BibleThianghlim – JOSHUA
Old Testament
Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi
New Testament
Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation
JOSHUA
12345678910
11121314151617181920
21222324
- A ngantu: Joshua
- Ngan kum: B.C. 1400-1370 hrawng
Hi cabu sung thu a tambik cu Joshua ih ngan mi a si (24:26). A sung thupawl hi mit rori ih hmutu in a dam laiih a ngan mi a si (5:1, 6). A neta lamih Joshua thihnak thu (24:29-31) ngantu hi Joshua si lo khal sehla, Thlarau Thianghlim in a kaihruai. Joshua cabu hi Pathian ih thawtkhum mi thuanthu a si ih, hi cabu hin Pathian cu ziang tlukin a thutiamkam parah a rinum ih, Israel hnenih Kanaan ram a pekdan a phuanglang (21:43-45; 23:5, 10).
Hi cabu in vawi 30 hnak tam Israel hnenah Pathian in ram a «pe» ti le an kut ah Israel doralpawl a «pe» ti a rel. Ram an «nei» ti le ram luahtupawl an «dawisuak» ti ṭawngfáng hi vawi 30 hnak tam a lang. «Ro» ti le «ro co» ti ṭawngfáng (vawi 50 hnak tam) khal hin hi ram cu Israel hnenih Bawipaih thilpek a si ti a reluar. Thilmak tampi hmang khal in Pathian in Israel a bawm (bung 3, 6, 10; 24:12). Pathian-ih cangvaihnakpawl hmuahhmuah hin Israel cu zianghman tuah loin a to men a si a tinak a si lo. Pathian in nehnak a pe hai (5:13-15), asinan cuih nehnak cu hruaitu Joshua hmangin a cangter.
Israel-mipawl cu cak le ralṭha ih um ding an si (1:6-7, 9, 18; 10:25; 23:6), Pathian ih a sim mi hmuahhmuah cu zum le thlun tengteng ding an si (4:8; 10:40; 11:15; 14:5), cule Bawipa hnen lawngih rinum ding an si (22:5; 23:11; 24:14-15). Mi hrekkhat in Pathian in ziangruangah Israel-mipawl kha Kanaan-mipawl that thluh dingin a fial ti an theithiam lo. Pathian in an sualralnak cu thuṭhennak a phu a si a ti tikah, bulpak le miphunpawl dāntat cu amah Pathian thuthu a si (Sem 15:16). Kanaan-mipawl an thahfai lo asile, a mipawl cu an sualnak le an milem biaknak in an bawrhhlawhter ding ti khal Pathian in a thei (Suah 23:32-33; Dnp 7:1-5, 16; 20:17-18). An thahfai lo ruangah cuvek cekci in a rung cang (Laireltupawl cabu zoh aw).
Israel-mipawl in Kanaan-mipawlih sualnak le milem biaknak an thlun tikah, Pathian in dān a tat hai (Jos 23:12-13; 2Si 17:15-18). Israel-mipawl cu Yahweh-ih dāntatnak hmanrua an si tengteng ding a si, cuti asile annih cun sual thuhla ih Pathian thinlung an theithiam in an ṭawmpi ding a si. Joshua cabu cu a tlangpiin ṭhen li ih ṭhen theih a si: Israel Kanaan ah a lut (bung 1-5), Kanaan nehnak (bung 6-12), Kanaan ram zemawknak (bung 13-21) le Yahweh thawi a thukham titharsalnak (bung 22-24) tiin.
Pathian in Israel a tiamkam mi ram a pek tikah Israel parih Pathian a rinumzia Joshua cabu in a langter. Laireltu cabu in Pathian hnenah Israel a rinum le rinum lo a langter ding.
Thuhlawm Ṭhen
- I. Kanaan ah Israel an Lut (bung 1-5)
- II. Israel in Kanaan a Neh (bung 6-12)
- III. Israel in Kanaan ram a ṭhen (bung 13-21)
- IV. Israel in Bawipa thawi a thukham a titharsal (bung 22-24)
Joshua hnenih Pathian Thupek
1 Jehovah siahhlawh Mosi a thih hnuah hitin a rak si, Jehovah in Mosi bawmtu, Nun-ih fapa Joshua cu a bia ih hitin a sim, 2 «Ka siahhlawh Mosi cu a thi zo. Curuangah atu ah nang le hi mipi zate cu tho uhla, Israel tefapawl ka pek ding mi ram, hi Jordan ralah va feh uh. 3 Mosi hnenih ka sim zo vekin na ke zaphak ih na palnak hmun kip cu ka lo pe ding. 4 Ramṭhing le hi Lebanon ihsin tiva tumpi, Zufraṭis Tiva tiang, Heth-mipawlih ram hmuahhmuah, cule nitlaknak lamah Tifinriat Tumpi tiangin nan ramri a si ding. 5 Na nunsung hmuahhmuah na hmaiah zohman an ding thei lo ding, Mosi hnenih ka um bangin na hnenah ka um ding. Ka lo tansan lo ding ih, ka lo thlauthla fawn lo ding. 6 Cak le ralṭha zetin um aw, ziangahtile an pupápawl hnenah ka lo pe ding tiih sia ka săm mi ram cu an ro dingah nangmah in anmah na zem ding. 7 Ka siahhlawh Mosi ih thu a lo pek mi dān hmuahhmuah bangtukih na thlun theinak dingah, cak le ralṭha zetin um aw; na fehnak hmun kip ih na hmuingil theinak dingah Mosi ih thupek mi cu vawrh lamah siseh, keh lamah siseh pialsan hlah. 8 A sungih ngan mi bangtukih na thlun theinak dingah hi Dān Cazual hin na kâ lo suahsan hlah seh, cuhnakin a sun a zanin cumi cu ngunngaih zetin ngaihtuah ringring sawn aw. Ziangahtile cutin na lam na tluangter ding ih, hlawhtlinnak ṭha na nei ding. 9 Thu ka lo pe a si lo maw? Cak le ralṭha zetin um aw; ṭih hlah, lungphâng fawn hlah, ziangahtile na fehnak hmun kip ah Jehovah na Pathian in a lo umpi a si,» tiin.
Jordan Tănkaidan Ding
10 Cun Joshua in mipi hotupawl hnenah, 11 «Ṭanhmun khuarnak hrutsuak uhla mipi hnenah, ‹Nan Pathian Jehovah ih a lo pek ding mi ram nei dingih lut dingin ni thum sungah hi Jordan ral nan tánkai ding ruangah nan ṭulhai mipawl timlam uh,› tiin thu pe uh,» tiah thu a pe hai.
12 Cule Joshua in Reuben-mipawl, Gad-mipawl le Manasseh hnám hrek hnenah, 13 «Jehovah siahhlawh Mosi in, ‹Nan Pathian Jehovah in cawlhnak a lo pe ding ih, hi ram hi a lo pe ding,› tiih thu a lo pek mi ṭawngkam kha cîng ringring uh. 14 Nan nupipawl, nan fanau tetepawl le nan sumhnámpawl cu Mosi ih a lo pek mi ram, Jordan-ih hi lam ralah an tâng ding. Asinan nannih cu nan unaupawl hmaiah ralthuam thawn, nan micak ralṭhapawl hmuahhmuah thawn Jordan tiva nan tánkai ding ih anmah nan bawm ding, 15 nanmah a lo pek vekih Jehovah in nan unaupawl cawlhnak a pek ih, cutin annih khal in nan Pathian Jehovah in a pek ding mi ram an va neihngah tiangin. Cun Jehovah siahhlawh Mosi ih a lo pek mi hi Jordan tiva ral nisuahnak lamah nan kirsal ding ih cumi ah lungawiaipuangin nan um ding,» tiah a ti.
16 Cule annih in Joshua cu, an sâng ih, «Thu in pek mi hmuahhmuah kan tuah ding ih, in thlahnak hmun kip ah kan feh ding. 17 Ziangkim ah Mosi thu kan rak ngai bangin na thu kan ngai ve ding. Mosi hnenih na Pathian Jehovah a rak um vekin, na hnen khalah um hram seh. 18 Na thupek dokalhih, amah thu na pek mi ṭawngkampawl hmuahhmuah a ngaithla lo tu pauhpauh cu thah an si pei. Cak le ralṭha zetin um men aw,» tiah an ti.
Rahab in Thlingthlatupawl a Thup
1 Cun Nun-ih fapa Joshua in a thupteih va thlingthla dingah Shittim hmun ihsin mipa pahnih a thlah ih, «Va feh uhla, ram va zoh uh, a hleicein Jeriko khawpi khi,» tiah a ti hai. Cutin an va feh ih, a hmin Rahab an ti mi hlawhhlângnuih inn ah an lut, cule cu tawkah an câm.
2 Cule Jeriko siangpahrang hnenah mi in, «Ngai hnik, Israel tefapawl lak ihsin ram thuhla ra zingzăwi dingin tuihzan ah hi tawkah mi an ra sokhaw,» tiah an sim.
3 Cule Jeriko siangpahrang in Rahab hnenah mi a thlah ih, «Na hnenah ra ih, na inn sungih a ra luttupawl kha rak hruaisuak aw, ziangahtile annihpawl cu ram pumpi thlingthla dingih ra an si,» tiah a ti.
4 Cun nunaunu cun cuih mi pahnih cu a hruai ih a rak thup hai. Cule nunaunu in, «A si, mi pahnih ka hnenah an ra ngai, asinan khuitawk ihsi ra an si ti ka thei lo. 5 Cule thim zâwng, kăwtka khar a cût zawngah lengah an suak zo. Khui lamah an feh ti ka thei lo; zamrang zetin va dawi uh, ziangahtile nan man khal a si men thei,» tiah a ti. 6 Asinan nunaunu cun inn tlun parah a hruai hai ih remteih a ret mi patko tawmpawl lakah a rak thup hai. 7 Cun mipapawl cun annih cu Jordan zin zawhin a kāi tiangin an hei dawi ciamco. Cule a dawitupawl an liam veten, kăwtka cu an khar.
8 Cun an ihthah hlanah nunaunu cu inn tlun par an hnenah a hung kai ih, 9 an hnenah, «Jehovah in hi ram hi a lo pe zo ti ka thei, nasazetin nanmah kan lo ṭih, cule nanmai ruangah hitawk ram ih cêngpawl cu an thinlung a zâm. 10 Ziangahtile Izip ram ihsin nan ra suah tikih Jehovah in Tipi Sen tidai nan hrangih a kānterdān le Jordan khat lam ralih um Amor-mipawlih siangpahrang pahnih Sihon le Og nan hlohralter verver thuhlapawl tla kan rak thei. 11 Cule hi thuhlapawl kan rak theih leveten kan thinlung a beidawng thluh, nanmah ruangah zohman in thazang an nei nawn lo, ziangahtile Jehovah nan Pathian cu tlun lam van le hnuai lam leilung khalah Pathian a si. 12 Curuangah ka lo ngen a si, Jehovah hmin in ka hnenah siasăm uh, nan parih ṭhatnak ka langter zo ruangah nannih khal in ka paih sungkua parah ṭhatnak langter ve uhla, hminsinnak rintlak in pe uh. 13 Cule ka pa, ka nu, ka ṭapapawl, ka unau nunaupawl le an neih thil hmuahhmuah zuahsak uh, cule thihnak ihsin kan nunnak in runsuak uh,» tiah a ti.
14 Cule annih in nunaunu cu an sâng ih, «Hi kan tuah mi hi zohman in nan rel lo a si ahcun, kan nunnak cu thih tiangin nanmai hrangah a si ding. Cule hitin a si ding, Jehovah in hi ram in pekngah tikah, nan parah ngilnei zet le dik zetin kan um ding,» tiah an ti.
15 Cun anmah cu tukvirh lam in hri thawn a ṭumter hai, ziangahtile a inn cu khawkulh parah a um; amahnu cu khawkulh parah a cêng a si. 16 Cule cu nu cun an hnenah, «Tlang ah feh uh, culoahcun a lo dawitupawl in an lo táwng pang ding. A lo dawitupawl an kirsal hlanlo cu tawkah ni thum sung va relh uh. Cuih hnuin nan fehsuak leh ding,» tiah a ti hai.
17 Cun cuih mipapawl in a hnenah, «Sia in sămter mi hi na thukam parah kannih cu sawihnăwm kâi lo kan si ding, 18 ngai hnik, hi ram kan ra luh tikah in ṭumternak tukvirh ah himi pat senlar hri hi na rak ṭawn pei, cule na pa, na nu, na ṭapapawl le na paih sungkua hmuahhmuah na inn ah na rak hruai thluh pei. 19 Cun hitin a si ding, zokhal na inn sângka leng lamzin ih a vâksuaktu cu amai thisen a lu parah um seh, cule kannih cu mawh nei lo kan si ding. Cule zokhal na inn sungah na hnenih a umtu cu an parih kutthlak a si ahcun, a thisen cu kan lu parah a um pei. 20 Cule hi kan thil ti mi na rel asile, sia in sămter mi na thukam ihsin kan luat ding,» tiah an ti.
21 Cun anih in, «Nan ṭawngkam vekin si seh,» tiah a ti. Cule anih in a thlah hai ih, annih khal an păwksuak. Cule pat senlar hri cu tukvirh ah a ṭawn.
22 Annih cu an păwksuak ih tlang ah an feh, cule a dawitupawl an kirsal hlanlo ni thum sung cu tawkah an câm. A dawitupawl cun zintluan hmuahhmuah an hawl, asinan an hmu lo. 23 Cun cuih mipa pahnih cu an kir ih, tlang ihsin an ṭum, cule tiva an tánkai; cule Nun-ih fapa Joshua hnen an ra thleng ih, an parih thil thleng mi hmuahhmuah an sim. 24 Cule annih in Joshua hnenah, «Jehovah in hi ram hmuahhmuah hi kan kut ah in pe taktak zo, ziangahtile thungaingaiin hi ram ih cêngtu hmuahhmuah hi kanmah ruangah an thinlung a zâm ṭheh a si,» tiah an ti.
Israel-mipawl in Jordan an Tánkai
1 Cun Joshua cu zingpit ten a tho ih amah le Israel tefapawl hmuahhmuah cu Shittim hmun ihsin an păwksuak ih Jordan ah an feh, cule tiva an tankai hlan sung cu tawkah an câm. 2 Hitin a si, ni thum an cām hnuah, hotupawl in ṭanhmun khuarnak an fángsuak; 3 cule annih in, «Nan Pathian Jehovah-ih Thukham Kuang cu Levi-mi, puithiampawl in an zawn nan hmuh tikah, nan umnak hmun ihsin nan păwksuak pei ih cumi cu nan thlun pei. 4 Asinan nanmah le cumi karlak cu tah tikah dawng 2000 a hla aw ding a si. Nan fehnak ding zin theih tumin, cumi cu naih hlah uh, ziangahtile himi zin hi tuihlanah nan rak paltlăng dah lo,» tiin mipi thu an pe.
5 Cule Joshua in mipi hnenah, «Tithianghlim aw uh, ziangahtile thaizing ah Jehovah in nan lakah mangbangza a tuah ding,» tiah a ti. 6 Cun Joshua in, «Thukham Kuang zâwn uhla, mipi hmaiah tiva hei tánkai uh,» tiin puithiampawl hnenah a sim. Cutin annih cun Thukham Kuang cu an zâwn ih, mipi hmaiah an feh.
7 Cule Joshua hnenah Jehovah in, «Mosi hnenih ka rak um vekin na hnen khalah ka um ding a si ti an theih theinak dingah, tuihsun ah Israel hmuahhmuah mithmuhah lo ropitter ka thăwk ding. 8 Thukham Kuang zâwntu puithiampawl cu, ‹Jordan tikap nan thlen tikah, Jordan tiva ah nan ding ringring pei,› tiin thu na pe hai pei,» tiah a ti.
9 Cule Joshua in Israel tefapawl hnenah, «Hi tawkah ra uh, cule Jehovah nan Pathian kamsuakthupawl ngaithla uh,» tiah a ti. 10 Cule Joshua in, «Kanaan-mipawl, Heth-mipawl, Hiv-mipawl, Periz-mipawl, Girgash-mipawl, Amor-mipawl le Jebus-mipawl nan hmai ihsin a dawisuak rori ding mi hin a nung mi Pathian cu nan lakah a um a si ti nan thei ding. 11 Ngai hnik uh, leilung pumpuluk ih Bawipaih Thukham Kuang cun nan hmaiah Jordan tiva a tánkai ding. 12 Curuangah atu ah hnám kip ihsin mipa pakhat ciar, Israel hnámpawl lak ihsin mi hleihnih hril uh. 13 Cule hitin a si ding, leilung pumpuluk ih Bawipa a si mi, Jehovah Thukham Kuang zâwntu puithiampawlih ke zaphak cu Jordan ti ih a ṭhumawk veten, Jordan tiva, sak lam ihsi a rung luang mi ti cu a cat ding, cule a hlawmin a ding ding,» tiah a ti.
14 Cule hitin a si, Jordan tánkai dingin mipi an riahhmun ihsin an pawhsuak tikah, Thukham Kuang zâwntu puithiampawl cu mipi hmaiah an feh ih, 15 Thukham Kuang zâwntupawl cu Jordan an thleng; rawl khâwm cān sung hmuahhmuah cu Jordan tiva hi a kap tiangin a liam dutdo ih, Kuang zâwntu puithiampawlih ke in Jordan ti a vun păl veten, 16 sak lam ihsi rung luang tidai cu a ding dukdi ih, hla zet Zaretan ram kiang, Adam khawpi ah a hlawmin a ding. Cutin tidai cu Arabah Tipi an ti mi Cite Tipi sungih luanglut ding a um nawn lo, a kāngcat; cule mipi cu Jeriko khawpi ralden zawnin an fehtlăng. 17 Cun Jehovah Thukham Kuang zâwntu puithiampawl cu mipi hmuahhmuah Jordan tiva an kaisuak thluh lai hlanlo, Jordan tiva laifang leicar ah an ding ringring, cule Israel-mi hmuahhmuah cu leicar parin an tánkai ṭheh.
Hngilhlonak Lungphunpawl
1 Cule hitin a si, mipi zaten Jordan an tankai ṭheh tikah, Jehovah in Joshua hnenah, 2 «Mipi lakin mipa hleihnih, hnám khat ihsin pakhat ciar na hrangah hril aw, 3 cule an hnenah, ‹Puithiampawl an dinnak hmun, Jordan tiva laifang ihta lungto hleihnih in nanmai hrangah la uh. Cumi cu nan zawngah nan thiar pei ih, tuihzan ih nan riahnak ding hmun ah nan ṭhum pei,› tiin thu na pe hai pei,» tiah a ti.
4 Cun Joshua in hnám kip ihsin mi pakhat ciar Israel tefapawl lak ihta a ruat mi mi hleihnih pawl cu a ko hai, 5 cule an hnenah Joshua in, «Jordan tiva laifangah nan Pathian Jehovah-ih Thukham Kuang hmaiah rak tánkai uhla, Israel tefapawl hnám zât in mi pakhat in lungto pakhat ciar pusuak uh, 6 cuticun nan tefapawl in, ‹Hi lungpawl hi nan hrangah ziang sullam an nei?› tiih an run suh cān ah himi cu nan lakah hminsinnak a rung si leh ding. 7 Cun Jehovah Thukham Kuang hmaiah Jordan ti cu a cat, Thukham Kuang in Jordan tiva a tankai tikah Jordan tipawl cu a rak cat a si tiin nannih in an hnenah nan sâng pei. Cule hi lungpawl hi Israel tefapawl hrangah kumkhaw hngilhlonak lung an si ding a si,» tiah a ti.
8 Cule Israel tefapawl cun Joshua ih thu a pek vek cekci in an tuah ih, Jehovah in Joshua hnenih a rak sim bangin Israel tefapawl hnám zât in Jordan tiva laifangih lungto hleihnih cu an lasuak, cule an riahnak hmun ah anmai zawngah an hei pu ih, cu tawkah an ret. 9 Cun Joshua in Thukham Kuang zâwntu puithiampawlih ke dinnak hmun Jordan tiva laifangah lungto hleihnih pawl cu a phun; cule cupawl cu tuihni tiangin cu tawkah an um lai a si.
10 Mosi in Joshua hnenih thu a rak pek zo mipawl bangtukin Jehovah in mipi sim dingih Joshua thu a pek mipawl ziangkim tuah ṭheh a si hlanlo, Jordan tiva laifangah Kuang zâwntu puithiampawl cu an ding ringring; cule mipi cu manhlap zetin an tánkai. 11 Cun hitin a si, mipi hmuahhmuah an tankai ṭhehin Jehovah-ih Kuang le puithiampawl cun mipi mithmuhah an tánkai ve. 12 Cule Mosi in an hnenih a rak sim cia vekin, Reuben pacangpawl, Gad pacangpawl le Manasseh hnám hrek cu Israel tefapawl hlanah ralthuam thuamawin an rak tánkai hmaisa. 13 Ral va do dingin raldonak hrangih a tiar mi, mi 40000 hrawng cu Jeriko phairawn lamah Jehovah hmaiah an rak tánkai. 14 Cuih ni ah Jehovah in Israel-mi hmuahhmuah mithmuhah Joshua a khaisâng, cule Mosi an rak ṭihzah bangin, a damsung hmuahhmuah Joshua cu an ṭihzah.
15 Cun Jehovah in Joshua hnenah, 16 «Theihpinak Kuang zâwntu puithiampawl kha Jordan tiva sung ihsin hung suak thlang uh tiah thu pe aw,» tiah a sim.
17 Curuangah Joshua in puithiampawl cu thu a pe ih, «Jordan tiva sung ihsin hung suak thlang uh,» tiah a ti hai. 18 Cule hitin a si, Jehovah Thukham Kuang zâwntu puithiampawl cu Jordan tiva laifang ihsin an hung suak ih, puithiampawlih ke zaphak in leicar a păl veten Jordan ti cu a luan kēlten a luangsal ih, a hlan vekin a kuang a khat ṭheh.
19 Cule mipi cu a thla khatnak a ni hratnak ah Jordan ihsin an so ih, Jeriko-ih nisuahnak ramri Gilgal ah ṭanhmun an khuar. 20 Cule Jordan tiva ihta an laksuah mi lungto hleihnih kha Joshua in Gilgal ah a phun hai. 21 Cun Israel tefapawl hnenah, «Lehhnu ah nan tefapawl in an palepawl hnenih, ‹Hi lungtopawl hi ziang an si?› tiih an suh tikah, 22 nan tefapawl cu hitin nan theihter pei, ‹Israel in hi Jordan tiva hi leicar ah a rak tánkai a si,› tiin nan tefapawl cu nan theihter ding a si. 23 Ziangahtile kan tankaingah hlanlo kan hmaiih a kāncatter mi Tipi Sen parih Jehovah nan Pathian ih a rak tuah vekin, nan tankaingah hlanlo Jordan ti cu Jehovah nan Pathian in nan hmaiah a rak kāngcatter a si. 24 Cutin leitlun miphunpawl hmuahhmuah in Jehovah kut cu a cak a si ti an thei thei ding, cutin kumkhuain Jehovah nan Pathian nan ṭihzah thei ding a si,» tiah a ti.
San Hnihnak Minungpawl Serh Zim Tan an Si
1 Cun hitin a si, Jordan nitlaknak lamih a um mi Amor-mipawlih siangpahrang hmuahhmuah le tifinriat kapih a um mi Kanaan-mipawlih siangpahrangpawl hmuahhmuah cu Jehovah in kan tankaingah hlanlo Jordan ti cu Israel tefapawl hmaiah a kāngcatter ti thu an hna ih an theih tikah, an thinlung a beidawng, cule Israel tefapawl ruangah anmah do tumnak thinlung khal an nei nawn lo.
2 Cuih cān ah Jehovah in Joshua hnenah, «Nanmai hrangah ṭêklung nâmtepawl tla tuah awla, Israel fapapawl hi a ṭum hnihnak an serh zim tansaksal aw,» tiah a ti. 3 Cutin Joshua in ṭêklung nâmtepawl amai hrangah a tuah ih, Israel fapapawl cu vun zimpawlih tlang ti mi ah an serh zim a tansak hai. 4 Cule Joshua in an serh zim a tansaknak săn cu hihi a si: Izip ram ihsin a păwksuak mi mipa hmuahhmuah cu lamlak ramṭhing ah an thi ṭheh, Izip ram ihsi an ra suah hnuah ral dotu mipa hmuahhmuah cu an thi ṭheh. 5 Ziangahtile Izip ram ihsi a păwksuaktupawl hmuahhmuah kha cu serh zim tan cia an si thluh, asinan Izip ihsi an suahnak lamzin tluan ramṭhing ih hrin mi hmuahhmuah cu serh zim tan an si hrih lo. 6 Jehovah aw an ngaithlak lo ruangih Izip ram ihsin a păwksuak mi ral do thei mipa hmuahhmuah an hlohral ṭheh tiang, Israel tefapawl cu ramṭhing ah kum 40 sung an vâk rero. Jehovah in sia a săm zo vekin, an pupápawl hnenih sia a săm zo mi hnawiti le khuaitizu luannak ram cu an hmuh ding a siang nawn lo. 7 Cun Jehovah in an aiih a tundīn mi an fapapawl cu Joshua in an serh zim a tansak; ziangahtile annih cu serh zim tan lo an si, ziangruangahtile annihpawl cu lam tluanah serh zim tăn an si lo.
8 Cule hitin a si, mipi hmuahhmuah serh zim tan an ṭheh tikah, an damngah tiang ṭanhmun khuarnak ah anmai hmun ciar ah an um. 9 Cun Jehovah in Joshua hnenah, «Tuihsun ah Izip ih an lo zăwmtaihnak cu ka hlăwnhlo zo,» tiah a ti. Curuangah cutawk hmun cu Gilgal tiah tuihni tiang an ko.
10 Israel tefapawl cu Gilgal ah ṭanhmun an khuar ih, cumi thla ni hleilitnak khawthim zawngah Jeriko phairawn ah Lanta Puai an tuah. 11 Cule Lanta Puai thaisun ah a ram suak rawl an ei ih, cuih ni lala ah thilnu telh lo sang le thlairawl kănro an ei. 12 Cun a ram suak rawl an ei ih a thaisun ihsin manna a hān vuarvi; cule Israel tefapawl in manna an nei nawn lo, cuih kum ah cun Kanaan ram rawl an ei sawn a si.
Jehovah Ralkappawlih Ralbawipi
13 Cule hitin a si, Joshua cu Jeriko khawpi kiangih a um laiah, khua a tang ih, zoh hnik, a kut ah a ralnâm phawi cia-in amai zawnih a ding mi Pacang pakhat a hmu. Cule Joshua in a hei pan ih a hnenah, «Kan lamṭang maw kan ralpawl lamṭang so na si?» tiah a ti.
14 Cule anih in, «Si lo ve, Jehovah-ih ralkappawlih Ralbawipi dinhmun in atu ka ra a si sawn,» tiah a ti.
Cule Joshua cu lei ah a băwkkhup ih, a bia ih a hnenah, «A siahhlawh hnenah ka Bawipa in ziangso sim a duh?» tiah a ti.
15 Cun Jehovah-ih ralkappawlih Ralbawipi in Joshua hnenah, «Na kedam phawih aw, ziangahtile na dinnak hmun hi a thianghlim a si,» tiah a ti. Cule cutivekin Joshua cun a tuah.
Jeriko Siatnak
1 Cun Jeriko khawpi cu Israel tefapawl ruangah hngetkhoh zetih kharbĕt a si, zohman an suakin an lut lo. 2 Cule Jehovah in Joshua hnenah, «Zoh hnik! Na kut ah Jeriko khawpi cu a siangpahrang le a micak ralṭhapawl thawn ka lo pe zo. 3 Nannih ral do mipa hmuahhmuah in khawpi cu nan hēl pei, khawpi cu vei khat nan hēlsuak pei. Cutivekin ni ruk sung nan tuah pei. 4 Cule Kuang hmaiah puithiam pasarih in tuupa ki tawtawrawt pasarih an keng pei. Asinan a ni sarihnak ah cun vei sarih khawpi nan hēlsuak pei, cule puithiampawl in tuupa kipawl cu an phaw pei. 5 Hitin a si ding a si, tuupa ki cu rei nawnin an hun phawt ruangro ih, tawtawrawt aw nan theih tikah, mipi hmuahhmuah cu aw ring zetin an au durdo pei, cucun khawpikulh cu a tlu rupri ding. Cule mipi cu anmai hmai zawn cio ih khawpikulh săwprăwp parah an kai pei,» tiah a ti.
6 Cun Nun-ih fapa Joshua in puithiampawl cu a ko hai ih an hnenah, «Thukham Kuang cu la uhla, puithiam pasarih pawl in Jehovah Kuang hmaiah tuupa ki tawtawrawt pasarih keng hai seh,» tiah a sim hai. 7 Cule anih in mipi hnenah, «Feh vivo uhla, khawpi cu hēlsuak uh, cule ralthuam thuamaw pacangpawl cu Jehovah Kuang hmaiah rak feh cia hai seh,» tiah a ti.
8 Cule hitin a rak si, Joshua in mipi hnenih thu a sim hnuah, Jehovah hmaiih tuupa ki pasarih keng puithiam pasarih pawl cu an feh vivo ih an tawtawrawt an phaw, cule Jehovah-ih Thukham Kuang in a thlun hai. 9 Ralthuam keng pacangpawl cu tuupa kipawl phawtu puithiampawl hmaiah an feh ih, puithiampawl in tuupa ki an phawt rero laiah khawrtu ralkappawl cun Kuang dung ihsin an thlun. 10 Cun Joshua in mipi cu thu a pe hai ih, «Nan hnenah, ‹Au uh,› ka lo ti ni a thlen hlanlo, nan au lo pei, nan aw thawn thawmvâng ziangkhal nan tuah lo pei, nan kâ ihsin ṭawngkam khat khal a suak fawn lo pei,» tiin thu a pe hai. 11 Cutin anih in Jehovah-ih Kuang cu khawpi a hēlter ih, vei khat an hēlsuak. Cule ṭanhmun khuarnak ah an ra lut ih, ṭanhmun khuarnak ah cun an riak.
12 Cule Joshua cu zingpit teah a tho ih, puithiampawl in Jehovah-ih Kuang cu an thiar. 13 Cun tuupa ki tawtawrawt pasarih keng puithiam pasarih pawl cu Jehovah-ih Kuang hmaiah an feh vivo ih tuupa kipawl an phaw phah vivo. Cule ralthuam keng pacangpawl cu an hmaiah an feh. Asinan khawrtu ralkappawl cu puithiampawl in tuupa kipawl an phawt rero laiah Jehovah-ih Kuang an run thlun. 14 Cule a ni hnihnak ah khawpi vei khat an hēlsuak ih, ṭanhmun khuarnak ah an ra kirsal. Cutin ni ruk sung an tuah.
15 Asinan a ni sarihnak ah cun hitin a rak si, zingpit te khawvâng zawngah an tho ih an tidān kēlten khawpi cu vei sarih an hēlsuak. Cuih ni lawngah vei sarih khawpi an hēlsuak. 16 Cule a vei sarihnak ah cun hitin a si, puithiampawl in tuupa kipawl an phawt tikah, Joshua in mipi hnenah, «Au uh, ziangahtile Jehovah in khawpi cu a lo pe zo! 17 Cun khawpi cu camsiat a si ding ih Jehovah hnenah ap a si ding, cuih khawpi le a sungih a um mi hmuahhmuah thawn. Hlawhhlâng Rahab, amah le a inn sungih a um mipawl hmuahhmuah lawng an nung ding a si, ziangruangahtile kan thlah mi palaipawl kha anih in a rak thup. 18 Cule nannih cu camsiat mi thilpawl lak ihsin ziangti zawng khalin thiarfihlim aw ziar uh, culoasile camsiat mi thilpawl nan lâk tikah camsiat mi ah nan cang ding ih, Israel ṭanhmun khuarnak khal camsiat mi ah nan cangter pang ding, cule cumi cu nan buaiter ding. 19 Asinan sui le ngun, dar le thir bungbel hmuahhmuah cu Jehovah hrangah serhhran an si zo, cupawl cu Jehovah-ih sumsaw retnak ah ret an si pei,» tiah a ti.
20 Cutin puithiampawl in tuupa kipawl an phawt tikah mipi cu an au. Cule hitin a si, mipi in tuupa ki awn an hun theih tikah mipi cu nasazetin an au ciamco ih, khawpikulh cu a tlu rupri. Cun mipi cu anmai hmai zawn cio ih kulh săwprăwp parah an kai ih, khawpi cu an la. 21 Cule khawpi sungih a um mi hmuahhmuah, mipa le nunau, nauhak le upa, câwcang le tuu le lāk pawl cu ralnâm in an thatfai verver.
22 Asinan Joshua in ram va thlingthlatu mi pahnih hnenah, «Hlawhhlangnuih inn ah va lut uhla, a hnenih sia nan rak săm zo bangin cu nu cu a neih hmuahhmuah thawn va hruaisuak uh,» tiah a rak sim zo a si. 23 Cule thlingthlatu mino pahnih cu an va lut ih, Rahab le a nu le a pa, a sungkhatpawl le a neih mi zate thawn an va hruaisuak. Cutin a sungkhat hmuahhmuah an va hruaisuak ih, Israel ṭanhmun khuarnak lengah an ret. 24 Asinan khawpi le a sungih um hmuahhmuah cu meisa in an urkāng ṭheh. Sui le ngun, dar le thir bungbelpawl lawng Jehovah inn ih sumsaw retnak ah an ret. 25 Cule Joshua in hlawhhlâng Rahab nunnak le a paih sungkuapawl le a neih mi hmuahhmuah cu a zuah. Cutin cu nu cu tuihni tiangin Israel ram ah a cêng, Joshua in Jeriko va thlingthla dingih a thlah mi palaipawl a rak thuh hai ruangah a si.
26 Cun cuih cān ah Joshua in, «Himi Jeriko khawpi dĭnsal ih saksaltupa cu Jehovah hmaiah camsiatin um seh; a lungphum a phum tikah a fatir a thi ding ih, a kăwtkapawl a bŭn tikah a fa nautabik a thi ding,» tiin anmahpawl cu thu a cah hai.
27 Cutin Jehovah cu Joshua hnenah a um ih, ram pumpi ah a hmin a thang.
Ai Khua ih Sunnak
1 Asinan Israel tefapawl in camsiat mi thilpawl thawn pehparin thilsual an tuah, ziangahtile Judah hnám Zerah-ih fapa Zabdi, cumiih fapa Kar-mi, cumiih fapa Akhan in camsiat mi thil a rak la, cutin Jehovah thinhengnak cu Israel tefapawl parah a alh.
2 Cun Joshua in Jeriko khua ihsin Bethel-ih nisuahnak lam, Beth Aven kiangih Ai khua ah mipapawl a thlah ih, an hnenah, «Hung feh uhla, ram va thlingthla hnik uh,» tiah a sim hai. Cutin cuih mipapawl cu an hung feh ih Ai khua cu an hung thlingthla.
3 Cule Joshua hnenah an ra kirsal ih, a hnenah, «Mi zaten hung feh hlah hai seh, cuhnakin mi 2000 asilole 3000 hrawng hung so hai sehla, Ai khua cu hung do hai seh. Cu tawkah mi zaten bāngter duh hlah, ziangahtile Ai khawmipawl cu mi málte an si,» tiah an ti. 4 Cutin mipi lak ihsin mi 3000 hrawng an hung so, asinan annih cu Ai khawmipawl hmaiah an tlânsia. 5 Cule Ai mipapawl in mipa 36 hrawng an rak that, ziangahtile kăwtka hmai ihsin Shebarim tiang an dûm ih an tlanliamnak zin ah an run that vivo; curuangah mipi thinlung a zuprál ih, tidai vekah a cang.
6 Cun Joshua cu a hnipuan a thlek ih, Jehovah Kuang hmai lei ah zan lam tiangin amah le Israel upapawl cu an băwk, cule an lu ah leivut an phulhaw. 7 Cule Joshua in, «Ala, Bawipa Jehovah, ziangahso Amor-mipawl kut ah in ap ih, in siatsuah ṭheh dingin hi mipipawl Jordan ralkhat ih na hruai hai? Maw, lungkim takin Jordan tiva khat lam ralah khan rak cêng huahhi men ding kan rak si nân! 8 Maw Bawipa, an ralpawl in an dawi ih, Israel a tlansiat tikah ziangso ka rel ding? 9 Ziangahtile Kanaan-mipawl le ram luahtupawl hmuahhmuah in cumi cu an thei ding ih, in run kulh ding, cule leilung ihsin kan hmin in thaihlo ding. Cun na hmin ropi tak hi ziangtin so na ti ding?» tiah a ti.
Akhan-ih Sualnak
10 Cule Jehovah in Joshua hnenah, «Tho aw! Ziangahso kha tiih na bawh ringring? 11 Israel cu a sual zo ih, anmah ka pek mi ka thukham khal an pahbăl zo. Ziangahtile camsiat mi thil hrekkhat an la, cule an ru ih mi an bum, cule cumi cu anmai thilri lakah an ret. 12 Curuangah Israel tefapawl an ralpawl hmaiah ding thei loin an ralpawl hmaiah an tlân sawn a si, ziangruangahtile annih cu camsiat mi an si. Camsiat mi nan lak ihsin nan hlohralter lo ah cun, ka lo umpi nawn lo ding. 13 Tho aw, mipi tithianghlim hai awla, ‹Thaizing hrangah tithianghlim aw uh, ziangruangahtile Israel-ih Pathian Jehovah in, «Maw Israel, nan lakah camsiat mi thil a um, nan lak ihsin camsiat mi thil nan hlăwnhloh hlanlo cu nan ralpawl hmaiah nan ding thei lo ding,» a ti. 14 Curuangah thaizing ah nan hnámpawl zulhin hruai nan si pei. Cule hitin a si ding, Jehovah ih a hril mi hnám cu a hrin a hrin in an ra pei, cule Jehovah ih a hril mi hrin cu a innsang a innsang in an ra pei, cule a hril mi innsang cu a pâk a pâk in an ra pei. 15 Cun hitin a si ding, camsiat mi thil a latu cu amah le a neih mi hmuahhmuah in meisa ih urkăng an si pei, ziangruangahtile anih cun Jehovah thukham a rak pahbăl ih, Israel ram ah atthlakza thil a rak tuah a si,› a ti,» tiah sim hai aw.
16 Cutin Joshua cu zingpit teah a tho ih, Israel cu an hnám an hnám in a run hruai, cule Judah hnám kha hril a si. 17 Judah hrin a hruai hai ih Zerah-ih sungkua hrilngah an si, cule Zerah-ih sungkua cu a pâk a pâk in a hruai leh ih Zabdi cu hrilngah a si. 18 Cun cu paih sungkua cu a pâk a pâk in a hruai hai ih, Judah hnám Zerah-ih fapa Zabdi, cumiih fapa Kar-mi, cumiih fapa Akhan cu hril a si.
19 Cun Joshua in Akhan hnenah, «Ka fapa, ka lo ngen a si, Israel-ih Pathian Jehovah cu sunlawihnak pe awla, a hnenah na sualphuang aw, cule atu rori ah ziang na rak tuah ti i sim aw; cumi cu ka hnen ihsin thup hlah,» tiah a ti.
20 Cule Akhan in Joshua cu a sawn ih, «Ngai hnik, Israel-ih Pathian Jehovah dokalhin ka rak sual a si, cutin khatin ka rak tuah a si: 21 Ralthillawnpawl lakah Babilon sinfen mawimawi le ngun tangka shekel 200 le sui tlăng shekel 50 ka hmuh tikah cupawl cu ka ît tuk ih ka rak lâk. Cule ngai hnik, cupawl cu ka puanthlam laifang lei hnuaiah ka thup hai, cumi tăngah ngun tangka cu a um,» tiah a ti.
22 Cutin Joshua in palaipawl a thlah ih, puanthlam ah cun an va tlân; cule ngai hnik, cumi cu a puanthlam ah cun thuh a rak si, a tăngah ngun tangka thawn. 23 Cule cupawl cu puanthlam sung ihsin an la ih Joshua le Israel tefapawl hmuahhmuah hnenah an rak keng, cule cumi cu Jehovah hmaiah an ret. 24 Cun Joshua le a zawngih um Israel hmuahhmuah in Zerah fapa Akhan cu ngun tangka, sinfen, sui tlăng, a fapapawl, a fanupawl, a câwcangpawl, a lākpawl, a tuupawl, a puanthlam le a neih mi hmuahhmuah thawn an hruai ih aAkor Phaikuam ah an fehpi. 25 Cule Joshua in, «Ziangruangah so in rak buaiter? Tuihsun ah Jehovah in a lo buaiter ding,» tiah a ti. Cutin Israel hmuahhmuah in amah cu lungto in an deng, cule anmah cu lungto ih an den hnuah meisa in an urkāng.
7:24a Akor: Buainak tinak a si.
26 Cun a parah lung an peng liailiai, cumi cu tuihni tiangin a um lai. Cutin Jehovah cu a thinhengnak nasazet lak ihsin a lamlêtsal. Curuangah tuihni tiangin cutawk hmun cu a hmin ah Akor Phaikuam tiah an ko lan ta.
Ai Khua Tlûknak
1 Cun Jehovah in Joshua hnenah, «Ṭih hlah, lungphâng fawn hlah; ral do mi hmuahhmuah cu na hnenah hruai awla, tho aw, Ai khua ah hung so uh. Ngai hnik, Ai siangpahrang, a mipawl le a khua le a ram cu nan kut ah ka lo pe zo. 2 Cule Jeriko khawpi le a siangpahrang parih nan tuah bangin, Ai khua le a siangpahrang parah nan tuah ding a si. A ralthillâk le rannungpawl lawng nanmai covo ah nan la pei. Khawpi cu a dung lamin a rak bawhthuptu ret aw,» tiah a ti.
3 Cule Joshua cu a tho ih ral do mi hmuahhmuah thawn Ai khua do dingin an so; cule Joshua in micak ralṭha pacang 30000 a hril ih, zan ah a thlahsuak hai. 4 Cule annih cu thu a pe hai ih, «Ngai hnik uh, khawpi cu a dung lamin nan bawhthup pei. Khawpi ihsi hla tukah feh hlah uh, nan zaten rak tiar ringring uh. 5 Cun kei le ka hnenih um mipi hmuahhmuah in khawpi kan run pan ding; cule hitin a si ding, a hmaisa vekih kanmah do dingih an ra suah tikah an hmaiah kan tlânse ding. 6 Ziangahtile annih cun khua ihsin kan bumsuahngah tiang in rak dawi ding, ziangahtile hitin an ti ding, ‹A hmaisa vekin kan hmaiah an tlânse leh a si hi,› tiin. Curuangah an hmaiah kan tlânse lawk ding. 7 Cun nan bawhthupnak ihsin nan păwksuak pei ih, khua cu nan la pei, ziangahtile Jehovah nan Pathian in khua cu nan kut ah a lo pe ding a si. 8 Cule hitin a si ding, khawpi nan lakngah tikah, cuih khawpi cu meisa in nan ur pei. Jehovah thupek bangtukin nan tuah ding a si. Zoh hnik uh, thu ka lo pek hi!» tiah a ti.
9 Curuangah Joshua in annih cu a thlahsuak hai; cule bawhthup dingin an fehsuak ih, Ai khua ih nitlaknak lam Bethel le Ai karlakah an va relh; Joshua bélte cu mipi lakah cuih zan cu a riak. 10 Cun Joshua cu zingpit teah a tho ih, mipi a khawm hai, cule amah le Israel upapawl cu mipi hmai hruaiin Ai khua lamah an hung so. 11 Cule a hnenih um ral do mi hmuahhmuah cu an hung so ih an hun naih; cule khawpi hmai zawnah an va ih Ai khua sak lamah ṭanhmun an khuar. Ai khua le anmai karlakah phaikuam a pharhaw. 12 Cule anih in pacang 5000 hrawng a hruai ih, khua ih nitlaknak lam Bethel le Ai khaw karlakin an rak bawh. 13 Cule mipi, khawpi sak lamih khawrtu ralkappawl ṭanhmun le khaw thlang lamih bawhthuptupawl ṭanhmun cu an ruatfel ṭheh tikah, Joshua cu cuih zan ah phaikuam laiah a feh.
14 Cule hitin a si, cumi cu Ai siangpahrang in a hmuh tikah, hmanhmawh takin zingpit teah an tho, cule khaw sung mipapawl cu, amah le a mipawl hmuahhmuah thawn, Arabah hmaiih ruat mi hmun ah Israel do dingin an fehsuak, asinan khaw dung lamah amah an bawhthup ti a thei lo. 15 Cule Joshua le Israel-mi hmuahhmuah in an hmaiah sung vekin an umawter ih, ramṭhing zin lamah an tlânsia. 16 Cutin Ai khua ih a um mi, milai hmuahhmuah cu anmah dawi dingin an kokhawmaw. Cule Joshua cu an dawi ih khawpi ihsin a bumsuakngah hai. 17 Israel dawi loih a tāng mi Ai khaw sungah le Bethel khaw sungah mi pakhat hman an um nawn lo. Cutin khawpi cu áwngawin an tân ih, Israel cu an dawi.
18 Cun Jehovah in Joshua hnenah, «Na kut ih na ralnâmte kha Ai khua lamah hei hawi aw, ziangahtile cumi cu na kut ah ka lo pe ding,» tiah a ti. Cule Joshua in a kut ih ralnâmte cu khaw lam hawiin a hei thlir. 19 Cule mi bawhthuptupawl cu an umnak hmun ihsin a rang theipatawpin an păwk; a kut a hun thlir veten an tlân ih khaw sungah an lut, cule khua cu an la ih, khua urkāng dingah an tlîau ciamco. 20 Cule Ai khaw mipapawl in an dung lam an hei zoh tikah, zoh hnik, khaw meikhu van ih kaiso luihlo an hei hmu. Cutin hi lamzin ah simaw, khi lamzin ah simaw tlân dingah thazang an nei nawn lo, cule ramṭhing lam panih tlân bumtu milaipawl cu anmah dawitupawl lamah an ra kirsal ṭheh.
21 Cule bawhthuptupawl in khua cu an la zo ti le khaw meikhu kaiso luihlo kha Joshua le Israel-mi hmuahhmuah in an hmuh tikah an kirsal ih, Ai khaw mipapawl cu an that. 22 Cun anmah do dingin khaw sung ihsin mi dangpawl an ra suak; cutin annih cu Israel karlakah kulhngah an si, a hrek cu hi lamah, a hrek cu khat lamah. Cule an that ciammam ih, cutin a tâng le a tlânsuak khal pakhat hman an um lo. 23 Asinan Ai siangpahrang cu a nungin an hruai ih, Joshua hnenah an thlenpi.
24 Cule hitin a si, Israel-mipawl in anmah an dawinak hmun ramṭhing le hramlak ih a um mi Ai khawmi hmuahhmuah an that ṭheh ih, an zaten ralnâm ih an thah ṭheh hnuah, Israel-mi hmuahhmuah cu Ai khua ah an kirsal ṭheh, cutin ralnâm hriam in an that ciamco hai. 25 Cutin cuih ni ih a thi mi hmuahhmuah cu mipa le nunau kăwmin 12000 an si, cumi cu Ai khawmi zate an si. 26 Ziangahtile Ai khua luahtu zateih a thah ṭheh hlanlo Joshua cun a ralnâmte hawi a thlah lo. 27 Joshua hnenih thu a pek mi Jehovah kamsuakthu bangtukin Israel in cuih khaw ṭilva le ralthillâk lawng anmai covo ah an la. 28 Cutin Joshua in Ai khua cu a urkāng ih hnawmpen ah a tuah lan ta, tuihni tiangin a ṭhing. 29 Cule Ai siangpahrang cu zan lam tiang thing parah a thlai. Cule ni a tlak veten Joshua in thu a pe ih, a ruang cu thing par ihsin an lathla, khawpi kăwtsuah ah an va hlăwn ih, a parah lungto an peng, cumi cu tuihni tiangin a um.
Joshua in Thukham a Tharter
30 Cun Joshua in Ebal Tlang parah Israel-ih Pathian Jehovah hrangah biakṭheng a dâwl. 31 Mosi Dān Cazual sungih ngan bangin Israel tefapawl hnenih Jehovah siahhlawh Mosi-ih thu a rak pek vekin, «Zohman in thir hmangih an ser lo mi lung hlir biakṭheng,» cu dawl a si. Cule a parah Jehovah hnenah Meiur Thilhlănpawl an hlan ih, Remnak Thilhlănpawl an thawi. 32 Cule Israel tefapawl hmaika-ah Mosi ih a rak ngan mi dān vek cekci kha cutawk lung parah cun a ngansal. 33 Cun Israel hmuahhmuah cu an upapawl, an hotupawl le an laireltupawl thawn Jehovah-ih Thukham Kuang zâwntu Levi-mi, puithiampawl hmaiih Kuang khat lam sirah an ding, ram dang mipawl le an lakih suak mipawl khal an tel ve. A hrek Gerizim Tlang hmai zawnah, a hrek Ebal Tlang hmai zawnah an ding. Hi hlanih Jehovah siahhlawh Mosi in thu a rak pek vekin, Israel-mipawl thlawsuah an pe ding a si. 34 Cule cumi hnuah Dān Cazual sungih ngan bangtukin malsawmnak le camsiatnak dān thupawl hmuahhmuah cu a siarsuak. 35 Israel pungkhawm hmuahhmuah le nunaupawl le fanau tetepawl thawn le an lakih um ram dang mipawl hmaiah Mosi ih thu a rak pek zo mipawl hmuahhmuah lakah Joshua in a siarsuak lo mi ṭawngkam pakhat hman a um lo.
Gibeon-mipawl thawn Thukham Tuah
1 Cule hitin a si, Jordan hi lam ralih siangpahrang hmuahhmuah, tlangpawl ih um le phairawn ih umpawl le Lebanon lam Tifinriat Tumpi kap tluan hmuahhmuah, Heth-mi, Amor-mi, Kanaan-mi, Periz-mi, Hiv-mi le Jebus-mi in Jeriko le Ai khaw thuhla an theih tikah, 2 alungrualin Joshua le Israel do dingin an pungkhawmaw.
9:2a lungrual: A ṭawng hrampi ah cun, «kâ» ti a si (1Sp 22:13 thawn khaikhin aw).
3 Asinan Gibeon luahtupawl in Jeriko le Ai khaw parih Joshua ih thil tuah mi an rak theih tikah, 4 hrăwkhrawl zetin an cāngvāi, palai vekin an umawter ih an va feh. Cule dip hlun taktak an lāk an phurter ih, sabitzu thâwl hlun tlek le belhcawp, 5 kedam hlun le belhcawp an bŭn ih, sinfen hlun zetzet an hruk, cule an ei le in ken mi sang hmuahhmuah tla an car ih an mâwr ṭheh. 6 Cule Gilgal ih ṭanhmun khuarnak ah, Joshua hnenah an ra ih, amah le Israel mipapawl hnenah, «Ram hlapi ihsin kan ra, curuangah atu kan hnenah thukham tuah uh,» tiah an ti.
7 Cun Israel mipapawl in Hiv-mipawl hnenah cun, «Kan lakih cêng nan rak si pang ding, curuangah ziangtin nannih thawn thukham kan tuah thei ding?» tiah an rak ti.
8 Asinan annih in Joshua hnenah, «Kannih cu na siahhlawh kan si,» tiah an ti.
Cule Joshua in an hnenah, «Zo nan si, khuitawk in nan ra?» tiah a ti hai.
9 Cule annih in a hnenah, «Na siahhlawhpawl hi Jehovah na Pathian hmin ruangah ram hla zet ihsin an ra; ziangahtile a hminthannak le Izip ram ih a tuah mi hmuahhmuah, 10 Jordan tiva ralih Amor-mipawlih siangpahrang pahnih, Heshbon siangpahrang Sihon le Ashtaroth ih a um mi Bashan siangpahrang Og parih a tuah mipawl kan rak thei. 11 Curuangah kan upapawl le kan ram ih um mi hmuahhmuah in kan hnenah, ‹Nan khualtlawnnak hrangah lamcaw keng uhla, anmah táwng dingin va feh uh, cule an hnenah, «Kannih cu nan siahhlawh kan si, curuangah kan hnenah thukham tuah uh,» va ti uh,› tiah in ti. 12 Hibang kan sangpawl tla hi nan hnen ra dingih kan innpawl ihsi kan pawhsuak ni ah a hlum ih kan run ken mi an si. Asinan zoh hman uh, an car ih an mâwr thluh thlang a si. 13 Cule hibang sabitzu thâwlpawl hi a thar ih kan thunkhah mi an si, zoh hnik uh, an tlek thlang, hibang kan sinfenpawl le kan kedampawl hi lam a hlat tuk ruangah an hlun thluh a si,» tiah an ti.
14 Cun Israel mipapawl in an lamcaw hrekkhat cu an la, asinan annih in Jehovah-ih thurawnpek an sut lo. 15 Cule Joshua in anmah thawn remnak a tuah, an nun zuah dingin thukham anmah thawn a tuah, cule mipi-umkhawm hotupawl in an hnenah sia an săm.
16 Cule anmah thawn thukham an tuah hnu ni thum a cem tikah, an kiangnaiih cêng an khaw innhnen an si ti an hna in an rak thei. 17 Cun Israel tefapawl cu an feh vivo ih a ni thumnak ah an khawpipawl an va thleng. An khawpipawl cu Gibeon, Khefirah, Beeroth le Kirjath Jearim tla an si. 18 Asinan Israel tefapawl in annih cu an do lo, ziangruangahtile mipi-umkhawm hotupawl in Israel-ih Pathian Jehovah hmin in an hnenah sia an rak săm zo. Cule mipi-umkhawm hmuahhmuah cu hotupawl parah an phunzai.
19 Cun hotupawl hmuahhmuah in mipi-umkhawm hmuahhmuah hnenah, «Israel-ih Pathian Jehovah hmin in an hnenah sia kan săm zo, curuangah annih cu kan dai thei lo. 20 Himi hi an hnenih kan tuah ding mi cu a si: An nunnak kan zuah ding, culole an hnenih sia kan rak săm mi thukam ruangah kan parah thinlingnak a thleng pang ding,» tiah an ti. 21 Cule hotupawl in an hnenah, «An nunnak kan zuah pei, asinan annih cu an tiamkam zo vekin mipi-umkhawm thinghlamsaktu le tikhaisaktu si hai seh,» tiah an ti.
22 Cun Joshua in annih cu a ko hai ih an hnenah, «Kan kiangnaite-ih cêng si siin ziangahso, ‹Lam hla zetih um mi kan si,› tiah in bum? 23 Curuangah atu ah nannih cu camsiat nan si, sál ihsin zohman nan luat lo pei, ka Pathian inn thinghlamtu le ti khaitu nan si pei,» tiah a ti hai.
24 Cule annih in Joshua cu an sâng ih, «Ziangruangahtile Jehovah na Pathian in a siahhlawh Mosi hnenah ram hmuahhmuah lo pe ding le nan hmaiih ram luahtupawl hmuahhmuah siatsuah ṭheh dingin thu a pe zo ti na siahhlawhpawl hi fiangteih sim an rak si, curuangah nanmah ruangah kan nunnak hrangah kan ṭih tuk lawmmam ih, hibang thil hi kan rak ti a si. 25 Cule atu ah zoh hnik, na kut ah kan um, kan parah tuah dingih ṭha le dik na tidān dānin tuah ko aw,» tiah an ti. 26 Cule an parah hitin a tuah, Israel tefapawl kut ihsin a runsuak hai ih, cutin annih cu an that lo. 27 Cule cuih ni ah Joshua in annihpawl cu mipi-umkhawm le Pathian ih a hrilnak hmun ih Jehovah biakṭheng thinghlamtu le ti khaitu ah tuihni tiangin a tuah hai.
Ni le Thla an Ding
1 Cun hitin a rak si, Jerusalem siangpahrang Adoni-zedek in Joshua in Ai khua a lâk le a siatbăl thluhdan, Jeriko khua le a siangpahrang parih a tuah vekin Ai khua le a siangpahrang par khalah a tuah ti mi le Gibeon khawmipawl cu Israel thawn remnak an tuah ih an lakah an um ti mi thuhlapawl a thei. 2 Cutikah an ṭih tuk lawmmam, ziangruangahtile Gibeon khua cu siangpahrang khawpi vekih khawpi ropi a si, cule Ai khua hnakin a ropisawn ih a mipapawl hmuahhmuah khal an caksawn. 3 Curuangah Jerusalem siangpahrang Adoni-zedek in Hebron siangpahrang Hoham le Jarmuth siangpahrang Piram le Lakish siangpahrang Jafia le Eglon siangpahrang Debir pawl hnenah mi a thlah ih, an hnenah, 4 «Ka hnenah hung so uhla, in bawm uh, cutin Gibeon kan do pei, ziangahtile Joshua le Israel tefapawl thawn remnak an tuah a si,» tiah a ti hai. 5 Curuangah Amor-mipawlih siangpahrang panga a si mi, Jerusalem siangpahrang, Hebron siangpahrang, Jarmuth siangpahrang, Lakish siangpahrang le Eglon siangpahrang pawl cu an pungkhawmaw ih anmah le an ralkappawl hmuahhmuah cu an hung so, Gibeon khaw hmaiah ṭanhmun an khuar ih an hung do.
6 Cule Gibeon mipapawl in Gilgal ṭanhmun khuarnak ah Joshua hnenah mi an thlah ih a hnenah, «Na siahhlawhpawl hi in thlauthla hlah aw, zamrangten hung so aw, in run awla in bawm aw, ziangahtile tlang ram ih cêng Amor-mipawlih siangpahrangpawl hmuahhmuah cu kanmah do dingin an pungkhawm zo a si,» tiah an ti.
7 Cutin Joshua le a hnenih um ral do mi hmuahhmuah le micak ralṭha hmuahhmuah cu Gilgal ihsin an hung so. 8 Cule Jehovah in Joshua hnenah, «Anmahpawl khi ṭih hlah, ziangahtile annih cu na kut ah ka lo pe zo, na hmaiah zohman an ding thei lo ding,» tiah a ti. 9 Curuangah Joshua cu Gilgal ihsin zanvar a hung so ih hmakhatteah an hnen a hung thleng. 10 Cutin Jehovah in Israel hmaiah annih cu a vaivuanter ṭheh hai ih, Gibeon ah tam ngaingai an that, Beth Horon fehnak zintluan in an dûm vivo ih, Azekah le Makkedah tiang an that vingvo. 11 Cule hitin a si, Israel tefapawl hmaiih an tlan laiah, Beth Horon lam suhnak hmun an thlen zawngah Jehovah in van ihsin rial tumpi pi in Azekah khua tiangin a run den ciamco ih an thi. Israel tefapawl in ralnâm ih an thah mi hnakin rial ih a denthat mi an tamsawn.
12 Cun Jehovah in Israel tefapawl hnenih Amor-mipawl a pek hai ni ah Joshua in Jehovah hnenah a ṭawngsuak ih, Israel mithmuhah:
«Ninu, Gibeon tlunah ding awla,
Thlapa, Aijalon Phaikuam ah,»
tiah a ti.
13 Cutin mipi in an ralpawl parih phuba an lâk thluh hlanlo,
Ni cu a ding ringring ih,
Thlapa khal a cawl.
Himi hi Jasher-ih Cazual ah ngan a si lo maw? Cutin ni cu van laifangah a ding ringring ih, ni khat pumhlum zikte tlak zai a rel lo.
14 Cule Jehovah in cutivekih minung aw a ngai ni cu a hlan khalah a hnu khalah a um dah lo, ziangahtile Jehovah in Israel hrangah ral a do a si.
15 Cun Joshua le a zawngih um Israel hmuahhmuah cu an ṭanhmun khuarnak Gilgal ah an kirsal.
Amor Siangpahrangpawl Thahnak
16 Asinan hi siangpahrang panga pawl cu an tlân ih Makkedah hmun ih pûk ah an va relh. 17 Cule cumi cu Joshua hnenah, «Siangpahrang panga kha Makkedah hmun ih pûk ah relhin an hmu sokhaw,» tiah an sim.
18 Cule Joshua in, «Pûk kâ ah lung tumpipawl hril uhla, anmah kiltu ding milai ret uh. 19 Cule nannih cu cu tawkah tāng ta hlah uh, nan ralpawl dawi sawn uh, cule a dung khawrtupawl kha bei uh. An khuapawl ah lutter hrimhrim hlah uh, ziangahtile Jehovah nan Pathian in nan kut ah anmah cu a lo pe hai zo a si,» tiah a ti. 20 Cun hitin a rak si, Joshua le Israel tefapawl in an cimih thluh lai hlanlo, thahawknak nasazetin an thah ciamco laiah, a tlânsuak mipawl cu kulh nei khawpipawl ah an lut. 21 Cule mipi hmuahhmuah cu Makkedah hmun ih Joshua hnenah, ṭanhmun khuarnak ah hnangamten an kirsal ṭheh. Israel tefapawl lakih zohman dokalhin zohman in an lei an cangter lo.
22 Cun Joshua in, «Pûk kâ kha áwng uhla, cuih siangpahrang panga pawl kha pûk ihsin ka hnenah rak hruai uh,» tiah a ti. 23 Cule cutivekcun an tuah, cule pûk ihsin a hnenah cuih siangpahrang panga pawl, Jerusalem siangpahrang, Hebron siangpahrang, Jarmuth siangpahrang, Lakish siangpahrang le Eglon siangpahrang pawl cu an hei hruai.
24 Cule hitin a rak si, cuih siangpahrangpawl Joshua hnenih an hei hruai tikah, Israel mipa hmuahhmuah cu Joshua in a ko hai ih, amah zawngih a fehtu ralbawipawl hnenah, «Rak naih uh, hi siangpahrangpawlih ahngawng pál uh,» tiah a ti hai. Cule an rak naih ih an hngawng an palsak. 25 Cun Joshua in an hnenah, «Ṭih hlah uh, lungphâng fawn hlah uh, cak le ralṭha zetin um uh, ziangahtile nan do mi nan ralpawl hmuahhmuah parah Jehovah in hitin a tuah ding a si,» tiah a ti. 26 Cule cumi hnuin Joshua in anmah cu a bei hai ih, a that hai, cule thing panga parah a thlai hai ih, zan lam tiang thing parah an thlaiaw ringring. 27 Cutin nitlak zikin Joshua in thu a pe ih, thing par ihta cupawl cu an lathla, an rak relhnak pûk sungah an hlăwn, cule pûk kâ cu lung tumpi pi in an sin, cumi cu tuihni tiangin an um lai.
10:24a hngawng: Siangpahrang in a neh mi siangpahrang cu a băwkter ding ih a hngawng parah a ke a ret.
Thlang lam Ram Lâknak
28 Joshua in cuih ni ah Makkedah cu a la ih, cumi le an siangpahrang cu ralnâm hriam in a that. Anih in annihpawl cu cuih hmun ih um nunnak nei hmuahhmuah thawn a that ṭheh hai. Pakhat hman hlah mi a nei lo. Jeriko siangpahrang parih a tuah vekin, Makkedah siangpahrang par khalah a tuah.
29 Cun Joshua cu a hnenih Israel-mi hmuahhmuah thawn Makkedah a suahsan ih, Libnah ah a feh, cule Libnah cu an do. 30 Cule Jehovah in cuih khua le a siangpahrang khal cu Israel kut ah a pek hai, anih in cuih khua le a sungih um nunnak nei hmuahhmuah cu ralnâm hriam in a that hai. Pakhat hman hlah mi a nei lo, an siangpahrang cu Jeriko siangpahrang parih a tuah vekin a tuah ve.
31 Cun Joshua cu a hnenih Israel-mi hmuahhmuah thawn Libnah a suahsan ih, Lakish ah a feh, cule ṭanhmun an khuar ih cuih khua cu an do. 32 Cule Jehovah in Lakish khua cu Israel kut ah a pe, cumi cu a ni hnihnak ah an la, cule Libnah parih a tuahdān hmuahhmuah bangtukin cuih khua le a sungih um nunnak nei hmuahhmuah cu ralnâm hriam in a that ṭheh. 33 Cun Gezer siangpahrang Horam cu Lakish bawm dingin a hung so, cule Joshua in amahpa le a mipawl cu pakhat hman tâng nawn lo tiangin a that.
34 Joshua cu a hnenih Israel hmuahhmuah thawn Lakish a suahsan ih Eglon ah a feh, cule ṭanhmun an khuar ih, cuih khua cu an do. 35 Cuih ni ah cuih khua cu an la ih, cuih ni lala ah khua le a sungih um nunnak nei hmuahhmuah cu Lakish khua a tuah vekin ralnâm hriam in a that ṭheh hai.
36 Cutin Joshua cu a hnenih um Israel-mi hmuahhmuah thawn Eglon ihsin a so ih Hebron ah a feh, cule cucu an va do. 37 Cule cuih khua cu an la ih a khua, a siangpahrang, a kiangkapih khua hmuahhmuah le an sungih um nunnak nei hmuahhmuah in ralnâm hriam in an do ih Eglon tlunih a tuah vekin pakhat hman a hlah lo, a khua le a sungih um nunnak nei hmuahhmuah cu a hlorálter ṭheh.
38 Cun Joshua le Israel hmuahhmuah cu Debir khaw lamah an kirsal, cule cuih khua cu an do. 39 Cule anih in cuih khua le a siangpahrang le a kiangkapih khua hmuahhmuah cu a la, cupawl cu ralnâm hriam in an bei ih, a sungih um nunnak nei hmuahhmuah cu a that ṭheh. Pakhat hman a hlah lo, Hebron parih a tuah vekin Debir le a siangpahrang parah a tuah, Libnah le a siangpahrang parih a tuah vek khalin.
40 Cutin Joshua cun ram hmuahhmuah: tlang ram le Negev le phairawn le ramṭhing ram hrâppawl le an siangpahrang hmuahhmuah cu a bei ih, pakhat hman a hlah lo, Israel-ih Pathian Jehovah in thu a rak pek zo vekin thaw a thaw mi hmuahhmuah cu a that ṭheh. 41 Cule Joshua in Kadesh Barnea ihsin Gaza tiang, Goshen ram hmuahhmuah, Gibeon tiangin a that ṭheh. 42 Joshua in hibang siangpahrangpawl hmuahhmuah le an ram cu ṭum khat ah a lâk ṭheh, ziangruangahtile Israel-ih Pathian Jehovah in Israel hrangah a do. 43 Cun Joshua le a hnenih um Israel-mi hmuahhmuah cu Gilgal ih an ṭanhmun khuarnak ah an kirsal.
Sak lam Ram Lâknak
1 Cule hitin a rak si, Hazor khaw siangpahrang Jabin in hih thuhlapawl a theih tikah, Madon khaw siangpahrang Jobab hnenah siseh, Shimron siangpahrang hnenah siseh, Akshaf siangpahrang hnenah siseh, 2 sak lam tlang rampawl, Kinneroth khaw thlang lam Arabah, hmun niam, nitlaknak Dor hmun sângpawl ih um siangpahrangpawl hnenah siseh, 3 nisuahnak le nitlaknak ih um Kanaan-mipawl hnenah siseh, tlang ih um Amor-mi, Heth-mi hnenah siseh, Periz-mi hnenah siseh, tlang parih um Jebus-mi le Mizpah ram Hermon hnuaiih um Hiv-mi hnenah siseh mi a thlah. 4 Cutin annih cu, anmah le an zawngih um an ralkappawl hmuahhmuah, mi tampi, an tam lam cu tifinriat kapih vunnel zat, ráng le ránglêng tam ngaingai thawn an păwksuak. 5 Cule hibang siangpahrangpawl hmuahhmuah cu an tawngkhawmaw, an ra ih Israel do dingin Merom tidai ah ṭanhmun an khuartlang.
6 Asinan Jehovah in Joshua hnenah, «Anmahpawl ruangah ṭih hlah, ziangahtile thaizing atu tikcu ah Israel hmaiah thah cia-in an zaten ka lo pe thluh hai ding. An rángpawl kaizatha nan sâtcat pei ih, an ránglêngpawl meisa in nan urkāng pei,» tiah a ti. 7 Cutin Joshua le a zawngih ral do mipawl hmuahhmuah cu Merom ti kapah cun an feh lohli ih an do hai. 8 Cule Jehovah in annihpawl cu Israel kut ah a pe, Sidon Ropisawn hmun tiang le Misrefoth Tivate tiang le nisuahnak lamah Mizpah Phaikuam tiangin an neh ih an dûm. Pakhat hman an tān nawn lo tiangin an do. 9 Cutin Jehovah in a rak sim vekin, Joshua in an parah a tuah, an rángpawlih kaikuatha a sahcatsak ih, meisa in an ránglêngpawl a urkāng ṭheh.
10 Cu laiah Joshua cu a kirsal ih Hazor khua a va la, cule an siangpahrang cu ralnâm hriam in a that, ziangahtile Hazor khua cu a hlanah cuih lalrampawl hmuahhmuah ih lubân a rak si. 11 Cule annih in cuih khua ih um nunnak nei hmuahhmuah cu ralnâm hriam in an that ih, an hlorálter ṭheh. Thaw a thaw mi pakhat hman an tâng lo. Cun Hazor cu meisa in a urkang.
12 Cule cuih siangpahrangpawlih khawpipawl hmuahhmuah le an siangpahrangpawl hmuahhmuah cu Joshua in a la ih, ralnâm hriam in a that hai. Jehovah siahhlawh Mosi ih thu a rak pek vekin anih in a that ṭheh hai. 13 Asinan Joshua ih a urkăng mi Hazor khua siarlo tlang parih a um mi khawpipawl cu pakhat hman Israel in a urkāng lo. 14 Cule hih khawpipawl ihsi ralthillawnpawl le sumhnámpawl cu Israel tefapawl in anmai covo ah an lak; asinan an tihlorál ṭheh hlanlo ralnâm hriam in mi kip cu an that, cule thaw a thaw mi pakhat hman an hlah lo. 15 Jehovah in a siahhlawh Mosi thu a pek vekin, Mosi in Joshua thu a pe ve, cule cuvek cekci in Joshua in a tuah ṭheh. Joshua cun Jehovah in Mosi thu a pek mi hmuahhmuah cu tuah loih hrelhtak hrimhrim a nei lo.
Joshua-ih Nehnak
16 Cutivekcun Joshua in hibang ram hmuahhmuah, tlang rampawl, Negev hmuahhmuah, Goshen ram hmuahhmuah, phaikuam rampawl le Arabah, Israel tlang rampawl le a phairawn rampawl, 17 Seir Tlang hun sutu Halak Tlang ihsin Hermon Tlang hnuai Lebanon Phaikuam ih um Baal Gad tiangin a lâk ṭheh. An siangpahrangpawl hmuahhmuah cu a la ṭheh, cule a sattlu hai ih, a that hai. 18 Joshua in cuih siangpahrangpawl hmuahhmuah cu reipi a do. 19 Gibeon khua ih a um mi Hiv-mipawl siarlo Israel tefapawl thawi remnak a tuahtu khua an um lo. An zaten do ih an lak mi hlir a si. 20 Ziangahtile Jehovah in Mosi hnenih thu a pek zo vekin, Jehovah in anmah a hlorálternak dingah le zahngainak zianghman co loih a thah ṭheh hai sawnnak dingah, Israel rak do dingin Jehovah in an thinlung a hakter.
21 Cule cu laifangah Joshua cu a feh ih, Anak-mipawl cu tlang rampawl ihsin siseh, Hebron ihsin siseh, Debir ihsin siseh, Anab ihsin siseh, Judah tlang ram hmuahhmuah ihsin siseh, Israel tlang ram hmuahhmuah ihsin siseh a cimitter ṭheh, anmah cu Joshua in an khawpipawl thawn a hlorálter verver. 22 Israel tefapawl ram ah Anak-mi pakhat hman an tâng nawn lo, Gaza khua le Gath khua le Ashdod khua lawngah an tâng lai.
23 Cutin Jehovah in Mosi hnenih a sim mi hmuahhmuah vekin, Joshua in ram pumpi in a lâk ṭheh, cule Joshua cun an hnám cio ih an covo zulhin Israel cu ro ih an co ding mi ram a zem fingfing hai. Cun ram cu ral a dai ta.
Mosi ih Neh Mi Siangpahrangpawl
1 Hipawl hi Israel tefapawl ih an neh mi ram siangpahrangpawl cu an si, nisuahnak lamah Jordan tiva ral, Arnon Tiva ihsin Hermon Tlang le nisuahnak lam Arabah hmuahhmuah tiangih an ram cu an neihsak. 2 Siangpahrang pakhat cu Amor-mipawlih siangpahrang Sihon a si. Amah cu Heshbon ah a cêng ih, Gilead ram hrek siseh, Arnon Tiva kapih um Aroer khua ihsin le cuih tiva laifang ihsin Ammon-mipawl ramri Jabbok Tiva tiangin siseh, 3 Arabah ihsi nisuahnak lamih um aKinneroth Tifinriat tiang le Arabah Tipi, nisuahnak lamih um Cite Tipi tiang siseh, Beth Jeshimoth lamzin siseh, thlang lam suk ah Pisgah tlanghrâp tiangin a uk. 4 A dang siangpahrang cu Bashan siangpahrang Og le a lalram a si, amah cu mimangkawngpawl lakih a tāngsŭn a si, amah cu Ashtaroth ah le Edrei ah a cêng. 5 Cule anih cun Hermon Tlang siseh, Salkah khua siseh, Bashan ram hmuahhmuah ah Geshur-mipawl le Maakath-mipawl ih ramri tiang le Heshbon siangpahrang Sihon-ih ramri Gilead ram a hrek tiangin a uk.
12:3a Kinneroth Tifinriat: Galili Tili kawhnak a si.
6 Hibangpawl hi Jehovah siahhlawh Mosi le Israel tefapawl in an rak neh, cule Jehovah siahhlawh Mosi in cuih ram cu Reuben-mipawl le Gad-mipawl le Manasseh hnám hrek pawl hnenah an ro dingah a rak pe.
Joshua ih Neh Mi Siangpahrangpawl
7 Cule hipawl cu Joshua le Israel tefapawl in Israel hnámpawl an hnam ṭhenawkdān bangtukih an neih dingih a pek mi hi lam nitlaknak lam Jordan ralih an neh mi Lebanon phaikuam ih um Baal Gad ihsin Seir tlang vun sutu Halak tlang tiangih siangpahrangpawl an si.
8 Cuih siangpahrangpawl cu tlang ram ah, phaikuam ah, Arabah ah, ram hrâp ah, ramṭhing ah le Negev ih a um mi an si. Anmah cu Heth-mipawl, Amor-mipawl, Kanaan-mipawl, Periz-mipawl, Hiv-mipawl le Jebus-mipawl an si.
9 Pakhat cu Jeriko siangpahrang a si, pakhat cu Bethel khaw kiangih um Ai siangpahrang a si.
10 Pakhat cu Jerusalem siangpahrang a si ih, pakhat cu Hebron siangpahrang a si.
11 Pakhat cu Jarmuth siangpahrang a si ih, pakhat cu Lakish siangpahrang a si.
12 Pakhat cu Eglon siangpahrang a si ih, pakhat cu Gezer siangpahrang a si.
13 Pakhat cu Debir siangpahrang a si ih, pakhat cu Geder siangpahrang a si.
14 Pakhat cu Hormah siangpahrang a si ih, pakhat cu Arad siangpahrang a si.
15 Pakhat cu Libnah siangpahrang a si ih, pakhat cu Adullam siangpahrang a si.
16 Pakhat cu Makkedah siangpahrang a si ih, pakhat cu Bethel siangpahrang a si.
17 Pakhat cu Tappuah siangpahrang a si ih, pakhat cu Hefer siangpahrang a si.
18 Pakhat cu Afek siangpahrang a si ih, pakhat cu Lasharon siangpahrang a si.
19 Pakhat cu Madon siangpahrang a si ih, pakhat cu Hazor siangpahrang a si.
20 Pakhat cu Shimron Meron siangpahrang a si ih, pakhat cu Akshaf siangpahrang a si.
21 Pakhat cu Taanak siangpahrang a si ih, pakhat cu Megiddo siangpahrang a si.
22 Pakhat cu Kedesh siangpahrang a si ih, pakhat cu Karmel tlang ih Jokneam siangpahrang a si.
23 Pakhat cu Dor tlang ram ih Dor siangpahrang a si ih, pakhat cu Gilgal miphunpawlih siangpahrang a si.
24 Pakhat cu Tirzah siangpahrang a si ih, siangpahrang zaten 31 an si.
Lâk ding mi Ram a Tang hrih Lai
1 Cun Joshua cu a tar ih, a kum khal a tam zet. Cule Jehovah in a hnenah, «Nang cu na tar thlang, na kum le a tam zet, ram lâk ding le tam tuk a tāng lai fawn. 2 Himi hi a tāng lai mi ram cu a si: Filisṭia-mipawl le Geshur-mipawlih ram hmuahhmuah, 3 Izip nisuahnak lamih Sihor tiva ihsin sak lamah Kanaan-mipawl ram ih siar Ekron ramri tiang; Filisṭia-mipawlih bawi panga an um: Gaza-mipawlih bawi, Ashdod-mipawlih bawi, Ashkelon-mipawlih bawi, Gath-mipawlih bawi, Ekron-mipawlih bawi, cule Avit-mipawlih ram khal. 4 Thlang lam ah cun, Kanaan-mipawlih ram hmuahhmuah, Sidon-mipawlih ta Mearah ihsin Afek tiang, Amor-mipawlih ramri tiangin, 5 Gebal-mipawlih ram le Lebanon nisuahnak lam ram hmuahhmuah le Hermon Tlang hnuaiih Baal Gad khua ihsin Hamath luhnak tiang, 6 Lebanon ihsin Misrefoth Maim tiangih tlang ram ih cêng mi hmuahhmuah le Sidon-mi hmuahhmuah tla an tel. Anmahpawl cu Israel tefapawl hmai ihsin ka dawisuak ṭheh hai ding. Na hnenih thu ka lo pek zo vekin, cumi cu camcawhfung zûkin an ro ah Israel tefapawl kha zem hai aw. 7 Curuangah hi ram hi hnám pakua pawl le Manasseh hnám hrek kha an ro ah zem hai aw,» tiah a ti.
Jordan Nisuahnak Ram Zemawknak
8 A dang Manasseh hnám hrek pawl thawn Reuben-mipawl le Gad-mipawl cun Jehovah siahhlawh Mosi in anmah a rak pek zo hai bangin, Mosi ih a rak pek hai zo mi Jordan nisuahnak lam ral cu an ro ah an co. 9 Arnon Tiva kapih um Aroer khua ihsin le phaikuam laifangih um khua le Medeba hmunrawn hmuahhmuah ihsin Dibon khua tiang, 10 Heshbon khawpi ihsi uktu Amor-mipawlih siangpahrang Sihon-ih khawpipawl hmuahhmuah ihsin Ammon tefapawlih ramri tiang, 11 Gilead ram le Geshur-mipawl le Maakath-mipawl ih ramri, Hermon Tlang hmuahhmuah le Bashan ram hmuahhmuah ihsin Salkah khua tiang, 12 mimangkawngpawl lakih a tāngsŭn Ashtaroth khua le Edrei khua uktu, Bashan siangpahrang Og-ih lalram hmuahhmuah tla an si. Ziangahtile hibangpawl cu Mosi in a rak neh hai zo ih, a rak dawisuak ṭheh zo.
13 Cutisikhalsehla Israel tefapawl in Geshur-mipawl le Maakath-mipawl cu an dawisuak lo, Geshur-mipawl le Maakath-mipawl cu tuihni tiangin Israel-mipawl lakah an cêng sawn.
14 Levi hnám lawng ro a pe ve lo, Jehovah in an hnenih a rak sim cia bangin, meisa ih ur mi, Israel-ih Pathian Jehovah hnenih thawi mipawl kha an ro a si.
Reuben Ram
15 Cule Mosi in Reuben tefapawlih hnám cu an hrin an hrin zulhin ro a pe hai. 16 An ramri cu Arnon Tiva kapih um Aroer khua ihsin le phaikuam sungih um khua le Medeba kiangih hmunrawn hmuahhmuah, 17 Heshbon khawpi le a kiangkap hmunrawn ih khua hmuahhmuah an si. Cupawl cu: Dibon, Bamoth Baal, Beth Baal Meon, 18 Jahaza, Kedemoth, Mefaath, 19 Kirjathaim, Sibmah, phaikuam kiang tlang ih um Zereth Shahar, 20 Beth Peor khua, Pisgah tlanghrâppawl le Beth Jeshimoth khua, 21 phairawn khua hmuahhmuah le Heshbon khua ihsi rak uktu Amor-mipawlih siangpahrang Sihon-ih lalram hmuahhmuah tiangin a rak si. Anih cu Midian lal Evi, Rekem, Zur, Hur le Reba pawl thawn Mosi in a that cih, annih cu Sihon-ih ram ih cêng a hnuaiih uktupawl an si. 22 Beor-ih fapa aizohthiam Balaam khal Israel tefapawl in mi dang an thah mipawl lakah ralnâm in an that tel ve. 23 Cule Reuben tefapawlih ramri cu Jordan tiva kap a si. Himi cu Reuben tefapawl in an hrin an hrin ih ro an co mi khawpipawl le an khawṭekpawl a si.
Gad Ram
24 Mosi in Gad hnám, Gad tefapawl hnen khalah an hrin an hrin zulhin ro a pe hai. 25 An ramri cu Jazer khua le Gilead ram ih khawpi hmuahhmuah le Ammon-mipawlih ram hrek ihsin Rabbah khaw hmaiih um Aroer khua tiang, 26 cule Heshbon khua ihsin Ramath Mizpah le Betonim khua tiang, cun Mahanaim ihsin Debir ramri tiang, 27 cule phaikuam ah Beth Haram khua, Beth Nimrah khua, Sukkoth khua le Zafon khua, Jordan tiva cu ramri ah hmangin Hesbon siangpahrang Sihon-ih lalram a tāng lai mi le Jordan nisuahnak lamah Kinnereth Tifinriat zim tiang a si. 28 Himi hi Gad-ih tefapawl in an hrin an hrin ih ro an co mi khawpipawl le an khawṭekpawl tla an si.
Manasseh Hnám Hrek (Nisuahnak Lamah)
29 Mosi in Mannaseh cithlah hnám hrek pawl ro a pe hai, cumi cu Mannaseh hnám hrek pawl hrangah an hrin an hrin zulhih pek mi a si. 30 An ramri cu Mahanaim ihsin Bashan ram hmuahhmuah, Bashan siangpahrang Og-ih lalram hmuahhmuah, Bashan ram sungih a um mi Jair-ih khuapawl hmuahhmuah le khawpi 60 thawn, 31 Gilead ram hrek le Bashan ram ih Og-ih lalram khawpi Ashtaroth le Edrei cu Mannaseh fapa Makir-ih tefapawl hrang a si ih, an hrin an hrin zulhin Makir-ih tefa a hrek pawl hrangah a si.
32 Hih Moab phairawnpawl, Jeriko zawn, Jordan ral, nisuahnak lam rampawl hi Mosi in an ro dingih a zem mi cu an si. 33 Asinan Levi hnám cu Mosi in ro a pe ve lo, Jehovah in an hnenih a rak sim zo bangin, Israel-ih Pathian Jehovah cu an ro a si.
Jordan Nitlaknak Ram Zemawknak
1 Hibang rampawl hi a si, Israel tefapawl in ro ih co dingah Kanaan ram ah an lâk. Puithiam Eleazar, Nun-ih fapa Joshua le Israel tefapawlih hnám palepawlih lubânpawl in cumi cu ro dingah anmahpawl cu an zem. 2 Hnám kua le hnám hrek hrangah Jehovah in Mosi kut hmangih thu a rak pek vekin, an ro hrangah camcawhfung an zûk. 3 Ziangahtile Mosi in hnám hnih le a hrek cu Jordan khat lam ralah ro a rak pe hai zo, asinan Levi-mipawl cu an lakah ro a pe ve lo. 4 Ziangahtile Joseph tefapawl kha Manasseh le Efraim tiin hnám hnih an si. Cule Levi-mipawl cu cuih ram ah an cēnnak ding hrangah khawpipawl le an sumhnámpawl le an thilripawl hrangih an ran tlannak ram lawnglakpawl siarlo covo zianghman an pe ve lo. 5 Jehovah in Mosi thu a rak pek vekin, Israel tefapawl in an tuah, cule ram cu an zemaw.
Kaleb in Hebron Ro ah a Co
6 Cun Judah tefapawl cun Gilgal ih Joshua an ra naih. Cule Keniz-mi Jefunneh-ih fapa Kaleb in a hnenah, «Jehovah in Pathian mi Mosi hnenah Kadesh Barnea ah nangmah le keimah-ih thuhla a rel mi thu kha na thei ko. 7 Jehovah siahhlawh Mosi in ram va thlingthla dingin Kadesh Barnea ihsi i thlah laiah khan kum 40 mi ka si ih, ka thinlung ih um vekin a hnenah thu ka thlĕnkir. 8 Cutisikhalsehla ka zawngih a so vetu ka unaupawl in mipi thinlung an beidawngter, asinan kei cun Jehovah ka Pathian cu pumhlum in ka thlun a si. 9 Cule cuih ni ah Mosi in sia a săm ih, ‹Jehovah ka Pathian cu pumhlum in na thlun ruangah na ke ih na palnak ram cu kumkhuain nangmah le na tefapawlih co mi ro a si tengteng ding,› tiah i ti. 10 Cule atu ah ngai hnik, Jehovah in Mosi hnenih cumi thu a sim ihsin ramṭhing ih Israel a vahvaih sung hmuahhmuah, Jehovah in a rak sim vekin kum 45 rori in nungdamter. Cule atu ah ngai hnik, tuihni ah kum 85 mi ka si thlang. 11 Tuihni ah Mosi in i thlah lai tlukin ka cak lai hrih thotho, doawknak ah feh sukso ding khalin atu ah thazang ka nei lai a si. 12 Curuangah khaih ni ih Jehovah in a rak sim mi himi tlang hi i pe aw, ziangahtile khaih ni ah cutawk hmun ah ziangtin Anak-mipawl an um ti le khawpipawl cu ziangtluk an nasa ih ziangvekin an kulhhngetaw tipawl tla na thei ko. Jehovah in i umpi ding ih, Jehovah in a rak sim vekin anmah cu ka dawisuak thei ko ding,» tiah a ti.
13 Cule Joshua in amah cu thlawsuah a pe ih Jefunneh fapa Kaleb cu a ro dingah Hebron khua a pe. 14 Curuangah Hebron cu Keniz-mi Jefunneh-ih fapa Kaleb-ih ro ah tuihni tiang a rung si lan ta, ziangruangahtile anih cun Israel-ih Pathian Jehovah cu pumhlum in a thlun. 15 Cule Hebron-ih hmin cu a hlanah cun Kirjath Arba a si. Arba cu Anak-mipawl lakih miropibik a si. Cun ram cu ral a dai ta.
Judah Ram
1 Judah tefapawlih hnám an hrin an hrin zulhih an covo cu hihi a si: Zin Ramṭhing thlang lam Edom ramri cu thlang lam ramri dĕng a si. 2 Cule an thlang lam ramri cu Cite Tipi kap ihsin a thăwk ih, a ti kĕl ihsin thlang lamah a hawithla vivo. 3 Cun Akrabbim sohnak thlang lam kapin ramri cu a feh vivo ih, Zin a va thleng, Kadesh Barnea thlang lam kapah a kaiso ih, Hezron a va thleng, Adar ah a kaiso ih, Karkaa a helkûal. 4 Cutawk ihsin Azmon lamah a feh vivo ih Izip Tivate ah a va suak, cule ramri cu tifinriat ah a net. Hihi thlang lam nan ramri ding cu a si.
5 Nisuahnak lam ramri cu Cite Tipi a si ih, Jordan tiva kâ tiangin a si. Cule sak lam ramri cu Jordan tiva kâ ih tifinriat kĕl ihsin a thăwk. 6 Ramri cu Beth Hoglah lamah a kaiso ih, Beth Arabah sak lam tiang a feh vivo, cule ramri cu Reuben-ih fapa Bohan-ih lungphun tiang a so vivo. 7 Cun ramri cu Akor Phaikuam ihsin Debir lamah a so vivo ih, phaikuam thlang lamih um Adummim sohnak hmaiah Gilgal lam panin sak lamah a feh vivo. Ramri cu En Shemesh tipi ah a feh vivo ih, En Rogel ah a net. 8 Cule ramri cu Hinnom Fapa Phaikuam ah a fehso ih, Jebus-mipawl umnak khua thlang lam tlanghrâp a thleng, cumi cu Jerusalem a si. Ramri cu Hinnom Phaikuam nitlaknak lam hmaiih um tlang zimah a so, cumi cu Refaim Phaikuam sak lam netnak a si. 9 Cun ramri cu tlang zim ihsin Neftoah tihna tiangin a fehkûal ih, Efron Tlang khawpipawl ah a lan vivo. Cule ramri cu Kirjath Jearim ti mi Baalah ah a fehkûal vivo. 10 Cun ramri cu Baalah ihsin Seir Tlang nitlaknak lamah a kirsal ih, sak lamah Jearim Tlang kap a thleng, cumi cu Kesalon a si, Beth Shemesh lamah a suk ih, Timnah a vung thleng. 11 Cule ramri cu sak lamah Ekron kapah a fehso. Cun ramri cu Shikron ah a fehkûal ih, Baalah Tlang a hei pahtlăng, cule Jabneel a va thleng. Cun ramri cu tifinriat ah a va net.
12 Nitlaknak lam ramri cu Tifinriat Tumpi kap tluan hmuahhmuah khi a si. Himi cu an hrin an hrin in Judah tefapawlih an ramri hmuahhmuah cu a si.
Kaleb in Hebron le Debir a Luah
13 Cule Jefunneh-ih fapa Kaleb cu Joshua hnenih Jehovah thupek bangtukin, Judah tefapawl lakah covo a pe ve ih, Hebron an ti mi Kirjath Arba a pe, Arba cu Anak-ih pa a si. 14 Kaleb in cuih hmun ihsin Anak-ih fapa pathum, Sheshai, Ahiman le Talmai, Anak-ih tefapawl tla a dawisuak hai. 15 Cun anih cu cutawk ihsin Debir ih cêngpawl hnenah a so, a hlanah Debir-ih hmin cu Kirjath Sefer a si.
16 Cule Kaleb in, «Kirjath Sefer khua do ih a latu cu a nupi dingah ka fanu Akhsah ka pe ding,» tiah a ti. 17 Cule Kaleb-ih unaupa Kenaz-ih fapa Othniel in cuih khua cu a la, cule Kaleb in a fanu Akhsah cu nupi ah a pek. 18 Cun hitin a si, cu nu cu cu pa hnen a va thlen tikah, cu nu cun a paih lóram dil dingin a pasal a năwr. Cun cu nu cu a lāk par ihsin a ṭum, cule Kaleb in a hnenah, «Ziangso na duh?» tiah a rak ti.
19 Anih in a let ih, «Thlawsuah in pe aw, Negev in pe zo cengmang cu cirhti khal in pe lawlaw aw,» tiah a ti. Cule Kaleb in cirhti tlunta le cirhti hnuaita cu a pe.
Judah Ram Khawpipawl
20 Himi hi Judah tefapawlih hnám an hrin an hrin zulhih an ro a si. 21 Thlang lamah cun Edom ramri lamih Judah cithlah hnámih an khawpi hlabikpawl cu Kabzeel, Eder, Jagur, 22 Kinah, Dimonah, Adadah, 23 Kedesh, Hazor, Ithnan, 24 Zif, Telem, Bealoth, 25 Hazor, Hadattah, Kerioth, Hazor ti mi Hezron, 26 Amam, Shema, Moladah, 27 Hazar Gaddah, Heshmon, Beth Pelet, 28 Hazar Shual, Beersheba, Bizjothjah, 29 Baalah, Ijim, Ezem, 30 Eltolad, Kesil, Hormah, 31 Ziklag, Madmannah, Sansannah, 32 Lebaoth, Shilhim, Ain le Rimmon pawl tla an si. An khawpipawl cu, an khawṭekpawl thawn a zaten 29 an si.
33 Phairawn lamih an khawpipawl cu, Eshtaol, Zorah, Ashnah, 34 Zanoah, En Gannim, Tappuah, Enam, 35 Jarmuth, Adullam, Sokoh, Azekah, 36 Sharaim, Adithaim, Gederah le Gederothaim tla an si: an khawpi zaten, an khawṭekpawl thawn hleili an si. 37 Cuihtlunah Zenan, Hadashah, Migdal Gad, 38 Dilean, Mizpah, Joktheel, 39 Lakish, Bozkath, Eglon, 40 Kabbon, Lahmas, Kithlish, 41 Gederoth, Beth Dagon, Naamah le Makkedah tla an si: an khawṭekpawl thawn, khawpi hleiruk an si. 42 Cuihtlunah Libnah, Ether, Ashan, 43 Jiftah, Ashnah, Nezib, 44 Keilah, Akzib le Mareshah tla an si: an khawṭekpawl thawn khawpi pakua an si. 45 Cuihtlunah Ekron le a kiangkap khawpi tedeuhpawl le a khawṭekpawl thawn an si. 46 Ekron ihsin tifinriat tiang Ashdod kiangkap hmuahhmuah ih an khawṭekpawl thawn an si. 47 Cuihtlunah Ashdod le a kiangkapih a khawpi tedeuhpawl le a khawṭekpawl, Gaza le a kiangkapih a khawpi tedeuhpawl le a khawṭekpawl tla an si ih, Izip Tivate le Tifinriat Tumpi kap tluan tiangin an si.
48 Cule tlang rampawl ah cun: Shamir, Jattir, Sokoh, 49 Dannah, Debir ti mi Kirjath Sannah, 50 Anab, Eshtemoh, Anim, 51 Goshen, Holon le Giloh tla an si ih, an khawṭekpawl thawn, khawpi hleikhat an si. 52 Cuihtlunah Arab, Dumah, Eshean, 53 Janum, Beth Tappuah, Afekah, 54 Humtah, Hebron ti mi Kirjath Arba le Zior tla an si ih, an khawṭekpawl thawn, khawpi pakua an si. 55 Cuihtlunah Maon, Karmel, Zif, Juttah, 56 Jezreel, Jokdeam, Zanoah, 57 Kain, Gibeah le Timnah tla an si ih, an khawṭekpawl thawn khawpi pahra an si. 58 Cuihtlunah Halhul, Beth Zur, Gedor, 59 Maarath, Beth Anoth le Eltekon tla an si ih, khawpi paruk, an khawṭekpawl thawn an si. 60 Cuihtlunah Kirjath Jearim ti mi Kirjath Baal le Rabbah tla an si ih, an khawṭekpawl thawn khawpi pahnih an si.
61 Ramṭhing ah cun: Beth Arabah, Middin, Sekakah, 62 Nibshan, Cite Khawpi le En Gedi tla an si ih, an khawṭekpawl thawn khawpi paruk an si.
63 Jerusalem luahtu Jebus-mipawl lawngte cu, Judah tefapawl in an dawisuak thei lo, Jebus-mipawl cu Jerusalem ah Judah tefapawl zawngah tuihni tiang an cêng riangri.
Joseph Tefapawlih Ram
1 Joseph tefapawl parih camcawhfung tla mi cu Jordan tiva ihsin Jeriko tiang a si: Jeriko tipi nisuahnak lamah a feh, Jeriko ihsin ramṭhing paltlăngin tlang ram lamah Bethel tiangin a fehso vivo. 2 Cun Bethel ihsin Luz ah a fehsuak ih, Arki-mipawlih ramri Ataroth tiangin a fehso. 3 Cule nitlaknak lamah Jaflet-mipawlih ramri ah, Beth Horon hnuaita ramri tiang le Gezer tiangin a feh vivo ih, tifinriat ah a va net. 4 Cutin Joseph-ih tefapawl, Manasseh le Efraim cun an co mi ro cu an la.
Efraim Ram
5 An hrin an hrin zulhih Efraim tefapawlih ramri cu hitin a si, nisuahnak lamih ro ih an co mi ramri cu Ataroth Addar a si ih, Beth Horon tlunta tiang a si.
6 Cule ramri cu Mikhmethath sak lam kap tifinriat lamah a suak, cun ramri cu nisuahnak lam a helkûal ih, Taanath Shiloh ah a feh, cule Janohah nisuahnak lam a hei paltlăng. 7 Cun Janohah ihsin Ataroth le Naarah ah a sukthla ih, Jeriko a thleng, cule Jordan tiva ah a suak.
8 Ramri cu Tappuah ihsin nitlaknak lamah Kanah Tivate tiangin a fehsuak ih, tifinriat ah a va net. Himi hi Efraim tefapawl an hrin an hrin zulhih an ro a si. 9 Manasseh tefapawlih ro lakah Efraim tefapawl hrangah a dangten khuapawl an retsak ih, cupawl cu an khawpipawl hmuahhmuah, an khawṭekpawl thawn an si.
10 Cule Gezer ih a cêng mi Kanaan-mipawl cu an dawisuak lo, Kanaan-mipawl cu tuihsun ni tiangin Efraim-mipawl lakah an cêng ih, săwr mi sál ah an cang sawn a si.
Nitlaknak lam Manasseh Hnám Ram
1 Manasseh hnám hrang khalah covo a rak um, ziangahtile anih cu Joseph-ih fatir a si, Manasseh-ih fatir a hmin Makir cu Gilead-ih pa a si, anih cu ral do mi a si ruangah amah cu Gilead ram le Bashan ram pek a si. 2 Cule Manasseh tefa dangpawl hrangah an hrin an hrin zulhin covo a um: Abiezer tefapawl hrang, Helek tefapawl hrang, Asriel tefapawl hrang, Shekem tefapawl hrang, Hefer tefapawl hrang le Shemida tefapawl hrangah a si. Hipawl cu an hrin an hrin zulhin Joseph-ih fapa Manasseh-ih mipa tefapawl an si.
3 Asinan Manasseh fapa Makir, cumiih fapa Gilead, cumiih fapa Hefer, cumiih fapa Zelofehad cu fapa a nei lo, fanu hlir a nei. Cule a fanulepawlih hmin cu, Mahlah, Noah, Hoglah, Milkah le Tirzah tla an si. 4 Cule puithiam Eleazar le Nun-ih fapa Joshua le hotupawl hmaiah annih cu an ra ih, «Jehovah in kan ṭapalepawl zawngih ro in pe ve dingin Mosi thu a rak pe a si,» tiah an ti. Curuangah Jehovah thupek bangtukin, anih in an paih unaupawl zawngah ro a coter hai. 5 Jordan khat lam ralih Gilead le Bashan ram hleiah, Manasseh covo ah hmun hra a tlu, 6 ziangruangahtile Manasseh fanupawl in a fapapawl lakah ro an nei, cule Gilead ram cu Manasseh fapa dangpawl in an co.
7 Cule Manasseh-ih ramri cu Shekem nisuahnak lamih um Asher ihsin Mikmethath tiang a si, cule ramri cu thlang lamah En Tappuah ih a um mipawl tiang a fehthla vivo. 8 Manasseh in Tappuah ram cu a nei, asinan Manasseh ramri parih a um mi Tappuah cu Efraim tefapawl in an co. 9 Cule ramri cu Kanah Tivate ah a sukthla ih, tivate tiang thlang lamah a sukthla vivo. Hibang Efraim khawpipawl cu Manasseh khawpipawl lakah an um. Manasseh ramri cu tivate sak lam kapah a si ih, tifinriat ah a va net ta.
10 Thlang lam cu Efraim-ih ta a si ih, sak lam cu Manasseh-ih ta a si, cule tifinriat kha a ramri a si. Manasseh-ih ramri cu sak lamah Asher a hun peh ih, nisuahnak lamah Issakar a hei peh. 11 Cule Issakar ram le Asher ram ah Manasseh in Beth Shean le a kiangkap khuapawl, Ibleam le a kiangkap khuapawl, Dor ih a cêng mipawl le a kiangkap khuapawl, En Dor ih a cêng mipawl le a kiangkap khuapawl, Taanak ih a cêng mipawl le a kiangkap khuapawl, Megiddo ih a cêng mipawl le a kiangkap khuapawl tla a nei, hibangpawl cu ramṭhen pathum an si. 12 Manasseh tefapawl in cubang khawpi luahtupawl cu an dawisuak thei hrih lo, Kanaan-mipawl cun cuih ram suahsan an tum hrimhrim lo. 13 Cule hitin a si, Israel tefapawl an hung cah deuhdeuh tikah, Kanaan-mipawl cu săwr mi sál ah an ret ih, dawisuak ṭheh loin an um riangri.
Efraim le Manasseh hrangah Ram Tamsin
14 Cun Joseph tefapawl in Joshua hnenah, «Ziangah so ro co ding covo pakhat le hmun khat lawng in pek, mipum tam zet kan si, atu tiang Jehovah in mal in sawm fawn?» tiah an ti.
15 Cule Joshua in, «Nan mipum nan tam tuk ih, Efraim tlang rampawl cu nan hrangih a tet tuk a si ahcun, Periz-mipawl le mimangkawngpawlih ram ih tupipawl ah va feh uhla, nanmai hrangah va hau uh,» tiah a ti.
16 Asinan Joseph tefapawl in, «Tlang ram cu kan hrangah a tawk lo, cun Beth Shean le a kiangkap khuapawl le Jezreel Phaikuam luahtu Kanaan-mi hmuahhmuah in thir ránglêng an nei thluh a si,» tiah an ti.
17 Cule Joshua in Joseph-ih sungza, Efraim le Manasseh hnenah, «Nannih cu mipum tampi nan si ih, thazang cak zet nan nei, covo pakhat lawng nan nei lo ding, 18 tlang ram khi nan ta a si sawn ding. Thing hlir in khat khal sehla, nan hau thluh pei ih, a hlatnakbik tiangin nanmai ta a si pei. Ziangahtile Kanaan-mipawl cu thir ránglêngpawl an nei ih, an cak zet ko nain, nan dawisuak ding a si,» tiah a ti hai.
A Tāng lai mi Ram Zemawknak
1 Cun Israel tefa umkhawm zaten Shiloh ah an pungkhawmaw ih, cu tawkah Tawnawknak Puanthlam an dĭn. Cule ram cu anmai thu hnuaiah a um. 2 Asinan an co ding mi ro a ngah hrih lo tu Israel tefapawl lakah hnám sarih an tâng lai.
3 Cun Joshua in Israel tefapawl hnenah, «Nan pupápawlih Pathian Jehovah ih a lo pek zo mi ram cu va feh ih, nei dingah ziang tik tiang so nan ngaihthah ding? 4 Nanmah lak ihsin hnám khat ah mi pathum fingfing in hrilsuak uhla, anmah cu ka thlah hai ding. Annih cu an tho ding ih, ram an va fángsuak ding, an co ding mi ro ciar vekin an va tah ding ih, ka hnenah an ra kirsal ding a si. 5 Cule ram cu hmun sarih ah an ṭhen pei. Judah cu thlang lamih anmai ram ah a tāng pei ih, Joseph sungza cu sak lamih anmai ramri sungah an tâng pei. 6 Curuangah ram cu hmun sarih ah va tah uhla, cumi cu ka hnenah rak keng uh, cutin hi tawkah Jehovah kan Pathian hmaiah nan hrangah camcawhfung ka lo zûksak ding. 7 Asinan Levi-mipawl cun nan lakah covo an nei ve lo, ziangahtile Jehovah-ih puithiam an sinak cu an ro a si. Cule Gad, Reuben le Manasseh hnám hrek cu Jehovah siahhlawh Mosi ih a rak pek mi Jordan nisuahnak lam ral cu an ro ah an rak co zo,» tiah a ti.
8 Cun mipapawl cu feh dingin an tho, cule Joshua in ram cu va tah dingin thu a cah hai ih, an hnenah, «Feh uh, ram cu va fángsuak uhla va tah uh, cule ka hnenah ra kirsal uh, cutin hitawk Shiloh ih Jehovah hmaiah nan hrangah camcawhfung ka lo zûksak ding,» tiah a ti hai. 9 Cule mipapawl cu an feh ih, ram cu an va fángsuak ṭheh, cule a khua a khua in hmun sarih ah ṭhenin cazual sungah an tah mi cu an ngan, cule Shiloh ṭanhmun khuarnak ah Joshua hnenah an feh. 10 Cun Joshua in Shiloh ih Jehovah hmaiah an hrangah camcawhfung a zûksak, cule cu tawkah Joshua in anmai covo bangtukin ram cu Israel tefapawl hnenah a ṭhensak hai.
Benjamin Ram
11 Cule Benjamin tefapawlih hnám covo cu an hrin zulhin a hung suak, cule an ramri covo cu Judah tefapawl le Joseph tefapawl karlakah a si. 12 Sak lamih an ramri cu Jordan ihsin a thăwk ih, ramri cu Jeriko sir sak lamah a so vivo, cule tlangpawl paltlăngin nitlaknak lamah a so vivo ih, Beth Ave Ramṭhing ah a net. 13 Ramri cu cutawk ihsin Luz lamah a feh ih, Bethel ti mi Luz thlang lam sirah a kaiso. Cule ramri cu Ataroth Addar le Beth Horon hnuaita thlang lam sirih tlang kiangah a vung ṭumsuk vivo.
14 Cun ramri cu nithlaknak lamin thlang lamah a fehkûal vivo, cumi cu Beth Horon thlang lamih tlang kiang ihsin a si. Cule ramri cu Judah tefapawlih khawpi Kirjath Jearim ti mi Kirjath Baal ah a net. Himi cu nitlaknak lam kap a si.
15 Thlang lam kap cu Kirjath Jearim dĕng ihsin a thăwk ih, ramri cu nitlaknak lamah a feh vivo, cule Neftoah tipi dawhhna ah a suak. 16 Cun ramri cu Refaim Phaikuam sak lamih um Hinnom fapa Phaikuam tlang cemnakah a sukthla ih, Hinnom Phaikuam ah a sukthla vivo, thlang lam Jebus-mipawlih khawpi kap lamah, cule En Rogel ah a sukthla vivo. 17 Cule ramri cu sak lam ihsin a fehkûal ih, En Shemesh ah a suak, Adummim sohnak hmaiih Geliloth lam tiang a feh vivo, cule Reuben fapa Bohan lung ah a suk. 18 Cun Arabah sir sak lamah a feh vivo ih, Arabah ah a ṭumsuk. 19 Cule ramri cu Beth Hoglah sak lam sirah a feh vivo, cun ramri cu Jordan tiva thlang lam a netnak, Cite Tipi sak lam ti kĕl ah a net.
20 Jordan tiva cu nisuahnak lamih a ramri a si cih. Himi cu Benjamin tefapawl an hrin an hrin zulhin le an ramri zulhin an ro ram in a kulh mi cu a si.
21 Cule Benjamin tefapawl hnámih an hrin an hrin zulhih an khawpipawl cu: Jeriko, Beth Hoglah, Emek Keziz,
22 Beth Arabah, Zemaraim, Bethel,
23 Avim, Parah, Ofrah,
24 Kefar Haammoni, Ofni le Gaba tla an si ih, khawpi hleihnih, an khawṭekpawl thawn an si.
25 Cuihtlunah Gibeon, Ramah, Beeroth,
26 Mizpah, Kefirah, Mozah,
27 Rekem, Irpeel, Taralah,
28 Zelah, Elef, Jerusalem ti mi Jebus, Gibeath le Kirjath tla an si ih, khawpi hleili, an khawṭekpawl thawn an si. Himi cu an hrin an hrin zulhih an co mi Benjamin tefapawlih ro a si.
Judah zawngih Simeon-ih Ro
1 A pahnihnak camcawhfung zûk mi cu Simeon hrangah a hung suak, an hrin an hrin zulhin Simeon tefapawlih hnám hrangah a si. Cule an co mi ro cu Judah tefapawl co mi ro sungah a tel cih.
2 An neih mi an ro cu: Beersheba ti mi Sheba, Moladah,
3 Hazar Shual, Balah, Ezem,
4 Eltolad, Bethul, Hormah,
5 Ziklag, Beth Markaboth, Hazar Susah,
6 Beth Lebaoth le Sharuhen tla an si ih, khawpi hleithum, an khawṭekpawl thawn an si.
7 Cuihtlunah Ain, Rimmon, Ether le Ashan tla an si ih, an khawṭekpawl thawn khawpi pali an si.
8 Cule cutawk ih khawṭek hmuahhmuah cu Negev-ih Ramah thleng ko Baalath Beer tiang hi khawpipawl hmuahhmuah kimvelah an um. Himi cu an hrin an hrin zulhih Simeon tefapawlih hnám an co mi an ro cu a si.
9 Simeon tefapawlih co mi ro cu Judah tefapawlih covo sungah a tel, ziangahtile Judah tefapawlih covo cu an hrangah a tam tuk lawmmam. Curuangah Simeon tefapawl in cuih minungpawlih co mi ro sungah ro an nei a si.
Zebulun Ram
10 A pathumnak camcawhfung zûk mi cu an hrin an hrin zulhin Zebulun tefapawl hrangah a hung suak, cule an co mi ro-ih ramri cu Sarid tiang a si. 11 An ramri cu nitlaknak lamah le Maralah ah a feh, cun Dabbasheth ah a feh ih, Jokneam nisuahnak lam tivate tluanah a feh vivo. 12 Cun Sarid ihsin nisuahnak lam, ni hung suahnak lamah Kisloth Tabor ramri tiang a pial vivo, cule Jafia paltlăngin Daberath lamah a suak. 13 Cule cutawk ihsin nisuahnak lamah Gath Hefer a paltlăng, Eth Kazin lamah a fehlan ih, Neah ramri Rimmon tiangin a tlăng. 14 Cun ramri cu Hannathon sak lam kapin a hun helkûal ih, Jifthah El Phaikuam ah a net. 15 A huap mipawl cu: Kattath, Nahallal, Shimron, Idalah le Bethlehem tla an si ih, khawpi hleihnih, an khawṭekpawl thawn an si. 16 Himi cu an hrin an hrin zulhin Zebulun tefapawlih co mi ro a si, hibang khawpipawl le an khawṭekpawl thawn.
Issakar Ram
17 A palitnak camcawhfung zûk mi cu Issakar parah a tla, cumi cu an hrin an hrin zulhin Issakar tefapawl hrangah a si.
18 Cule an ramri cu Jezreel, Kesulloth, Shunem,
19 Hafraim, Shion, Anaharath,
20 Rabbith, Kishion, Abez,
21 Remeth, En Gannim, En Haddah le Beth Pazzez a hei huap cih.
22 Cule ramri cu Tabor, Shahazimah le Beth Shemesh a va thleng, an ramri cu Jordan tiva ah a va net ih, khawpi hleiruk, an khawṭekpawl thawn an si. 23 Himi cu an hrin an hrin zulhin Issakar tefapawlih hnám co mi ro a si, khawpipawl le an khawṭekpawl thawn.
Asher Ram
24 A pangatnak camcawhfung zûk mi cu an hrin an hrin zulhin Asher tefapawlih hnám hrangah a hung suak. 25 Cule an ramri in Helkath, Hali, Beten, Akshaf, 26 Alammelek, Amad le Mishai a huap. Cumi in Karmel Tlang nitlaknak a va thleng ih, Shihor Libnath tivate tluan tiangin a feh vivo. 27 Beth Dagon nisuahnak lamah a ra kir ih, Zebulun ramri le Jifthah Phaikuam a va thleng, cun sak lamah Beth Emek le Neiel a hun lan ih, keh lamih Kabul a paltlăng. 28 Cumi cun Ebron, Rehob, Hammon Kanah a huap ih, Sidon Ropisawn tiangin a si. 29 Cule ramri cu Ramah le kulh nei khawpi Ṭaiar lamah a her. Cun ramri cu Hosah lamah a her ih, Akzip ram kiang tifinriat ah a net. 30 Cuihtlunah Ummah, Afek le Rehob pawl khal telin khawpi 22, an khawṭekpawl thawn a si. 31 Himi cu an hrin an hrin zulhin Asher tefapawlih hnám ih co mi ro a si, khawpipawl le an khawṭekpawl thawn.
Naftali Ram
32 A paruknak camcawhfung zûk mi cu Naftali tefapawl parah a hung suak, an hrin an hrin zulhin Naftali tefapawl hrangah a si. 33 Cule an ramri cu Helef in a thăwk ih, Zaanannim ih elon thingkung ihsin Adami Nekeb le Jabneel tiangin a huap, cule Lakkum tiangin a huap, ramri cu Jordan tiva ah a net. 34 Ramri cu Helef ihsin nithlaknak lam Aznoth Tabor ah a fehbêt ih, cutawk ihsin Hukkok lamah a fehsuak. Zebulun thlang lamah le Asher thawn nitlaknak lamah an pehaw ih, ni hung suahnak lamah Jordan tiva kiang Judah ram ah a net.
35 Cule kulh nei khawpipawl tla cu: Ziddim, Zer, Hammath, Rakkath, Kinnereth,
36 Adamah, Ramah, Hazor
37 Kedesh, Edrei, En Hazor,
38 Iron, Migdal El, Horem, Beth Anath le Beth Shemesh tla an si ih, khawpi hleikua le an khawṭekpawl thawn an si.
39 Himi cu an hrin an hrin zulhin Naftali tefapawlih hnám-ih co mi ro a si, khawpipawl le an khawṭekpawl thawn.
Dân Ram
40 A pasarihnak camcawhfung zûk mi cu an hrin an hrin zulhin Dân tefapawlih hnám hrangah a hung suak.
41 Cule an co mi ro-ih ramri cu Zorah, Eshtaol, Ir Shemesh,
42 Shaalabbin, Aijalon, Jethlah,
43 Elon, Timnah, Ekron,
44 Eltekeh, Gibbethon, Baalath,
45 Jehud, Bene Berak, Gath Rimmon,
46 Me Jarkon, Rakkon le Joppa kiang ram thawn an si.
47 Cule Dân tefapawlih ramri cu hipawl lan tiangin a feh, ziangruangahtile Dân tefapawl cu Leshem do dingin an so ih an hung la. Cule ralnâm hriam thawn an hung do ih an lâk, cule a sungah an cêng cih. Leshem cu Dân tiah an pa Dân hmin suangin an sak. 48 Himi cu an hrin an hrin zulhin Dân tefapawlih hnám-ih co mi ro a si, hibang khawpipawl le an khawṭekpawl thawn.
Joshua-ih Co Mi Ro
49 Anmai ramri ciar bangtukih an ro dingah ram ṭhenawk an hun ṭheh tikah, Israel tefapawl in Nun-ih fapa Joshua kha an lakah ro an pe ve. 50 Amah ih a dil mi khua, Efraim tlang ram ih um Timnath Serah cu Jehovah kamsuakthu bangtukin amah an pe. Cule khua a dĭn ih, cumi ah a cêng.
51 Hipawl cu puithiam Eleazar, Nun-ih fapa Joshua le Israel tefa hnámpawlih pupápawlih lubânpawl in an ro dingah Shiloh ih Jehovah hmaiah camcawhfung zûkin punkhawmnak puanthlam sângka hramih an rak zem mi ro an si. Cutin ram ṭhenawk cu an ṭheh riai.
Răwlhimnak Khawpipawl
1 Jehovah cu Joshua hnenah a ṭawng ih, a hnenah, 2 «Israel tefapawl sim awla, an hnenah, ‹Mosi hmangih nan hnenih ka lo sim mi nanmai hrangah răwlhimnak khawpipawl ruat uh, 3 cutin thei lo pi asilole tum lo piih mi a thatngah pangtu cu, cu tawkah a tlânlut ding ih, cuih khawpipawl cu thisen phuba lâknak lak ihsin nan răwlhimnak an si ding a si. 4 Cule anih cu cuih khawpipawl lakih pakhat ah va tlânlut in, khawpi kăwtsuah ah dingin khawpi upapawl hnatheihah a thuhla a than tikah, anmah lakih mi pakhat vek cekci in khawpi sungah an hruailut pei ih, umnak hmun an pe pei, cutin an lakah a cêng ding a si. 5 Cun thisen phuba latu in a rak dawi asile, mi thattupa cu a kut ah an rak pe ding a si lo, ziangruangahtile tum lo piin a innhnenpa a that pang a si, a hlan ihsin a rak huat cia mi a si lo. 6 Cule mipi-umkhawm hmaiih thuṭhensak dingih a din hlan le culaifangih puithiam lubik a ṭuantu a thih hlanlo cu, cuih khua ah a cêng ringring pei. Cun mi that pa cu a tlansuahnak khua amai khua le amai inn ah kirin a va tlung thei thlang ding a si,› tiah sim aw,» tiah a ti.
7 Cule Naftali tlang ram ih Galili peng ih Kedesh khua, Efraim tlang ram ih Shekem khua, Judah tlang ram ih Hebron ti mi Kirjath Arba khua pawl cu an serhhran. 8 Cule Jeriko-ih nisuahnak lam Jordan tiva khat lam ralah Reuben hnám ihsin ramṭhing phairawn ih um Bezer khua, Gad hnám ihsin Gilead ram ih Ramoth khua le Manasseh hnám ihsin Bashan ram ih um Golan khua pawl cu an ruat. 9 Hih khawpipawl cu Israel tefapawl hmuahhmuah le an lakih cêng ve ram dang mi hrangah tum lo piih mi a thattu zokhal a tlanluh theinak dingah le mipi-umkhawm hmaiih a din hlanlo thisen phuba latu kut ih a thihlonak dingih an ruat mi an si.
Levi-mipawlih Khawpipawl
1 Cun Levi-mipawlih palepawlih lubânpawl cun puithiam Eleazar le Nun-ih fapa Joshua le Israel tefapawlih hnám palepawlih lubânpawl an va naih. 2 Cule Kanaan ram ih Shiloh khua ah annih in, «Jehovah in Mosi hmangin kan cēnnak ding khawpipawl le kan sumhnámpawl hrangah cuih khawpipawlih ran tlannak ram lawnglakpawl in pe dingin thu a rak pe zo a si,» tiah an hnenah an ti. 3 Cule Jehovah thupek bangtukin, Israel tefapawl in an co mi ro sung ihsin himi khawpipawl le an ran tlannak ram lawnglakpawl cu Levi-mipawl an pe.
4 Cun Kohath-mipawlih hrinpawl hrangah camcawhfung zûk mi a hung suak. Cule Levi-mi, puithiam Aaron-ih tefapawl in Judah hnám covo ihsin le Simeon hnám covo ihsin le Benjamin hnám covo pawl ihsin camcawhfung zûknak in khawpi hleithum an congah. 5 A tāng lai mi Kohath tefapawl in Efraim hnám hrinpawlih covo ihsin le Dân hnám covo ihsin le Manasseh hnám hrek covo pawl ihsin camcawhfung zûkin khawpi pahra an congah.
6 Cule Gershon-ih tefapawl in Issakar hnám hrinpawlih covo ihsin le Asher hnám covo ihsin le Naftali covo ihsin le Bashan ram ih Manasseh hnám hrek covo pawl ihsin camcawhfung zûkin khawpi hleithum an congah.
7 An hrin an hrin zulhin Merari tefapawl in Reuben hnám hrin covo ihsin le Gad hnám covo ihsin le Zebulun hnám covo pawl ihsin khawpi hleihnih an congah.
8 Cule Mosi hmangih Jehovah in thu a pek vekin, Israel tefapawl in himi khawpipawl cu an ran tlannak ram lawnglakpawl thawn camcawhfung zûkin Levi-mipawl an pe.
9 Cule Judah tefapawlih hnám covo ihsin le Simeon tefapawlih hnám covo ihsin an hmin tarlăng ding mi hih khawpipawl hi an pe. 10 Cu mipawl cu Levi tefapawl a si mi Kohath-mipawlih hrinpawl lakih pakhat Aaron tefapawl hrangah an si, ziangahtile camcawhfung zûknak cu a hmaisabikah anmah hrangah a si. 11 Cule Judah tlang ram ih um Hebron tiih an kawh mi Kirjath Arba cu a ran tlannak ram lawnglak thawn anmah an pe (Arba cu Anak-ih pa a si). 12 Asinan khawpi rampawl le a kimvel khawṭekpawl cu a ta dingah Jefunneh-ih fapa Kaleb hnenah an pe.
13 Cutivekcun puithiam Aaron-ih tefapawl hnenah Hebron cu a ran tlannak ram lawnglak thawn mi thattu hrangih răwlhimnak khawpi, Libnah cu a ran tlannak ram lawnglak thawn, 14 Jattir cu a ran tlannak ram lawnglak thawn, Esthemoa cu a ran tlannak ram lawnglak thawn, 15 Holon cu a ran tlannak ram lawnglak thawn, Debir cu a ran tlannak ram lawnglak thawn, 16 Ain cu a ran tlannak ram lawnglak thawn, Juttah cu a ran tlannak ram lawnglak thawn, Beth Shemesh cu a ran tlannak ram lawnglak thawn tiin hnám pahnih pawl covo ihsin khawpi pakua an pe. 17 Cule Benjamin hnám covo ihsin, Gibeon cu a ran tlannak ram lawnglak thawn, Geba cu a ran tlannak ram lawnglak thawn, 18 Anathoth cu a ran tlannak ram lawnglak thawn, Almon cu a ran tlannak ram lawnglak thawn tiin khawpi pali an pe. 19 Aaron-ih tefa puithiampawlih khawpi zate cu khaw hleithum le an ran tlannak ram lawnglakpawl thawn an si.
20 Cule Levi-mi, Kohath tefapawlih hrinpawl, a tāng lai mi Kohath tefapawl cu Efraim hnám covo ihsin an covo khawpipawl an congah. 21 Ziangahtile Efraim tlang ram ih Shekem cu a ran tlannak ram lawnglak thawn mi thattu hrangih răwlhimnak khua, Gezer cu a ran tlannak ram lawnglak thawn, 22 Kibzaim cu a ran tlannak ram lawnglak thawn, Beth Horon cu a ran tlannak ram lawnglak thawn tiin khawpi pali an pe. 23 Cule Dân hnám covo ihsin, Eltekeh cu a ran tlannak ram lawnglak thawn, Gibbethon cu a ran tlannak ram lawnglak thawn, 24 Aijalon cu a ran tlannak ram lawnglak thawn, Gath Rimmon cu a ran tlannak ram lawnglak thawn tiin khawpi pali an pebet. 25 Cule Manasseh hnám hrek covo ihsin, Tanak cu a ran tlannak ram lawnglak thawn, Gath Rimmon cu a ran tlannak ram lawnglak thawn tiin khawpi pahnih an pebet. 26 Khawpi pahra le an ran tlannak ram lawnglak hmuahhmuah cu a tāng lai mi Kohath tefapawlih hrinpawl hrangah a si.
27 Levi-mipawlih hrin, Gershon tefapawl hnen khalah, a dang Manasseh hnám hrek covo ihsin, Bashan ram ih Golan cu a ran tlannak ram lawnglak thawn mi thattu hrangah răwlhimnak khua, Be Eshterah cu a ran tlannak ram lawnglak thawn tiin khawpi pahnih an pe. 28 Cule Issakar hnám covo ihsin, Kishion cu a ran tlannak ram lawnglak thawn, Doberath cu a ran tlannak ram lawnglak thawn, 29 Jarmuth cu a ran tlannak ram lawnglak thawn, En Gannim cu a ran tlannak ram lawnglak thawn tiin khawpi pali an pe. 30 Cule Asher hnám covo ihsin, Mishal cu a ran tlannak ram lawnglak thawn, Abdon cu a ran tlannak ram lawnglak thawn, 31 Helkath cu a ran tlannak ram lawnglak thawn, Rehob cu a ran tlannak ram lawnglak thawn tiin khawpi pali an pe. 32 Cule Naftali hnám covo ihsin, Galili ih Kedesh cu a ran tlannak ram lawnglak thawn mi thattu hrangih răwlhimnak khua a si, Hammoth Dor cu a ran tlannak ram lawnglak thawn tiin khawpi pathum an pe. 33 An hrin an hrin zulhih Gershon-mipawlih khawpi zate cu hleithum le an ran tlannak ram lawnglakpawl thawn an si.
34 Cule a tāng lai mi Levi-mi, Merari tefapawlih hrinpawl hnenah, Zebulun hnám covo ihsin, Jokneam cu a ran tlannak ram lawnglak thawn, Kartah cu a ran tlannak ram lawnglak thawn, 35 Dimnah cu a ran tlannak ram lawnglak thawn, Nahalal cu a ran tlannak ram lawnglak thawn tiin khawpi pali an pe. 36 Cule Reuben hnám covo ihsin, Bezer cu a ran tlannak ram lawnglak thawn, Jahaz cu a ran tlannak ram lawnglak thawn, 37 Kedemoth cu a ran tlannak ram lawnglak thawn, Mefaath cu a ran tlannak ram lawnglak thawn tiin khawpi pali an pe. 38 Cule Gad hnám covo ihsin, Gilead ram ih Ramoth cu a ran tlannak ram lawnglak thawn mithattu hrangih răwlhimnak khua a si, Mahanaim cu a ran tlannak ram lawnglak thawn, 39 Heshbon cu a ran tlannak ram lawnglak thawn, Jazer cu a ran tlannak ram lawnglak thawn tiin a zaten khawpi pali an pe. 40 Cutin an hrin an hrin zulhin a tāng lai mi Levi-mipawlih hrinpawl, Merari tefapawl hrangih khawpi zate cu anmai camcawhfung zûknak in khawpi hleihnih a si.
41 Israel tefapawl covo ihsin Levi-mipawlih khawpi hmuahhmuah khawpi 48 cu an ran tlannak ram lawnglakpawl thawn a si. 42 Hi khawpipawl cun an ran tlannak ram lawnglak an nei ciar, hi khawpipawl cu cutivek hlir an si.
Thutiam a Famkim
43 Cule Jehovah in an pupápawl hnenah pe dingih sia a rak săm zo mi ram hmuahhmuah cu Israel a pe, cule cumi cu an nei ih, a sungah an cêng. 44 An pupápawl hnenih sia a rak săm bangtukin, Jehovah in ziangkim ah cawlhhahdamnak a pe hai. Anmah dokalhin an ralpawl hmuahhmuah lakah mi pakhat hman an ding thei lo. Jehovah in an kut ah an ral hmuahhmuah cu a pe. 45 Israel sungza hnenih Jehovah ih thil ṭha a rak sim mi ṭawngkam a tlawlh mi pakhat hman a um lo. A zaten an tlamtling ṭheh a si.
Nisuahnak Hnámpawl anmai Ram ah an Kirsal
1 Cun Joshua in Reuben-mipawl, Gad-mipawl le Manasseh hnám hrek pawl tla a ko hai ih, 2 an hnenah, «Jehovah siahhlawh Mosi in thu a lo pek mi hmuahhmuah nan thlun ih, nan hnenih thu ka lo pek mi ka aw hmuahhmuah nan ngaithla. 3 Tuihni tiangin hi tluk ni tampi sung nan unaupawl nan thlahthlam lo ih, Jehovah nan Pathian in thu a lo cah mi a thupek nan thlun sawn. 4 Cule an hnenih a rak tiamkam cia bangin, nan unaupawl cu Jehovah nan Pathian in cawlhhahdamnak a pe hai zo. Curuangah atu cun Jordan tiva khat lam ralih Jehovah siahhlawh Mosi in a lo pek mi nan puanthlam le nan neih mi ram lamah kir uhla, tlung thlang uh. 5 Asinan Jehovah siahhlawh Mosi in Jehovah nan Pathian duhdawt dingah le a lamzinpawl hmuahhmuah thlun dingah, a thupekpawl thlun dingah, amah kaihnget dingah le nan thinlung hmuahhmuah le nan nunnak hmuahhmuah in amah rian dingih thu a lo pek mi thupek le dān tuahsuak dingin fimkhur nasa uh,» tiah a ti. 6 Cun Joshua in annih cu mal a sawm hai ih a thlah hai, cule an puanthlampawl lamah an tlung.
7 Cun Mosi in Manasseh hnám hrek pawl cu Bashan ram ah covo a pe hai, asinan Joshua in a dang hnám hrek pawl hnenah cun Jordan hi lam ral nitlaknak lamah an unaupawl lakah covo a pe hai. Cule Joshua in anmahpawl cu an puanthlampawl lam panih a thlahsuak hai tikah, mal a sawm hai. 8 Cule an hnenah, «Nan puanthlampawl lamah lian zetin, sumhnám tampi thawn, ngun thawn, sui thawn, dar thawn, thir thawn le hnipuan tam lutuk thawn kir uh law. Nan ralpawl hnenih nan ralthillawnpawl tla nan unaupawl zem ve hai uh,» tiah a ti.
9 Cun Reuben tefapawl, Gad tefapawl le Manasseh hnám hrek pawl cu an kirsal ih, Kanaan ram Shiloh hmun Israel tefapawl hnen ihsin Mosi hmangih Jehovah ṭawngkam bangtukih an rak ngah mi, anmai neih mi ram, Gilead ram lam pan dingin an păwksuak.
Jordan kiangih Biakṭheng
10 Cule Kanaan ram ih Jordan ramri an va thlen tikah, Reuben tefapawl, Gad tefapawl le Manasseh hnám hrek pawl cun cuih Jordan tiva kapah cun biakṭheng an dâwl, hmuh ăwl mi biakṭheng tumpi a si. 11 Cun Israel tefapawl in, «Ngai hnik, Reuben tefapawl, Gad tefapawl le Manasseh hnám hrek pawl in Kanaan ram ralden, Jordan ramri, Israel tefapawlih ram lam kapah biakṭheng an dâwl,» tiih mi rel thâwm an rak thei. 12 Cule cuih thu cu Israel tefapawl in an theih tikah, Israel tefa umkhawm hmuahhmuah cu anmah va do dingin Shiloh khua ah an táwngawkhawm.
13 Cun Israel tefapawl in puithiam Eleazar fapa Finehas kha Reuben tefapawl, Gad tefapawl le Manasseh hnám hrek pawl hnen, Gilead ram ah an hei thlah. 14 Cule a zawngah hotu pahra, Israel hnám kip ihsin sungkaw lubik pakhat ciar an tel. Hipawl cu Israel a thawngthawng lakih an sungkaw lubân fingfing an si. 15 Cun Reuben tefapawl, Gad tefapawl le Manasseh hnám hrek pawl hnen, Gilead ram ah cun an va feh ih an hnenah, 16 «Jehovah-ih mipi-umkhawm pumpi in, ‹Israel Pathian lakah ziangtluk rinumlonak a si, tuihsun ah Jehovah dungthlunnak ihsin hawikir dingin nan hrangah biakṭheng nan rak dâwl, cutin tuihni ah Jehovah dokalhin hel nan tum. 17 Peor hmun ih mawhsualnak kha kan hrangah a tawk lo maw si, Jehovah-ih mipi-umkhawm lakah hremnak a rak um na cingin, tuihni tiangin khaih mawhsualnak ihsin kan thianfaiaw hrih lo. 18 Tuihni ah Jehovah cu a dungthlunnak ihsin pialhlo nan tum thotho a si lo maw? Hitin a si ding, tuihni ah Jehovah dokalhin nan hél asile, thaizing ah Israel mipi-umkhawm pumpi tlunah a thin a heng ding. 19 Sikhalsehla nan neih mi ram a thianlo asile, Jehovah-ih Biakbûk umnak, Jehovah-ih neih mi ram ah ra kai uhla, kan lakah covo ra la ve uh, asinan Jehovah kan Pathian Biakṭheng siarlo nan hrangih biakṭheng dang dawlnak cun Jehovah cu dokalhin hél hlah uhla, kannih khal in dokalhin hél hlah uh. 20 Zerah fapa Akhan in camsiat mi thil parah thilsual a rak tuah ih, Israel mipi-umkhawm zate parah thinhengnak a tla a si lo maw? Amai mawhsualnak ah cu pa lawng a hlorál lo a si kha,› tiah an lo ti,» tiah an va ti.
21 Cun Reuben tefapawl, Gad tefapawl le Manasseh hnám hrek pawl in Israel a thawngthawng lubânpawl cu an rak sâng ih an hnenah, 22 «Jehovah, pathianpawlih Pathian, Jehovah, pathianpawlih Pathian, anih cun a thei, Israel amah rori khal in thei seh, himi hi helnak le Jehovah dokalhih rinumlonak asile, tuihni ah in runhim lo mai uh. 23 Jehovah dungthlunnak ihsin pial dingah maw, Meiur Thilhlăn le Thlairawl Thilhlăn hlan dingah simaw, Remnak Thawinakpawl hlan dingah simaw kan hrangah biakṭheng kan dawl a si ahcun, amah Jehovah rori in a man in dil seh. 24 Asinan a taktak ah cun himi hi ṭihphannak ruangah le thil pakhat khat ruangih kan tuah mi a si tiin an hnenah, ‹Nan tefapawl in kan tefapawl hnenah, «Israel-ih Pathian Jehovah thawn ziang pehtlaihawknak so nan neih? 25 Ziangahtile nannih Reuben tefapawl le Gad tefapawl, Jehovah in nannih le kanmah karlak ramri ṭhen ah Jordan a tuah zo a si. Jehovah hnenah covo zianghman nan nei ve lo,» hitiih an ti cān a ra thleng lai ding. Cutin nan tefapawl in kan tefapawl kha Jehovah ṭihzahnak an bansanter pang ding,› tiah a si. 26 Curuangah kannih in, ‹Atu ah biakṭheng dâwl dingin timlamaw uhsi, Meiur Thilhlăn hrangah le thawiawknak hrangah si loin, 27 cuhnakin cumi cu nanmah le kanmah le kan hnuih kan tesinfanaupawl karlakih theihpinak a si sawn ding, cutin kan Meiur Thilhlănpawl, kan thawiawknakpawl le kan Remnak Thilhlănpawl tla in amai hmaika-ah Jehovah rawngbawlhna kan tuah theinak dingah a si ding, cutin nan tesinfapawl in kan tesinfapawl hnenah, «Jehovah hnenah covo nan nei ve lo,» tiah an run ti thei lo ding,› tiah a ti. 28 Curuangah hitin a si ding, a ra lai ding mi cān ah kanmai hnenah maw kan tesinfanaupawl hnenah simaw hitiih in run ti tiktikah, kannih in, ‹Ngai hnik uh, kan pupápawl in Jehovah-ih Biakṭheng pianhmang an rak tuah, Meiur Thilhlănpawl le thawiawknakpawl hrangah a si lo, nanmah le kanmah karlakih theihpitu ah a si sawn› tiah kan ti thei ding. 29 Jehovah dokalhih hél in, tuihsun ah Jehovah dungthlunnak ihsi pialin, Jehovah kan Pathian-ih Biakṭheng, a Biakbûk hmaiih biakṭheng hleiah Meiur Thilhlănpawl hrangah simaw, Thlairawl Thilhlănpawl hrangah simaw, thawiawknakpawl hrangah simaw biakṭheng kan dâwl a si lamlam lo,» tiah an rak ti.
30 Cule puithiam Finehas le a zawngih um mipi-umkhawm hotu, Israel a thawngthawng lubânpawl in Reuben tefapawl le Gad tefapawl le Manasseh tefapawlih ṭawngkampawl an theih tikah an lung a hmui. 31 Cun puithiam Eleazar fapa Finehas in Reuben tefapawl le Gad tefapawl le Manasseh tefapawl hnenah, «Tuihni ah Jehovah cu kan lakah a um ti kan theifiang, ziangruangahtile Jehovah parah hi rinumlonak hi nan rak tuah lo. Cun Jehovah kut ihsin Israel tefapawl nan runsuakngah a si hi,» tiah a ti.
32 Cule puithiam Eleazar fapa Finehas le hotupawl cu Gilead ram ih Reuben tefapawl le Gad tefapawl hnen ihsin Kanaan ram ih Israel tefapawl hnenah an kirsal ih, an hnenah thu an hei kengkirsal. 33 Cun cuih thil cun Israel tefapawl lung a hmuiter ih, Israel tefapawl in Pathian an thangṭhat. Reuben tefapawl le Gad tefapawl ra do ding thu le an umnak ram va siatsuah ding thu cu an rel nawn lo.
34 Reuben tefapawl le Gad tefapawl in cuih biakṭheng cu «Theihpitu» tiah hmin an sak, «Ziangahtile Jehovah cu Pathian a si ti kan karlakih theihpitu a si,» tiah an ti a si.
Joshua Thucah Netabik
1 Cun hitin a si, kum ziangmaw zât a liam hnu, Jehovah in Israel cu an kiangkapih an ralpawl hmuahhmuah lak ihsin cawlhhahdamnak a pek hai hnuah, Joshua cu a upa tuk ih, a tar zet thlang. 2 Cule Joshua in Israel hmuahhmuah le an upapawl le an lubânpawl le an laireltupawl le an bawipawl a ko hai ih an hnenah, «Kei cu ka upa tuk zo ih, ka tar zet thlang. 3 Jehovah nan Pathian in nanmai ruangih hi miphunpawl hmuahhmuah parih a tuah mi hmuahhmuah cu nan hmu ṭheh zo, ziangahtile Jehovah nan Pathian cu a lo dosaktu a si. 4 Ngai hnik uh, himi a tāng lai mi miphunpawl hi ka hlohralter zo mi miphunpawl hmuahhmuah thawn, Jordan ihsin nitlaknak lamah Tifinriat Tumpi tiangin ro dingah nan hnámpawl camcawhfung zûkin ka lo zem ṭheh hai zo. 5 Cule Jehovah nan Pathian in annih cu nan hmai ihsin a dawisuak hai ding ih, nan hmuh bănlonak ah a dawihlo hai ding. Cun Jehovah nan Pathian in nan hnenih a lo tiamkam cia vekin an ram cu nan nei ding. 6 Curuangah Mosi Dān Cazual sungih ngan mi hmuahhmuah thlun dingin ralṭha zetin um uh, culole vawrh lamah simaw, keh lamah simaw nan pialsan pang ding, 7 culole nan lakih a tāng lai mi, hi miphunpawl lakah nan feh pang ding. An pathianpawlih hmin nan sâl lo pei, cupawl sālin zokhal sia nan sămter fawn lo pei, an rawng nan bawl lo pei ih, an hmaiah nan kûn fawn lo pei. 8 Cuhnakin tuihni ih nan tuah vekin, Jehovah nan Pathian nan pawkhnget ringring sawn pei. 9 Ziangahtile Jehovah in nan hmaika ihsin miphun ropi le cak pawl a dawisuak hai zo, tuihni tiangin nanmah dokalhin zohman an ding thei lo. 10 Nan lakih mi pakhat in mi 1000 a dûm ding, ziangahtile Jehovah nan Pathian cu a lo tiamkam vekih a lo dosaktu a si. 11 Curuangah Jehovah nan Pathian nan duhdawtnak dingah fimkhurten um uh. 12 Cuti si loih, ziangmawtiih dung lamah nan sīp ih, hi a tāng lai mi miphunpawl nan kăwp ih, nan lakih a tāng lai mi hipawl hi nan ṭhi hai ih, an hnenah nan feh ih annih khal nan hnenih an feh asile, 13 himi hi fiangten thei uh, Jehovah nan Pathian in nan hmaika ihsin hi miphunpawl hi a dawisuak hai nawn lo ding. Jehovah nan Pathian in a lo pek mi himi ram ṭha ihsin nan hlohral thluh hlanlo, annihpawl cu nan hrangah tháng le mangkhâwng le nan hnak ah vuakfung le nan mit ah hling an si sawn ding.
14 «Ngai hnik uh, tuihsun ah leilung hmuahhmuah ih zin ah ka feh thlang ding. Jehovah nan Pathian in nan thuhla a rak rel cia mi thil ṭha hmuahhmuah cu pakhat hman a tlawlh lo ti cu nan thinlung zate le nan nunnak zaten nan thei ko. A zaten nan hrangah a thlengsuak ṭheh, kam khat hman a tlawlh lo. 15 Curuangah hitin a si ding, Jehovah nan Pathian in a rak lo tiamkam cia mi thil ṭha hmuahhmuah nan parih a thlen thluh vekin, Jehovah nan Pathian in himi ram ṭha zet a lo pek mi ihsin a lo hlohralter thluh hlanlo, Jehovah in nan parah mi tina thei thilpawl a thlengter ding. 16 Thu a lo pek mi Jehovah nan Pathian-ih thukham nan pahbăl ih, pathian dangpawl hnenah feh in anmah nan rian ih an hmaiih nan kûn tiktikah, nanmah dokalhin Jehovah thinhengnak a alh ding ih, ram ṭha zet a lo pek zo mi ihsin zamrang zetin nan hlorál ṭheh ding,» tiah a ti hai.
Shekem hmun ih Thukham
1 Cun Joshua in Israel hnám hmuahhmuah cu Shekem ah a pungkhawmawter hai ih, Israel upapawl, an lubânpawl, an laireltupawl le an bawipawl a ko hai, cule Pathian hmaiah an suakkhawm. 2 Cule Joshua in mipi zate hnenah, «Israel-ih Pathian Jehovah in hitin a ti, ‹Hlanlaipiah nan pupápawl cu Abraham le Nahor-ih pa Terah tla thawn Zufariṭis Tiva khat lam ralah an rak cêng, cule pathian dangpawl an rak rian. 3 Cun nan pa Abraham cu Tivapi ralkhat ihsin ka hruai ih, Kanaan ram pumpi tluansuakin ka hruai, a tesinfapawl ka karhzaiter ih, amah cu Isak ka pe. 4 Isak hnenah Jakob le Esau ka pe. Esau hnenah Seir tlang rampawl a neih dingah ka pe, asinan Jakob le a tefapawl cu Izip ram ah an vung suk. 5 Cuihtlunah Mosi le Aaron ka thlah, cule an lakih ka tuah mi vek khan Izip ram cu ka hrem. Cuihhnu ah ka lo hruaisuak hai a si.
6 ‹Cun nan pupápawl cu Izip ram ihsin ka hruaisuak hai ih tifinriat ah nan thleng, cule Izip-mipawl in nan pupápawl cu ránglêng le rángpawl thawn Tipi Sen tiang an rak dawi. 7 Cule annih cu Jehovah hnenah an au, cule anih in Izip-mipawl le nan karlakah thimkhawzing a tlunter, an parah tipi a thlenter ih a khuh ṭheh hai. Cule Izip ram ih ka thil tuah mi cu nan mit in a hmu. Cun ramṭhing ah cān reipi nan rak cêng. 8 Cule Jordan khat lam ralih um Amor-mipawlih ram ah ka lo hruailut hai ih, annih in an rak lo do. Asinan an ram nan luah theinak dingah annih cu nan kut ah ka lo pe, cule annih cu nan hmaiah ka hlorálter hai. 9 Cun Moab siangpahrang Zippor-ih fapa Balak cu Israel do dingah a păwk ih, Beor-ih fapa Balaam kha nanmah lo camseter dingah mi thlahin a ko. 10 Asinan Balaam cu ka ngaithla duh lo, curuangah anih cun thlawsuah a lo pe thotho. Cule a kut sung ihta ka lo runsuak hai a si. 11 Cun Jordan nan tánkai ih Jeriko khua nan thleng. Cule Jeriko pacangpawl in an rak lo do ih, Amor-mipawl, Periz-mipawl, Kanaan-mipawl, Heth-mipawl, Girgash-mipawl, Hiv-mipawl le Jebus-mipawl khal in an rak lo do. Asinan annihpawl cu nan kut ah ka lo pe hai. 12 Nan hmaiah khuaingal ka thlah ih, cupawl cun nan hmai ihsin annihpawl cu an dawisuak, Amor-mipawlih siangpahrang pahnih khal nan ralnâm le nan thál tel loin ka dawisuak hai. 13 Nan ṭuansuah si lo ram le nanmai dĭn mi si lo khawpipawl ka lo pe hai ih, cupawl ah cun nan cêng. Nanmai phun lo mi sabit hmuan le olif hmuan ihta nan ei,› tiin.
14 «Curuangah atu ah Jehovah cu ṭihzah uhla, diktakin le thungaithlakin amah cu rian uh, cule nan pupápawl in Tiva ralkhat le Izip ram ih an rak rĕn mi pathianpawl cu hlăwnhlo uh. Jehovah rian uh! 15 Cule Jehovah rĕn hi ṭhalo ih nan ruah asile, zo so nan rian ding, tuihsun ah hril uh, nan pupápawl ih an rak rĕn mi Tivapi khat lam ralih um pathianpawl maw, an ram nan luahsak mi Amor-mipawlih pathianpawl so nan rian ding. Kei le ka sungzapawl cun Jehovah kan rian sawn ding a si,» tiah a ti.
16 Cule mipi cun an sâng ih, «Pathian dangpawl rian dingah Jehovah cu kan tansan lamlam lo ding. 17 Ziangahtile amah Jehovah kan Pathian cu kanmah le kan pupápawl Izip ram ihta sáltannak hmun ihsin in hruaisuak ih, kan mithmuhah hminsinnak ropi taktak a tuah, kan fehnak zintluan hmuahhmuah ah le kan hruttlăng mi miphunpawl hmuahhmuah lakih in humhimtu a si. 18 Cule Jehovah in kan hmaika ihsin miphun dangpawl hmuahhmuah, cuih ram ih cêng Amor-mipawl telin in dawisuahsak ṭheh. Anih cu kan Pathian a si ruangah Jehovah cu kan rian ve ding a si,» tiah an ti.
19 Asinan Joshua in mipi hnenah, «Jehovah cu nan rian thei lo ding, ziangahtile anih cu Pathian thianghlim a si. Anih cu thîkthusia Pathian a si, nan dānpahbălnak le nan sualpawl a ngaidam lo ding. 20 Jehovah nan tansan ih ram dang pathianpawl nan rĕn asile, nan parih thil ṭha a tuah hnuah a hawikirsal ding ih, lo tina in a lo riarálter thluh hai ding,» tiah a ti.
21 Cule mipi in Joshua hnenah, «Si lo e, Jehovah cu kan rian ko ding,» tiah an ti.
22 Cun Joshua in mipi hnenah, «Amah rian dingin Jehovah cu nan hril zo ti theihpitu cu nanmah lala hi nan si,» tiah a sim hai.
Cule annih in, «Kanmah hi theihpitu kan si,» tiah an ti.
23 Anih in, «Cuti a si ahcun, nan lakih um ram dang pathianpawl kha hlăwnhlo ṭheh uhla, Israel-ih Pathian Jehovah lamah nan thinlung hawiter uh,» tiah a ti hai.
24 Cule mipi in Joshua hnenah, «Jehovah kan Pathian kan rian ding ih, a aw kan ngaithla ding!» tiah an ti.
25 Cun Joshua in cuih ni ah mipi thawn thukham a tuah, cule an hrangah sakhaw dān le cīn le dān tla Shekem ah a tuahsak hai.
26 Cule Joshua in hi kamsuakthupawl hi Pathian Dān Cazual sungah a ngankhum. Cun lung tumpi a la ih, Jehovah-ih Hmun Thianghlim kiangih ela thing hnuaiah a phun. 27 Cule Joshua in mipi zate hnenah, «Ngai hnik uh, himi lung hi kan hrangah theihpitu a si ding a si, ziangahtile Jehovah in kan hnenih a sim mi kamsuakthupawl hmuahhmuah cu himi in a thei thluh zo. Curuangah nan hrangah theihpitu a si ding a si, culole nan Pathian nan hnáwng pang ding,» tiah a ti hai. 28 Cun Joshua in mipi cu ro ih an co mi ram ciar ah a tlunter hai.
Joshua le Eleazar Thihnak
29 Cun hitin a si, hi thilpawl hnuah Jehovah siahhlawh, Nun-ih fapa Joshua cu kum 110 mi siin a thi. 30 Cule amah cu Efraim tlang ram, Gaash Tlang sak lam kap, ro ih a co mi ramri sung Timnah Serah hmun ah an phum.
31 Joshua damsung hmuahhmuah le Israel hrangih Jehovah in thil a tuahsak mi hmuahhmuah thei bantu Joshua hnu tiangih a dam mi upapawlih damsung hmuahhmuah ah cun Israel cun Jehovah a rian.
32 Israel tefapawl in Izip ram ihta Joseph-ih ruh an thiar mi kha Shekem-ih pa Hamor-ih fapapawl hnen ihsin Jakob in ngun tangka 100 ih a rak lei mi leiram, Shekem hmun ah an phum, cule cuih hmun cu Joseph tefapawlih ro ah a rung cang ta.
33 Cule Aaron fapa Eleazar a thi. Amah cu Efraim tlang ram ah amah an rak pek mi a fapa Finehas-ih co mi tlang ram ah an phum.