hnget lo ih, cucu anih in a thei lo.
7 Curuangah ka faletla, atu ah i ngai hnik uhla,
Ka kamsuak ṭawngkampawl suahsan hlah uh.
8 A hnen ihsin hlapi ah na lamzin ret awla,
A inn sângka kiang va naih hlah.
9 Culole na zahumnak mi dang hnenah le,
Na dam kumpawl minunrâwng hnenah na pe pang ding.
10 Culole khawtluang mipawl cu na neihnunnak thawn an tlaiawter pang ding ih,
Na ṭuanbăngnak rahpawl cu ram dang mi inn ah a feh pang ding;
11 Na titsa le na taksaruangpum a cauh tikah,
A netnakah na hrûm ding.
12 Cule, «Ziangtin so nun zirhnak ka rak huat ih,
Ka thinlung in nunrĕmnak a rak nautat cu aw!
13 I zirhtupawlih aw ka rak ngaithla lo ih,
Keimah nun i rak zirhtupawl lamah ka hna ka rak tháwng fawn lo!
14 Mipungkhawm le mipi-umkhawm lakah,
Siatral ṭhehnak khāmtlâng ah ka um!» tiah na ti ding.
15 Nangmai tidawl ihta tidai le
Nangmai tikhur ihta ti luanglai in aw.
16 Na tihnapawl luangdarh in,
Kăwtthler ah tidai tivatepawl a luang ding maw si?
17 Cupawl cu nangmai ta lawngah si hai sehla,
Na hnenih um mikhualpawl hrangah si hlah seh.
18 Na tihna cu thlawsuahin um hram sehla,
Na no lai nupi thawn lungawiaipuangin um aw.
19 Duhumza zuknêng le duhnungza zuknêngnu vekin,
A hnawipawl in ziang tik lai cān khalah na di lo riamter seh.
Cule a duhdawtnak in lo nuamter ringring seh.
20 Cule ka fapa, ziangahso nunau ṭhalo thawi nuamawin le,
Uirenuih banpawl ih pawm ih na um ding?
21 Ziangahtile minung lamzinpawl cu Jehovah mithmuhah an um ih,
A zinpawl hmuahhmuah a zohhliah.
22 Misualrál cu amai mawhsualnakpawl in a awk ih,
Amai sualnak hripawl sungah awh a si.
23 Anih cu nun zirhnak tlaksăm ruangah a thi ding ih,
A atnak rapthlak ah a fehpêng ding.

6

Thurawn Dangdang

1 Ka fapa, na rualpi hrangah âmkhām ah na cang ih,
Mikhual hrangah tiamkamawknak na tuah asile,
2 Na kamsuak ṭawngkampawl ih awh na si ih,
Na kamsuak ṭawngkampawl ih kaih na si le,
3 Ka fapa, hihi tuah awla, nangmah le nangmah runsuakaw aw.
Ziangahtile na rualpi kut sung na thleng zo a si:
Feh awla nangmah le nangmah phahniamaw aw.
Na rualpi cu zangfah va dil aw.
4 Na mit kha itthatter hlah awla,
Na mittlângpawl khal singter hai fawn hlah.
5 Nangmah le nangmah kha ramtawipaih kut sung ihsin sakhi bangin le,
Vâte pêltu kut sung ihsin vâte bangin runsuakaw aw.
6 Nang mizāngzêl, sihte hnenah feh aw!
A lamzinpawl kha ruat awla, fim aw:
7 Anih cun hotu siseh, vilvengtu siseh, uktu siseh a nei lo.
8 A ei ding ṭhâl sungah a tawlrel ih,
Thlairawl khawm cān ah a rawl a lakhawm.
9 Maw mizāngzêl, ziang tik tiang so na ihthah ding?
Na ihthahnak ihsin ziang tikah so na thawh ding?
10 Málte sung itthatin, málte sung sing duakin,
It dingin na kut na băwm duak sungah,
11 Na farahnak cu khualtlawng mi bangin le,
Na tlaksămnak cu hriamnâm kengtupa bangin na parah an thleng ding.
12 Misantlailo, misualrálpa cu thuphan per phahin a veivak.
13 Anih cun mit mi a sĭn,
A ke in theihthiamnak a pe,
A kutzung in a khih;
14 Ngerhfetnak cu a thinlung ah a um,
Thil ṭhalo khua a khâng camcin,
Remawklonak thlaici a tuh.
15 Curuangah a vanduainak cu rinlopiin a ra thleng ding;
Tuahṭhatsal theih nawn loin rinlopiah amah cu siatter a si ding.
16 Jehovah in hi thil paruk hi a hua,
A si, pasarih cu a hrangah fihnungza an si:
17 Puarthau mithmai,
Thuphan per lei,
Mawh nei lo thisensuahtuih kut,
18 Suangtuahnak sualrál khawkhângtu thinlung,
Ṭhatlonak lamih zamrang zetih a tlân mi ke,
19 Thuphan sim theihpitu diklo le,
Unaupawl lakih remawklonak tuhtu.
20 Ka fapa, na paih thupek thlun awla,
Na nuih dān hnáwng hlah.
21 Cupawl cu na thinlung ah ṭem ringring aw,
Na hngawng ah awrh aw.
22 Na tawihvah tikah, cupawl cun an lo hruai ding;
Na ihthah tikah, cupawl cun an lo kil ding;
Cule na ṭhang tikah, cupawl cun nun an lo zirh ding.
23 Ziangahtile thupek cu meito a si ih,
Dān cu tleu a si;
Nun zirh kawkawknakpawl cu nunnak lamzin a si.
24 Nunau ṭhalo le,
Uire dangnâl nunau lak ihsin a lo kilhim ding.
25 Na thinlung ah a hmelṭhatnak kha hahio hlah awla,
A mittlângpawl khal in lo hip fawn hlah seh.
26 Hlawhhlângnu ruangah mipa pakhat cu sang car ah a cang;
Uirenu cun a hlú zet mi cuih nunnak cu a pêl.
27 Mi in a hnipuan kāng loin,
A ṭāng ah meisa a pawm thei ding maw?
28 A ke kāng loin, meiling parah mi a feh thei ding maw?
29 Cutivekin a innhnenpaih nupi ihpitu khal a si ding ih,
Cu nu a thâmtu pauhpauh cu mawh nei lo an si lo ding.
30 Fifir pakhat in a rilrawn laiah,
Amah le amah diriamawter dingin thil a fir asile, cu pa cu mi in an nautat lo.
31 Asinan amah cu hmuhsuah a si tikah, alet sarih in a rūl tengteng pei;
A inn sungih a neih mi hmuahhmuah a pek thluh a ṭul men ding.
32 Nunau pakhat thawi a uiretu pauhpauh cu theihthiamnak an tlasam a si;
Cutivekih a tuahtu cun amai nunnak a siatsuah.
33 Anih cun hriamhmapawl le hminsiatnak a ngah ding ih,
A mualphonak cu phiahhlo a si lo ding.
34 Ziangahtile thîksiatnak cu pasal thinsonak a si;
Curuangah phubalak ni ah anih cun a zuah lo ding.
35 Zangnadăwmnak zianghman a cohlang lo ding ih,
Thilpek tampi na pek hmanah a duh cuang lo ding.

7

Uirenuih Hrăwkhrawlzia

1 Ka fapa, ka ṭawngkampawl thlun awla,
Na sungah ka thupekpawl thup aw.
2 Ka thupekpawl thlun awla, nungdam aw.
Cule ka dān cu na mitmu vekin kilkhawi aw.
3 Cupawl cu na kutzungpawl ah ṭem aw;
Na thinlung tlep ah ngan hai aw.
4 Fimnak hnenah, «Nang cu ka farnu na si,» ti awla,
Theihthiamnak kha, «Ka laicin naibik,» tiin ko aw.
5 Cutin cupawl cun nunau ṭhalo lak ihsin le,
Uire dangnâlnuih ṭawngkampawl lak ihsin an lo kilhim ding.
6 Ziangahtile ka inn tukvirh ih ka kalhpaṭheng ăwng in ka zoh,
7 Cule theihthiamnak nei lo tlangval pakhat,
Mimâwlpawl lakah ka hmu,
Minopawl lakah ka theithiam,
8 Cu nuih umnak kăwtthler kĕl kiang lamah a va feh;
Cule cu nuih inn zin a zawh,
9 Khawmawt zawng, zan lam, zanṭim le thim ah a si.
10 Cule ngai hnik, nunaunu in a rak hmuak,
Hlawhhlâng thuam le hrăwkhrawlnak thinlung thawn.
11 Anih cu a aw a ring ih helhmang a si,
A ke cu inn a hlum dah lo.
12 A cān ah lengah, a cān ah mual ah,
Kil kip ah mi a bawh.
13 Cutin cu pa cu a kaingah ih a hnam. Ningzak hmel pu riai loin a hnenah:
14 «Ka hnenah remnak thawinakpawl ka nei.
Tuihni ah ka thutiampawl ka pe zo.
15 Curuangah nangmah lo táwng dingin,
Taima zetih na mithmai hawl dingin ka ra suak ih,
Ka lo hmungah a si.
16 Ka ihkhun kha ihphah khuh puan mawite ka phah zo,
Izip ram ih cawih mi puan nem páte thawn.
17 Ka ihkhun cu mura, aloe le thingthak rimhmui ka theh zo.
18 Ra aw, zing lam tiangin duhdawtnak kan cēn pei;
Duhdawtnak in kan nuamaw pei.
19 Ziangahtile inn ah ka pasal a um lo;
Khual hlapi ah a tlâwng;
20 Paisa dip a keng ih,
Thla thūl ni ah inn a ra tlung ding,» tiah a ti.
21 A thusimthiamnak in a lēmngah,
A kamnālnak in a bumngah.
22 A thattu hnenih câwcang a feh vekin le,
Nunrĕmnak kăwl lamih mi-â a feh vekin,
23 Thálfung in a thin a suntlăng tiangin anih in cu nu cu a thlun.
Vâte in tháng lamih a hmanhmawh vekin,
Cu pa cun amai nunnak a hloh ding ti a rak thei lo.
24 Curuangah atu ah ka faletla, i ngai hnik uh;
Ka kamsuak ṭawngkampawl ṭhaten ngai uh:
25 Cu nuih lamzinpawl ah nan thinlung pialter hlah uh,
A zinpawl ah pial hlah uh;
26 Ziangahtile hriamhma pu ko mi tampi a hlăwnthluk ih,
Cu nuih thah mipawl cu tamtak an si.
27 Cu nuih inn cu Sheol lamzin a si,
Thihnak pindanpawl lamah a suk.

8

Fimnak Thilpekpawl

1 Fimnak cun ausuakin,
Theihthiamnak cun a aw a suah a si lo maw?
2 Hmun sângbik ah le,
Zinpawl tawnawknak lamzin kapah a ding.
3 Kulh kăwtkapawl kiang, khawpi luhnak ah,
Sângkapawl luhnak ah anih cu a ausuak:
4 «Maw minungpawl, nanmah ka lo ko ih,
Ka aw cu minung fapapawl hnenah a si.
5 Maw nannih mimâwlpawl, khawruahthiamnak theithiam uhla,
Maw nannih mi-âpawl, theihthiamnak thinlung nei uh.
6 Ngai hnik uh, ziangahtile thil ṭha hleicepawl ka rel ding ih,
Ka kâ ka annak in thildikpawl an ra suak ding.
7 Ziangahtile ka kâ in thudik a rel ding;
Sualralnak cu ka hmurkâ hrangah fihnungza a si.
8 Ka kâ ih a suak mi ṭawngkam hmuahhmuah cu an dik a si;
Amah ah kawinak le khêrmēinak zianghman a um lo.
9 Cupawl cu a theithiamtuih hrangah cun thutluang hlir an si ih,
Theihnak hmusuaktuih hrangah cun thildik a si.
10 Ngun si loin, ka nun zirhnak hi cohlang aw,
Cule sui ṭha hnakin theihnak;
11 Ziangahtile fimnak cu lung mankhung senpawl hnakin a ṭhasawn ih,
Cumi cu duhthusam thil hmuahhmuah thaw khalih khaikhin theih a si lo.
12 Kei, fimnak cu khawruahthiamnak thawn kan cêngtlang ih,
Theihnak le remtheihnak ka hmungah.
13 Jehovah ṭihzah cu thil ṭhalo huat hi a si;
Hngalnak le duhawknak le lamzin ṭhalo le ṭawng khêrmei pawl cu ka hua a si.
14 Thurawnpeknak le fimnak ziktluak cu keimai ta a si.
Keimah cu theihthiamnak ka si,
Kei cun cahnak ka nei.
15 Siangpahrangpawl in keimah ruangah an uk ih,
Uktupawl in diknak in thu an relcat.
16 Uktupawl le ṭihzah tlakpawl in keimah ruangah an uk,
Leilung tlun thuṭhentu hmuahhmuah khal in.
17 Keimah i duhdawtu ka duhdaw ih,
Taima zetih i hawltupawl cun in hmu ding.
18 Lennak le upatnak cu ka hnenah a um,
Rei a daih mi lennak le dingfelnak thawn.
19 Ka rahsuah cu sui hnakin a ṭhasawn, a si, sui hlirhlăng hnakin le,
Ka ṭuansuah cu ngun ṭha hnakin.
20 Dingfelnak lamzin ka zawh,
Diknak zin cu,
21 Cutin keimah i duhdawtupawl cu ro ka coter hai ding,
An hlawnthil retnakpawl ka khatter ding.

Fimnak Thawhkehnak

22 «Hnaṭuan a thawhtirah Jehovah ta ka rak si,
Khuahlan ih a hnaṭuanpawl hlanah.
23 Catuan ihsin dĭnhngeh ka rak si,
Leilung a rak um hlan, a hramthăwk ihsin.
24 Tipithuanthumpawl an um hlanah, keimah cu hrin ka si,
Tihnapawl ah ti an khahliam hlanah.
25 Tlangpawl dĭn an si hlan,
Tlangmualpawl dĭn an si hlanah, keimah cu hrin ka rak si;
26 Leilung le ramlakpawl a rak tuah hlan,
Leitlun ih leivut hmaisabik a rak tuah hlanah.
27 Vanpawl a timtuah laiah ka rak um,
Tipithuanthum vangdâp parah kūalpûm um dingih thu a pek laiah.
28 Vanpawl a rak dĭn laiah,
Tipithuanthum hnapawl a rak hngehter laiah,
29 Tipi in a thupek an rak pahbăllonak dingah,
Tipithuanthum ri a ṭhen lai le,
Leilung ṭohrampawl a rak hminsin laiah,
30 Kei cu zungthiam bang a kiangah ka rak um.
Cule keimah cu a ni tin năwmawknak ka si,
A hmaiah ka aipuang camcin,
31 Leitlun, amai leilung ah aipuangin ka um ih,
Ka năwmawknak cu milai fātepawl hnenah a si.
32 Curuangah atu ah, faletla, i ngai hnik uh,
Ziangahtile ka lamzin a thluntupawl cu mithlawsuak an si.
33 Nun zirhnak ngaithla awla, fim aw,
Cule cumi cu zohnîam hlah.
34 I ngaithlatu cu mithlawsuak a si,
Ni tin ka kulh kăwtkapawl ah a thlir,
Ka sângka banpawl ah a hngak.
35 Ziangahtile zokhal keimah i hmusuaktu cun nunnak a hmusuak ih,
Jehovah hnen ihsin duhsaknak a congah.
36 Asinan keimah dokalhih thilsual a tuahtu cun amai nunnak a siatsuah a si;
Keimah i huatu hmuahhmuah cu thihnak duh an si.»

9

Fimnak ih Sawmnak

1 Fimnak in a inn a sak,

Anih in amai ṭhuam pasarih a phun.
2 Amai ṭilvapawl a rak that,
A sabitzu a rawi,
A cabuai khal a ret cia.
3 A falapawl a thlah,
Khawpi hmun sângbikpawl ihsin a ausuak,
4 «Mimâwl pauhpauh, hi tawkah pial hai seh!» tiin.
Theihthiamnak tlasampa hrangah, anih in a hnenah hitin a ti,
5 «Ra aw, ka sang ei awla,
Ka rawi cia mi ka sabitzu in aw.
6 Atnak kha tlansan awla, nungdam aw,
Cule theihthiamnak lamzin ah feh aw.
7 Mi hnihsanhmang nun zirhtu cun amai ningzahnak a hmu,
Cule misualrálpa kawktu cu amah le amah a tuahmawhaw a si.
8 Mi hnihsanhmang nunrĕm hlah, a lo hua pang ding.
Mifimpa kawk awla, a lo duhdawt ding.
9 Mifimpa hnenah nun zirhnak pe awla, a fim sinsin ding.
Midikpa zirh awla, zirnak lamah a ṭhang ding.
10 Jehovah ṭihzah cu fimnakih hramthăwknak a si ih,
Mi Thianghlim theihnak cu theihthiamnak a si.
11 Ziangahtile keimah ruangah na damsung ni a sau ding ih,
Damkumpawl bêt na si ding.
12 Na fim asile, nangmai hrangih fim na si ih,
Mi na hnihsan asile, nangmah lawng in cumi cu na tuar ding,» tiin.

Nunau Â

13 Nunau â cu a aukio;
Anih cu a mâwl ih, zianghman a thei lo.
14 Ziangahtile anih cu a inn sângka ah a to,
Khawpi hmun sângbikpawl kiangih tonak ah,
15 Lamzin ih dĭng teih a fehtu,
Amah lantupawl ko dingah:
16 «Mimâwl pauhpauh, hi tawkah pial hai seh,» tiin;
Cule theihthiamnak tlasampa hrangah cun, anih in a hnenah,
17 «Fir mi tidai cu a thlum ih,
A thupteih ei mi sang cu a thaw,» tiah a ti.
18 Asinan cu tawkah mithipawl an um ti le,
A mikhualpawl Sheol thûknakpawl ah an um ti a thei lo.

10

Solomon Thufimpawl

1 Solomon-ih thufimpawl:

Fapa fim in a pa a lungawiter,
Asinan fapa â cu a nuih thinnatnak a si.
2 Sualralnak khawlkhawmnak in zianghman hlawknak a thlĕn lo,
Asinan dingfelnak cun thihnak ihsin a runsuak.
3 Jehovah in midingfel cu rilrawn a siang lo ding,
Asinan misualrálpawlih saduhthah cu a hlăwnhlohsak.
4 Kut zangzel a nei mi cu mifarah ah a cang,
Asinan mitaima kut cun a lianter.
5 Ṭhal laiih thlairawl khâwmtu cu fapa fim a si;
Thlairawl khâwm cān ih a itthattu cu ningzahnak thlentu fapa a si.
6 Thlawsuahpawl cu midingfel lu parah an um,
Asinan misualrálpawl kâ in nunrawnnak a thup.
7 Midingfelih cīnken theinak cu malsawmnak a si,
Asinan misualrálpawlih hmin cu a răwpral ding.
8 Thinlung fim cun thupekpawl a cohlang ding,
Asinan mi-â ṭawng tam cu a tlu ding.
9 Felfaiteih a fehtu cu ralmuangten a feh,
Asinan lamzin kâwi zawhtu cu theihsuah a si ding.
10 Mit misĭntu cun buainak a suakter,
Asinan mi-â ṭawng tam cu a tlu ding.
11 Midingfel kâ cu nunnak tihna a si,
Asinan misualrálpawlih kâ cu nunrawnnak in a hup.
12 Huatawknak in tawhawknak a căwktho,
Asinan duhdawtnak cun sual hmuahhmuah a khuh.
13 Fimnak cu theithiamnak a neitupaih hmurkâ ah hmuhsuah a si,
Asinan fungfek cu theihthiamnak nei lo tupaih zāng hrangah a si.
14 Mifimpawl in theihnak an khawlkhawm,
Asinan mi-â kâ cu siatralnak kiangah a um.
15 Milianpaih neihnunnak cu amai kulhhnget a si;
Mifarahpawl siatralnak cu anmai farahnak a si.
16 Midingfelih ṭuanbăngnak cun nunnak a thlĕn,
Misualrálih hlawhman cun hremnak.
17 Nun zirhnak a thluntu cu nunnak lamzin ah a um,
Asinan nunrĕmnak a êltu cu a fehpêng.
18 Zokhal huatnak a thuptu in thuphan per hmurkâ a nei ih,
Zokhal mi relsiatnak a thehdarhtu cu mi-â a si.
19 Ṭawngkam tamnak ah sual a tlasam lo,
Asinan a hmurkâ a sūptu cu mifim a si.
20 Midingfel lei cu ngun ṭha a si. Misualrálpawlih thinlung cu a santlai lo.
21 Midingfel hmurkâ in mi tampi a câwm,
Asinan mi-âpawl cu fimnak tlaksăm ruangah an thi.
22 Jehovah-ih thlawsuah in mi a lianter ih,
Cumi ah riahsiatnak a bêt lo.
23 Thil ṭhalo tuah cu mi-â năwmnak a si,
Cuvekin fimnak cu theihthiamnak neitupa hrangah a si ve.
24 Misualrálih ṭihnak cu amai parah a thleng ding ih,
Midingfelih saduhthah cu pek a si ding.
25 Phusîng a hran tikah, misualrál a hrănhlo,
Asinan midingfel cun catuan lungphum a nei.
26 Ha hrangih sabit ti thûr le mit hrangih meikhu vekin,
Amah thlahtupawl hrangah mizāngzêlpa khal a si ve.
27 Jehovah ṭihzahnak in damsung ni a sauter,
Asinan misualrálih kumpawl cu tawiter a si ding.
28 Midingfelih ruahsannak cu lungawinak a si ding,
Asinan misualrálih beiseinak cu a hlorál ding.
29 Jehovah lamzin cu mifel hrangah cahnak a si,
Asinan mawhsualnak tuahtupawl hrangah siatralnak a thleng ding.
30 Midingfel cu hninter a si dah lo ding,
Asinan misualrálpawl cun leilung an luah lo ding.
31 Midingfel kâ in fimnak a suah,
Asinan bumkâwihmang lei cu tan a si ding.
32 Midingfelih hmurkâ in cohlantlak ziang a si ti a thei,
Asinan misualrálpawlih kâ cun bumkawihmang ziang a si ti a thei.

11

1 Cuailung diklo cu Jehovah hrangah fihnungza a si,
Asinan cuailung dik cu a lungsinak a si.
2 Hngalnak a rat tikah, ningzahnak a ra ve;
Asinan mităngdawrpawl hnenah cun fimnak.
3 Mifelpawlih felfainak in anmah cu lam a hmuh hai ding,
Asinan mirinumlopawlih bumkawinak cun anmah a hlorálter ding.
4 Thinling ni ah cun lennak in ṭhathnemnak a nei lo,
Asinan dingfelnak cun thihnak ihsin a runsuak.
5 Sawihnăwm kâi lo dingfelnak in a lamzin kha diktein a khihhmuh ding,
Asinan misualrál cu amai sualralnak in a tlu ding.
6 Mifel dingfelnak in amah a runsuak ding,
Asinan mirinumlopawl cu anmai câkhiarnak in awh an si ding.
7 Misualrálpa a thih tikah, a beiseinak a hlorál ding ih,
Midik lo pawlih ruahsannak khal a hlorál ve.
8 Midingfel cu buainak ihsin runsuak a si,
Cule misualrál in a airawl ding.
9 Midepde cun a kâ in a innhnen a hlorálter,
Asinan midingfel cu theihnak hmangin runsuah a si ding.
10 Midingfel a lam a tluan tikah, khawpi a ai a puang.
Cule misualrál a hlohral tikah, aipuan aunak a um.
11 Mifelpawl thlawsuah an dăwn ruangah khawpi khaisanin a um,
Asinan misualrálpawlih kâ ruangah khawpi a siatbăl.
12 Fimnak nei lo mi in a innhnen a nautat,
Asinan theihthiamnak neitupa cu daiten a um.
13 Kam tam vahhmang in thuthuppawl a phuangsuak,
Asinan thinlung rinum cun thuhla a thup.
14 Thurawnpek umlonak ah, mipi an tlu.
Asinan thurawnpetu tamnak ah runsuahnak a um.
15 Ram dang mi hrangih âmkhām ih tuahawtu cun a tuar ding,
Asinan âmkhāmnak a huatu cu a him ding.
16 Nunau nunnem in upatnak a co,
Asinan mirămhmangpawl cun lennak an co.
17 Zahngai theitupa in amai hrangah thil ṭha a tuah,
Asinan minunrâwng cun amah le amah a tuahmawhaw.
18 Misualrálpa in diklo zetin hlawh a la,
Asinan dingfelnak a tuhtu cun lawmman taktak a ngah ding.
19 Dingfelnak dik in nunnak lamah a hruai ih,
Thil ṭhalo a dawitu cun amai thihnak dingah a dawi.
20 Thinlung kâwipawl cu Jehovah hrangah fihnungza an si,
Asinan sawihnăwm kâi loih fehpawl cu a lungsinak an si.
21 Thungaiten, misualrálpawl cu hrem loin an lan lo ding.
Asinan midingfelpawlih tesinfapawl cu runsuah an si ding.
22 Nunau duhum remtheihnak tlasam cu văwk hnar ih sui hnarkhaih vek a si.
23 Midingfelpawlih saduhthah cu a ṭha hlir a si,
Asinan misualrálpawlih beiseinak cu thinlingnak a si.
24 A thehdarh nân, lian deuhdeuh mi a um;
Cule a pek ding awm zât pe lo ih,
Farah deuhdeuh mi a um.
25 Mitirhsiang cu lenter a si ding ih,
Tidai tawihtu cu amah khal tăwih a si ve ding.
26 Thlairawl a sūpbĕttu cu mipi in an camsiat ding,
Asinan a zuartuih lu parah cun thlawsuahnak a um ding.
27 Thil ṭha ṭhahnemngai zetih a hawltu in duhsaknak a hmusuak ding,
Asinan thil ṭhalo a hawltupa hnenah cun thil ṭhalo a thleng ding.
28 A lennak a rinsantu cu a tlu ding,
Asinan midingfel cu hnah hring bangin a hning ding.
29 Amai sungkua a buaitertu cu ro ah thli a co ding ih,
Mi-â cu mifim siahhlawh a si ding.
30 Midingfelih rah cu nunnak thingkung a si,
Cule thlarau kaitu cu mifim a si.
31 Midingfel hman leilung parah lehrulh a si ahcun,
Pathian ngaihsak lo le misual cu ziang tlukin a nasa sinsin ding!

12

1 Nun zirhnak a duhtu pauhpauh cun theihnak an duh,
Asinan nunrĕmnak a huatu cu micŭt a si.
2 Miṭha in Jehovah hnen ihsin duhsaknak a ngah,
Asinan misualrálpa ih khawkhannak cu a dĕm ding.
3 Milai cu sualralnak hmangih dĭnsuah a si lo,
Asinan midingfelih hram cu ṭhawn theih a si lo ding.
4 Nupi ṭhaṭhum cu a pasalih lallukhum a si,
Asinan ningzahnak a suahtertu cu a pasal ruh sungih măwtnak bangtuk a si.
5 Midingfelpawlih ruahnak cu a dik,
Asinan misualrálpawlih thurawnpek mipawl cu bumnak an si.
6 Misualrálpawlih ṭawngkampawl cun thisen suah dingin an bawh,
Asinan mifelih kâ in anmah a runsuak ding.
7 Misualrálpawl cu namthluk an si ih an hlo,
Asinan midingfelih inn cu a ding ding.
8 Minung cu a fimnak zulhin fak a si ding,
Asinan thinlung kâwi cu nautat a si ding.
9 Mah le mah upataw rero naih rawl tlaksăm hnakin,
Ziang an siar lo mi siahhlawh neitu a ṭhasawn.
10 Midingfel in a ṭilva nunnak a ngaihsak,
Asinan misualrálpawlih lainatnak cu a siava.
11 Amai ló a lettu cun rawl khăwpkham a ngah ding,
Asinan thulolak thil a thluntu cu theihthiamnak nei lo a si.
12 Misualrál in miṭha lopawlih thil awh mi a daw,
Asinan midingfelih hram cun rah a suah.
13 Misualrál cu amai ṭawngkam sual in a awk,
Asinan midingfel cun buainak a pahtlăng ding.
14 Minung cu amai kamsuak rah hmangin thil ṭha in a di a riam ding,
Cule minung kut ih ṭuansuah mi cu a hnenah a kirsal ding.
15 Mi-â lamzin cu amai mithmuhah cun a dik,
Asinan thurawnpek ngaithlatu cu mifim a si.
16 Mi-â thinlingnak cu hmakhatteah theih a si,
Asinan mifim cun ningzahnak a hupbĕt.
17 Thudik simtu in diknak a than,
Asinan theihpitu diklo cun mi a bum.
18 Ralnâm sŭn bangih ṭawng zutzotu a um,
Asinan mifim lei cun harhdamnak a pe.
19 Thudik sim hmur cu kumkhuain a dinghnget ding,
Asinan thuphan sim lei cu camkhatte hrang a si.
20 Thil ṭhalo a suangtuahtupawlih thinlung ah bumnak a um,
Asinan remdaihnak thurawnpetupawl cun aipuannak an nei.
21 Midingfel parah thil ṭhalo a thleng dah lo ding,
Asinan misualrálpawl cu thil ṭhalo in an khat ding.
22 Thuphan sim hmur cu Jehovah hrangah fihnungza a si,
Asinan dik zetih thil titupawl cu a lungsinak a si.
23 Khawruatthiam milai in theihnak a thup,
Asinan mi-âpawlih thinlung cun atnak a phuang.
24 Mitaima kut in a uk ding,
Asinan mizāngzêl cu hranhramin hna ṭuanter a si ding.
25 Milai thinlung sungih dawnharnak in nguicăuhnak a thlĕn,
Asinan ṭawngkam thlum cun thinlung a lungawiter.
26 Midingfel in a rualpi ding fimkhur zetin a hril,
Ziangahtile misualrálpawlih lamzin cun anmah a hruaipêng ṭheu.
27 Mizāngzêl cun ramtawihnak ih a ngah mi sa a rawh lo,
Asinan taimaknak cu milaiih neih mi thil hlú a si.
28 Dingfelnak lamzin ah nunnak a um ih,
Cuih zintluan ah thihnak a um lo.

13

1 Fapa fim cun a paih nun zirhnak a ngaithla,
Asinan mi hnihsanhmang cun kawknak a ngaithla lo.
2 Minung cu a kâ rah ihsin thil ṭha a ei ding,
Asinan mirinum lo cun buainak a duh.
3 A kâ a kiltu cu a nunnak a humhim a si,
Asinan hmurkâ kāu zetih a ângtu cun siatralnak a táwng ding.
4 Mizāngzêl thinlung cun saduh a that ih, zianghman a nei lo;
Asinan mitaima thinlung cu tlăiter a si ding.
5 Midingfel cun thuphan per a hua,
Asinan misualrál cu luaksuakza a si ih, ningzahnak ah a thleng ding.
6 Dingfelnak in sawihnăwm kâi lo paih lamzin a kil,
Asinan sualralnak cun misual a nâmtlu.
7 Mah le mah milian tiaw naih, zianghman nei lo a um;
Cule mah le mah mifarah tiaw naih, nasatakih lian a um.
8 Milai nunnak tlennak cu amai lennak hi a si,
Asinan mifarah cun hrinhronak a táwng lo.
9 Midingfelpawlih tleu cu tle zetin a tleu,
Asinan misualrálpawlih meito cu a mit ding.
10 Hngalnak in tawhawknak siarlo zianghman a suah lo,
Asinan thurawn dawngtupawl cun fimnak an nei.
11 Diklo zetih ngah mi neihnunnak cu a zâwr vivo ding,
Asinan ṭuanbăngnak ihsi a khāwltuih neihnunnak cu a pungṭhang ding.
12 Ruahsan mi thleng tlai cun thinlung damlonak a thlĕn,
Asinan saduhthah kim cu nunnak thingkung vek a si.
13 Kamsuakthu zianghman siar lo tu cu hlohralter a si ding,
Asinan thupek ṭihzahtu cu lawmman pek a si ding.
14 Thihnak tháng ihsin mi luatter dingin,
Mifimih zirhnak cu nunnak tihna a si.
15 Theihthiamnak ṭha in duhsaknak a co,
Asinan rinumlonak lamzin cu a har.
16 Khawruatthiam mi kip in theihnak thawn an cāngvāi,
Asinan mi-â cun a atzia a phawrhsuak.
17 Misualrál palai cu buainak sungah a tla,
Asinan rinsantlak aiawh palai in harhdamnak a thlĕn.
18 Nunrĕmnak ngaihsak lo tu parah farahnak le ningzahnak a thleng ding,
Asinan simhrinnak ngaihsaktu cu upat a hlawh ding.
19 Saduhthah tlamtlin cu thinlung hrangah a thlum,
Asinan thil ṭhalo suahsan cu mi-âpawl hrangah fihnungza a si.
20 Mifimpawl thawi kawmawtu cu a fim ding,
Asinan mi-â va hawipitu cu a hlorál ding.
21 Vansiatnak in misualpawl a dûm,
Asinan midingfelpawl hnenah cun thil ṭha pek a si ding.
22 Miṭha in a fātepawlih falepawl hrangah ro a tăn,
Asinan misual neihnunnak cu midingfel hrangah khawlkhâwm a si.
23 Mifarah ló ah rawl tampi a um ih,
Diknak tlaksăm ruangah kawlawngnak a um.
24 A fungfek a sūptu cun a fapa a hua,
Asinan amah a duhdawtu cun taima zetin a thunun.
25 Midingfel cun a diriam ko ei ding a nei,
Asinan misualrál pum cu a tlasam ding.

14

1 Nunau fim in a inn a sak,
Asinan nunau â cun amai kut in a ṭhiatbăl.
2 Fel zetih a fehtu in Jehovah a ṭihzah,
Asinan amai lamzinpawl ih fehpêngtu cun Jehovah a nautat a si.
3 ^aMi-â kâ ah hngalnak fungfek a um,
Asinan mifimpawlih ṭawngkam cun anmah a humhim hai ding.
4 Câwcangpawl umlonak ah cun, rankhēng a fai.
Asinan câwcang cahnak hmangin paṭhatnak a ra.
5 Theihpitu rinum cun thuphan a per lo,
Asinan theihpitu diklo cun thuphan a per.
6 Mi zohniamtu cun fimnak a hawl nân, a táwng lo,
Asinan theihnak cu a theithiamtu hrangah cun thil ăwlte a si.
7 Mi-âpaih hmaikâ ihsin tlân aw,
Culole fimnak thu na thei lo ding.
8 Khawruatthiamih fimnak cu a fehnak ding theihthiam hi a si,
Asinan mi-âpawlih atnak cu bumawknak a si.
9 Mi-âpawl in sual an hnihsan,
Asinan mifelpawl lakah cun ^bduhsaknak a um.
10 Thinlung in amai siatkhâtnak a thei ih,
Mi dang cun amai aipuannak cu an ṭawmpi ve lo.
11 Misualrálpawlih inn cu ṭhiahbăl a si ding,
Asinan mifelpawlih puanthlam cu ṭhaten a um ding.
12 Milai hrangih dik vekih lang lamzin a um,
Asinan a netnak cu thihnak lamzin a si.
13 Hnih lai hmanah thinlung a riahsia thei ih,
Hlimnak a cem tikah thinnatnak a um thei.
14 Thinlung dungtawlh cu amai ruahdān in a khat ding,
Asinan miṭhapa cu amai neih mi ah a lungawi tawk ding.
15 Mimâwl cun ṭawngkam tinkim a zum,
Asinan khawruatthiam cun a fehnak ṭhaten a zoh.
16 Mifim in thil ṭhalo a ṭih ih a tlansan,
Asinan mi-â cu a luhlul ih amah le amah a rinsanaw.
17 Mithintawi cu atthlak zetin a cāngvāi ih,
Misualrálpaih khawkhannak cu huat a si.
18 Mimâwlpawl cun ro ah atnak an co,
Asinan khawruatthiampawl cu theihnak lallukhum khumter an si.
19 Miṭha lo pawl cu miṭhapawl hmaiah an kûn ding ih,
Misualrálpawl cu midingfel kăwtkapawl ah.
20 Mifarah cu amai innhnen hman in an hua,
Asinan milian cu mi tampi in an duhdawt.
21 A innhnen nautattu cu sual a tuah a si.
Asinan mifarah parih zahngainak neitu cu mithlawsuak a si.
22 Thil ṭhalo khawkhângtupawl cu an fehpêng a si lo maw?
Asinan zahngainak le thudik cu thil ṭha khawkhângtuih ta a si.
23 Ṭuanbăngnak hmuahhmuah ah hlawknak a um,
Asinan ṭawng menmen nak cun farahnak a thlĕn.
24 Mifimpawlih lallukhum cu an lennak hi a si,
Asinan mi-âpawlih atnak cu at hi a si.
25 Theihpitu dik in nunnak a runsuak,
Asinan mibumhmang theihpitu cun thuphan a sim.
26 Jehovah ṭihzahnak ah rinsanawknak hnget a um ih,
A falepawl in răwlhimnak hmun an nei ding.
27 Thihnak thangpawl ihsin mi tlânsuakter dingah,
Jehovah ṭihzahnak cu nunnak tihna a si.
28 Mipi tampi cu siangpahrang ropitnak a si,
Asinan mipi tlaksăm cu uktu tlakniamnak a si.
29 Mithinfûal in theihthiamnak nasatak a nei,
Asinan mithintâwi cun atnak a cawisâng.
30 A hahdam mi thinlung cu taksa nunnak a si,
Asinan iksiknak cu ruhpawl hrangah măwtnak a si.
31 Mifarah palbĕttu cu amah Sersiamtu a nautat a si,
Asinan amah upattu cun miṭulsam parah zahngainak a nei.
32 Misualrál cu amai sualralnak ah tlukter a si,
Asinan midingfel cun a thihnak ah răwlhimnak a nei.
33 Fimnak cu theihthiamnak neituih thinlung ah a um,
Asinan mi-âpawl thinlung sungih a um mi cu phuanlăng a si.
34 Dingfelnak in miphun a cawisâng,
Asinan sualnak cu mi kip mualphonak a si.
35 Siangpahrang in a fim mi siahhlawh a duhsak,
Asinan ningzahnak suahtertuih parah cun a thinlingnak a um.

14:3^a Mi-â kâ ah hngalnak fungfek a um: «A duh duhih mi-â a ṭawngnak in a zāng hrangah fungfek a thlĕn,» tinak a si.

14:9^b duhsaknak: Pathian duhsaknak a si.

15

1 Thulehnak nēm in thinlingnak a daiter,
Asinan ṭawngkam khâ cun thinhengnak a căwktho.
2 Mifim lei in dik zetin theihnak a hmang,
Asinan mi-âpawlih kâ cun atnak a phûtsuak.
3 Jehovah mit cu hmun kip ah a um,
Miṭha lo le miṭha a zoh ringring.
4 ^aLei zaidam cu nunnak thingkung a si,
Asinan merhkawihmang lei cun thinlung a kûaiter.
5 Mi-â in a paih nun zirhnak a nautat,
Asinan nunrĕmnak cohlangtu cu mifim a si.
6 Midingfel inn ah hlawnthil tampi a um,
Asinan misualrálih ṭuansuah mi ah buainak a um.
7 Mifimpawlih hmurkâ in theihnak an thehdarh,
Asinan mi-âpawlih thinlung cun cuvekin an tuah lo.
8 Misualrálpawlih raithawinak cu Jehovah hrangah fihnungza a si,
Asinan mifelpawlih thlacamnak cu a lungsinak a si.
9 Misualrál lamzin cu Jehovah hrangah fihnungza a si,
Asinan anih cun dingfelnak dawitu a duhdawt.
10 Thununnak khoh cu zin dik tlansantu hrangah a si ih,
Nunrĕmnak a huatu cu a thi ding.
11 Sheol le ^bAbaddon cu Jehovah hmaiah an um.
Minung fapapawlih thinlung cu ziang tlukin a si sinsin pei.
12 Mi hnihsanhmang cun amah nunrĕmtu a duh lo ih,
Mifim hnen khalah a feh fawn lo ding.
13 A hlipár mi thinlung in mithmai a panter,
Asinan thinlung riahsiatnak ruangah lungthin a kûai.
14 Mifim thinlung in theihnak a hawl,
Asinan mi-âpawlih kâ cu atnak in a câwmaw.
15 Mizawnzaipawlih damsung ni hmuahhmuah cu an ṭha lo,
Asinan thinlung hlipár a neitu cun tlaitluanin ruai a nei.
16 Buainak thawi hlawnthil tampi hnakin,
Jehovah ṭihzahnak thawi thil málte a ṭhasawn.
17 Huatnak thawi cawmthau câwno ei hnakin,
Duhdawtnak umnak ih hanghnahhangrah zanriah ei a ṭhasawn.
18 Mithintâwipa in tawhawknak a căwktho,
Asinan thinfûal cun remawklonak a daiter.
19 Mizāngzêl lamzin cu hling hruang bangtuk a si,
Asinan mifel lamzin cu zinpi a si.
20 Fapa fim in a pa a lungawiter,
Asinan mi-â cun a nu a hmuhsuam.
21 Thuṭhenfelthiamnak nei lo tu hrangah cun atnak hi a aipuannak a si,
Asinan theihthiamnak neitupa cu zin dik ah a feh.
22 Thurawnpeknak um lo cun, tumtahnakpawl an hlawhsam,
Asinan thurawnpetu tamnak ah cupawl cu dĭnhngeh an si.
23 A kâ ih dik zetih thu a lehnak ah milai in aipuannak a nei,
A tikcu teih ṭawngsuak mi ṭawngkam cu ziang tlukin so a ṭha!
24 Hnuaiih um Sheol a pialsan theinak dingah,
Nunnak lamzin cu mifim hrangah tlun lamah a um.
25 Jehovah in mipuarthau inn a ṭhiatbăl ding,
Asinan nuhmei ramri cu a hngetter ding.
26 Misualrálpawlih ruahnak cu Jehovah hrangah fihnungza an si,
Asinan ṭawngkam thlumpawl cu an thiangfai.
27 Hlawknak diklo hrangih duhamtu cun amai sungkua a buaiter,
Asinan nawhthuh huatu cu a nung ding.
28 Midingfel thinlung cun ziangtiih thuleh ding ti a ruat,
Asinan misualrál kâ cun thil ṭhalo a phûtsuak.
29 Jehovah cu misualrálpawl hnen ihsin a hla,
Asinan midingfelpawlih thlacamnak cu a thei.
30 Mithmai pan in thinlung a aipuangter ih,
A ṭha mi thuthang in ruhpawl a harhdamter.
31 Nunnak hrangih kawknak theitu hna cu mifimpawl lakah a cêng ding.
32 Nun zirhnak zohnîamtu cun amah le amah a nautataw a si,
Asinan kawknak a ngaithlatu cun theihthiamnak a ngah a si.
33 Jehovah ṭihzah cu fimnak nun zirhnak a si ih,
Upatnak hlanah tăngdawrnak a um.

15:4^a Lei zaidam: A ṭawng hrampi ah, «lei dam» ti a si.

15:11^b Abaddon: Siatralnak.

16

1 Thinlung timlamawknak cu minung ta a si,
Asinan thulehnak ṭawngkam cu Jehovah hnen ihsin a si.
2 Milai lamzin hmuahhmuah cu amai mithmuhah cun an thiang ṭheh,
Asinan Jehovah in thinlung cuai a thlai.
3 Jehovah hnenah na hnaṭuanpawl ap awla,
Na ruahnakpawl dĭnhngeh an si ding.
4 Jehovah in amai hrangah thil hmuahhmuah hi a tuah,
A si, misualrál tiangin ni ṭhalo hrangah.
5 Thinlung ih mipuarthau pauhpauh cu Jehovah hrangah fihnungza an si.
Thungaiten, hrem loin zohman an lan lo ding.
6 Zahngainak le thudik ah mawhsualnak cu sualkhuhthawinak cu pek a si.
Cule Jehovah ṭihzahnak in mi in thil ṭhalo an tlansan.
7 Milai lamzinpawl in Jehovah an lunghmuiter tikah,
A ralpawl hman amah thawn a remawter hai.
8 Diknak tel loih sumlut tampi hnakin,
Diknak thawi málte neih a ṭhasawn.
9 Milai thinlung in a fehnak ding khua a khâng,
Asinan Jehovah in a fehnak ding a khihhmuh.
10 Siangpahrang hmurkâ ah Pathian thusuak a um;
A kâ in thu a ṭhensual ding a si lo.
11 ^aA dik mi cuailungpawl le cuaithlainakpawl cu Jehovah ta an si;
Dip sungih cuailung hmuahhmuah cu amai hna a si.
12 Sualralnak tuah hi siangpahrangpawl hrangah fihnungza a si,
Ziangahtile laltokham cu dingfelnak ih dĭnhngeh a si.
13 Thudik simtu hmurkâ cu siangpahrangpawlih năwmawknak a si ih,
Annih in thudik simtu an duhdawt.
14 Siangpahrang thinlingnak cu thihnak palai vek a si,
Asinan mifimpa in cumi cu a daiter ding.
15 Siangpahrang mithmai a pan tikah nunnak a um ih,
A duhsaknak cu ṭhâl tawp ruah khawdur vek a si.
16 Sui hnakin fimnak ngah cu ziang tlukin so a ṭha!
Cule theihthiamnak ngah cu ngun hnakin hril sawn ding a si.
17 Mifel zinpi cu thil ṭhalo tlansan hi a si.
Amai lamzin kilhimtu cun amai nunnak a humhim.
18 Siatralnak hlanah hngalnak a feh ih,
Tlûknak hlanah uanawknak thinlung.
19 Mipuarthau thawi ralthillawn zemawk hnakin,
Mihnuaita thawi thinlung tăngdawr a ṭhasawn.
20 Fim zetih ṭawngkam a ngaithlatu cun thil ṭha a hmusuak ding ih,
Zokhal Jehovah a rinsantu cu mithlawsuak a si.
21 Thinlung sungih mifim cu khawruatthiam tiah an ti ding ih,
Hmurkâ thlum in zirnak a ṭhangter.
22 Theihthiamnak cu a neituih hrangah nunnak cirhti a si.
Asinan mi-âpawlih nunrĕmnak cu atnak hi a si.
23 Mifim thinlung in amai kâ a zirh ih,
Amai hmurkâ ah zirnak a bêt.
24 Ṭawngkam thlum cu khuaithlar bangtuk an si,
Thinlung hrangah a thlum ih, ruh hrangah harhdamnak a si.
25 Milai hrangih dik vekih lang lamzin a um,
Asinan a netnak cu thihnak lamzin a si.
26 Bāng zetih hnaṭuantu cu amai hrangih ṭuanbāng a si,
Ziangahtile a rilrāwnnak in a phût a si.
27 Pathian ngaihsaklopa in thil ṭhalo a laisuak ih,
Cumi cu amai hmurkâ ah meialh bangtuk a si.
28 Thu merhkawi hmangpa in tawhawknak a tuh ih,
Mikamtam in rualpi ṭhabikpawl a ṭhenawter.
29 Minunrâwngpa in a innhnen a lēm ih,
Lamzin ṭhalo ah a hruai.
30 Anih in thil diklo suangtuah dingin a mit a sĭn;
Anih in a kam a sehhnawh ih, thil ṭhalo a suakter.
31 Lusam par cu ropitnak lallukhum a si,
Cumi cu dingfelnak lamzin ih hmuhsuah a si.
32 Micak hnakin mithinfûal a ṭhasawn ih,
Khawpi latu hnakin a thinlung thununtu a ṭhasawn.
33 Camcawhfung cu cāwn parah an zûk,
Asinan cumiih thutluknak kip cu Jehovah hnen ihsin a si.

16:11^a A dik mi cuailung: A ṭawng hrampi ah, «thuṭhennak lungpawl» ti a si.

17

1 Toaw phahih ruaiṭheh murmonak inn hnakin,
Hnangamteih rawl ṭhing bar khat a ṭhasawn.
2 Siahhlawh fim in ningzahnak a suaktertu fapa a uk ding ih,
Unaupawl lakah ro a zem ding.
3 Thianternak bel cu ngun hrangah a si ih, rawhtitnak somei cu sui hrangah a si,
Asinan Jehovah in thinlung a hniksak.
4 Thil ṭhalo a tuahtu in thuphan per hmurkâ a ngaithla;
Thuphan pertu in mi siatsuah thei ṭawngkam hngakhlap zetin a ngaithla.
5 Mifarah hmuhsuamtu cun a Sersiamtu a nautat a si.
Mi vanduainak ih lungawitu cu hrem loin a lan lo ding.
6 Fātepawlih falepawl cu putarpawlih lallukhum an si ih,
Falepawlih ropitnak cu an pa hi a si.
7 Thusim ṭha hleice cu mi-â thawn an mawihaw lo,
Thuphan per hmurkâ cu mipawimawhpa thawn an măwihaw lo sinsin.
8 Nawhthuh cu a neituih mithmuhah âizēlnak lung a si;
Anih cu a hawinak kip ah a hlawhtling.
9 Dānpahbălnak a thuptu in duhdawtnak a hawl,
Asinan thuhla nawlhsaltu cun rual ṭha a ṭhendarh.
10 Mi-â vei 100 thawi hnakin, mifim vei khat kawk hmual a nei sawn.
11 Miṭha lo pa in helnak lawng a hawl;
Curuangah amai hnenah palai hrohrang thlah a si ding.
12 Mi-â a at lai tawn hnakin,
A fanopawl lawnsak mi saváwm pinu mi in tâwng sawn seh.
13 Thil ṭha kha thil sia ih a lehrūltu cu,
A inn ihsin thil ṭhalo in a suahsan dah lo ding.
14 Tawhawknak thăwktir cu tidai thlah bangtuk a si;
Curuangah sualawknak a thăwk hlanah thuelawknak bāng uh.
15 Misualrál thiam cohtu le midik thiamlo cotertu cu,
An pahnih in bangrepin Jehovah hrangah fihnungza an si.
16 Fimnak leinak man cu ziangahso mi-â kut sungih a um,
Cumi hrangih thinlung a neih lo lo thâwi?
17 Rualpi cun ziang tikcān khalah mi a duhdawt ih,
A unaupa cu harsatmangbángnak hrangih suak a si.
18 Theihthiamnak nei lo milai cun kămawknak a tuah ih,
A rualpi hrangah âmkhām ah a cang.
19 Dānpahbăl a duhtu cun tawhawk a duh ih,
A kăwtka khaisângtu cun siatralnak a hawl.
20 Mi bum duhnak thinlung a neitu cun thil ṭha a hmusuak lo ih,
Thu merhkawihmang lei neitu cu thil ṭhalo sungah a tla.
21 Mi hnihsanhmang a hringtu in amai riahsiatnak dingah a hring ih,
Mi-â-ih pa cun aipuannak a nei lo.
22 A hlipár mi thinlung in damnak a thlĕn,
Asinan a kekkuai mi thinlung cun ruhpawl a roter.
23 Thuṭhennak dik merhkâwi dingah,
Misualrálpa in a ṭāng ah nawhthuh a la.
24 Fimnak cu theihthiamnak neituih mithmuhah a um,
Asinan mi-â mit cu leilung dĕngah a um.
25 Fapa â cu a paih thinnatnak a si ih,
A hringtu a nu hrangah khâtnak a si.
26 Cuihhleiah midingfel cawhkuan pek a ṭha lo,
Mipawimawhpawl an dĭngnak ruangih vuak khal.
27 Theihnak a neitu cun a ṭawngkam a sūp ih,
Thiltheithiampa cu midai a si.
28 Daiteih a um tikah, mi-â hman mifim ih ruah a si;
A hmurkâ a cip tikah, anih cu thil theithiam ih ruah a si.

18

1 Mi kăwm duh lo tu cun amai ṭānghma a sial ih,
Fimnak ṭha hmuahhmuah a dodal a si.
2 Mi-â cun theihthiamnak ah nuam tinak a nei lo,
Asinan amai thinlung phuanlăngnak ah a nei.
3 Misualrál a rat tikah, mi ziangsiarlonak khal a ra.
Cule mualphonak zawngah ningzahnak a ra.
4 Milai kamsuak ṭawngkampawl cu a thûk mi tipi vek an si.
Fimnak cirhtihna cu a luang mi tivate vek a si.
5 Misualrál hnenih thleidănnak lăngter a ṭha lo ih,
Thuṭhennak ih midingfel sunter khal a ṭha lo.
6 Mi-â hmurkâ cun tawhawknak a thlĕn ih,
A kâ in vuakvelhawknak a ko.
7 Mi-â kâ cu amai siatralnak a si ih,
A hmurkâ cu a nunnak hrangih tháng a si.
8 Kâ tam vahhmangih ṭawngkampawl cu rawl thaw bangtuk a si ih,
Taksa sungtabik ah an lutthla.
9 Amai hna ih a zangzeltu cu
Siatsuahtuih unaupa a si.
10 Jehovah hmin cu dawlsâng hnget a si;
Midingfel cu cu tawkah a tlân ih a him.
11 Milianpaih neihnunnak cu amai khawpi hnget a si ih,
Amai suangtuahnak ah cun khawkulh sâng bangtuk a si.
12 Siatralnak hlanah minung thinlung cu a uangaw ih,
Upat sunlawihnak hlanah tăngdawrnak a um.
13 Hna ih a theih hlanih thuhla a lettu cu,
A hrangah atnak le ningzahnak a si.
14 Milai thinlung in a damlonak a tuar thei ding,
Asinan zo in so thinlung kekkuai tuar thei ding?
15 Khawruatthiam thinlung in theihnak a khāwl ih,
Mifim hna cun theihnak a hawl.
16 Milai thilpek in amai hrangah lamzin a tuahsak ih,
Miropipawl hmaiah amah a hruai.
17 A innhnenpa a rat ih a zawihnit hlanlo,
Mai thuhla rel hmaisabiktu kha dik vekin a lang.
18 Camcawhfung zûknak in tawhawknak a rehter ih,
Miropipawl a ṭhenawter.
19 Khawpi hnget va lâk ding hnakin lungawi lo ko tuah mi unaupa neh ding a har sawn ih,
Tawhawknak cu lal inn kulhnak hruang bangtuk a si.
20 Milai pumpi cu amai kâ rah ihsin a khawpkhâm ding,
Amai hmurkâ rahsuah ihsin a puar ding.
21 Thihnak le nunnak cu lei thiltitheinak ah an um ih,
Cumi a duhtupawl cun a rah an ei ding.
22 Nupi hmu cu thil ṭha hmu a si ih,
Jehovah hnen ihsin duhsaknak a co a si.
23 Mifarah in a diltein a dil,
Asinan milian cun hrohrang zetin a let.
24 Rualpi tam tuk neitupa cun siatnak a thlĕn thei,
Asinan unau hnakih naisawn ih kăwpbettu rualpi khal an um.

19

1 Thu merhkawihmang hmurkâ nei mi-â hnakin,
Felfaiteih nungtu mifarah a ṭhasawn.
2 Cuihtlunah theihnak tel lo ṭhahnemngainak cu a ṭha lo ih,
Feh hmanhmawhtu cun thilsual a tuah.
3 Mi pakhat ih atnak in amai lamzin a siatsuah ih,
A thinlung in Jehovah parah a thin a so.
4 Neihnunnak in rualpi tampi a tuah,
Asinan mifarah cu a rualpi hnen ihsin ṭhenin a um.
5 Theihpitu diklo cu hrem loin a um lo ding ih,
Thuphan simtu cu a tlânsuak lo ding.
6 Mi tampi in mitirhsiang an tlăwn ih,
Mi kip hi thilpek petuih rualpi an si.
7 Mifarah cu a unaupawl hmuahhmuah in an hua,
A rualpipawl cu ziang tlukin so a hnen ihsin an fehhla sinsin pei!
Anih in ṭawngkampawl hmangin a dawi hai ding,
Cuticingin annih in amah cu an fehsan thotho.
8 Fimnak a ngahtu cun amai nunnak a duhdaw;
Theihthiamnak a kilhimtu cun thil ṭha a hmu ding.
9 Theihpitu diklo cu hrem loin a um lo ding ih,
Thuphan simtu cu a hlorál ding.
10 Năwmtawlnak cu mi-â thawn an milaw lo,
Siahhlawh in hotupawl a uk ding cu a mil lo sinsin.
11 Milai remtheihnak in amah cu thinfûal ko a tuah ih,
Thilsual tuah mi hmu lo vekih a umsan mennak cu a hminṭhatnak a si.
12 Siangpahrang thinlingnak cu kiosa hûk bangtuk a si,
Asinan a duhsaknak cu hrampi parih daitla bangtuk a si.
13 Fapa â cu a paih siatnak a si ih,
Nupi mitawhhmang cu catbang loih inn zŭn a si.
14 Inn le lennak cu palepawl hnen ihsi co mi ro an si,
Asinan nupi khawruatthiam cu Jehovah hnen ihsin a si.
15 Zangzēlnak in thithlĕpin mi a itthatter ih,
Mizê cun rilrāwn a tuar ding.
16 Thupek a thluntu cun a nunnak a kilhim,
Asinan a lamzinpawl ih a fimkhur lo tu cu a thi ding.
17 Mifarah a zangfahtu cun Jehovah hnenah a cawih ih,
Anih in a rak peksuah mi cu a rūlsal ding.
18 Ruahsannak a um laiah na fapa nunsim awla,
A thih ding kha na thinlung in duh hlah seh.
19 Thinling tuk pa cu cawhkuan a tuar ding;
Ziangahtile amah na rŭn asile, na tisal cingcing a ṭul ding.
20 Na ni neta lamih na fimnak dingah,
Thurawnpek ngaithla awla, nun zirhnak cohlang aw.
21 Milai thinlung ah khawkhannak tampi a um,
Sikhalsehla Jehovah-ih thurawnpek lawng a dinghnget ding.
22 Milai sungih thil duhum cu ngilneihnak hi a si ih,
Mifarah cu thuphan pertu hnakin a ṭhasawn.
23 Jehovah ṭihzahnak cun nunnak ah mi a hruai ih,
Cumi a neitu cu diriam zetin an um ding.
Thil ṭhalo in amah a pan lo ding.
24 Mizāngzêl in khengkûm sungah a kut a thluah ih,
A kâ thlentersal ding hman a paih lo.
25 Mi hnihsanhmang cu vaw awla, mimâwl kha a fim ding;
Theihthiamnak a neitu kha kawk awla, theihnak a ṭhenfel thiam ding.
26 A pa tuahsetu le a nu dawisuaktu cu ningzahnak le,
Mualphonak thlentu fapa a si.
27 Ka fapa, nun zirhnak ngaithlak bansan hnik hman,
Theihnak ṭawngkampawl ihsin na pial ding.
28 Theihpitu santlailo cun diknak a hnihsan ih,
Misualrálpawlih kâ in mawhsualnak a darhzaiter.
29 Dāntatnakpawl cu mi hnihsanhmangpawl hrangah timtuah a si ih,
Vuaknakpawl cu mi-âpawlih zāng hrangah.

20

1 Sabitzu cu hmuhsuamnak suaktertu, zureu cu tawhawkbuainak suaktertu,
Zokhal cumi ih hruaipen mi cu a fim lo a si.
2 Siangpahrang thinlingnak cu kiosa hûk bangtuk a si;
Amah thinheng ko căwkthotu pauhpauh cu anmai nunnak dokalhin thilsual an tuah a si.
3 Tawhawknak bansantu milai cu upattlak a si,
Ziangahtile mi-â pauhpauh in elawknak an thăwk ṭheu.
4 Mizāngzêl cun thla a tăn ruangah ^alei a let lo ding;
Thlairawl khawm cān ah kut a dawh ding ih, zianghman a nei lo ding.
5 Milai thinlung ih tumtah mi cu ti thûkpi bangtuk a si,
Asinan theihthiamnak a neitu in cumi cu a phawrhsuak ding.
6 Mi tampi in anmai ṭhatnak ciar an phuang ding,
Asinan zo in so rinsantlak minung a hmu thei ding?
7 Midingfel cu amai felfainak ah a tlanglêng.
A falepawl cu a hnuah an hualvan a ṭha ding.
8 Thuṭhennak tokham parih a totu siangpahrang in
A mit in thil ṭhalo hmuahhmuah a darhter ṭheh.
9 Zo in, «Ka thinlung ka faiter zo,
Ka sualnak ihsin ka thiang zo,» ti thei ding?
10 ^bCuailung dangdang le tahnak dangdang hi
Jehovah hrangah an pahnih in bangrepin fihnungza an si.
11 Nauhak hman hi a tuah mi a thiang maw,
A dik maw ti a thil ti mipawl in theih a si.
12 Theihnak hna le hmuhnak mit hi an pahnih in
Jehovah ih tuah veve mi an si.
13 Ih duh tuk hlah, culole na farah pang ding;
Na mit meng awla, rawl na khăwpkham ding.
14 Thil leitu cun, «A ṭha lo, a ṭha lo,» tiah a ti;
Asinan a fehhlo hnuah cun a tluangkhawnpi ṭheu.
15 Sui le lung mankhung sen tampi an um,
Asinan theihnak hmurkâ cu lung mankhung a si.
16 Ram dang mi hrangah âmkhām tuahtuih sinfen cu la awla,
Cumi cu uirenu hrang a si tikah tiamkamnak tuah aw.
17 Bumnak ih ngah mi rawl cu milai hrangah a thlum,
Asinan a lehhnu ah a kâ cu lungte hrâwl in a khat ding.
18 Khawkhannakpawl cu thurawnpeknak in an dinghnget;
A fim mi thurawn thawn ral do aw.
19 Kâ tam vahhmang vâktawipa in thuthuppawl a phuang;
Curuangah mikamtam cu va kawm hlah.
20 A pa simaw, a nu simaw camsetu cu,
Thim sahpi lakah a meito a mit ding.
21 A hramthăwkih zamrang tukih ngah mi ro cu
A netnakah thlawsuah a si lo ding.
22 «Thil ṭhalo kha ka thŭngrūl ding,» tiah ti hlah.
Jehovah hngak awla, anih in a lo runsuak ding.
23 ^cCuailung dangdang hi Jehovah hrangah fihnungza an si ih,
Cuaithlainak diklopawl khal an ṭha lo.
24 Milai kekarpawl cu Jehovah ta an si;
Ziangtin so milai cun amai lamzin a theihthiam thei ding?
25 Thil thianghlim vekih hmanhmawh tukih hlăn le,
A hnuih a thutiampawl ruahsal ding cu milai hrangah tháng a si.
26 Siangpahrang fim in misualrálpawl a dawihlo ih,
An parah fângcilnak lêngke a hrilh.
27 Milai thlarau cu Jehovah meito a si,
A thinlung sungmuril hmuahhmuah a hawl.
28 Zahngainak le thudik in siangpahrang a humhim ih,
Zahngainak hmangin a laltokham a hngetter.
29 Minopawlih ropitnak cu an thazang hi a si ih,
Putarpawlih ceiawknak cu an lusam par hi a si.
30 Vuaknak hriamhma in thil ṭhalo a thiangfaiter,
Vuaknak vualpawl in thinlung sungmuril a thianfai.

20:4^a lei a let lo ding: Bible san laiah cun thlatang khalah leilet in thlaici an vawrh ṭheu.

20:10^b Cuailung dangdang le tahnak dangdang: A ṭawng hrampi ah cun, «lungto pakhat le lungto pakhat, efa khat le efa khat,» ti a si. «Efa» ti ṭawngfáng hi hi tawkah a tlangpi tahnak hrangih hman a si.

20:23^c Cuailung dangdang: A ṭawng hrampi ah cun, «lungto pakhat le lungto pakhat,» ti a si.

21

1 Siangpahrang thinlung cu Jehovah kut sungih a um mi tivapi bangtuk a si.
Cumi cu a duhnaknak ah a kâwiter.
2 Milai umdān pauhpauh hi amai mit ah cun an dik ṭheh,
Asinan Jehovah in thinlung cuai a thlai ṭheu.
3 Raithawinak hnakin dingfelnak le diknak tuah cu Jehovah hrangah cohlantlak sawn a si.
4 A uangaw mi mithmai, a puarthau mi thinlung le,
Misualrálih meifar cu sual hi a si.
5 Mitaimapaih khawkhannakpawl cun neih tamnak lamah mi a hruai taktak,
Asinan mihmanhmawh pauhpauh cu farahnak lamah hruaiin an um taktak.
6 Thuphan per lei hmangih ngah mi hlawnthilpawl cu,
Thihnak hawltupawlih suangtuahnak ziamrál lohli mi hi a si.
7 Misualrálpawlih nunrawnnak cun anmah a hlorálter ding.
Ziangruangahtile dik zetih thil ti ding an êl.
8 Mawhnak neipaih lamzin cu a kâwi;
Asinan mithiang lawngte cu a hnaṭuan a dik.
9 Mitawhhmang nunau thawi inn ṭawmawk hnakin,
^aInn luanglu kĕlkawm ih cēn a ṭhasawn.
10 Misualrál thinlung in thil ṭhalo a câk;
A innhnenpa in a hmaiah duhsaknak a hmu lo.
11 Mi hnihsanhmang cawhkuan pek a si tikah, mimâwl cu fim ko tuah a si;
Asinan mifim nun zirh a si tikah, anih cun theihnak a ngah.
12 Midingfel in misualrál sungkua fim zetin a ngaihtuah,
Anmai sualralnak ruangah misualrálpawl cu a tlukter ṭheh hai.
13 Mifarah aunak lamih a hna a phittu pauhpauh cu,
Anmah khal an au ve leh ding ih, ngaithlaksak an si lo ding.
14 A thupteih thilpek in thinheng a daiter ih,
Ṭāng sungih pek mi nawhthuh in, thinlingnak nasazet.
15 Midik hrangah diknak tuah cu aipuannak a si,
Asinan mawhsualnak tuahtupawl parah siatralnak a thleng ding.
16 Theihthiamnak lamzin ihsin a vâkvaitu milai cu
Mithi punkhawmnak ah a cawl ding.
17 Nunnăwm duhtu cu mifarahpa ah a cang ding;
Sabitzu le hriak duhtu cu a lian dah lo ding.
18 Misualrál cu midingfel tlennak a si ding ih,
Mirinum lo cu mifel hrangah.
19 Mitawhhmang le thinhenghmang nunau thawi cēntlang hnakin,
Ramṭhing ih cēn a ṭhasawn.
20 Mifim cēnnak ah haheuhtlak hlawnthil le hriak a um,
Asinan mi-â cun cumi cu a riarálter men.
21 Dingfelnak le zahngainak dawitu cun,
Nunnak, dingfelnak le upatnak a hmu.
22 Mifim cu micakpawlih khawpi parah a kai ih,
An rinsan mi ralhruangkulh a cimter.
23 A kâ le a lei a kiltu cun,
Buainak ihsin a nunnak a kilhim a si.
24 Mipuarthau le miuangaw paih hmin cu, «Mihnihsanhmang,» ti a si;
Hngal zetin a cāngvai.
25 Mizāngzêl saduhthah cun amah a that,
Ziangahtile a kut in hnaṭuan a êl.
26 Sunvu-in nasazetin a iksik,
Asinan midingfel cun a pe ih, a ui lo.
27 Misualrálpawl raithawinak cu fihnungza a si ih,
Lungput diklo thawi a hlăn tikah cun ziang tlukin nasa sinsin pei maw!
28 Theihpitu diklo cu a hlorál ding,
Asinan hna ih amah theitupa cun cem ni nei loin a rel ding.
29 Misualrálpa in a mithmai a hakter,
Asinan mifel lawngte cun a lamzin a dĭnhnget.
30 Jehovah dokalhnak ah fimnak siseh, theihthiamnak siseh, thurawnpeknak siseh a um lo.
31 Doawknak ni hrangah ráng cu timtuah a si,
Asinan runsuahnak cu Jehovah ta a si.

21:9^a Inn luanglu kĕlkawm: Jew-pawl cun an inn tlun hi tlanlēn theih rāwn in an tuah.

22

1 Lennak nasatak hnakin hminṭhatnak hi hril sawn ding a si,
Sui le ngun hnak khalin duhsaknak a duhum sawn.
2 Milian le mifarah hmunkhatah an táwngaw,
Cupawl zate tuahtu cu Jehovah a si.
3 Khawruatthiampa in thil ṭhalo a hmu cia ih a relhsan,
Asinan mimâwlpawl cun an pahtlăng ih cawhkuan pek an si.
4 Tăngdawrnak le Jehovah ṭihzahnak rah cu,
Lennak, upatnak le nunnak a si.
5 Thu merhkawihmang lamzin ah hlingpawl le thangpawl an um;
A nunnak kiltu cu cupawl ihsin hlapi ah a um ding.
6 Nauhak cu a fehnak ding lamzin zirh awla,
A upat tikah cumi cu a suahsan lo ding.
7 Milian in mifarahpawl a uk ih,
Cawitupa cu a cawihtuih siahhlawh a si.
8 Mawhsualnak a tuhtu cun riahsiatnak a at ding ih,
A thinhengnak fungfek khal a riarál ding.
9 Mitirhsiang cu thlawsuah a si ding,
Ziangahtile a rawl mifarah a pe.
10 Mi hnihsanhmang kha dawihlo awla, tawhawknak a reh ding,
A si, remawklonak le hmuhsuamawknak a cem ding.
11 Thinlung thiang a duhtu le awkam thlum a neitu cu,
Siangpahrang rualpi a si ding.
12 Jehovah mit in theihnak a humhim,
Asinan mirinum loih ṭawngkampawl cu a hlawhsamter ding.
13 Mizāngzêl in, «Lengah kiosa a um!
Kăwtthler ah in that ding,» tiah a ti.
14 Nunau ṭhalo kâ cu khur thûkpi a si;
Jehovah-ih camsiat mi cu cu tawkah a tla ding.
15 Nauhak thinlung ah atnak ṭem a si;
Nunrĕmnak fungfek in cumi cu a hnen ihsin hlapi ah a dawisuak ding.
16 A lennak pungṭhang dingih mifarah palbĕttu le,
Milian hnenih petu cu a farah leh tengteng ding.
17 Mifim ṭawngkampawl kha na hna tháwng awla, ngai aw,
Cule keimai theihnak lamah na thinlung pe aw;
18 Ziangahtile na thinlung ih cumi na ret asile, thil duhnungza a si ding;
Cupawl cu na hmur hrangah timlam cia a si ding,
19 Cutin na rinsannak cu Jehovah ah a si ding;
Tuihsun ah nangmah rori ka lo zirh a si.
20 Na hnenah thurawnpeknak le
Theihnak ṭha pawl ka ngan a si lo maw?
21 Cucu thutak ṭawngkampawl an hngehzia lo theihter dingah le,
A lo thlahtupawl hnenih thutak ṭawngkampawl ih na leh thei hainak dingah a si.
22 Mifarah cu a farah ruangah na hlawknak dingah hmang hlah,
Mizawnzaipawl kha kulh kăwtka ah palbĕt fawn hlah.
23 Ziangahtile Jehovah in an thuhla a relsak leh ding ih,
Anmah lawngtupawlih nunnak a lawnsak ding.
24 Thinsepa kawm hlah awla,
Thinso hmangpa kawm fawn hlah,
25 Culole a nundānpawl na zir ding ih,
Nangmai hrangih thangkam na si pang ding.
26 Kămawknak tuahtupawl lakih mi pakhat va si hlah,
Leiba hrangih âmkhām tuahtupawl lakih mi pakhat khal;
27 Pek ding zianghman na neih lo asile,
Ziangahso na ihkhun a lo laksak ding?
28 Na pupápawl ih an rak phŭn mi,
Khuahlan ramri kha ṭhawn hlah.
29 Amai hnaṭuannak ih thiam hleice pa na hmu maw?
Amah cu siangpahrang hmaiah a ding ding;
Mi menmenpawl hmaiah a ding lo ding.

23

1 Uktu thawi rawl eitlang dingih na to tikah,
Na hmaiah ziang a um ti kha fimkhurten zoh aw.
2 Cule mihrawng tuk na si le,
Na hrawk ah nâmte thun aw.
3 A rawl thawpawl kha hahio hlah,
Ziangahtile cupawl cu bumnak rawl an si.
4 Lian dingah a hleihluatin hnaṭuan hlah;
Nangmai fimnak hmangin sūpawk thiam aw!
5 Thil um lo mi ah na mit na futer ding maw?
Ziangahtile lennakpawl cun thla an tuahaw tengteng ding;
Muvanlai bangin van lamah an zamhlo ding.
6 Mitirhfak rawl ei hlah awla,
A rawl thawpawl khal hahio fawn hlah;
7 Ziangahtile anih cu a thinlung sungih a ruah mi vekin a um.
Na hnenah anih in, «Ei awla, in aw,» a lo ti,
Asinan a thinlung cu na hnenah a um lo.
8 Na ei zo mi bar khatte hman na luaksal ding ih,
Na ṭawngkam thlumpawl na hmang lăk ding.
9 Mi-â theih ah ṭawng hlah,
Ziangahtile na thufimpawl a nautat ding.
10 Khuahlan ramri kha ṭhawn hlah awla,
Pa nei lo pawlih lópawl năwr fawn hlah.
11 Ziangahtile anmah Tlentu cu a cak.
Anih in nangmah dokalhin an thuhla a relsak ding.
12 Thuzirhnak lamah na thinlung hmang awla,
Theihnak ṭawngkampawl lamah na hna.
13 Nauhak nunrĕmnak ah sūpaw hlah,
Ziangahtile fungfek ih na vuak khalle a thi lo ding.
14 Amah cu fungfek in na vaw ding ih,
A nunnak cu Sheol ihsin na runsuak ding a si.
15 Ka fapa, na thinlung a fim a si ahcun,
Ka thinlung rori khal a aipuang taktak ding.
16 A si, na hmurkâ in a dik mi thilpawl a rel tikah,
Ka thinlung a ai a puang ding.
17 Na thinlung in misualpawl iksik hlah,
Cuhnakin sunnihlawh in Jehovah ṭihzahnak hrangah ṭhahnemngai sawn aw.
18 Ziangahtile ruahsan ding na nei ih,
Na beiseinak cu sahcat a si lo ding.
19 Ka fapa, ngai awla, fim aw;
Cule na thinlung kha lamzin dik ah fehter aw.
20 Sabitzu phâm mipawl lakah tel hlah,
Sa pham mipawl lak khalah.
21 Ziangahtile zu phâm mipawl le sa phâm mipawl cu farahnak ah an thleng ding ih,
Ihhmutnak in annih cu hnipuan ṭet a hrukter ding.
22 A lo hringtu na paih thu kha ngaithla awla,
Na nu kha a tar tikah nautat hlah.
23 Thutak cu lei awla, zuarsal hlah,
Fimnak, nun zirhnak le theihthiamnak pawl khal.
24 Midingfelih pa cu nasazetin a ai a puang ding ih,
A fim mi fāte hringtu cu a fāte parah a nuamaw ding.
25 Na nu le na pa kha lungawi hai sehla,
Nangmah a lo hringtunu cu aipuang seh.
26 Ka fapa, na thinlung i pe awla,
Na mit in ka lamzinpawl zâwt seh.
27 Ziangahtile hlawhhlâng cu khur thûkpi a si ih,
Uirenu cu tikhur fiak a si.
28 Deh ding vekin mi a bawh fawn ih,
Mipapawl lakah mirinum lo a pungzaiter.
29 Zo so hmakhuapit ṭheu?
Zo so riahse ṭheu?
Zo so mi va to ṭheu?
Zo so phunzai ṭheu?
Zo so săn um loih hriamhma tuar ṭheu?
Zo so mit sen ṭheu?
30 Sabitzu hmun ih cambângpawl,
Sabitzu cawhrawi hawlih fehtupawl an si.
31 Sabitzu kha a sen lai,
No sungih thlet a si lai,
A luan ziaizo lai zoh hlah.
32 A netnakah rul bangtukin mi a cuk ih,
Rulngân bangtukin mi a cuk.
33 Na mit in thil maksakpawl a hmu ding ih,
Na thinlung in thil ṭhalo pawl a ṭawngsuak ding.
34 A si, tifinriat sungih a zautupa bangtuk na si ding,
Asilole lăwng puanzarnak băn zim parih zautupa bangtuk.
35 Nang in, «Annih in in rak vel, asinan hriam ka si lo;
Annih in in rak vua, asinan ka theitham lo.
Insal ding mi hawl dingah, ziang tikah so ka ṭhangharh ding?» na ti ding.

24

1 Miṭha lo pawl iksik hlah awla,
An hnenih um ding khal duh fawn hlah.
2 Ziangahtile an thinlung in nunrawnnak ding khua an khâng ih,
An hmurkâ in buainak thu an rel.
3 Fimnak hmangin inn cu sak a si ih,
Theihthiamnak in cumi cu dĭnhngeh a si.
4 Theihnak in pindanpawl cu a khatter,
A sunglawi mi le a duhnung mi lennak hmuahhmuah thawn.
5 Mifimpa cu a cak,
A si, theihnak neipa in a thiltitheinak a ṭhangter.
6 Ziangahtile thurawnpek fim in ral na do pei,
Thurawnpetu tamnak ah himnak a um.
7 Fimnak cu mi-â hrangah a sâng tuk;
Kulh kăwtka ah a kâ a âng lo.
8 Thil ṭhalo tuah ding tumtu cu,
Mi phiarthuptu tiih kawh a si ding.
9 Atnakih khawkhannak cu sual a si ih,
Mi hnihsanhmang cu minungpawl hrangah fihnungza a si.
10 Harsatmangbang ni ih na căuh asile,
Na thazang a mál a si.
11 Thihnak lamih dirh mipawl cu runsuak awla,
Thah dingih thlûk mipawl kha dirkir aw.
12 Nannih in, «Himi cu kan thei hrimhrim lo,» nan ti a si ahcun,
Thinlung cuaithlaitupa in cumi cu a ngaihtuah lo ding maw?
Na nunnak kilhimtupa cun cumi cu a thei lo ding maw?
Cule anih in mi kip anmai thil ti bangtukin a rūl leh lo ding maw?
13 Ka fapa, khuaitizu ei aw, ziangruangahtile cumi cu a ṭha a si,
Cule na kâ ih a thlum mi khuaithlar khal.
14 Cuvekin fimnakih theihnak cu na nunnak hrangah a si ding.
Cumi na tawnngah asile, ruahsan ding a um ih, na beiseinak cu sahcat a si lo ding.
15 Maw misualrálpa, midingfel cēnnak kha bawhthup hlah.
A cawlhhahdamnak hmun kha tisiat hlah.
16 Ziangahtile midingfelpa cu vei sarih a tlu ding ih,
A thosal ding,
Asinan misualrál cu vanduainak ah a tlu ding.
17 Na ral a tlûk tikah lungawiaipuangin um hlah,
A rilhbah tikah na thinlung lungawi hlah seh.
18 Culole Jehovah in cumi cu a hmu ding ih, ^aa lung a hmui lo ding;
Cule amah hnen ihsin a thinlingnak a sūpsal pang ding.
19 Miṭha lo pawl ruangah thinsoin um hlah awla,
Misualrálpawl iksik fawn hlah.
20 Ziangahtile miṭha lopaih hrangah cun ruahsan ding a um lo;
Misualrálpaih meito cu a mit ding.
21 Ka fapa, Jehovah le siangpahrang ṭihzah aw;
Thlengawkhmangpawl va kawm hlah.
22 Ziangahtile an vanduainak cu rinlopiah a thleng ding ih,
An pahnih ih an thlenter thei mi siatralnak cu zo in a thei?
23 Himi thilpawl khal hi mifim thusim mi an si:
Thuṭhennak ih thleidăn neih a ṭha lo.
24 Misualrál hnenih, «Nangmah cu midingfel na si,» a titupa cu,
Minungpawl in an camse ding. Miphunpawl in amah cu an fih ding.
25 Asinan misualrál a kawktupawl cu năwmawknak an nei ding ih,
An parah a ṭha mi thlawsuah a thleng ding.
26 Thulehnak dik petu in hmurkâ a hnam.
27 Leng lamih na hna tifel aw,
Ló ah ziangkim tifel thluh aw;
Cule cuihhnu ah nangmai inn sak aw.
28 Săn um loin na innhnen dokalh zawngin theihpitu va si hlah,
Ziangahtile nangmai hmurkâ in na bum ding maw si?
29 «Amah in ka parih a rak tuah vekin,
A parah ka tuah ve ding.
Amai hnaṭuan bangtukin milaipa cu ka lehrūl ding,» ti hlah.
30 Mizāngzêlpaih ló kiangah ka va feh ih,
Theihthiamnak nei lo milaipaih sabit hmuan kiangah;
31 Cule ngai hnik, cumi cu hlingrûl in a khat ṭheh;
A ló hmai cu thaihliak in a khat;
A ló lunghruang a cim.
32 Cumi ka hmu tikah fimkhur zetin khua ka ruat;
Cumi cu ka zoh ih nunzirnak ka ngah:
33 Málte sung itthatin, málte sung sing duakin,
Kut băwmin it duak hnik;
34 Na farahnak cu khualtlawng mi bangin le,
Na tlaksămnak cu hriamnâm kengtupa bangin na parah an thleng ding.

24:18^a a lung a hmui lo: A ṭawng hrampi ah cun, «mithmuh ah thil ṭhalo a si,» ti a si.

25

Hezekiah-ih Milaipawlih Ngansâwng mi Solomon Thufim

1 Hipawl khal hi Solomon-ih thufimpawl,
Judah siangpahrang Hezekiah-ih milaipawl ih an ngansâwng mi a si.
2 Thuhla thuh hi Pathian ropitnak a si,
Asinan siangpahrangpawlih ropitnak cu thuhla hawlsuah hi a si.
3 Vanpawl an sâng ih leilung a thûk vekin,
Siangpahrangpawlih thinlung cu zawihnitsuah theih a si lo.
4 Ngun ihsin a êk lahlo awla,
Sodengpa in bungbel ah a tuah thei ding.
5 Siangpahrang hmai ihsin misualrál lahlo awla,
Dingfelnak in a laltokham cu dĭnhngeh a si ding.
6 Siangpahrang hmaika-ah nangmah le nangmah cawisâng aw hlah awla,
Miropi dinnak ah va ding hlah;
7 Ziangahtile na hmuh dah mi mizahum hmaiih lo niamter hnakin,
Na hnenah anih in, «Hi tawkah hung so aw,» a lo ti cu a ṭhasawn.
8 Thuṭhennak ah hmanhmawh tukin thuhla thlĕn hlah;
Ziangahtile na innhnenpa in na ning a lo zahter tikah,
A netnakah ziang na cang ding?
9 Na thubuai cu na innhnen thawn relfel uhla,
Thuthup cu mi dang hnenah phuang hlah.
10 Culole cumi a theitu in na ning a lo zakter ding ih,
Na hmin a se tâtâ ding.
11 A cān teih ṭawng ding mi cekci ṭawngkam cu,
Ngunkûalpawl parih sui epălpawl vek a si.
12 A fim mi mi kawktu cu thulung mi hna ih
Sui hnakhaih le sui hlirhlăng ceiawknak bangtuk a si.
13 A thlahtupawl hrangih palai rinum cu,
Thlairawl khâwm tikcucān ih vurdai bangtuk a si,
Ziangahtile a pulepawlih thinlung a nuamter.
14 Pe si loih pe vekih tluangkhâwngtu pauhpauh cu,
Ruah tel lo khawdur le thli bangtuk an si.
15 Zāwitheinak hmangin uktu cu lēmngah a si ih,
Awka nêm in ruh a khiak.
16 Khuaitizu na hmu maw?
Na ṭul zât lawng ei aw,
Culole a lo ngei tuk ding ih, na luak pang ding.
17 Na innhnenpaih inn ah leng tam tuk hlah,
Culole a lo ning ding ih a lo hua pang ding.
18 A innhnen dokalh zawngih theihpitu diklopa cu,
Talhtum, ralnâm le thálfung zúm bangtuk a si.
19 Buai cān ih rinum lo pa rinsan cu,
A sia mi ha le a thîr mi ke bangtuk a si.
20 Thinbāng hnenih hla va saktu cu,
Thlatâng cān ih sinfen phawih le sawda parih sabit ti thûr vek a si.
21 Na ral a ril a rāwn asile, ei ding rawl pe aw;
Cule a ti a hāl asile, in ding tidai pe aw;
22 Ziangahtile cutin a lu parah meiling na pêng a si ding ih,
Jehovah in lawmman a lo pe ding.
23 Sak lam thli in ruah a keng ih,
Mi relsiatnak lei in thinheng mithmai.
24 Mitawhhmang nunau thawi inn ṭawmawk hnakin,
^aInn luanglu kĕlkawm ih cēn a ṭhasawn.
25 A dai mi ti cu a car mi dang hrangah a si vekin,
Ram hlapi ihsi thuthangṭha khal a si.
26 Misualrál hmaiih a tlu mi midingfelpa cu,
Cirhti nâwi le tikhur bawrhhlawh bangtuk a si.
27 Khuaitizu tam tuk ei a ṭha lo;
Mai hrangih cawimawinak hawl cu cawimawinak a si lo.
28 Amai thinlung a uk lo tu cu,
Kulh băl mi khawpi bangtuk a si.

25:24^a Inn luanglu kĕlkawm: 21:9 simfiangnak zoh aw.

26

1 Ṭhâl cān ih vur le thlairawl khâwm cān ih ruah vekin,
Upatnak cu mi-â hrangah a mil lo.
2 Vâte vâkvai vekin le peleng zam vekin,
Săn um loih camsiatnak cu a hlawhtling lo ding.
3 Ráng hrangah vuaknak hri, lāk hrangah kâkharh,
Cule mi-â zāng hrangah fungfek.
4 Mi-â kha amai atdān zulhin let hlah,
Culole nangmah khal amah vek na si pang ding.
5 Mi-â kha amai atdān phu tawkin let aw,
Culole amai mit ah mifim a si pang ding.
6 Mi-â kut ih thucah a kuattu cun,
Amai ke a tán ih, nunrāwnnak a in a si.
7 Kebái ke cu hmantlak an si lo,
Mi-âpawl kâ ih ṭawngṭhimnak cu cuvek a si.
8 Mi-â hnenih upatnak petu cu,
Herhli ih lunghlûm ṭembĕttu bangtuk a si.
9 Mi-âpawl kâ ih thufim cu,
Zuri kut suntu hling bangtuk a si.
10 Mi hmuahhmuah hmabaihtu thálsaitu cu,
Mi-â hlawhfa ih latu le mivaktawi hlawhfa ih latu thawn an bangaw.
11 Amai luak lamih uico a kirsal vekin,
Mi-â cun a atnak a nawlhsal rero.
12 Amai mit ih mifimpa na hmu maw?
Cu pa hrang hnakin mi-â hrangah ruahsannak a um sawn.
13 Mizāngzêl cun, «Zinpi ah kiosa a um!
Kăwtthler ah kiosa a um,» tiah a ti.
14 Kăwpza parah sângka a herawk vekin,
Mizāngzêl cu a ihkhun parah.
15 Mizāngzêl in khengkûm sungah a kut a thluah ih,
A kâ thlentersal ding hman a paih lo.
16 Fim zetih thu a let theitu mi pasarih hnakin,
Mizāngzêl cu amai mit ah a fimsawn.
17 A hrawlhawk venak ding um riai si loih feh phahih mi thu va êltu cu,
Uico a hna ih kaitu vek a si.
18 Meisêr, thálfungpawl le thihnak thawi mi ṭhihṭhaihtu mimawlh cu,
19 Amai innhnen bum tahratih, «Ka lo capoh men!» a titupa bangtuk a si.
20 Thing umlonak hmun ah, meisa a mit;
Cule kâ tam vahhmang umlonak ah sualawknak a reh.
21 Meiling cu meihol vâmtertu le thing cu meialhtertu a si vekin,
Mitawhhmangpa cun sualawknak a alhter.
22 Kâ tam vahhmangih ṭawngkampawl cu rawl thaw bangtuk a si ih,
Taksa sungtabik ah an lutthla.
23 Hmurkâ thlum naih thinlung sualrál cu,
Ngun êk hnih mi leibel bangtuk a si.
24 Mihuatu cun, a mi huatnak kha a hmurkâ in a thup ih,
Amai sungah bumnak a khawlkhawm;
25 Ngilnei zetih a ṭawng tikah, cu pa cu zum hlah,
Ziangahtile a thinlung sungah thil fihnungza pasarih an um;
26 A mi huatnak kha bumnak in khuh hmansehla,
A sualralnak cu mipungkhawm hmaiah phuanlăng a si ding.
27 Khur laitu pauhpauh cu cumi sungah an tla ding ih,
Lung hriltu cu amai parah a rīlsal ding.
28 Thuphan perhmang lei cun amai bum mipawl kha a hua ih,
Kamnâl in siatralnak a thlĕn.

27

1 Thaisun thu ah tluangkhâwng hlah,
Ziangahtile cuih ni in ziang a suahpi ding ti na thei lo.
2 Nangmai kâ si loin, mi dang in lo lawm seh;
Nangmai hmurkâ si loin, mikhual in.
3 Lung cu a rit ih, vunnel in khīng a nei,
Asinan mi-â thinlingnak cu, cute pahnih hnakin a ritsawn.
4 Thinlingnak cu a hrohrang ih, thinhengnak cu a rapthlak,
Asinan zo so thîksiatnak hmaiah ding thei ding?
5 A thupteih duhdawtnak hnakin,
Langhngân kawknak a ṭhasawn.
6 Rualpi ih hriamhmabaihnak cu rintlak a si,
Asinan ral ih hnămnak cu bumnak a si.
7 A pumpuar mi cun khuaithlar kha a luak a suak,
Asinan a rilrâwng mi hrangah cun thil khâ tinkim in a thlum.
8 Amai hmun ihsin a vâkvai mi pa cu,
A bu ihsin a vakvai mi vâte bangtuk a si.
9 Hriak le rimhmui in thinlung a nuamter ih,
Rualpi ih thlumnak cu thinlung tak ih a thurawnpeknak ihsin a si.
10 Nangmai rualpi le na paih rualpi thlauthla hlah awla,
Na vanduai ni ah na unaupaih inn ah feh fawn hlah;
Hlápi ih maih unaupa hnakin,
Kiangnai innhnen a ṭhasawn.
11 Ka fapa, keimah i hmuhsuamtu ka leh theinak dingah,
Ka thinlung lungawiter aw.
12 Khawruatthiampa in thil ṭhalo a hmu cia ih a relhsan,
Asinan mimâwlpawl cun an pahtlăng ih cawhkuan pek an si.
13 Ram dang mi hrangah âmkhām tuahtuih sinfen cu la awla,
Cumi cu uirenu hrang a si tikah tiamkamnak tuah aw.
14 Zingpit teah thoin, aw ring zetih a rualpi thlawsuah a petu,
Cumi cu cu pa hrangah camsiatnak ih siar a si ding.
15 Ruah cēn zet ni ih catbang loih inn zŭn le,
Mitawhhmang nunau an bangrep;
16 Cu nu kham cu thli kham vek le,
A vawrh lam kut ih hriak hum vek a si.
17 Thir in thir a tathriam,
Cuvekin mi pakhat in a dang mi pakhat a tathriam.
18 Theipi kung a fingkhawitu pauhpauh cun a rah an ei ding;
Cuvekin a pu fingkhawitu cu sunlawih a si ding.
19 Tidai ah hmel a kēlih a lăng vekin,
Milai thinlung in milai a phuanglang.
20 Sheol le ^aAbaddon cu an khăwpkham dah lo,
Cuvekin milai mit khal a khăwpkhâm dah lo.
21 Thenfainak bel cu ngun hrangah a si ih, thŭkmei cu sui hrangah a si,
Cule milai cu mi dang in amah an faknak ihsin tah a si.
22 Mi-â cu fâng thawn lung rialdipnak ah rial hman awla,
A atnak cun a suahsan cuang lo ding.
23 Na rante rual dinhmun theifiang awla,
Na ranpi rual khal ṭhaten zoh aw.
24 Ziangahtile lennak cu kumkhaw hrang an si lo ih,
Lallukhum khalin san hmuahhmuah a daih lo.
25 Hrampi a ziamrál tikah, hrampi note an ṭo ih,
Tlang ih hramhringpawl cu lakkhawm an si.
26 Tuufa nopawl in na hnipuan an lo tum ding ih,
Mepapawl in na ló man.
27 Na rawl hrangah,
Na sungkaw rawl hrangah me hnawi haidaih na nei ding ih,
Na siahhlawh nunaupawl cawmnak khalah.

27:20^a Abaddon: Siatralnak.

28

1 Misualrál cu zohman ih dawi loin a tlân,
Asinan midingfelpawl cu kiosa vekin an ral a ṭha.
2 Rammipawl dānpahbălnak ruangah, uktu tampi an um phah;
Asinan theihthiamnak le theihnak neitupa zarah,
A dinghnget vivo ding.
3 Mifarah palbĕttu mifarahpa cu,
Thlai siatsuah thluhtu a nasazet mi ruah bangtuk a si.
4 Dān thlauthlatupawl cun misualrál an thangṭhat,
Asinan dān thluntupawl cun cupawl cu an do.
5 Miṭha lo pawl cun dik zetih thuṭhennak an theithiam lo,
Asinan Jehovah hawltupawl cun ziangkim an theithiam.
6 Lian cingih hlohthlau hnakin,
Felfai zetih nungtu mifarah a ṭhasawn.
7 Dān a thluntu pauhpauh cu fapa fim an si,
Asinan rawl phâmpawlih hawipi cun a pa a ning a zakter.
8 Sum pung le a faṭhang diklo zetih ngahtu cun,
Mifarah zangfahtu hrangah a khawlkhawm a si.
9 Dān ngaithlaknak ihsi a hna a herpêngtu cu,
A thlacam hman kha fihnungza a si.
10 A ṭha lo mi zin ih mifel fehpêngtertu pauhpauh cu,
Anmai khur sungah anmah rori an tla ding.
Sawihnăwm kâi lo pa cun thil ṭha a ro ah a co ding.
11 Milianpa cu amai mit ah cun a fim,
Asinan theihthiamnak nei mifarahpa in amah cu a hmutlăng.
12 Midingfelpawl nehnak an co tikah, ropitnak nasatak a um;
Asinan misualrálpawl an dinsuah tikah, mi an relh.
13 Amai dānpahbălnakpawl a thuptu cu a hmuingil lo ding,
Asinan zokhal sualphuang ih tlansantu cun zahngainak a co ding.
14 Pathian ṭihzahnak a nei camcintu cu mithlawsuak a si,
Asinan a thinlung a haktertu cu vanduainak sungah a tla ding.
15 Mifarah tlunih uktu sualrál cu a hûk mi kiosa le,
A vâktawi mi savâwm bangtuk a si.
16 Theihthiamnak tlasam uktu cu nasazetih mipalbĕttu a si,
Asinan diklo zetih sum ngah huatu cu a nunkhua a sau ding.
17 Mi dang thisen suahnak phurrit phurtu cu, khur sungah a tlânlut ding;
Zohman in bawm hlah hai seh.
18 Sawihnăwm kâi lo teih a fehtu pauhpauh cu rŭn an si ding,
Asinan a fehpêngtu cu rinlopiah a tlu ding.
19 Amai ló a lettu cun rawl khawpkhâm a ngah ding,
Asinan thulolak thil a thluntu cu a fahrah zet ding.
20 Mirinumpa cu malsawm vur a si ding,
Asinan lian dingih hmanhmawhtu cu hrem loin a lan lo ding.
21 Mi thleidăn neih cu a ṭha lo,
Ziangruangahtile sang phel pakhat ruangah milai in dān a pahbăl ding.
22 A ṭha lo mi mit neitupa cu lian dingin a hmanhmawh ih,
A parah farahnak a thleng ding ti a ruat lo.
23 Lei ih mi fakpawrh mentu hnakin,
Mi kawktu in lehhnu ah duhsaknak a hmu tamsawn ding.
24 A pa simaw, a nu simaw a suam ih,
«Hi cu dānpahbăl a si lo,» titu pauhpauh cu,
Siatsuahtuih hawipi an si.
25 Mipuarthau in tawhawknak a căwktho,
Asinan Jehovah a rinsantu cu a hmuingil ding.
26 Amai ruahnak a rinsantu cu mi-â a si,
Asinan zokhal fim zetih a nungtu cu runsuah a si ding.
27 Mifarah bāwmtu cu a tlasam lo ding,
Asinan hmu lo vekih umsantu cun camsiatnak tampi a co ding.
28 Misualrálpawl an dinsuah tikah, minungpawl an relh;
Asinan an hlohral tikah, midingfelpawl an pungṭhang.

29

1 Kawk leuhleuh cingih, a ring khăwngtertupa cu,
Rinloparalah a hlorál ding ih, damter a si nawn lo ding.
2 Midingfelpawl thuneitu an si tikah, mi senpi an ai a puang;
Asinan misualrálpa in a uk tikah cun mi senpi an aihram.
3 Fimnak a duhtu pauhpauh cun an pa an aipuangter,
Asinan hlawhhlângpawlih hawipi cun a neihnunnak a thehral.
4 Siangpahrang in thuṭhennak dik in ram a dĭnhnget,
Asinan nawhthuh eitupa cun ram a siatter.
5 A innhnen fakpawrhtupa cun,
A ke hrangah sûr a zâr a si.
6 Miṭha lo pa cu dānpahbălnak in a awk,
Asinan midingfel cu hla a sak ih a ai a puang.
7 Midingfel in mifarah hmakhua a ngaihtuah,
Asinan misualrál cun cuvek ngaihtuahnak a theithiam lo.
8 Mi hnihsanhmangpawl in khawpi an kāngter,
Asinan mifimpawl cun thinlingnak an daiter.
9 Mifimpa le mi-âpa an tawhawk tikah,
Mi-âpa a thin a heng ih a sursēk, cu tawkah daihnak a um lo.
10 Thisen suahhmangpawl cun sawihnăwm kâi lo pa an hua,
Asinan mifelpawl in a nunnak ding an tawlrelsak.
11 Mi-â cun a thinhengnak a phawrhsuak ṭheh,
Asinan mifim cun a sûp.
12 Uktu in thuphanpawl a ngaihven asile,
A kut hnuaiih mi hmuahhmuah cu misualrál ah an cang.
13 Mifarahpa le mipalbĕttu hmunkhatah an táwngaw:
Jehovah in an pahnih in an mit a vângter veve.
14 Mifarah parih thudik thawi thu a ṭhentu siangpahrang cu,
Kumkhuain a laltokham dĭnhngeh a si ding.
15 Fungfek le kawknak in fimnak a pe,
Asinan nauhak amah teih tān mi cun a nu hnenah ningzahnak a thlĕn.
16 Misualrálpawl an karhzai tikah, dānpahbălnak a karh,
Asinan midingfelpawl in an tlûk kha an hmu ding.
17 Na fapa nunrĕm awla, anih in cawlhhahdamnak a lo pe ding,
A si, thinnăwmnak a lo pe ding.
18 Thuphuan umlonak ah, mipi an dâwngdah,
Asinan dān a thluntu cu mithlawsuak a si.
19 Siahhlawh cu ṭawngkam menin nunrĕm theih a si lo ding;
Ziangahtile a theihthiam hmanah a ngaihsak lo ding.
20 A ṭawngkampawl ih hmanhmawh mi pa na hmu maw?
Cu pa hrang hnakin mi-â hrangah ruahsannak a um sawn.
21 A siahhlawh a nauhak lai ihsi a duattu cun,
A netnakah cu pa cu a fapa vekin a nei ding.
22 Mithinhengpa cun tawhawknak a căwktho ih,
Thinso hmangpa in dānpahbălnak tampi a tuah.
23 Milai hngalnak in amah cu a dirthla ding,
Asinan thinlung tăngdawr mi cun upatnak a hmu ding.
24 Fifir thawi ṭangtlangtu pauhpauh cu anmai nunnak an hua a si,
Anih in sesămnak a hna in a thei nân, zianghman a phuang lo.
25 Milai ṭihnak ah tháng a um,
Asinan zokhal Jehovah rinsantu cu an him ding.
26 Mi tampi in uktu ih duhsaknak an hawl,
Asinan milai hrangih thuṭhennak dik cu Jehovah hnen ihsin a si.
27 Midik lo pa cu midingfel hrangah fihnungza a si ih,
Umdān ih mifel cu misualrál hrangah fihnungza a si.

30

Agur Thufim

1 Jakeh fapa, Agur-ih ṭawngkampawl, a ṭawngsuah mipawl cu, hi pa in Ithiel hnen, Ithiel le Ukal hnenah a rel.

2 Thungaiten kei cu mi dang hnakin ka cŭt sawn ih,
Milai theihthiamnak khal ka nei lo.
3 Fimnak ka rak zir lo ih,
Mi Thianghlim-ih theihnak khal ka nei fawn lo.
4 Zo so van ah hung kai ih ṭumsal?
Zo so mai kuttum sungih thli khâwl?
Zo so sinfen in tidai fûn?
Zo so leilung dĕng hmuahhmuah rak dĭn?
A hmin cu ziang a si ih, a Fapaih hmin cu ziang a si,
Na rel thei maw?
5 Pathian kamsuakthu tinkim cu a thiang.
Anih cu amah hnenih răwltupawl hrangah ralphaw a si.
6 A ṭawngkampawl bêt hlah,
Culole a lo kawk ding ih,
Nangmah kha thuphan per na si ti hmuhsuah na si ding.
7 Thil pahnih na hnenah ka lo dil,
Cupawl cu ka thih hlanah i êl hram hlah aw:
8 Ka hnen ihsin diklonak le thuphan pernak lahlo aw.
Farahnak siseh, lennak khal siseh i pe hlah.
Ka covo tawk rawl in i câwm aw.
9 Culole ka nei tam tuk ding ih ka lo hnáwng ding,
Cule, «Jehovah cu zo a si,» ka ti pang ding.
Asilole ka farah tuk ding ih, fi ka fir pang ding,
Cule ka Pathian hmin ka bawrhbangter pang ding.
10 A pu hnenah siahhlawh kha hēk hlah,
Culole a lo camsiat ding ih, mimawh ih hmuh na si pang ding.
11 A pa camsiat ih a nu malsawm lo tu,
San khat minung an um.
12 Amai mit ih thiangfai ih,
A bawrhhlawhnak a khawlhfai lo tu san khat minung an um.
13 San khat minung an um, aw, an mit cu ziang tlukin a sâng!
An mittlângpawl khal an sângter.
14 Leilung ihsin mifarahpawl le,
Minungpawl lak ihsin miṭulsampawl zawnzaiter dingah,
An hápawl ralnâm bangtuk a si mi le,
An hnuai lam hapawl nâmte bangtuk a si mi san khat minung an um.
15 «I pe aw,» «I pe aw,» titu cāngvăt in fanu pahnih a nei.
Khăwpkham ti nei lo mi thil pathum an um,
«A tawk thlang,» ti dah lo tu thil pali an um:
16 Sheol,
A cíng mi sūl,
Tidai khăwpkham lo tu leilung le,
«A tawk thlang,» ti dah lo meisa tla an si.
17 A pa hmuhsuamtu le,
A nu hnihsantu mit cu,
Phaikuam tlangâkpawl in an phawrhsuak ding ih,
Cumi cu muvanlai nopawl in an ei ding.
18 Ka hrangah a mak tuk mi thil pathum an um,
A si, ka theihthiam lo mi thil pali tla:
19 Van ih muvanlai lamzin,
Lung parih rul lamzin,
Tifinriat ih lăwng lamzin le,
Fala le tlangval fehnak lamzin.
20 Himi hi uirethmang nunau umdān cu a si:
A ei ih, a kâ a hnulfai,
Cule, «Sualralnak zianghman ka rak tuah lo,» tiah a ti.
21 Thil pathum ruangah leilung a khūr,
A si, thil pali a tuar thei lo:
22 Siahhlawh kha siangpahrang a si tikah,
Rawl in mi-â a pum a puar tikah,
23 Duhtu nei lo nunau in pasal a neih tikah le,
A piih ro cotu siahhlawh nunau tla an si.
24 Leilung parah a fate mi thil pali an um,
Asinan cupawl cu maksak zetin an fim:
25 Sihtepawl hi cak lo an si,
Cutisikhalsehla ṭhâl cān ah an rawl an khâwl;
26 Shafanpawl cu cak lo zet an si,
Cuticingin lungkhām lakah an umnak an tuah;
27 Kharbawkpawl in siangpahrang an nei lo,
Cuticingin an zaten a rual a rual in an feh;
28 Dĕkdēr cun a kut in thiam zetin a pāwktâng ih,
Siangpahrang innpawl ah a um.
29 Zahum zetih a fehtu thil pathum an um,
A si, zahum zetih tlanglêng thil pali an um:
30 Ramsa lakih a cak zet mi le dungsip dah lo kiosa,
31 Raldonak ráng,
Mecang khal,
Cule amai zawngih a ralkap burpi um ringring siangpahrang tla an si.
32 Nangmah le nangmah na khaisanawknak ih na rak at asile,
Asilole thil ṭhalo tuah na tumthup asile, na kâ hup aw.
33 Căwh mi hnawi in thāwphāt a suahter ih,
Hnar hmuainak in thi a suakter,
Cutivekin thinling dingih turhnawhnak in tawhawknak a suakter.

31

Siangpahrang Lemuel Nuih Ṭawngkampawl

1 A nu in amah a zirh mi ṭawngkampawl, Siangpahrang Lemuel-ih thusim mipawl:

2 Ziangso, ka fapa?
Ziangso, ka rilrah fapa?
Ziangso, ka thutiam fapa?
3 Na thazang kha nunau hnenah pe hlah awla,
Na cahnak kha siangpahrangpawl siatsuahtu hnenah pe fawn hlah.
4 Maw Lemuel, cumi cu siangpahrangpawl hrangah a si lo,
Sabitzu in hi siangpahrangpawl hrang a si lo ih,
Zureu in hi uktupawl hrang a si fawn lo.
5 Culole an in ding ih thusuah mi dān an hngilh ding,
Cule zăwnzaih tuar mipawl hmuahhmuah ih diknak an merhkâwi pang ding.
6 A thi cuahcopa hnenah zureu pe awla,
Lungkuai mipawl hnenah sabitzu pe aw.
7 Anih in in sehla a farahnak hngilh seh,
Cule a mangbangvansannak cîng nawn hlah seh.
8 Ṭawng thei lo pawl hrangah na kâ âng aw,
Thi dingih ruat mipawl hrang khalah.
9 Na kâ āng aw, dingfel zetin thuṭhen awla,
Mifarah le miṭulsam covo hrangah dilsak aw.

Nupi Ṭhaṭhum

10 Zo in so nupi ṭhaṭhum a hmu thei ding?
A man cu lung mankhung senpawl hnakih tlunpi ah a si.
11 A pasal thinlung in cu nu cu a rinsan ih,
A pasal cun thil ṭha zianghman a tlasam lo ding.
12 A damsung ni hmuahhmuah a pasal hrangah thil ṭhalo si loin,
Thil ṭha a tuah.
13 Sahmul le pat a hawl ih,
A kut in aipuang zetin a ṭuan.
14 Anih cu sumdâwng lăwngpawl bangtuk a si,
Hlâpi ihsin a rawl a rak keng.
15 Khawvâng hlanah a tho ih,
A sungkuapawl hrangah rawl le,
A siahhlawh nunaupawl hrangih covo a pe.
16 Ló a ngaihtuah ih a lei;
A hlēp mi in sabit hmuan a tuah.
17 Cahnak in a tâi a ṭemaw ih,
A bānpawl a cakter.
18 A sumdawnnak a ṭha ti a theingah ih,
Zan ah a meito a mit lo.
19 Pat hmawihnak lamah a kut a suah ih,
A kut in pat hmawihnak a hûm.
20 Mifarah a kut in a bawm,
A si, miṭulsam a kut in a ṭanpi.
21 A sungkua hrangah vur a ṭih lo,
Ziangahtile a sungkuapawl hmuahhmuah cu hnipuan senlar an hruk ṭheh.
22 Amai hrangah tăngphah khuh a tuah;
A hnipuan cu puan nem páte le sendup an si.
23 Ram upapawl lakih a to tikah,
A pasal cu kăwtka ah mi theih mi a si.
24 Patzai fêmte in sinfen a tuah ih a zuar,
Cule sumdâwngpawl hrangah taikhappawl a pe hai.
25 Cahnak le upatnak cu a hnipuan an si;
A ra lai ding mi tikcucān ah anih cu lungawiaipuangin a um ding.
26 Fimnak thawn a kâ a āng ih,
A lei ah ngilnei zetih zirhnak a um.
27 A sungkuapawlih umdānpawl ṭhaten a zoh ih,
Zêtnak rawl a ei lo.
28 A falepawl an tho ih amah cu mithlawsuak tiah an ko,
A pasal khal in, cule a lawm:
29 «Fanu tampi in ṭha zetin an rak ṭuan,
Asinan nang in an zaten na hleih ṭheh hai,» tiah a ti.
30 Duhumnak cu bumhmang a si ih, hmelṭhatnak cu zianghmanlo men a si,
Asinan Jehovah ṭihzahtu nunau cu lăwm a si ding.
31 A kutsuak rah kha amah pe uhla,
Amai hnaṭuanpawl in kăwtka ah amah lāwm hai seh.