About Bible Thianghlim | ©

BibleThianghlim – ISAIAH

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

ISAIAH

12345678910
11121314151617181920
21222324252627282930
31323334353637383940
41424344454647484950
51525354555657585960
616263646566

• A ngantu: Profet Isaiah
• A siartu: Judah
• A huap sung cān: B.C. 740-680A siartu: Judah

Isaiah hmin sullam cu «Jehovah cu rundamnak a si» ti asilole, «Jehovah in a rundam,» tinak a si. A hmin sullam bangtukin thuṭhennak (bung 1-39) le rundamnak (40-66) thu a sim. Judah ram ih um Pathian minungpawl hnenah an cān pawimawh lai thuanthu a ngan. Isaiah-ih rawngbawl cān cu siangpahrang Uzziah, Jotham, Ahaz, Hezekiah le Manasseh pawlih lal lai cān ah a si (1:1; 37:37-38).

Isaiah cabu ih Israel thuanthu kan hmuh mi hi a hnăwkin theih a harsa. Hih cān ah Judah-mipawl in vansanglămnak ṭum thum an táwng: B.C. 734-732 ah Siria le Israel an doaw, B.C. 722 ah Assiria in Israel a neh ih, B.C. 701 ah Assiria siangpahrang Sennakerib in Judah a la.

Pathian tumtah mipawl zulhin a tho ih a tlu mi hih miphunpawl hi Pathian in a uk hai (bung 13-23). Judah ram khal hin biaknaksakhaw lamah buainak a nei. Annih in Pathian simdān vekin thawinak an tuah, asinan milem biaknak, nunau-mipa sualnak khal an tuah ih, an ramhnen rairingpawl ih biak mi milem an bia.

Isaiah cabu in a pawimawh zet mi «theology» a phuanglang. A pakhatnakah, Pathian cu «Ralkap rualpawlih Jehovah,» a si (vei 45). Anih cu thil ziangkim tlunih Lal a si ih, cupawl hmangin a tumtah mipawl a hlĕnsuak. Anih cu «Israel-ih Mi Thianghlim» khal a si (vei 26). Anih cu thilsual hmuahhmuah ihsin a fihlim ih, a thiangfai pumhlum. Anih cu ziang hmuahhmuah hnakin a danglam, mihleice a si. Curuangah anih cun amah dodaltu thu a ṭhen thei ih, amah rinsantu a rundam thei.

Isaiah bung 40-66 (a hleicein bung 40-48) in ziang vekih mihleice a sizia a tarlang. Amah lawng cu sersiamtu, thutak phuanglangtu umsŭn le tlentu umsŭn a si. B.C. 605, 597, 586 ah doral kut ih Judah a tlûknak hmutu ding le Babilon sáltannak kumpawl hmutu ding san minungpawl hnenah thazang le ruahsannak peknak dingah, Isaiah in bung 40-66 pawl thu hi a ngan. Hih vanduainakpawl hi Pathian a cah lo ruang le Babilon-mipawlih pathianpawl an cah sawn ruangah a si lo ti theihter a duh. Hih vanduainakpawl hi minungpawlih sual ruangah Pathian in a siang a si.

Isaiah cabu in Messiah a khaisâng. Isaiah in Messiah ropitzia, ṭum hnih a ratnak le lei parih rawng a bawlnak thu in sim. Isaiah in Messiah hrangah hmin tampi a pe (4:2; 11:1; 7:14; 9:6). Jesu-ih nun le a rawngbawlnak ih rung famkim mi thu tampi khal a phuang (7:14; 9:1-2; 53:4-6; 61:1-2). Isaiah ih thuphuan thupibikpawl cu «siahhlawh hlapawl» ah an um (42:1-9; 49:1-6; 50:4-9; 52:13-53:12). Jehovah cu Israel-ih Mi Thianghlim a si. Amah lawng kan rinsan ding a si!

1

1 Amoz fapa Isaiah in Judah siangpahrang Uzziah, Jotham, Ahaz le Hezekiah tepawlih san laiah Judah le Jerusalem thuhla ih a hmuh mi larnak cu.

Helhmang Miphun

2 Maw vanpawl, ngai hnik uh, Maw leilung, na hna tŭn aw!
Ziangahtile Jehovah in,
«Fanaupawl ka câwm ih, ka pitlingter hai,
Asinan annih cu keimah lakah an hél;
3 Câw in a neitu a thei ih,
Lāk in a pu-ih rawl peknak kuang a thei,
Asinan Israel cun a thei lo,
Ka mipawl cun an theithiam lo,» tiah a ti.
4 Ai law, miphun sualrál,
Mawhsualnak thawi a khat mi minungpawl,
Thil ṭhalo tuahhmang cithlahpawl,
Mibawrhhlawh tefapawl!
Jehovah an thlauthla zo,
Israel-ih Mi Thianghlim cu an rak hnáwng,
Dung lam an hawisan.
5 Ziangahso vuak nan sisal ding ih,
Ziangahso nan hél sinsin ding?
Lu cu a pumhlum in a nâ ih,
Thinlung cu a pumhlum in a nâ.
6 Ke zaphak ihsin lu tiang rori,
Damnak hrimhrim a um lo,
Hriamhma, vuakdurh le hmahnâi hlir a si sawn;
Cupawl cu hmeh le tuam le nēm ko hriak hnih an si lo.
7 Nan ram a ṭhing,
Nan khawpipawl cu meisa in a kāng,
Ram dang mipawl in nan hmaika-ah nan lópawl an tisiat ṭheh;
Cule cumi cu ram dang mipawl ih ṭhiahbăl mi bangin a ṭhing.
8 Zion fanu cu sabit hmuan ih thlamte bang,
Fanghma hmuan ih deute bang le,
Kulhkhŭm mi khawpi bangtuk a si.
9 Ralkap rualpawlih Jehovah in kannih a tāngsŭn mál takte hi in zuah lo sehla cu,
Sodom vek kan si zo ding,
Gomorrah vek kan si zo ding.
10 Nannih Sodom uktupawl,
Jehovah kamsuakthu hi ngai hnik uh;
Nannih Gomorrah mipawl,
Kan Pathian Dān lamah nan hna tŭn uh.
11 «Ka hnenih nan raithawi mi liangluang hi ziang tumtahnak hrangah so? Jehovah in a ti.
«Tuucangpawl le ranpi cawmthaupawl hmangih Meiur Thilhlănpawl cu ka khawp tuk zo.
Câwpapawl le tuufa nopawl le mepawlih thisen ah lungawinak ka nei lo.
12 Ka hmaiah lang dingin nan rat tikah, ka tualrawn nan cīl hi,
Zo in so a lo phút?
13 A ṭhahnem lo mi raithawinakpawl rak keng nawn hlah uh;
Rimhmui ur mi cu ka hrangah fihnungza a si.
Thla Thar Puaipawl, Sabbath-pawl le pumkhawm dingih sawmkhawmawknak pawl ka fih hai.
Mawhsualnak le tawnkhawmawknak hleice khal ka tuar thei nawn lo.
14 Nan Thla Thar Puaipawl le nan puai khiah mipawl ka nun in a hua;
Cupawl cu ka hrangah phurrit an si,
Ka tuar thei hai nawn lo.
15 Nan kut nan phar tikah,
Nan hnen ihsin ka mit ka hup ding;
Vei tam zet thla nan cam khal le,
Ka ngaithla lo ding.
Nan kutpawl cu thisen in an khat.
16 «Khawlhfai aw uhla, thianfai aw uh;
Nan thil tiṭhat lo pawl ka mithmuh ihsin hlăwnhlo uh,
Thil ṭhalo tuah bāng thlang uh.
17 Thil ṭha tuah zir uh, diknak hawl uh,
Mipalbĕttupawl kawk uh;
Pa nei lo pawl hum uh,
Nuhmeipawl ṭăn uh.
18 «Atu ah ra uhla, ruattlang hnik uhsi, Jehovah in a ti,
Nan sualpawl cu senlar bangtuk si khal hai sehla, vur vekin an var ding;
Sendup bangin sen khal hai sehla, sahmul vek an si ding.
19 Rem nan ti ih thu nan lun asile,
Ram sungih thil ṭhapawl tla nan ei ding;
20 Asinan nan êl ih nan hél a si ahcun, ralnâm in a lo eirál ding»;
Ziangahtile Jehovah kâ in cumi cu a sim zo.

Khawpi Sualrál

21 Ziangtin sokhawpi rinum cu hlawhhlâng ih a can tâk!
Anih cu diknak ih khat a rak si si,
A sungah dingfelnak a rak cêng,
Asinan atu ah cun laithatpawl an cêng.
22 Nan ngun cu thir-ek ah a cang,
Nan sabitzu cu tidai in a dălter.
23 Nan bawipawl cu helhmang an si ih,
Fifirpawlih hawipi an si;
Mi kip in nawhthuh an duh ṭheh ih,
Laksawng an dawi ṭheh.
Pa nei lo pawl an hum lo ih,
Nuhmeipawlih thuhla an hmaiah a thleng fawn lo.
24 Curuangah Bawipa in,
Israel-ih Micak Pa, ralkap rualpawlih Jehovah,
«Aa, ka doralpawl lakin ka hlîtkiangaw ding ih,
Ka ralpawl phuba ka la ding.
25 Nan lamah ka kut ka hawi ding ih,
Cingál hmangih tifai vekin nan thir-êk ka tifai verver ding,
Cule nan thir-êk sia hmuahhmuah ka tifai ṭheh ding.
26 Nan thuṭhentupawl cu a hlan vekah ka cangtersal ding ih,
Nan thurawnpetupawl khal a thăwktir vekah ka cangtersal ṭheh ding.
Cuihhnu ah nannih cu dingfelnak khawpi, khawpi rinum tiih kawh nan si ding,» tiah a ti.
27 Zion cu diknak hmangin tlen a si ding ih,
A sungih sual sir mipawl khal dingfelnak hmangin.
28 Thilsual tuahtupawl le misualpawl cu tisiattlang an si ding.
Cule Jehovah a hawisantupawl cu an hlorál ding.
29 Ziangahtile nan duh zet mi ^aayil thingkungpawl ruangah nan ning a zak ding;
Cule nan rak hril mi nan hmuanpawl ruangah nan mithmai a se ding.
30 Ziangahtile nannih cu a hnah a vuai mi ela thingkung vek le
Tidai um lo hmuan vek nan si ding.
31 Micak cu meiṭêk vek a si ding ih,
A hnaṭuan cu meici vek a si ding,
An pahnih in an kāngtlang ding ih,
Zohman in an hmit lo ding.

1:29^a ayil thingkung: Thingkung tum phun khat a si.

2

Hmai lam Cān ih Pathian Inn

1 Judah le Jerusalem thuhla ih Amoz fapa Isaiah in a hmuh mi kamsuakthu cu.

2 Ni neta ah cun hitin a si ding,
Jehovah inn umnak tlang cu,
Tlangpawl lakih sângbik ah dĭn a si ding ih,
Tlangmualpawl tlunah cawisan a si ding;
Cule miphun hmuahhmuah cu cumi ah an feh hluarhlo ding.
3 Mi tampi an ra ding ih,
«Ra uhla, Jehovah tlang ah so uhsi, Jakob Pathian inn ah;
Anih in a lamzinpawl in zirh ding ih,
A zinpawl kan zawh ding,» tiah an ti ding.
Ziangahtile Zion ihsin dān a ra suak ding ih,
Jerusalem ihsin Jehovah kamsuakthu.
4 Anih cun miphunpawl karlak thu a ṭhen ding ih,
Minung tampi hrangah thutluknak a tuah ding;
An ralnâmpawl cu leilehnak ah an ser ding ih,
An feipipawl tla leicawhnak thirzum ah an ser ding;
Miphun pakhat in miphun dokalhin ralnâm a hawi lo ding;
Ral dodān khal an zir nawn hrimhrim lo ding.

Jehovah Ni

5 Maw Jakob sungza, ra uhla,
Jehovah-ih tleu ah tlanglêng uhsi.
6 Ziangahtile nan mi, Jakob sungza nan rak thlauthla,
Ziangruangahtile annih cu nisuahnak lam tidān in an khat ṭheh,
Annih cu Filisṭia-mipawl bangin aizohthiam an si ih,
Ram dang mipawl parah an lung a hmui.
7 An ram cu sui le ngun a khat fawn ih,
An hlawnthilpawl cu tawpcin a nei lo;
An ram cu rángpawl a khat fawn ih,
An ránglêngpawl cu a cem dah lo.
8 An ram cu milem in a khat fawn ih,
Anmai kutsuak an bia,
Anmai kutzung ih tuah mi cu.
9 Mitenau kûnter a si ih,
Miropi ningzahter a si;
Curuangah annih cu ngaidam hai hlah aw.
10 Jehovah ṭihnunnak rapthlak tak ihsin le,
A cungnun ropitnak lak ihsin,
Lungpi lakah lut uhla, leivut lakah relh uh.
11 Milai duhawknak cu niamter a si ding ih,
Milai uanawknak cu kūnter a si ding,
Cuih ni ah cun Jehovah lawng khaisan a si ding.
12 Ziangahtile mihngal le mipuarthau kip tlun le,
Mipawrhaw kip tlunah
Ralkap rualpawlih Jehovah ni cu a ra ding.
Cule annihpawl cu hnuhniam an si ding.
13 A sâng mi le hlĭrsang a si mi Lebanon sidar kung hmuahhmuah tlun le,
Bashan ih elon thingkung hmuahhmuah tlunah,
14 Tlang sâng hmuahhmuah tlun le,
Tlangmual sâng hmuahhmuah tlunah,
15 Dawlsâng kip tlun le,
Kulhhnget kip tlunah;
16 Tarshish lăwng hmuahhmuah tlun le,
Puanzar lăwng mawi zet tlunah a ra ding.
17 Milai pawrhawknak cu kūnter a si ding ih,
Milaipawlih uanawknak cu hnuhniam a si ding;
Cuih ni ah cun Jehovah lawng khaisan a si ding,
18 Asinan milempawl cu hlohralter verver an si ding.
19 Nasatakih leilung hnînter dingih a din tikah cun,
Jehovah ṭihnunnak rapthlak tak ihsin le,
A cungnun ropitnak lak ihsin,
Annih cu lungpi kuapawl ah le,
Leilung pûk sungpawl ah an lut ding.
20–21 Nasatakih leilung hnînter dingih a din tikah cun,
Jehovah ṭihnunnak rapthlak tak le,
A cungnun ropitnak lak ihsin,
Lungpi khāmrangpawl ah le,
Lungpi khāmzumpawl ih feh dingin,
Cuih ni ah cun biak dingih anmai hrang ciar ih an rak tuah mi
An ngun milempawl le,
An sui milempawl cu,
Sinthirpawl le palâppawl hnenah milai in an hlăwn ṭheh ding.
22 A hnarkua ih thaw a thaw mi milai lak ihsin thiarfihlim aw uh;
Ziangahtile anih cu ziang thil ah so a ṭhathnem?

3

Judah le Jerusalem parih Dāntatnak

1 Ziangahtile ngai hnik, ralkap rualpawlih Jehovah, Bawipa in,
Jerusalem le Judah ihsin,
Thil sêkkhawm mi le thil khawlkhawm mi,
An rawl hmuahhmuah,
2 Miralṭha le ral do thiam,
Thuṭhentu le profet,
Simsungthiam le upa;
3 Sawmnga hotu ralbawi le upattlak minung,
Thurawnpetu le kutthemthiam,
Khawse kawhthiam pawl tla a lahlo ding.
4 «Anmah uktu dingah tleirawlpawl ka pe hai ding ih,
Nauhakte te in anmah an uk ding.
5 Minungpawl cu palbĕt an si ding,
Mi kip cu mi dangin, mi kip anmai innhnen in;
Nauhak in upa a do ding ih,
Minauta in upattlak mi a do ding.»
6 Mi in a paih inn ih a unaupa a kaibĕt ih,
«Nang cu hnipuan na nei,
In uktu na si pei ih,
Hi siatralnakpawl hi nangmai thuneihnak hnuaiah um seh,» tiin a ti tikah,
7 Cuih ni ah anih in,
«Nan natnak ka lo damter thei lo ding,
Ziangahtile ka inn ah rawl siseh, hnipuan siseh a um lo,
Mipi uktu ah i tuah hlah uh,» tiin a êl ding.
8 Ziangahtile Jerusalem cu a bah ih,
Judah cu a tlu,
Ziangruangahtile a ropitnak mit nater dingin,
An ṭawngkam le an thil tipawl in Jehovah an dokhalh.
9 An mithmai lăngdānin anmah a dokhalh ih,
Sodom vekin an sualnak an phuang;
Cumi cu an thup lo.
An hmakhua a pit!
Ziangahtile anmai parah thil ṭhalo an thlenaw.
10 Midingfelpawl hnenah nan lam a tluang ding ti uh,
Ziangahtile an thil ti rahpawl an ei ding.
11 Misualrál cu a hmakhua a pit!
A van a sia ding,
Ziangahtile a thil ti rah cu amah pek a si ding.
12 Ka mipawl hrang lawngte ahcun, anmah palbĕttu cu nauhakpawl an si ih,
Nunaupawl in anmah an uk.
Maw ka mipawl! A lo hruaitupawl in an lo hruaisual ih,
Nan fehnak zinpawl an siatsuah.

Palbĕtnak le Năwmtawlnak Thiamlo Coternak

13 Jehovah cu ṭăn dingin a ding ih,
A mipawl thuṭhensak dingin a ding.
14 Jehovah cu a mipawlih upapawl le a mipawimawhpawl thawn
Dāntatnak ah a lut ding:
«Ziangahtile nannih in sabit hmuan nan ei thluh;
Mifarahpawl nan răm mi cu nan innpawl ah an um.
15 Ka mipawl khuai rero le mifarahpawlih hmai rial rero cu ziangso nan duhsan?» tiah ralkap rualpawlih Bawi Jehovah in a ti.
16 Cuihtlunah Jehovah in,
«Zion fanupawl cu an hngal ih,
Van tau uau-o le,
Khawhrik khawhra tangin an feh,
An feh phahin an tlángphah ih,
An ke ah khingte an awnter.
17 Curuangah Bawipa in Zion fanupawlih lu cu a hmater ding ih,
Jehovah in an zahmawhpawl a langter ding,» tiah a ti.
18 Cuih ni ah Bawipa in an ceiawknak,
Khingtepawl, hngawngawrh puantepawl le an ṭhikualpawl,
19 An ṭhipawl, an faupawl le an hmaikhuhnakpawl,
20 An lu thuampawl, an ke ceinakpawl le an lu thuamnakpawl,
An rimhmui dawngpawl, an hmai ceinakpawl le,
21 Zunghrukpawl,
Hnarkhaihpawl,
22 Puai thuamhnawpawl le puanbahpawl,
Sinfen leng hrukpawl, paisa dippawl le,
23 Thlalangpawl;
Puan nem páte, lupâwngpawl le kâwrfualpawl tla a hlăwnhlo ding.
24 Cule hitin a si ding:
Rimthaw aiah rimsia a um ding,
Taiṭen aiah hridai,
Sám ceimawi aiah lukawlhnak,
Hnipuan mawi aiah buri-puan,
Cule mawinak aiah thirling ih deh.
25 Na mipapawl cu ralnâm in an tlu ding ih,
Na micakpawl cu raldonak ah.
26 A kăwtkapawl cu an ṭap ding ih, an riahsia ding,
Cule anih cu ṭhing riamriamin lei ah a to ding.

4

1 Cule cuih ni ah cun nunau pasarih in mipa pakhat an kaibĕt ding ih, «Kanmai rawl kan ei ding ih, kanmai hnipuan kan hruk ding; na hminte lawng in putter aw, kan ningzahnak in lakhlohsak aw,» tiin an ti ding.

Jehovah-ih Hngeṭek

2 Cuih ni ah cun Jehovah-ih Hngeṭêk cu a mawi in a ropi ding, cule a nungdamsŭn Israel hrangah leilung rah cu a ṭha tuk lawmlam ding ih, thinlung a la zet ding.

3 Cule hitin a si ding, Zion ih tān ta mi le Jerusalem ih a tāng mi cu thianghlim tiih kawh a si ding, Jerusalem ah a nung tiih hmin ngankhum mi kip cu. 4 Bawipa in dāntatnak thlarau le meialh thlarau in Zion fanupawlih balhnak a khawlhfai ih, a hnen ihsin Jerusalem thisen a thianfai tikah cun, 5 Jehovah in Zion Tlang pumhlum tlunah le a mipi tawngkhawmaw tlunah sun ah khawdur le meikhu le zan ah meialh êng a umter ding. Ziangahtile ropitnak hmuahhmuah tlunah khuhtu a um ding. 6 Cule sun ih ni sa lakih daihnem hrangah thlamte, thlipi le ruahpi lakih beunak hrangah răwlhimnak a um ding.

5

Sabit Hmuan Hla

1 Ka duhdawt zet mi hnenah hla seh ning,
A sabit hmuan thuhla ih ka duhdawt miih hla cu:
Ram ṭha zet tlangmual ah cun,
Ka duhdawt zet mi in sabit hmuan a nei.
2 Cumi cu anih in a lai ih a lunghrâwlpawl a hrilfai hai,
Cule cuih hmuan ah cun sabit ṭhabik a cîng.
A laiah dawlsâng a sak ih,
A sungah sabit sawrnak khal a tuah,
Cule cuih hmuan in sabit ṭha rahsuak dingin a beisei,
Asinan rah sia a rah riangri.
3 «Cule atu ah, Maw Jerusalem luahtupawl le Judah mipapawl,
Keimah le ka sabit hmuan karlak thu in ṭhensak hram hnik uh.
4 Ka sabit hmuan parih ka tuah ding mi ka tuah lo ziangso um nawn?
Ziangruangah sabit ṭha rah dingih ka beisei laiah,
Rah sia a rah riangri?
5 Cule atu ah, ka sabit hmuan parih ka tuah ding mi ka lo sim ding:
Hling ih kulh mi a hruang ka ṭhiat pei ih,
Meisa ih ur a si ding;
A hruangdawl cu ka băl pei ih,
Cīlsiat a si ding.
6 Ka ṭhingter ding,
Hlĕuhfai a si lo ding ih, vûr a si fawn lo ding,
Hrambuar le hlingpawl an keuh sawn ding.
A parah ruah sur lo dingin
Khawdurpawl khal thu ka pe ding.»
7 Ziangahtile ralkap rualpawlih Jehovah-ih sabit hmuan cu Israel sungza hi a si ih,
Judah mipapawl cu a lunghmuinak thlai kung an si.
Anih in diknak a hawl ih, asinan ngai hnik, thisen suahawknak a hmu;
Dingfelnak a hawl, asinan ngai hnik, băwmnak dil ih ṭahnak a hmu.

Hmakhuapihnakpawl le Dāntatnakpawl

8 Ram laifangih anmah lawng an cēn theinak dingih,
Hmun lawng um lo ko,
Inn pakhat le pakhat a pehtu,
Ló le ló a kăwmtu pawl cu,
An hmakhua a pit!
9 Ralkap rualpawlih Jehovah in ka hnatheihah,
«Thungaiin, inn tampi a ṭhing ding,
Inn tumpi pi le mawi zetzet pawl cu, luahtu nei loin.
10 Ziangahtile sabit hmuan eka hra in ^abath khat rah a suah ding ih,
Thlaici ^bhomer khat in efa khat lawng rah a suah ding,» tiah a ti.
11 Zureu hmun pan dingah,
Zingpit teih a thotupawl,
Sabitzu an ritngah hlanlo
Zan simpi tiangtiang a umtupawl cu an hmakhua a pit!
12 An puaipawl cu ṭingṭang le lemlawi,
Khuangte le phirivau le,
Sabitzu thawn an hmang,
Asinan Jehovah-ih hna cu an ngaihsak lo ih,
A kutsuak thil an ngaihtuah fawn lo.
13 Curuangah ka mipawl cu dawisuah an si ding,
Ziangruangahtile theihnak an nei lo,
An miupattlakpawl cu an ṭamsawl ding ih,
An mipipawl cu tihâlin an car ding.
14 Curuangah Sheol cun a dang a kauter ih,
Tah cawk loin a kâ a âng;
Jerusalem ropitnak le a mipi tam zet le năwmawk dupdonak le,
A sungih năwmcēnnak cu cu tawkah an sukthla ding.
15 Mitenau cu kûnter a si ding ih,
Miropi cu ningzahter a si ding,
Cule mipuarthau mit khal niamter a si ding.
16 Asinan ralkap rualpawlih Jehovah cu a thuṭhennak ruangah khaisan a si ding ih,
A thianghlim mi Pathian cu dingfelnak ruangah thianghlim a sinak a langter ding.
17 Cun tuufa nopawl cu an tlannak hmun ah tlimno an piat ding ih,
Milianpawlih hmun ṭhingpawl ah cun ram dang mipawl in an ei ding.
18 Bumnak hrihrual thawi mawhsualnak a dirtupawl le,
Lênghri thawi sual a dir tupawl,
19 «Kan hmuh theinak dingah,
A hna cu ṭuan hlauhhlauh in hmanhmawh seh,
Kan theih theinak dingah,
Israel-ih Mi Thianghlim thil tum cu ra nâi sehla, ra thleng seh,» tiih a titupawl cu an hmakhua a pit a si.
20 Thil ṭhalo cu thil ṭha ti ih, thil ṭha cu thil ṭhalo a titupawl,
Tleu cu thim ih ruat ih, thim cu tleu ih a ruattupawl,
Thil thlum cu thil khâ ih ruat ih, thil khâ cu thil thlum ih a ruattupawl cu an hmakhua a pit a si!
21 Anmai mit ih a fimpawl le,
Anmai ruahnak ih khawruatthiampawl an hmakhua a pit a si!
22 Sabitzu phâm zetpawl cu an hmakhua a pit,
Zureu va rawităwnnak lamih micakvakpawl khal.
23 Nawhthuh ruangih misualrál thiam cohtu le,
Midingfel hnen ihsin diknak lahlotu cu an hmakhua a pit!
24 Curuangah meihliau in cangpâwl a kangrál vek le,
Meialh in fângko a hūlral vekin,
An hram cu mawtnak vekah a cang ding ih,
An par mûm cu leivut bangin semhloh an si ding,
Ziangruangahtile ralkap rualpawlih Jehovah Dān cu an rak hnáwng ih,
Israel-ih Mi Thianghlim kamsuakthu cu ziang an siar lo.
25 Curuangah Jehovah thinhengnak cu a mipawl parah a tho,
Anmah dokalhin a kut a hawi ih,
Annihpawl cu a vuak hai,
Cule tlangmualpawl cu an khūr.
An ruangpawl cu kăwtthler laiah êk bangin an um.
Ziangahtile hi tlukih a tuah hnu khalah a thinhengnak cu a reh cuang si lo,
A kut cu a hawi hrih lai thotho.
26 Anih in hla zetih miphunpawl hrangah thantar a tar ding ih,
Leilung dĕng ihsin an hnenah a hurhuk ding,
Ngai hnik, annih cu rang zetin an ra zurzo ding.
27 An lakih mi zohman an cau lo ding ih an bah fawn lo ding,
Zohman an sĭng lo ding ih an itthat fawn lo ding,
An tâi ihsin an taikhap a dawr lo ding ih,
An kedam hripawl khal an cat fawn lo ding,
28 An thálfungpawl cu an hriam ih,
An thál hmuahhmuah cu an nawpaw cia ṭheh,
An rángpawlih tinpawl cu ṭêklung vekin an cang reureu ih,
An lêngkepawl cu phusîng vek an si.
29 An hrûm cu kiosa bangtuk a si,
Kiosa vanglaipawl bangin an hrûm,
Hrûm phahin sa an deh ih,
Zohman ih runsuah lo dingin an thiarhlo.
30 Cuih ni ah cun tifinriat hrûm bangin
Amah dokalhin an hrûm ding.
Zo in si maw ram cu thlir hmansehla,
Ngai hnik, thim le riahsiatnak lawng!
Cule tleu cu khawdur in a thimter.

5:10^a bath khat: Kalan ruk hrawng a rit.

5:10^b homer khat: Pung 4 hrawng a si.

6

Isaiah Kawhnak

1 Siangpahrang Uzziah a thih kum ah, sâng zetih khaisan mi laltokham parih to Bawipa ka hmu, a kâwrfualpi fêm cu temple a khat ṭheh. 2 Cumi tlunah ^aserafpawl an ding, thla paruk ciar an nei: an thla pahnih in an hmai an hup fingfing ih, pahnih in an ke an hup fingfing, cule pahnih in an zam. 3 Cule pakhat le pakhat an auhaw ih,

6:2^a serafpawl: Hebru ṭawng a si ih, a sullam cu «a alh mi» tinak a si; vancungmi umdān a relnak a si.

«Ralkap rualpawlih Jehovah cu a thianghlim, a thianghlim, a thianghlim;
Leilung pumpi cu a ropitnak in a khat!»

tiah an ti. 4 Cule a autuih authâwm ruangah sângka biangpawl an hnîn ṭheh ih, inn cu meikhu in a khat ṭheh.

5 Cule kei in,

«Ka hmakhua a pit, ziangahtile ka cemthla a si!
Ziangruangahtile kei cu hmur thianglo ka si ih,
Hmur thianglo mipawl lakah ka cêng,
Ziangahtile ka mit in Siangpahrang ka hmu zo,
Ralkap rualpawlih Jehovah cu,»

tiah ka ti.

6 Cun caiceh thawi Biakṭheng ihsin a lâk mi meiling a kut ih keng phahin serafpawl lakih pakhat ka hnenah a ra zam. 7 Cule ka kâ a run dĕp ih,

«Ngai hnik, himi in na hmur a dĕpngah zo,
Na mawhsualnak cu lakhlo a si zo ih,
Na sual ngaidam a si,»

tiah a ti.

8 Bawipaih aw ka thei lala ih,

«Zo so ka thlah ding ih,
Zo so kan hrangah a feh ding,»

tiin a au.

Cun kei in, «Hi tawkah keimah ka um! I thlah aw,»

tiah ka ti.

9 Cule anih in, «Va feh awla, hi minungpawl hnenah:

‹Ngaithla ringring uh, asinan theithiam hlah uh,
Zoh ringring uh, asinan a sullam cu thei hlah uh,› tiah sim aw.
10 «Hi minungpawlih thinlung hĭtter awla,
An hna setter aw,
Cule an mit cawtter aw,
Culoasile an mit in an hmu pang ding ih,
An hna in an thei pang ding,
Cule an thinlung in an theithiam pang ding,
Cun an kirsal ding ih damter an si pang ding,»

tiah a ti.

11 Cun kei in, «Bawipa, ziang tiang so a si ding?» tiah ka ti. Cule anih in,

«Khawpipawl ṭhing ko le luahtu nei loin an um ih,
Innpawl milai um loin an um ih,
Ram cu a ṭhingngah reprep ih,
12 Jehovah in milaipawl hla zetah a ṭhawn ih,
Ram sungah tlansan mi hmun tampi an um hlanlo a si ding.
13 Pahra lakah pakhat cu cu tawkah um hman hai sehla,
An kangrál leh ding,
Cumi cu hau tikih an tawbúl tāng mi, ela thingkung le elon thingkung vek a si.
Ci thianghlim hi a tawbúl cu a si,»

tiah a sâng.

7

Immanuel Hminsinnak

1 Cule Judah siangpahrang Uzziah fapa Jotham-ih fapa Ahaz san ah hitin a si, Siria siangpahrang Rezin le Israel siangpahrang Remaliah fapa Pekah cu Jerusalem do dingin an hung so, asinan an neh thei lo. 2 Cule, «Siria ralkappawl cun Efraim ram sungah ṭanhmun an khuar,» tiin David sungza hnenih sim a si tikah, Ahaz-ih thinlung le a mipawlih thinlung cu thli in thingkungpawl a hninter vekin an hnîn ṭheh.

3 Cun Jehovah in Isaiah hnenah, «Puan sawptuih ló zin ih um, tili sakta tikawng lu ah, Ahaz hmuak dingin nang le na fapa ^aShear-Jashub cu atu ah fehsuak uhla, 4 a hnenah, ‹Fimkhur awla, hnangamten um aw, hi thingbúl mût pahnih, ^bRezin le Siria le Remaliah fapa pawlih thinhengnak maksak ruangah hin zianghman ṭih hlah awla, na bei khal dawng hlah. 5 Ziangruangahtile Siria, Efraim le Remaliah fapapawl in nangmah dokalhin thil ṭhalo khua an khâng ih, 6 «Judah hung do in hung cawkbuai uhsi, cule a khawkulh tisiat uhsi la, an tlunah Tabel fapa hi siangpahrang ṭuanter uhsi,» tiah an ti a si. 7 Curuangah Bawipa Jehovah in,

7:3^a Shear-Jashub: Hebru ṭawng a si ih, a sullam cu «A tāngsŭnpawl an kirsal ding» tinak a si.

7:4^b Rezin le Siria: Rezin cu Siria siangpahrang a si. Rezin le Siria ṭih hlah tiih a sullam cu Siria-mipawl le an siangpahrang ṭih hlah tinak a si.

«Cuih thu cu a thleng lo ding ih,
A cangsuak fawn lo ding.
8 Ziangahtile Siria lu cu Damaskas a si ih,
Damaskas lu cu Rezin a si.
Kum 65 sungah Efraim cu siatbăl a si ding ih,
Cutin miphun a si nawn lo ding.
9 Efraim lu cu Samaria a si ih,
Samaria lu cu Remaliah fapa a si,
Na zum lo ding asile,
Dĭnhngetin na um hrimhrim lo ding,»

tiah a ti,› tiin sim uh,» tiah a ti.

Immanuel Simsungnak

10 Cuihhleiah Jehovah in Ahaz a simsal ih, 11 «Jehovah na Pathian hnen ihsin na hrangah hminsinnak, Sheol tlukih thûkin simaw, van tăwng tlukih sângin simaw dil aw,» tiin a sim.

12 Asinan Ahaz in, «Ka dil lo ding, Jehovah ka hniksak fawn lo ding!» tiah a ti.

13 Cun anih in, «Maw David sungzapawl, atu ah ngaithla hnik uh! Milai thinbăngter hi nan hrangah thil tenau men maw a si, ka Pathian thin khal nan bāngter hrih thotho ding maw? 14 Curuangah Bawipa amah rori in hminsinnak a lo pe hai ding: ngai hnik fala him in fapa a vun ding ih, fapa a hring ding, cule a hmin ah ^aImmanuel tiah a ko ding. 15 Thil ṭhalo hnawn le thil ṭha a hrilthiam tikah hnawihlap le khuaitizu a ei ding. 16 Ziangahtile naute in thil ṭhalo hnawn le thil ṭha hril a theih hlanah na ṭih mi siangpahrang pahnih ih ram cu răm a si ding. 17 Judah ihsin Efraim a pawtsuak ni ihsin a thleng dah lo mi ni cu, nangmah le na mipawl le na paih sungza parah a thlengter ding. Na parah Jehovah in Asiria siangpahrang a run hruai ding,» tiah a ti.

7:14^a Immanuel: Hihi Messiah ih sinak dinhmun a si, a sullam cu «Pathian kan hnenah a um» tinak a si.

18 Cule cuih ni ah cun hitin a si ding,
Izip tivapawl dĕngih a um mi thothe le
Asiria ram ih a um mi khuaipawl ko dingin
Jehovah a hurhuk ding.
19 Annihpawl cu an ra pei ih, hawrkuam lawnglakpawl,
Lungpi khāmrangpawl,
Hlingbûr hmuahhmuah parah le ran tlannak hmuahhmuah ah an zaten an ra fu ding.
20 Cuih ni thotho ah tivapi ral ihsin Bawipa in sān mi sám ziahnak nâmte,
Asiria siangpahrang hmangin,
Lu le ke hmulpawl a ziat ṭheh ding ih,
Khabe hmul khal a ziathlo ṭheh ding.
21 Cuih ni ah cun, mi pakhat in câwla pakhat le tuu kăwp khat a vulh ding;
22 Cule hitin a si ding, hnawi tampi an suah ruangah,
Hnawihlap a ei ding,
Ziangahtile ram ih a tāng mi mi kip in hnawihlap le khuaitizu an ei ding.
23 Cuih ni ah cun hitin a si ding,
Ngun tangka shekel 1000 a mannak
Sabit hri 1000 a rak um ṭheu nak hmun kip ah,
Hrambûar le hlingbûr an um thlang ding.
24 Cu tawkah thálfungpawl le thálpawl thawn mi an ra ding,
Ziangruangahtile ram pumpi cu hrambûar le hlingbûr an si ṭheh ding.
25 Cule phaihlai thawi na rak laihnak tlangmual pauhpauh ah,
Hrambûar le hlingbûr ṭih ah na feh ngam lo ding,
Asinan câwcangpawl tlannak le,
Tuupawl tlannak hmun ah a cang ding.

8

Jehovah Hmanrua, Assiria

1 Cuihtlunah Jehovah in ka hnenah, «Cazual tumpi la awla, a parah milai cafung in ^aMaher-Shalal-Hash-Baz thuhla ngan aw. 2 Cule ngankhum dingin ka hrangah theihpitu rinum puithiam Uriah le Jeberekiah fapa Zekariah ka rak hruai ding,» tiah i ti.

8:1^a Maher-Shalal-Hash-Baz: Ralthillawn lamah khulrang aw, rallâksum lamah hmanhmawh aw tinak a si.

3 Cun nunau profet hnenah ka feh ih anih in fapa a vun ih a hring. Cun Jehovah in ka hnenah, «A hmin ah ^aMaher-Shalal-Hash-Baz sak aw; 4 ziangahtile cuih fapate in, ‹Ka pa,› asilole, ‹Ka nu,› tiih kawh hna a thiam hlanah, Damaskas lennakpawl le Samaria-ih ralthillawnpawl cu Assiria siangpahrang in a lahlo ṭheh ding,» tiah i ti.

8:3^a Maher-Shalal-Hash-Baz: Câng 1 simfiangnak zoh aw.

5 Jehovah in ka hnenah,

6 «Hi mipi hin nemteih a luang mi
Shiloah tidai an hnáwng ih,
Rezin le Remaliah fapa ah lungawiaipuangin an um;
7 Curuangah atu ah, ngai hnik, Bawipa in a khoh zet mi le a cak zet mi Zufraṭis tivapi a si mi
Assiria siangpahrang le a ropitnak hmuahhmuah in annih cu a khuhter ṭheh hai ding;
A tihriat hmuahhmuah le
A kap hmuahhmuah cu cuih tivapi cun a cîmpil ṭheh ding.
8 Cuih tivapi cun Judah tiang a hrut ding,
A luangliam ding ih a hruttlăng vivo ding,
Hngawng tiang hman a thleng ding,
Cule a thla pharh mi cu
Maw ^aImmanuel, na ram kauh zât in a khat ṭheh ding.
9 Kekkûai ṭheh uh, Maw nannih miphunpawl tla, cip nêknêkin kûai ṭheh uh!
Nan hna tŭn uh, nannih leilung dĕngih um ram hmuahhmuah tla.
Nan tâi ṭawn uh, cucingin kûai seksek uh,
Nan tâi ṭawn uh, cucingin kûai seksek uh.
10 Thu rawnawkhawm uh, asinan cumi cu hlawhsămter a si ding,
Thu relkhawm uh, asinan a ding khawsuak lo ding,
Ziangahtile Pathian in in umpi a si,»

8:8^a Immanuel: 7:14 simfiangnak zoh aw.

tiin i simsal.

Pathian Ṭihzah Aw

11 Ziangahtile Jehovah in huham nasazet thawn ka hnenah hitin thu a sim, cule hi minungpawlih lamzin ka zawhlonak dingah i khihhmuh:

12 «Hi minungpawl ih phiarthupnak an ti mi hmuahhmuah cu,
‹Phiarthupnak,› ti ve hlah aw,
An ṭihphan mi ṭih fawn hlah awla, na thla khal phâng hlah seh.
13 Ralkap rualpawlih Jehovah cu thianghlim ah ruat uh;
Anih cu nan ṭih mi si-aw sehla,
Anih cu a lo thlaphângtertu si seh.
14 Anih cu hmun thianghlim a si ding,
Asinan Israel sungza pahnih hrangah cun,
Tlûknak lung le bahnak lungpi a si sawn ding,
Jerusalem luahtupawl hrangah tháng le sûrthang a si ding.
15 Cule an lakih mi tampi cu ^aan parah an bah ding,
An tlu ding ih an kekkuai ṭheh ding,
Thang ih awh an si ding ih kaih an si ding,» tiin.
16 Theihpinak hi ṭembĕt aw,
Ka dungthluntupawl lakah dān hi erhpit aw.
17 Cule Jakob sungza hnen ihsin a hmai thuptu Jehovah cu ka hngak ding;
Cule amah cu ka ruahsan ding.

8:15^a an parah: Câng 14 ih lung le lungpi a relnak a si.

18 Ngai hnik, Jehovah ih i pek mi nauhakpawl le keimah hi, Zion Tlang ih cêng ralkap rualpawlih Jehovah hnen ihsin Israel lakah hminsinnak le mangbangza kan si.

19 Cule nan hnenah, «Ṭawng thektho le a phun supso mi thlarau kawhthiampawl le tinzohthiampawl răwn uh,» an lo ti tikah, mi in an Pathian an ráwn sawn lo ding maw? A nung mi aiah a thi mi an ráwn ding maw? 20 Dān le thutheihpinak thlun ding a si! Hi kamsuakthu bangtukih an rel lo asile anmah ah tleu a um lo ruangah a si ding.

21 Har zet le ṭamsawlin an fehtlăng ding, cule hitin a si ding, an ril a rawn tikah an ai a thăwk ding, cule an siangpahrang le an Pathian an camse ding ih, van an tau ding. 22 Cun leilung an zoh ding ih, ngai hnik, buainak le thim, ānhai beidăwnnak an hmu ding; cule annih cu thim lakah dawihlo an si ding.

9

Kan hrangah Naute a Suak

1 Cutisikhalsehla vansannak a tuartu ram parah nguinak a um nawn lo ding,
Hi hlanah cun Zebulun ram le Naftali ram cu a rak ngainep,
Sikhalsehla lehhnu ah cun Jordan tiva ral,
Tipi lamzin ih um,
Miphunpawl umnak Galili a sunlawih ding.
2 Thim lakih a rak um mipawl in
Tleu nasazet an rak hmu;
Thimkhawzing ram ih a cêngtupawl,
An parah êng a ra suak.
3 Miphun na rak karhter ih,
A aipuannak na pungzaiter;
Rawl khawm aipuan bangtukin,
Ralthillawn an zemawk laiih lungawiaipuangih mi an um bangtukin,
Na hmaiah lungawiaipuangin an um.
4 Ziangahtile Midia-mi san laiih na rak tuah vekin
A phurrit hngawngkol na khiahsak,
A liang ih fung,
A palbĕttuih kianghrăwl cu.
5 Ziangahtile ral do buainak ih bŭn mi kedam hmuahhmuah le,
Sinfen thisen kăwp hnuanghnipawl cu,
A kāng ding ih, meisa hrangah meiti vek a si ding.
6 Kan hrangah naute a suak,
Kan hrangah Fapa pek kan si,
Cule uknak cu a liang parah a um ding.
Cule a hmin cu Mangbangza Thurawnpetu, Pathian Cak, Kumkhaw Pa, Remnak Lal tiih kawh a si ding.
7 A uknak le daihnak a kauhdān cu
Cem ti a nei lo ding,
David laltokham par le a lalram tlunah a to ding ih,
Cuih cān ihsin kumkhua tiangin
Thuṭhennak le diknak in a lalram cu a dĭnhnget ding.
Ralkap rualpawlih Jehovah-ih ṭhahnemngainak cun hihi a tuahsuak ding.

Israel parih Jehovah Thinhengnak

8 Bawipa in Jakob dokalhin thucah a thlah ih,
Israel parah a tla.
9 Minung hmuahhmuah in an thei ding,
Hngal zet le thinlung duhaw zetih a ṭawngtu,
Efraim le Samaria luahtu hmuahhmuah in:
10 «Tlakrawhpawl an cim,
Asinan ser mi lungpawl in kan saksal ding,
Sikamor kungpawl cu hauthluk an si,
Asinan sidar thingpawl in kan airawl ding,» tiah an ti.
11 Curuangah Jehovah in Rezin doralpawl kha amah do dingin a cakter ding ih,
A ralpawl a căwktho ding,
12 Nisuahnak lamah Siria-mipawl le nitlaknak lamah Filisṭia-mipawl,
Cule annih in kâ âng in Israel cu an eirál ding.
Cuticingkhalin a thinhengnak a reh cuang lo,
Cuhnakin a kut a hawi hrih lai thotho.
13 Cuih minungpawl cun anmah vawtu lam an hawi duh lo,
Ralkap rualpawlih Jehovah an hawl duh lo.
14 Curuangah Jehovah in Israel cu a lu le a mei,
Ṭhulhfau hnah le phaipheng pawl thawn ni khat sungah a sattán ding.
15 Upa le upattlak cu a lu a si,
Thuphan zirhtu profet cu a mei a si.
16 Ziangahtile hi minungpawl in anmah cu an hruaisual ih,
An kaihhruai mipawl cu an hlorál ṭheh.
17 Curuangah Bawipa cu an minopawl parah aipuannak a nei lo ding ih,
An pa nei lo pawl le an nuhmeipawl par khalah zahngaihnak a nei fawn lo ding;
Ziangahtile mi kip cu midepde le thil ṭhalo tuahtu an si,
Cule kâ i kip in atthlak thu an rel,
Cuticingkhalin a thinhengnak a reh cuang lo,
Cuhnakin a kut a hawi hrih lai thotho.
18 Ziangahtile sualralnak cu meisa vekin a kāng;
Hrambûar le hlingbûr pawl a kangrál,
Cule ramlak phūl a kāng;
Annih cu meikhu sâng takah an cang.
19 Ralkap rualpawlih Jehovah thinlingnak hmangin ram cu urkăng a si,
Cule minungpawl cu tihthing vek an si ding,
Zohman in mai unau an zuah lo ding.
20 Cule a kut vawrh lam ihta a hlep ding nân,
A ril a râwng thotho ding;
A keh lam ihta a ei ding ih
A khăwpkham cuang lo ding;
Mi kip in anmai bantit an ei ding.
21 Manasseh in Efraim a ei ding ih,
Efraim in Manasseh;
Judah an dotlang ding.
Ziangahtile a thinhengnak a reh lo,
A kut a hawi hrih lai thotho.

10

1 «Thusuah ṭhalo suahtupawl,
Thutluknak diklo ngan ringring tupawl,
2 Nuhmeipawl thil laksak in,
Pa nei lo pawl an suam theinak dingah
Mitlasampawl hnen ihsin thuṭhennak dik lawnsaktu,
Ka minungpawl lakih mifarahpawlih covo laksaktupawl cu an hmakhua a pit.
3 Dāntatnak ni ah le,
Hmun hla zet ihsin a ra ding mi siatnak ni ah ziang na tuah ding?
Băwmnak dil dingah zo hnenah so na tlânluh ding?
Cule na neihnunnak teh khuiah so na tān ta ding?
4 Thawngtlapawl lakih kūn le,
Thah mipawl lakih tlûk ti siarlo cu zianghman a um nawn lo.
Ziangahtile a thinhengnak cu a reh lo,
A kut a hawi hrih lai thotho.

Mihngal Assiria Dāntatnak

5 «Ka thinhengnak fungfek, Asiria le
Ka aithawknak kengtu kianghrăwl cu a hmakhua a pit a si.
6 Ralthillawn va cuh dingin le ralkaih mi va lăwng dingin,
Kăwtthler ih ciarbêk bangih anmah cīl dingin,
Amah cu Pathian ngaihsak lo miphun do dingin ka thlah ding ih,
Ka thinlingtertu miphun do dingin amah cu thucah ka pe ding.
7 Sikhalsehla anih cun cuvek cu a tum lo,
Cuvek cu a thinlung in a ruat fawn lo;
Miphun málte men thah ding si loin,
Va thah ṭheh ding kha a thinlung ah a um sawn.
8 Ziangahtile anih cun,
‹Ka bawipawl cu siangpahrang an si thluh lo maw?
9 Kalno khua cu Karkemish khua bangtuk a si lo maw?
Hamath khua cu Arpad khua bangtuk a si lo maw?
Samaria khua cu Damaskas khua bangtuk a si lo maw?
10 Jerusalem le Samaria ta hnakih ṭhasawn khercawp milimpawl neitu,
Milem betu lalrampawl ka kut ih a hmuhsuah bangin,
11 Samaria le a milempawl parih ka tuahdān bangin,
Jerusalem le a milempawl parah ka tuah ve lo ding maw?› tiah a ti.»

12 Curuangah hitin a si ding, Bawipa in Zion Tlang le Jerusalem parah a hna hmuahhmuah a ṭuan ṭheh tikah, anih in, «Assiria siangpahrang hngalnak thinlung rah le hngal zetih a mi zohnak cu dān ka tat ding,» tiah a ti.

13 Curuangah anih in:

«Ka bân thacahnak le ka fimnak in ka tuah,
Ziangahtile kei cu khawruatthiam ka si;
Miphunpawlih ramri khal ka ṭhawn ih an hlawnthil retnakpawl ka suam;
Micak vekin a luahtupawl ka dirthla.
14 Vâte bu bangin miphunpawlih lennak cu ka kut in a hmusuak ih,
Tān tâk mi vâte ti mi in an khawm vekin,
Leilung hmuahhmuah ka rak khawm;
Cule thla zâp pakhat hman an um lo,
Âi dingih kâ âng khal an um lo,»

tiah a ti.

15 Hreitlung in thingcehnak ih amah a hmangtu tlunah a tluangkhâwng ding maw?
Hluah in thingattu tlunah a titumaw ding maw?
Cuti si ta sehla cu fungfek in amah hawitu a văikir ih,
Kianghrăwl in thing si lo amah hawitu a văikir a si ding.
16 Curuangah Bawipa, ralkap rualpawlih Bawi in,
A mithaupawl lakah ṭawlnak a thlah ding;
A ropitnak hnuaiah
Meisa kāng bangin
Mei a ur ding.
17 Cutin Israel-ih tleu cu meisa dingah a si ding ih,
A Mi Thianghlim cu meialh hrangah;
Cumi cun a kāng ding ih a kangrál ding,
Ni khat thilthu ah a hlingbûr le hrambûar pawl tla.
18 Cule cumi in a tupi le a lóram ṭhapawlih ropitnak cu a kangrál ding,
An nunnak le an taksa a pahnih in,
Annih cu mina ziamral lai vek an si ding.
19 Cun a tupi thingpawl lakih a tāngsŭn cu mál takte an si ding ih,
Naute ih hminsin thei fangte an si ding.

A Tangsŭn Israel Kirsalnak

20 Cule cuih ni ah cun hitin a si ding,
Israel tāngsŭn le,
Jakob sungza a tlânsuak mipawl cun,
Anmah nehtu an rinsansal dah nawn lo ding,
Thutak ah, Israel-ih Mi Thianghlim, Jehovah an rinsan sawn ding.
21 Mitangsŭn, Jakob mitangsŭnpawl cu an ra kirsal ding,
A cak mi Pathian hnenah cun.
22 Maw Israel, na mipawl cu, tifinriat vunnel zât sikhal hai sehla,
A tāngsŭn lawng an kir ding,
Thusuah mi siatralnak cu dingfelnak in a tuam ṭheh ding.
23 Ram sungah ralkap rualpawlih Bawi Jehovah in thuṭhencatnak a tuah ding.

24 Curuangah ralkap rualpawlih Bawi Jehovah in hitin a ti, «Zion ih a cêng mi, Maw ka minungpawl, Assiria-mipawl ṭih hlah uh. Izip tidān vekin fungfek in a lo thawi ding ih a kianghrăwl a lo hawihnawh ding. 25 Ziangahtile a rei hlanah aithawknak a cem ding, an siatralnak dingih ka thinhengnak vekin,» tiah a ti. 26 Cule ralkap rualpawlih Jehovah in Oreb lungpi ih Midian-mipawl an thah lai vek khan cu pa hrangah fungfek a căwktho ding, cutin anih in tipi tlun le Izip ram ih a tidān vekin a hawi ding.

27 Cuih ni ah cun hitin a si ding
Na liang ihsin a phurrit lakhloh a si ding ih
Na hngawng ihsin a hngawngkol lakhloh a si ding,
Cule thih mi hriak ruangah kawn cu siatbăl a si ding.
28 Anih cu Aiath khua a thleng zo,
Migron khua a lăn;
Mikmash khua ah a bungrua a retṭha.
29 Annih cu tlangkâwn in an fehliam,
Geba khua ah an riak.
Ramah cu a thla a phâng,
Saul-ih khua Gebeah a zâmhlo.
30 Na aw suah aw,
Maw Gallim fanu!
Laish khua tiang theih dingin,
Maw Anathoth na va farah ve!
31 Madmenah khua cu a zâmhlo,
Gebim luahtupawl in răwlhimnak an hawl.
32 Tuihsun ah anih cu Nob khua ah a tâp hrih ding,
Zion fanuih tlang,
Jerusalem cu a kuttum a hmuh ding.
33 Ngai hnik, Bawipa, ralkap rualpawlih Jehovah in,
Tuksumzain thing zik a săwktán ding,
A ṭêk sângpawl cu sahthlak an si ding ih,
A lăwr hleicepawl cu niamter an si ding.
34 Anih in hrei in tupi sahtak cu a hau ding ih,
Micak Pa ruangah Lebanon cu a tlu ding.

11

Jessi Hngeṭêk

1 Jessi búlhram ihsin Cerhno a hung suak ding ih,
A hram ihsin Hngeṭêk a cerhsuak ding,
2 Amai parah Jehovah Thlarau a fu ding,
Fimnak le theihthiamnak Thlarau,
Thurawnpeknak le cahnak Thlarau,
Theihnak le Jehovah ṭihnak Thlarau cu.
3 A lungsinak cu Jehovah ṭihnak ah a si ih,
A mit ih a hmuhnak zulhin thu a ṭhen lo ding ih,
A hna ih a theihnak zulhin thutluknak a tuah fawn lo ding;
4 Asinan dingfelnak hmangin mifarahpawl thu a ṭhen ding ih,
Dik zetin leilung minunnempawl hrangah thutluknak a tuah ding;
A kâ ih fungfek in leilung a vaw ding ih,
A hmur ih thaw in misualrálpawl a that hai ding.
5 Dingfelnak cu a taibawr khapnak a si ding,
Rinumnak cu a taikhap a si ding.
6 «Cinghnia khal tuufa no zawngah a tláng ding,
Tlavâng cu meno zawngah a băwk ding,
Câwpa no le kiosa vanglai le cawmthau mi ran cu an băwktlang ding,
Cule nauhakte in cupawl cu a hruai hai ding.
7 Câw le saváwm hrampi an piattlang ding,
An fanotepawl an băwktlang ding,
Cule câwcang bangin kiosa in cangpâwl a ei ding.
8 Hnawifawp lai naute cu cawngawr kua ah a lek ding ih,
Hnawi thlei zo naute in rulngân bu a pur ding.
9 Ka tlang thianghlim ah cun an tuahmawhaw lo ding ih, an siatsuahaw fawn lo ding,
Ziangahtile tipi in tifinriat a khuh bangin,
Leilung cu Jehovah theihnak in a khat ding.
10 «Cule cuih ni ah cun miphunpawl hrangih thantar vekih a dingtu ding Jessi-ih Búlhram a um ding;
Ziangahtile miphunpawl in amah an hawl ding ih,
A cawlhnak hmun cu a ropi ding.»
11 Cuih ni ah cun hitin a si ding,
Assiria ihsin, Izip ihsin, Pathros ihsin, Kush ihsin, Elam ihsin, Shinar ihsin, Hamath ihsin le tifinriat tikulhpawl ihsin tān mi, a minung tāngsŭnpawl la leh dingin,
Bawipa in a vei hnihnak a bân a pharsal ding.
12 Miphunpawl hrangah thantar a tar ding ih,
Israel-mi lakih dawisuak mipawl cu a khawm ding,
Cule leilung kil li ihsin,
Judah-mi lakih a ṭekdarh mipawl cu a fĭnkhawm ding.
13 Efraim-ih iksiknak khal a reh ding ih,
Judah doral cu sahtan a si ding;
Efraim in Judah a iksik lo ding ih,
Judah in Efraim a hnaihnăwk lo ding.
14 Annih cu Filisṭia-mipawlih liang par, nitlaknak lamah an zámthla sawn ding;
Nisuahnak lam mipawl an rămtlang ding,
Edom le Moab parah an kut an thlak ding,
Cule Ammon-mipawl in an thu an lung ding.
15 Jehovah in Izip Tifinriat tikĕl a siatsuah verver ding,
A cak zet mi a thlipi hmangin ^aTivapi tlunah a kuttum a hmuh ding ih,
Cumi cu tivate pasarih cang ko a vaw ding,
Mi in an kedam thawn an paltlăng ding.
16 Izip ram ihsin a hung soh ni ih Israel hrangih a um vek khan,
A nungdam tāngsŭn a mipawl hrangah
Assiria ihsin zinpi a um ding.

11:15^a Tivapi: Zufraṭis a si.

12

Thangṭhatnak Hla

1 Cuih ni ah cun nang in,

«Maw Jehovah, ka lo thangṭhat ding;
Ka parah na thin rak heng khal awla,
Na thinhengnak cu a dai ih, nang in i hnem.
2 Ngai hnik, Pathian cu ka runsuahnak a si,
Ka rinsan ding ih ka thlaphâng lo ding;
Ziangahtile ^aYAH, Jehovah cu ka cahnak le ka hla a si;
Anih cu ka rundamnak khalah a ra cang,»

12:2^a YAH: Jehovah a tawi zawngih kawhnak a si.

na ti pei.

3 Curuangah runsuahnak tikhurpawl ihsin
Aipuang zetin tidai na khai ding.

4 Cule cuih ni ah cun nang in,

«Jehovah cu thangṭhat uh, a hmin ko uh;
Miphunpawl lakah a thil tipawl thăn uh,
A hmin cu khaisanin a um ti tarlang uh.
5 Jehovah hnenah hla sak uh,
Ziangahtile anih cun thil ṭha cungcuangpawl a tuah;
Cumi cu leilung pumpi ah theihter uh.
6 Ausuak uhla aipuang zetin au uh, Maw Zion luahtupawl;
Ziangahtile nan lakih a um mi Israel-ih Mi Thianghlim cu a ropi a si!»

tiah na ti pei.

13

Babilon Dokalhih Thuphuansuah

1 Amoz fapa Isaiah in Babilon thuhla ih thuphuan a hmuh mi.

2 «Tlangsang parah thantar tar aw,
An hnenah na aw ringpin suah aw,
Mizahumpawlih kăwtkapawl an luh theinak dingah na kut zāp aw.
3 Ka serhhran mipawl thu ka pe hai;
Ka thinhengnak hlĕnsuakter dingin khaisan ka sinak ih lungawiaipuangih um, ka micakpawl khal ka ko hai.»
4 Tlang ih mipi thawmvâng cu,
Mi tampi thawmvâng bangtuk a si!
Umkhawm miphunpawl, lalrampawlih thawmvâng nuaino cu!
Doawknak hrangah ralkap rualpawlih Jehovah in ralkappawl a kokhawm.
5 Annih, Jehovah le a aithawknak hriamhreipawl cu,
Ram hlatpi,
Van dĕng ihsin
Ram pumpi siatsuah dingin an ra.
6 Râk ciamco uh, ziangahtile Jehovah ni cu a nâi a si!
Cumi cu Ziangkimtithei hnen ihsin siatnak ra thleng vekin a ra ding.
7 Curuangah kut hmuahhmuah a zâwng ding,
Mi kip thinlung a tirál ding ih,
8 An thin a phâng ding.
Natnakpawl le riahsiatnakpawl in anmah an kaibĕt ding,
Nunau nauhrinnat vekin tuarnak a um ding;
Pakhat le pakhat mak tiin an zohaw ding,
An hmai cu meialh bangtuk a si ding.
9 Ngai hnik, Jehovah ni cu a ra thleng,
Ram ṭhingter dingah,
Thinlingnak le thinhengnak nasazet, siava tak thawn,
Cule cutawk ihsin misualpawl a hlorálter hai ding.
10 Ziangahtile van arsipawl le an arsi rualpawl,
An tleu an suah lo ding;
Ni a ra suah tikah a thim ding ih,
Thlapi in a êng a suah lo ding.
11 Leitlun cu a ṭhatlonak ruangah le,
Misualrálpawl cu an mawhsualnak ruangah dān ka tat hai ding,
Cule mipuarthaupawlih duhawknak ka netter ding ih,
Miṭihnungpawlih uanawknak ka hnûkniam ding.
12 Sui ṭha hnakin milai hlú ko ka tuah ding,
Ofir sui thianghlim hnakin milai khal.
13 Curuangah ralkap rualpawlih Jehovah thinlingnak le
A nasazet mi a thinhengnak ni ah cun,
Vanpawl ka hnîn ding ih,
Leilung cu a hmun ihsin hninter a si ding.
14 Cule hitin a si ding, dawi mi sakhi vek le,
Khāltu nei lo tuu vekin,
Mi kip anmai mi hnen cio ah an kir ding ih,
Mi tin anmai ram cio ah an zâm ding.
15 Hawlsuah mi kip in suntlăng an si ding ih,
Kaih mi kip cu ralnâm in an tlu ding.
16 An fātepawl cu anmai mithmuhah parh ṭheh ko hlăwn an si ding;
An innpawl cu răm an si ding ih,
An nupipawl sualpi an si ding.
17 «Ngai hnik, anmah dotu dingah Medes ka căwktho ding,
Annih cun ngun cu ziangah an rel lo ding;
Cule sui khalah lungsinak an nei lo ding.
18 Cuihtlunah an thálpawl in tlangvalpawl cu a that ding ih,
Rilrah parah zangfahnak an nei lo ding;
An mit in nautepawl tla an zuah lo ding.
19 Cule lalrampawlih mawinak,
Kaldia-mipawl in an tluangkhawnpi, a ropi mi Babilon cu,
Pathian in Sodom le Gomorrah a siatsuah vekin a siatsuah ding.
20 Cumi cu zohman in an luah dah nawn lo ding ih,
San hmuahhmuah ah mi an um fawn lo ding,
Arab-mipawl in puanthlam an zâr fawn lo ding,
Tuukhālpawl khal in cu tawkah an tuupawl an băwkter nawn lo ding.
21 Nelrawn sahrangpawl cu tawkah an băwk sawn ding ih,
An innpawl cu sumbuhpawl an khat ding;
Kalauk vapawl cu tawkah an cêng ding ih,
Zâtharpawl cu tawkah an lek ding.
22 ^aRam uipawl cu anmai kulhhnget sungah an bo ding ih,
Cinghniapawl cu anmai siangpahrang inn nuam zetpawl sungah an um ding.
Amai tikcucān a nâi zo ih,
Amai cān cu sauter a si nawn lo ding.»

13:22^a Ram uipawl: Cinghnia phun khat an si ih, mirang in Hyena an ti.

14

Jakob parih Zahngainak

1 Ziangahtile Jehovah in Jakob parah zahngainak a nei ding ih, Israel cu a hril leh ding, cule anmai bul ram ah umhmun a khuarter ding. Ram dang mipawl in an run fĭn ding ih, Jakob sungza an run kăwp ding. 2 Cun anmah kha miphunpawl in an hruai ding ih, anmai ram ah an hruai ding, cule Israel sungzapawl in anmah cu Jehovah ram ah siahhlawh mipa ah le siahhlawh nunau ah an nei ding; anmah ralkaih ih rak hruaitupawl kha ralkaih ah an hruai sawn ve ding ih, anmah palbĕttupawl an uk ding.

Babilon Siangpahrang Tlûknak

3 Na riahsiatnak, na ṭihphannak le hnaṭuan khunghar zet an lo ṭuanternak ihsin Jehovah in a lo cawlhter ni ah cun hitin a si ding, 4 hi ṭawngĕl hi Babilon siangpahrang na relhnawh ding ih,

«Ziangtin so palbĕttu cu a reh!
Ziangtin so thinsonak cu a reh!
5 Jehovah in misualrálpawlih kianghrăwl a khiak,
Uktupawlih siangpahrang kianghrăwl cu;
6 Thinlingin minungpawl catbang loin a rak thawi,
Thinhengin miphunpawl a rak uk ih,
Sûpaw loin a rak tiduhdah.
7 Leilung pumpi hi a cawl ih a dai khepkhep;
Aipuang zetin an ausuak.
8 A si, mirang far thingpawl cu na parah lungawiaipuangin an um ih,
Lebanon sidarpawl khal,
‹Hauthluk na si ihsi thăwkin,
Thing hautu zohman kanmah hau dingin an hung so lo,› an ti.
9 «Na rat tikah nangmah lo hmuak dingin hnuai lamih Sheol cu a tha a tho zet,
Na hrangah mithi, leilung luban hmuahhmuah ih thlarau cu a căwktho hai,
Miphunpawlih siangpahrang hmuahhmuah cu
An laltokham ihsin a thoter hai.
10 An zaten an lo be ding ih, na hnenah:
‹Kanmah vekin na ṭawntai ve zo a si maw?
Kanmah bangtukah na cang zo maw si?
11 Na ropitnak cu Sheol ah dirhthlak a si,
Na tum mi hripawlih aw thawn;
Tholung cu na tăngah an phahaw ih,
Pangāngpawl in an lo khuh,› tiah an lo ti ding.
12 Ziangtin so van ihsin na tlak,
Maw deirel arsi, varṭian fapa!
Ziangtin so lei ih sahthlak ih na um,
Nang miphunpawl cak lotertu!
13 Ziangahtile na thinlung in,
‹Van ah ka kaiso ding,
Pathian arsipawl tlunah ka laltokham ka khaisâng ding;
Sak lam a hlatnakbik,
Mipi-umkhawmnak tlang parah ka to fawn ding;
14 Khawdur sângpi tlunah ka so ding,
Cungnung Bik vekin ka tuahaw ding,› tiah na ti.
15 Sikhalsehla nang cu Sheol ah namthlak na si ding,
Khur thûknak bik ah cun.
16 «A lo hmutupawl in an lo zoh keukeu ding ih,
‹Hi pa hi leilung khūr ko tuahtu,
Lalrampawl hnîntu,
17 Ramṭhing vekih leitlun tuahtu le,
A khawpipawl siatsuahtu,
A thawngtlapawl inn ih tlung dingih sângka ăwn duh lo tu kha a si lo maw?› tiin na thuhla an ruat ding.
18 «Miphunpawlih siangpahrang hmuahhmuah,
An zaten, ropi zetin an itthat,
Mi kip anmai thlān fingfing ah;
19 Asinan nang cu na thlān ihsin hlăwnsuak na si,
Fihnungza hngeṭêk bangin,
Thah mipawlih sinfen bangin,
Ralnâm ih suntlăng mi,
Khur sungih lungtopawl lakih a sukthla mi,
Ke hnuaiih cīl rero mi mithi ruak bangin.
20 An lakah phumtel na si lo ding,
Ziangruangahtile na ram na siatsuah ih
Na mipawl na that.
Thil ṭhalo tuahtupawlih cithlahpawl cu an hmin hlam an si dah lo ding.
21 An pupápawlih mawhsualnak ruangah
A fātepawl hrangah mi thattu timlam uh,
Culole an tho ding ih ram an nei pang ding,
Cule leitlun vangdâp cu khawpipawl a khatter thluh pang ding,» tiin.
22 «Anmah do dingin ka păwk ding,» tiah ralkap rualpawlih Jehovah in a ti,
«Babilon ihsin a hmin le minung tāngsŭn le,
A cithlah le a tefapawl ka sattán ding,» Jehovah in a ti.
23 «Cumi cu sakuh ta ah ka tuah ding ih,
Dûm ah ka tuah fawn ding,
Cumi cu siatralnak hmunphiah in ka phiat ding,» tiah ralkap rualpawlih Jehovah in a ti.

Assiria Dokalhih Thuphuansuah

24 Ralkap rualpawlih Jehovah in sia a săm,

«Ka ruah mi vekin a cangsuak tengteng ding ih,
Ka tumtah vekin a thlengsuak tengteng ding:
25 Ka ram sungih Assiria-mi ka khiak ding ih,
Ka tlangpawl ah ka ke hnuaiah amah cu ka cīl ding.
Cun an hnen ihsin a hngawngkol laksak a si ding ih,
An liang ihsin a phurrit laksak a si ding.
26 Himi cu leilung pumpi dokalhih tumtah mi thu tum cu a si ih,
Himi cu miphun hmuahhmuah tlunih kut hawi mi cu a si.
27 Ziangahtile ralkap rualpawlih Jehovah in tumtahnak a rak nei ih,
Zo in so tlawlhter ding?
A kut a hawi ih,
Zo in so lakirter ding,» tiin.

Filisṭia Dokalhih Thuphuansuah

28 Himi hi siangpahrang Ahaz thih kum ih a thleng mi thuphuan a si.

29 «Nannih Filisṭia-mi hmuahhmuah tla,
Nanmah lo thawitu fungfek a kiah ruangah lungawiaipuangin um hlah uh.
Ziangahtile rul búlhram ihsin rulngân a ra suak ding,
Cule a cithlah cu ṭihnungza rulvankâi a si ding.
30 Mifarah fatirpawl in an ei ding ih,
Mitlasampawl himten an băwk ding,
Na hrampawl cu mangṭam in ka thiter hai ding ih,
Cumi in na mitangsŭnpawl a that hai ding.
31 Râk ciamco aw, Maw kăwtka! Ṭap aw, Maw khawpi!
Zuprál uh, Maw nannih Filisṭia-mi hmuahhmuah tla!
Ziangahtile sak lam ihsin meikhu a ra ding ih,
Mai cān bikhiah cio ah zohman mah te lawng an um lo ding,» tiin.
32 Cuih miphunih palaipawl cu ziangso an rak săwn ding?
Jehovah in Zion a rak dĭnhnget ih,
A minungpawl lakih mifarahpawl cu cu tawkah an beu ding.

15

Moab dokalhih Thuphuansuah

1 Moab dokalhih thuphuan.

Thungaiten zan ah Moab ram ih Ar khua cu ṭhing ko tuah le siatbăl a si,
Thungaiten zan ah Moab ram ih Kir khua cu ṭhing ko tuah le siatbăl a si.
2 Anih cu hmun sâng ih um temple le Dibon ah ṭap dingin a so.
Moab in Nebo le Medeba a ṭahhnawh ding;
Lu i kip cu kawlh ṭheh a si ding ih,
Khabe hmul kip cu tan a si ding.
3 An kăwtthlerpawl ah buri-hnipuan an thuamaw ding,
An inn lupawl ah le
An kăwtthler ah
Mi kip an râk ciamco ding ih, nasazetin an ṭap ding.
4 Heshbon le Elealeh an ausuak ding,
An aw cu Jahaz tiangin theih a si ding;
Curuangah ralthuam keng Moab ralkappawl cu an ausuak ding,
A sungih a nunnak cu a khūr ding.
5 «Ka thinlung cu Moab hrangah a ausuak ding,
A raltlânpawl cu Zoar le Eglath-shelishiyah tiang an tlân ding.
Ziangahtile Luhith so ah ṭap phahin an so;
Ziangahtile Horonaim lamzin ah
Siatralnak auaw an suah.
6 Ziangahtile Nimrim tipi a kāng ding,
Thungaiten hramhring a vuaihlo zo;
Hrampi a tla, a hring mi zianghman a um lo.
7 Curuangah an neih mi liangluang le,
An rak sêkkhawm mipawl cu,
Partiam Tivate ah an thiarhlo ding.
8 Ziangahtile Moab ramri kimvelah authâwm a thang,
Râk ciamco aw cu Eglaim khua tiang le
Râk ciamco aw cu Beer Elim khua lam tiangin.
9 Ziangahtile Dimon ti cu thisen in a khat ding,
Ziangruangahtile Dimon parah thil nasa sinsin ka thlengter ding,
Moab ihsin a tlânsuaktu le
A tāngsŭn rammipawl cu kiosa in a bei ding.

16

Moab Dokalhih Thuphuansuah

1 Ram uktu hnenah tuufa no kuat uh,
Sela ihsin ramṭhing zawhin, Zion fanuih tlang ah.
2 Ziangahtile cumi cu a bu ihsin dawisuak mi vâte vâkvai vek a si ding;
Cutivekin Moab fanupawl cu Arnon tiva kāi ah an um ding.
3 «Thurawnpek la aw, thuṭhennak tuah aw;
Na thlahlim cu sun laifangah zān bangin tuah aw;
Hnawhsuah mipawl cu thup aw,
A tlânsuakpa kha zuarthlai hlah.
4 Moab-mipawl lak ihsi hnawhsuah mipawl cu na hnenah cêng hai seh;
Siatsuahtu hmaika ihsin an hrangah beunak si aw.
Ziangahtile minekrawktu cu a cemnetnak a thleng,
Siatnak a cem,
Mipalbĕttupawl khal ram ihsin an hlorál verver.
5 Laltokham cu lainatduhdawtnak in dĭnhnget a si ding;
Cule David puanthlam ah cuih laltokham parah rinumnak thawn thuṭhentu a to ding,
Anih cun diknak kengkawhin dingfelnak lamah a khul a rang ding.
6 Moab hngalzia kan hna in kan thei zo,
Nasatukin a pawrhaw,
A uanawknak, a hngalnak le a thinlingnak pawl khal;
A pawrhawknak santlailo cu zianghmanlo men a si.
7 Curuangah Moab cu a râk ciamco ding,
Moab-mi hmuahhmuah an râk ciamco ding.
Kir Hareseth sabit car sangper nan ṭah ding;
Thungaiten annih cu vuak an si.
8 Ziangahtile Heshbon lópawl cu an car ṭheh ih,
Sibmah sabit hri khal;
Jazer tiangih zâm bān a hnge,
Ramṭhing lamih zâm, hnge cerh thar darhsuak mi in tipi ralkhat tiangih zâm sabit hnge ṭhapawl cu miphunpawlih bawipawl in an cîl.
9 Curuangah Sibmah sabit hri cu ka ṭah ding,
Jazer ṭahin ka ṭah ding;
Maw Heshbon le Elealeh,
Ka mitthli ka lo tawih hai ding;
Ziangahtile nan ṭhâl thlairahpawl le nan rawl khawm mi thuhla ah,
Lungawiaipuannak auaw a um nawn lo.
10 Paṭhatnak ló ihsin lungawinak le aipuannak lakhlo a si;
Sabit hmuanpawl ah hla sak a um lo ding,
Lungawinak auaw khal a um lo ding;
Sabit sawrkhur ah sabit cīltupawl in sabit an cîl lo ding;
An aunak ka cemter a si.
11 Curuangah ka thinlung cu Moab ruangah ṭingṭang bangin a awnsal ding ih,
Ka sungril khal Kir Heres ruangah.
12 Cule hitin a si ding,
Moab cu hmun sângpawl ah a so ih, a cau-awter lak men a si;
Anih cu thlacam dingin a hmun thianghlim ah a ra ding;
Asinan a hlawhtling lo ding.

13 Himi hi tuih hlanih Jehovah in Moab thuhla a rak sim mi kamsuakthu a si. 14 Asinan atu ah Jehovah in, «Hlawhfapaih kum tiam vekin, kum thum sungah, Moab ropitnak cu a mipi nasazet hmuahhmuah thawn hmuhsuamin a um ding ih, a tāngsŭn cu mál tuk le ṭawnṭai tuk an si ding,» tiin a sim.

17

Siria Dokalhih Thuphuansuah

1 Damaskas dokalh ih thuphuan.

«Ngai hnik, Damaskas cu a khawpi sinak ihsin a cem ding ih,
Inn siat penkhawm mi men a si ding.
2 Aroer khawpipawl cu tansan an si;
Annih cu rante rual tlannak an si ding ih,
Cupawl cu zohman in an thlaphângter lo ding.
3 Kulhhnget khal Efraim hnen ihsin a cem ding,
Uknak cu Damaskas hnen ihsin,
Cule Siria-mi lakih a tāngsŭn khal;
Cupawl cu Israel tefapawlih ropitnak a ziamral vekin an si ding,»
Tiah ralkap rualpawlih Jehovah in a ti.
4 «Cuih ni ah cun hitin a si ding,
Jakob ropitnak cu a zawr ding ih,
A titsa thaunak cu a ṭumṭawl ding.
5 Cumi cu rawl khâwmtu in thlairawl a khâwm lai le,
A kut ih a vuipawl a ah lai vek a si ding;
Cumi cu Refaim Phaikuam ih
Mi in thlairawl vuipawl a khâwm vek a si ding.
6 Sikhalsehla olif thing an hnin tikah,
A zim sângbik ih a rah hmin pahnih pathum simaw, a rah bawrnak hnge ah pali panga simaw a tān bangin,
Thlairawl khawm ding mi a lêp a tāng lai,»
Tiah Israel-ih Pathian Jehovah in a ti.
7 Cuih ni ah cun milai in amah Sersiamtu a thlir ding ih,
A mit in Israel-ih Mi Thianghlim a beisei ding.
8 A kutsuak biakṭhengpawl a zoh lo ding,
A kutzung ih a rak tuah mi
Asherah-pawl le rimhmui biakṭhengpawl a upat lo ding.
9 Cuih ni ah cun Israel tefapawl ruangih tān ta mi an khawpi hngetpawl cu
Tupi le tlang zimih tansan mi hmun vek an si ding ih,
A ṭhing reprep thluh ding.
10 Ziangruangahtile na runsuahnak Pathian na hngilh zo ih,
Na hauhruang Lungpi na ngaihsak lo,
Curuangah kung duhum taktak phun in,
Ram dang ta sabit hnge phun khal awla,
11 Na phun ni ah ṭha zetin na kulh ih,
A thaizing ah na thlaici cerhno suahter hman awla,
Thinnatnak le a nasazet mi riahsiat ni ah cun
Rah sengkhawmnak cu siatnak penkhawm a si ding.
12 Tifinriat hûk durdo bangih hûk miphun tam zet le,
Tipi lian nasatak thâwm durdo luang awn bangih thâwm neitu miphunpawl cu an hmakhua a pit!
13 Miphunpawl cu tipi lian nasatak bangin an thâwm durdo ding;
Asinan Pathian in annih cu a kawk hai ding ih hlapi ah an tlânhlo ding,
Cule tlang ih thli hmaiih fānghi bang le,
Phusîng hmaiih leivut bangin sempĕt an si ding.
14 Cun ngai hnik, zan lamah buainak a thleng!
Cule zing khawvan hlanah annih cu an um nawn lo.
Hihi kanmah rămtupawlih covo a si ih,
Kanmah suamtupawlih co mi cu a si.

18

Kush Dokalhih Thuphuansuah

1 Kush tivapawl ralkhat ih a um mi thla zâp awn phuppho ram cu
A hmakhua a pit a si,
2 Tipi parih phaipheng lăwngpawl hmangin
Tifinriat lamzin in palai a thlahtu cu.
A rang zet mi palaipawl tla,
Miphun khansang le vun nonâl pawl,
Ram hla le ram nai ih umpawl ih ṭih mi,
Miphun thiltithei le mi palthlukhmang,
Tivapipawl ih an ram a ṭhensak mi minungpawl hnenah feh uh.
3 Leitlun luahtupawl le leilung tlunih cêngtupawl hmuahhmuah:
Tlangpawl parih thantar a tar tikah, zoh uhla,
Tuupa ki a phawt tikah, ngai uh.
4 Ziangahtile Jehovah in ka hnenah,
«Nitlan cān ih khawsa lutuk zoh bangin le,
Rawl khâwm khawsat cān ih khawdur zoh bangin,
Ka cēnnak hmun ihsin daiten ka thlir ding,» tiah i ti.
5 Ziangahtile rawlkhawm hlanah, par mûm a cût tikah le,
A par cu a hung rah tikah,
Anih in a cerhtetepawl cu favah in a hlep ding,
Cule a hngeṭêk zampawl khal a lahlo ding ih a sattán ding.
6 Cupawl cu tlang ih sa ei vâtepawl le
Leilung ramsapawl hrangah tānkhawm an si ding;
Sa ei vâtepawl in ṭhâl ah cucu an tlān ding ih,
Leilung ramsapawl in cucu thlatang ah an tlān ding.
7 Cuih cān ah miphun khansang le vun nonâl pawl,
Ram hla le ram nai ih um mipawl ih ṭih mi,
Miphun thiltithei zet le mi palthlukhmangpawl,
Tivapipawl in an ram a ṭhensak mi minungpawl hnen ihsin
Ralkap rualpawlih hmin umnak hmun,
Zion Tlang ah,
Ralkap rualpawlih Jehovah hnenah laksawng an rak keng ding.

19

Izip Dokalhih Thuphuansuah

1 Izip dokalhih thuphuansuah.

Ngai hnik, Jehovah cu a rang zet mi khawdur parah to in,
Izip ah a ra ding;
A hmaiah Izip milempawl an khūr thlauhthlo ding ih,
Izip-mipawl thinlung cu a sungah a zuprál ding.
2 «Izip-mipawl le Izip-mipawl ka doawter hai ding,
Mi kip in anmai unau an do ding ih,
Mi kip in anmai innhnen an do ding,
Khawpi le khawpi, lalram le lalram an doaw ding.
3 Izip-mipawlih thinlung cu a sungah a bei a dawng ding,
An thurawnpek ka buaiter ding ih,
Annih in milempawl le dawithiampawl, thlarau kawhthiampawl le polpawl an răwn ding.
4 Cule mihrohrang zet bawi kut ah,
Izip-mipawl ka pe ding ih,
Anmah cu siangpahrang kawlhsen zetin a uk hai ding,»
Bawipa, ralkap rualpawlih Jehovah in a ti.
5 Tifinriat a kāng ding,
Cule tivapi a kāng ding ih a car ṭheh ding.
6 Tivapipawl an rim a se ṭheh ding,
Kilvenawknak tivatepawl an kāng ding ih, an car ṭheh ding,
Câlterûl le phaiphengpawl an vuai ding.
7 Nile Tivapi kap, Nile Tivapi suah rori ih a um mi phŭkpawl le,
Nile Tivapi kapih thlai cinnak ló hmuahhmuah,
An vuai ding, semhloh an si ding ih, an um nawn lo ding.
8 Ngakaitupawl khal riahsiain an ṭap ding;
Nile Tivapi sungih sio a thlatu hmuahhmuah lungzûrin an ṭap ding ih,
Tipi parih sûr vawrhtupawl an bei a dawng ding.
9 Cuihhleiah patzai fêmte hmangih puan nem páte a tuahtupawl le
Puan var tahtupawl an ning a zak ding;
10 Cule a ṭhuampawl cu an kiak ding.
Hlawhawtu hmuahhmuah an nun a buai ding.
11 Thungaiten Zoan-ih bawipawl cu mi-â an si;
Faro-ih thurawnpetu mifimpawl in atthlakza thurawn an pe.
Ziangtin nannih in Faro hnenah, «Keimah cu mifim fapa ka si,
Khuahlan siangpahrangpawlih fapa ka si,» nan ti thei?
12 Cuti asile khuiah so na mifimpawl cu?
Atu ah lo sim hai sehla,
Ralkap rualpawlih Jehovah in Izip dokalhin ziang a tum ti thei hai seh.
13 Zoan-ih bawipawl cu mi-â ah an rak cang,
Nof-ih bawipawl cu bumin an um;
Annih in Izip cu an hruaisual fawn,
An hnám sutpibănpawl cun.
14 Jehovah in an lakah buainak lungput a burh;
Cule zuripa amai luak ih a hâwr rero vekin,
Annih in Izip cu a thil ti hmuahhmuah ah an hruaisual.
15 Izip lu in siseh, a mei in siseh,
Ṭhulhfau hnah in siseh, phaipheng in siseh,
A tuah thei mi zianghman a um lo ding.

16 Cuih ni ah cun Izip-mipawl cu nunau bangtukah an cang ding ih, ralkap rualpawlih Jehovah in a kut a văi mi, an tlunih a văi mi ruangah an lung a phâng ding ih an ṭih ding. 17 Cule Judah ram cu Izip hrangah mirâptu a si ding; ralkap rualpawlih Jehovah in tuah a tum mi, Izip dokalhih a tuah tum mi ruangah, Judah hmin sāl a theitu pauhpauh cu an thin a phâng ding.

Izip, Assiria le Israel Thlawsuahnak

18 Cuih ni ah cun Izip ram ih khawpi panga cu Kanaan ṭawng an hmang ding ih, ralkap rualpawlih Jehovah hmin in sia an săm ding; khawpi pakhat cu ^aSiatralnak Khawpi tiah an ko ding.

19:18^a Siatralnak Khawpi: Siatralnak ti ṭawngfáng hi ni sa ti khalih leh a si. Cuti asile Ni Khawpi tinak a si thei.

19 Cuih ni ah cun Izip ram sungah Jehovah hrangah Biakṭheng a um ding ih, a ramri ah Jehovah hrangah ṭhuam a um ding. 20 Cule cumi cu Izip ram sungah ralkap rualpawlih Jehovah hrangah hminsinnak le theihpinak a si ding; ziangahtile palbĕttupawl ruangah Jehovah an auh ding ih, anih in Rundamtu le Humhimtu a thlah hai ding, cule anih in anmah cu a run ding. 21 Cun Jehovah cu Izip ih theih a si ding ih, cuih ni ah cun Izip-mipawl in Jehovah an thei ding, cule raithawinak le thilhlăn thawn Pathian an be ding; a si, Jehovah hnenah thutiam an tuah ding ih, cumi cu an hlĕnsuak fawn ding. 22 Cule Jehovah in Izip a thawi ding, a thawi ding ih a damter ding; annih cu Jehovah hnenah an hawikir ding, cule amah in a ngaihsak hai ding ih a tidam ding.

23 Cuih ni ah cun Izip ihsin Assiria ah zinpi a um ding, cule Izip ah Assiria-mipawl an ra ding ih, Assiria ah Izip-mipawl an ra ding, cule Izip-mipawl cu Assiria-mipawl thawn Jehovah an betlang ding.

24–25 Cuih ni ah cun Israel cu Izip le Assiria zawngah pathum lakih pakhat a si ding ih, «Ka miphun Izip le ka kutsuak Assiria le ro ih ka co mi Israel cu thlawsuah si hai seh,» tiih ralkap rualpawlih Jehovah in a pek mi thlawsuahnak cu leilung parah a um ding.

20

Izip le Ethiopia Dokalhih Thuphuansuah

1 Assiria siangpahrang Sargon ih thupek in Ashdod ah ralbawipi a ra ih, Ashdod cu a do ih a la. 2 Cu laifangah Jehovah in Amoz fapa Isaiah hnenah, «Feh awla na tâi ihsin buri-hnipuan hlít aw, cule na ke ih na kedam phawih aw,» tiin a sim. Cule cutin a tuah, taklawng le kelawngin a vâk rero.

3 Cun Jehovah in, «Izip le Kush dokalhtu hminsinnak le mangbangza hrangah kum thum sung taklawng le kelawngih feh ka siahhlawh Isaiah vekin, 4 Thawngtla Izip-mipawl le ralkaih Kush-mipawl cu nauhak le upa ti loin, taklawng, kelawng le tawlangin, Izip mualphonak dingah Assiria siangpahrang in a hruaihlo hai ding. 5 Cun an ruahsan mi Kush le an tluangkhawnnak Izip parih thil thleng mi ruangah an thla a phâng ding ih an ning a zak ding. 6 Cule cuih cān ah cun hi tipi kap tluan luahtupawl in, ‹Ngai hnik, Assiria siangpahrang hnen ihsin in runsuakin in bawmtu ding tiih kan ruahsan mi le an hnenih kan rak tlanluhnakpawl parih thil cang mipawl hi! Ziangtin so kannihpawl hi kan tlânsuah thei ding?› an ti ding,» tiah a ti.

21

Babilon Tlûknak ding Thuphuansuah

1 Tifinriat kapih ramṭhing dokalhih thuphuansuah.

Phusîng in Negev a hrut bangin,
Cumi cu tuksumza ram, nelrawn ihsin a ra.
2 Larnak rapthlak tak cu ka hnenah thăn a si.
Hrăwkhrawl zetih titu cun hrawkhrâwl zetin a ti ih,
Mi rămtu cun mi a răm.
Hung so aw, Maw Elam!
Kulhkhŭm aw, Maw Media!
A mi aihramternak hmuahhmuah ka rehter zo.
3 Curuangah ka êl a na ṭheh;
Nunau in fahrinnat a tuar bangin ka nâ thluh.
Ka hna in cumi ka theih tikah vansangin ka um;
Cumi ka hmuh tikah, ka thla a phâng.
4 Ka lung a phu dukdo, ṭihphannak in i lâuter;
Ka hngakhlap zet mi zan cu ka hrangah ṭihphannak ah a cang.
5 Cabuai timtuah uh,
Pher phah uh,
Ei uhla in uh.
Nannih ralbawipawl tho uh,
Ralphaw kha hriak thih uh!
6 Ziangahtile hitin Bawipa in,
«Feh aw, ralvengtu ret aw,
Anih in a hmuh mi cu thăn seh,» tiah ka hnenah i sim a si.
7 Cule ránglêngpawl, rángtothiam a kăwp a kăwpin,
Lāktothiampawl, kalauktothiampawl a hmuh tikah,
Ralringten ngunngaih zetin ngaithla seh.
8 Cun ^aralvengtu a ausuak ih, «Bawipa, sun ah ralvennak dăwnsang ah ka ding ringring;
Zan tin ka kilnak hmun ah ka um.
9 Cule zoh hnik, ránglêngpawl, rángtothiampawl a kăwp a kăwpin an rat khi!» tiah a au.
Cun anih in a sâng ih,
«A tlu e, a tlu e, Babilon cu!
A pathianpawlih khercawp milim hmuahhmuah cu lei ah khuai ṭheh an si,» tiah a ti.
10 Aw, hruihhmun ih cīl mi ka thlairawl tla!
Israel Pathian, ralkap rualpawlih Jehovah hnen ihsin ka hna ih ka theih zo mipawl cu na hnenah ka thăn a si.

21:8^a ralvengtu a ausuak: Hebru Masoretic text ah «Kiosa vekin a ausuak» asilole « ‹Kiosa› tiah a ausuak» tin a um. Dead Sea Scroll cun «ralvengtu.» Hebru ṭawng ah «ralvengtu» ti le «kiosa» ti hi a bangaw zet.

Edom Dokalhih Thuphuansuah

11 Edom dokalhih thuphuansuah cu.

Seir ihsin mi pakhat in i ko ih,
«Ralvengtu, zan hi ziang tik tiang so a thlen zo?
Ralvengtu, zan hi ziang tik tiang so a thlen zo?» tiah i ti.
12 Ralvengtu in, «Zing khua a hung vâng ih, zan a rung thleng.
In suh duh asile, in sut uh;
Ra kirsal uh!» tiah a ti.

Arabia Dokalhih Thuphuahsuah

13 Arabia dokalhih thuphuansuah.

Maw nannih Dedan-mi khualtlawng mi burpawl,
Arabia phūl lakah zan nan cām ding.
14 Maw Tema ram luahtupawl,
Tihâl mi hnenah tidai rak keng uh;
Raltlanpawl cu sang thawn rak hmuak uh.
15 Ziangahtile annih cu ralnâm lak ihsin, phawi cia ralnâm lak ihsin,
Thál nawp cia lak ihsin le raldonak ṭihnungza lak ihsin an rung tlânsia a si.

16 Ziangahtile hitin Bawipa in ka hnenah, «Hlawhfa kum siar zulhin, kum khat sungah, Kedar ropitnak hmuahhmuah a hlo ṭheh ding; 17 cule a tāng mi thálsaithiampawl, Kedar-mi miralṭhapawl cu an mál vivo ding; ziangahtile Israel-ih Pathian Jehovah in cumi cu a sim zo a si,» tiah i ti.

22

Jerusalem Dokalhih Thuphuansuah

1 Larnak phaikuam dokalhih thuphuansuah.

Ziangahso maw inn tlun khuh parih nan kai ṭheh,
2 Thawmvâng thawi a khat mi,
Khawpi hlung dupdo, aw nang khawpi aipuang?
Na thah mipawl cu ralnâm ih thah an si lo,
Raldonak hmun ih thi khal an si fawn lo.
3 Na uktupawl hmuahhmuah cu an zâmtlang ṭheh;
Annih cu thál tel loih kaih an si.
Annih cu hmun hlapi ah rak tlân khal hai sehla,
Na sungih kaih mi hmuahhmuah cu an ṭemkhawm ṭheh.
4 Curuangah kei in, «In hawisan uh,
Nasa takin ka ṭap ding;
Ka mipawlih fanu rămnak ruangah cun,
In hnem dingin ṭanla duh hlah uh,» tiah ka ti.
5 Ziangahtile larnak phaikuam ah
Buainak le palbĕtnak le mangbangnak ni cu ralkap rualpawlih Bawi Jehovah hnen ihsin a ra thleng,
Khawkulhpawl cimternak le tlang lamih aunak ni cu.
6 Ránglêng mâwngtupawl le rángtothiampawl zawngah,
Elam in thálfung bawm a keng;
Cule Kir in ralphaw tuamnak a phawrh cia.
7 Hitin a si ding, na phaikuam ṭhabikpawl cu
Ránglêngpawl in a khat thluh ding ih,
Rángtothiampawl cu kăwtsuah ah tiar cia-in an tlaraw ding.
8 Anih in Judah kilhimnak cu a ṭhawnhlo.
Cuih ni ah cun nang in tupi inn ih ralthuam na rak cuan;
9 David khawpikulh siatnak zawn cu a tam ti na hmu fawn,
Cule hnuaita sawn tili ti cu na khawlkhawm.
10 Jerusalem innpawl cu na siar ih,
Khawkulh hngehternak dingah, innpawl cu na ṭhiatbăl.
11 Tili hlun ti hrangah khawkulh pahnih karlakah tikhawlnak na tuah fawn.
Asinan a sersiamtupa cu na rak ngaihsak lo ih,
Hlanlaipiih cumi a rak ruahmantu khal na upat fawn lo.
12 Cule cuih ni ah cun ralkap rualpawlih Bawi Jehovah in
Ṭap ding le sūn dingin,
Lu ziatkawlh ding le buri-hnipuan veng dingin a lo ko.
13 Ngai hnik, cumi aiah aipuannak le lungawinak,
Câwcangpawl thatin le tuupawl thatin,
Sa eiin le sabitzu inin nan um:
«Ei uh sila in uhsi, ziangahtile thaisun ah kan thi ding!» tiah nan ti.
14 Cun ralkap rualpawlih Jehovah in cumi cu ka hnenah a phuang,
«Hi mawhsualnak hrangah na thih tiang khal sualkhuhthawinak na hrangah a um hrimhrim lo ding,» ralkap rualpawlih Bawi Jehovah in a ti.

Shebna parih Dāntatnak

15 Ralkap rualpawlih Bawi Jehovah in hitin a ti:

«Ra awla, hi sumkiltu hnenah feh aw,
Siangpahrang sungkua hotu Shebna va pan awla:
16 ‹Hi tawkah thlān na virh,
Hmun sâng ah thlān na virh ih,
Mai hrangih lungpi lakih cēnnak hmun na kher hi
Ziang thuneihnak so na neih ih,
Hi tawkah zo so na neih?
17 Ngai hnik, Jehovah in rapthlak takin a lo hlăwnhlo ding,
Maw minung,
Cule a lo kaihnget ding.
18 Nasa takin a lo herh rero ding ih thil hlûm bangin
Ram kaupi sungah a lo deng ding;
Cu tawkah na thi ding, cutawk ih na ránglêng ropipawl khal,
Nang cu na Bawipaih inn hrangah ningzahnak na si.
19 Cutin na hnaṭuan ihsin ka lo dawisuak ding ih,
Na dinhmun ihsin ka lo námthla ding.
20 Cun cuih ni ah cun hitin a si ding,
Hilkiah fapa ka siahhlawh Eliakim ka ko ding,
21 Amah cu na kâwrfual ka hruhter ding ih,
Na taikhap in amah cu ka cakter ding;
A kut ah na thuneihnak ka pe ding.
Amah cu Jerusalem luahtupawl le
Judah sungza hrangah pa a si ding.
22 David sungza tawhfung cu a liang parah ka ṭhum ding;
Cule a ăwn mi cu zohman in an khar lo ding;
Cule a khar mi cu zohman in an áwng lo ding.
23 Hmun him ih kilhbĕtnak vekin anih cu ka hngetter ding ih,
Anih cu a paih sungza laltokham ropi ah a cang ding.

24 ‹Annih in a paih sungza ropitnak hmuahhmuah, a tefapawl le a cithlahpawl, bungbel tenau hmuahhmuah, nopawl ihsin thâwlpawl hmuahhmuah tiangin a parah an thlai ṭheh ding. 25 Cuih ni ah cun ralkap rualpawlih Jehovah in, ‹Hmun him ih kilhbĕtnak hrenhnget mi cu a phawng ding ih hauthluk a si ding, cule a tlu ding, cun a parih thlaiaw thilrit cu sahtan a si ding, ziangahtile Jehovah in a rel zo,› tiah a sim,» tiah a ti.

23

Taiar Dokalhih Thuphuansuah

1 Ṭaiar dokalhih thuphuansuah.

Râk ciamco uh, nannih Tarshish lăwngpawl!
Ziangahtile cumi cu inn le lăwng cawlhhmun pakhat hman um loin,
Ṭhing riamriamin a um
Cumi cu Saipras ram ihsin an hnenih simthan a si.
2 Nannih tipi kap tluan luahtupawl,
Nannih Sidon sumdâwngpawl,
Tifinriat ih khualtlawngpawl ih neihnunter mipawl,
Daiten um uh.
3 Cule tidai tampi parah an tlawng ṭheu,
Shihor thlairawl, Nile Tivapi ihsin thlairawl an khâwm mi cu amai sum hmuhnak a si,
Cule anih cu miphunpawlih sumdawnnak hmunpi a si.
4 Na ningzak aw, Maw Sidon;
Ziangahtile tifinriat in thu a sim,
Tifinriat cahnak cun,
«Nauhrinnat ka tuar lo ih, fāte khal ka hring lo;
Tlangvalpawl khal ka câwm ṭhanglian dah lo ih,
Fala himpawl khal ka cawm ṭhanglian dah lo,» tiah a ti.
5 Thuthang cu Izip a thlen tikah,
Annih khal Ṭaiar thuhla ruangah an thin a nâ duahdo ding.
6 Tarshish ah va feh uh;
Râk ciamco uh, nannih tipi kap tluan luahtupawl!
7 Tuan le māng ihsi rak um,
Ram hla zetih cêng dingah a ke ih feh ṭheu,
Hi khawpi hi nan khawpi nuam zet kha a si lo maw?
8 A mipawimawhpawl sumdâwngin,
A sumtuahtu leilung mizahumpawl a si mi,
Lallukhum khum Ṭaiar khua cu dokalhin,
Zo in so hi thurawnpek hi a rak la?
9 Ropitnak hmuahhmuah ih hngalnak dirthla dingin,
Leilung tlunih mizahumpawl hmuahhmuah mualphoter dingin,
Ralkap rualpawlih Jehovah in cumi cu a rak tumtah a si.
10 Maw Tarshish fanu,
Nile Tivapi bangin na ram ah luangliam humho aw,
Lăwng cawlhnak hrimhrim a um nawn lo.
11 Anih in tifinriat tlunah a kut a hun hawi,
Lalrampawl a hnîn hai;
Jehovah in Kanaan dokalhin thu a pe,
A hauhruangpawl siatbăl dingin.
12 Cule anih in, «Nan ai a puang nawn lo ding,
Maw nang palbĕt mi fala him Sidon fanu.
Tho law, Saipras lamah feh aw;
Cutawk khalah cawlhdamnak na hmu lo ding,» tiah a ti.
13 Ngai hnik, Kaldia-mipawlih ram,
A hlorál zo mi hi miphun;
Assiria in nelrawn ramsapawl hrangah a canter.
Annih in a dawlsângpawl an dĭn,
Annih in a siangpahrang innpawl an tisia,
Cumi cu siat ko an tuah.
14 Râk ciamco uh, nannih Tarshish lăwngpawl!
Ziangahtile nan hauhruangpawl tisiat a si.

15 Cuih ni ah cun hitin a si ding, Ṭaiar cu siangpahrang pakhat kum zât kum 70 sung hngilh a si ding. Kum 70 a cem tikah hlawhhlâng hla ih a sim vekin, Taiar parah a thleng ding:

16 «Ṭingṭang la-in, khawpi fang aw,
Nang hngilh mi hlawhhlâng;
Nang cu cinken na si theinak dingah,
Awnmawi tum awla, hla tampi sak aw,» tiin.

17 Cule kum 70 a cem tikah hitin a si ding, Jehovah in Ṭaiar cu a vehvai ding. Anih cu a ^azuarawknak ah a kirsal ding ih, leilung vangdâp parih leitlun lalram hmuahhmuah thawn nunau-mipa sualnak a tuah ding. 18 A ngah mi le a hlawhman cu Jehovah hrangah serhhran a si ding; cumi cu ro ah ret a si lo ding ih, khawl a si fawn lo ding, ziangahtile a ngah mi cu khăwpkham teih ei dingah le hnipuan ṭha hrangah Jehovah hmaika-ih a cêngtupawl hrangah a si ding.

23:17^a zuarawknak: Hitawk ih zuarawknak ti hi nunau-mipa sualnak lam a si lo. Pathian a theih hlanih Taiar sumdawnnak a simnak a si. Pathian a theih hnuah sum a dawngsal ding ih a ngah mi cu Jehovah hrangah serhhran a si ding (câng 18).

24

Jehovah in Leilung a Tisiat Ding

1 Ngai hnik, Jehovah in leilung cu lawnglak ko le ṭhing ko a tuah ding,
Lei hmai a siatsuah ding ih
A luahtupawl ram dang ah a ṭekdarhter ding.
2 Cule hitin a si ding:
Mipi parih a thlen vekin, puithiam parah a thleng ding;
Siahhlawh parih a thlen vekin, a pu parah a thleng ding;
Siahhlawhnu parih a thlen vekin, a pi parah a thleng ding;
A leitu parih a thlen vekin, a zuartu parah a thleng ding;
A cawihtu parih a thlen vekin, a cawitu parah a thleng ding;
A batertu parih a thlen vekin, a bâktu parah a thleng ding.
3 Leilung cu a pumhlum in a lawnglak ding ih răm ṭheh verver a si ding,
Ziangahtile Jehovah in hi thu hi a sim zo.
4 Leilung a ngui ih a ziamrál,
Leitlun a cau ih a ziamhlo;
Leilung miropipawl an cau.
5 Leilung khal a luahtupawl ruangah a bawrhbang,
Ziangruangahtile annih in dānpawl an buar ih,
Cīn le dān an pahbăl,
Kumkhaw thukham an pahbăl.
6 Curuangah camsiatnak in leilung a eirál ih,
A sungih cêngpawl an mawh.
Cuihruangah leilung luahtupawl cu urkăng an si ih,
Mi málte lawng an tâng.
7 Sabitzu thar a ngui ih, sabit hri a cau,
Hliparnak thinlung hmuahhmuah an aihhram ṭheh.
8 An khuangte tum hlimnak a reh.
Năwmawknak thâwm a dai,
Ṭingṭang thawi aipuannak a reh.
9 Hla thawn sabitzu an in lo ding,
Zureu cu a intu hrangah a khâ.
10 A hnăwk luihlo mi khawpi cu siatbăl a si;
Zohman an luh theilonak dingah, inn kip khar an si.
11 Sabitzu ngaiin kăwtthler ah auaw a um,
Aipuannak hmuahhmuah a thim ṭheh,
Ram hlimnak cu a cem riaiaw.
12 Khawpi cu a ṭhing reprep ih,
Kăwtka cu tisiat a si.
13 Olif kung hnin bang le,
Sabit rah lawh hnuih sabit hri parih an tuah vekin,
Leilung miphunpawl parah tuah a si ding.
14 An aw an suah ding, hla an sak ding;
Jehovah cungnunnak ruangah
Nitlaknak lam ihsin ringpin an au ding.
15 Curuangah nisuahnak lamah Jehovah sunlawih uh,
Tifinriat kap tluanpawl ah Israel-ih Pathian Jehovah hmin cu.
16 Leilung dĕng ihsin hlapawl kan rak thei:
«Midingfel Pa cu sunlawihin um seh!» tiin.
Asinan kei in, «Ka cem aw, ka cem aw!
Ka hmakhua a pit a si!
Hrăwkhrawl takih titupawl cun hrăwkhrawl takin an ti,
A si, hrăwkhrawl takih titupawl cun nasazetih hrăwkhrawlin an rak ti a si,» tiah ka ti.
17 Ṭihnungza le khúr le tháng cu
Na tlunah an um, Maw leilung luahtu.
18 Cule hitin a si ding,
Ṭihnak thawmvâng ihsin a tlânsuaktu cu
Khur sungah a tla ding ih,
Khur sung ihsin a hung suaktu cu
Thang in a rak awk ding;
Ziangahtile hmun sannak ih tukvirhpawl cu ăwn an si ih,
Leilung lungphumpawl an hnîn.
19 Leilung cu nasatakin a kekkuai,
Leilung cu a khĭngcat vemvem,
Leilung cu a makih makin a hnîn.
20 Leilung cu zuri bangin a hâwr cuaco ih,
Thlamte bangin a hnîn ciamco;
A dānpahbălnak cu a parah a rit tuk ding ih,
Thosal thei nawn lo dingin a tlu ding.
21 Cuih ni ah cun hitin a si ding,
Jehovah in van ih thilmak rual le,
Leilung ih um lei siangpahrangpawl dān a tat hai ding.
22 Thawngtlapawl cu khur sungah fĭnkhawm an si bangin
Annihpawl cu fĭnkhawm an si ding ih,
Thawnginn sungah kharkhum an si ding;
Ni tampi hnuah annih cu dāntat an si ding.
23 Cun thlapi cu a mualpho ding ih,
Ni cu a ning a zak ding;
Ziangahtile Zion Tlang le Jerusalem ihsin,
Ralkap rualpawlih Jehovah in a uk ding ih,
Amai upapawl hmaiah a ropitnak a um ding.

25

Jehovah Thangṭhatnak

1 Maw Jehovah, nang cu ka Pathian na si,
Ka lo cawimawi ding,
Na hmin ka thangṭhat ding,
Ziangahtile mangbangza thilpawl na tuah a si;
Na thurawnpek hlunpawl cu an rinum in an tak a si.
2 Ziangahtile khawpi cu thil se penkhawm ah na tuah ih,
Kulhhnget nei khawpi na siatter,
Ram dang mipawlih siangpahrang inn cu khawpi si nawn dah lo ko na tisiat;
Cumi cu ziang tik hmanah saksal a si nawn lo ding.
3 Curuangah miphun cak in a lo sunlawih ding;
Ṭihnungza miphunih khawpipawl in an lo ṭihzah ding.
4 Ziangahtile nang cu mifarahpawl humtu na si,
Mitlasampawl hrangah an vansan laiih cahnak na si,
Thlipi lakah răwlhimnak na si,
Ni sa lakah daihnem na si,
Ziangahtile miṭihnungpawlih thaw cu khawkulh nuaitu thlipi vek le,
5 A car mi hmun ih khawsâ vek a si.
Khawtluang mipawlih thawmvâng cu na dimter ding,
Khawdur hnem hnuaiih khawsâ a dem bangin,
Miṭihnungpawlih hla cu a dêm ding.
6 Cule hi tlang ah ralkap rualpawlih Jehovah in miphun hmuahhmuah hrangah
A thawbik mi rawl puai a um ding ih,
Uam rei mi sabitzu,
Thlik ih khat sathaupawl le,
Ṭha zetih uam sabitzu thlawrfim mi in puai a tuah ding.
7 Cule minung hmuahhmuah khuhnak puan,
Miphun hmuahhmuah khuhnak puan rori cu,
Hih tlang ah anih in a dawlh ṭheh ding.
8 Anih in kumkhaw daihin thihnak a dawlhhlo ding ih,
Bawipa Jehovah in hmai hmuahhmuah ihsin mitthli a hnulfai ṭheh ding;
A mipawlih ningzahnak cu
Leilung pumpi ihsin a lahlo ding;
Ziangahtile Jehovah in a sim zo a si.
9 Cule cuih ni ah cun,
«Ngai hnik, in run dingih kan hngah mi, amah hi kan Pathian a si.
Anih hi kan hngah mi Jehovah cu a si;
A runsuahnak ah lungawi le aipuangin um uhsi,» tiih rel a si ding.
10 Ziangahtile Jehovah kut cu hi tlang ah hin a ṭhumaw ding ih,
Cangpâwl cu ran êkpenkhawmnak hmun ih an cīl bangin,
Moab cu cīlthlak a si ding.
11 Cule tileuhtu in tileuh dingih a văi bangin,
An laiah a kut a phar ding.
Cule anih in an hngalnak a dirthla ding
An mi bumnak kutpawl thawn.
12 Na kulhhnget hauhruang sâng pipipawl cu
A cimter ding, niam ah a ṭhum ding ih,
Lei ah, leivut thleng ko a cimter ding.

26

Thangṭhatnak Hla

1 Cuih ni ah cun Judah ram ah hi hla hi an sak ding:

«Khawpi hnget tak kan nei;
Pathian in himnak dingah hauhruang le kulhhnget a tuah.
2 Kăwtkapawl rak áwng uh,
Thutak kaitu a dĭngfel mi miphun a ra lut ding.
3 Na parih a lungthin rettu cu
Nang in hnangamnak famkim ah na ret ding.
Ziangruangahtile anih in nangmah a lo rinsan.
4 Kumkhuain Jehovah rinsan aw,
Ziangahtile YAH, Jehovah cu kumkhaw Lungpi a si.
5 Ziangahtile hmun sâng ih cêngpawl a dirthla,
Khawpi sâng tak,
Niamte ah a ṭhum,
Lei thleng ko niam ah a ṭhum,
Leivut thleng ko a dirthla.
6 Cumi cu ke in a cīl ding,
Mifarah ke le
Mitlasampawlih kekarpawl khalin,» tiin.
7 Midingfelpaih lamzin cu na tluangter;
Miding, midik lamzin na rualter.
8 A si, na thuṭhennak lamzin ah cun,
Maw Jehovah, nangmah ka lo hngak;
Kan nunnak ih a hiar mi cu nangmai hmin le
Nangmah cīn ringring hi a si.
9 Ka nunnak in zan ah nangmah a lo ngai,
A si, ka sungih ka thlarau in hlawptlo zetin a lo hawl ding;
Ziangahtile leilung ih na thuṭhennak a thlen tikah,
Leitlun luahtupawl in dingfelnak thu an zir ding.
10 Misualrál hnenah duhsaknak lăngter si khal sehla,
Dingfelnak a zir cuang lo;
Dĭngnak ram ah diklo takin a ti ih,
Jehovah cungnunnak a zoh lo.
11 Jehovah, na bân na phar ih, annih in an hmu lo.
Annih in mi hrangih na ṭhahnemngainak an hmu ih an ning a zak.
A si, meisa in na ralpawl a kāngral hai ding.
12 Maw Jehovah, nang in kan hrangah hnangamdaihnak in dĭnsak ding,
Ziangahtile kan hnaṭuan hmuahhmuah khal nang in kan hrangah in tuahsak ṭheh.
13 Maw Jehovah kan Pathian, nangmah lawng si loin, bawi dangpawl in, in rak uk ve hai a si;
Asinan nangmai zar lawngin na hmin kan máng a si.
14 Annihpawl cu an thi ih, an nung lo ding;
Annihpawl cu an liam ih, an tho lo ding.
Nang in annihpawl cu dān na tat hai ih na hlorálter hai,
Cule anmah cīn ringring nak hmuahhmuah na siatter ṭheh.
15 Nang in hi miphun hi na karhzaiter, Maw Jehovah,
Nang in hi miphun hi na karhzaiter,
Nang cu sunlawihin na um;
Hi ram ramri hmuahhmuah na kauter.
16 Maw Jehovah, buai cān ah nangmah an lo pan ṭheu,
Na nunsimnak an parih a thlen tikah, ti thekthote lawngin thla an cam thei.
17 Maw Jehovah, nunau naupai,
Hrin nâi thlang in,
Nauhrinnat tuar ih, tâl ih, a hrûm rero bangin,
Kannih khal na mithmuhah kan um ve ṭheu.
18 Nau kan rak pai, kan rak tâl;
^aThli vek menfang kan hring,
Leilung ah hin ziang runsuahnak hman kan rak hlĕnsuak lo ih,
Leitlun luahtupawl khal hrin an rak si fawn lo.
19 Na mithipawl an nung ding,
An taksaruang an tho ding.
Ṭhang uhla hla sak uh, nannih leivut ih itpawl tla;
Ziangahtile na daifim cu zing daifim bangtuk a si ih,
Leilung in mithipawl a hringsuak ding.
20 Ra uh, ka mipawl, nan pindanpawl ah lut uhla,
Nan sângkapawl kharkhum aw hnik uh;
Mit ṭhep kar sungte relh hnik uh,
A aithawknak a reh lai hlanlo.
21 Ziangahtile ngai hnik, an mawhsualnak ruangah leilung luahtupawl dāntat dingin,
Jehovah cu a umnak hmun ihsin a ra suak thlang ding.
Leilung luahtupawl an mawhsualnak ruangih dāntat dingin,
Leilung khal in a thisen suah mipawl a phawrsuak ding ih,
A mi thah mipawl a hup nawn lo ding.

26:18^a Thli vek menfang: Zianghmanlo tinak a si men thei.

27

Jehovah in Israel a Run Ding

1 Cuih ni ah cun Jehovah in a ralnâm turu tak, tumpi le khoh takin
Rulpi zamṭha Leviathan,
Rulpi ngerhfe Leviathan cu dān a tat ding;
Tifinriat sungih rulhreng a that ding.

2 Cuih ni ah cun a hnenah,

«Sabitzu suahnak sabit hmuan, hla sak aw!
3 Keimah, Jehovah in ka kilveng,
Atu le atu tidai ka tawih;
Cumi cu tuahmawh a silonak dingah,
A sun a zan ka kilveng.
4 Keimah ah thinsonak a um lo.
In tibuai dingin, hrambûar le hlingbûr um khal sehla,
Cupawl cu doawknak ah ka pah rumro hai ding ih,
Ka urkāng thluh hai ding.
5 Culole ka kilhimnak rinsan hai seh,
Keimah thawn remnak tuah hai seh,
Keimah thawn remnak tuah hai seh,» tiin.
6 Lehhnu ah cun Jakob cu hram a thla ding,
Israel cu a parmûm ding ih a par ding,
Cule leitlun vangdâp cu rah in a khat ding.
7 Israel vawtupawl a vuak hai vekin, anih in Israel cu a vaw dah maw si?
Asilole Israel thattupawl a thah hai bangtukin Israel cu thah a si maw si?
8 Dawisuak le thlahhloin annih cu na bei.
Nisuahnak lam thli ih a hrăn ni vek khan,
A thlipi rapthlak in annih cu a hrănhlo.
9 Curuangah himi hin Jakob-ih mawhsualnak cu khuhhlo a si ding;
Cule hihi a sual lakhlohnak man pumhlum a si ding:
Leivut cang ko an sŭt mi ṭhúng lungto bangih
Biakṭheng lungto hmuahhmuah cu a canter tikah,
Asherah-pawl le rimhmui urnak biakṭhengpawl an ding nawn lo ding.
10 Ziangahtile kulhhnget nei khawpi ah minung an um nawn lo,
A sungih cêngtu in an tansan ih ramṭhing bangin an tān ta,
Câwpa no in hrampi a piat ding ih cu tawkah a băwk ding,
Cule a hngeṭêkpawl a ei ṭheh ding.
11 A hngeṭêkpawl a vuai tikah, cupawl cu an kiak ding,
Nunaupawl an ra ding ih cupawl cu meisa ah an tik ding.
Ziangahtile cumi cu theihthiamnak nei lo minung an si;
Curuangah anmah Sersiamtu cun an parah zahngainak a nei lo ding ih,
Anmah Semsuahtu cun an hnenah duhsaknak a langter lo ding.
12 Cule cuih ni ah cun hitin a si ding,
Zufraṭis Tivapi ihsin Izip Tivate tiang
Jehovah in thlairawl a cīl ding,
Maw nannih Israel tefapawl tla,
Pakhat te ten sarkhawm nan si ding.
13 Cuih ni ah cun hitin a si ding:
Tawtawrawt tumpi an phaw ding;
Assiria ram ih a hlorál zik rero pawl le,
Izip ram ih raltlanpawl an ra ding ih,
Jerusalem tlang thianghlim ah Jehovah an be ding.

28

Efraim parih Hmakhawpihnak

1 Efraim zuripawlih lallukhum puarthau,
Lu parih phaikuam hring demdem um,
A ropi mi mawinakih pangpar vuai rero mi,
Sabitzu ih a ciahneh mipawl cu an hmakhua a pit a si!
2 Ngai hnik, Bawipa in micak le thacak pa a nei,
Rial nasa takih tla tupto vek le siatsuahtu thlipi vek,
Tilik nasatakih luang luihlo bangin,
Anih in anmahpawl cu a kut in leilung ah a hlăwnthlu hai ding.
3 Efraim zuripawlih lallukhum puarthau cu,
Ke hnuaiih cīl a si ding;
4 Cule phaikuam hring demdem lu ih um, a ropi mi mawinakih pangpar vuai rero cu
Ṭhâl hlanih theipi hmin hmaisabik, a hmutu in kut ih a lâk leveteih a dawlh mi vek a si ding.
5 Cuih ni ah ralkap rualpawlih Jehovah cu
A minung tāngsŭnpawl hrangah,
Lallukhum ropi le lallukhum mawi ah a cang ding.
6 Thuṭhennak ih a totu pa hnenah diknak thlarau le,
Kăwtka tiangih a dokirtupawl hnenah thazang a si ding.
7 Asinan hipawl hi sabitzu ruangah an pai cuaco ih, zureu ruangah an hawr ṭuaṭo:
Puithiam le profet cu zureu ruangah an rak hawr ṭuaṭo,
Annih cu sabitzu in a ciah ṭheh hai,
Annih cu zureu ruangah lamzin tluanah an hâwr ṭuaṭo;
Larnak an hmuh laiah an pai cuaco, thu an ṭhen laiah an kûr nguaingo.
8 Ziangahtile sakhaw lam cabuai hmuahhmuah cu fihnungza luak in a khat;
A fainak hmun hrimhrim a um lo.
9 «Zo hnenah so theihnak a zirh ding?
Cule zo hnenah so thucah a simfiang ding?
Hnawi thlei pektepawl hnenah maw si?
Hnawi fawh bānter pektepawl hnenah maw si?
10 Ziangahtile ^athupek parah thupek, thupek parah thupek,
Rīn parah rīn, rīn parah rīn,
Hi tawkah málte, khi tawkah málte ti a si.»
11 Ziangahtile ṭawng mak le ram dang ṭawng hmangin,
Hi minungpawl a be hai ding,
12 Anih in an hnenah, «Hihi cawlhhahdamnak a si,
Micaupawl cawlhahdamter uh,» tiin le
«Hihi hahdamnak hmun a si,» tiah a ti,
Cuticingin an ngaithla duh lo.
13 Curuangah Jehovah kamsuakthu an hnenih thleng mi cu hihi a si:
«Thupek parah thupek, thupek parah thupek,
Rīn parah rīn, rīn parah rīn,
Hi tawkah málte, khi tawkah málte,» tiin.
Cutin annihpawl cu an feh ding ih, zapathalin an tlu ding,
Cule an kiak ding ih, awh le kaihngah an si ding.
14 Curuangah Jehovah kamsuakthu ngaithla uh,
Jerusalem ih um hi minungpawl uktu, nannih minautathmangpawl,
15 Ziangruangahtile nannih in,
«Thihnak thawn thukham kan tuah zo ih,
Sheol thawn lungkimtlangnak kan tuah zo.
Tilian vekin vuaknak a thlen tikah,
In cîm bān lo ding,
Ziangahtile kan răwlhimnak ah thuphan kan hmang ih,
Thu diklo hnuaiah kan relh a si,» tiah nan ti.

28:10^a thupek parah thupek: Hebru ah cun «ki tsav latsav, tsav latsav, qav laqav, qav laqav» ti a si. Ram dang misîmtu an rat tikah an ṭawng cu naute hnawi thlei pekte ṭawng ăwndān thawi bangawin profet in a sim.

A Kilih Lung Pawimawh

16 Curuangah Bawipa Jehovah in hitin a sim:

«Ngai hnik, Zion ih lungphum dingah lungto,
Hniksak zo mi lungto, a kilih lung hlú, lungphum hnget tak cu ka ret;
Zokhal amah zumtu cu a vaivuan lo ding.
17 Diknak cu rīn tahnak ah le,
Dingfelnak cu darhlumthlai hri ah a tuah fawn ding;
Rial in thuphanpawlih răwlhimnak cu a phiatfai ṭheh ding ih,
Tilian in hmun thuppawl a hrut ṭheh ding.
18 Thihnak thawi nan thukham cu a pelhsawlh ding ih,
Sheol thawi nan lungkimtlangnak cu a ding khawsuak lo ding;
Tilian vekin vuaknak a thlen tikah cun,
Nannih cu cumi hmangin cîmhloh nan si ding.
19 Cumi a thlen tinten a lo la ṭheu ding;
Ziangahtile cumi cun zing tin le a sun a zanin a lo cîm ding;
Thuthan theihthiamnak cun mirâpza ṭihphannak lawng a thlen ding,» tiin.
20 Ziangahtile ihkhun cu ke thluan dingah a tawi tuk ih,
Puan cu sĭn dingah a fate tuk.
21 Ziangahtile a hnaṭuan, a hnaṭuan maksak cu a ṭuansuah theinak dingah le,
A thil ti, a thil ti maksak cu a ṭhehsuak theinak dingah
Jehovah cu Perazim Tlang ih a thawh bangkhan a tho ding,
Anih cu Gibeon Phaikuam ih a thin a heng bangkhan a thin a heng ding.
22 Curuangah minautattu si nawn hlah uh,
Culole nan kolpawl a khoh sinsin pang ding,
Ziangahtile leilung tlun pumpi parih siatralnak thleng tengteng dingih ruat mi cu
Ralkap rualpawlih Bawi Jehovah hnen ihsin ka hna in ka thei zo a si.

Pathian Zirhnak Ngaithla Aw

23 Nan hna tŭn uhla, ka aw hi ngai hnik uh,
Ngaithla uhla, ka thurel mi hi thei hnik uh.
24 Lei lettu in thlaici cîng dingin a tlaitluanin lei a let ringring dah maw si?
Leihlăngpawl dipter in a lei a căwklet ringring maw si?
25 A vangdâp a cawhrual tikah, ^aanethon tuhin, ^bkumin a vawrh ih,
A tlarin sangvut phunin,
Barli sangvut khal a hmun ah le,
Kusemet sangvut khal a kap tluanah a cîng a si lo maw?
26 Ziangahtile Pathian in anih cu cīn le dān dik a khihhmuh,
A Pathian in a zirh a si.
27 Anethon cu thlairawl vuaknak in an vaw dah lo ih,
Kumin cu lêngke in an cīl dah fawn lo;
Anethon cu fung in vuak a si sawn ih,
Kumin cu fungfek in.
28 Thlairawl cu rial ding a si;
Curuangah anih in cumi cu a cîl kumkhua lo,
A lêngke in a khuai ringring lo ih,
A rángtothiampawl thaw khal in a cīlkuai ringring fawn lo.
29 Hi khal hi ralkap rualpawlih Jehovah hnen ihsi ra a si,
Anih cu thurawnpeknak ih mangbangza le fimnak ih cungcuanghleice a si.

28:25^a anethon: Grik ṭawng a si ih, thlai kung rimhmui phun khat a si.

28:25^b kumin: Grik ṭawng a si ih, rawl hmeh ih an thlak ṭheu mi mu fate takte nei thlai kung a si.

29

Jerusalem Hmakhawpihnak

1 «David rak cēn ṭheu nak khawpi ^aAriel, Ariel cu a hmakhua a pit!
Kum ah kum bêt uh;
Puaipawl ra thleng hai seh.
2 Ariel cu kan vansangter ding;
Phurrihnak le riahsiatnak a um ding ih,
Cumi cu ka hrangah cun Ariel vek a si ding.
3 Nangmah dokalhin na kimvelah ṭanhmun ka khuar ding,
Khur laiin nangmah ka lo kulhkhŭm ding ih,
Nangmah dokalhin lei ka sûngpâwng ding.
4 Nang cu dirthlak na si ding,
Lei ihsin na ṭawng ding;
Na bawhnak leivut ihsin na ṭawngkam cu theih a si ding;
Na aw cu thlarau kawhthiam aw bangtukin, lei ihsin a hung suak ding,
Leivut ihsin thu na sim thektho ding.
5 «Cuihhleiah mipi tamtak na ralpawl cu,
Leivut dip zet bangtuk an si ding ih,
Miṭihnungza mipi tamtak cu sempĕt mi fānghi bangtuk an si ding;
A si, cumi cu mit ṭhep karah, a thleng thutthi ding.
6 Nangmah cu ralkap rualpawlih Jehovah in
Khawri le linghnîn le awn nasazet thawn,
Thlipi le phusîng le
Mikangrál thei meialh thawn dāntat na si ding.
7 Ariel dotu miphunpawlih mipi hmuahhmuah,
Amah dotu le a kulhhnget dotu le
Amah vansangtertu hmuahhmuah cu,
Mang, zan ih larnak vek an si ding.
8 Cumi cu rilrâwngpa in mang a man vek a si:
Zoh hnik, rawl a rak ei,
Asinan a hung ṭhang tikah a rilrawn a reh cuang lo;
Asilole tihâlpa in mang a man vek a si:
Zoh hnik, ti a in,
Asinan a hung ṭhang tikah, ngai hnik, a ṭamsawl ih a tihal a reh cuang lo.
Zion Tlang a rak dotu miphun hmuahhmuah ih mipi cu cuvek ah an cang ding,» tiin.

29:1^a Ariel: Pathian-ih kiosa tinak a si.

Thulunglo Mitcâwtnak

9 Hngak hrih uhla, mak ti uh!
Nan mitcawter uhla mitcaw uh!
Zu an ri, asinan sabitzu a si lo;
An hâwr ṭuaṭo, asinan zureu in a si lo.
10 Ziangahtile Jehovah in ihthah thlepthlepnak thlarau nan parah a burh a si,
Cule nan (profetpawl) mit a sinter,
Cule nan (hmutupawl) lu a khuh.

11 Larnak hmuahhmuah cu nan hrangah erhpit mi cazual sungih cangan mi bangtukah a cang. Cumi cu casiarthiam hnenah, «Hihi rak siar hram aw,» tiih an pek tikah, «Ka siar thei lo, ziangahtile cumi cu erhpit mi a si,» tiah anih in a ti.

12 Cun cuih cazual cu casiarthiam lo mi hnenah, «Hihi siar hram aw,» tiin pek a si.

Cule anih in, «Kei cu ca ka siarthiam lo,» tiah a rak ti.

13 Curuangah Bawipa in,

«Hi minungpawl cun an kâ in in ra naih ih
An hmur in in upat,
Asinan an thinlung cu ka hnen ihsin hla zetah an ṭhawn ih,
In ṭihzahnak cu milai thurosiah zirhawknak men a si,
14 Curuangah ngai hnik, hi minungpawl hnenah tuksumza, thilmak taktak ka tuahsal ding;
Ziangahtile an mifimpawlih fimnak cu a hlorál ding,
Cule an khawruatthiampawlih theihthiamnak cu thuh a si ding,»

tiah a ti.

15 Jehovah hnen ihsin an khawkhan mi thûk zetih thuh tumtupawl le,
Thim lakih thil titupawl cu an hmakhua a pit;
Annih in, «Zo in so in hmu?» ih,
«Zo in so in thei?» tiah an ti.
16 Thungaiten thil nan merhkawi ṭheh a si hi teh!
Beltuahtu cu bellei tluk fangih ruah ding a si maw?
Thil tuah mi in a tuahtupaih thuhla ah,
«Anih ih tuah mi ka si lo,» a ti ding maw?
Asilole thil sersiam mi in a sersiamtuih thuhla ah,
«Anih in theihthiamnak a nei lo,» a ti ding maw si?

Hmai lam Cān ih Ruahsannak

17 Lebanon cu lóram ṭha zetah a can ih,
Lóram ṭha zet cu tupi vekih ruah a si ding cu,
A rei nawn lo ding a si lo maw?
18 Cuih ni ah cun hnasetpawl in cazual sungih canganpawl an ngaithla thei ding ih,
Khawthim le khawmaw lakah mitcawpawl in an hmu ding.
19 Mităngdawrpawl khal in Jehovah hnenih an lungawiaipuannak a karh ding ih,
Minungpawl lakih mifarahpawl in
Israel-ih Mi Thianghlim hnenah lungawiaipuangin an um ding.
20 Ziangahtile miṭihnungpa cu zianghmanlo ah dirhthlak a si ding,
Mi hmuhsuamtupa cu a hlorál ding ih,
Thilsual tuah tum ringring tu hmuahhmuah cu sahtan an si ding.
21 Cupawl cun ṭawngkam khat in mawh neiah mi an cangter ih,
Kăwtka ah nun simtupa hrangah tháng an kăm ih,
Diknak lamih umtu kha thulolak ṭawngkam hmangin thiamlo an coter.

22 Curuangah Abraham runsuaktu Jehovah in Jakob sungza thuhla ah hitin a ti:

«Atu ah cun Jakob cu a ning a zak nawn lo ding,
Atu ah cun a hmai a râm nawn fawn lo ding,
23 Asinan an lakih ka kut hnaṭuan, a tefapawl a hmuh tikah,
Ka hmin an zah ding ih,
Jakob-ih Mi Thianghlim cu an zah ding,
Cule Israel Pathian cu ṭihzahin an ding ding.
24 Thinlung ih fehsualpawl khal in an theithiam thlang ding ih,
A phunzaipawl in nun zirhnak an pawm ding,» tiin.

30

Helhmang Miphun Hmakhawpihnak

1 Jehovah in, «An hmakhua a pit, helhmang tefapawl,
Keimah ráwn loin, khua an khâng,
Cule ka Thlarau ráwn loin, sual parih sual an bêt theinak dingah, khawkhannak an tawlrel.
2 Faro-ih humhimnak ah beunak hawl le,
Izip hnemdai rinsan dingin
Ka ngaihdān in sut loin,
Izip ih suk dingin ke an kar.
3 Curuangah Faro-ih humhimnak cu nan ningzahnak a si ding ih,
Izip hnemdai nan rinsannak cu
Nan mualphonak a si ding.
4 Ziangahtile a bawipawl cu Zoan ah an um ih,
A palaipawl cu Hanes ah an ra thleng.
5 Anmah ṭhathnemnak a pe thei lo minungpawl ruangah an ning a zak thluh ding,
Băwmnak siseh, ṭhathnemnak siseh an si lo ding ih,
Ningzahnak le hminsiatnak an si sawn ding,» tiah a ti.

6 Negev ramsapawl dokalhih thuphuansuah.

Kiosa pinu le kiosa pa,
Rulngân le rulvankâi suahnak,
Buainak le ānhainak ram paltlăngin,
Annih in an lennakpawl cu lāk tuaipawl zāng in le,
An hlawnthilpawl cu kalaukpawl ṭhúng in
Anmah bawm thei lo tu miphun hnenah an thiar ding;
7 Mi a băwmnak cu thulolak le zianghmanlo men a si mi Izip hnen rori ah cun.
Curuangah amah cu to thluang ve menmen ^aRahab tiah ka ko.
8 Atu ah feh aw, calung parah cumi cu an hmaika-ah ngan awla,
Cazual parah khum aw,
Cumi cu a ra lai ding mi tikcucān hrangah a si ding,
Kumkhuain kumkhua tiang:
9 Himi cu helhmang miphun,
Bumhmang fāte,
Jehovah Dān ngaithla lo ding mi fāte an si;
10 Hmutupawl hnenah, «Hmu hlah uh,» tiin le,
Profetpawl hnenah, «Kan hnenah thildik phuang hlah uh;
Kan lunghmui zawng phuang uh, bumnak thupawl phuang uh.
11 Lamzin cu suahsan uh,
Zin ihsin pial uh,
Israel-ih Mi Thianghlim cu kan hmaika ihsin hloter uh,» titupawl tla.

30:7^a Rahab: Sam 87:4 simfiangnak zoh aw.

12 Curuangah Israel-ih Mi Thianghlim cun hitin a ti:

«Hi kamsuakthu na nautat ih, palbĕtnak le merhkawinak na rinsan,
Cule an parih na ṭhumawk ruangah,
13 Hi mawhsualnak cu na hrangah
A cim zik ṭiaṭia mi khawkulh khing bangtuk le
Hruang sângpi tung iau-iau,
Rinloparalih cim hruak bangtuk a si.
14 Cuih siatnak cu beltuahtuih bel khuai vekin a si,
Cumi cu dip seksekih khuai a si ruangah;
Thŭk ih meiling lâknak ding asilole,
Tikhur ih tidai suahnak ding a phelte hman hmuh a si lo ding,» tiin.

15 Ziangahtile Israel-ih Mi Thianghlim, Bawipa Jehovah in,

«Siraw ih nan cawlh asile runsuah nan si ding;
Daiteih um le rinsannak cu nan cahnak a si ding,»

tiin a rak ti.

Asinan nannih in nan rak duh lo.
16 Cule nannih in, «Kan duh lo, ziangahtile ráng toin kan tlân ding,» tiah nan ti.
Curuangah nan tlân a si pei cu!
Cule, «Ráng tlân cak zetpawl kan to ding,» nan ti.
Cuihruangah a lo dawitupawl khal an tlân cak ding!
17 Mi pakhat ih hro mennak in mi 1000 an tlânse ding,
Tlang zimih thantar vek le
Tlang parih hminsinnak vekih tān nan si tiangin,
Mi panga ih hronak in nan tlanse ding.

Pathian cun Zangfahnak a Nei Ding

18 Curuangah nanmah a lo zangfah theinak dingah Jehovah in a hngakhlap;
Curuangah nan parih zahngainak langter dingah a tho ding.
Ziangahtile Jehovah cu diknak Pathian a si;
Amah hngaktupawl hmuahhmuah cu mithlawsuak an si.
19 Ziangahtile minungpawl cu Jerusalem ih Zion ah an cêng ding;
Na ṭap nawn lo ding.
Anih cu na ṭah auaw ah zangfahnak a nei ding;
Cumi a hna ih a theih veten a lo sâng ding.
20 Cule harsatnak rawl le zăwnzaihnak tidai Bawipa in lo pe khal sehla,
Nanmah a lo zirhtupawl cu thuh an si nawn lo ding,
Cuhnakin nan mit in nanmah zirhtupawl nan hmu sawn ding.
21 «Hihi lamzin a si, cumi ah feh uh,» tiih nan dung lamih rel mi thu cu,
Vawrh lamih na pial, asilole keh lamih na pial tiktikah nan hna in nan thei ding.
22 Cuihtlunah ngun khût mi nan milimpawl,
Sui khût mi nan milimpawl khal nan bawrhbangter ding.
Thil thianglo dinhmun in cupawl cu nan hlăwnhlo ding;
An hnenah, «Tlânhlo uh!» tiah nan ti ding.
23 Cun anih in lei ih na cīn mi na thlaici hrangah ruah a lo pe ding ih,
Leilung rawl na paṭha ding;
Cumi cu a hlawk nasa ding ih a tam liailiai ding.
Cuih ni ah cun nan sumhnámpawl cu
Ran tlannak hmun kau zetah an tláng ding.
24 Cuvek thothoin lei lettu câwcangpawl le lākpawl in
Suahdur le ^athehfainak hmanrua thawi an tifai mi,
Ṭha zetih timtuah mi ran rawl an ei ding.
25 Thahawknak ni rapthlak,
Dawlsângpawl an tlûk ni ah,
Tlang sâng kip le tlangmual sâng kip ah
Tiva ti a luang ding.
26 Cuihhleiah Jehovah in a mipawlih an hma a tuamsak ni le
Amai tuahmawhnak an hriamhma a damter ni ah cun,
Thlapi tleu cu ni tleu vek a si ding ih,
Ni tleu cu alet sarih in,
Ni sarih ta tleu vek a si ding.

30:24^a thehfainak hmanrua: Sangvut tifainak hrangih thirkut vekih thing ih tuah mi a si, cumi in sangvut thli ih semfaiternak dingah an theh ṭheu.

Assiria parih Dāntatnak

27 Ngai hnik, Jehovah hmin cu hla zet ihsin,
A thinhengnak meialh le
Meikhu sahpi thawn a ra.
A hmur cu aithawknak in a khat ih
A lei cu kăngralhmang meisa bangtuk a si.
28 Miphunpawl ṭangṭa ih khei dingah le siatnak lamih hruaihlo dingah,
Minungpawl kâ ih kâkharh kharh dingin,
A thaw cu hngawng tiang thleng tivate luangliam vek a si.
29 Zan ih puai thianghlim nan hman tikih sak vekin hla nan nei ding.
Jehovah tlang ih kai dingin le,
Israel Lungpi hnenih feh dingin,
Phirivau awn thawn a feh mi pa vekin nan lung a awi ding.
30 Jehovah in a aw ropi cu mi a theihter ding ih,
A thinhengnak nasazet,
Mi kăngralhmang meialh,
Thlipi le ruahpi le rial thawn,
A kutthlak lai cu a langter ding.
31 Ziangahtile Jehovah aw hmangin
Fungfek ih a vuak tikah,
Assiria cu ṭihin a thir thlauhthlo ding.
32 Cule Jehovah in cu pa a vuaknak,
Dāntatnak kianghrăwl hmangih a vuak tinten,
Khuangtepawl le ṭingṭangpawl in an thlun ding;
Cule raldonak ah hriamhrei hawiin annih cu a do ding.
33 Ziangahtile ^aTofeth cu hlanlaipi ihsi timlam cia a rak si,
A si, cumi cu siangpahrang hrangih timlam mi a si.
Cumi cu thûk zet le kau zetin a rak tuah;
Meisa ih ur dingah zanthing penkhawm a si,
Kât tiva bangtuk a si mi Jehovah thaw in cumi cu a alhter.

30:33^a Tofeth: Molek pathian hnenih milai rai an thawinak hmun a si.

31

Izip Rinsantupawl Hmakhawpihnak

1 Băwmnak dil ih Izip ih a sukthlatu le,
Rángpawl a rinsantupawl,
An tam ruangih ránglêngpawl a rinsantupawl le,
An cah tuk ruangih rángtothiampawl rinsan ih,
Israel-ih Mi Thianghlim a zoh lo tupawl,
Jehovah a hawl fawn lo tupawl cu an hmakhua a pit a si!
2 Cutisikhalsehla anih cu a fim fawn ih siatnak a thlengter ding,
Cule a kamsuakthupawl cu a hnûkkir lo ding,
Cuhnakin thil ṭhalo tuahtu sungza do dingin le
Mawhsualnak a tuahtupawlih băwmnak do dingin a tho sawn ding.
3 Izip-mipawl cu milai an si ih, Pathian an si lo;
Cule an rángpawl cu titsa an si ih, thlarau an si lo.
Jehovah in a kut a hawi tikah cun,
A bawmtu cu a bah ding ih,
Băwm mi khal a bah ding;
An zaten an hloráltlang ding.

Pathian in Jerusalem a Runsuak Ding

4 Ziangahtile Jehovah in ka hnenah hitin a ṭawng:

«Kiosa simaw, kiosa vanglai simaw a sa deh mi parih a hûk durdo ih,
Cuih sahrang do dingin tuukhāltu mi burpi an kawhawk tikah,
An aw cun cuih sahrang cu a thlaphângter lo ding ih,
An thawmvâng in a hnaihnăwk fawn lo ding.
Cuvekin Zion Tlang le a tlangmual hrangih do dingin,
Ralkap rualpawlih Jehovah cu a rung ṭum ding.
5 Vâtepawl an bu tlunih an dîr curco bangin,
Ralkap rualpawlih Jehovah in Jerusalem a kilhim ding.
A kilhim ding ih a runsuak ding,
A zuah ding ih, a humhim ding,» tiin.

6 Maw Israel tefapawl, nasatakih nan helsan mi pa hnenah ra kir uh. 7 Ziangahtile cuih ni ah cun sualnak dingah nanmai kut rori in nanmai hrangih nan tuah mi ngun milempawl le sui milempawl cu mi kip in nan hlăwn ding.

8 «Cun Assiria cu milai ralnâm a si lo mi in a tluter ding ih,
Milai ralnâm a si lo mi in a eirál ding.
Anih cu ralnâm lak ihsin a luat lo ding ih,
A tlangvalpawl cu hranhramih ṭuanbăngter mi ah an cang ding.
9 Ṭihnak ruangah a lungpi cu a hlorál ding ih,
A mipawimawhpawl cun thantar an ṭih ding,» tiin,
Zion ih a meisa rettu le,
Jerusalem ih a meipi rettu Jehovah in a ti.

32

Dingfelnak Lalram

1 Ngai hnik, siangpahrang pakhat in dingfelnak in a uk ding ih,
Uktupawl in diknak in an uk ding.
2 Pakhat ciar cu thli lakih relhnak hmun le
Thlipi lakih phentu an si cio ding,
A carnak hmun ih tivapipawl vek an si ding ih,
Ramcar ih lungpi tumpi thlahlim vek an si ding.
3 A hmutupawlih mit cu a caw lo ding ih,
A ngaithlatupawlih hna in a thei ding.
4 Mihaihawt thinlung khal in thudik a theithiam ding ih,
Ṭawnghak mi lei khal in fiang zetih ṭawng dingin a tiar ding.
5 Mi-â cu mizahum tiah an ti nawn lo ding ih,
Mitirhfak khal mitirhsiang tiah an ti fawn lo ding.
6 Ziangahtile mi-â cun thil atthlak a rel ih,
Pathian ngaihsak loih nung dingin,
Jehovah dokalhih thilsual rel dingin,
Mirilrâwngpawl khăwpkhamter lo dingin le,
Tihâlpawl tidai inter lo dingin
A thinlung in sual a ruat.
7 A ṭha lo mi khawkhângtuih khawkhannakpawl cu an ṭha lo;
Mitlasam in diknak thu a rel hmanah,
Thuphan ṭawngkampawl thawi mifarahpawl siatsuah dingin,
Ruahmannak sualrálpawl khua a khâng.
8 Asinan mizahum cun zahtlak thil ti dingin khua a khâng ih,
Zahtlak thil ti dingin khua a khan ruangah anih cu a dinghnget.

Thlahdahawknakih Rah

9 Nannih nunau thlahdahawpawl, tho uh,
Ka aw hi ngaithla hnik uh;
Nannih midaithlang fanupawl,
Ka thurel lamah nan hna tŭn uh.
10 Kum khat le ni tawkfang ah
Nan buai ding, nannih nunau daithlangpawl;
Ziangahtile sabit a rah lo ding,
Sabit rah lawh ti a um lo ding.
11 Khūr uh, nannih nunau thlahdahawpawl;
Buai uh, nannih midaithlangpawl;
Hlît aw uh, lawng ten um uhla,
Nan tâi ah buri-hnipuan veng uh.
12 Lóram ṭha le sabit rah bawr zetpawl kha, nan âwm cūmin ṭah uh.
13 Ziangahtile ka mipawlih ram ah hlingbûr le hrambûar an ṭo,
A si, khawpi nuam zet sungih aipuannak inn hmuahhmuah cu ṭah uh.
14 Ziangruangahtile siangpahrang innpawl cu tlansan an si,
Mi tampi umnak khawpi cu thlauthlak a si.
Khawkulhpawl le dawlsângpawl cu pûk ah an cang kumkhua,
Ramlak lākpawlih aipuannak le rante rual tlannak ah a cang tariai.
15 Tlun sâng ihsin kan parah Thlarau burh a si tiang le,
Ramṭhing cu ram ṭha ih a can tiang le,
Lóram ṭha cu tupi vekih siar a si tiangin.

Pathian Uknak ruangih Daihnak

16 Cun diknak cu ramṭhing ah a cêng ding ih,
Dingfelnak cu lóram ṭha ah a tâp ding.
17 Dingfelnak thil ti cu hnangamnak a si ding ih,
Dingfelnak rah cu kumkhaw thawvennak le rinrahawknak a si.
18 Ka mipawl cu ralmuannak hmun ah,
Him zetih cēnnak hmunpawl le cawlhhahdamnak hmunpawl ah an cêng ding.
19 Tupi ah rial a tla ih, khawpi cu santlaihlonak ah niam ko dirh a si hmanah,
20 Nannih tipi kap hmuahhmuah ih thlairawl cingtupawl le,
Câwcang le lāk zalen zetih tlangtertupawl cu mithlawsuak nan si.

33

Vansannak le Băwmnak

1 Nang, rămnak táwng dah lo na cingih, mi rămtu nang,
Nang, hrawkhrâwl zetih ti táwng dah lo na cingih, hrăwkhrawl zetih mi titu nang, na hmakhua a pit a si!
Mi va răm na bān tikah, răm na si ding.
Hrawkhrâwl zetih mi ti na bān tikah,
Mi dang in hrawkhrâwl zetin an lo ti ding.
2 Maw Jehovah, in zangfah hram aw;
Nangmah kan rak lo hngak a si.
Zing tin an thazang rung si aw,
Buai cān ah kan runsuahnak khal rung si hram aw.
3 Mipi thawmvâng ruangah mi an tlân;
Na din tikah, miphunpawl an ṭekdarh.
4 Khaukhuap in thil a thiarkhawm bangin,
Na rallâksumpawl cu fĭnkhawm an si,
Kharbawkpawl a suk a so ih an pet vekin,
Annih in cupawl cu an va cuh.
5 Jehovah cu khaisanin a um, ziangahtile anih cu tlun sâng ah a cêng,
Anih in diknak le dingfelnak in Zion a khatter.
6 Anih cu na damsung lo tihngettu a si ding ih,
Anih cu runsuahnak luangliam le fimnak le theihnak a si ding.
Jehovah ṭihzah cu a hlawnthil a si.
7 Ngai hnik, an miralṭhapawl cu kăwtthler ah an ṭap ding,
Remnak palaipawl cu nasatakin an ṭap ding.
8 Zinpipawl cu an ṭhing reprep,
Khualtlawng an um nawn lo.
Anih in thukham a pahbăl,
Khawpipawl a nautat,
Zohman a hmaisăwng lo.
9 Leilung cu a ṭap ih a cau,
Lebanon cu ningzakin a vuai,
Sharon cu ramṭhing bangtuk a si ih,
Bashan le Karmel cu an hnîn.

Zion Dāntatnak

10 Jehovah in, «Atu ah ka tho ding;
«Atu ah khaisan ka si ding,
Atu ah ka cawisângaw ding.
11 Nannih in fânghi nan vun ding,
Nannih in cangpâwl nan hring ding,
Nan thaw in meisa vekin a lo kangrál hai ding.
12 Cule minungpawl cu ṭhunglung rawh mi bangtuk an si ding;
Annih cu sahthlak mi hling meisa ih ur mi bangtuk an si ding.
13 Nannih hlapi ih a um mipawl, ka thil tuah mi hi nan hna in rak thei uh,
Cule nannih naite-ih a um mipawl,
Ka cahzia hi rak thei uh,» tiah a ti.
14 Zion ih um misualpawl cu an thin a phâng;
Ṭihnak in midepdepawl a kaibĕt:
«Kan lakah zo so meisa kāng lakah cêng thei um?
Kan lakah zo so catuan meialh lakah cêng thei ding?» tiah an ti?
15 Dingfel zetih a tlanglêngtu le dik zetih a ṭawngtu,
Palbĕtnak ih ngah mi a nautattu,
Nawhthuh la duh loih a kut a herhsantu,
Thisen suah ding thu thei duh loih a hna a hupbĕttu le,
Thil ṭhalo hmu lo dingih a mit hupbĕttu cu:
16 Hmun sâng ah a cêng ding,
A kilhimawknak cu lungpi kulhhnget a si ding,
Rawl a tlasam lo ding ih,
Tidai a tlasam lo ding.

Siangpahrang ropiih Ram

17 Na mit in Siangpahrang cu amai mawinak ah a hmu ding,
A hla zet mi ram cu an hmu ding.
18 Na thinlung in ṭihnungza ngunngaih zetin a ngaihtuah ding:
«Khuiah so cangantu cu a um?
Khuiah so cuaithlaitu kha a um?
Dawlsângpawl siartu teh khuiah so?» tiin.
19 Mikawlhsenpawl,
Theihthiam thei lo mi ṭawng a ṭawngtu le,
Theihfiang thei lo mi ṭawnghak ih a ṭawngtu minung na hmu nawn lo ding.
20 Kan puai ruat mipawl hmannak khawpi Zion cu zoh hman;
Ralmûang takih tlanlēnnak hmun,
Phelh lo ding mi puanthlam,
A fung khen pakhat hman ṭhawn lo ding mi,
A dirhnak hri pakhat hman sahcat lo ding mi Jerusalem cu
Na mit in a hmu ding.
21 Asinan a ropi mi Jehovah cu kan hrangah,
Hlaucawp lăwngte le lăwng ropipi khal an fehlonak
Tivapi le tivate umnak hmun kaupi ah a cang ding.
22 Ziangahtile Jehovah cu kan thuṭhentu a si,
Jehovah cu kan dān petu a si,
Jehovah cu kan Siangpahrang a si,
Anih in in runsuak ding.
23 Na lăwng hri a dawr,
An puanzar banpawl an hngetter thei nawn lo,
An puanzar an pharh thei nawn lo,
Cun rallâksum nasazet cu an zemaw ding;
Kebái in rallakthil a la.
24 Cule cuih khua luahtu zohman in, «Ka dam lo,» an ti lo ding ih,
Cutawk ih cêng mipawl cu an mawhsualnak ngaidam an si ding.

34

Miphunpawl Dāntatnak

1 Nannih miphunpawl, ngaithla dingin ra nai hnik uh,
Nannih minungpawl, ngai uh!
Leilung le a sungih um mi hmuahhmuah khal in ngaithla hai seh.
Leitlun le a sung ihsin a ra suak mi thil hmuahhmuah khal in.
2 Ziangahtile Jehovah aithawknak cu miphun hmuahhmuah parah a thleng ih,
An ralkap hmuahhmuah parah a thinsonak;
Anih in annihpawl cu a that ṭheh hai,
Mi thattu hnenah a ap hai a si.
3 An thah mipawl khal hlăwnsuah an si ding;
An mithi ruangpawl ihsin an rimsia a tho vutvo ih,
Tlangpawl cu an thisen in a ciah ding.
4 Van ih thilmak rual hmuahhmuah an rál ṭheh ding ih,
Vanpawl cu cazual bangin an zualaw ding;
Sabit hri ihsin a hnah a tlak bangin le,
Theipi kung ihsin a rah a ṭilh bangin,
Van ih thilmak rual hmuahhmuah an ṭil ṭheh ding.
5 «Ziangahtile ka ralnâm cu van ah a ri,
Ngai hnik, cumi cu Edom parah le,
Ka camsiat mipawl parah, thuṭhennak hrangah a ra thleng ding.
6 Jehovah ralnâm cu thisen in a khat ih, thau a kăwp liailiai,
Tuufa nopawl le mepapawlih thisen in,
Tuucangpawlih kaileng thau tla in.
Ziangahtile Jehovah in Bozrah ah raithawinak a nei ih,
Edom ram ah thahawknak rapthlak zet.
7 Ramlak câwcangpawl cu anmah zawngah an tlu ding ih,
Câwpa tuaipawl khal câwcang cak zetpawl zawngah,
An ram cu thisen in a ciahaw ding ih,
An leivut cu thau in a rîm ṭheh ding.
8 Ziangahtile Jehovah in phubalak ni,
Zion ruangah lehrulhnak kum a nei.
9 A tivatepawl cu katṭaza ah an cang ding ih,
A leivutpawl cu kât ah an cang ding;
A ram cu katṭaza kāng hluahhlo ah a cang ding.
10 Cumi cu a sun a zanin a mit lo ding;
A meikhu cu a khu kumkhua ding.
Cumi cu san khat ihsin san khat tiang a ṭhing ding;
Kumkhuain kumkhua tiang cumi cu zohman in an paltlăng nawn lo ding.
11 Asinan cumi cu ^aka-at va le sakuh in an luah ding,
Sumbuh le tlangâk khal cu tawkah an cêng ding.
Cule anih in cumi tlunah hnăwkbuainak hri le kawlawngnak darhlumthlai hri a thlai ding.
12 Cucu lalram tiih kawh dingin a mipawimawhpawl in zianghman an nei nawn lo ding,
A bawipawl hmuahhmuah cu zianghmanlo ah an cang ding.
13 Cule a siangpahrang innpawl ah hling an kho ding,
A kulhhnget sungah thaihliak le hlingbûr an ṭo ding;
Cumi cu cinghniapawl umnak le,
Kalauk vapawl umnak a si ding.
14 Nelrawn sahrangpawl khal cinghniapawl thawn an táwngaw ding ih,
Zâthar in a hawipi a ko ding;
Zan vâk ṭihnungza pinu khal cu tawkah umhmun a khuar ding ih,
Cu tawkah a khawsa ding.
15 Rulngân in cu tawkah bu a tuah ding ih ti a ti ding,
Cule fa a keuhter ding ih, a kilhimnak hnuaiah a khawm hai ding;
Khautepawl khal cu tawkah an umkhawm ding,
Mai kăwppi fingfing thawn.
16 «Jehovah cazual sung ihsin hawl uhla, siar uh:
Hipawl lakah pakhat hman kim lo a um lo ding;
Kăwppi tlasam pakhat hman an um lo ding,
Ziangahtile ka kâ in thu a pe zo ih, a Thlarau in a fĭnkhawm hai zo.
17 An hrangah camcawhfung a zûksak zo ih,
Tahnak rīn in an lakah cumi cu a kut in a zem hai.
Kumkhuain cumi cu an nei lan ta ding;
San khat hnu san khat, cu tawkah an cêng ding,» tiin.

34:11^a ka-at va: Pui 11:18 simfiangnak zoh aw.

35

Tlen Mipawlih Aipuannak

1 Ramṭhing le nelrawn cu anmai hrangah an lung a awi ding ih,
Arabah cu a ai a puang ding, cule rose pangpar vekin a par ding;
2 Cumi cu hlaw zetin a par ding ih, lungawiaipuangin a um ding,
Cule aipuangin hla a sak ding.
Lebanon ropitnak cu a hnenah pek a si ding,
Karmel le Sharon ṭhatnakbik khal.
Annih in kan Pathian cungcuannak,
Jehovah ropitnak an hmu ding.
3 Kut caklopawl cu cakter uhla,
Khuk ṭawnṭaipawl cu cakter uh.
4 Thinlung thlaphângpawl hnenah,
«Cak zetin um uh, ṭih hlah uh!
Ngai hnik uh, phuba la dingin nan Pathian a ra ding,
Pathian lehrulhnak a thleng ding;
Anih cu a ra ding ih a lo run hai ding,» tiah sim uh.
5 Cun mitcawpawlih mit a vâng ding ih,
Hnasetpawlih hna a vâng ding.
6 Cun kebáipawl cu zuknêng bangin an khir ding ih,
Ṭawng thei lo pawlih lei in aipuangin hla a sak ding.
Ziangahtile ramṭhing ah tidai a pût ding ih,
Arabah ah tivatepawl.
7 Leicar sa hiamhiam cu dûm ah a cang ding ih,
Ram tihâl cu tihna ah a cang ding,
Cinghniapawl cēnnak, an bawhnak hmun ih hrampi cu câlterûl le phaipheng ah an cang ding.
8 Cu tawkah cun zinpi le lamzin a um ding ih,
Cumi cu Thianghlimnak Zinpi tiah an ko ding.
Mithiang lo cun cumi cu a zawh lo ding,
Asinan cucu mi dang hrangah a si ding.
Lamzin a zawhtu pauhpauh cu, mi-â an si hmanah,
Zinpêng an zawh lo ding.
9 Cu tawkah cun Kiosa an um lo ding ih,
Sahrang kohăm khal pakhat hman cu tawkah an so lo ding,
Cu tawkah hmuh an si lo ding.
Asinan tlen mipawl cu cu tawkah an tlanglêng ding.
10 Jehovah ih tlen mipawl cu an ra kirsal ding ih,
Hla sak phahin Zion ah an ra ding,
An lu parah catuan aipuannak a um ding.
Aipuannak le lungawinak an ngah ding ih,
Riahsiatnak le aihramnak cu an tlânhlo ding.

36

Sennakerib in Jerusalem a Hro

1 Cule Siangpahrang Hezekiah a lal a kum hleilitnak ah hitin a si, Assiria siangpahrang Sennakerib cu Judah-ih kulh nei khawpipawl hmuahhmuah do dingin a hung so ih a lâk hai. 2 Cun Assiria siangpahrang in Rabshakeh cu ralkap tampi thawn Lakish khua ihsin Jerusalem ih siangpahrang Hezekiah hnenah a thlah. Cule anih cu puan sawptuih ló zin ih um, tili sakta tikawng kiangah a ding. 3 Cule siangpahrang sungkua lakih hohatu Hilkiah fapa Eliakim, cangantu Shebna le Asaf fapa thuthang khumtu Joah te cu a hnenah an ra suak.

4 Cun Rabshakeh in an hnenah, «Hezekiah hnenah atu ah, ‹Siangpahrang ropi Assiria siangpahrang in hitin a ti: «Nan rinsan mi rinawknak hi ziang a si? 5 Doawknak hrangah ruahmannak le cahnak pawl na rel, cupawl cu ṭawngkam men lawng an si, ka ti. Atu ah hin zo so na rinsan ih keimah dokalhih na hél? 6 Zoh hnik! Hi a kiak mi câlte kianghrăwl, mi in a hngauhsan tikih a kut rak sun ih, rak tuahmawhtu Izip cu na rinsan. Izip siangpahrang Faro cu amah rinsantu hmuahhmuah parah cuvek a si. 7 «Asinan nannih in, ‹Jehovah kan Pathian kan rinsan,› tiah ka hnenah nan ti khal a si men thei. Hmun sângpawl le biakṭhengpawl băl ṭheh ih, Judah le Jerusalem hnenah, ‹Hi biakṭheng hmaiah Pathian nan be pei,› a titu cu Hezekiah a si lo maw?»

8 ‹Curuangah atu ah, ka lo dil a si, Assiria siangpahrang ka bawipa hnenah thukamnak pe awla, nangmah lamin an parih totu dingpawl na ret thei ding asile, ráng 2000 ka lo pe ding! 9 Ránglêngpawl le rángtothiampawl hrangah Izip rinsanin, ka bawipaih siahhlawhpawl lakih a tebikpawl lakih ralbawi pakhat hman ziangtin so na khir thei ding? 10 Atu hi Jehovah tel loin hi ram siatbăl dingah ka ra maw si? Jehovah in ka hnenah, «Hi ram dokalhin hung so awla, siatbăl aw,» in ti a si,› tiah a ti.

11 Cun Eliakim, Shebna le Joah tepawl in Rabshakeh hnenah, «Zangfahten na siahhlawhpawl hi Aramik ṭawng in in be aw, ziangahtile cucu kan theithiam ih, hruang parih um mipawl hnatheihah ^aJudah ṭawng in in be hlah,» tiah an ti.

36:11^a Judah ṭawng in: Hebru ṭawng a si.

12 Asinan Rabshakeh in, «Ka bawipa cun na bawipa hnen le na hnen lawngah hi ṭawngkampawl hi sim dingin in thlah maw si? Hruang parih topawl, nanmah thawi mai êk ei dingpawl le mai zin in dingpawl hnenah in thlah sawn a si lo maw?» tiah a ti.

13 Cun Rabshakeh cu a ding ih ^aJudah ṭawng in aw ring zetin a auh hai ih, «Siangpahrang ropi, Assiria siangpahrang ṭawngkampawl hi ngaithla uh! 14 Siangpahrang in hitin a ti: ‹Hezekiah in lo bum hlah seh, ziangahtile anih cun a lo runsuak thei lo ding, 15 Hezekiah in, «Jehovah in in runsuak tengteng ding, hi khawpi cu Assiria siangpahrang kut ah pek a si lo ding,» tiah tiin Jehovah lo rinsanter fawn hlah seh. 16–17 Hezekiah cu ngaihsak hlah uh, ziangahtile Asssiria siangpahrang in hitin a ti: laksawng hmangin keimah thawn remnak tuah uhla, ka hnenah ra suak uh, cule nan hnen ka rat ih nanmai ram bangtuk ram, thlairawl le sabitzu thar tamnak ram, sang le sabit hmuanpawl tamnak ram ih ka lo hruaihloh hlanlo mi kip in mai sabit hri ihta le mai theipi kung ihta nan ei fingfing ding ih, mi kip mai tikhur ih tidai nan in cio ding. 18 Fimkhur uh, culole, «Jehovah in in runsuak ding,» tiin Hezekiah in a lo lēmneh pang ding. Miphunpawlih pathianpawl lakih pakhat tal in Assiria siangpahrang kut ihsin an ram an runsuak dah maw si? 19 Hamath le Arpad pathianpawl kha khuiah so? Sefarvaim-ih pathianpawl kha teh khuiah so? Ka kut ihsin Samaria kha an rak runsuak maw? 20 Hi rampawlih pathianpawl hmuahhmuah lakin zopawl in so ka kut ihsin an rampawl rak runsuak? Cuti asile Jehovah in ka kut ihsin Jerusalem a runsuak thei ding maw si?› a ti,» tiah a ti.

36:13^a Judah ṭawng in: Câng 11 simfiangnak zoh aw.

21 Asinan annih cu daiten an um men ih kam khat hman an sâng lo, ziangahtile siangpahrang thupek cu, «Amah kha sâng hlah uh,» ti a si. 22 Cun siangpahrang sungkua hohatu Hilkiah fapa Eliakim, cangantu Shebna le Asaf fapa Joah, ngankhumtupawl cu an hnipuan thlekin Hezekiah hnenah an ra ih, Rabshakeh-ih ṭawngkampawl cu a hnenah an sim.

37

Hezekiah in Isaiah Thu a Ráwn

1 Cule hitin a si, siangpahrang Hezekiah in cuih thu a theih tikah, a hnipuan a thlek ih, buri-hnipuan a khuhaw ih, Jehovah inn ah a lut. 2 Cun anih in siangpahrang sungkua hohatu Eliakim, cangantu Shebna le puithiampawl lakih upapawl cu buri-hnipuan khuhawin Amoz fapa profet Isaiah hnenah a thlah hai. 3 Cule annih in a hnenah, «Hitin Hezekiah in a ti, ‹Tuihni cu buainak le kawkawknak le thangsiatawknak ni a si, ziangahtile naute suah a cu thlang, asinan sangsuak dingin tha a nei lo. 4 A nung mi Pathian simse dingih a bawipa Assiria siangpahrang in a thlah mi Rabshakeh ṭawngkampawl cu Jehovah na Pathian in a theih ka zum, cule Jehovah na Pathian in a theih mi ṭawngkampawl ruangah amah cu a kawk ding. Curuangah tān mi a tāngsŭnpawl hrangah thlacam aw,› » tiin.

5 Cun siangpahrang Hezekiah siahhlawhpawl cu Isaiah hnenah an feh. 6 Cule Isaiah in an hnenah, «Nan bawipa hnenah hitin nan sim pei, ‹Jehovah in, «Assiria siangpahrang siahhlawhpawlih in thangsiatnak na theih mi ṭawngkampawl kha ṭih hlah. 7 Ngai hnik, a parah thlarau pakhat ka ret ding ih, anih in thuthang a thei ding, cule amai ram ah a kir ding; cule amai ram ah ralnâm ih tlu dingin ka tuah ding,» a lo ti,› tiah nan ti pei,» tiah a ti hai.

8 Cun Assiria siangpahrang cu Lakish a suahsan zo ti Rabshakeh in a theih ruangah anih cu a tlungkir, cule siangpahrang in Libnah a rak do rero lai a va táwng. 9 Cule, «Nangmah lo do dingin a hung so,» tiin Kush siangpahrang Tirhakah thuhla a hnenah an sim ih, cuih thu a theih tikah, anih in Hezekiah hnenah palaipawl a thlah ih, 10 «Judah siangpahrang hnenah hitin nan sim pei, ‹Na rinsan mi na Pathian in, «Jerusalem cu Assiria siangpahrang kut ah pek a si lo ding,» tiin lo bum hlah seh. 11 Zoh hnik! Assiria siangpahrangpawl in siatbăl ṭheh verver ko ram hmuahhmuah parih an tuah mi cu na hna in na thei zo. Cuti a si ahcun nang cu runsuahin na um ding maw? 12 Miphunpawlih pathianpawl in ka pupápawlih an rak siatbăl mi, Gozan le Haran le Rezef le Telassar ih a um mi Eden-mipawl kha an rak runsuak dah maw? 13 Hamath siangpahrang, Arpad siangpahrang, Sefarvaim khawpi siangpahrang, Hena siangpahrang le Ivah siangpahrang kha khuiah so?› tiin nan va sim pei,» tiah a ti hai.

Hezekiah Thlacam

14 Cule Hezekiah in palaipawl kut ihsin cakuat cu a cohlang ih, a siar; cule Hezekiah cu Jehovah inn ah a so ih, Jehovah hmaiah cakuat cu a pharh. 15 Cun Hezekiah in Jehovah hnenah, 16 «Maw ralkap rualpawlih Jehovah, Israel Pathian, cherub karlakih a cêngtu, nangmah lawng hi leilung lalrampawl hmuahhmuah Pathian na si. Nang in lei le van na rak sersiam. 17 Maw Jehovah, na hna tháwng awla, rak ngai aw; Maw Jehovah, na mit meng awla, zoh hnik; a nung mi Pathian simse dingih a kuat mi Sennakerib-ih ṭawngkampawl hi ngaithla aw. 18 Maw Jehovah, Assiria siangpahrangpawl in miphunpawl hmuahhmuah le an rampawl cu an ṭhingter thluh ngaingai ih, 19 an pathianpawl cu meisa ah an urkāng, ziangahtile annih cu pathian taktak an si lo, milai kutsuak thing le lung an si sawn. Curuangah cupawl cu annih in an rak siatbăl ṭheh a si. 20 Curuangah atu ah, Maw Jehovah kan Pathian, leilung lalrampawl hmuahhmuah in nangmah lawng hi Jehovah na si ti an lo theihnak dingah amai kut ihsin in runsuak aw,» tiin thla a cam.

Sennakerib Tlûknak

21 Amoz fapa Isaiah in Hezekiah hnenah, «Israel-ih Pathian Jehovah in, ‹Assiria siangpahrang Sennakerib thuhla ah ka hnenih thla na cam ruangah, 22 hihi Jehovah in amah dokalhih a rel mi a kamsuakthu cu a si:

«Fala him, Zion fanu cun,
A lo nautat ih, hmuhsuamin a lo hnihsan;
Jerusalem fanu cun,
^aNa dung ihsin a lu a lo thĭn!
23 Zo so na simsiat ih na thangsiat?
Zo dokalhin saw na aw na suah ih
Na mit sâng ih na ngauhnawh?
Israel-ih Mi Thianghlim dokalhin a si lo maw?
24 Na siahhlawhpawl hmangin Bawipa rak simsia in,
‹Ka ránglêng tampi thawn
Tlang sângpi pi ah ka kai,
Lebanon tlangsannak bik ah cun;
A sidar thing sangpi pi le
A mirang far thing ṭhaṭhapawl ka hau ding;
A hmun sannak hlabik, a tupi ṭha ah cun ka lut ding.
25 Tikhur ka lai ih tidai ka in,
Cule ka ke zaphak in kilhimnak tivate hmuahhmuah ka kāngter ṭheh,› tiah na ti.
26 Hihi hna in na thei dah lo maw si?
Tuan le māng laiah cumi cu ka rak ruatfel zo,
Khuahlan ihsin cumi cu ka rak tum zo.
Kulhhnget nei khawpipawl siatbălin thil se penkhawm menih na canter dingah,
Atu ah cumi cu ka cangsuakter a si.
27 Curuangah an sungih cêngpawl in huham málte an nei;
Annih cu an thla a ṭem ih an ān a hai;
Annih cu hramlak hrampi le
Thlai hring vek an si,
A pitlin man hlanih ni in a emro mi inn luanglu rāwn parih hrampi vek an si.
28 Asinan na cēnnak hmun,
Na thil ti mi hmuahhmuah le,
Ka parih na thinsosatnak ka thei.
29 Ka parih na thinsosatnak le na vaivungawknak cu
Ka hna ih a hung thlen ruangah,
Ka sio cu na hnar ah ka thluah ding ih,
Ka kakharh cu na kâ ah,
Cule na ratnak zin in ka lo kirter ding,» tiin thu a cah.
30 Hihi na hrangah hminsinnak a si pei:
Tuih kum ah amah teih kho mi nan ei ding ih,
A kum hnihnak khal cumi ihsin a kho mi thotho nan ei ding;
A kum thumnak khalah thlairawl nan cîng ding ih nan at ding,
Sabit hmuanpawl nan tuah ding ih cupawlih rah nan ei ding.
31 Cule Judah sungza lakih a tlânsuak minung tāngsŭn cu
Hnuai lamih hramthla le
Tlun lamih rahsuahin an umsal ding.
32 Ziangahtile Jerusalem ihsin mitangsŭnpawl an feh ding ih,
A tlânsuak mipawl cu Zion Tlang ihsin.
Ralkap rualpawlih Jehovah-ih ṭhahnemngainak in himi hi a tuah ding a si.

37:22^a Na dung ihsin: Assiria a si.

33 «Curuangah Jehovah in Assiria siangpahrang thuhla ah:

‹Anih cu hi khawpi sungah a lut lo ding ih,
Cu tawkah thálfung khal a sai lo ding,
Khawpi hmaiah ralphaw keng khalin a ra fawn lo ding,
Khawpi kulhkhŭmnak lei sunpâwng khal a dâwl fawn lo ding.
34 A ratnak zin thothoin a tlungkir ding,
Cule anih cu hi khawpi sungah a lut lo ding,› Jehovah in a ti.
35 ‹Ziangahtile hi khawpi run dingin ka kilveng ding,
Keimah ruangah le ka siahhlawh David ruangah,›

tiah a ti,» tiin.

Sennekerib Thihnak

36 Jehovah-ih vancungmi a fehsuak ih, Assiria-mipawlih ṭanhmun khuarnak ah mi ting khat le thawng sawmriat le thawngnga a that hai; cule zingpit teih mi an hung thawh tikah, ngai hnik, mithi ruang hlir an rak si. 37 Cule Assiria siangpahrang Sennakerib cu a păwk ih, a fehhlo, inn ah a tlung ih, Nineveh ah a um lan ta. 38 Cule hitin a si, a pathian Nisrok inn ih pathian a biak laiah, amai fapa Adrammelek le Sharezer in amah cu ralnâm in an sahthluk; cule anmah cu Ararat ram ah an tlânhlo. Cun a aiah a fapa Esarhaddon a lal.

38

Hezekiah Natnak

1 Cuih cān ah Hezekiah cu thi ziktein a nâ. Cule Amoz fapa profet Isaiah a hnenah a va feh ih a hnenah, «Jehovah in, ‹Na innsang felten tawlrel aw, ziangahtile na thi ding ih na nung lo ding,› a lo ti a si,» tiah a ti.

2 Cun Hezekiah cu phăr lam a hawi ih, Jehovah hnenah thla a cam ih, 3 «Maw Jehovah, ka lo ngen a si, thungaithlak le rinumnak thinlung thawi na hmaika-ih ka nundān le na mithmuhih thil ṭha ka tuah mipawl kha cing hram aw,» tiah a ti. Cule Hezekiah cu nasazetin a ṭap.

4 Cule Isaiah hnenah Jehovah kamsuakthu a ra thleng ih, 5 «Feh awla Hezekiah hnenah, ‹Na pa David Pathian, Jehovah in hitin a ti: «Na thlacam ka thei, na mitthli ka hmu; ngai hnik, na dam kum cu kum hleinga ka lo bêt ding. 6 Nangmah le hi khawpi hi Assiria siangpahrang kut ihsin ka lo runsuak ding ih, hi khawpi hi ka kilveng ding,» a ti,› tiah sim aw.

7 «Cule Jehovah in a rel zo mi hi thil hi a tuah tengteng ding a si ti lăngternak ah himi hi Jehovah hnen ihsin hminsinnak a si: 8 ngai hnik, Ahaz-ih ni hmangih tikcu tahnak parih ni thlahlim a sukthla zo mi khi, kal hra ka kirtersal ding,» tiah a ti. Cutin ni cu ni hmangih tikcu tahnak parih a liam zo hnu kal hra a kirsal.

9 Himi hi Judah siangpahrang Hezekiah in a damlonak ihsin a damsal hnuih a ngan mi a si:

10 Kei in, «Ka vanglai cān ah
Sheol kăwtka ka lut ding;
A tāng lai mi ka dam kumpawl cu ka hloh a si hi,» tiah ka ti.
11 Kei in, «YAH, Jehovah cu a nungdam mipawlih ram ah ka hmu nawn lo ding a si hi;
Leitlun luahtupawl lakah milai ka hmu nawn lo ding.
12 Tuukhāltuih deuthlam bangin ka cēnnak cu phelh a si;
Puantahtu bangin ka nunnak cu ka zual.
Anih in thiambu ihsin i sattán;
Nang in khawvan ihsin khawthim hlan menah i cemter a si hi.
13 Zing a si hlanlo khua ka ruat,
Kiosa bangtukin anih in ka ruhpawl hmuahhmuah a khiak ṭheh;
Khawvan ihsin khawthim hlan menah i cemter riai.
14 Vaca simaw, peleng simaw bangin ka au ruri;
Thuro bangin ka ai;
Tlun lam ka zohnak ah ka mit a khâm.
Maw Jehovah, palbĕtin ka um;
Ka hrangah ṭuanvo la hram aw!
15 Ziangso ka sim ding?
Anih cun in bia ih,
Amah lala in cumi cu a rak tuah.
Ka nunnak ih harsatnak ruangah ka damsung nuamnaiteten ka tlanglêng ding.
16 Maw Bawipa, milaipawl cu hi thilpawl ruangah an nung;
Cule hi thilpawl ruangah nunnak ka nei;
Cutin nang in in damtersal ih in nungter.
17 Ngai hnik, ka ṭhatnak dingah
Harsatnak nasa lutuk ka rak táwng;
Asinan nang in duhdawt zetin siatralnak khur ihsin ka nunnak na runsuak,
Ziangahtile ka sualpawl hmuahhmuah na dung lamah na rak hlăwn.
18 Ziangahtile Sheol cun lungawi thu a lo sim thei lo,
Thihnak cun a lo thangṭhat thei lo;
Khur sungih a suktupawl cun na thutak an beisei thei lo.
19 A nung mi, a nung mi milai, anih in a lo thangṭhat ding,
Tuihni ih ka tuah vekin;
Pa in a fātepawl na thutak a theihter hai ding.
20 Jehovah in i runsuak cing ding;
Curuangah ka hlapawl hi hri nei tum mipawl thawn Jehovah inn ah
Kan damsung hmuahhmuah in kan sak ding,» tiah ka ti.

21 Cule Isaiah in, «Theipi rah hmeh mi hlawm khat lâk uhla, a hmasia parah bĕn uh, cule anih cu a dam ding,» tiah a ti.

22 Cule Hezekiah in, «Jehovah inn ah ka so ding ti theihnak ding hminsinnak cu ziang bik so,» tiah a rak ti.

39

Babilon Palaipawl

1 Cuih cān ah Baladan fapa, Babilon siangpahrang Merodak-Baladan in cakuatpawl le laksawng cu Hezekiah hnenah a rak kuat, ziangahtile anih cu a na ih a damsal zo ti thu a thei. 2 Cule Hezekiah cu an parah a lung a hmui ih, a hlawnthil retnak inn ihta, sui le ngun, rimhmui le hnih mi hriak mankhung le a ralthuam hmuahhmuah, a hlawnthil retnak ih um hmuahhmuah cu a hmuh ṭheh hai. Hezekiah in an hnenih a hmuh hai lo mi a inn sungah siseh, a uknak ram hmuahhmuah ah siseh pakhat hman a um lo.

3 Cun profet Isaiah cu Siangpahrang Hezekiah hnenah a feh ih a hnenah, «Hi milaipawl hin ziangso an rel ih khui ihsin so na hnenih an rat?» tiah a ti.

Cule Hezekiah in, «Ram hlapi Babilon ihsin ka hnenah an ra,» tiah a ti.

4 Cule anih in, «Na inn ah ziangso an hmuh?» tiah a ti.

Cule Hezekiah in, «Ka inn sungih um mi hmuahhmuah an hmu ṭheh; ka hlawnthil retnak innpawl ah anmah ka zohter lo mi pakhat hman a um lo,» tiah a sâng.

5 Cun Isaiah in Hezekiah hnenah, «Ralkap rualpawlih Jehovah kamsuakthu hi rak ngai aw: 6 ‹Ngai hnik, na inn sungih a um mi hmuahhmuah le na pupápawl in tuihni tiangih an rak khawl mipawl hmuahhmuah, Babilon ih an thiar thluh ding cān a ra thleng ding; zianghman tān mi an nei lo ding,› tiah Jehovah in a ti. 7 ‹Cule annih in na hrin ding mi, nangmai tesinfa a si ding mi na fapapawl lakih mi hrekkhat an hruaihlo ding; cule annih cu Babilon siangpahrang inn ih tlangsuak upa an si ding,› a ti,» tiah a ti.

8 Cule Hezekiah in Isaiah hnenah, «Na rel mi Jehovah kamsuakthu cu a ṭha e,» tiah a ti. Ziangahtile anih in, «Ka san sungah daihnak le thutak a um tâk ah,» tiin a ruat.

40

Pathian Mipawl Hnĕm an Si

1 «Thlangam uh, a si, ka mipawl thlangam uh,» nan Pathian in a ti.
2 «^aDuat takin Jerusalem hnenah thusim uhla,
A raldonak cu a cem,
A mawhsualnak ngaithiam a si, tiah ausuak uh;
Ziangahtile a sualpawl hmuahhmuah hrangah alet in Jehovah kut ihsin anih cun a rak tuar,» tiin.
3 Ramṭhing ih mi pakhat auaw cun:
«Jehovah-ih lamzin sial uh;
Kan Pathian hrangah nelrawn ah zinpi dĭngter uh.
4 A kuarnak kip kha silhkhat uhla,
Tlang le mual kip in rāwnter uh;
Hmun rual lo pawl rualter uhla,
Hmun bingbopawl tlămter uh.
5 Jehovah ropitnak a lang ding ih,
Titsa hmuahhmuah in cumi cu an hmutlang ding;
Ziangahtile Jehovah kâ in a rak rel zo,» tiin.
6 Aw in, «Au aw!» tiah a ti.
Cule anih in, «Ziang so ka au ding?» tiah a ti.
«Titsa hmuahhmuah hi hrampi an si ih,
An mawinak hmuahhmuah hi ramlak pangpar bangtuk an si.
7 Hrampi a vuai, pangpar a ziam,
Ziangruangahtile Jehovah thaw cu a parah a hrang;
Thungaiten minungpawl cu hrampi an si.
8 Hrampi a vuai, pangpar a ziam,
Asinan kan Pathian kamsuakthu cu kumkhuain a hmun,» tiin.
9 Nang thuthangṭha kengtu, Maw Zion,
Tlang sâng ah khin kaiso hnik;
Nang thuthangṭha kengtu, Maw Jerusalem,
Na aw ringpin suah hnik,
Ṭih hlah, na aw suah ko;
Judah khawpipawl hnenah, «Zoh hnik uh, nan Pathian!» tiah sim uh.
10 Ngai hnik, Bawipa Jehovah cu kut cak tak thawn a ra ding ih,
A bân in amai hrangah a uk ding;
Ngai hnik a lawmman cu a hnenah a um ih,
A hnaṭuan cu a hmaiah a um.
11 Tuukhāltu bangin a rante rual a khāl ding;
Tuufa nopawl cu a bân in a fĭnkhawm hai ding ih,
A ṭāng sungah a thiar hai ding,
Cule a notepawl cu dimdawih zetin a hruai hai ding.
12 Zo in so tipi cu a kut zaphak ih tah um dah,
Zo in so van cu khâp in a tah dah ih,
Leilung leivut cu zo in so a tah dah?
Zo in so tlangpawl cu khīngkhainak ih tah ih,
Tlangmualpawl cu cuaithlainak thawi a tah dah?
13 Zo in so Jehovah Thlarau hnenih thupe,
Asilole amai thurawn vekih amah zirh dah?
14 Zo hnenah so thurawnpek a lâk ih,
Zo in so amah thu rak pe dah ih,
Diknak zin ih amah zirh dah?
Zo in so theihnak amah zirh ih,
Theihthiamnak zin amah khihhmuh dah?
15 Ngai hnik, miphun hmuahhmuah cu ṭin sungih tidai fawr khat vek an si ih,
Khīngkhainak parah leivut fáng khat vek fangih siar an si;
Zoh hnik, anih cun tikulhpawl cu thil fate zet vekin a khai men.
16 Cule Lebanon cu ur dingah a daih tawk lo,
A ramsapawl khal Meiur Thilhlăn dingah a daihtawk fawn lo.
17 A hmaiah cun miphun hmuahhmuah hi zianghmanlo men an si ih,
Annih cu zianghmanlo menah le thulolak menah a ruat hai.
18 Pathian cu zo thawn so nan tahṭhim ding?
Asilole amah cu ziang lem thawn so nan khaikhin ding?
19 Sodengpa in milim a ser,
Sui ertu cun a parah suiti a khût ih,
Ngun ertu in cikcinṭhi a tuahsak.
20 Nunhar tuk ruangih cuvek thawhhlawm thawh thei ve lo tu cun
Răwp thei lo zanthing a hril;
A derdai lo ding mi khercawp milim tuahsak dingin
Amai hrangah kutthemthiam a hawl.
21 Nan thinlung in nan thei dah lo maw si?
Nan hna in nan thei dah lo maw si?
A tir ihsin rak sim zo nan si lo maw si?
Leilung sersiam thăwk ihsi khan nan rak theithiam zo lo maw si?
22 Anih cu leilung kualpûm tlunih totu kha a si,
Cumi luahtupawl cu kharbawk bangtuk an si,
Vanpawl kha puanzar bangtukin a zar ih,
Cēnnak ding puanthlam bangtukin a pharh.
23 Anih cun uktupawl cu zianghmanlo ah a canter;
Leilung thuṭhentupawl cu hmantlaklo ah a tuah hai.
24 Harsa zetih phun an si ding,
Harsa zetih tuh an si ding,
Harsa zetin an kungpi in leilung sungah hram a thla ding,
Anih in anmah a sēm tikah,
An vuai ding ih
Phusîng in cangpâwl bangin a cawihlo hai ding.
25 «Zo vek thaw in so in tahṭhim ding,
Asilole zo vek thaw in so in tlukawkter ding?» Mi Thianghlim in a ti.
26 Van tau uhla, zoh uh,
Zo in hi thilpawl a rak sersiam,
Zo in so arsipawl pakhat te ten a hruaisuak ih,
An zaten an hmin ih ko?
A cahnak nasatak le
A thiltitheinak thazang ruangah,
Mi pakhat hman an hlo lo.
27 Ziangahso, Maw Jakob, hitiih na ti,
Maw Israel, ziangahso hitiih na ṭawng:
«Ka lamzin cu Jehovah hnen ihsin thuh a si ih,
Ka covo thuṭhennak dik hi ziangahso ka Pathian in a ngaihsak lo,» tiin?
28 Nan thinlung in nan rak thei lo maw si?
Nan hna in nan rak thei lo maw si?
Catuan Pathian, Jehovah,
Leilung dĕng tiangih sersiamtu cu,
A hnang dah lo ih a cau dah fawn lo ti mi hi,
A thil theihthiamzia cu hmuhsuah ding rual a si lo.
29 Anih in a hnang mipawl hnenah thiltitheinak a pe ih,
Cahnak a nei lo mipawl hnenah an cahnak a ṭhangter.
30 Minopawl hnangin cau hman hai sehla,
Tlangvalpawl tlu thlepthlep hman hai sehla,
31 Jehovah beiseitupawl cu
Thazang thar an ngah ding;
Muvanlai bangin thla in an zamso ding,
An tlân ding ih an cau lo ding,
An feh ding ih an hnang lo ding.

40:2^a Duat takin: A ṭawng hrampi ah cun, «thinlung ah» ti a si.

41

Ṭih Hlah, Ka Lo Umpi

1 «Ka hmaiah daiten um uh, Maw tipi kap tluanpawl,
Cule miphunpawl cu an thazang tharter hai seh!
Ra nâi hai sehla, ṭawng hai seh;
Thuṭhennak hrangah va naih tlangkhawm uhsi.
2 «Zo in so nisuahnak lam ihsi mi pakhat cawktho?
Zo in so dingfelnak in amah cu a ke hramah a ko?
Anih cun a hmaika-ah miphunpawl cu a hruaisuak ih,
Siangpahrangpawl a duaiter.
Anih cun a ralnâm hmangin anmah cu leivut vekin le,
A thál hmangin cangpâwl thli ih a semhloh vekin a tuah.
3 Anih cun a ke ih a feh dah lonak zin in anmah a dawi ih, himten a lan hai.
4 Zo in so a tir ihsin cithlahsâwng hmuahhmuah koin, tuahsuak ih tisuak?
Kei, Jehovah cu a hmaisabik le,
A netabik umpitu amah cu ka si.»
5 Tipi kap tluanpawl in cumi cu an hmu ih an ṭih,
Leilung dĕngpawl an thin a phâng;
An ra nâi ih an ra.
6 «Cak zetin um aw!» tiah mi kip in anmai innhnen an bawm ih,
An unau hnenah an sim!
7 Cun an thil car cu, «A ṭha e,» tiin zungthiampa in thirsertu thazang a pe,
Sobul ih a thil sutupa in dolung dengtu a lawm;
Cun derdai lo dingin,
Kilhnakpawl in cumi cu a hngetter.
8 «Asinan ka rual Abraham-ih tesinfapawl,
Nang, Israel ka siahhlawh,
Ka hril mi Jakob,
9 Nang cu leilung dĕng ihsin ka lo laksuah mi na si ih,
Hmun hlatnakbik ihsin ka lo kawh mi na si,
Cule na hnenah,
‹Nang hi ka siahhlawh na si,
Ka rak lo hril ih ka lo hlăwn lo,
10 Ṭih hlah, ziangahtile na hnenah ka um;
Na thinphâng hlah, ziangahtile keimah cu na Pathian ka si.
Ka lo cakter ding,
A si, ka lo bawm ding,
Ka dingfelnak vawrh lam kut in ka lo kaibĕt ding,› tiah ka lo ti.
11 Ngai hnik, nangmah lo thinhengtertu hmuahhmuah cu
An ning a zak ding ih an mualpho ding;
Cule nangmah a lo dotupawl cu zianghmanlo ah an cang ding ih, an hlorál ding.
12 Nangmah a lo beitu cu,
Na hawl hai ding ih na hmu hai lo ding.
Nangmah a lo dotupawl cu,
Thil um lo mi vekin,
Zianghmanlo ah an cang ding.
13 Ziangahtile kei, Jehovah na Pathian in na kut vawrh lam ka kai.
‹Ṭih hlah, ka lo bawm ding,› titu cu keimah ka si.
14 «Ṭih hlah, nang pangāng Jakob,
Nannih Israel mipapawl!
Ka lo bawm ding,» Jehovah in a ti.
Nanmah tlentu cu Israel-ih Mi Thianghlim a si.
15 «Ngai hnik, hahriam nei thlairawl vuaknak thar ah ka lo tuah,
Tlangpawl na cīl pei ih na vaw te ṭheh ding ih,
Tlangmualpawl cu fānghi bangtukah na tuah ding.
16 Annih cu na theh hai ding ih, thli in a hranhlo hai ding,
Cule phusîng in a darhter hai ding;
Sikhalsehla nang cu Jehovah ah na ai a puang ding ih,
Israel-ih Mi Thianghlim ah tluang na khawng ding.
17 «Mifarahpawl le mitlasampawl in tidai an hawl, asinan a um lo,
An lei cu tihâlin a ro ding.
Kei, Jehovah in annih cu ka sâng hai ding;
Kei, Israel Pathian in ka thlauthla hai lo ding.
18 Hmun sâng kawlh ah tivapawl ka luangsuakter ding,
Phaikuampawl laiah tihnapawl ka pûtter ding,
Ramṭhing cu tili ah le,
Ramcar cu tihna ah ka tuah ding.
19 Ramṭhing ah sidar le akasia thing,
Hadas le hriak thing ka phun ding,
Nelrawn ah mirang far thing le far thing le ^atidhar thing pawl ka khotlangter hai ding,
20 Cutin hihi Jehovah kut in a rak tuah ih,
Israel-ih Mi Thianghlim in a rak sersiam ti an hmu ding ih an thei ding,
Cule an ngaihtuah ding ih an theithiamtlang ding.

41:19^a tidhar: Thingkung fate a si, a hnah a bŭk ih a hring ringring. Lebanon tlang ah a kho.

Milem Santlaihlonak

21 «Nan thuhla run thlĕn uh,» Jehovah in a ti.
«Nan thiamthu rak suahpi uh,» Jakob-ih Siangpahrang in a ti.
22 «Rak suahpi hai sehla, thil cang ding mi in hmuh hai seh;
Kan ruah thiamtheinak dingah le,
Lehhnu ih an netnak ding kan theih theinak dingah,
Hi hlan thilpawl kha ziang an si ti in hmuh hai seh,
Asilole a ra lai ding thilpawl kan hnenah in thăn hai seh.
23 Nannih cu pathian nan si ti kan theih theinak dingah,
Tuih hnuih a ra thleng ding mi thilpawl in hmuh uh,
Kan thin a phâng ding ih, kan ṭih theinak dingah,
A si, thil ṭha simaw, thil ṭhalo simaw tuah uh.
24 Ngai hnik uh, nannih cu zianghmanlo men nan si ih,
Nan hnaṭuan mi khal zianghmanlo a si;
A lo hriltu cu fihnungza a si.
25 «Sak lam ihsin mi pakhat ka cawktho ih,
Anih cu a ra ding,
Ni a suah ihsin ka hmin a ko ding;
Cule lung rialdip mi cīl vekin le,
Beltuahtu in tlak a cīl bangin,
Uktupawl tlunah a ra ding.
26 Kan theih theinak dingah, zo in so a tir ihsin a rak thăn?
Cule ‹Anih cu midingfel a si,› kan ti theinak dingah a hlan cānpawl kha zo in so a thăn?
Thungaiten a hmuhtu zohman an um lo,
Thungaiten a thăntu zohman an um lo,
Thungaiten na ṭawngkampawl a theitu zohman an um lo.
27 Zion hnenah, ‹Zoh hnik, annihpawl khi!› tiah ka ti hmaisa ding ih,
Jerusalem hnenah thuthangṭha kengtu pakhat ka pe ding.
28 Cule ka zoh ih, mi zohman an um lo;
An lak ka zoh ih, asinan thurawnpetu an um lo,
Zo so a si tiih ka suh tikah an lakah kam khat hman in sâng theitu an um lo.
29 Ngai hnik, an zaten misantlailo hlir an si,
An hnaṭuan mipawl cu zianghmanlo men an si,
An burcawp milimpawl cu thli le hnăwkhnainak men an si.

42

Jehovah Siahhlawh

1 «Ngai hnik! Ka kaihhnget mi ka siahhlawh,
Ka hril mi, a parih ka lungsinak um mi!
A parah ka Thlarau ka ret;
Anih in miphunpawl hnenah diknak a thlĕn ding.
2 Anih cu a ausuak lo ding ih, a aw khal a suah fawn lo ding,
Lamzin ih theih dingin a aw a suah fawn lo ding.
3 Câlte kiak mi hman anih in a tán lo ding ih,
Meica thi zikte a mitter lo ding;
Thutak hrangah diknak a keng ding.
4 Leilung tlunah diknak a dĭnsuak hlanlo,
A cau lo ding ih, a tha khal a ṭum lo ding,
Cule tipi kap tluan in a dān an hngak ding,» tiin.
5 Jehovah Pathian,
Vanpawl sersiamtu le kaipharhtu,
Leilung le a sung ihsi suak pharhtu,
A parih um minungpawl hnenih thaw petu le,
A parih a tlanglêngtupawl hnenih thlarau a petu cun hitin a ti:
6 «Kei, Jehovah in dingfelnak in ka lo ko,
Na kut ka lo kai ding ih,
Ka lo humhim ding.
Minungpawl hrangih thukham dingah le,
Miphunpawl hrangih tleu si dingah ka lo ruat ding.
7 Mitcawpawl mitvângtertu dingah,
Thawnginn ihsin thawngtlapawl suaktertu dingah le,
Thawnginn thim sungih a to mipawl suahtu dingah a si.
8 Keimah cu Jehovah ka si, cumi cu ka hmin a si,
Cule ka ropitnak cu mi dang ka pe lo ding,
Thangṭhat mi ka sinak khal sercawp milimpawl hnenah ka pe fawn lo ding.
9 Ngai hnik, thil hmaisa cu an rak cang zo ih,
Thil tharpawl ka thăn;
An cerhno hlanah an thuhla ka lo sim a si,» tiin.

Jehovah Thangṭhatnak

10 Jehovah hnenah hla thar sa uhla,
Amah thangṭhatnak cu leilung dĕngpawl ihsin sak uh,
Nannih tifinriat sungih a luttupawl le a sungih um hmuahhmuah tla,
Nannih tipi kap tluanpawl le nannih cutawk ih a cêngtupawl tla!
11 Ramṭhing le a khawpipawl in an aw suah hai seh,
Kedar-mipawl umnak khawtepawl tla in.
Sela luahtupawl in hla sak hai seh,
Tlang zimpawl ihsin au hai seh.
12 Jehovah hnenah sunlawinak pe hai sehla,
Tipi kap tluanpawl ah a thangṭhatnak thăn hai seh.
13 Jehovah cu micakpa bangtukin a păwksuak ding,
A ṭhahnemngainak cu ral do mi bangin a căwktho ding.
A ausuak ding, a si, ringpin a au ding;
A ralpawl cu a neh hai ding.

Jehovah Băwmnak

14 «Cān reipi daiten ka rak um,
Ka um menmen ih ka rak sūpaw.
Atu cun nunau fahrinnat tuar bangin ka au ding,
Hmakhatteah ka thaw hluthlo ding ih ka thaw hutho ding.
15 Tlangpawl le tlangmualpawl cu ka ṭhingter hai ding ih,
Cutawk ih thilṭo hmuahhmuah ka roter ding;
Tivapipawl cu tipi kap tluanpawl ah ka tuah ding ih,
Tilipawl ka kāngter ding.
16 Mitcawpawl cu an theih lo mi lamzin in ka hruai hai ding,
An rak theih dah lo mi zinpawl ah ka hruai hai ding.
An hmaiah thim cu tleu ah ka cangter ding ih,
Hmun bingbopawl ka rualter ding.
Hi thilpawl hi an hrangah ka tuah ding ih,
Anmah cu ka thlauthla hai lo ding.
17 Khercawp milimpawl rinsan ih,
‹Nannih cu kan pathian nan si,› tiih
Burcawp milimpawl hnenih a titupawl cu
Kirter an si ding ih, nasazetin ningzahter an si ding.
18 Nannih hnasetpawl, ngai uh;
Nannih mitcawpawl, nan hmuh theinak dingah zoh uh.
19 Ka siahhlawh dah ti lo zo so mitcaw um,
Asilole ka thlah mi ka palai vekih hnaset zo so um?
Keimah thawi remawpa vekih mitcaw le,
Jehovah siahhlawh vekih mitcaw zo so um?
20 Thil tampi hmu cing siin, na ngaihsak lo;
Hnavâng cingin, a hna in a thei lo,» tiin.

Israel-ih Thulunlonak

21 Jehovah cu amai dingfelnak ruangah a lung a hmui tuk;
Anih in dān a khaisâng pei ih upattlakah a tuah ding.
22 Asinan himi cu suam le răm tuar miphun a si,
An zaten kua sungpawl ah kaih an si ih,
Thawng innpawl ah thuh an si;
Annih cu runsuaktu nei lo deh ding mi sa ah le,
«Pekir uh,» titu nei lo rallâksum ah an cang.
23 Nan lakah zo in so himi lamih hna tŭn ding?
Zo in so ngaithla in cān ra lai ding hna ih thei ding?
24 Zo in so Jakob cu rallâksum dingah le,
Israel cu misuamtupawl hnenah a pe ding?
A lakih thilsual kan tuahnak pa,
Jehovah kha a si lo maw?
Ziangahtile annih in a lamzin an zawh duh lo ih,
A dān khal an thlun duh fawn lo.
25 Curuangah anih in a thinsosatnak nasatak le,
Doawknak rapthlak tak cu a parah a burh;
A kimvel hmuahhmuah cu mei in a ur,
Cucingin anih in a thei cuang lo;
Amah cu a kāng nân,
A thinlung ah a lalut cuang lo.

43

Israel Runsuaktu Umsŭn

1 Asinan atu ah, Maw Jakob, nangmah lo sersiamtu le,
Maw Israel nangmah a lo dĭnsuaktu Jehovah in hitin a ti:
«Ṭih hlah, ziangahtile ka lo tlen zo;
Na hmin in ka lo ko zo;
Nang cu keimai ta na si.
2 Tipi na tan tikah, ka lo umpi ding ih;
Tivapipawl na tan tikah an lo cîmpil lo ding.
Meisa na zawhtlăng tikah, na kāng lo ding ih,
A alh khal in a lo em-ut lo ding.
3 Ziangahtile keimah cu Jehovah na Pathian ka si,
Israel-ih Mi Thianghlim, na Runsuaktu ka si,
Nangmah tlennak ah Izip,
Na aiah Kush le Seba ka pe.
4 Nang cu ka mithmuhah na sunglawi tuk,
Cawimawi na rak si ih,
Ka rak lo duhdawt;
Curuangah na aiah mi dang,
Na nunnak aiah miphunpawl ka pe ding.
5 Ṭih hlah, ziangahtile ka lo umpi a si;
Nisuahnak lam ihsin na tesinfapawl ka hruai ding ih,
Nitlaknak lam ihsin ka lo fĭnkhawm ding,
6 Sak lam hnenah, ‹Thlah hai aw!› ka ti ding ih,
Thlang lam hnenah, ‹Kaitâng hai hlah!› ka ti ding.
Hmun hlapi ihsin ka fapapawl rak hruai uhla,
Leilung dĕngpawl ihsin ka fanupawl rak hruai hai uh, ka ti ding.
7 Ka hmin ih kawh mi pauhpauh,
Ka sunlawinak ding hrangih ka rak sersiam mi,
Ka rak dĭnsuah mi, ka rak tuah mi rori cu,» tiin.
8 Mit nei si mitcawpawl le hna nei si hnasetpawl cu rak hruaisuak uh.
9 Miphun hmuahhmuah cu fĭnkhawm aw hai sehla,
Minungpawl cu pungkhawm hai seh.
An lakah zo so himi a thăn thei um ih,
Hi hlan thilpawl in hmuh theitu um?
Thiam an co theinak dingah, an thutheihpitupawl cu rak hruai hai seh;
Asilole an hna in thei hai sehla, «Cumi cu thudik a si,» ti hai seh.
10 «Nannih cu ka thutheihpitu nan si,» tiah Jehovah in a ti ih,
«Keimah in thei ih in zum theinak ding le,
Amah cu ka si ti in theihthiam theinak dingah,
Ka hril mi ka siahhlawh na si.
Ka hlanah Pathian pakhat hman dĭnsuah an si lo ih,
Ka hnu khalah dĭnsuah an si lo ding.
11 Kei, keimah rori hi Jehovah cu ka si ih,
Keimah siarlo runsuaktu an um lo.
12 Keimah in ka thăn zo ih ka run zo,
Ka phuangsuak zo ih,
Nan lakah ram dang Pathian pakhat hman an um lo;
Curuangah nannih cu Pathian ka si ti ka thutheihpitu nan si,» Jehovah in a ti.
13 «A si, nithla a um hlan ihsin, keimah cu amah ka si;
Cule ka kut ihsin mi a runsuak theitu zohman an um lo,
Ka thil tuah zo mi cu, zo in a zûkkir pei?» tiah a ti.

Pathian Zahngainak le Israel Rinumlonak

14 Jehovah, nangmah tlentu, Israel-ih
Mi Thianghlim in hitin a ti:
«Nanmai ruangah Babilon ah mi ka thlah ding ih,
Kaldia-mipawl cu an aipuannak lăwngpawl sungah,
Raltlân dinhmun in ka hruaithla hai ding.
15 Keimah cu Jehovah, nan Mi Thianghlim, Israel Sersiamtu, nan siangpahrang ka si,» tiin.
16 Tifinriat ih lamzin tuahtu le,
Tipi cak zet pahtlăngih zin tuahtu,
17 Lêng le ráng,
Ralkap le miralṭha hruaitu Jehovah in hitin a ti
(An tlu ding ih, an thosal nawn lo ding;
Meica vekih mihter an si ih, an cimit ṭheh):
18 «A hlan thilpawl cîng ringring hlah awla,
Hlanlai thilpawl ngaihtuah fawn hlah.
19 Ngai hnik, thil thar ka tuah ding,
Atu ah cumi cu a cerhsuak ding;
Cumi cu thei loin maw na um ding?
Ramṭhing ah lamzin le
Nelrawn ah tivapipawl tiangin ka tuah ding.
20 Ramsapawl in in cawimawi ding,
Cinghniapawl le kalauk vâtepawl in,
Ziangruangahtile ka hril mi, ka mipawl inter dingah,
Ramṭhing ah tidai le
Nelrawn ah tivapipawl ka pek hai.
21 Hi minungpawl cu keimai hrang rori ih ka rak dĭnsuak mi an si;
Annih in keimah thangṭhatnak an thăn ding.

Rinumlo Israel Ngĕnnak

22 «Asinan Maw Jakob, nannih in keimah in rak ko lo;
Maw Israel, nannih in keimah in ning a si.
23 Nang cun na Meiur Thilhlănpawl hrangah tuu i rak kĕn dah lo,
Nang cun na raithawinakpawl khalin in cawimawi dah fawn lo.
Thlairawl Thilhlănpawl thawn in rian dingin ka lo fial dah lo ih,
Rimthaw thawinak thaw khalin ka lo bāngter dah fawn lo.
24 Paisa in kane thlum i leih dah lo ih,
Na raithawinak thaupawl khalin i tláiter dah fawn lo;
Cuhnakin na sualpawl in in phurritter sawn ih,
Na mawhsualnakpawl in in bāngter.
25 «Kei, keimah rori hi, keimai zarah na dānpahbălnakpawl thaihlo ṭhehtu ka si ih,
Na sualpawl cu ka cîng lo ding.
26 I mángsuakter aw;
El aw hnik uhsi;
Thiam na co theinak dingah na thuhla hun rel hnik.
27 A hmaisabik na pa in thilsual a rak tuah ih,
Na palaipawl cu keimah dokalhin sual an rak tuah.
28 Curuangah hmun thianghlim mipawimawhpawl cu ka bawrhhlawhter hai ding;
Jakob cu camsiat mi ah ka pe ding ih,
Israel cu zăwkzet bawr ah.

44

Pathian in Israel a Hril

1 «Sikhalsehla atu ah, Maw ka siahhlawh Jakob,
Ka hril mi Israel i ngaithla aw.
2 A lo tuahtu le sūl ihsin a lo dĭnsuaktu, nangmah lo bawmtu ding Jehovah in hitin a ti:
‹Maw ka siahhlawh Jakob le,
Ka hril mi, nang, Jeshurun ṭih hlah.
3 Ziangahtile ram tihâl parah tidai ka tawih ding ih,
Leicar parah ti ka likter ding;
Nan tesinfapawl parah ka Thlarau ka burh ding ih,
Nan tefapawl parah ka malsawm ka burh ding;
4 Annih cu hrampi lakah an kho ding
Tikăwng kapih partiam bangin,› tiin.
5 Mi pakhat in, ‹Keimah cu Jehovah ta ka si,› a ti ding;
Mi dang in Jakob hmin kengtu ah a bunaw ding;
Mi dangin, ‹Jehovah-ih ta,› tiin a kut in a ngan ding ih,
Israel hmin a bunaw ding.

Pathian dang a Um Lo

6 Jehovah, Israel Siangpahrang le
Amah tlentu, ralkap rualpawlih Jehovah in hitin a ti:
‹Keimah cu a hmaisabik ka si ih keimah cu a netabik ka si;
Keimah siarlo Pathian an um lo.
7 Cule zo so keimah vek um?
Phuang sehla thăn seh.
Khuahlan mipawl ka rak ruat ihsi thăwkin,
Anih in cumi cu a sangsángten thăn seh.
Cule a cang rero lai mi le a cang leh lai ding mi thilpawl cu an hnenah hmuh hnik hai seh.
8 Ṭih hlah uh, nan thin khal phâng fawn hlah uh;
Cu lai ihsin ka lo sim cia ih ka lo thăn cia a si lo maw?
Nannih cu ka thutheihpitu nan si.
Keimah hleiah Pathian dang an um maw?
A si, Lungpi dang pakhat hman an um lo;
Pakhat hman ka thei lo,› a ti,» tiin.

Milem Biaknak cu Atthlak a Si

9 Milim a tuahtupawl cu, an zaten hmantlaklo an si ih,
An thil hlúpawl cu ṭhathnemnak an nei lo ding.
Ningzahter an sinak dingah,
An thutheihpitupawl cun an hmu thei lo ih, a theih khal an thei lo.
10 Ṭhathnemnak nei lo pathian a tuahtu le milim a burtu cu zo a si?
11 Ngai hnik a hawipi hmuahhmuah cu an ning a zak ding ih,
Kutthiam neipawl cu milai men an si.
An zaten pungkhawm aw hai seh,
Ding hai seh;
Cuticingkhalin an ṭih ding,
Ningzak ko tuahtlang an si ding.
12 Sodengpa in a hmanrua thawn meiling ah thil pakhat a ser,
Cumi cu sobul in a su ih, a bân tha in a ṭuan.
Cule anih cu a ril a râwng ih, a tha a cem;
Tidai a in lo ih a cau.
13 Zungthiampa in a hri a dir,
Cafung in cumi cu a hminsin;
Cumi cu zipaw in a năwr,
Rinkualnak in a hminsin ih,
Milai pianhmang bangtukin a tuah,
Inn ih ret theih dingin milai mawinak neiin a tuah.
14 Amai hrangah sidar thingpawl a hau ih,
Mirang far thing le elon thingkung a la;
Tupi thingrûl lakah cumi cu amai hrangah a humhimbĕt.
Far kung a phun ih ruahpi in a câwm.
15 Cun cumi cu mi pakhat in meisa tihnak ah a hmang,
Anih in a hrekkhat a la ih a ai;
A si, mei a muah ih sang a em;
A si, pathian a tuah ih cucu a bia;
Milim khercawp a tuah ih băwkkhupin a bia.
16 A hrek cu meisa ah a tik;
Cuih a hrek cun sa a rawh, a ei ih, a tlái zet.
A hlumawter ih,
«Cei law! Ka hlum thlang e,
Meisa hmungah ing e,» tiah a ti.
17 Cule a tāng lai mi thing cu pathian ah a tuah,
A khercawp mi milim ah.
Cumi hmaiah a băwk ih, a bia,
A hnenah cun thla a cam ih,
«I runsuak aw, ziangahtile nang cu ka pathian na si!» tiah a ti.
18 Annih cun an thei lo ih an theithiam fawn lo;
Ziangahtile an hmuh theilonak dingah an mit huhsak an si,
An theihthiamlonak dingah an thinlung kharsak an si.
19 Cule «A hrek cu meisa ah ka tik,
A si, meiling parah sang ka em fawn;
Sa ka rawh ih ka ei;
Cule a tānglaipawl cu thil fihnungza ah ka tuah ding maw si?
Thingtum hmaiah ka băwk ding maw si?» ti dingin,
An thinlung in zohman in an ruat lo,
Theihnak an nei lo ih, theihthiamnak khal an nei fawn lo.
20 Vutcâm a ei ṭheu,
Mibumhmang thinlung in amah cu a hruaipêng;
Cule a nunnak a runsuak thei lo ih,
«Ka vawrh lam kut ah hin thuphan a um lo maw si?» ti khal a ti fawn lo.

Jehovah in Israel a Tlen

21 «Maw Jakob, hipawl hi cîng ringring aw,
Israel khal in, ziangahtile nang cu ka siahhlawh na si;
Ka rak lo dĭnsuak, nang cu ka siahhlawh na si;
Maw Israel, nang cu ka lo hngilh dah lo ding!
22 Na thilsual tuah mipawl cu khawdur sahpi bangin, ka hloter hai ih,
Na sualpawl cu mero bangin ka hloter hai.
Ka hnenah ra kir aw, ziangahtile ka lo tlen zo,» tiin.
23 Maw vanpawl, aipuang zetin au uh, ziangahtile Jehovah in cumi cu a tuah ṭheh zo!
Nannih leilung hmunniamnakpawl, lungawiaipuangin au uh;
Nannih tlangpawl, Maw tupi le a sungih um thingkung hmuahhmuah tla aipuangin ausuak uh!
Ziangahtile Jehovah in Jakob cu a tlen zo ih,
Israel ah a sunlawihaw zo a si.

Jerusalem Luahsal a Si Ding

24 Nangmah tlentu le,
Sūl sung ihsin a lo dĭnsuaktu, Jehovah in hitin a ti:
«Keimah cu Jehovah, thil ziangkim tuahtu,
Mate lawngih vanpawl zarpharhtu,
Mahte ih leilung pharhtu ka si,
25 Kei cu phun nuahnotupawlih hminsinnak a pelhsawlhtertu le,
Aizohthiampawl buaitertu;
Mifimpawl dung lamih kirtertu le,
An theihnak atthlakza ih cangtertu ka si;
26 A siahhlawhih kamsuakthu nĕmhngettu le,
A palaipawlih thurawnpek tuahsuaktu ka si;
Jerusalem hnenah, ‹Nang cu luah na si leh ding,› tiin le,
Judah khawpipawl hnenah, ‹Nannih cu dĭnsal nan si ding,› a titu ka si ih,
Amai hmun ṭhingpawl ka tungdingsal ding;
27 Ti thûknak hnenah, ‹Rak kāng aw!
Cule na tivapipawl ka kāngter ding,› titu ka si.
28 Sairas thuhla ah, ‹Anih cu ka tuukhāl a si ih,
Ka lunghmui zawng hmuahhmuah cu a tuahsuak ding,›
Jerusalem cungcangthu ah, ‹Sak na si leh ding,› tiin le,
Temple thuhla ah, ‹Na lungphum phum a si leh ding,› tiah a ti ding.

45

Pathian Hmanrua, Sairas

1 «A hmaiih miphunpawl duaiter dingin,
Siangpahrangpawlih ralthuam hlihsak dingin,
A hmaiah sângka thuah hnih ăwnsak ih,
Kăwtkapawl khar si lo dingin
A hriak thih mi, a kut vawrh lamih ka kaihbĕt mi Sairas hnenah Jehovah in hitin a ti:
2 ‹Na hmaiah ka feh ding ih
Hmun bingbopawl ka rualter ding;
Dar kăwtkapawl ka băldarh ṭheh ding ih,
Thir tlângpawl ka khiak ding.
3 Thim lakih hlawnthilpawl le
Hmun thuppawlih thuh mi lennakpawl ka lo pe ding,
Cutin keimah cu na hmin ih nangmah lo kotu Jehovah ka si ti le,
Israel Pathian ka si ti na thei ding.
4 Ka siahhlawh Jakob ruangah le
Ka hril mi Israel ruangah,
Na hmin rori in ka rak lo ko a si;
In rak thei dah lo nain, hmin ka rak lo sak thotho.
5 Keimah cu Jehovah ka si ih, mi dang zohman an um lo;
Keimah siarlo Pathian an um lo.
In rak thei dah lo nain, na tâi ka lo ṭem thotho ding.
6 Cutin keimah siarlo zohman an um lo,
Keimah cu Jehovah ka si ih, mi dang an um lo ti,
Nisuah ihsin nitlak tiang an thei ding;
7 Tleu ka tuah ih thim khal ka sersiam,
Hnangamnak ka tuah ih vanduainak khal ka sersiam;
Hi thil hmuahhmuah tuahtu hi keimah Jehovah ka si,› tiin.
8 «Nannih vanpawl, tlun ihsin rung surthla uhla,
Vandumpawl in dingfelnak run burhthla hai seh;
Leilung áwngaw sehla, runsuahnak rahsuah seh,
Cule dingfelnak hung keuhtlang hai seh.
Keimah, Jehovah in cumi cu ka sersiam a si.
9 «Amah tuahtu ĕltaitu cu a hmakhua a pit a si!
Leilung hlampheipawl lakih hlamphei men cu!
Bellei in amah tuahtu hnenah, ‹Ziang so na tuah,› a ti ding maw?
Asilole nangmai kutsuak in, ‹Anih cu kut a nei lo,› a ti ding maw?
10 A pa hnenah, ‹Ziang so na hrin?› a titu siseh,
A nu hnenah, ‹Ziang so na rak hrinsuak?› a titu cu a hmakhua a pit a si!» tiin.
11 Amah tuahtu Jehovah le Israel-ih Mi Thianghlim in hitin a ti:
«Ka fapapawlih thuhla ih a ra thleng ding mi thilpawl in sut uh;
Cule ka kut hnaṭuan thuhla ah thu in pe uh.
12 Leilung ka rak tuah ih,
Cutawk ih um milai ka rak sersiam.
Keimah in keimai kut rori in vanpawl ka zarpharh ih,
An arsipawl hmuahhmuah thu ka rak pe.
13 Anih cu dingfelnak in ka tungding ih,
A lamzin hmuahhmuah ka tluangter ding;
A man duh ruangah le lawmman duh ruang khalah si fawn loin,
Anih in ka khawpi a sak ding ih
Ka sáltangpawl cu a suah hai ding,»
Ralkap rualpawlih Jehovah in a ti.

Runtu Umsŭn, Jehovah

14 Jehovah in hitin a ti:
«Izip neihnunnak le Kush-ih sumtuahnak le,
Mikhansâng Sabia-mipawl cu,
Na hnenah an ra ding ih, cupawl cu na ta ah an cang ding;
Na dung lamin an ra ding ih,
Cikcin ih ṭemin an ra thleng ding;
Cule na hmaiah an băwkkhup ding.
Na hnenah, ‹Pathian cu nangmah ah a um rori,
A dang an um lo;
Pathian dang an um lo,› tiin na hnenah dilnak an nei ding,» tiin.
15 Thungaiten Maw Israel Pathian, Rundamtu,
Nang cu a thupaw ṭheu mi Pathian na si!
16 Annih cu an ning a zak ding ih,
An zaten an mualpho fawn ding,
Milem tuahtupawl cu,
An hnăwkbuaitlang ṭheh ding.
17 Asinan Israel cu catuan runsuahnak in
Jehovah in a runsuak ding,
Nang cu kumkhuain kumkhua tiang na ning a zak lo ding ih,
Na mualpho lo ding.
18 Ziangahtile vanpawl sersiamtu,
Leilung dĭnsuak ih a tuahtu,
A dĭnhngettu,
A lak menih sersiam loih,
Luah dingih dĭnsuaktu Pathian Jehovah cun hitin a ti:
«Keimah cu Jehovah ka si, a dang an um lo.
19 A thup in le,
Leilung thimnak hmun ah thu ka rel lo;
Jakob cithlah hnenah,
‹A lak menin in hawl aw,› ka ti dah lo;
Kei, Jehovah cun dingfelnak thu ka rel ih,
A ding mi thilpawl ka thăn a si.
20 «Pungkhawm uhla ra hnik uh;
Nannih miphunpawl lak ihsi tlânsuakpawl,
In rak naihtlang hnik uh.
Anmai khercawp mi milim zanthing a thiartupawl le,
Mi runsuak thei lo pathian hnenih thla a camtupawl cun,
Theihnak an nei lo.
21 Nan thuhla rel uhla rak suahpi hnik uh;
A si, răwn awkhawm hai seh.
Tuan le māng ihsin zo in so hihi rak thăn dahtu um?
Cuih cān ihsin zo so cumi rak rel dah?
Keimah, Jehovah in ka rel dah a si lo maw?
Cule keimah siarlo Pathian dang an um lo,
Diknak Pathian le runsuaktu ka si;
Keimah siarlo zohman an um lo.
22 «Ka lam ra hawi uhla, rundamin um uh,
Nannih leilung dĕngpawl ih a um mi hmuahhmuah tla!
Ziangahtile keimah cu Pathian ka si ih, a dang an um lo.
23 Mah le mah sālawin sia ka săm;
Ka hnenah khuk kip an bil ding ih,
Lei kip in thukamnak an tuah theinak dingah,
Thu cu ka kâ ihsin dingfelnak in a pawtsuak ih,
A ra kirsal nawn lo ding.
24 Anih in,
‹Thungaiten Jehovah ah dingfelnak le cahnak ka nei.
A hnenah mi an ra ding ih,
A parih thinhengtupawl cu a hnenah an ra ding,
Cule an zaten an ning a zak ding.
25 Israel tesinfapawl hmuahhmuah cu Jehovah ah thiam coter an si ding ih tluang an khawng ding,› a ti ding,» tiin.

46

Babilon Milempawl le Pathian Nung

1 ^aBel cu a kûn ih, ^bNebo cu a niamawter;
An milempawl cu rannung le ṭilva an phurter.
Nan phurpawl cu phurrit tak an si,
Ramsa cau hrangah phurrit a si.
2 An awp, an kûntlangkhawm;
Annih in phurrit cu an phur thei lo,
Asinan anmah rori cu ralkaih ah an rak feh.
3 «Na suah ihsin ka lo dăwm mi le,
Sūl sung ihsin ka lo thiar mi,
Maw Jakob sungza le,
Israel sungza a tāngsŭn hmuahhmuah tla,
I ngaithla hnik uh:
4 Na tarkûn tiangin keimah cu ka kêl ringring ding ih,
Na ṭuak a par tiangin ka lo paw ding!
Ka lo tuah zo ih, ka lo phur ding;
Ka lo paw ding ih, ka lo runsuak ding.
5 Zo thawn so in tahṭhim ding, in tlukawter ding ih,
Mibangaw kan si theinak dingin zo thawn so in khaikhin?
6 Zâl sung ihta sui a sûngbung ih,
Ngun cu cuaithlainak ah khīng a khai;
Sui erthiam an hlâng ih, anih in cumi cu pathian ah a tuah;
An băwkkhup ih, an bia.
7 Cumi cu liang in an zâwn, an thiar ih,
Amai hmun ah an toh, cule cumi cu a ding;
A hmun ihsin a ṭhawn nawn lo ding.
Cumi cu mi in an auh nân, cumi cun a sâng thei lo,
An buainak sung ihsi khalin a runsuak thei fawn lo.
8 Maw nannih thilsual a tuahtupawl,
Hihi cîng ringring uhla, pacangawter uh, ruat ṭhasal uh.
9 Khuahlan thil hlunpawl kha cîng ringring uh,
Ziangahtile keimah cu Pathian ka si ih, a dang zohman an um lo;
Keimah cu Pathian ka si ih, keimah bangtuk pakhat hman an um lo,
10 ‹Ka thurawnpek cu a dingsuak ding ih,
Ka lunghmuizawng hmuahhmuah ka tuah ding,› tiin,
A tir ihsin a netnak ding ka thăn ih,
Tuan le māng ihsin tuah hrih lo mi thilpawl ka thăn,
11 Nisuahnak lam ihsin sa dehhmang vâte ka ko,
Ram hlapi ihsin ka thurawnpek tuahsuaktu ding pa ka ko,
A si, cucu ka sim zo a si;
Cangsuak ko ka thlengter fawn ding,
Cumi cu ka tumfel zo ih,
Ka tuahsuak fawn ding.
12 Nannih thinlungruh,
Dingfelnak hlattupawl, in ngaithla hnik uh:
13 Nâite ah ka dingfelnak ka run keng, cumi cu hlapi ah a um lo ding;
Ka runsuahnak a khawtlai lo ding.
Ka rundamnak cu Zion hrangah le
Ka ropitnak cu Israel hrangah ka pe ding.

46:1^a Bel: Babilon pathianpawl lakih pakhat a si.

46:1^b Nebo: Babilon khawzingnu Nabu hmin pakhat a si.

47

Babilon parih Thuṭhennak

1 «Rung ṭum awla leivut ah to aw,
Maw Babilon fanu himte aw;
Laltokham loin lei parah rung to aw,
Maw Kaldia-mipawlih fanu aw!
Ziangahtile nang cu nonâl hngialhngi le duhnungza an lo ti nawn lo ding.
2 Riallung la awla fâng rial aw.
Na hmaikhuh kha áwng aw,
Na hni hlít aw,
Na cāwn langter aw,
Tivapipawl tán aw.
3 Na taklawngnak lăngter a si ding,
A si, na ningzahnak cu lăngter a si ding;
Phuba ka la ding ih,
Mi ka dimdawih lo ding,» tiin.
4 In Tlentu cu, a hmin ralkap rualpawlih Jehovah, Israel-ih Mi Thianghlim a si.
5 «Maw Kaldia-mipawlih fanu,
Daiten to awla, thim lakah lut aw;
Ziangahtile nang cu Lalrampawlih Lalnu tiih kawh na si nawn lo ding.
6 Ka mipawl parah ka thin a heng;
Ro ih ka co mipawl ka bawrhhlawhter hai ih,
Na kut ah ka lo pe hai zo.
Nang in an parah zahngainak na langter lo;
Kum upapawl parah a rit zet mi na hngawngkol na bŭn hai.
7 Cule nang in, ‹Kumkhuain lalnu ka si ringring ding,› tiah na ti,
Hi thilpawl hi na thinlung ah na ret duh lo ih,
Cupawlih cemnetnak khal na mangngaih fawn lo.
8 «Curuangah nang năwmtawlnak cēn ih,
Ngaihngam takih a um huahhitu,
Na thinlung ah, ‹Keimah hi ka si mai, keimah siarlo mi dang zohman an um lo;
Nuhmei in ka to lo ding ih,
Fāte thih khal ka thei lo ding,› a titu atu ah hihi na hna in thei aw;
9 Asinan hmakhatteah le ni khat sungah, hi thil pahnih hi na parah a ra thleng ding,
Fāte thih le nuhmei sinak cu.
Na dawi hmannak a tam tuk na cingin le
Na khawse kawhnak a nasatuk na cingin,
Cupawl cu na parah an ra thlengkim thluh thotho ding.
10 Na sualralnak na rak rinsan;
Nang in, ‹Zohman in in hmu lo,› tiah na ti;
Na fimnak le na theihnak in an lo merhkâwi;
Cule na thinlungtein,
‹Keimah hi ka si mai, keimah siarlo mi dang zohman an um lo,› tiah na rak ti.
11 Curuangah na parah thil ṭhalo a ra thleng ding;
Khui ihsin a ra pawt ti na thei lo ding.
Cule na parah buainak a thleng ding ih,
Cumi cu na phawih thei lo ding.
Cule rinlopiin siatnak na parah a ra thleng ding,
Cumi cu na thei lo ding.
12 Atu ah khawsia-kawhthiamnak le
Na dawithiamnak nasatak thawn ding hnik,
Na no lai ihsin na rak ṭuanbăng mi kha
Na hlawkpi men thei sokhaw,
Na khurter hai tla a si thei men!
13 Na thurawnpek dăwn a tam tuknak ah na cau a si hi;
Atu ah van lam thil zohthiampawl, arsizohthiampawl le,
Thlapi zoh ih thuphuang thiampawl cu ding hai sehla, na parih thil thleng ding lak ihsin lo run hai seh.
14 Ngai hnik annih cu cangpâwl vek an si ding,
Meisa in a kāng hai ding;
Meisa alhhliau thiltitheinak lak ihsin anmah ten an runsuakaw thei lo ding;
Hlumawkternak ding meiling a si lo ding ih,
Aih ding mi meisa khal a si fawn lo ding!
15 Na rak ṭuanbăngpipawl cu,
Cuvekin na hrangah an cang ding,
Na no lai ihsin na hnenih sumdâwngpawl cu,
Anmai lamzin ciar ah an vâkvai ding.
Zohman in an lo run lo ding.

48

Lungruh Israel

1 «Maw Jakob sungza, Israel hmin ih kawh mi le,
Judah ṭhalbe ihsi suak,
Thutak in maw, dingfelnak in maw si si loih,
Jehovah hmin ih sia a sămtu le
Israel Pathian hmin a sāltupawl,
Hihi ngai uh;
2 Ziangahtile annih cu khawpi thianghlim mi kan si an tiaw ih,
Israel Pathian an rinsan;
Ralkap rualpawlih Jehovah ti hi amai hmin a si:
3 «A tir ihsin khuahlan thilpawl ka rak thăn;
Cupawl cu ka kâ ihsin an pawtsuak ih mi ka theihter hai.
Cupawl cu hmakhatteah ka rak tuah ih, cutin an rak cang.
4 Mi lungruh na si ih,
Na hngawng thahri cu thir a si,
Na cal cu dar a si ti ka theih ruangah,
5 A tir ihsi hrimhrim in cumi cu na hnenah ka thăn;
A rak can hlan ihsin na hnenah ka rak phuang cia zo,
Culole nang in, ‹Cupawl cu ka milem ih tuah mi an si ih,
Khercawp ka milim le burcawp ka milim in
Thu an rak pek mi an si,› na ti pang ding.
6 «Na hna in na rak theih kha;
Hipawl hmuahhmuah hi na hmu ṭheh ko.
Cule nang in na thăn lo ding maw?
Tuih cān ihsin thil thar,
Thil thuppawl le na theih dah lo mipawl tiangin na hna in thei ko ka lo tuah.
7 Cupawl cu hlanlai ah si loin atu ih sersiam mi an si;
Cule tuihni hlanah nang in cupawl cu na hna in na rak thei hrih hai lo,
Culole nang in, ‹Ka theih cia mi an si ko,› na ti pang ding.
8 A si, na hna in na rak thei dah lo,
A si, na thinlung in na rak thei dah lo;
A si, a hlan reipi ihsin na hna cu ăwn a rak si lo.
Ziangahtile hrăwkhrawl zetin na ti ding ti ka thei ih,
Sūl sung ihsin thilsual titu tiih kawh na si.
9 «Ka lo hlohralterlonak dingah
Ka hmin ruangah ka thinhengnak ka khêkkhal hrih ding ih,
Ka hminṭhatnak ruangah na hrangah ka sūp hrih ding.
10 Ngai hnik, ka lo erfai zo, asinan ngun vek cun si loin;
Zăwnzaihnak meipi ah ka lo hniksak zo a si.
11 Keimah ruang rori ah, keimah ruang rori ah, cumi cu ka tuah ding;
Ziangahtile ziangtin ka hmin cu bawrhhlawhter a si ding?
Cule mi dang hnenah ka ropitnak ka pe lo ding.

Pathian in Israel a Zalenter Ding

12 «Maw Jakob le ka kawh mi Israel in ngai hnik:
Keimah cu amah ka si, keimah cu a hmaisabik ka si,
Keimah cu a netabik khal ka si.
13 Thungaiten ka kut in leilung lungphum a rak phum ih,
Ka kut vawrh lamin vanpawl a rak zarpharh a si;
Cupawl ka kawh hai tikah,
Hmunkhatah an ding.
14 «Nan zaten, pungkhawm uhla, ngai hnik uh!
An lakih zo in so hi thilpawl hi a rak thăn?
Jehovah in amah cu a duhdawt;
Babilon parah amai lunghmui zawng a tuah ding ih,
A bân in Kaldia-mipawl a do ding.
15 Kei, keimah rori in ka rel zo;
A si, amah cu ka ko zo,
Ka hruai zo ih, a lamzin a hmuingil ding.
16 «I rak naih uhla, hihi ngaithla hnik uh:
A tir ihsin a thupin thu ka rel dah lo;
Cān a rak um ihsin, cu tawkah ka rak um,
Cule atu ah Bawipa Jehovah le a Thlarau in
Kei hi in rak thlah a si.»
17 Jehovah, nangmah tlentu, Israel-ih Mi Thianghlim in hitin a ti:
«Keimah cu Jehovah na Pathian,
Na hlawknak dingih lo zirhtu le,
Na fehnak ding lamzin ih lo hruaitu ka si.
18 Ka thupekpawl kha rak ngaihsak cila maw!
Na hnangamdaihnak cu tivapi bangtuk a rak si ding ih,
Na dingfelnak cu tifinriat suar bangtuk a rak si ding nân.
19 Na tesinfapawl khal vunnel bangtuk an rak si ding ih,
Na taksa cikuang khal vunnel fáng zât an rak si ding nân;
A hmin cu thaihloh a si lo ding ih,
Ka hmaika ihsi khalin hlohralter a si fawn lo ding nân!» tiin.
20 Babilon ihsin suak uh!
Kaldia-mipawl cu tlanhlohsan uh!
Hla sak aw thawn,
Hihi thăn uhla, phuang uh,
Leilung dĕng tiangin thăn uh;
«Jehovah in a siahhlawh Jakob a tlen zo,» tiah ti uh.
21 Cule nelrawn paltlăngih a hruai hai tikah khan,
An ti a rak hâl dah lo;
Anih in an hrangah lungpi ihsin tidai a khawhsuakter;
Lungpi khal a khĭngter ih tidai a khawhsuak.
22 «Misualrálpawl hrangah cun hnangamdaihnak a um lo,» tiah Jehovah in a ti.

49

Jehovah Siahhlawh

1 «Maw tipi kap tluanpawl, i ngaithla hnik uh,
Nannih ram hlapi ih miphunpawl fimkhur uh!
Jehovah in sūl sung ihsin i rak ko zo;
Ka nuih sūl sung ihsin ka hmin a rak sak zo.
2 Cule ka kâ cu ralnâm hriam bangtukah a rak tuah;
A kut thlahlim ah i rak thup ih,
Tathriam mi thálfung ah i tuah;
A thálfung bawm sungah i rak thup.»
3 «Cule anih in ka hnenah,
‹Nangmah ah sunlawih ka sinak dingah,
Maw Israel, nang cu ka siahhlawh na si,› tiah i ti.
4 Cun kei in, ‹A lakin ka rak ṭuanbāng ih,
Thulolak men le zianghmanlo men hrangah ka thazang ka rak hmang;
Sikhalsehla thungaiten ka diknak lawmman cu Jehovah hnenah a um ih,
Ka ṭuan rah cu ka Pathian hnenah a um,› tiah ka ti.
5 «A hnenih Israel an punkhawmnak dingih,
A hnenih Jakob hruaikirsal dingin,
A siahhlawh si dingah sūl sung ihsin i dĭnsuaktu Jehovah in atu ah hitin a ti,
(Ziangahtile Jehovah mithmuhah ka sunglawi ding ih,
Ka Pathian cu ka cahnak a si ding),
6 A si, anih in Jakob hnámpawl thoter dingah le,
Zuah mi Israel tungding dingah,
Ka siahhlawh ih na can ding cu thil tenau tuk a si maw si?
Miphunpawl hrangah tleu ah ka lo tuah ding,
Cutin ka runsuahnak cu leilung dĕng tiang a thleng ding,› tiah i ti,» tiin.
7 Jehovah, Israel tlentu, anmai Mi Thianghlim,
Mi ih an hmuhsuam mi,
Miphunpawl ih an fih mi,
Uktupawlih siahhlawh hnenah cun hitin a ti:
«Nangmah hriltu
A rinum mi Jehovah,
Israel-ih Mi Thianghlim ruangah, Siangpahrangpawl in an hmu ding ih an tho ding,
Uktupawl in an be ding,» tiin.
8 Jehovah in hitin a ti:
«Cohlan tikcu ah ka rak lo ngaithla ih,
Runsuahnak ni ah ka rak lo bawm;
Leilung dinṭhasal dingin le,
A ṭhing mi ropawl anmah coter dingin,
Minungpawl hrangih thukham ah,
Nang cu ka lo kilhim ding ih ka lo pe ding;
9 Cutin nang in, thawngtlapawl hnenah, ‹Suak uh,›
Thim lakih a um mipawl hnenah,
‹Ra suak uh,› tiin na ti ding.
«Lamzin tluanah rawl an ei phah vivo ding ih,
An tlannak cu hmun sâng phūl kawlhpawl ah a si ding.
10 An ril a râwng lo ding ih an ti a hâl fawn lo ding,
Sâ an tuar lo ding ih ni in a emna hai fawn lo ding;
Ziangahtile an parih zahngainak neitu in a hruai hai ding,
Tihna kiang tiangin a kaihhruai hai ding.
11 Ka tlang hmuahhmuah cu lampi ah ka tuah hai ding ih,
Ka zinpipawl cu santer an si ding.
12 Ngai hnik, hipawl cu a hlatnak ihsin an ra ding,
Zoh hnik! Khipawl cu sak lam le nitlak lam ihsin le,
Hipawl cu ^aSinim ram ihsin an si,» tiin.
13 Maw vanpawl, aipuangin au uh!
Maw leilung, lungawiaipuangin um aw!
Maw tlangpawl tla, aipuangin ausuak uh!
Ziangahtile Jehovah in a minungpawl a hnem ih,
Zăwnzaih tuar a mipawl parah zahngainak a nei.

49:12^a Sinim: Izip ram Nile tivapi kiangih hmunram pakhat a si. Atu ah cun Aswa tiah an ko.

Pathian in Zion a Máng Ding

14 Asinan Zion in, «Jehovah in i thlauthla zo ih,
Ka Bawipa in i hngilh zo,» tiah a ti.
15 «Nunau in hnawi a fawh lai mi a fa a hngilh in,
A rilrah a fapa lainat loin a um thei pei maw?
A si, an hngilh tla a si thei,
Cutisikhalsehla kei cun ka lo hngilh lo ding.
16 Ngai hnik, ka kut zaphak ah ka lo ngan;
Na khawkulhpawl cu ka hmaiah an um ringring.
17 Na fapapawl cu an hmanhmawh ciamco;
A lo siatsuahtupawl le a lo ṭhingtertupawl cu
Na hnen ihsin an tlânhlo ding.
18 Khua cuan aw, na kiangkap zoh awla thlir hnik;
Hipawl hmuahhmuah hi an pungkhawmaw ih na hnenah an ra.
Ka nun rori vekin, Jehovah in a ti,
«Nang cu ceiawknak thuam vekin an zate hmangin na thuamaw tengteng ding ih,
Mo a thawmawk vekin, anmah hmangin na thuamaw ding.
19 «Ziangahtile a răm mi le a ṭhing mi na hmunpawl le,
A siat mi na ram cu,
A luahtupawl hrang hmanah a bi tuk thlang ding;
Cule a lo dawlhtupawl cu hlapi ah an um thlang ding.
20 Mi dangpawl na hloh hnuah,
Na neih ding mi na fātepawl in,
‹Ka hrangah hmun a bi tuk;
Ka cēnnak ding hmun i pe aw,› tiin,
Na hnatheihah an lo simsal ding.
21 Cun na thinlung ah nang in,
‹Ka fātepawl ka hloh hai ih ka ṭhin thluh ihsin,
Ralkaih mi ka si ih, a suk le a so ih ka vahvaih ihsin,
Zo in so hipawl hi i hrinsak?
Zo in so hipawl hi a pitlingter hai?
Ngai hnik, kei cu mah te lawngih tān ka si;
Asinan hibangpawl hi khuiah so an rak um?› na ti ding,» tiin.
22 Bawipa Jehovah in hitin a ti:
«Ngai hnik miphunpawl hnenah ka kut ka thlir ding ih,
Minung hmuahhmuah hrangah thantar ka phun ding;
Na fapapawl cu an bân in an hruai ding ih,
Na fanupawl cu an liang in an pungpucuan ding,
23 Siangpahrangpawl cu nangmah kiltu an si ding ih,
An siangpahrang bawinupawl cu a lo kilkhawitu an si ding;
Annih cu na hmaiah leisin bihin an kûn ding ih,
Na ke ih leivut an liak ding.
Cun keimah cu Jehovah ka si ti na thei ding,
Ziangahtile keimah hngaktu cu an mualpho lo ding,» tiin.
24 Micak hnen ihsin ralthillâk le
Midingfel hnen ihsin ralkaihpawl cu runsuah an si pei maw?
25 Asinan Jehovah in hitin a ti:
«Micakih ralkaihpawl hman lawnsak in,
Miṭihnungza-ih ralthillâk mi khal runsuah an si ding;
Ziangahtile a lo dotu cu ka do ding ih,
Na fātepawl cu ka run ding.
26 A lo palbĕttupawl cu anmai sa rori ka eiter hai ding ih,
Sabitzu thlum rit vekin anmai thisen an ri ding.
Keimah cu Jehovah a lo Rundamtu le,
A lo Tlentu Jakob-ih Micak ka si ti titsa hmuahhmuah in an thei ding,» tiin.

50

Israel Sualnak

1 Jehovah in hitin a ti:
«Ka rak dawisuak mi,
Nan nu mâknak ca kha khuiah so?
Asilole ka leibatnak zo bik hnenah so ka rak lo zuar?
Nan mawhsualnakpawl ruangah nanmah ten nan zuaraw ih,
Nan dānpahbălnakpawl ruangah nan nu cu dawisuak a rak si.
2 Ka rat laiah khan, ziangruangah so milai an um lo?
Ka kawh laiah khan, ziangruangah so zohman sângtu an um lo?
Ka kut hi tlen thei lo ding tiangtiangin a tawi maw si?
Asilole runsuak dingin huham ka nei lo maw si?
Ngai hnik, ka nunsimnak in tifinriat ka kāngter,
Tivappipawl thlaler ah ka canter;
Tidai a um lo ruangah an ngapawl
Tihâlin an thi ih an thu.
3 Vanpawl cu thimnak ka hrukter hai ih,
Buri-puan thawn ka khuhawter hai,» tiin.

Siahhlawh Thulunnak

4 «Micau hnenah a tikcu teih ṭawngkam,
Ṭawngdān ding ka theih theinak dingah,
Ṭawngkam thiamnak, Bawipa Jehovah in i rak pe.
Zing tinten anih in i ṭhang,
Zirh mi bangih ngaithla dingin, ka hna a ṭhang,
5 Bawipa Jehovah in ka hna a rak áwng,
Kei cu ka rak hél lo ih,
A pial khal ka rak pial fawn lo.
6 I vawtupawl hnenah ka zâng ka rak tŭn ih,
Ka khahmul phawitupawl hnenah ka biang;
Mualphonak le cilphuinak lakah ka hmai ka thup lo.
7 Bawipa Jehovah in i băwm ruangah, ka mualpho lo;
Curuangah ṭêklung bangin ka hmai ka hawih ih,
Ka ning a zak dah lo ding ti ka thei.
8 Thiam i cotertu cu a nâi a si;
Zo in so in do ding?
Kan ding veve hnik pei.
Zo so i dodaltu?
I rak naih hnik seh.
9 Ngai hnik, Bawipa Jehovah cun i bawm;
Thiam lo i cotertu cu zo so a si?
Ngai hnik, annih cu sinfen bangin an hlun ding,
Tlâp in a ei ṭheh hai ding.»
10 «Nan lakah Jehovah ṭih ih, a siahhlawh aw thlun le
Tleu nei lo, thim lakih tlanglêng cu zo so a si?
Jehovah hmin rinsan sehla,
A Pathian parah ṭhum aw seh.
11 Zoh hnik, nannih meisa vângtu hmuahhmuah le mai meifar ih kulhawtupawl,
Nan meitleu ah le nan van mi meifar lakah vâk uh,
Ka kut ihsin nan co ding mi cu hihi a si:
Harsa zetin nan it ding.

51

Jehovah in Zion a Thlangăm

1 «Nannih dingfelnak a dawitupawl, nannih Jehovah a hawltupawl,
I ngai hnik uh:
Nanmah sersuahnak lungpi le,
Nanmah laihsuahnak khur cu zoh hnik uh.
2 Nan pa Abraham le,
A lo hringtu Sarah cu zoh hnik uh;
Ziangahtile amah lawnglawng ka ko,
Cule mal ka sawm ih ka pungzaiter a si,» tiin.
3 Ziangahtile Jehovah in Zion cu a hnem ding,
A hmun ṭhingpawl hmuahhmuah a hnem hai ding;
A thlaler cu Eden bangtukah a cangter ding;
A nelrawn cu Jehovah hmuan bangtukah a tuah ding,
Cumi ah aipuannak le lungawinak hmuh a si ding,
Lungawi thu simnak le awnmawi khal.
4 «Ka mipawl, i ngai hnik uh;
Maw ka miphun, hna in tŭn uh:
Ziangahtile keimah ihsin dān a ra suak ding ih,
Ka thuṭhennak dik cu miphunpawlih tleu ah ka hmunter ding.
5 Ka dingfelnak cu a nâi a si,
Ka runsuahnak a fehsuak ih,
Ka bân in miphunpawl thu a ṭhen ding;
Tipi kap tluanpawl in keimah in hngak ding ih,
Ka bân an hngak ding.
6 Van lam hun cuan uhla,
Thuai lamih leilung khi zoh nik uh.
Ziangahtile vanpawl cu meikhu bangin an ziamrál ding,
Leilung cu sinfen bangin an hlun ding,
Cubangtukin a sungih cêngpawl cu an thi ding;
Asinan ka runsuahnak cu kumkhaw daih a si ding ih,
Ka dingfelnak cu cemralter a si lo ding.
7 «Nannih dingfelnak theitupawl,
Nannih thinlung ih ka dān neitupawl, i ngai hnik uh:
Milaipawlih nautatnak cu ṭih hlah uhla,
An lo hmuhsuamnak ruang khalah thinphâng fawn hlah uh.
8 Ziangahtile anmah cu sinfen bangin tlap in a ei hai ding,
Cule sahmul puan bangin nget in a ei hai ding,
Asinan ka dingfelnak cu kumkhaw daih a si ding ih,
Ka runsuahnak cu san khat ihsin san khat tiang,» tiin.
9 Ṭhangharh aw, ṭhangharh aw, cahnak hruh aw,
Maw Jehovah-ih bân!
Tuan le māng lai, khuahlan san lai bangkhan ṭhangharh aw.
Nang hi ^aRahab satṭhentu,
Rulhreng tuahmawhtu kha na si lo maw?
10 A thûk zet mi,
Tifinriat kāngtertu;
Tlen cia mipawl tankainak dingih
Tifinriat thûknak hmunpawl tla lamzin ih tuahtu kha na si lo maw?
11 Cutin Jehovah ih tlen cia mipawl cu an ra kirsal ding ih,
Hla sak phahin Zion ah an ra ding,
An lupawl parih catuan aipuannak thawn an ra ding.
Aipuannak le lungawinak an congah ding;
Riahsiatnak le aihramnak cu an tlânhlo ding.
12 «Kei, keimah rori hi a lo hnemtu ka si.
A thi thei mi milai le
Hrampi vekih tuah mi milai fapa ṭihtu cu zo so maw na si?
13 Cule vanpawl a zarpharhtu le
Leilung lungphum a phumtu,
Nangmah a lo tuahtu Jehovah na hngilh a si;
Siatsuah dingih a timlam tikah,
A lo palbĕttuih thinhengnak ruangah
Ni tinten na rak ṭih ringring.
Cule palbĕttuih thinhengnak cu khuiah so?
14 Ṭemṭawnih um mi cu suah a si cing ding,
Cutin khur sungah a thi lo ding ih,
A rawl khal a cem lo ding.
15 Asinan keimah cu Jehovah na Pathian,
Tifinriat cawktho ih a tisuar hrûm dupdotertu ka si;
A hmin cu ralkap rualpawlih Jehovah a si.
16 Cule na kâ ah ka kamsuakthupawl ka ret;
Ka kut thlahlim in ka lo phen,
Cutin vanpawl ka zarhpharh thei ding ih,
Leilung lungphumpawl ka phum thei ding,
Cule Zion hnenah, ‹Nang cu ka mi na si,› ka ti thei ding,» tiin.

51:9^a Rahab: Sam 87:4 simfiangnak zoh aw.

Pathian Thinsosatnak Ṭhawnhloh a Si

17 Ṭhangharh aw, ṭhangharh aw!
Ding hnik, Maw Jerusalem,
Nang, Jehovah kut ih a ritu, a thinsosatnak no a ritu;
Hâwr rero nak no tawne tiangin na in ih,
Na thlefai ṭheh verver.
18 A hrin mi a fapapawl hmuahhmuah lakah
Amah kaihruaitu ding pakhat hman an um lo;
A cawm pitlin mi a fapapawl hmuahhmuah lakah
Kut ih amah hruaitu khal pakhat hman an um fawn lo.
19 Hi thil pahnih hi an hnenah an ra thleng;
Zo so nangmah ruangih ninghang ding?
Ṭhinnak le siatralnak, mangṭam le ralnâm tla an si.
Zo in so lo hnem ding?
20 Na fapapawl cu an ṭamsawl ṭheh zo,
Sûr sungih zâtum bangin,
Kăwtthler kip ah an zau;
Jehovah thinsonak,
Na Pathian-ih kawknak in annih cu an khat.
21 Curuangah zăwnzaihter mi nang,
Sabitzu si lo a ri mi, zangfahten hihi ngaithla aw.
22 Na Bawipa, a mipawl hrangih ngensak ṭheu tu,
Jehovah le na Pathian cun hitin a ti:
«Zoh hnik, hâwr rero nak no,
Ka thinsosatnak no tawne cu,
Na kut ihsin ka lâk zo;
Cumi cu na insal nawn lo ding.
23 Asinan cumi cu nangmah a lo zawnzaitertupawlih kut ah ka ret ding,
Annih in na hnenah,
‹Na parih kan feh theinak dingah băwk aw,› an lo ti.
Cule lei bangtukin na taksa na phah ih,
Na parih a fehtupawl hrangah kăwtthler vekin na phahaw,» tiin.

52

Jehovah in Jerusalem a Tlen

1 Ṭhangharh aw, ṭhangharh aw!
Maw Zion, na cahnak in thuam aw hnik;
Maw Jerusalem, khawpi thianghlim,
Na sinfen mawipawl hruk hnik!
Serh zim tan lo pawl le mithiang lo pawl
Na hnenah an ra nawn lo ding.
2 Leivut ihsin thingaw awla, hung tho aw;
To aw, Maw Jerusalem!
Maw ralkaih mi Zion fanu,
Na hngawng ṭemnak phelhaw aw!

3 Jehovah in hitin a ti:

«Zianghmanlo ah nan rak zuaraw aw ih,
Paisa tel loin tlen nan si ding,» tiin.

4 Ziangahtile Bawipa Jehovah in hitin a ti:

«Ka mipawl cu a tirah
Izip ih cêng dingin an vung suk;
Cun a săn um loin Assiria-mipawl in an palbĕt.
5 Curuangah atu ah, hi tawkah ziangso ka neih,» tiah Jehovah in a ti.
«Cutin ka mipawl cu zianghmanlo ah hruaihloh an si maw?
Anmah uktupawl in râk rero ko an tuah,» tiah Jehovah in a ti,
«Cule ni tin ka hmin cu thangsiat tlaitluan a si.
6 Curuangah ka mipawl in ka hmin an thei thlang ding;
Curuangah cuih ni ah cun annih in,
‹Ngai hnik, cumi cu keimah ka si,› a titu kha keimah ka si ti an thei thlang ding,» tiin.
7 Tlangpawl parah thuthangṭha thlĕn ih,
Remnak tlangaupi ih,
Thil ṭha thuthangṭha keng ih,
Runsuahnak phuang ih,
Zion hnenih,
«Na Pathian in a uk a si!» a tituih ke cu ziang tlukin so a mawi!
8 Na ralvengtupawl cun an aw an suah ding ih,
An aw suahin aipuang zetin an au ding;
Ziangahtile Jehovah in Zion ih a hruaikirsal tikah an mit rori in an hmu ding.
9 Nannih Jerusalem hmun ṭhingpawl,
Lungawiaipuangin ausuak uh!
Ziangahtile Jehovah in a mipawl a hnem ih,
Jerusalem a tlen.
10 Miphun hmuahhmuah mithmuhah,
Jehovah in amai bân thianghlim cu a hlîp,
Cule kan Pathian runsuahnak cu
Leilung netnak hmuahhmuah in an hmu ding.
11 Păwksuak uh! Păwksuak uh! Cutawk ihsin fehsuak uh,
A thianglo mi thil hrimhrim dai hlah uh,
Nannih Jehovah bungbel a phurtupawl
A sung ihsin fehsuak uhla, thiangten um uh.
12 Ziangahtile manhlapin nan feh lo pei ih,
Raltlân vek khalin nan feh lo pei,
Ziangahtile nan hmaiah Jehovah a feh ding ih,
Israel Pathian cu a lo khawrtu a si ding.

Sual Phurtu Siahhlawh

13 Ngai hnik, ka siahhlawh in thiam zetin a cāngvai ding,
Anih cu khaisan a si ding ih cawimawi le nasazetih cawisan a si ding.
14 A hmel cu milai zo vek hnak hman khalin tisiat a si ih,
A pianhmang khal milai fapapawl hnakin,
Na parah mi tampi an khawruah a har vekin,
15 Miphun tampi a vansangter hai ding.
Siangpahrangpawl cu amah ruangah an kâ an hup ding;
Ziangahtile anmah sĭm dah lo mi an hmu ding ih,
An hna ih an rak theih dah lo mi an theithiam ding.

53

1 Zo in so kan thuthan mi a zum?
Zo hnenah so Jehovah-ih bân lăngter a si?
2 Ziangahtile anih cu thil cerhno vekin a hmaiah a ṭhang ding ih,
Leicar ihsin phawisuah mi hram vek a si ding.
Anih cu pianhmang le mawinak hrimhrim a nei lo,
Amah kan zoh tikah,
Amah kan duhnak dingah mawinak hrimhrim a nei lo.
3 Anih cu milaipawl in an hmuhsuam ih an hnáwng,
Miriahsia le thinnat thei mi a si.
Cule mi in an hmai an huhsan mi pa bangin,
Anih cu hmuhsuam a si ih, amah cu kan rak ngaisang lo.
4 Anih cun kan thinnatnak a phur taktak ih,
Kan riahsiatnak khal a phur.
Sikhalsehla kannih cun Pathian ih vuak ah le,
Vĕlh mi ah le zăwnzaihter mi ah kan ruat.
5 Asinan anih cu kanmai dānpahbălnakpawl ruangah hriamhma putter a si;
Kan mawhsualnakpawl hrangah hmabaihin a um,
Kan hnangamnak dingih nunsimnak cu a parah a tla ih,
An vuaknak vualpawl in tidam kan si.
6 Kan zaten tuu bangin kan fehpêng ṭheh,
Mi kip mai lamzin cio ah kan pial;
Jehovah in kan zateih mawhsualnak cu a parah a ṭhum.
7 Anih cu palbĕt a si ih anih cu zăwnzaihter a si,
Sikhalsehla anih cu a kâ a âng lo;
Anih cu ranthattu hnenih hruai mi tuufa no vek a si ih,
A hmul mettu hmaiih cāng lo teih a um mi tuu vekin a kâ a âng lo.
8 Anih cu palbĕtnak le thuṭhennak thawn lâk a si ih,
Amai san minungpawl lak ihsin zo in so a thuhla dinpi ding?
Anih cu a nungdam mipawlih ram ihsin sahcat a si;
Ziangahtile anih cu ka mipawlih dānpahbălnak ruangah vuak a si.
9 Cule a thlān cu misualrálpawl lakah ruahman a si nân,
A thih tikah cun milian zawngah tuahsak a si,
Ziangruangahtile anih cun thilsual zianghman a tuah dah lo ih,
A kâ khalah bumnak pakhat hman a um dah lo.
10 Sikhalsehla amah vuakdurh ding cu Jehovah-ih lunghmui zawng a si;
Anih in amah cu thinna ko a tuah.
A nunnak cu mawh thilhlăn ih tuah a si tikah,
Amai cithlah a hmu ding ih, a damsung kumpawl a sauter ding,
Cule Jehovah lunghmuizawng cu a kut ah a hmuingil ding.
11 Anih in a nunnak ih ṭuanbăng rah a hmu ding ih, a di a riam ding.
Amai theihnak in a dingfel mi ka Siahhlawh in mi tampi thiam a coter ding,
Ziangahtile anih in an mawhsualnakpawl a phur ding.
12 Curuangah miropipawl zawngah covo amah ka zem ding ih,
Anih cu micakpawl thawn ralthillawn an zemaw ding,
Ziangruangahtile anih in thihnak tiang a nunnak a sûngbung ih,
Dānpahbăltupawl lakih siar a si.
Cule anih in mi tampi sual a phur ih,
Thilsual tuahtupawl hrangah thla a cam.

54

Hmai lam Cān ih Zion Ropitnak

1 «Maw micing, aipuangin au aw,
Nang fa hring dah lo!
Lungawiaipuangin ausuak awla, ring zetin ausuak aw,
Nang fahrinnat tuar dah lo!
Ziangahtile umharnuih fātepawl cu
Pasal nei nunauih fātepawl hnakin an tamsawn,» Jehovah in a ti.
2 «Na puanthlam hmun kauh aw,
Na cēnnak hmunpawlih puanzarpawl cu zar si hai seh,
Ren hlah;
Na hridaipawl sauter awla,
A fungkhĕnpawl fekter aw.
3 Ziangahtile vawrh lamah le keh lamah na darhkau ding,
Cule na tesinfapawl in miphunpawl an co ding ih,
Khawpi ṭhingpawl kha minung umnak ah an tuah ding.
4 «Ṭih hlah, ziangahtile na ning a zak lo ding;
Na mithmai sia fawn hlah, ziangahtile ningzahter na si lo ding;
Ziangahtile na no laiih na ningzahnak na hngilh ding ih,
Na nuhmei sinak hminsiatnak cu na cîng lo ding.
5 Ziangahtile nangmah a lo tuahtu cu na pasal a si,
A hmin cu ralkap rualpawlih Jehovah a si,
Nangmah tlentu cu Israel-ih Mi Thianghlim a si;
Anih cu leilung pumpi Pathian tiih kawh a si.
6 Ziangahtile thlauthlak mi nunau thinna-ih um bangin le,
Vāng lai nupi, hnawn zo mi kawhkirsal bangin,
Pathian in a lo ko,» Jehovah in a ti.
7 «Ziangahtile camkhatte lawng ka lo thlauthla,
Asinan a nasazet mi zahngainak in ka lo fĭnkhawm leh ding.
8 Thinlingnak luangliam ruangah na lakah camkhatte sung ka hmai ka thup;
Asinan catuan ngilneihnak in na parah zahngainak ka nei ding,»
A lo tlentu Jehovah in a ti.
9 «Ziangahtile himi cu ka hrangah Noah san laiih tipi bangtuk a si;
Ziangahtile Noah san laiih tidaipawl in leilung an khuh nawn lo ding tiih sia ka rak săm vek khan,
Na parah ka thin a heng nawn lo ding ih a kawk khal ka lo kawk nawn lo ding tiah sia ka săm a si.
10 Tlangpawl cu ṭhawnaw in,
Tlangmualpawl cu hnîn khal hai sehla,
Ka ngilneihnak cun a lo suahsan lo ding ih,
Ka hnangamdaihnak thukham a hnîn fawn lo ding,» tiah na parih zahngainak neitu Jehovah in a ti.
11 «Maw nang zăwnzaihter mi,
Thlisia ih thên rero mi le hnĕm táwng lo mi,
Ngai hnik, na lungtopawl cu răwng a phunphun nei lung mankhungpawl in ka rĕm ding ih,
Na lungphumpawl cu safaira thawn ka phum ding.
12 Na luanglu cu rubi in ka tuah ding,
Na kăwtkapawl cu khrisṭal in,
Cule na phăr hmuahhmuah cu lung mankhung hlir in ka tuah ding.
13 Na fātepawl hmuahhmuah cu Jehovah in a zirh hai ding ih,
Na fātepawlih hnangamnak cu nasatak a si ding,
14 Dingfelnak ih dĭnhngeh na si ding;
Palbĕtnak ihsin hla zetah na um ding, ziangahtile na ṭih riai lo ding;
Thil rapthlak ihsin na hla fawn ding, ziangahtile cumi in a lo naih lo ding.
15 Ngai hnik, keimai ruangah si loin, an pungkhawm tengteng ding.
Nangmah lo doih a pungkhawmawtu pauhpauh cu,
Nangmai ruangah an tlu ding.
16 «Ngai hnik, meisa sungih meilingpawl zâptu soser ka dĭn a si,
A hna hrangih hriamhrei sersuaktu cu;
Cule siatsuah dingin mi rămtu ka dĭn fawn.
17 Nangmah dokalhih hriamhrei sersuah pakhat hman a hmuingil lo ding ih,
Thuṭhennak ih nangmah dokalhih a thotu lei pauhpauh cu thiam lo na coter hai ding.
Himi cu Jehovah siahhlawhpawlih ro a si ih,
An dingfelnak cu keimah hnenin a si,» tiah Jehovah in a ti.

55

Tihâlpawl Pathian in a Sawm

1 «Aw! Tihâl mi pauhpauh,
Tidai umnak ah ra uh;
Cule nang paisa nei lo,
Ra uh, lei uhla ei uh.
A si, ra uh, paisa lo le man loin,
Sabitzu le hnawi ra lei uh.
2 Ziangahso rawl a si lo mi hrangah paisa nan ^ahmang ih,
Puarnak a si lo mi hrangah nan hlawhmanpawl nan hman?
Fimkhur zetin i ngaithla uhla, a ṭha mi cu ei uh,
Cule nan nunnak cu neihnunnak ah lungsi zetin um seh.
3 Nan hna tháwng uhla, ka hnenah ra uh.
Ngaithla uh, cule nan nung ding;
David hnenih lăngter mi zahngainak hnget vekin,
Na hnenah catuan thukham ka tuah ding.
4 Ngai hnik, mipi hrangah thutheihpitu ah le,
Mipi hrangih hruaitu le thupetu ah amah cu ka ruat zo.
5 Ngai hnik, na theih lo mi miphun ka ko ding ih,
Jehovah na Pathian ruangah le,
Israel-ih Mi Thianghlim ruangah;
Na theih lo mi miphunpawl na hnenah an ra tlân ding;
Ziangahtile anih in a lo sunlawih zo.»
6 Hmuh theih a si laiah Jehovah cu hawl uhla,
A nai laiah amah cu ko uh.
7 Misualrál in a lamzin tlansan sehla,
Midingfel lo pa in amai ruahnakpawl tlansan seh;
Jehovah hnenah ra kirsal sehla,
Anih in a parah zahngainak a nei ding,
Cule kan Pathian hnenah ra kirsal seh,
Ziangahtile anih in a ngaidam tuk ding.
8 «Ziangahtile ka ruahnakpawl cu nan ruahnakpawl a si lo ih,
Nan lamzin khal ka lamzinpawl an si lo,» Jehovah in a ti.
9 «Ziangahtile vanpawl cu leilung hnakih a sansawn vekin,
Ka lamzinpawl cu nan lamzinpawl hnakin an sângsawn ih,
Ka ruahnakpawl cu nan ruahnakpawl hnakin.
10 Ziangahtile van ihsin ruahpi le vur a rung tla ih,
Leilung cîarter loin,
Cu tawkah a kirsal lo,
Thlai a keuhter ih a cerhter,
Cutin thlai cingtu hnenah ci a pe ih,
Eitu hnenah rawl a pek bangin,
11 Ka kâ ihsi suak ka kamsuakthu cu a si;
A lakin ka hnenah a kirsal lo ding,
Ka duh mi a tuahsuak sawn ding ih,
Ka thlahnak san hrangah a hlensuak ding.
12 «Ziangahtile aipuang zetin nan fehsuak pei ih,
Thlangam zetin hruai nan si ding;
Tlangpawl le tlangmualpawl in
Na hmaiah lungawiaipuangin an ausuak ding ih,
Ramlak ih thingkung hmuahhmuah in an za an bēng ding.
13 Hling aiah mirang far thing an kho ding ih,
Hrambûar aiah hadas thing a kho ding;
Cule cumi cu Jehovah cīn ringring nak,
Thaihloh a si lo ding mi kumkhaw hminsinnak a si ding.»

55:2^a hmang: A ṭawng hrampi ah cun, «ngun nan thlai» ti a si.

56

Miphunpawl hrang Rundamnak

1 Jehovah in hitin a ti:
«Diknak kaihnget uhla, dingfel zetin tuah uh,
Ziangahtile ka runsuahnak cu a ra thleng zikte ih,
Ka dingfelnak cu lăngter a si ding.
2 Himi a tuahtupa le,
Cumi a kaihngettu minung fapa cu mithlawsuak an si;
Sabbath bawrhbangter lo ih a ultu le,
Thil ṭhalo tuah lo ih a kut a kilkhawitu cu mithlawsuak an si,» tiin.
3 «Jehovah in a mipawl hnen ihsin in thliardang verver,» tiin,
Ram dang fapa Jehovah a thluntu in ṭawng hlah seh;
Cun tilper mi khal in,
«Ngai hnik, kei cu thingkung ro men ka si,» ti hlah seh.
4 Ziangahtile Jehovah in hitin a ti:
«Ka Sabbath-pawl ultu tilperpawl le,
Ka lunghmui zawng hriltupawl le,
Ka thukham fekteih a kaitupawl hnenah,
5 Ka inn le ka hruang sung rori ah
Fapapawl le fanupawl sinak hnakih ṭhasawn
Hmin le cinken ringring nak an hnenah ka pe ding.
A hlorál dah lo ding mi catuan hmin ka pe hai ding.
6 «Amah rian dingih, Jehovah a rak thluntu le,
Amai sál si dingih Jehovah hmin duhdawt dingih,
Sabbath bawrhbangter lo ih a ultu kip le,
Ka thukham fekteih a kaitu,
Ram dang mipawl khal,
7 Anmah rori cu ka tlang thianghlim ah ka hruai hai ding ih,
Ka thlacamnak inn ah anmah cu ka aipuangter hai ding;
An meiur thilhlănpawl le an thawiawknakpawl cu,
Ka biakṭheng ah cohlan an si ding;
Ziangahtile ka inn cu miphun hmuahhmuah hrangih thlacamnak inn tiah kawh a si ding,» tiin.
8 Hnawhsuak mi Israel hruaikhawmtu Bawipa Jehovah in,
«A hnenih hruaikhawm zo mipawl hleiah,
A hnenah mi dang ka hruaikhawm leh ding,» a ti.

Pathian in Misualrálpawl a Mawhthluk

9 Nannih ramlak ramsa hmuahhmuah tla,
Eirál ṭheh dingin ra uh,
Nannih tupi sungih ramsa hmuahhmuah.
10 A rak kilvengtupawl cu mitcaw an si,
An zaten theihnak nei lo an si;
An zaten aw nei lo uico an si,
An bo thei lo;
An it, an zau, sĭng hmang mi an si.
11 A si, annih cu khawh ti nei lo uico duhham an si.
Cule annih cu theithiam thei lo tuukhāltu an si;
An zaten anmai zin ah an pial,
Mi kip in diklo zetih hlawknak an dawi.
12 «Ra uh, sabitzu ka rak keng ding ih,
Ri thlekthlek ko zureu kan in pei;
Thaisun khal tuihsun vek a si ding ih,
A nasa sinsin ding,» tiah an ti cio.

57

A Santlailo mi Israel-ih Milem Biaknak

1 Midingfel a hlorál ih,
Zohman in an pawisa lo;
Zohman ih an ngaihtuah lo laifangah
Zahngai thei mipapawl lakhloh an si,
Ziangahtile midingfel cu siatnak lak ihsin lakhloh a si.
2 Anih cu daihnak ah a lut;
Dingnak ih a fehtupawl cu an ihkhun ah an cawlhahdam ṭheu.
3 «Asinan nannih dawithiamnuih fapapawl,
Nannih uire le hlawhhlâng cithlahpawl,
Hi tawkah ra uh!
4 Zo so nan hnihsan?
Zo dokalhin so kâ nan ān ih,
Lei nan khakhnawh?
Nannih cu dānpahbălnak fā le,
Diklonak cithlah nan si lo maw?
5 Thingbŭknîm hnuai kip ih pathianpawl thawn sakhaw hursualnak tuahin,
Phaikuampawl ah
Lungpi khĭng hnuaiih naute thattu nan si lo maw?
6 Tivate ^alungto ngilpawl lakah
Na covo a um;
Cupawl, cupawl cu na covo an si!
Cupawl hnen rori ah Inding Thilhlăn na rak tawih,
Thlairawl thilhlăn na rak hlan.
Cupawl ah cun ka thin a na lo ding maw?
7 Tlang sâng le nasa ah
Na ihkhun na rak hung;
Cutawk tiangin raithawinak hlan dingah
Na rak kaiso.
8 Sângka le sângka biang phenah
Na hrangah hngilhlonak na rak tung;
A taktak ah cun keimah tlansan in,
Na taklawngnak na hlîpaw ih,
An hnenah na so;
Na ihkhun na kauh ih
Anmah thawn nan remaw;
An taklawngnak na hmuhnak an ihkhun na ngaina.
9 Hriak thawn siangpahrang na pan ih,
Na rimhmuipawl na luarter sinsin;
Na palaipawl cu hlapi ah na thlah hai ih,
Sheol tiangin an ṭumthla.
10 Na lamzin a hlat ruangah na cau,
Cuticingkhalin nang in, ‹Ruahsan ding a um lo,› na ti dah lo.
Cahnak thar na hmuh ruangah na cau lo.
11 «Thuphan na rel, in hngilh, keimah ngaihsak loih na um tikah
Zo so na huphurh ih na ṭih?
Reipi lai ihsin daiteih ka rak um ruangah in ṭih lo a si lo maw?
12 Na dingfelnak le
Na hnaṭuanpawl ka thăn ding,
Asinan na hlawkpi cuang lo ding.
13 Na ausuak tikah,
Na khawlkhawm mi milempawl in lo run hai seh.
Asinan cupawl cu thli in a hrănhlo ṭheh hai ding,
Thaw in a semhlo hai ding.
Asinan keimah i rinsantu cun ram a co ding ih,
Ro ah ka tlang thianghlim a co ding.»

57:6^a lungto ngilpawl: Thlairawl le milai cithlah ṭhatnak pathianpawl hmuhsaknak a si.

Dungtawlh Tidamnak

14 Cule mi in,
«Sûngpâwng uh! Sûngpâwng uh!
Lamzin rak sial uh,
Ka mipawl lamzin ih khamtu kha hlăwn uh,» a ti ding.
15 Ziangahtile Micungnung le Cawisan mi Pa
Kumkhuaih nung, a hmin Mithianghlim ti mi cun hitin a ti:
«Mităngdawr thinlung ṭhangphawk dingin le,
Lungkuaipawl thinlung ṭhangphawk dingin,
Hmun sâng le hmun thianghlim ah le,
Lungkuai le mităngdawr pawl hnenah ka um.
16 Ziangahtile ka do kumkhua hai lo ding ih,
Ka thinheng ringring fawn lo ding;
Ziangahtile ka hmaiah thlarau cu a hlawhsam ding ih,
Ka tuah mi nunnakpawl khal an hlawhsam ding.
17 A duhhamnak mawhsualnak ruangah,
Ka thin a heng ih amah cu ka vua;
Ka thup ih ka thin a heng,
Cule a thinlung duhdān in a pialhlo.
18 A nundān ka hmu zo ih, amah ka damter ding;
Amah ka hruai fawn ding ih,
Amah le amah ninghanpitupawl hnenah hnĕmnak ka thartersal ding.
19 «Kei in hmur rah ka sersiam:
Remnak, lamhla ih a um mi hnenah le naite-ih a um mi hnenah remnak um seh,» Jehovah in a ti,
«Cule amah cu ka damter ding,» tiin.
20 Asinan misualrálpawl cu tifinriat so ut-o bangtuk an si,
Cumi cu a cawlh thei lo tikah,
An tipi in ciarbêk le hnawmpawl a hun hlăwnsuak.
21 «Misualrálpawl hrangah cun hnangamdaihnak a um lo,» tiah ka Pathian in a ti.

58

Rawlulh Dik

1 «Ringpin au aw, dĭm hlah aw;
Tuupa ki phawt bangin na aw thangter aw;
Ka mipawl hnenah an dānpahbălnak sim hai awla,
Jakob sungza hnenah an sualpawl khal.
2 Annih cun ni tin a hawl cu in hawl ve ko,
Ka lamzin theih ding khal nuam an ti,
Dingfelnak a tuahtu le an Pathian cīn le dān a thlauthla lo tu miphun bangin.
Annih in diknak cīn le dān in sut;
Pathian pan ding khal nuam an ti.
3 ‹Ziangruangah so rawl kan ul ih in rak hmuh lo?
Ziangruangah so kan nunnak kan zawnzaiter ih na rak theih lo?› tiah an ti.
«Ngai hnik, nan rawlulh ni ah năwmnak nan hawl ih,
Nan hlawhfa hmuahhmuah nan ṭuanbāngter.
4 Ngai hnik, toaw ding le êlaw ding le
Kuttum sualrál thawi mi thăwng dingin a si rawl nan ulh.
Tlun sâng lamih nan aw theihtlak ding cun,
Tuihni vek si loih rawl nan ulh a ṭul.
5 Ni khat sung mi in an phahniamawk menmen hi maw si ka hril mi rawlulh cu?
Câlte bangih lu kûn le
Buri-puan sĭnih vutcâm lakih um hi maw si?
Hihi rawlulhnak tiin le Jehovah ih cohlantlak ni tiah na ti ding maw si?
6 «Diklo zetih ṭembĕt mipawl phelhsak le,
Hngawngkol hri hlihsak,
Palbĕt mipawl zalenter le,
Hngawngkol kip na khiahsak hi
Ka hril mi rawlulhnak cu a si lo maw?
7 Mirilrawngpawl na sang na hlawm ih,
Inn nei lo mifarahpawl na inn ah na hruai ih,
Taklawngih um na hmuh tikah na khuh ih,
Na hrinpipawl lakih an thuhawk lo ding hi a si lo maw?
8 Cun na tleu cu khawfingcat bangin a tleusuak ding ih,
Na harhdamnak cu zamrang zetin a ra pûtsuak ding;
Cule na dingfelnak cu na hmaiah a feh ding;
Jehovah ropitnak cu na dung lo khawrtu a si ding.
9 Cun na ko ding ih, Jehovah in a lo sâng ding,
Na auh ding ih anih in, ‹Hi tawkah ka um,› a lo ti ding.
Nan lakih hngawngkol le,
Kutzung ih mi khih le sualrál takih ṭawngpawl tla na lahlo ih,
10 Rilrâwngpawl hnenah na tirhsiang ih,
Zăwnzaihter mi thinlung na dirĕmter a si ahcun,
Na tleu cu thim ah a tleu ding ih,
Na thim cu sun laifang vek a si ding.
11 Jehovah in a lo kaihruai tlaitluan ding ih,
Khawkhen cān khalah na nunnak a lo diriamter ding,
Cule na ruhpawl a cakter ding;
Nang cu ti tawih mi hmuan bangtuk na si ding,
A tidai kâng dah lo mi tihna bangtuk na si ding.
12 Nan lakih mipawl in a ṭhing mi hmun hlunpawl an dĭnsal ding;
Nang in san tampi hrang lungphumpawl na tungdingsal ding;
Cule nang cu Khawkulh siatnak zawn Rĕmṭhatu le,
Cēnnak dingah Kăwtthler Rĕmṭhasaltu an lo ti ding.
13 «Ka ni thianghlim ah nangmai duh zawng ti ih,
Sabbath buar lo dingin na ke na kilkhawi ih,
Sabbath cu thinnăwmnak tiih na kawh ih,
Jehovah ni thianghlim cu na upat ih,
Nangmai lamzin zawh loin na upat ih,
Nangmai duhnak hawl fawn loin le,
Nangmai ṭawngkam men na rel lo a si ahcun,
14 Jehovah ah na nuamaw ding ih,
Leilung tlangmual sângpi pipawl ka lo cuangter ding,
Cule na pa Jakob-ih ro in ka lo câwm ding,
Ziangahtile Jehovah kâ in a rel zo,» tiin.

59

Pathian thawi Ṭhenawknak

1 Ngai hnik, Jehovah kut cu lo run thei lo dingin a tawi lo ih,
Lo thei thei lo dingin a hna khal a set fawn lo.
2 Asinan nanmai mawhsualnakpawl in nan Pathian hnenin a lo ṭhen ih,
Nan sualpawl in nan hnen ihsin a hmai a rak phen,
Cutin anih in a lo ngaithla hai lo ding.
3 Ziangahtile nan kut cu thisen thawn an bawrhbang ih,
Nan kutzung cu mawhsualnak in;
Nan hmur in thuphan a rak per;
Nan lei cu ngiaufiaunak a ṭawng bûarbo.
4 Zohman in diknak an hlâm lo ih,
Zohman in thutak ngĕnnak khal an tuah fawn lo,
Thil ṭhalo an vun ih mawhsualnak an hring.
5 Rulngân ti an ăwp ih maimăwm inn râng an tah;
An ti a eitu cu an thi ih,
A kek mi sung ihsin rulngân a hung suak.
6 An maimăwm inn râng cu sinfen ah an cang lo ding ih,
An hnaṭuan mi in an khuhaw lo ding;
An hnaṭuan cu mawhsualnak hnaṭuan an si ih,
Râwng zetih căngvaihnak cu an kut ah a um.
7 An ke cu thil ṭhalo lam panin a tlân ih,
Mawh nei lo thisen suah dingin an manhlap;
An ruahnak cu mawhsualnak ruahnak an si;
Khawhrălnak le siatralnak cu an lamzin ah an um.
8 Hnangamdaihnak lamzin an rak thei lo ih,
An lamzinpawl ah diknak hrimhrim a um lo;
Anmah in lamzin kĕlkawipawl an tuahaw;
Zokhal cuih lamzin a zawhtu cun hnangamdaihnak a thei lo ding.

Sualphuannak

9 Curuangah diknak cu kan hnen ihsin a hla ih,
Dingfelnak khal in in cîm bān lo;
Kannih in tleu kan hawl ih, ngai hnik thim kan hmu riangri!
Tleu kan hawl ih, thim ah kan vâk riangri.
10 Mitcaw bangin phăr kan cul duado ih,
Mit nei lo bangin kan dap duado;
Thim hmulhmak vekin sun laiah kan bah ih;
Kannih cu hmun ṭhing ih mithi vek kan si.
11 Kan zaten saváwm bangin kan hrûm ih,
Thuro bangin riahsia zetin kan ai;
Diknak kan hawl, asinan pakhat hman kan hmu lo;
Runsuahnak kan hawl, asinan cumi cu kan hnen ihsin a hla.
12 Ziangahtile kan dānpahbălnakpawl cu na hmaiah an pung deuhdeuh ih,
Kan sualpawl in kanmah dokalhin thu an theihter;
Ziangahtile kan dānpahbălnakpawl cu kan hnenah an um ringring ih,
Kan mawhsualnakpawl tla kan thei a si:
13 Thilsual tuahnak, Jehovah phatsannak,
Kan Pathian hawisannak,
Palbĕtnak le helnak thu kan relnak,
Thinlung ah thuphan pai ih ṭawngsuahnak pawl tla hi.
14 Diknak cu a hawikir ih,
Dingfelnak cu hlapi ah a va ding;
Ziangahtile thutak cu lamzin ah a tlu ih,
Rualrānnak cu a lut thei lo.
15 A si, thutak cu a hlawhsam ih,
Thil ṭhalo hawisantu cu hmuitin mi ah a tuahaw riangri.
Cun cumi cu Jehovah in a hmu ih,
Diknak um lo cun ^aa riah a siater.

59:15^a a riah a sia: A ṭawng hrampi ah cun, «mithmuh ah ṭhalo in a hmu,» ti a si.

Zion Tlentu

16 Anih in mi zohman an um lo ti a hmu ih,
Mi dang hrang thlacamsaktu an um lo cu a mang a bang;
Curuangah amai hrangih runsuahnak cu amai bân rori in a run thlĕn;
Cule amai dingfelnak in amah a tungding.
17 Ziangahtile anih in awmphaw ah dingfelnak a hruk ih,
Runsuahnak lukhum cu a lu ah a khum;
Hnipuan ah phubalaknak sinfen a hruh ih,
Kâwrfual ah ṭhahnemngainak a hruh.
18 An thil tipawl bangtukin a rūl hai ding,
Amah dodaltupawl hnenah aithawhnak a rūl ding,
Tipi kap tluanpawl khal kimten a rūl ṭheh hai ding.
19 Cubangtukin nitlaknak lam ihsin Jehovah hmin an ṭih ding ih,
Nisuahnak lam ihsin a ropitnak an ṭih ding;
Jehovah-ih thli in a hrăn mi tiva suar bangin amah cu a ra ding.
20 «Zion ah tlentu a ra ding ih,
Jakob tefapawl lakih dānpahbălnak hawisantupawl hnenah a ra ding,» Jehovah in a ti.

21 Jehovah in, «Kei ka hrangah cun, an hnenih ka thukham cu hihi a si,» tiah a ti: «Na parih um ka Thlarau le na kâ ih ka ret mi ka kamsuakthupawl cun atu ihsin kumkhuaih kumkhua tiangin na kâ, na tesinfapawl kâ le na tesinfapawlih tesinfapawl kâ suahsan hlah seh,» tiah Jehovah in a ti.

60

Zion Ropitnak

1 Tho awla, êngsuak aw;
Ziangahtile na tleu a ra thleng zo!
Cule Jehovah ropitnak cu na parah a rung suak a si.
2 Ziangahtile ngai hnik, thim in leilung a khuh ding ih,
Thim thûkpi in minungpawl a khuh ding;
Asinan Jehovah cu na tlunah a tho ding ih;
Na parah a ropitnak hmuh a si ding.
3 Na tleu ah miphunpawl an ra ding ih,
Siangpahrangpawl cu na ra suahnak êng ah an ra ding.
4 «Na kimvel vun cuan awla, zoh hnik;
An zaten an pungkhawm ih na hnenah an ra;
Na fapapawl cu a hlatnak ihsin an ra ding ih,
Na fanupawl cu na cawi hai ding.
5 Cun na hmu ding ih tleu ah an cang ding,
Cule na thinlung cu aipuangin a hlim ding;
Ziangruangahtile tifinriat lennak cu na lamah an ra her ding ih,
Miphunpawlih lennak cu na hnenah an ra thleng ding.
6 Kalauk tam zetin na ram an khuh ṭheh ding ih,
Midian le Efah pawlih kalauk an khat ṭheh ding;
Cupawl hmuahhmuah cu Sheba ihsin an ra ding;
Sui le rimthaw an rak phur ding ih,
Jehovah thangṭhatnak an phuang ding.
7 Kedar ram ih rante hmuahhmuah cu na hnenih fĭnkhawm an si ding,
Nebaioth ram ih tuucangpawl in an lo rian ding;
Cohlan mi siin ka biakṭheng ah an kai ding ih,
Ka ropitnak inn cu ka sunlawih ding.
8 «Khawdur bangih zuang le,
Thuro bangih an riahnak pantu cu zo so an si?
9 Tipi kap tluanpawl cun in hngak tengteng ding;
Cule Jehovah na Pathian hmin hrangah le,
Israel-ih Mi Thianghlim hrangah,
Hla zetih um na fapapawl, an sui le an ngun pawl an zawngih rak keng dingin,
Tarshish lăwngpawl cu a hmaisabikah an ra ding,
Ziangruangahtile anih in a lo sunlawih zo.
10 «Ram dang mipawl in na hruangkulh an dâwl ding ih,
An siangpahrangpawl in na rawng an bawl ding;
Ziangahtile ka thinlingnak in ka rak lo vua,
Asinan ka duhsaknak in na parah zahngainak ka rak nei.
11 Curuangah na kăwtkapawl cu ăwn ringring an si ding;
An siangpahrangpawl in hmai an hruai ih
Mi in miphunpawl lennak an rak lo sum theinak dingah,
A sun a zanin khar an si lo ding.
12 Nangmah a lo rian lo tu miphun le lalram cu an hlorál ding ih,
Cuih miphunpawl cu an se nêknêk ding;
13 «Ka hmun thianghlim mawiter dingin,
Lebanon ropitnak, mirang far thing, far thing le ^atidhar thing pawl cu na hnenah an ra thleng ding;
Cule ka keretnak hmun ka sunglawiter ding.
14 A lo zawnzaitertupawlih fapapawl khal
Na hmaiih kûnin an ra ding ih,
A lo hmuhsuamtu hmuahhmuah cu na ke zaphak hramah an băwk ding;
Cule annih in Jehovah khawpi,
Israel-ih Mi Thianghlim-ih Zion an lo ti ding.
15 Nang cu thlauthlak le mi ih huat mi na si ih,
Zohman ih paltlăng si lo si khal awla,
Kumkhuaih mi cungcuangbik,
San khat hnu san khat aipuannak ah ka lo tuah ding.
16 Miphunpawlih hnawiti le siangpahrangpawlih hnawiti na in ding;
Keimah, Jehovah cu a lo runsuaktu le
A lo tlentu, Jakob-ih Micak Pa ka si ti in thei ding.
17 Dar aiah sui ka rak keng ding,
Thir aiah ngun ka rak keng ding,
Thing aiah dar le lungto aiah thir ka rak keng ding.
Hnangamdaihnak cu na bawi ah ka tuah ding ih;
Dingfelnak cu na thuṭhentu ah ka tuah ding.
18 Na ram ah thahrumsuahnak theih a si nawn lo ding ih,
Na ramri kulh sungah ṭhinnak le siatbălnak khal theih an si nawn lo ding;
Na hruangpawl cu Runsuahnak tiin le,
Na kăwtkapawl cu thangṭhatnak tiin na ko ding.

60:13^a tidhar thing: hingkung fate a si, a hnah a bŭk ih a hring ringring. Lebanon tlang ah a kho.

Pathian cu a Mipawlih Sunlawinak a Si

19 Ni cu sun ah na hrangih tleu a si nawn lo ding ih,
Êng hrangah thlapi khal in tleu a lo pe nawn fawn lo ding,
Asinan Jehovah cu na hrangah catuan tleu a si ding ih,
Na Pathian cu na ropitnak a si ding.
20 Na ni a tla nawn lo ding ih,
Na thlapi a liam nawn fawn lo ding,
Ziangahtile Jehovah cu na catuan tleu a si thlang ding ih,
Na ninghannak nipawl an cem thlang ding.
21 Na minungpawl hmuahhmuah khal midingfel an si ṭheh ding,
Annih in ram cu ro ah an luah kumkhua ding,
Anmah cu hngeṭêk vekin ka phun hai ding,
Anmah cu ka kut hnaṭuan mi an si,
Cutin keimah cu sunlawih ka si thei ding.
22 A tebik cu 1000 ah a hung cang ding ih,
Mitenaubik cu miphun cak zetah a hung cang ding.
Keimah, Jehovah in a tikcucān teah cumi cu ka hmanhmawhter ding,» tiin.

61

Jehovah Duhsak Kum

1 Bawipa Jehovah Thlarau cu ka parah a um,
Ziangruangahtile mifarahpawl hnenih thuthangṭha sim dingah
Jehovah in hriak i thih;
Anih in thinlung kekkuaipawl damter dingah le,
Sáltangpawl hnenih zalĕnnak phuang dingah le,
Thawngtlapawl hnenah zalĕnnak thu phuang dingah,
2 Jehovah duhsak kum le,
Ka Pathian phulei samnak thu phuang dingah,
A ṭap mipawl hmuahhmuah thlangăm dingin,
3 Zion ih a ṭap mipawl hnem dingah,
Vutcâm aiah lu ceimawinak pe dingah le,
Ṭahnak aiah aipuannak hriak pe dingah,
Nguinak thlarau aiah thangṭhatnak sinfen pe dingah i rak thlah.
Cutin annih cu dingfelnak thingkung tiih kawh an si ding,
Amah sunlawih a si theinak dingah, Jehovah phŭn mi ti an si ding.
4 Cule annih in a siat mi hmunpawl an dĭnsal ding,
Hlanih a răm zo mipawl an tungding ding ih,
San tampi a răm zo mi, khawpi siatpawl an rĕmsal ding.
5 Mi dang an ding ding ih nan rante rualpawl an khāl ding,
Cule ram dang mipawl cu nan lei lettu le nan sabit hmuan kilkhawitu an si ding.
6 Asinan nannih cu Jehovah puithiam tiah hmin an lo sak ding,
Annih in nannih cu kan Pathian siahhlawh tiah an lo ti ding.
Nannih in miphunpawlih lennak nan ei ding ih,
Anmai ropitnak ah tluang nan khâwng ding.
7 Nan mualpho aiah alet ih upatnak nan co ding ih,
Mualphonak aiah an covo ah lungawiaipuangin an um ding.
Curuangah an ram ah alet hnih in an nei ding;
Catuan aipuannak cu anmai ta a si ding.
8 «Ziangahtile kei, Jehovah hin diknak ka ngaina;
Meiur Thilhlăn hrangih misuamnak ka hua;
Rinum zetin an lawmman ka pe hai ding ih,
Anmah thawn catuan thukham ka tuah ding.
9 An tesinfapawl cu miphunpawl lakah theih an si ding ih;
An cithlahpawl cu minungpawl lakah theih an si ding.
Anmah hmutu hmuahhmuah in annih cu Jehovah ih thluasuah mi cithlah an si ti an thei ding,» tiin.
10 Jehovah ah nasazetin lungawiaipuangin ka um ding,
Ka nunnak cu ka Pathian ah a aipuang ding;
Ziangahtile mo neitu cu lu ceimawinak ih a ceiawk vek le,
Mo cu a ceimawiawknak mawi zetzet thawi a ceiawk vekin
Anih in runsuahnak sinfen i hruhter,
Dingfelnak kâwrfual in i tuam.
11 Ziangahtile leilung in cerhno a suah vek le,
Hmuan in a sungih an tuh mi a keuhter vekin,
Bawipa Jehovah in miphunpawl hmaiah dingfelnak le thangṭhatnak a keuhter ding.

62

Zion Hmin Thar

1 A dingfelnak cu tleu vekin a suak ih,
A runsuahnak cu a alh mi meifar vekih a suah hlanlo cu,
Zion ruangah daiten ka um men lo ding ih,
Jerusalem ruangah ka cawl men fawn lo ding.
2 Miphunpawl in na dingfelnak an hmu ding ih,
Siangpahrang hmuahhmuah in na ropitnak an hmu ding.
Jehovah kâ in hmin a lo sak ding mi,
Hmin thar in an lo ko ding.
3 Nang cu Jehovah kut ah
Sunlawinak lallukhum na si ding ih,
Na Pathian kut ah lallukhum ropi na si ding.
4 Nang cu Thlauthlak mi an lo ti nawn lo ding ih,
Na ram cu a ṭhing mi ram an ti nawn lo ding,
Nang cu ^aKhefsivah an lo ti ding ih, na ram cu ^bBeulah an ti sawn thlang ding;
Ziangahtile Jehovah cu nangmah ah a nuamaw ih,
Na ram cu ṭhit a si ding.
5 Ziangahtile tlangval in fala himte a ṭhit bangin,
Na fapapawl in an lo ṭhi ding;
Cule mo neitu cu mo parih lungawiaipuangih a um vekin,
Na Pathian cu na parah lungawiaipuangin a um ding.
6 Maw Jerusalem, na hruangpawl parah ralvengtupawl ka ret zo;
A sun a zanin daiten an um men lo ding.
Nannih Jehovah a hlâmtupawl daiten um hlah uhla,
7 Leilung ah Jerusalem cu thangṭhatnak ih a tuah hlanlo le,
A dĭnngah hlanlo anih cu cawlter hlah uh.
8 Jehovah cun a vawrh lam kut in sia a săm zo ih,
A cahnak bân in sia a săm zo:
«Na ralpawl ei dingah na rawl ka pe nawn hai hrimhrim lo ding;
Cule ram dang mipawl in na ṭuanbăng mi, na sabitzu thar an in lo ding,
9 Asinan cumi a sengtupawl cun an ei ding ih,
Jehovah an thangṭhat ding;
A khawmtupawl in ka tualrawn thianghlim ah an in ding,» tiin.
10 Fehtlăng uh, kăwtkapawl ihsin fehtlăng uh!
Mipi hrangah lamzin sial uh;
Sûngpâwng uh,
Zinpi kha sûngpâwng uh!
Lungtopawl kha hlăwn uhla, miphunpawl hrangah thantar khaisâng uh!
11 Ngai hnik uh, Jehovah in leitlun dĕng hnenah,
«Zion fanu hnenah,
‹Ngai hnik, na runsuahnak a nâi zo,
Ngai hnik, lawmman cu amai hnenah a um ih,
Ṭuan man cu a zawngah a um,› ti aw,» tiah a phuang.
12 Cule annih cu Jehovah ih tlen mi,
A thianghlim mi minung tiah an ko ding;
Cule nang cu hawlsuah mi,
Thlauthlak lo mi Khawpi tiah an lo ti ding.

62:4^a Khefsivah: Ka lungsinak cu amah ah a um tinak a si.

62:4^b Beulah: Hebru ṭawng ih a sullam cu «Ṭhit mi tinak a si» tinak a si.

63

Pathian Phuba Lâk Ni le Runsuah Ni

1 Himi Bozrah khua ihsi a tle mi sinfen thawi Edom ram ihsi a ra mi,
Cuvek sinfen hruh ih ropi tak,
A cahnak ropitnak thawi a ratu hi zo so a si?
«Mi runsuak dingih, dingfelnak ih thusimtu keimah hi ka si,» tiin.
2 Ziangahso na sinfen a sen ih,
Sabit sawrnak khur ih cīl mi bangih nan sinfen an um?
3 «Keimah te lawngin sabit sawrnak ka pălsawr ih,
Miphunpawl lak ihsin ka zawngah zohman an tel lo.
Ziangahtile ka thinhengnak in annih cu ka pâlsawr ih,
Ka thinsosa in annih cu ka cīl hai;
An thisen cu ka sinfen parah a ṭĭk ih,
Ka angkifual hmuahhmuah a hnih ṭheh.
4 Ziangahtile phulei samnak ni cu ka thinlung ah a um ih,
Ka tlennak kum a ra thleng zo.
5 Khua ka cuan ih, ngai hnik, bawmtu ding an um lo,
Cule ṭanpitu an um lo ruangah ka mang a bang;
Curuangah keimai bân rori in ka hrangah runsuahnak a thlĕn ih;
Keimai thinsosatnak rori in in tuahsuakter.
6 Ka thinhengnak in miphunpawl a pălsawr hai,
Ka thinsosatnak in ri ko ka tuah hai ih,
An cahnak cu leilung ah ka dirthla.»

Thlacamnak le Thangṭhatnak

7 Jehovah-ih lainatduhdawtnak le
Jehovah thangṭhatnak cu
Jehovah ih in pek mi hmuahhmuah zulhin ka thăn ding.
A lainatduhdawtnak tampi bangtukin,
A zahngainak bangtukih a pek hai mi
Israel sungza parih a ṭhatnak ropi tak khal.
8 Ziangahtile anih in, «Thungaiten annih cu ka mi, thuphan per lo ding mi ka tefa an si,» tiah a ti.
Cutin anih cu an rundamtu ah a cang.
9 Anih cu an zawnzăihnak hmuahhmuah ah tizawnzăih a si ve ih,
A hmaika ihsi thlah mi Vancungmi in a run hai;
Anih in a duhdawtnak le a zangfahnak in a tlen hai;
Cule khuahlan cān hmuahhmuah ah
Anih in a phur hai ih a thiar hai.
10 Asinan annih in a Thlarau Thianghlim cu an do ih a thin an nater;
Curuangah anih cu anmah dokalhin ral vekin a her ih,
Anmah cu a do hai.
11 Cun anih in khuahlan,
Mosi le a mipawl san lai a cîng ringring,
A tuu rual khāltu hmangih
Anmah tifinriat sung ihsin hruaisuaktu kha khuiah so?
An sungih a Thlarau Thianghlim rettu,
12 A bân sunglawi thawi,
Mosi vawrh lam kut hmangih anmah hruaitu,
Amai hrangah catuan hmin tuah dingih
An hmaiih tidai ṭhencat ih,
13 An bahlonak dingih
Ramṭhing ih ráng hruai vekih,
Ti thûk zetih anmah hruaitlăngtu kha khuiah so?
14 Phaikuam ih ramsa a sukthlak bangin,
Jehovah Thlarau in anih cu a cawlhter,
Cutin nangmah le mah hmin sunglawi tuahaw dingin,
Na mipawl na rak hruai hai.

Zahngainak hrang Thlacam

15 Van ihsin run thlir awla,
A thianghlim le a ropi mi na cēnnak ihsin run zoh hnik.
Na ṭhahnemngainak le na cahnak,
Na thinlung ih in ngainak le ka lamih na zahngainakpawl kha khuiah so?
Cupawl cu sūp an si ṭheh maw si?
16 Abraham in in ngaihsak loin,
Israel in in thei lo hmansehla,
Rinhlelh ding um loin nang cu kan Pa na si.
Maw Jehovah nang cu kan pa na si;
Khuahlan ihsin in tlentu ti mi cu na hmin a si;
17 Maw Jehovah ziangahso na lamzin ihsin in rak pialter ih,
Nangmah ṭihnak ihsin kan thinlung na hakter?
Ro ih na co mi hnámpawl,
Na siahhlawhpawl ruangah hin ra kirsal aw.
18 Na mithianghlimpawl cun cumi cu rei lo te sung lawng an co;
In dodâltupawl in na hmun thianghlim an cīl men.
19 Kannih cu na rak uk dah lo mi le,
Na hmin ih kawh dah lo mi bangtukah kan cang aw.

64

1–2 Na doralpawl hnenah na hmin theihter ih,
Na hmaika-ih miphunpawl an khŭrhnak dingah
Meisa in thinghâr a kăng vek le
Meisa in tidai a soter lai vek khan
Na hmaika-ah tlangpawl an khŭrhnak dingah
Vanpawl thlekin rung ṭum hram cila maw!
3 Kan beisei băn lo mi thil maksakpawl na tuah laiah khan,
Na rung ṭum ih,
Na hmaika-ah tlangpawl an khur.
4 Ziangahtile amah hngaktu hrangih cāngvaitu,
Nangmah siarlo Pathian zohman,
Leilung sēmtir ihsi thăwkin,
Annih in an hna in an thei dah lo,
An hna ah a lut dah fawn lo ih,
An mit khal in a hmu dah fawn lo.
5 Nang cun milungawiaipuang le dingfelnak a tuahtu le,
Na lamzinpawl ah nangmah a lo máng ringring tu cu na rak cohlang ṭheu.
Kan rak sual ih, himi lamzinpawl ah kan umpeh vivo ruangah,
Ngai hnik, nang cu na thin a heng;
Rundam kan si thei ding maw?
6 Asinan kan zaten thil thianglo bangtuk kan si ih,
Kan dingfelnak hmuahhmuah cu ^apuansia thianglo bangtuk an si;
Kan zaten thinghnah vekin kan vuai ih, Kan mawhsualnakpawl in thli bangin in hrănhlo ṭheh.
7 Cule nangmah lo pāwk dingih căwkthoawtu le,
Na hmin lo hlâmtu zohman an um lo;
Ziangahtile kan lakah na hmai na thup ih,
Kan mawhsualnak ruangah in siatsuah ṭheh a si.
8 Asinan atu ah, Maw Jehovah,
Nang cu kan Pa na si;
Kannih cu bellei kan si ih, nang cu beltuahtu na si;
Kan zaten nangmai kutsuak kan si.
9 Maw Jehovah, thinsoin um hlah aw,
Mawhsualnak khal kumkhuain cîng ringring hlah;
Ngai hnik, zangfahten in zoh hnik law, kan zaten na mi kan si!
10 Na khawpi thianghlimpawl cu ramṭhing ah an cang,
Zion cu ramṭhing ah a cang,
Jerusalem khal a răm ṭheh.
11 Kan pupápawl ih an rak lo thangṭhatnak hmun,
Kan temple thianghlim le mawi cu
Meisa ih urkăng a si;
Cule kan thil hlúpawl hmuahhmuah cu an ziamrál ṭheh.
12 Maw Jehovah, hi thilpawl a thlen hnu khalah na um men hrih ding maw?
Daiten um in nasazetin in zawnzaiter ding maw si?

64:6^a puansia thianglo: Nunau thi neih laiih an dăm mi puan a si.

65

Thuṭhennak le Rundamnak

1 «I sut dah lo tupawl ih hawl ka si;
I hawl dah lo tupawl ih hmuh ka si.
Ka hmin in hlâm dah lo tu miphun hnenah, ‹Hinah ka um, hinah ka um,› tiah ka ti.
2 Anmai ruahnak zulhih
Thil ṭhalo lamzin a zawhtu
Helhmang minungpawl hnenah sunvu-in ka kut ka dawh,
3 Hmuan sungah raithawiin le,
Leirawh ih dawl mi biakṭheng parih rimhmui urin
Hi minungpawl cun ka hmaika rori ah thinheng camcin dingin in turhnawh.
4 Annih cu thlān lakah zanvar an to,
Annih cun văwksa an ei ih,
An bungbel sungah sa thianglo ningnawi a um;
5 ‹Nangmah ten um aw,
I rak naih hlah,
Ziangahtile nang hnakin ka thianghlim deuh a si!› titu an si.
Hipawl cu ka hnarkaw sungih a um mi meikhu,
Sunvu-ih a alh ṭheu mi meisa an si.
6 Ngai hnik, ka hmaika-ah cumi cu ngan a si:
Daiten ka um men lo ding, ka lehrūl hai sawn ding,
Anmai ṭāng sung rori ah ka lehrūl hai ding.
7 Nanmai mawhsualnak le nan pupápawlih mawhsualnak cu ṭum khat ah ka lo lehrūl ding,»
Jehovah in a ti,
«Tlang parih rimhmui a urtu le
Tlangmual parih i thangsiattu an si;
Curuangah an hnaṭuan hmaisa kha anmai ṭāng sungah ka tahsak hai ding,» tiin.
8 Jehovah in hitin a ti:
«Sabit rah bawr ah sabitzu thar an hmu ih,
Mi in, ‹Kha kha siatsuah hlah uh,
Ziangahtile cu tawkah malsawmnak a um,› an ti vekin,
Ka siahhlawhpawl zarah cutin ka tuah ding.
An zate cun ka siatsuah ṭheh lo ding.
9 Jakob ihsin tesinfa ka suakter ding ih,
Judah ihsin ka tlangpawl ro ih cotu ding mi pakhat ka suakter ding,
Cumi cu ka hril mi in a co ding ih,
Ka siahhlawhpawl cu tawkah an cêng ding.
10 In hawltu ka mipawl hrangah cun,
Sharon cu rante rual tlannak hmun a si ding ih,
Akor Phaikuam cu ranpi rual bawhnak hmun a si ding.
11 Asinan nannih cu Jehovah thlauthlatu,
Ka tlang thianghlim hngilhtu, ^aGad hrangih cabuai timlamtu le, ^bMeni hrangih Inding Thilhlăn timlamtu nan si.
12 Curuangah ralnâm hrangah ka lo ruatlawk hai ding ih,
Mi thattu hnenah nan zaten nan kûn ding;
Ziangruangahtile ka lo kawh laiah in rak sâng lo;
Ka lo biak laiah nan ngaithla lo;
Ka mithmuhah thil ṭhalo nan tuah sawn ih,
Ka duh lo zawng nan rak hril sawn,» tiin.

65:11^a Gad: Hebru ṭawng ih a sullam cu «ralkap burpi» simaw «vanneihnak» ti simaw a si. Mi hrekkhat cun hi Gad hi vanneihnak thlentu rairingpawlih pathian a si tiah an ti.

65:11^b Meni: Hmuitin mi thlentu rairingpawlih pathian.

13 Curuangah Bawipa Jehovah in hitin a ti:

«Ngai hnik uh, ka siahhlawhpawl cun an ei ding,
Nannih lawngte cu nan ril a râwng ding;
Ngai hnik uh, ka siahhlawhpawl cun an in ding ih,
Nannih lawngte cu nan ti a hâl ding;
Ngai hnik uh, ka siahhlawhpawl cu an ai a puang ding ih,
Nannih lawngte cu nan ning a zak ding,
14 Ngai hnik uh, ka siahhlawhpawl cu lungawinak thinlung thawn an au ding,
Nannih lawngte cu thinlung riahsiat ruangah nan ṭap ding,
Cule thinnat ruangah nan râk rero ding.
15 Nan hmin cu micamsiatnak hrangah ka mi hril hnenah nan tân ta ding;
Ziangahtile Bawipa Jehovah in a lo that ding ih,
A siahhlawhpawl cu hmin dangin a ko hai ding;
16 Cutin leilung ah mi hrangih malsawm diltu cun
Thutak Pathian hmin in a ti ding,
Cule leilung tlunah sia a sămtu cun,
Thutak Pathian hmin in sia a săm ding;
Ziangruangahtile harsatnak hmaisapawl cu hngilh ṭheh an si,
Ziangruangahtile cupawl cu ka mithmuh ihsin thuhhlo an si!

Van Thar le Leilung Thar

17 «Ziangahtile ngai hnik uh, van thar le leilung thar ka sersiam;
Cule a hmaisa cu cinken an si nawn lo ding ih, ruah an si nawn lo ding.
18 Asinan ka sersiam mi ah cun kumkhuain lungawi uhla lungawiaipuangin um uh;
Ziangahtile ngai hnik uh, Jerusalem cu lungawiaipuannak dingah ka sersiam ih,
A mipi cu năwmnak dingah.
19 Jerusalem ah lungawiaipuangin ka um ding ih,
Ka mipawl ah ka aipuang ding;
A sungah ṭah aw theih a si nawn lo ding ih,
Authawm khal theih a si nawn fawn lo ding.
20 Cu tawkah cun ni málte lawng a nung mi naute an um nawn lo ding ih,
Putar mai dam kum zât ding kimter lo an um fawn lo ding;
Ziangahtile kum 100 ih thi cu nauhak ih siar an si ding ih,
Misual kum 100 nung lo cu camsiat mi ih siar a si ding.
21 Annih in inn an sak ding ih an luah ding;
Annih in sabit hmuan an tuah ding ih a rah an ei ding.
22 Inn an sak ding ih mi dang in an luah lo ding;
Ka mipawl cu thingkung nun rei vekin an nung rei ding ih,
Ka mihrilpawl cu anmai kutsuak ah reipi pi lungawiaipuangin an um ding.
23 A lakin an ṭuanbāng lo ding ih,
Buainak hrangah tefa an hring fawn lo ding;
Ziangahtile annih cu Jehovah ih thlawsuah mi tesinfa an si ding,
Cule an cikuangpawl cu an hnenah an um ding.
24 Hitin a si ding
Annih ih in kawh hlanah, ka sâng hai ding;
Cule an ṭawng lai rero hmanah ka hna in ka thei hai ding.
25 Cinghnia le tuufa no cu hrampi an piattlang ding,
Kiosa in câwcang bangin cangpâwl a ei ding ih,
Leivut cu rul rawl a si ding.
Ka tlang thianghlim hmuahhmuah ah an tuahmawhaw lo ding ih, an siatsuahaw nawn lo ding,»

tiah Jehovah in a ti.

66

Thuṭhennak le Ruahsannak

1 Jehovah in hitin a ti:

«Van cu ka laltokham a si ih,
Leilung cu ka keretnak a si.
Ka hrangih nan sak ding mi inn cu khuiah so?
Ka cawlhnak hmun cu khuiah so?
2 Ziangahtile cuih thil hmuahhmuah cu ka kut ih ka tuah mi an si ih,
Cuih thil hmuahhmuah cu an ra um a si,» tiah Jehovah in a ti.
«Asinan hi thil pakhat, mifarah le a siraw duahdo mi lungput le
Ka kamsuakthu parih a khūr rero mi pa cu ka zoh a si.
3 «Câwcang thattu cu milai that tluk a si;
Tuufa no ih raithawitu cu uico hngawng tan tluk a si;
Thlairawl Thilhlăn hlantu cu vawk thisen hlan vek a si.
Rimhmui urtu cu milem thlawsuah pe tluk a si.
A si, anmai lamzin an rak hril vek cekci in le,
Anmai thil fihnungzapawl ah an thinlung a nuamaw,
4 Kei khal in anmai hrangah tisiatnak ka hril ding ih,
An parah an ṭih zawng ka thlengter ding;
Ziangruangahtile ka kawh hai tikah, zohman in in sâng dah lo;
Ka biak hai tikah an ngaithla lo;
Ka mithmuhah thil ṭhalo an rak tuah sawn ih,
Ka lungawi lo zawng an rak hril,» tiin.

5 Nannih a kamsuakthu parih a khūr rero tupawl, Jehovah kamsuakthu hi ngaithla hnik uh:

«A lo huatu nan unaupawl,
Ka hmin ruangih a lo dawisuaktupawl in,
‹Nan aipuannak kan hmuh theinak dingah,
Jehovah cu sunlawihin um seh,› tiah an ti.
Asinan annih cu ningzak ko tuah an si ding.
6 Khawpi ihsin thâwm celcel cu!
Temple ihsi authâwm cu!
A ralpawl kimcângteih a lehrūltu,
Jehovah authâwm cu!
7 «Anih cun fahrinnat a tuar hlanin nau a hring;
A nat a thawh hlanah,
Mipa a hring.
8 Zo in so cuvek thil a hna in a thei dah?
Cubangtuk thilpawl cu zo in so hmu dah?
Leilung hi ni khat ih hrinsuah a si pei maw?
Asilole hmakhatteah miphun a suak pei maw?
Ziangahtile Zion cun fahrinnat a tuar veten,
A fātepawl a hring.
9 Hrinter si loin, nau hrin cān ka thlengter pei maw? tiah Jehovah in a ti.
«Nau hringtertu hin an sūl ka phit ding maw? tiah na Pathian in a ti.
10 «Nannih amah duhdawtu hmuahhmuah tla Jerusalem zawngah lungawiaipuangin um uhla,
A zawngah lungawi uh;
Aipuan ruangah amah thawn lungawiaipuangin um uh,
Nannih amah ṭahtu hmuahhmuah tla;
11 A thlangamnak hnawi nan fawh ih nan dirĕm theinak dingah le,
Hnawiti ih khat hnawi hnangamten nan in theinak dingah a si,» tiin.

12 Jehovah in hitin a ti:

«Ngai hnik, daihnak cu tivapi bangin a hnen tiang ka kauter ding ih,
Miphunpawl sunlawinak cu tivate luang bangin a hnen tiang ka luangter ding.
Cun a hnawi nan fawp ding;
A lo pawm ding ih,
A khuk parah a lo lehpi ding.
13 Mi, a nu ih a hnĕm vekin kei khal in ka lo hnem hai ding;
Cule Jerusalem ah hnangamter nan si ding,» tiin.

Pathian Uknak le Aithawhnak

14 Himi nan hmuh tikah nan thinlung cu lungawiaipuangin a um ding ih,
Nan ruhpawl cu hrampi bangin an cerhno hluahhlo ding;
Jehovah kut cu a siahhlawhpawl hnenah theihter a si ding ih,
A ralpawl hnenah a thinaithawknak.
15 Ziangahtile ngai hnik, Jehovah cu meisa thawn a ra ding ih,
Phusîng bangin a ránglêngpawl thawn a ra ding,
A thinhengnak cu thinsonak ih langter dingin le,
A mi kawknak cu meialh thawi langter dingin a si.
16 Ziangahtile Jehovah in meisa le a ralnâm hmangin
Titsa hmuahhmuah thu a ṭhen ding,
Cule Jehovah ih a thah mipawl cu tampi an si ding.
17 «Văwksa le thil fihnungza le zinghnam sa ei phahih,
Hmuan laiih um pa dung thlunih mah te tithianghlimawtupawl le thianfaiawtupawl cu,
An hloráltlang ding,» Jehovah in a ti.

18 «Ziangahtile an thil tipawl le an ruahnakpawl cu ka thei. Miphunpawl le ṭawng phun zakip ka hruaikhawm cān a ra thleng ding; cule annih cu an ra ding ih ka ropitnak an hmu ding. 19 An lakah hminsinnak ka tuah ding ih, an lak ihsin a tlânsuak mi miphun: Tarshish le Pul le thál a nawptu Lud, Tubal le Java, ka hminthannak a thei dah lo le ka ropitnak khal hmu dah lo hlatpi ih um tipi kap tluan pawl hnenah ka kuat hai ding. Cule annih in miphunpawl lakah ka ropitnak an thăn ding. 20 Cun Israel tefapawl in Jehovah inn ah bungbel thianghlim hmangih an thilhlăn an rak ken ṭheu bangin, Jehovah hnenih hlăn ding hrangah miphunpawl lak ihta nan unau hmuahhmuah cu ráng, ránglêng, lêng, lākrang le kalauk pawl hmangin ka tlang thianghlim Jerusalem ah an rak hruai ding, tiah Jehovah in a ti. 21 Cule an lakih mi hrekkhat cu puithiam le Levi-mi si dingah ka la fawn hai ding, Jehovah in a ti.

22 «Ziangahtile ka tuah leh ding mi van thar le leilung thar cu
Ka hmaiih an um ringring ding vekin,
Nan tesinfapawl le nan hmin khal a um ringring ve ding tiah, Jehovah in a ti.
23 Cule hitin a rak si ding,
Thla thar ihsin thla thar dang leh tiang,
Sabbath ihsin Sabbath dang leh tiang
Titsa hmuahhmuah cu ka hmaiah in be dingin an ra ding, tiah Jehovah in a ti.
24 Cule an fehsuak ding ih,
Keimah dokalhih thilsual tuahtupawlih ruakpawl an zoh ding.
Ziangahtile an tholung a thi lo ding ih,
An meisa a mit dah lo ding.
Annih cu titsa hmuahhmuah hrangih fihnungza an si ding,» tiin.