BibleThianghlim – THUPHUAN
Old Testament
Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi
New Testament
Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation
THUPHUAN
12345678910
11121314151617181920
2122
- A ngantu: John
- A siartu: Asia Minor ih kawhhran pasarih
- Ngan kum: A.D. 95
Apostol John in Thukham Thar sungih cabu panga a ngan. Cupawl cu Thuthangṭha John, 1 John, 2 John, 3 John le Thuphuan tla hi an si. John cu apostol a si vekin, Jesu leitlun ih rawng a bawl laiah Khrih thawn an rak tlanglêngtlang. A cangan mi hi huham thawn a khat mi Jesu-ih kamsuakthu le thil ti mipawl rak hmutu dinhmun ih a ngan mi an si. Cuihhleiah John in thosal Jesu khal a hmu. John cu A.D. 95 hrawngah Patmos tikulh ah thawng a rak tla. Hivek nun harsa a tawn laiah ropi zetih Jesu Khrih phuanlăngawknak a hmu. Thuphuan cabu hi Patmos tikulh ih a phuanlăngawk ṭum ah Khrih in John a rak sim mi ngankhum mi a si.
Hih Thuphuan cabu in John le kum zabi pakhatnak ih zumtupawl thazang a cakter zet ding. Anmai san ih uktu cu Domisian a si. Rom siangpahrang in zumtupawl hrem dingin thu a rak pe ngaingai lo nân, anmah huat ding tha a rak pe. Thuphuan bung 2-3 ih kawhhranpawl hnenih cakuatpawl in cuih huatnak cu a langter. Zumtu rinumteih nung dingah cun nunsimnak, nun zirhnak le thapeknak pawl a ṭul. Curuangah Jesu in John hnenah kawhhranpawl in an siar, an theih le an thlun dingah hi simsungnak thupawl hi a nganter (1:3).
Hih cabu a tlangpiih ṭhennak hi 1:19 ah kan hmu. Bung khatnak in a liam cia thu a sim. Cumi cu van kai zo Khrih-ih larnak ropi a si. Bung 2-3 in a thleng rero lai mi thu a sim. Cumi cu Asia Minor ih kawhhran pasarih hnenih cakuatpawl an si. Bung 4-22 in a thleng lai ding mi thu a sim. Cumi cu harsatnak (bung 4-19), kum 1000 uknak (bung 20) le kumkhaw dinhmun (bung 21-22) thupawl an si.
Hih cabu hi larnak a hmuh hnuih John ih a ngan mi a si. Curuangah hi cabu hi simsungnak tiin a ko (1:3; 22:7, 10, 18, 19). A thu tambik cu leitlun le Pathian ih ralpawl parih a ra thleng lai ding mi dāntatnakpawl simsungnak thu a si. Khrih in a ralpawl parah nehnak a co ding. Thuphuan cabu hi Khrih-ih tlennak hnaṭuan cemnak ropi thu a simsung. Thuphuan hi simsungnak cabu a si nân, John in kawhhranpawl hnenah cakuat pakhat vekih a ngan mi a si. A net tiang thulung le rinumin um dingah tha a pe.
Thuphuan in Khrih ih nehnak le leitlun ih Pathian uknak a langter. «Thah mi Tuufano cu huham, lennak, fimnak, cahnak, cawimawinak, ropitnak le thangṭhatnak cotlak a si» (5:12).
Thuhlawm Ṭhen
- I. Thuhmaihruai (1:1-8)
- II. John in van ih kai zo Khrih a hmuhdān a phuang (1:9-20)
- III. John in Khrih hnen ihta thucahpawl kawhhranpawl hnenah a phuang (bung 2-3)
- IV. John in hmai lam cān ih thil thleng ding mi thuhlawm a ṭhen
(bung 4-22)
- A. Harsatnak cān (bung 4-19)
- B. Kum 1000 uknak (bung 20)
- C. Kumkhaw dinhmun (21:1-22:5)
- V. Thukharnak
Thuhmaihruai
1 Hihi Jesu Khrih-ih Thuphuan a si, a siahhlawhpawl hnenih hmuh dingah Pathian in Jesu Khrih hnenih a pek mi, a rei hlanih thil rung thleng tengteng ding mipawl an si. Cucu Pathian in a vancungmi thlahin a siahhlawh kei, John hnenah a run theihter. 2 Kei, John cun Pathian kamsuakthu le Jesu Khrih-ih theihternak le ka hmuh mi thil hmuahhmuah cu ka theihter. 3 Hi simsungnak ṭawngkampawl a siartu le a ngaithlatu le a sungih ngan mi thupawl a thluntu cu mithlawsuak an si, ziangahtile cān a nâi zo.
Cibaibûknak le Faknak
4 John in Asia peng ih um mi kawhhran pasarih pawl hnenah hitin ca a kuat:
A um lai mi le a rak um zo mi le a ra leh ding mi hnen ihsin le a laltokham hmaika-ih um Thlarau pasarih pawl hnen ihsin zangfahnak le hnangamdaihnak nan hnenah um hram seh. 5 Cule theihpitu rinum a si mi, mithi lak ihsi suak hmaisabik, leitlun siangpahrangpawl uktu a si mi, Jesu Khrih hnen ihsin zangfahnak le hnangamdaihnak nan hnenah um hram seh.
Anih cu in duhdawtu le amai thisen rori ih kan sualpawl in khawlhfaisaktu a si. 6 Cun anih cu Pathian le a Pa hnen lamih siangpahrang le puithiam ih in tuahtu a si. A hnenah thangṭhatnak le thiltitheinak cu um kumkhua hram seh. Amen.
7 Ngai hnik uh, anih cu mero thawn a ra ding, cule mit hmuahhmuah in amah cu an hmu ding, amah a suntupawl rori khal in an hmu ding. Cule leitlun ih hnám hmuahhmuah cu amai ruangah an râk ding. A si, Amen.
8 «Kei cu Alfa le Omega, Thăwknak le Cemnak, a um lai mi, a um zo mi le a ra leh ding mi, Ziangkimtithei ka si,» tiah Bawipa in a ti.
Mi Pakhat, Minung Fapa Vek
9 Kei, John, nan unaupa, harsatnak le Jesu Khrih-ih uknak le tuarfainak ṭawmpitu cu Pathian kamsuakthu ruangah le Jesu Khrih theihpinak ruangah Patmos tikulh an ti mi ah ka um. 10 Bawipaih Ni ah Thlarau in ka um, cule ka dung lam ihsin tawtawrawt aw vek aw ring zetin, 11 «Kei cu Alfa le Omega, Hmaisabik le Netabik ka si. Cule na hmuh mi cu cazual sungah ngan awla, Asia peng ih a um mi: Efesa khua, Smirna khua, Pergamos khua, Thiatira khua, Sardis khua, Filadelfia khua le Laodisia khua pawl ih a um mi kawhhran pasarih hnenah kuat aw,» a ti ka thei.
12 Cun i betu hmu dingah ka heraw. Cule ka herawk tikah, sui meito retnak pasarih ka hmu. 13 Meitoṭhuam pasarih laiah Minung Fapa a bang mi Pa cu a kephah tiangin sinfen a hruk ih, a ṭāng ah sui taikhap a khap. 14 A lu le a sám cu tuu hmul le vur vekin a var ih, a mit cu meisa alh vek a si. 15 A ke cu rawhtitnak meisa vâm sungih rawh thianhlim zo mi dar tle vek a si ih, a aw cu tidai tampi aw vek a si. 16 A vawrh lam kut ah arsi pasarih a keng ih, a kâ ihsin kap hnih hriam ralnâm hriam zet a suak, cule a hmel cu sun ni ling zet vek a si.
17 Cule amah ka hmuh tikah, a ke hramah mithi vekin ka tlu. Cutikah anih in a vawrh lam kut cu ka parah a suang ih ka hnenah, «Ṭih hlah, keimah hi Hmaisabik le Netabik ka si. 18 Kei cu a nung mi le a thi dah zo mi ka si, ngai hnik, kei cu kumkhuain ka nung. Amen. Mithi khua le Thihnak tawhfungpawl ka nei.
19 Na hmuh zo mi thilpawl le atu ih a um rero lai mi thilpawl le lehhnu ih a um leh ding mi thilpawl cu ngan aw. 20 Ka kut vawrh lamih arsi pasarih na hmuh mi le sui meitoṭhuam pasarih na hmuh mi ih thuthup cu hihi a si: arsi pasarih cu kawhhran pasarih pawlih vancungmi an si ih, meitovannak pasarih cu kawhhran pasarih pawl kha an si.
Efesa Kawhhran Hnenah
1 «Efesa kawhhran vancungmi hnenah,
‹A kut vawrh lamih arsi pasarih keng ih, sui meitoṭhuam pasarih lakih vâk rero tu in, 2 «Na hnaṭuan mipawl, na ṭuan băngnakpawl le na tuarfainakpawl, miṭha lopawl na zāwi thei loziapawl ka thei. Apostol si si loih apostol tiawpawl na hniksak ih, thuphan per an si ti na rak hmu zo. 3 Cun na tuar ṭenṭo ih, tuarfainak na nei, ka hmin ruangah na ṭuanbāng zet ih, na cau lo. 4 Sihmansehla lo dĕmnak ka nei, cucu na duhdawtnak hmaisa na tlansan mi kha a si. 5 Curuangah khuitawkin na tlu ti cîng ringring awla, lung thleng in, na tuah mi thil hmaisapawl kha tuahsal aw. Culole na hnenah zamrang zetin ka ra ding ih, na lung na thleng lo asile na meitoṭhuam cu a hmun ihsin ka ṭhawn ding. 6 Asinan hihi na nei, Nikolas thluntupawlih thil tipawl na hua, cucu kei khal in ka hua ve.
7 «Thlarau in kawhhranpawl hnenih a sim mi hi hna a neitu cun thei seh. Nehtu hnenah Pathian Paradise ih a um mi nunnak thingkung ihsin a ei dingah ka pe ding,» ti mi thilpawl hi a sim,› tiin ngan aw.
Smirna Kawhhran Hnenah
8 «Cule Smirna kawhhran vancungmi hnenah,
‹Hmaisabik le Netabik, a thi ih a nungsaltu in, 9 «Na hnaṭuan mipawl, na harsatnak le na retheihnak ka thei, asinan na lian. Cule Jew-mi si lopiin Jew-mi tiawpawlih an lo relsiatnak ka thei, annih cu Setan-ih sinakok an si. 10 Na tuar ding mi thilpawl hi zianghman ṭih hlah. Ngai hnik, hniksak nan si theinak dingah Diabol cun nan lakih mi hrekkhat cu thawng a lo thla cing ding. Cun ni hra sung harsatnak nan tuar ding. Thih tiang rinumin um aw, cule nunnak lallukhum ka lo pe ding. 11 Thlarau in kawhhranpawl hnenih a sim mi hi hna a neitu cun thei seh. Nehtu cu vei hnih thihnak in a tuahmawh hrimhrim lo ding,» ti mi thilpawl hi a sim,› tiin ngan aw.
Pergamos Kawhhran Hnenah
12 «Cule Pergamos kawhhran vancungmi hnenah, ‹Ralnâm kap hnih hriam neitu in, 13 «Na hnaṭuan mipawl le na cēnnak hmun cu Setan-ih laltokham umnak hmun a si ti ka thei. Cule ka hmin na kaihnget ih, ka martar rinum Anṭipas, nan lakah Setan cēnnak hmun ih an rak thah lai khalah khan keimah i zumnak na phatsan lo.
14 «Asinan kha tawkah Balaam-ih zirhnak pawmtupawl na umpi hai ruangah lo dĕmnak thil málte ka nei. Israel-mipawl hmaika-ah tlûknak ret dingin Balaam cun Balak a rak zirh. Cuih an tlûknak cu milem hnenih an hlăn mi thil ei ding le nunau-mipa sualnak tuah dingin a si. 15 Cuvek thothoin Nikolas thluntupawlih zirhnak pawmtupawl khal na umpi, cuih zirhawknak cu ka hua. 16 Na lung thleng aw, culoasile na hnenah zamrang zetin ka ra ding ih, ka kâ ih ralnâm in cupawl cu ka do hai ding.
17 «Thlarau in kawhhranpawl hnenih a sim mi hi hna a neitu cun thei seh. Nehtu hnenah ei dingih thuh mi manna ka pe ding. Lung var ka pe ding ih, cuih lung parih hmin thar ngan mi cu a cotu siarlo zohman in an thei lo,» ti mi thilpawl a sim,› tiin ngan aw.
Thiatira Kawhhran Hnenah
18 «Cule Thiatira kawhhran vancungmi hnenah,
‹Pathian Fapa, a mit meisa bangih alh mi le a ke dar tle vek a si mi in, 19 «Na hnaṭuannak, na duhdawtnak, na rawngbawlnak, na zumnak, na tuarfainak pawl ka thei. Na hnaṭuan netabikpawl cu a hmaisabikpawl hnakin a nasasawn ti ka thei.
20 «Cuti si hman sehla khaih nunau, Jezebel, profet tiaw nu kha ka siahhlawhpawl nunau-mipa sualnak tuah ding le milem hnenih hlăn mi thil ei ding a zirh hai ding le a hruaipen ding na sian ruangah lo dĕmnak thil málte ka nei. 21 Cule a nunau-mipa sual tuahnak ihsin lung thleng dingah cān ka pe nân, a lung a thleng cuang lo. 22 Ngai hnik, amah cu mina ihkhun ah ka hlăwn ding ih, amah thawi a uiretupawl khal an thil tuah mipawl ihsin an lung an thleng lo asile, harsatnak rapthlak sungah ka thla hai ding. 23 A fātepawl cu thihnak in ka that ding ih, keimah cu lungthin le thinlung zohtu ka si ti kawhhran hmuahhmuah in an thei ding. Cule nan hnaṭuandān vek cio in ka lo rūlsal ding.
24 «Cun cuih zirhnak pawm loih, Setan-ih thu thûk an ti mipawl a thei lo tu nannih, Thiatira khua ih a tāng mipawl hnenah ka lo sim, nan parah phurrit dang ka ṭhum lo ding. 25 Sikhalsehla nan rak neih cia mi kha cu ka rat tiangin kaihnget uh.
26 Cule nehtu le ka hnaṭuanpawl a cemnet tiangih a kiltu hnenah miphunpawl parih thuneihnak ka pe ding.
27 ‹Anih cun thir kianghrăwl in a uk hai ding ih,
Beltuahtupaih belpawl bangin annih cu hlăwnkuai nêknêk an si ding.›
Ka Pa hnen ihsin thuneihnak ka hmuh vekin, an hnen khalah thuneihnak ka pe ve hai ding. 28 Cule amah cu deirel arsi ka pe ding.
29 «Thlarau in kawhhranpawl hnenih a sim mi hi hna a neitu cun thei seh,» ti mi thilpawl a sim,› tiin ngan aw.
Sardis Kawhhran Hnenah
1 «Cule Sardis kawhhran vancungmi hnenah,
‹Pathian Thlarau pasarih le arsi pasarih neitupa in, «Na hnaṭuan mipawl ka thei, nung hmin na pu nân na thi a si. 2 Ralring awla, a thi zikte mi, a tāng mi thilpawl kha cakter aw, ziangahtile na hnaṭuan mipawl Pathian hmaika-ah famkim tawkin ka hmu lo. 3 Curuangah ziangtin na cohlang ih na ngaithla ti kha cîng ringring aw; kaihnget awla, na lung thleng aw. Curuangah na ralrin lo asile, na hnenah fifir bangin ka ra ding, ziang tikcān ah na hnenah ka ra ding ti na thei hrimhrim lo ding.
4 «Sardis khua ah an sinfen bawrhbangter lo tu mi málte na nei. Annih cu sinfen var hruhin ka zawngah an leng ding, ziangahtile annih cu an tling a si. 5 A nehtu cu sinfen var hruhter a si ding ih, Nunnak Cazual sung ihsin a hmin ka phiathlo hrimhrim lo ding; cuhnakin a hmin cu ka paih hmaika-ah le a vancungmipawlih hmaika-ah ka ṭăn sawn ding a si. 6 Thlarau in kawhhranpawl hnenih a sim mi hi hna a neitu cun thei seh,» ti mi thilpawl a sim,› tiin ngan aw.
Filadelfia Kawhhran Hnenah
7 «Cule Filadelfia kawhhran vancungmi hnenah,
‹Cuih thilpawl hnuah, a thianghlim mi, a dik mi, David-ih tawhfung neitu, a ăwn mi cu zohman ih khar theih lo le a khar mi cu zohman ih ăwn theih lo pa in, 8 «Na hnaṭuan mipawl ka thei. Ngai hnik, na hmaika-ah ăwn mi sângka ka ret ih, cucu zohman in an khar thei lo ding. Ziangahtile cahnak málte na nei, ka kamsuakthu na rak kilkhawi ih, ka hmin na phatsan lo. 9 Ngai hnik, Setan sinakok ih mi, Jew-mi ngai si lo, Jew-mi ka si tiih thuphan pertupawl kha ka thlah hai ding. Ngai hnik, na ke hramah ra in, ka băwkkhupter hai ding ih, ka lo duhdawt ti khal ka theihter hai ding. 10 Tuarfainak nei dingih thu ka lo pek mi na kilhim ruangah, leilung parih cêng mipawl hniksak dingah leitlun hmuahhmuah ih a ra thleng ding mi hniksaknak tikcucān ihsin kei khal in ka lo kilhim ve ding.
11 «Ngai hnik, ka ra cing ding! Zohman in na lallukhum an lo laksaklonak dingah, na neih cia mi kha kaihnget aw. 12 A nehtu cu ka Pathian temple sungih ṭhuam ah ka tuah ding ih, anih cu a lengah a suak nawn lo ding. A parah ka Pathian hmin le ka Pathian khawpi hmin ka ngan ding ih, a parah ka hmin thar ka ngan ding; cumi cu van ihsin, ka Pathian hnen ihsi a rung ṭum mi Jerusalem Thar cu a si.
13 «Thlarau in kawhhranpawl hnenih a sim mi hi hna a neitu cun thei seh,» ti mi thilpawl a sim,› tiin ngan aw.
Laodisia Kawhhran Hnenah
14 «Cule Laodisia kawhhran vancungmi hnenah,
‹Cuih thilpawl hnuah, Pathian sersiam miih Hrampi, Theihpitu Rinum le Dik, Amen in, 15 «Na hnaṭuan mipawl ka thei, nang cu daih khal na dai lo ih, săt khal na sa lo. Na daih simaw, na săt simaw ka duh. 16 Cuticun nang cu dai si lo, sa si lo, hlum fangfang na si ruangah ka kâ sung ihsin ka lo khaksuak ding. 17 Ziangruangahtile nang in, ‹Ka lian, thilri thawn ka neinung ih, ṭulsam mi zianghman ka nei lo,› na ti ih, mizawnzai, zangfahumza, mifarah, mitcaw le taklawngih um na sizia na theiaw lo a si. 18 Na len theinak dingah meisa sungih hniksak mi sui, na taklawng ningzahnak a lănglonak dingah na hruh ding mi sinfen var siseh, khua na hmuh theinak dingah na mit hnih ding mitna si ka hnenah lei dingin thurawn ka lo pe a si.
19 «Ka duhdawt mi pauhpauh cu ka kawk ih nun ka sim ṭheu. Curuangah ṭhahnemngai awla, na lung thleng aw. 20 Ngai hnik, sângka hramah dingin ka king. Zokhal ka aw a thei ih sângka a ăwn ah cun a hnenah ka lut ding ih, a hnenah zanriah ka ei ding, cule anih khal ka hnenah a ei ve ding. 21 Ka neh ih, ka Pa hnenah a laltokham ih ka to bangin a nehtu cu ka laltokham ah, ka hnenah ka toter ve ding.
22 «Thlarau in kawhhranpawl hnenih a sim mi hi hna a neitu cun thei seh,» ti mi thilpawl a sim,› tiin ngan aw,» tiah a ti.
Van ih Laltokham
1 Cuih thilpawl hnuah ka hun zoh ih, ngai hnik, van ah sângka a áwngaw. Cule a hmaisabikih ka theih mi tawtawrawt aw vekih i betu khan, «Hi tawkah hung so aw, hi hnuih thil ra thleng tengteng ding mipawl ka lo hmuh ding,» tiah i ti.
2 Hmakhatteah kei cu Thlarau in ka um: cule, ngai hnik, laltokham pakhat cu van ah retin a um ih, cuih laltokham ah cun Mi pakhat a to. 3 Cule cuih a totu Pa cu jasper le sardias lung mankhung vekin a lang. Cuih laltokham kimvel cu vangro, emerald lung mankhung vekih lang mi in a kulh. 4 Cuih laltokham kimvelah laltokham 24 a um. Cuih laltokhampawl parah upa 24, kâwrfual var hruhin an to kha ka hmu; cule an lu ah sui lallukhum an khum. 5 Cule cuih laltokham ihsi cun nimthlakaupawl, khawripawl le awpawl siseh an ra suak. Laltokham hmaiah a alh mi meito pasarih an um, cupawl cu Pathian Thlarau pasarih pawl kha an si.
6 Laltokham hmaiah kristal vek a si mi thlalang tifinriat a um. Cule laltokham laiah siseh, a kimvelah siseh, dung lam le hmai lam mit ih a khat mi thilnung pali an um. 7 A pakhatnak thilnung cu kiosa vek a si, a pahnihnak thilnung cu câwpa no vek a si, a pathumnak thilnung cun minung vekin mithmai a nei ih, a palitnak thilnung cu a zam mi muvanlai vek a si. 8 Cuih thilnung pali pawl cun thla paruk cio an nei ih, an leng lam le sung lam cu mit in a khat. Cule annih in,
«Bawipa Pathian Ziangkimtithei,
A um zo mi le a um lai mi le a um leh ding mi cu,
A thianghlim, a thianghlim, a thianghlim,»
tiah sun le zan cawl loin an ti.
9 Cuih thilnung pali pawl cun kumkhua kumkhuaih a nung mi laltokham ih a totu Pa hnenah cawimawinak, upatnak le lungawinak an hlăn tiktikah, 10 upa 24 pawl cu laltokham ih a totu Pa hmaiah an băwkkhup ih, kumkhua kumkhuaih a nung mi cu an bia, cule an lallukhumpawl cu laltokham hmaiah an sēp ih,
11 «Maw Bawipa, nang cu ropitnak siseh, sunparnak siseh, huham siseh cotlak na si.
Ziangahtile nang in ziangkim na sersiam ih,
Nangmai duhnak ruangih ra um le sersiam mi an si,»
tiah an ti.
Cazual le Tuufa No
1 Cule laltokham parih a totu paih vawrh lam kut ah a sung lam le a leng lamih ngan mi cazual, erhpitnak pasarih erhpit mi cu ka hmu. 2 Cun a cak zet mi vancungmi pakhat ka hmu ih, aw ring zetin, «Zo so hih cazual pharh ih, erhpit mipawl phawihtlak um?» tiah a au. 3 Cule van ih a um mi siseh, leitlun ih a um mi siseh, lei hnuaiih a um mi khal siseh, zohman in cuih cazual a pharh theitu an um lo ih, a sung lam zoh theitu khal an um lo. 4 Cuih cazual cu siar dingah pharh ih a sung lam khal zohtu dingah a tlak mi zohman hmuh an si lo ruangah, nasazetin ka ṭap. 5 Cun upapawl lakih pakhat in ka hnenah, «Ṭap hlah, ngai hnik, Judah hnámih Kiosa, David-ih Búlhram cun cuih cazual pharh ding le erhpit mi pasarih phawih dingah a neh zo,» tiah i ti.
6 Cule ka zoh ih, ngai hnik, laltokham le thilnung pali le upapawl lakah thah zo mi vek Tuufano ding ka hmu, cuih Tuufano cun ki pasarih le mit pasarih a nei. Cupawl cu leitlun pumpuluk ih thlah mi Pathian Thlarau pasarih pawl an si. 7 Cun anih cu a ra ih, laltokham parih a totu paih kut vawrh lamih cazual cu a lâk. 8 Cun cuih cazual a lâkngah tikah, thilnung pali le upa 24 pawl cu ṭingṭang le rimhmui thawi a khat mi sui khengkûm keng cio in Tuufano hmaika-ah cun an băwkkhup. Cuih rimhmuipawl cu mithiangpawlih thlacamnak a si. 9 Cule hla thar an sak ih,
«Nang cu cuih cazual latu dingah le
Erhpit mipawl phawihtu dingah na tlak a si.
Ziangahtile nang cu thah na si zo ih,
Nang cun na thisen in hnám kip, ṭawng kip, mi kip le phun kip lak ihsin
Pathian hrangah in rak tlen zo.
10 Cule kan Pathian hrangah kannih cu siangpahrang ah le puithiam ah in rak tuah zo.
Cun lei parah kan uk ding,»
tiah an ti.
11 Cun ka hun zoh ih, laltokham le thilnungpawl le upapawl ih kimvelah cun vancungmi tampi aw ka thei. Cuih vancungmipawlih tam lam cu siar cawk lo le thawng tampi an si. 12 Cupawl cun aw ring zetin,
«Thah mi Tuufano cu
Huham, lennak, fimnak, cahnak, cawimawinak, ropitnak le thangṭhatnak cotlak a si!»
tiah an ti.
13 Cule van ah siseh, leitlun le lei hnuai khalah siseh, tifinriat sungih a um mi siseh, cuih sungih a um mi hmuahhmuah cun,
«Laltokham ih a totu le Tuufano hnenah cun, thangṭhatnak siseh, cawimawinak siseh, ropitnak siseh, huham siseh kumkhuain kumkhua tiang um seh!»
tiah an ti ka thei.
14 Cun thilnung pali pawl cun, «Amen!» tiah an ti. Upa 24 pawl khal cun kumkhuain kumkhua tiang a nung mi Pa cu băwkkhupin an bia.
Erhpitnak Pasarih
1 Cun Tuufano in erhpit mi pasarih lakih pakhat a phawih lai kha ka hmu. Cule thilnung pali pawl lakih pakhat in khawri aw bangtukin, «Ra awla, zoh hnik,» tiih a ti ka thei. 2 Cule ka hun zoh ih, ngai hnik, ráng var pakhat ka hmu, a parih a totu pa cun thál pakhat a keng. Cule a hnenah lallukhum an pe ih, neh ding le neh vivo dingin a fehsuak.
3 Erhpitnak pahnihnak a phawih tikah, thilnung pahnihnak in, «Ra awla, zoh hnik,» tiih a ti ka thei. 4 A dang ráng pakhat a ra suak, cuih ráng cu a sen. Cule pakhat le pakhat an thahawktăwn theinak dingah a parih a totu pa hnenah leilung ihsin daihnak lakhlo theinak huham an pe, a hnenah ralnâm tumpi khal an pe.
5 Erhpitnak pathumnak a phawih tikah, thilnung pathumnak in, «Ra awla, zoh hnik,» tiih a ti ka thei. Cule ka zoh ih, ngai hnik, ráng dum pakhat a um; a parih a totu pa cun a kut ah cuaithlainak pakhat a keng. 6 Cule thilnung pali pawl lak ihsin aw pakhat ka thei ih, «Dinari paisa pakhat in sangvut akhoinik khat, barli sangvut khoinik thum ah dinari paisa pakhat, asinan hriak le sabitzu cu na siatsuah lo pei,» tiah a ti kha ka thei.
6:6a khoinik: Grik ṭawng a si ih khoinik khat cu no li hrawng a si.
7 Erhpitnak palitnak a phăwih tikah, thilnung palitnak in, «Ra awla, zoh hnik,» tiih a ti ka thei. 8 Cun ka zoh ih, ngai hnik, ráng râm pakhat a um, a parih totupaih hmin cu ‹Thihnak› a si. Cule Mithi khua in amah cu a run thlun. Cun an hnenah leilung tlun mi ṭhen li ih ṭhen khat, ralnâm in siseh, rilrawnnak in siseh, thihnak in siseh, leilung sahrangpawl in siseh that dingin huham pek an si.
9 Erhpitnak pangatnak a phawih tikah, Pathian kamsuakthu ruangah le an pawm mi theihternak thu ruangih thah a tuar mipawlih thlarau cu biakṭheng hnuaiah ka hmu hai. 10 Cule ring zetin, «Maw Bawipa, a thianghlim mi le a dik mi, leitlun ih a cêng mipawl parah ziang tik tiang so thuṭhen loin le kan thisen phuba la loin na um ding?» tiah an au. 11 Cun an hnenah kâwrfual râng pek cio an si. Cule anmah bangtukih thah a si ding mi an sálpipawl le an unaupawl thah kim an si hlanlo, cān málte sung cawl hrih dingih sim an si.
12 Erhpitnak paruknak a phawih tikah, ngai hnik, ling nasazet a hnîn, ni cu buri hmul dum vekah a cang ih, thlapi cu thisen vekah a cang. 13 Cule thlipi in theipi kung a nuai ruangih a kuhpawl an tlak vekin, van arsipawl cu lei ah an tla. 14 Cun van cu cazual vekin a zualawhlo ih, tlang le tikulh hmuahhmuah cu an umnak hmun ihsin an ṭhawn ṭheh.
15 Cule leilung ih siangpahrangpawl, mithupipawl, milianpawl, ralbawipipawl, micakpawl, sál hmuahhmuah le miluat hmuahhmuah cu lungpûk sungah le tlang ih lungpi karlakah an relh. 16 Cun tlangpawl le lungpipawl hnenah, «In nĕn uhla, laltokham parih a totu paih hmai ihsin le Tuufano-ih thinlingnak ihsin in phen uh! 17 Ziangahtile a thinlingnak ni rapthlak cu a ra thleng zo a si hi, zo so a ding thei ding?» tiah an ti.
Israel-mi 144000
1 Cuih thilpawl hnuah leilung par, tifinriat parah le ziang thingkung par hmanih thli hrang lo dingin, lei thli pali cu kai in leilung kil li ih a ding mi vancungmi pali ka hmu. 2 Cun nisuahnak lam ihsin a hung suak mi, a nung mi Pathian-ih tacik a nei mi a dang vancungmi pakhat ka hmu. Cule anih cun leilung le tifinriat siatsuah dingih thupek mi vancungmi pali hnenah aw ring zetin, 3 «Kan Pathian siahhlawhpawl an cal ih tacik kan khĕn thluh hlanlo leilung siseh, tifinriat siseh, thingkungpawl siseh siatsuah hlah uh,» tiah a au. 4 Cule tacik khĕn mipawlih an mipum zât cu ka hna in ka thei. Israel-mipawlih hnám kip ihsin ting khat le thawng sawmli le thawngli cu tacik khĕn an si.
5 Judah hnám ihsin mi 12000 cu tacik khĕn an si,
Reuben hnám ihsin mi 12000 cu tacik khĕn an si,
Gad hnám ihsin mi 12000 cu tacik khĕn an si,
6 Asher hnám ihsin mi 12000 cu tacik khĕn an si,
Naftali hnám ihsin mi 12000 cu tacik khĕn an si,
Manasseh hnám ihsin mi 12000 cu tacik khĕn an si,
7 Simeon hnám ihsin mi 12000 cu tacik khĕn an si,
Levi hnám ihsin mi 12000 cu tacik khĕn an si,
Issakar hnám ihsin mi 12000 cu tacik khĕn an si,
8 Zebulun hnám ihsin mi 12000 cu tacik khĕn an si,
Joseph hnám ihsin mi 12000 cu tacik khĕn an si,
Benjamin hnám ihsin mi 12000 cu tacik khĕn an si.
Puan Var Sĭn Mipi Tam Zet
9 Himi thilpawl hnuah ka hun zoh ih, ngai hnik, zohman ih siar cawk lo mipi ka hmu. Cuih mipi cu phun kip le hnám kip le mi kip le ṭawng kip ihsi a ra mi an si. Kâwrfual var hruhin an kut in ṭhulhfau hnah an keng ih, laltokham hmai le Tuufano hmaiih an din kha ka hmu. 10 Cule annih in aw ring zetin, «Laltokham parih a totu kan Pathian le Tuufano hnenah rundamnak a um!» tiah an au.
11 Vancungmi hmuahhmuah cu laltokham le upapawl le thilnung pali pawlih kimvelah an ding. Cule laltokham hmaiah cun băwkkhupin, Pathian an bia.
12 «Amen! Thangṭhatnak siseh, ropitnak siseh, fimnak siseh,
Lungawi thu simnak siseh, cawimawinak siseh, huham siseh, cahnak siseh a kumkhuaih kumkhua tiang
Kan Pathian hnenah um seh. Amen,»
tiah an ti.
13 Cun upapawl lakih pakhat cun a sâng ih ka hnenah, «Hi kâwrfual var hruhtupawl hi zo an si, khuitawk ihsin an ra?» tiah i ti.
14 Cule kei in a hnenah, «Bawipa, nangmah in na thei,» tiah ka ti. Cun anih in ka hnenah, «Hipawl hi harsatnak rapthlak sung ihsi a ra suak mi an si ih, an kâwrfual kha Tuufano thisen ah sawp in, an varter.
15 Curuangah annih cu Pathian laltokham hmaiah an cêng ih, a sun a zanin a hmun thianghlim ah a rawng an bawl. Cule laltokham parih a totu Pa cu an lakah a um ding. 16 Annih cu an ril a râwng nawn lo ding ih, an ti khal a hâl nawn lo ding. Ni khal in a săt hai nawn lo ding ih, ziang sătnak khal an tuar lo ding. 17 Ziangahtile laltokham laiih a um mi Tuufano in anmah cu tuukhāltu bangin a kilkhawi hai ding ih, tihna nung umnak ah a hruai hai ding. Cule Pathian in an mit ihsin mitthli hmuahhmuah cu a hnulhlo thluh ding,» tiah i ti.
Erhpitnak Pasarihnak le Sui Rimhmui Urtu
1 Tuufano in erhpitnak pasarihnak a phawih tikah, van ah nazi hrek hrawng a dai ṭhepṭhep. 2 Cule Pathian hmaika-ih a ding mi vancungmi pasarih pawl cu ka hmu ih, an hnenah tawtawrawt pasarih pek an si. 3 Cun a dang vancungmi a ra ih, rimhmui urnak sui ih tuah mi meiling khēng pakhat kengin biakṭheng kiangah a ding. Mithiangpawl hmuahhmuah ih thlacamnak thawn laltokham hmai, sui biakṭheng parih a hlăn theinak dingah rimhmui tam zet a hnenah pek a si. 4 Cule rimhmui khu cu vancungmi kut ihsin mithiangpawlih thlacamnak thawn Pathian hmaika-ah a hung kai. 5 Cun cuih vancungmi cun rimhmui urnak meiling khēng cu a lâk ih biakṭheng meisa thawn a khatter, cule leilung parah a hlăwn. Cun awthâwmpawl siseh, khawripawl siseh, nimthlakaupawl siseh, linghnîn siseh a um.
Tawtawrawt Pasarih
6 Cun tawtawrawt pasarih kengtu vancungmi pasarih pawl cu an tawtawrawt phaw dingin an timtuahaw.
7 A pakhatnak vancungmi in a tawtawrawt a phaw ih, thisen thawi a rawiaw mi, rial le meisa a um cih ih, cupawl cu leilung parah hlăwnthlak an si. Cule thingkung ṭhen thum ih ṭhen khat a kāng ih, hrampi hring hmuahhmuah khal an kāng ṭheh.
8 Cun a pahnihnak vancungmi in a tawtawrawt a phaw ih, tlang tumpi meisa kāng lai vek cu tifinriat sungah hlăwnthlak a si. Cule tifinriat ṭhen thum ih ṭhen khat cu thisen ah a cang. 9 Cule sersiam mi, tifinriat sungih a um mi nunnak a nei mipawl ṭhen thum ih ṭhen khat an thi ih, lăwngpawl khal ṭhen thum ih ṭhen khat an siat thluh.
10 Cun a pathumnak vancungmi in a tawtawrawt a phaw ih, meito vekih alh arsi tûm zet pakhat cu van ihsin tivapawl le cirhtipawl ṭhen thum ih ṭhen khat parah a tla. 11 Cuih arsi hmin cu Hnîtkhâ tiah an ko, tidai ṭhen thum ih ṭhen khat cu hnîkkhâ ah a cang. Cule tidai cu a khât tuk ruangah cuih tidai ruangah mi tampi an thi.
12 Cun a palitnak vancungmi in a tawtawrawt a phaw ih, ni ṭhen thum ih ṭhen khat, thlapi ṭhen thum ih ṭhen khat le arsi ṭhen thum ih ṭhen khat cu tidanglam an si, cutin cupawlih ṭhen thum ṭhen khat cu a thim. Sun khal ṭhen thum ih ṭhen khat a vâng lo ih, zan khal cuvek thothoin a si ve.
13 Cule ka hun zoh ih, van ih a zam mi vancungmi pakhat ka hmu. Cuih vancungmi in aw ring zetin, «Vancungmi pathum pawl in an phawt lai ding mi tawtawrawt aw ruangah leitlun ih a um mipawl an hmakhua a pit, an hmakhua a pit, an hmakhua a pit!» tiah a au.
1 Cun a pangatnak vancungmi in a tawtawrawt a phaw ih, arsi pakhat van ihsin leilung ih a tla cia mi cu ka hmu. A hnenah tawnet nei lo khur tawhfung pek a si. 2 Cule anih cun tawnet nei lo khur a áwng ih, cuih khur ihsin meikhu, rawhtitnak mei nasazet khu vek a hung suak. Cun cuih khur ih meikhu ruangah ni le boruak cu an thim. 3 Cun cuih meikhu ihsin kharbawk leilung parah an ra suak ih, cuih kharbawkpawl cu leilung ih tlangkaikuangpawl in thuneihnak an neih vekin an hnenah thuneihnak pek an si. 4 Cuih kharbawkpawl cu lei ih hrampi siseh, ziang thil hring le ziang thingkung hman siatsuah loin, an cal ih Pathian tacik nei lo minungpawl lawng siatsuah dingih thupek an si. 5 Cule cuih kharbawkpawl cu minung that loin, thla nga sung hrem sawn dingin thuneihnak pek an si. Mi an hrem tikih a natzia cu tlangkaikuang in mi a hĕn tikih a nat vek kha a si. 6 Cuih cān ah minung in thihnak an hawl ding ih, an hmu hrimhrim lo ding. Thih an duh ding ih, thihnak in a tlansan hai ding.
7 Cuih kharbawkpawlih pianzia cu raldonak hrangih a tiar mi ráng vek an si. An lu parah sui lallukhum vek an khum ih, an hmai cu minung hmai vek an si. 8 Nunau sám vek an nei ih, an ha cu kiosa ha vek a si. 9 Cule thir awmphaw vek a si mi awmphaw an nei ih, an thla zâp awn cu ral do dingih a tlân mi ránglêng tampi awn tlurtlo vek a si. 10 Cuih kharbawkpawl cun tlangkaikuang mei vek mei an nei ih, an mei ah mi hĕnnak hmanrua a um. Thla nga sung minungpawl siatsuah theinak thuneihnak an nei fawn. 11 Cule anmah uktu siangpahrang an nei ih, cuih an siangpahrang cu tawnet nei lo khur ih vancungmi a si. A hmin cu Hebru ṭawng in aAbaddon a si ih, Grik ṭawng in a hmin cu bApollyon a si.
9:11a Abaddon: Siatralnak.
9:11b Apollyon: Siatsuahtu.
12 Hmakhuapihnak pakhat cu a cem zo. Ngai hnik, hipawl hnuah hmakhuapihnak pahnih a ra lai ding.
13 Cun a paruknak vancungmi in a tawtawrawt a phaw ih, Pathian hmaika-ih a um mi sui biakṭheng ih ki pali ihsin aw pakhat ka thei. 14 Cuih aw cun tawtawrawt kengtu a paruknak vancungmi hnenah, «Zufraṭis tivapi ih ṭawn mi vancungmi pali kha phawih aw,» tiah a ti. 15 Cule cuih vancungmi pali cu thlah an si ih, annih cu hih nazi le ni le thla le kum ih minung ṭhen thum ih ṭhen khat that dingah rak timtuah mi an si. 16 Cun ráng ralkap mipum zât cu million zahnih an si tiah hna in ka thei. 17 Cule larnak ah cun rángpawl le an parih totupawl cu hitivekin ka hmu hai: meisa vekih sen, dumpâwl le kât vekih aire awmphaw an hruh. Rángpawlih lu cu kiosa lu vek an si ih, an kâ ihsin mei le meikhu le kât alh a suak. 18 Cuih thil pathum, rángpawlih kâ sung ihsin a suak mi meisa, meikhu le kât meisa pawl in minung ṭhen thum ih ṭhen khat cu an that. 19 Ziangahtile an thuneihnak cu an kâ le an mei ah a um. Ziangahtile an mei cu rul vek a si ih, an mei ah lu an nei, cumi in mi an tuahmawh.
20 Cun cuih hremnakpawl ih thah lo mi, a tāng mipawl cu khawsiapawl le sui, ngun, dar, lungto le thing ih tuah mi, khua a hmu thei lo mi, a thei thei lo mi, a feh thei lo mi milempawl be lo dingin, an kut ih tuah mi thilpawl ihsin an lung an thleng cuang lo. 21 Cule an laithahnak, an dawi hmannak, nunau-mipa sual an tuahnak le an rûkrûknak pawl ihsin an lung an thleng cuang lo.
Vancungmi le Cazual Fate
1 A cak zet mi a dang vancungmi pakhat mero thawi thuamaw, van ihsi rung ṭum ka hmu. A lu ah vangro a zām ih, a hmai cu ni vek a si, a ke cu meisa ṭhuam vek an si. 2 A kut in kau cia mi, cazual fate a keng. A vawrh lam ke cu tifinriat parah a ret ih, a keh lam ke cu leilung parah a ret. 3 Cule kiosa hûk vekin, aw ring zetin cuih vancungmi cu a au ih a au ṭheh tikah, khawri pasarih pawl in an aw an suah. 4 Cun khawri pasarih pawl in an aw an suahngah tikah ngan ka tum; asinan van ihsin aw pakhat in ka hnenah, «Khawri pasarih pawl ih sim mi thilpawl cu hminsin aw, ngan hlah,» tiah i run ti.
5 Ka hmuh mi, tifinriat par le leilung parih ding vancungmi in a kut cu van lamah a phar ih, 6 kumkhuain kumkhua tiang a nung mi, van le a sungih a um mi thilpawl, leilung le a sungih a um mi thilpawl, tifinriat le a sungih a um mi a sersiam mi thilpawl salin, tikcucān a um nawn lo ding tiin sia a săm. 7 Asinan a pasarihnak vancungmi in a tawtawrawt a phawt zik tikah a siahhlawh profetpawl hnenih a rak thăn zo mi Pathian thuthup kha a kim thluh thlang ding, tiah a ti.
8 Cun van ihsi ka theih mi aw khan in run be lehsal ih, «Feh awla, tifinriat par le leilung parih a ding mi vancungmi kut sungih kau cia mi cazual fate kha va la aw,» tiah i ti.
9 Cuih vancungmi hnenah cun ka va feh ih, a hnenah, «Khaih cazual fate kha i pe aw,» tiah ka ti.
Cule anih in ka hnenah, «La awla, ei thluh aw, na pum a khăter ding, asinan na kâ sungah cun khuaitizu bangin a thlum ding,» tiah i ti. 10 Cun cuih cazual fate cu vancungmi kut ihsin ka lâk ih, ka ei thluh. Cuih cazual fate cu ka kâ sungah cun khuaitizu bangin a thlum. Asinan ka ei thluh veten ka pum cu a khâ. 11 Cule anih in ka hnenah, «Minung tampi, miphunpawl, ṭawngpawl le siangpahrangpawl hnenah profet thuphuan in thu na phuang lehsal tengteng ding,» tiah i ti.
Theihpitu Pahnih
1 Cun kianghrăwl vek a si mi tahnak phaikung in pe ih, cuih a ding mi vancungmi cun, «Tho awla, Pathian temple hmun thianghlim le biakṭheng le a sungih Pathian a betupawl cu tah aw. 2 Asinan temple hmun thianghlim leng lamih tual cu tân aw, tah hlah, ziangahtile cumi cu Zentelpawl hnenih pek a si zo. Annih cun khawpi thianghlim cu thla 42 sung an ke hnuaiah an pál ding. 3 Cule ka thutheitu pahnih hnenah huham ka pe ding ih, annih cun buri-hnipuan hrukin ni 1260 sung profet thuphuan in thu an phuang ding,» tiah a ti. 4 Hite cu lei Pathian hmaiih a dingtu olif thing pahnih le meitoṭhuam pahnih an si. 5 Cule mi pakhat khat in anmah tuahmawh a tum asile, an kâ ihsin meisa a suak ih, an ralpawl cu an kangrál thluh. Cule mi pakhat khat in annih cu tuahmawh a tum asile, cutivekih thah tengteng a si ding. 6 Hi theihpitu pahnih hin profet thuphuan ih thu an phuan sung hmuah ruah sur lo ko van khar theinak thuneihnak an nei. Cule an duh tikcān pauhih thisen ih canter theinak tipi parah thuneihnak le leilung hi hremnak hmuahhmuah ih tidanglam theinak thuneihnak an nei.
7 An thutheihternak an ṭheh tikah, tawnet nei lo khur ihsi a hung suak mi sahrang in anmah cu a do ding, a neh hai ding ih, a that hai ding. 8 Cule an ruang cu khawpi ropi zin ah hlum an si ding, cuih khawpi ropi cu thlarau lamin Sodom le Izip tiih kawh a si. Cuih hmun ah kan Bawipa khal khĕnbet a si. 9 Cun minungpawl, hnámpawl, ṭawngpawl le miphunpawl in an ruang cu ni thum le a hrek sung an zoh ding ih, thlān ih phum an siang lo ding. 10 Cule cuih profet pahnih cun leitlun ih a cêng mipawl an tinat ruangah an thih tikah, leitlun ih cêngpawl cu lungawiaipuangin an um ding ih, năwmnak an tuah ding, pakhat le pakhat thilpek an kuataw ding.
11 Cun ni thum le a hrek hnuah Pathian hnen ihsin an sungah nunnak Thlarau cu a rung lut ih, an ke in an ding, cule anmah hmutupawl cu ṭihnak nasazetin an khat. 12 Cule, «Hi tawkah hung so uh,» tiin van ihsi aw ring zet an thei. Cun mero lakah van ah an kaiso ih, an ralpawl in an hmu.
13 Cu laifangah ling nasazetin a hnîn ih, khawpi cu ṭhen hra ih ṭhen khat a cim. Cuih linghnînnak ah mi 7000 an thi. Cule a tāng mipawl cu an thin a phâng ih van Pathian hnenah cawimawinak an pe.
14 Hmakhuapihnak pahnihnak cu a cem zo. Ngai hnik, hmakhuapihnak pathumnak a ra thleng cing ding.
Tawtawrawt Pasarihnak
15 Cun a pasarihnak vancungmi in a tawtawrawt a phaw ih van ah aw ring zet a suak, «Hi leitlun lalrampawl cu kan Bawipa le a Khrih-ih lalram ah an cang zo. Amah in kumkhuain kumkhua tiang a uk ding!» tiah an ti. 16 Cule Pathian hmaiih anmai laltokham parih a totu upa 24 pawl cun băwkkhupin Pathian an bia.
17 «Maw Bawipa Pathian, Ziangkimtithei,
Atu ih a um lai Mi le a rak um zo Mi le a ra lai ding Mi,
Na huham ropi cu na la ih, na uk ruangah na hnenah lungawi thu kan lo sim a si.
18 Miphunpawl cu an thin a heng ih,
Na thinlingnak a rung thleng ve.
Mithipawl thu na ṭhen ding cān cu a rung thleng zo,
Cule na siahhlawh profetpawl le mithiangpawl, na hmin a ṭihzahtu, mithupi le
Mithupilopawl hnenih lawmman pek cān khal a rung thleng zo ih
Leilung siatsuahtupawl siatsuah cān khal a thleng a si,»
tiah an ti.
19 Cun van ah Pathian temple cu a áwngaw ih, a thukham kuang cu temple sungah a ra lang. Cule nimthla a kau, awpawl a thang, khua a ri, ling a hnîn ih, rial nasazetin a tla.
Nunau Pakhat le Rulhreng
1 Cun van ah hminsinnak ropi zet a lang: nunau pakhat cu ni thawn a thuamaw, a ke thuaiah thlapi a um ih, a lu parah arsi hleihnih nei lallukhum a khum. 2 Cun cu nu cun fa a rai ih, fa a hrin zikah fahrinnat tuarin a au.
3 Cule van ah a dang hminsinnak a ra langsal: ngai hnik, lu pasarih le ki pahra nei, a lu parih lallukhum pasarih a khum mi rulhreng sen tumpi a um. 4 A mei in van ih arsi ṭhen thum ih ṭhen khat kha a dir ih, leilung ah a hlăwnthlak. Cule cuih rulhreng cu nau hring zikte nunaunu hmaiah anaute a suah veteih dawlh dingin a ding. 5 Cu nu cun miphun hmuahhmuah thir kianghrăwl thawi uktu ding mipa a hring. Cule a naute cu Pathian hnen, a laltokham ah cun cawisoh a si. 6 Cun ni 1260 sung an cawm theinak dingah cuih nunau cu ramṭhing ih a hmun neih mi, Pathian ih a timtuahsak mi ah a tlân.
12:4a naute: Jesu a simnak a si.
7 Cule van ah doawknak a um: Maikal le a vancungmipawl cun cuih rulhreng cu an do ih, rulhreng khal in a vancungmipawl thawn a do hai ve. 8 Asinan rulhreng le a vancungmipawl cun an neh lo ruangah, van ah umnak hmun an nei nawn lo. 9 Cun rulhreng maksak cu an hlăwnthlak, cuih khuahlan rulpi cu Diabol tiin le leilung pumpuluk bumtu Setan tiih kawh a si. Anih cu leilung ah an hlăwnthlak ih, a vancungmipawl khal amah zawngah hlăwnthlak an si ve.
10 Cun van ah aw ring zet pakhat ka thei. Cuih aw cun, «Atu ah cun rundamnak, cahnak, kan Pathian-ih lalram le a Khrih-ih thuneihnak cu a ra thleng zo, ziangahtile kan unaupawl hēktu, kan unaupawl Pathian hmaiih a sun a zanih hēktu cu hlăwnthlak a si zo. 11 Cule annih in Tuufano thisen le an thutheihternak ṭawngkam in amah cu an neh ih, thih ngam tiangin an nunnak an ui lo. 12 Curuangah nannih vanpawl le nannih a sungih cêngpawl lungawiaipuangin um uh! Diabol cun cān tawite lawng a nei ti theiin, nasazetih thinlingin nan hnen lamih a rung ṭum ruangah leilung le tifinriat luahtupawl cu nan hmakhua a pit a si!» tiah a ti.
13 Cun rulhreng in leilung ah hlăwn a si ti a theih tikah, fapa naute a hringtunu kha a tiduhdah. 14 Cule cuih nunau cu amai umnak hmun ramṭhing ih a zam theinak dingah muvanlai tûm zet thla pahnih pek a si. Cu tawkah rulpi ih hmuh băn lo dingin cān khat le cānpawl le cān hrek sung cawm a si ding. 15 Cun rulpi cun cuih nunau kha tilian in a fĕnhlo theinak dingah a kâ sung ihsin tilian vekin cuih nunau dungah ti a phûtsuak. 16 Asinan leilung in cuih nunau cu a bawm, leilung cu a kâ a âng ih, rulhreng in a ka sung ihsin a suahter mi tilian kha a dawlh thluh. 17 Rulhreng cu cuih nunau parah a thin a heng tuk lawmmam ih, nunau cithlah a tāng mipawl, Pathian thupek a thluntupawl le Jesu Khrih thu theihter mi a thluntupawl kha do dingin a fehsuak.
A Pakhatnak Sahrang
1 Cun tifinriat ih vunnel parah ka ding ih, tifinriat ihsin a hung suak mi sahrang pakhat, lu pasarih le ki pahra nei ka hmu. A kipawl ah lallukhum pahra a um ih, a lupawl parah Pathian thangsiatnak hmin a um. 2 Cun ka hmuh mi sahrang cu tlavâng vek a si, a ke cu saváwm ke vek a si ih, a kâ cu kiosa ka vek a si. Cule rulhreng cun a hnenah a huham le a laltokham le thuneihnak nasazet a pe. 3 Cule a lu pakhat cu thihpitlakih tuahmawh mi vek khan ka hmu. Asinan thihpitlak a si mi a hriamhma cu a dam ih, leitlun mi hmuahhmuah in cuih sahrang parah an mang a bang ih, amah an thlun. 4 Cun sahrang hnenih thuneihnak petu rulhreng cu an bia. Cule, «Hi sahrang vek zo so um? Zo in so amah cu a do thei ding?» tiah an ti.
5 Cule cuih sahrang hnenah thil ropi zetzet le Pathian thangsiat thusimnak kha pek a si ih, thla 42 sung cāngvai dingin thuneihnak khal pek a si. 6 Cun anih in Pathian hmin le a biakbûk le van ih cêngpawl thangsiatin le Pathian thangsiatin a kâ a âng. 7 Mithiangpawl do ding le anmah neh ding cu a hnenah pek a si. Cule hnám hmuahhmuah, ṭawng hmuahhmuah le miphun hmuahhmuah parih thuneihnak cu a hnenah pek a si. 8 Leilung tlunih a cêng mi hmuahhmuah, leilung sersiam thăwk ihsi thah a si mi Tuufano Nunnak Cazual sungih hmin ngan a si lo mi hmuahhmuah in sahrang cu an be ding.
9 Zokhal hna a neih asile thei seh.
10 Sáltannak ih mi a hruaitu cu amah khal sáltannak ah a feh ve ding. Ralnâm thawi mi a thattu cu amah khal ralnâm ih thah a si tengteng ding. Hi tawkah hin mithiangpawlih tuarfainak le zumnak a lang.
A Pahnihnak Sahrang
11 Cun leilung sung ihsi hung suak mi sahrang dang pakhat ka hmu, anih cun tuu ki vek ki pahnih a nei ih, rulhreng vekin a ṭawng. 12 Cule amai hlanih sahrang hmaisasawnih thuneihnak hmuahhmuah kha cuih sahrang hmaisasawn hmaika-ah cun a hmang. Leilung le a sungih cêngpawl cu thihpitlak hriamhma damter a si mi sahrang pakhatnak kha a biakter hai. 13 A pahnihnak sahrang cun hminsinnak nasazetzet a tuah, van ihsi meisa tlakter tiangin milaipawl mithmuhah a tuah. 14 Cule sahrang hmaisasawn mithmuhah tuah dingih pek a si mi hminsinnakpawl hmangin lei ih cêngpawl cu a bum hai. Lei ih cêngpawl hnenah ralnâm ih tuahmawh ih nungsal mi sahrang lem tuah dingin a fial hai. 15 A pahnihnak sahrang hnenah cuih sahrang pakhatnak lem sungih thaw pek theinak huham pek a si, cutin sahrang lem cu a ṭawng thei ih, cuih sahrang lem a be duh lo tu hmuahhmuah thahter theinak a tuah thei fawn. 16 Cuih sahrang in mi hmuahhmuah, mitûm siseh, mite siseh, milian siseh, mifarah siseh, sál siseh, miluat siseh, an vawrh lam kut ah siseh, an cal ah siseh hminsinnak a coter hai. 17 Cule cuih hminsinnak, asilole sahrang hmin, asilole sahrang hmin ih nambat neitu siarlo, zohman in an lei in an zuar thei lo ding.
18 Hi tawkah fimnak a um. Theihthiamnak a neitu cun sahrang nambat cu tuak seh, ziangahtile cuih nambat cu mi pakhat nambat a si ih, a nambat cu 666 a si.
Tuufano le Mi 144000
1 Cun ka hun zoh ih, ngai hnik, Zion Tlang parah Tuufano a ding ka hmu. Cule amah thawn mi ting khat le thawng sawmli le thawngli an um ih, an cal ah a paih hmin ngan a si. 2 Cule van ihsin aw ka thei ih, tidai tampi aw vek le khawri nasazet aw vek a si. Cun ṭingṭang tumtupawlih an ṭingṭang tum aw khal ka thei fawn. 3 Annih in laltokham le thilnung pali le upapawl hmaiah cun hla thar si awm tak khi an sak. Cule cuih hla cu leilung ihsi tlen a si mi minung ting khat le thawng sawmli le thawngli pawl siarlo zohman in an zir thei lo. 4 Hipawl cu nunaupawl thawi a bawrhbangawter lo mi an si. Ziangahtile annih cu mihim an si. Hipawl cun Tuufano cu a fehnak kip ah an thlun. Minungpawl lak ihsin tlen an si ih, Tuufano le Pathian hrangah rah hmaisabikpawl an si. 5 Cule an kâ ah mi bumnak thu a um lo. Ziangahtile annih cu Pathian laltokham hmaiah sawisel ding um lo an si.
Vancungmi Pathum
6 Cun leitlun ih a cêng mipawl, miphun kip, hnám kip, ṭawng kip le mi kip hnenih phuan ding mi kumkhaw thuthangṭha nei a dang vancungmi van ih a zam ka hmu. 7 Anih cun aw ring zetin, «A thuṭhennak tikcucān a ra thlen zo ruangah Pathian cu ṭihzah uhla, a hnenah thangṭhatnak pe uh. Van siseh, leilung siseh, tifinriat siseh, cirhtipawl siseh sersiamtu cu bia uh,» tiah a ti.
8 Cule a dang vancungmi in a run thlun ih, «A tlu e, a tlu e, ram ropi Babilon cu! Ziangahtile miphun hmuahhmuah kha a nunau-mipa sualnak thinlingnak sabitzu a inter thluh,» tiah a ti.
9 Cun a pathumnak vancungmi in annih cu a run thlun hai ih, aw ring zetin, «Mi zokhal sahrang le a milem bia ih, a cal ah simaw, a kut ah simaw a hminsinnak a neih asile, 10 cu pa rori cun Pathian thinlingnak sabitzu, a aithawknak no sungah zianghman rawi loih thlet mi cu a in ding. A thianghlim mi vancungmipawlih hmaiah le Tuufano hmaiah meisa le kât ih hrem a si ding. 11 Cule anmah hremnak meikhu cu kumkhuaih kumkhuain tlun van ah a so ding ih, sahrang le amai lem a betupawl le a hmin ih hminsinnak a neitu pauhpauh a sun a zan cawlhhahdamnak an nei lo ding,» tiah a ti. 12 Hi tawkah mithiangpawlih tuarfainak a um. Hi tawkah Pathian thupekpawl le Jesu zumnak a kilkhawitupawl an um.
13 Cun van ihsin aw pakhat ka thei ih, ka hnenah, «Ngan aw, ‹Atu thăwkin mithi, Bawipa ih a thi mipawl cu mithlawsuak an si.› »
«A si,» Thlarau cun a ti, «An ṭuanbăngnak ihsin an cawl ding ih, an hnaṭuan mipawl in a run thlun hai ding,» tiah i ti.
Leilung Rawl Khawm Cān
14 Cun ka hun zoh ih, ngai hnik, mero var ka hmu. Cuih mero parah cun Mi Pakhat, Minung Fapa a bang mi Pa cu a lu ah sui lallukhum a khum ih, a kut ah favah hriam zet kengin a to. 15 Cule a dang vancungmi pakhat cu temple ihsin a ra suak ih, cuih mero parih a to mi pa hnenah aw ring zetin, «Na favah hawi awla, at aw. Ziangahtile na ah ding cān a ra thleng zo, ziangahtile leilung thlairawl rah cu a hmin zo,» tiah a au. 16 Cun cuih mero parih a totu cun a favah cu leilung ah a hawi ih, leilung ihta cu ah a si.
17 Cun a dang vancungmi pakhat van temple ihsin a ra suak leh ih, anih khal cun a hriam zet mi favah a nei ve. 18 Cule a dang vancungmi pakhat, meisa tlunih thuneihnak neitu cu biakṭheng ihsin a ra suak. Cule favah hriam zet a neitu vancungmi hnenah ring zetin a au ih, «Na favah hriam zet kha hawi awla, sabit rahpawl kha an hmin thluh zo ruangah, leilung ih sabit rah bawr zetzet pawl kha khawm thlang aw,» tiah a ti. 19 Cun cuih vancungmi cun a favah cu leilung ah a vun hawi. Cule leilung ih sabit cu a khawm ih, Pathian thinlingnak sabit sawrnak maksak sungah a vun thlak. 20 Cule khawpi lengih sabit sawrnak khur ah cun an palsawr. Cule sabit sawrnak khur ihsin thisen a luangsuak. Cuih thisen ih a khuh mi cu peng 200 hrawng a sau ih, ráng kakharh thleng tiangih thûk a si.
Hremnak Pasarih Neitu Vancungmi Pasarih
1 Cun van ah a maksak zet mi le mangbangza a si mi hminsinnak dang pakhat, netabik hremnak pasarih neitu vancungmi pasarih ka hmu, cuih hremnakpawl ah cun Pathian thinlingnak a kim.
2 Cule thlalang le meisa rawiaw mi tifinriat vek ka hmu. Cule sahrang le amai lem le a hminsinnak le a hmin nambat parih nehnak cotupawl cu Pathian ṭingṭangpawl kengin thlalang tifinriat parah dingin ka hmu hai fawn. 3 Annih in Pathian sálpa Mosi hla le Tuufano hla,
«Bawipa Pathian,
Ziangkimtithei, na hnaṭuan mipawl cu a ropi ih, mangbangza a si.
Nang, mithiangpawlih Siangpahrang, na lamzinpawl cu a dik in a hman a si.
4 Maw Bawipa, zo so nangmah lo ṭihzah loin le na hmin thangṭhat loih um ding?
Ziangahtile nangmah lawng hi mithianghlim na si.
Miphun hmuahhmuah an ra ding ih,
Na hmaika-ah an lo be ding,
Ziangahtile na thuṭhennakpawl cu phuanlăng an si,»
ti mi an sak.
5 Cuih thilpawl hnuah ka hun zoh ih, ngai hnik, van ih theihternak biakbûk hmun thianghlim cu a áwngaw. 6 Cule hmun thianghlim sung ihsin hremnak pasarih nei vancungmi pasarih pawl cu a thiangfai mi puan nem var an sin ih, an ṭāng ah sui taikhap khapaw in an ra suak. 7 Cun thilnung pali lakih pakhat in vancungmi pasarih pawl hnenah kumkhua kumkhuaih a nung mi Pathian-ih thinlingnak thawi a khat mi sui khengkûm pasarih cu a pek. 8 Hmun thianghlim cu Pathian ropitnak le a huham khu in a khat, cule vancungmi pasarih pawlih hremnak pasarih cu kimter a si hlanlo zohman hmun thianghlim sungah an lut thei lo.
Pathian Thinlingnak No Pasarih
1 Cun hmun thianghlim sung ihsin aw ring zet pakhat in, vancungmi pasarih pawl hnenah, «Va feh uhla, Pathian thinlingnak khengkûmpawl kha leilung parah burh uh,» tiah a ti ka thei.
2 Cule a pakhatnak cu a feh ih, a khengkûm cu leilung parah a burh. Cule sahrang hminsinnak nei milaipawl parah le amai lem betupawl parah rimse zet mi le a nâ zet mi hma a suak.
3 Cun a pahnihnak vancungmi in a khengkûm kha tifinriat ah a burh. Cule cuih tifinriat cu mithi thisen vekah a cang ih, cuih tifinriat sungih um thilnung tinkim cu an thi ṭheh.
4 Cun a pathumnak vancungmi in a khengkûm cu tivapawl le cirhtipawl parah a burh. Cule thisen ah an cang. 5 Cule tipi vancungmi in,
«Atu ih a um Mi le um zo Mi le a um lai ding Mi, maw Bawipa, nang cu midingfel na si.
Ziangruangahtile hitivekin thu na rak ṭhen.
6 Ziangahtile annih cun mithiangpawl le profetpawl ih thisen an suah.
Cule nang in pektlak an si ruangah annih cu an in dingah thisen na pe hai,»
tiah a ti ka thei.
7 Cule biakṭheng ihsin aw dang pakhat in,
«A si ngai, Bawipa Pathian, Ziangkimtithei, na thuṭhennakpawl cu an dik ih an dingfel a si,» tiah a ti ka thei.
8 Cun a palitnak vancungmi in a khengkûm cu ni parah a burh. Cule ni hnenah milaipawl meisa thawi khăng theinak thuneihnak pek a si. 9 Cule milaipawl cu a sa zet mi ni sa in a kāng hai ih, cuih hremnakpawl parih thuneihnak neitu Pathian hmin cu an thangsiat; amah upatnak pe dingin an lung an thleng cuang lo.
10 Cun a pangatnak vancungmi in a khengkûm cu sahrang tokham parah a burh. Cule a lalram cu thim in a khat ih, a nat tuk ruangah an lei an keu. 11 An natnakpawl le an hmapawl ruangah van Pathian an thangsiat ih, an thil tipawl ihsin an lung an thleng cuang lo.
12 Cun a paruknak vancungmi in a khengkûm kha Zufraṭis tivapi parah a burh. Cule nisuahnak lam siangpahrangpawlih lamzin timtuah a si theinak dingah a ti cu a kāngcat. 13 Cule rulhreng kâ sung, sahrang ka sung le profet deu ka sung ihsin a ra suak mi butlak vek thlarau bawrhhlawh pathum ka hmu. 14 Cupawl cu khawsiapawlih thlarau, hminsinnakpawl tuah ṭheu tu an si. Annih cu Ziangkimtithei Pathian-ih ni rapthlak, doawknak ih hruaikhawm dingin leitlun siangpahrangpawl hnenah le leitlun pumpuluk ah an fehsuak.
15 «Ngai hnik, fifir vekin ka ra ding. Ralring ih a sinfen a fingkhawitu cu mithlawsuak a si, culole taklawngin a um ding ih, a ningzahnak mi in an hmu pang ding.»
16 Cule thlarau pathum pawl cun siangpahrangpawl cu Hebru ṭawng in Armageddon an ti mi hmun ah an hruaikhawm.
17 Cun a pasarihnak vancungmi in a khengkûm cu thli lakah a burh. Cule van temple sungih laltokham ihsin, «Ṭheh a si zo!» tiin aw ring zet a ra suak. 18 Cule awpawl le khawripawl le nimthlakaupawl a ra um. Linghnîn maksak, cutivekih a cak mi le a maksak mi lei milai an um thăwk ihsin a um dah kêl lo mi linghnîn a um. 19 Cun khawpi ropi cu ṭhen thum ah a ṭhenaw ih, miphunpawlih an khawpipawl khal an cim ṭheh. Cule a nasazet mi a thinlingnak sabitzu no inter dingin Babilon khaw ropi cu Pathian in a máng. 20 Cun tikulh hmuahhmuah an tlânhlo ṭheh ih, tlangpawl cu hmuh an si nawn lo. 21 Cule van ihsin rial tumpi pi, pakhat ah talent khat tluk rit milaipawl parah an tla. Hremnak cu a nasatuk ih, cuih rial hremnak ruangah milaipawl in Pathian an thangsiat.
Sahrang parih To Nunau
1 Cun khengkûm pasarih keng, vancungmi pasarih lakih pakhat ka hnenah a ra ih hitin i sim, «Hi tawkah ra hnik, tidai tampi parih to a maksak zet mi hlawhhlângnu tlunih thuṭhennak ka lo hmuh ding. 2 Leitlun siangpahrangpawl cu amah thawn nunau-mipa sualnak an tuah ih, leitlun ih a um mi milaipawl cu a nunau-mipa sual tuahnak sabitzu ri-in an um,» tiah a ti.
3 Vancungmi cun ramṭhing ah Thlarau in i hruai. Cule Pathian thangsiatnak hminpawl ih a khat mi lu pasarih le ki pahra nei sahrang senlar parih to nunau pakhat ka hmu. 4 Cuih nunau cun hnipuan sendup le senlar a hruk ih, sui le lung mankhungpawl le keplungpawl thawn a thuamaw. Cule a kut ah thil fihnungzapawl le a nunau-mipa sual tuahnak thil bawrhhlawhpawl thawi a khat mi sui no a keng. 5 Cule a cal ah,
«THUTHUP, A ROPI ZET MI BABILON,
HLAWHHLÂNGPAWL LE LEITLUN
THIL FIHNUNGZAPAWLIH NU,»
tiih hmin ngan mi a um. 6 Cuih nunau cu mithiangpawlih thisen le Jesu ruangih martar tuarpawlih thisen ri in ka hmu.
Cu nu ka hmuh tikah mak ti zetin ka mang a bang. 7 Cule vancungmi in ka hnenah, «Ziangah na mang a bang? Nunau le a phurtu sahrang, lu pasarih le ki pahra nei ih thuthup ka lo sim ding. 8 Na hmuh mi sahrang kha hlanah a rak um dah zo, atu ah cun a um lo, tawnet nei lo khur sung ihsin a hung suak ding ih, siatralnak ah a feh ding. Cule leitlun ih cêngpawl, leilung hramthăwk ihsin Nunnak Cazual sungih hmin ngan lo mipawl in, hlanih rak um dah zo, atu ih um lo, cule a um lehsal ding mi, sahrang an hmuh tikah an mang a bang ding.
9 «Hi tawkah fimnak nei lungthin a um: lu pasarih cu cuih nunau tonak tlang pasarih an si. 10 Siangpahrang pasarih khal an si. Panga cu an tlu zo ih, pakhat cu a um lai, pakhat cu a ra lang hrih lo. Cule a ra lăng tik khalah cān tawite sung lawng a um ding. 11 Cun a rak um dah zo, cule atu ih um lo mi sahrang kha a pariatnak a si, siangpahrang pasarih lakih tel a si ih, siatralnak ah a feh.
12 «Ki pahra na hmuh mi kha lalram a co hrih lo mi siangpahrang pahra an si, asinan sahrang thawn nazi pakhat sung siangpahrang vekin thuneihnak an cotlang ding. 13 Cuih siangpahrang pahra pawl cu lungthin pakhat an nei ih, an huham le an thuneihnak cu sahrang hnenah an pe ding. 14 Annih cun Tuufano cu an do ding ih, Tuufano cu bawipawlih Bawi, siangpahrangpawlih Siangpahrang a si ruangah annihpawl cu a neh hai ding. Cule a hnenih um mipawl cu kawh mi, hril mi, mirinum an si,» tiah i ti.
15 Cun vancungmi cun ka hnenah, «Na hmuh mi hlawhhlângnuih tonak tipi cu minungpawl, mipi, miphunpawl le ṭawngpawl an si. 16 Cule sahrang parih na hmuh mi ki pahra pawl khan hlawhhlângnu cu an hua ding ih, zianghman nei lo le taklawngin an umter ding, a sa an ei ding ih, meisa in an ur ding. 17 Ziangahtile Pathian kamsuakthupawl a thlenkim lai hlanlo a tumtah mi an tuahnak dingah le lungthin pakhat an neihnak dingah le an lalram sahrang hnenih an peknak dingah, Pathian in an thinlung ah a fial hai. 18 Cule na hmuh mi nunau kha khawpi ropi, leitlun siangpahrangpawl uktu a si,» tiah i ti.
Babilon Tlûknak
1 Cuih thilpawl hnuah a dang vancungmi, van ihsin a rung ṭum ka hmu. Anih cun thuneihnak ropi a nei ih, a ropitnak in leilung a tlet. 2 Cule anih cun aw ring zetin nasazetin a au ih, «A tlu e, a tlu e, ram ropi Babilon cu! Anih cu khawsiapawl cēnnak le thlarau bawrhhlawh tinkim umkhawmnak le huatumza vâte bawrhhlawh tinkim hrangih thawnginn ah a cang zo! 3 Ziangahtile miphun hmuahhmuah in a nunau-mipa sualnak thinlingnak sabitzu cu an in zo. Leitlun siangpahrangpawl cun amah thawn nunau-mipa sualnak an tuah ih, leitlun ih sum tuahpawl cun a năwmcēnnak khatliam cu an lenpi phah,» tiah a ti.
4 Cule van ihsin aw dang in hitiih a ti ka thei, «Ka minungpawl, a sualpawl ih nan tellonak dingah le hrem a tuarnak nan tuar ve lonak dingah a sung ihsin suak uh. 5 Ziangahtile cu nuih sualpawl cu van an thleng ih, Pathian in a thil tuahsualpawl kha a cîng ringring. 6 Nan parih a tuah mi vekin lehrūl uhla, a thil tuah mi vekin alet in lehrūl uh. A cawhrawinak no sungah a hrangah alet hnih in căwkrawi uh. 7 Amah le amah a rak ropitawkternak zât in le nuamcēn ih a rak um zât in hremnak le riahsiatnak pe uh. Ziangahtile a thinlung sungin, ‹Siangpahrangnu vekin ka to, nuhmei ka si lo ih, riahsiatnak cu ka hmu dah hrimhrim lo ding,› tiah a tiaw. 8 Curuangah hremnak a tuar ding mipawl thihnak, riahsiatnak le mangṭam pawl cu ni khat sungah an ra thleng ding ih, amah cu meisa ih urkăng thluh a si ding. Ziangahtile amah thu a ṭhentu Bawipa Pathian cu a cak a si.
9 «Amah thawi nunau-mipa sualnak tuah ih, nuamcēn ih a rak umtu, leitlun siangpahrangpawl cu a kăngnak meikhu an hmuh tikah amah an ṭah ding ih, an râk ding. 10 A tuar mi ṭih ruangah a hlatnak hmun ah dingin, ‹Ala, ala, khaih Babilon khaw ropi, khaih a cak zet mi khawpi! Nazi pakhat sungah thuṭhen na sinak a ra thleng a si hi,› tiah an ti ding.
11 «Cule leitlun ih sumtuahpawl zohman in an sumtuahnak thil an lei nawn lo ruangah cuih khawpi cu an ṭah ding ih riahsiain an um ding. 12 An zuar mi sui le ngun, lung mankhung le keplung, puan nem páte le puan sendup, pu puan le puan senlar, thing rimhmui phunphun le vuiho ih tuah mi bungbel a phunphun, thing mankhung ih tuah mi bungbel a phunphun le dar, thir le marbal lung, 13 thingthak hmui le rimthaw, hriak rimhmui le frankinsense rimhmui, sabitzu le hriak, sangvut phŭt le sangvut, câw le tuu, rángpawl le ránglêngpawl, sálpawl le minung nunnakpawl cu an lei nawn lo. 14 Na thlarau ih câkhiar mi rahpawl cun an lo tlanhlohsan, lennak thil hmuahhmuah le thil duhnung hmuahhmuah cun an lo tlanhlohsan ih, cupawl cu ziang tik hmanah na hmusal nawn hrimhrim lo ding. 15 Hi thilpawlih sumtuahpawl, amah ih a lenter mipawl cu, a tuar mi hremnak an ṭih ruangah hlapi ah an ding ding, an ṭap ding ih, an râk ding. 16 Cule, ‹Ala, ala, puan nem páte, puan sendup, puan senlar hruh ih sui le lung mankhung le keplung pawl thawi a thuamaw mi khaih khaw ropi cu, 17 nazi pakhat sungah kha tluk lennak maksak cu zianghmanlo ah a cang tariai,› tiah an ti ding. Lăwng mâwngtupawl hmuahhmuah, lăwng ih khualtlawngpawl hmuahhmuah, lăwng hnaṭuantupawl hmuahhmuah le tifinriat ih sumtuahpawl hmuahhmuah cu hmun hlatpi ah an ding. 18 Cule a kăngnak meikhu an hmuh tikah an ṭap ih, ‹Hi khawpi ropi vek hi ziang khawpi a um dah?› tiah an au.
19 « ‹Ala, ala, hi khawpi ropi hi milian ih kan cannak a si, kannih tifinriat parih lăwng neitupawl hmuahhmuah cu a thil mankhungpawl ruangah milian ah kan cang. Nazi pakhat sungah zianghmanlo ah a cang tariai,› tiah au-in an lu ah leivut an phulhaw.
20 «Maw van, nannih apostol thianghlimpawl le profet thianghlimpawl, amah ruangah lungawiaipuangin um uh, ziangahtile Pathian in nan hrangah a parah phuba a la zo!» tiah a ti.
21 Cun a cak zet mi vancungmi pakhat in riallung tumpi vek lung pakhat a lâk ih, tifinriat sungah a hlăwn, cule, «Hitivekin khawpi ropi Babilon cu nasazetih hlăwnthlak a si ding ih, hmuhsal a si nawn hrimhrim lo ding.
22 Ṭingṭang tumtupawl, awnmawi tumtupawl, phirivau tumtupawl le tawtawrawt phawtupawl ih aw cu na sungah theih a si nawn lo ding. Zungthiam, ziang vek zungthiam an si khalle na sungah hmuh an si nawn lo ding ih, rialnak awnthawm khal na sungah theih a si nawn hrimhrim lo ding.
23 Meito tleu khal na sungah a vâng nawn hrimhrim lo ding ih, na sungah mo le mo neitupaih aw khal theih a si nawn hrimhrim lo ding. Ziangahtile na sumtuahpawl cu leitlun ih miropi zetzet pawl an rak si ih, na dawithiamnak in miphun hmuahhmuah cu bum an rak si.
24 Cule profetpawl, mithiangpawl le leilung tlunih thah mipawl hmuahhmuah ih thisen cu a sungah hmuh a si,»
tiah a ti.
Van ah Thangṭhatnak
1 Cuih thilpawl hnuah van ah mipi tam zet aw ring zetin,
«Halleluiah!
Rundamnak, ropitnak, upatnak le huham cu Bawipa kan Pathian ta a si!
2 Ziangahtile a thuṭhennakpawl cu an dik ih, an fel.
A nunau-mipa sual tuahnak in leilung a bawrhhlawhtertu a maksak zet mi hlawhhlângnu cu thu a ṭhen zo ih, a siahhlawhpawlih thisen kha cu nuih parah phuba a la zo,»
tiah an ti. 3 Annih in,
«Halleluiah! Cuih hlawhhlângnuih khu cu kumkhuaih kumkhua tiang a kaiso!»
tiah an tisal.
4 Upa 24 pawl le thilnung pali pawl in laltokham parih to Pathian cu băwkkhupin an bia ih, «Amen! Halleluiah!» tiah an ti.
5 Cun laltokham ihsin aw a ra suak mi cun,
«Nannih a siahhlawhpawl hmuahhmuah, nannih amah ṭihzahtu mithupipawl le mithupilopawl hmuahhmuah, kan Pathian thangṭhat uh!»
tiah a ti.
Tuufano Nupi Ṭhit Puai
6 Cule minung tampi aw vek le tidai tampi aw vek, a cak zet mi khawri aw vekin,
«Halleluiah! Ziangahtile Ziangkimtithei Bawipa Pathian in a uk a si, a ti ka thei.
7 Lungawi le aipuangih um in, amah cu upatnak pe uhsi, ziangahtile Tuufano nupi ṭhit puai a thleng zo ih, a nupi khal amah te rori in a timtuahaw zo,»
tiih a ti kha ka thei.
8 Cule Tuufano nupi cu a thuamawknak dingah puan nem páte ṭha zet, fai le var cu pek a si, ziangahtile puan nem páte cu mithiangpawlih dingfelnak a si.
9 Cun vancungmi cun ka hnenah, « ‹Tuufano nupi ṭhit puai ih sawm mipawl cu mithlawsuak an si,› tiin ngan aw,» in ti. Cule ka hnenah anih in, «Hih thupawl hi Pathian thudik an si,» tiah i ti.
10 Cule amah be dingah a ke hramah ka băwkkhup. Asinan anih cun ka hnenah, «Kha tin ti hlah! Kei cu nangmah le Jesu-ih thutheihtertu na unaupawlih siahhlawhpi ka si. Pathian be aw! Ziangahtile Jesu-ih thutheihternak cu simsungnak thlarau hi a si,» tiah a ti.
Ráng Var parih To
11 Cun van áwngaw ka hmu ih, ngai hnik, ráng var pakhat le a parih to Rinum le Dik an ti mi cu ka hmu fawn. Anih cun dingfelnak in thu a ṭhen ih, ral a do. 12 A mit cu meisa alh vek an si ih, a lu parah lallukhum tampi a khum. Hmin ngan mi a nei ih, amah siarlo zohman in an thei lo. 13 Anih cu thisen sungih hnim mi kâwrfual hruhter a si, cule a hmin cu ‹Pathian Kamsuakthu› tiih kawh a si. 14 Cule van ralkappawl cun puan nem páte, var le fai sĭnin ráng varpawl parah toin amah cu an run thlun. 15 Cun a kâ sung ihsin ralnâm hriam pakhat a suak ih, cuih ralnâm in miphunpawl cu a sat hai ding. Cule annih cun thir kianghrăwl thawn a uk hai ding. Ziangkimtithei Pathian thinlingnak le a nasazet mi sabit sawrnak khur ah cun a pálsawr hai ding. 16 Cule a kâwrfual par le a cāwn parah,
«SIANGPAHRANGPAWLIH SIANGPAHRANG LE
BAWIPAWLIH BAWI,»
tiih ngan mi hmin a um.
17 Cun ni ih a ding mi vancungmi pakhat ka hmu ih, anih cun van ih a zam mi vâte hmuahhmuah hnenah aw ring zetin, «Pathian ropiih zanriah ah cun fĭnkhawm aw uh. 18 Siangpahrangpawlih sa, ralbawipawlih sa, micakpawlih sa, rángpawl le an parih a totupawlih sa, mi hmuahhmuah ih sa, miluat le sál pawlih sa, mithupi le mithupilo pawlih sa nan ei theinak dingah ra uh,» tiin a au.
19 Cule sahrang, leitlun siangpahrangpawl le an ralkappawl cu ráng parih totu Pa le a ralkappawl do dingah an fĭnkhawmawk ka hmu. 20 Cun sahrang le sahrang mithmuhih hminsinnak tuah ṭheu tu profet deu cu kaih an si. Cuih hminsinnakpawl hmang cun sahrang hminsinnak neitupawl le a milem betupawl cu a bum ṭheu hai. An pahnih in kât meisa thawi a alh mi meilipi sungah nung cingin a paih hai. 21 Cule a tāng mipawl cu ráng parih totu Pa in a kâ ihsi a suak mi ralnâm in a that ṭheh hai. Cule vâte hmuahhmuah cun cupawlih sa cu khawp zetin an ei.
Kum 1000
1 Cun vancungmi pakhat tawnet nei lo khur awnnak tawhfung nei le a kut ih cikcin tûm zet pakhat keng van ihsin a rung ṭum kha ka hmu. 2 Anih cun khaih rul tar, rulhreng cu a kai. Cumi cu Diabol le Setan a si. Anih cu kum 1000 sung vancungmi cun a ṭawnhrem ih, 3 kum 1000 a kim hlanlo miphunpawl bum nawn lo dingin tawnet nei lo khur sungah a vun hlăwn, a kharkhum ih tacik a khĕn. Asinan cuih thilpawl hnuah cān málte sung thlahsal a si ding.
4 Cule laltokhampawl ka hmu ih, cupawl parah mi an to, cule an hnenah thuṭhennak pek an si. Cun Jesu-ih thutheihpitu an si ruangah le Pathian kamsuakthu ruangah lu tan a tuartupawlih thlaraupawl ka hmu. Hipawl cun sahrang an be lo, a milem khal an be lo ih, a hminsinnak khal an cal ah siseh, an kut ah siseh, an nei ve lo. Cupawl cu an nungkirsal ih, Khrih thawn kum 1000 sung an uk. 5 Sikhalsehla mithi dangpawl cu kum 1000 a cem hlanlo an nungkirsal hrih lo. Himi cu thawhsalnak hmaisa a si. 6 Thawhsalnak hmaisa ih a teltupawl cu mithlawsuak le mithianghlim an si. An parah thih hnihnak in thuneihnak zianghman a nei lo, annih cu Pathian le Khrih-ih puithiam an si sawn ding ih, amah thawn kum 1000 an uk ding.
Setan Nehnak
7 Cun kum 1000 a cem tikah, Setan cu a thawngtlaknak ihsin suah a si ding. 8 Cule leilung kil li ih um miphunpawl bum dingin a fehsuak ding, cuih miphunpawl cu Gog le Magog an si. Annihpawl cu ral do dingah a fĭnkhawm hai ding, an mipum cu tifinriat ih vunnel zât an si. 9 Leilung tlun hmun zakip ah an fehdarh ih, mithiangpawl umnak hmun le duhdawt zet mi khawpi cu an kulh. Cule van ihsin Pathian hnenin meisa a rung tla ih, anmahpawl cu a kangrál thluh. 10 Anmah bumtu Diabol cu sahrang le profet deu an hlăwnnak meilipi le kât meisa sungah an hlăwn. Cule annihpawl cu a sun a zanin kumkhuaih kumkhua tiang hrem an si ding.
Tokham Var Thuṭhennak
11 Cun laltokham var ropi le a parih to Pa cu ka hmu, a hmai ihsin leilung le van cu an tlânhlo ih, an um nawn lo. 12 Cule mithipawl, mithupipawl le mithupilopawl khal Pathian hmaika-ih ding ka hmu. Cule cazualpawl cu pharh an si ih, cazual dang pakhat khal pharh a si, cucu Nunnak Cazual a si. Cule mithipawl cu cuih cazualpawl sungih an ngan mi thilpawl, an thil tuah mipawl vekin thuṭhen an si. 13 Tifinriat cun a sungih a um mi mithipawl kha a hun suah ih, Thihnak le Mithi khua khal in an sungih um mithipawl kha an hun suah ve. Cule mi tin an thil ti mi bangtukin thuṭhen an si. 14 Cun Thihnak le Mithi khua cu meilipi sungih hlăwn an si. Himi cu vei hnih thihnak a si. 15 Cule zokhal Nunnak Cazual sungih an hmin ngan hmuh a si lo mi cu meilipi sungah hlăwn an si.
Van Thar le Lei Thar
1 Cun van thar le lei thar ka hmu, ziangahtile van hmaisa le lei hmaisa cu an hlorál ih, tifinriat khal a um nawn lo. 2 Cun khawpi thianghlim, Jerusalem Thar cu, a pasal hrangih mawi zetih a ceiaw mi mo vekin timtuahaw in van Pathian hnen ihsin a rung ṭum kha keimah, John in ka hmu. 3 Cule van ihsin a ring zet mi aw pakhat in, «Ngai hnik, Pathian biakbûk cu minungpawl hnenah a um, amah cu an hnenah a cêng ding ih, annih cu amai minung an si ding. Pathian amah rori cu an hnenah a um ding ih, an Pathian a si ding. 4 Cule Pathian in mitthli hmuahhmuah kha an mit ihsin a hnulhlo thluh ding. Thihnak a um nawn lo ding, riahsiatnak a um nawn lo ding ih, ṭahnak khal a um nawn lo ding. Nat tuar khal a um nawn lo ding, ziangahtile thil hmaisapawl cu an hlorál thluh zo,» a ti ka thei.
5 Cun laltokham parih to Pa in, «Ngai hnik, thil hmuahhmuah cu ka tharter thluh zo,» tiah a ti. Cule ka hnenah, «Ngan aw, ziangahtile hi ṭawngkampawl hi an dik ih, rintlak an si,» tiah i ti.
6 Cule ka hnenah, «Ṭheh a si zo. Kei cu Alfa le Omega, Thăwknak le Cemnak ka si. Tihâl mi hnenah nunnak tihna a lakin ka pe ding. 7 A nehtu cun thil hmuahhmuah ro ah a co ding, keimah cu a Pathian ka si ding ih, anih cu ka fapa a si ding. 8 Asinan miṭihhrutpawl, zumlotupawl, Pathian huat mi tuahtupawl, laithatpawl, nunau-mipa sualnak tuahtupawl, dawithiampawl, milem betupawl le thuphan perpawl hmuahhmuah ih an co ding hmun cu mei le kat thawi a kāng mi meilipi a si ding, himi cu vei hnih thihnak a si,» tiah a ti.
Jerusalem Thar
9 Cun vancungmi pasarih, hremnak netabik pasarih thawi a khat mi khengkûm pasarih kengtu lakih pakhat kha ka hnenah ra in i sim ih, «Hi tawkah ra aw, Tuufano nupi, mo cu ka lo hmuh ding,» tiah i ti. 10 Cule cuih vancungmi cun Thlarau in tlang tûm zet le sâng zet parah in thiarhlo ih, khawpi ropi Jerusalem khaw thianghlim Pathian hnenin van ihsi a rung ṭum mi cu i hmuh. 11 Cuih khawpi cun Pathian ropitnak a nei. A tleuzia cu lung mankhungbik jasper lung vek le kristal lung vekih fai a si. 12 Cuihtlunah kulh ropi zet le sâng zet a nei ih, kăwtka hleihnih a nei. Cuih kăwtkapawl ah cun vancungmi hleihnih an um ih, cuih kăwtkapawl parah Israel tefa hnám hleihnih hminpawl ngan a si. 13 Nisuahnak lamah kăwtka pathum, sak lamah kăwtka pathum, thlang lamah kăwtka pathum, nitlaknak lamah kăwtka pathum a um. 14 Cun cuih khawpikulh cun lungphum hleihnih a nei ih, an parah Tuufano-ih apostol hleihnih pawlih hmin ngan a si.
15 Cule i simtu vancungmi cun cuih khawpi le a kăwtkapawl le a kulh tah dingah sui phaikung fung a keng. 16 Cuih khawpi cu kil li neiin a um; a kauh lam le a sau lam a bangaw. Cule cuih vancungmi in khawpi kha cuih tahnak fung in a tah: a sau lamah peng 1500 a si ih, a kauh lam khalah peng 1500, a san lam khalah peng 1500 thotho a sâng. 17 Cun vancungmi cun khawkulh cu minung tahnak hmangin, cumi cu vancungmi tahnak a si, a tah ih dawng 144 a si. 18 Cun a kulh cu jasper lung mankhung ih tuah a si ih, cuih khawpi cu thlalang vekih a fim mi sui hlir ih tuah a si. 19 Cuih khawpikulh ṭohrampawl cu lung mankhung a phunphun ih ceimawi an si.
Ṭohram hmaisabik cu jasper lung a si ih,
a pahnihnak cu safaira lung a si,
a pathumnak cu kalkidon lung a si ih,
a palitnak cu emerald lung a si.
20 A pangatnak cu sardonuk lung a si ih,
a paruknak cu sardias lung a si.
A pasarihnak cu krisolait lung a si ih,
a pariatnak cu birul lung a si.
A pakuatnak cu ṭopaz lung a si ih,
a pahratnak cu krusopra lung a si.
A hleikhatnak cu jacinth lung a si ih,
a hleihnihnak cu amethist lung a si.
21 Kăwtka hleihnih pawl cu keplung hleihnih an si. Kăwtka pakhat ciar cu keplung pakhat fingfing an si. Cule cuih khawpi lamzin cu sui hlir, hmuhtlăng thei mi thlalang vek a si.
22 Cule cuih khawpi sungah cun temple ka hmu lo, ziangahtile Ziangkimtithei Bawipa Pathian le Tuufano cu cuih khawpi ih temple an si. 23 Cuih khawpi cu Pathian ropitnak in a tlet ruangah a tleu hrangah ni khal a ṭul lo, thlapi khal a ṭul lo. Tuufano cu cuih khawpi ih tleu a si. 24 Cule rundam a si mi miphunpawl cu cuih khawpi ih tleu ah an feh ding ih, leitlun siangpahrangpawl cun an ropitnak le an zahumnak cu cuih khawpi sungah an kenglut ding. 25 Cuih khawpi kăwtkapawl cu sunnivu-in khar an si lo ding, ziangahtile cu tawkah zan a um hrimhrim lo ding. 26 Cule miphunpawl in an ropitnak le an zahumnak kha cuih khawpi sungah an kenglut ding. 27 Cun cuih khawpi sungah cun ziangti lam hmanin thil thianglo zianghman a lut lo ding asilole thil fihnungza a tuahtu asilole thuphan perhmangpawl khal an lut lo ding. Tuufano Nunnak Cazual sungih an hmin ngan a si mipawl lawng an lut ding.
Nunnak Tiva
1 Cule vancungmi cun nunnak ti, tiva fim, krisṭal lung vekih fim Pathian le Tuufano laltokham ihsi a luangsuak mi cu i hmuh. 2 Cuih khawpi lamzin laifangah le cuih tiva tlang kap hnih ah phun hleihnih a rah mi nunnak thingkung a um ih, thla tinten rah a rah. Cuih thingkung hnahpawl cu miphunpawl hrangah damnak a si. 3 Cule cu tawkah camsiatnak hrimhrim a um nawn lo ding ih, Pathian le Tuufano laltokham cu cuih khawpi ah a um ding, cule a siahhlawhpawl in amah an rian ding. 4 A hmel an hmu ding ih, a hmin cu an cal ah a um ding. 5 Cu tawkah zan a um nawn lo ding: meito an ṭul nawn lo ding ih, ni tleu khal an ṭul nawn lo ding, ziangahtile Bawipa Pathian in tleu a pe hai ding ih, kumkhuaih kumkhuain an uk ding.
6 Cun anih in ka hnenah, «Hi kamsuakthupawl hi zumtlak le a dik mi an si,» tiah i ti. A thianghlim mi profetpawlih Bawipa Pathian cun thil rung thleng tengteng cing ding mipawl cu a siahhlawhpawl hmuh dingin a vancungmi a thlah a si.
7 «Ngai hnik, ka ra cing ding! Hi cazual sungih simsungnak kamsuakthupawl a thluntu cu mithlawsuak an si,» tiah Jesu in a ti.
8 Cun kei, John hi cuih thilpawl hmutu le hna ih theitu ka si. Cule ka thei ih, ka hmuh tikah, cuih thilpawl i hmuhtu vancungmi cu be dingin a ke hramah ka băwkkhup. 9 Cun anih in ka hnenah, «Hitin tuah hlah. Ziangahtile kei cu nangmah le na unau profetpawl le hi cazual sungih kamsuakthupawl thluntupawlih siahhlawhpi ka si. Pathian be aw,» tiah i ti.
Jesu a Ra cing Ding
10 Cule anih in ka hnenah, «Hi cazual simsungnak kamsuakthupawl hi erhpit hlah, ziangahtile cān a nâi zo. 11 Midik lo cu diklo in um hrih ko seh, mibawrhhlawh cu bawrhhlawhin um hrih ko seh, midingfel cu fel in um hrih ko seh, mithianghlim cu thianghlimin um hrih ko seh,» tiah i ti.
12 «Cule ngai hnik, zamrang zetin ka ra ding, mi kip an tuah mi bangtukih pe dingin ka lawmman cu ka hnenah a um. 13 Kei cu Alfa le Omega, Thăwknak le Cemnak, Hmaisabik le Netabik ka si.»
14 A thupekpawl a thluntu cu mithlawsuak an si, nunnak thingkung ei theinak le kăwtkapawl ihsin khawpi sungih luh theinak an nei ding. 15 Ziangahtile a lengih a um mipawl cu uicopawl, dawithiampawl, nunau-mipa sualnak tuahtupawl, laithatpawl, milem betupawl, thuphan per duhtu pauhpauh le thuphan perhmangpawl an si.
16 «Kei, Jesu in hi thilpawl hi kawhhranpawl lakih nan hnenah theihter dingin ka vancungmi ka run thlah a si. Keimah cu David-ih Hram le Tesinfa, A Tleu Zet Mi le Deirel Arsi ka si,» tiah a ti.
17 Cule Thlarau le mo cun, «Ra aw!» an ti. A theitu in, «Ra aw!» ti seh. Tihâl mi cu ra seh. Zokhal a duhtu cun nunnak ti a lakin la seh.
18 Hi cazual sungih simsungnak kamsuakthupawl a theitu hmuahhmuah hnenah ka lo theihter a si: zokhal in hi thilpawl tlunih a bêt asile, hi cazual sungih ngan mi hremnakpawl hi Pathian in a parah a thlengter ve ding. 19 Cule zokhal in hi simsungnak cazual sungih kamsuakthupawl a lakhlo asile, nunnak cazual ih a co ding mi a covo siseh, khawpi thianghlim ih a co ding mi a covo siseh, hi cazual sungih ngan mi thilpawl a co ding mi a covo siseh, Pathian in a lahlo ve ding.
20 Hi thilpawl a theihtertu in, «A si, zamrang zetin ka ra ding,» tiah a ti. Amen. A si, Bawipa Jesu, ra aw!
21 Kan Bawipa Jesu Khrih zangfahnak cu nan zate hnenah um hram seh. Amen.