About Bible Thianghlim | ©

BibleThianghlim – 2 SANSIARNAK

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

2 SANSIARNAK

12345678910
11121314151617181920
21222324252627282930
313233343536

• A ngantu: Ezra
• A siartu: Sáltan hnu Israel-mipawl
• Thil cang kum: B.C. 971-538
• Ngan kum: B.C. 430 hrawng

Sansiarnak bu khatnak le bu hnihnak hi a thăwk ah cun bu khat a si (Sansiarnak bu khatnak Thuhmaihruai zoh aw).

Siangpahrang bu hnihnak bangin Sansiarnak bu hnihnak hin Jew-pawlih lalram thuanthu Solomon uknak ihsin Babilon sáltan tiang a huap. Siangpahrang bu hnihnak vek si loin, Sansiarnak bu hnihnak cun thlang lam lalram a hmuitin hleice.

Sansiarnak bu khatnak Thuhmaihruai in Sansiarnak cabu pahnih ih thupi pawimawhpawl a rel. Hih thupi tamsawn cun a bur le bulpak ih Pathian biak a reluar. Cule zohṭhimtlak ih Pathian biak le rinumnak cu Sansiarnak cabupawl hin an rel nasa. An thinlung Yahweh an pek ruangih a hmuingil mi siangpahrangpawlih thuhla in Sansiarnak cabupawl ah hmunram tam zet a luah. Bung 65 lakah bung 38 pawl cun David-ih thlahsâwng siangpahrang 22 lakih mi panga: David, Solomon, Jehoshafat, Hezekiah le Josiah thu a ngan.

Pathian biak ti mi cu milai ih Pathian lehrulhnak a si. Kap khat lamah Pathian biak ti mi ih thupi cu Pathian ih milai a lehrulhnak a si. Cutivekin himi Pathian ih lehrulhnak thupi cun a ṭha lam le a ṭha lo lam a sawhkhih thei. Sansiarnak cabupawl in Pathian malsawm an uar ih a hman mi ṭawngkampawl cu: «bawm» (vei 26), «hmuingil» (vei 13) le «cawlhahdam» (vei 7) an si. Thil cang zo mi tampi cu Pathian ngaihsak le ngaihsak lo parih a ṭhumawkzia hi cabu ngantu in vei tam zet a simfiang (1San 28:9; 2San 15:2).

A hramthăwkih a siartupawlih dinhmun theihfiang a si ahcun, hi cabu siartu in Sansiarnak cabu-ih thupipawl hi thupi ah a ruat ko ding. Sáltan hnuih Jew-pawlih nun ah rinumnak le rinumlonak kan hmu. A cān ah cun dik zetin Pathian kamsuakthu an lehrul, asinan cān dangah cun Pathian Dān an pahbăl. Annih cu thanauumza tikcucān ah an um. Solomon temple ropi cu tisiat a si ih, cumi cu temple tenau in a airawl. A nungdamsŭnpawl cu an cak lo ih, an kimvelah ral tam zet an cêng. Ezra in harsa zetih um a nungdamsŭnpawl cu tha a pe ih, ralrinnak khal a pe. An thuanthu ihsin Pathian băwmnak le hmuingilnak thlengtertu le a lunghmuilonak le a nunsimnak thlengtertu an lungput le an cangvaihnak a theihter hai.

Ziang san khalah amah tlansantupawl Yahweh in a tlansan hai, asinan mah le mah phahniamawtu, amah hawltu le Bible ih zirh vekih amah betupawl a bawm ti Sansiarnak cabupawl in in zirh.

1

Siangpahrang Solomon

1 David fapa Solomon cu a lalram ah a ticakaw, cule Jehovah a Pathian in a umpi ih, nasazetin a khaisâng.

Gibeon ih Solomon Máng

2 Cule Israel-mi zate hnen, a thawng le a za hotu ralbawipawl hnen, laireltupawl hnen le Israel zate lakih uktu a si mi pupápawlih sungza lubânpawl hnenah Solomon in thu a sim. 3 Cun Solomon le a hnenih um mipungkhawm hmuahhmuah cu Gibeon ih um hmun sâng lamah an so; ziangahtile cu tawkah Jehovah siahhlawh Mosi in ramṭhing ih a rak tuah mi Pathian thawi Tawnawknak Puanthlam cu a um. 4 Asinan Pathian Kuang cu Kirjath Jearim ihsin David in a rak timlam cia mi hmun ah a thiar, ziangahtile cumi hrangah Jerusalem ah puanthlam a rak zar zo. 5 Cule Hur fapa Uri-ih fapa Bezalel ih a tuah mi dar biakṭheng cu Jehovah Biakbûk hmaiah a um; Solomon le mipungkhawm in cu tawkah amah an hawl. 6 Cule Solomon cu cutawk, Jehovah hmaiih um dar biakṭheng, Tawnawknak Puanthlam ah a hung so ih, cumi parah Meiur Thilhlăn 1000 a hlan.

7 Cuih zan ah Solomon hnenah Pathian a lang ih, «Dil aw! Ziang ka lo pe ding?» tiah a ti.

8 Cule Solomon in Pathian hnenah, «Ka pa David parah zahngainak nasazet na langter ih, a aiah siangpahrang ah i tuah. 9 Atu ah, Maw Jehovah Pathian, ka pa David hnenih na tiamkam mi cu dinghnget hram seh, ziangahtile nang in leilung leivut bangtukih tam mipi tlunah siangpahrang ah i tuah. 10 Hi minungpawl hmaiah lut le suakih ka um theinak dingah atu ah fimnak le theihnak i pe aw; ziangahtile hi zozai na minungpawl cu zo in so a uk thei ding?» tiah a ti.

11 Cun Pathian in Solomon hnenah, «Na thinlung ah himi a um ih lennak, neihnunnak, upatnak le na ralpawlih nunnak dil lo le nun saunak khal dil loin, cuhnakin an tlunih siangpahrang ih ka lo tuahnak ka mipawl na uk theinak dingah nangmai hrangah fimnak le theihnak na dil ruangah, 12 fimnak le theihnak cu na hnenih pek an si; cule lennak, neihnunnak le upatnak ka lo pe ding, na hlanih siangpahrangpawl zohman in cuvek cu an rak nei lo ih, na hnuah zohman in an nei fawn lo ding,» tiah a ti.

13 Cule Solomon cu Gibeon ih um hmun sâng, Tawnawknak Puanthlam ihsin Jerusalem ah a tlung, cule Israel tlunah a lal.

Solomon cu Milian ah a Cang

14 Cun Solomon in ránglêngpawl le rángtothiampawl a khawm; ránglêng 1400 le rángtothiam 12000 a nei, cupawl cu ránglêng khawpipawl le siangpahrang hnen Jerusalem ah a ret. 15 Cuihtlunah siangpahrang in sui le ngun cu Jerusalem ah lungto tlukin a umter ih, phairawn ih um, ^asikamor kung vekih tam in sidar thing cu a umter. 16 Solomon in Izip le Kue ihsi lakluh mi rángpawl a nei; siangpahrang-ih sumtuahpawl in cupawl cu Kue ah a man tawnin an rak lei ṭheu. 17 Izip ihsin ránglêng pakhat ah ngun tangka shekel 600 le ráng pakhat ah shekel 150 in an ngah ih an lalut. Cutivekin Heth-mipawlih siangpahrang le Siria siangpahrang hmuahhmuah hrangah an kuatsuak.

1:15^a sikamor: 1Sp 10:27 simfiangnak zoh aw.

2

Solomon in Temple Sak a Timlam

1 Cun Jehovah hmin hrangah Temple sak dingin le a lalram hrangah inn sak dingin Solomon in a ruatcat.

2 Solomon in thil phurtu dingah mipa 70000, tlang parih lungto sertu dingah mi 80000 le cupawl hohatu dingah mi 3600 a ruat.

3 Cun Solomon in Ṭaiar siangpahrang Hiram hnenah mi a thlah ih, «Ka pa David hrangih na tuah vekin le cēnnak dingah amai hrang inn saknak dingah sidar thingpawl na kuat vekin, ka hrang khalah tuah aw. 4 Ngai hnik, a hnenih hlăn dingah, Jehovah ka Pathian hmin hrangah Temple ka sak ding. Cumi cu Sabbath-pawl, Thla Tharpawl le Jehovah kan Pathian ih ruat mi puaipawl ah a hmaiih rimhmui thaw ur dingah, cawl loih Sangserh hrangah le zing le tlai ih Meiur Thilhlănpawl hrangah a si pei. Cumi cu Israel hrangah kumkhaw cīn le dān a si ding a si. 5 Cule ka sak ding mi Temple cu a ropi zet ding, ziangahtile kan Pathian cu a dang pathianpawl hmuahhmuah hnakin a tumsawn a si. 6 Asinan anih cu vanpawlih van hmanah a tlem lo ruangah zo in so inn saksak thei ding? A hmaiih thawinak ur dah ti lo, inn saksak dingin kei teh zo so ka si?

7 Curuangah Judah ram le Jerusalem ih ka hnenih um ka pa David in a timlam cia mi kutzungthiampawl thawn ṭuan dingah sui le ngun, dar le thir le puan sendup, puan senlar le puan mepian tuah thiamtu kutthiam neipawl kha i rak kuat aw. 8–9 Lebanon ihsin sidar thing, mirang far thing le algum thing pawl khal i rak kuat aw, ziangahtile na siahhlawhpawl khan Lebanon thing hau an thiam ti ka thei; cule ngai hnik, thing tampi i timlamsak dingin ka siahhlawhpawl cu na hlawhfapawl hnenah an ṭuan ve ding, ziangahtile ka sak ding mi Temple cu a tumin a mak ding a si. 10 Cule ngai hnik, thing hautu na siahhlawhpawl cu sangvut rialdip kor 20000, barli sangvut kor 20000, sabitzu bath 20000 le olif hriak bath 20000 ka pe hai ding,» tiah a ti.

11 Cun Ṭaiar siangpahrang Hiram in cakuat in a sâng ih, cumi cu Solomon hnenah a kuat:

«Jehovah in a mipawl a duhdawt hai ruangah, an tlunih siangpahrang ah a lo tuah a si,» tiin.

12 Cuihtlunah Hiram in, «Lei le van tuahtu Israel-ih Pathian Jehovah cu thangṭhatin um seh, ziangahtile anih in Siangpahrang David hnenah fapa fim a pe ih Jehovah hrangah Temple le a lalram hrangah inn pakhat a sak theinak dingah khawruahthiamnak le theihthiamnak thawn a thuam.

13 Cule atu ah kutzungthiampa, theihthiamnak nei Huram ka rak thlah. 14 Amah cu Dân tesinfa nunau pakhat ih fapa a si, asinan a pa cu Ṭaiar khawmi a si. Anih cun sui le ngun, dar le thir, lung le thing, sendup le mepian, puan nem páte le senlar tuah thiam a si ih, amah cu thil kher ziangkim tuah le a hnenih pek mi ruahmannak ziangkhal hlĕnsuak thei mi a si. Anih cu na kutzungthiampawl le ka bawi David, na paih kutzungthiampawl zawngah a ṭuan ve ding.

15 Curuangah atu ah ka bawi in a rak rel dah mi sangvut, barli sangvut, hriak le sabitzu cu a siahhlawhpawl hnenah rak kuat seh. 16 Cule Lebanon ihsin thing na ṭul zâtzât kan hau ding, cucu Joppa khua ah tipi ihsin pûm in ka run thiar ding ih Jerusalem ah na phurso ding,» tiah a ti fawn.

17 Cun a pa David in mipum a rak siar cia mi, khawtluang mipawl hmuahhmuah mipum a siar ih, mipum ting khat le thawng sawmnga thawngthum le zaruk hmuh an si. 18 Cule cupawl lakah mi 70000 cu thil phurtu ah, mi 80000 cu tlang parih lungto sertu ah, hohatu 3600 cu hnaṭuan tawlrelsaktu ah a tuah hai.

3

Solomon in Temple Sak A Thăwk

1 Cun Solomon in a pa David hnenih Jehovah a langnak hmun Jerusalem ih ^aMoriah Tlang par, David ih a rak timlamnak Jebus-mi Ornan-ih hruihhmun ah Jehovah Temple sak a thăwk. 2 Cule a lal a kum litnak thla hnihnak ni hnihnak ah inn sak a thăwk.

3:1^a Moriah: Hebru ṭawng a si ih a sullam cu «Jehovah ih hril,» tinak a si.

Temple Sung lam le Leng Lam

3 Himi hi Pathian inn saknak hrangih Solomon in lungphum a phumdān cu a si: a sau lam cu tahdān hlun dawng vekin, dawng 60 le a kauh lam dawng 20 a si. 4 Cule inn hmaiih hulhliap cu inn sau lam can dawng 20 a si ih, a san lam cu dawng 120 a si. A sung cu sui hlirhlăng a khût. 5 Pindan tumsawn phăr ah sui hlirhlăng a khût mi mirang far thing a bĕn ih, cumi parah ṭhulhfau kungpawl le cikcin a kher. 6 Cule a mawinak dingah inn cu lung mankhungpawl in a ceimawi ih, cuih sui cu Parvaim sui an si. 7 Inn, a tlângpawl le sângka biangpawl, a pharpawl le sângkapawl cu sui a khût; cule pharpawl ah cherub lempawl a kher.

8 Cule Hmun Thianghlim Bik a tuah. A sau lam cu inn kauh lam cān, dawng 20 a si ih, a kauh lam khal dawng 20 a si. Cumi cu sui hlirhlăng talent 600 a khût. 9 Tlawngkhen khīng rih zât cu sui shekel 50 a si, cule sâwng tlunta pindan cu sui a khût.

A Bungruapawl

10 Cule Hmun Thianghlim Bik sungah cherub lem pahnih, kherih thuammawi mi a tuah, cule cumi cu sui a khût hai.

11 ^aCherub-pawlih thla sau lam cu dawng 20 a si: cherub pakhat ih thla cu dawng nga a si ih pindan phăr a dai, cule khat lam thla khal dawng nga a si ih a dang cherub-ih thla a dai; 12 a dang cherub-ih thla khal dawng nga a si ih, pindan phăr a dai, cule a dang thla khal dawng nga a si ih, a dang cherub-ih thla a dai. 13 Hi cherub-pawlih thla kauh lam cu dawng 20 vuakvel a si. An ke in an ding ih, an hmai cu sung lam an hawi.

3:11^a Cherub-pawl: Vancungmi phun khat an si.

14 Cule anih in puanzar mepian, sendup, senlar le puan nem páte pawl tla a tuah ih, a parah cherub lem cuangin a tak.

15 Temple hmai lam khalah dawng 35 sâng ṭhuam pahnih a phun ih, an lu zim parih lubol um lukhuh cu dawng nga veve an si. 16 Hmun thianghlim sungta deuh pindan sungah cikcin hri a tuah ih, cuih ṭhuampawlih lu zim ah a bât; cule talê rah 100 lai a tuah ih, cikcinpawl parah cun a thlaih vivo. 17 Cun Temple hmaiah ṭhuam a phun, pakhat cu vawrh lamah, pakhat cu keh lamah an um; vawrh lamih um mi cu Jakin tiah hmin a sak ih, keh lam ta cu Boaz tiah hmin a sak.

4

1 Cuihtlunah dawng 20 sau, dawng 20 kau le dawng hra sâng dar biakṭheng pakhat in a tuah.

2 Cun Dar bur Tikuangpi a tuah ih, a tlâng cu khat lam ihsin khat lam tiang dawng hra a si, cumi cu a kûal. A san lam dawng nga a si ih, a tlâng kimvel cu dawng 30 a si. 3 Cule cumi hnuai cu câwcang lem bangin a vĕlsuak ih, dawng khat ah pahra vivo in Dar Tikuangpi kimvelah cun an um. Dar Tikuangpi bur a si tikah câwcang lem cu tlar hnih ih bur a si. 4 Dar Tikuangpi cu câwcang lem hleihnih parah a ṭhumaw, pathum in sak lam an hawi; pathum in nitlaknak lam an hawi, pathum in nisuahnak lam an hawi, pathum in thlang lam an hawi; Tikuangpi cu an parah hūn a si ih, an dung lam zaten sung lam an hawi thluh. 5 Tikuangpi cu zabăwk tia a sah; cule a tlâng cu no tlâng vek, lily par hlâw vekih tuah a si. Cumi cun bath 3000 a tlem ih a dâwl.

6 Cule khawlhawknak dingah maihum pahra khal a tuah ih, vawrh lam kapah panga, keh lam kapah panga a hung; annihpawl cu Meiur Thilhlăn an hlăn tikah a sungah an khawlhaw ta ding a si, asinan Tikuangpi cu puithiampawl khawlhawknak dingah a si.

7 Cule ruahman cia mi vek cio in, sui meitoṭhuam pahra a tuah ih, Temple sungah panga cu vawrh lamah, panga cu keh lamah tiin a ret.

8 Cabuai pahra khal a tuah ih, cupawl cu Temple sungah thlang lamah panga, sak lamah panga tiin a ret. Cule sui khengkûm 100 khal a tuah.

9 Cuihtlunah puithiampawlih tualrawn, tualrawn kaupi le tualrawn hrangah sângkapawl khal a tuah; cule cuih sângkapawl cu dar a khût hai. 10 Tikuangpi cu vawrh lam, nisuahnak lamah thlang lam hawiin a hung.

Temple Ṭhehfel a Si

11 Cun Huram in belpawl, suahdurpawl le khengkûmpawl a tuah. Pathian inn hrangih Siangpahrang Solomon a tuahsak mi hna cu Huram in a ṭheh: 12 ṭhuam pahnih le khengkûm vek, cuih ṭhuam pahnih tlunih lubol, ṭhuam lu zimih khengkûm vekih lubol pahnih tuamnak ṭial ṭhikṭhek pahnih; 13 cumi tuamnak ṭial ṭhikṭhek pahnih hrangih talê rah 400, ṭhuam lu zimih khengkûm vekih lubol pahnih tuamnak ding ṭial ṭhikṭhek veve hrangah talê rah tlar hnih, 14 a hunnak le a hunnak parih maihum khal a tuah; 15 Tikuangpi pakhat le a hnuaiih câwcang hleihnih thawn; 16 cuihtlunah belpawl, suahdurpawl, salaknak hmanruapawl le an bungbelpawl hmuahhmuah khal Huram in Jehovah inn hrangah hnawhtlet mi dar ihsin Siangpahrang Solomon a tuahsak.

17 Cupawl cu Jordan phairawn Sukkoth le Zaredah karlakih bellei hmun ah siangpahrang in a bur hai. 18 Cule Solomon in hi bungbel hmuahhmuah cu tam ngaingaiin a tuah ih, dar rih zât cu tah cawk a si lo.

19 Cutivekcun Solomon in Pathian inn sungih bungbel hmuahhmuah cu a tuah: sui biakṭheng le a parih Sangserh um cabuaipawl; 20 hmun thianghlim sungta hmaiih vandān ding vekin meitoṭhuampawl le an meitopawl cu sui hlirhlăng in a tuah, 21 cun pangparpawl, meitopawl le caicehpawl cu sui le sui hlirhlăng in, 22 cun caicehpawl, khengkûmpawl, haidaupawl le meiling ruhnakpawl cu sui hlir in a tuah. Hmun thianghlim luhnak, Hmun Thianghlim Bik luhnak sângkapawl le Temple sângkapawl cu sui in a tuah.

5

Solomon in Temple sungah Ziangkim a Ret

1 Cule Solomon in Jehovah inn hrangih a ṭuan mi hna hmuahhmuah cu ṭhehfel a si; cule a pa David ih a rak serhhran mi thilpawl, ngun, sui le bungbelpawl hmuahhmuah cu Solomon in a sungah a thiarlut ih, Pathian inn ih hlawnthil retnak pindan ah a ret hai.

Temple Hlănnak

2 Cun Solomon in Israel upapawl le hnámpawlih lubânpawl hmuahhmuah, Israel tefapawlih hotu pupápawl cu David Khawpi a si mi Zion ihsin Jehovah-ih Thukham Kuang zâwn dingin Jerusalem ah a kokhawm hai. 3 Cule Israel mipa hmuahhmuah cu thla sarihnak puai ah siangpahrang thawn an tawngkhawmaw. 4 Cule Israel upapawl zaten an ra ih, Levi-mipawl in Kuang cu an zâwn. 5 Cun annih in Kuang, Tawnawknak Puanthlam le Biakbûk sungih um a thianghlim mi bungbelpawl hmuahhmuah cu an rak thiar. Cupawl cu Levi-mi puithiampawl in an thiar. 6 Cuihhleiah Siangpahrang Solomon le a hnenih ra pungkhawm Kuang hmaiih um Israel mipi-umkhawm hmuahhmuah in tuu le câwcang a tam lam siar cawk lo le rel cawk loin rai an thawi.

7 Cun puithiampawl in Jehovah Thukham Kuang cu amai hmun, Temple hmun thianghlim sungta, Hmun Thianghlim Bik, cherub-pawlih thla hnuaiah an zâwnlut. 8 Ziangahtile cherub-pawl in Kuang hmun tlun zawnah an thla an pharh ih, cherub-pawl in Kuang le a zawnfungpawl cu an hliap. 9 Cuih zawnfungpawl cu an sau ih, kuang zawnfungpawlih zim cu hmun thianghlim sungta hmai ihsin hmuh thei a si, asinan leng lam ihsi cun hmuh theih an si lo. Cule cupawl cu cu tawkah tuihni tiangin an um. 10 Izip ihsin an fehsuak laiah, Jehovah in Israel tefapawl thawn thukham a tuah tikih, Mosi in Horeb ih a ret mi lungpheng pahnih siarlo Kuang sungah a dang zianghman a um lo.

11 Cule hitin a si, Hmun Thianghlim ihsin puithiampawl an ra suak, ziangahtile khui burṭhen ih um an si khalle, a rak um mi puithiampawl hmuahhmuah cun an thianfaiaw ta thluh, 12 Levi-mi hlasakthiampawl, cupawl zate lak ihsin Asaf, Heman, Jeduthun le an fapapawl le an unaupawl cu biakṭheng netnakih nisuahnak lamah patzai fêm var hnipuan thuamawin, sumselpawl, cawngcingpawl le ṭingṭangpawl kengin an ding, cule an zawngah puithiam 120 cun tawtawrawt an phaw ih, 13 hitin a si, tawtawrawt phawtupawl le hla saktupawl cun aw khat vekin Jehovah thangṭhatnak le lungawi thu simnak ih an tum awn cu aw pakhat vekih theih a si ih, tawtawrawtpawl le sengsengpawl le awnmawi hmanruapawl thawn an aw suahin,

«Ziangahtile anih cu a ṭha,
Ziangahtile a zahngainak cu kumkhuain a hmun,»

tiih Jehovah an thangṭhat tikah, cuih inn, Jehovah inn cu mero in a khat, 14 cutin puithiampawl cu mero ruangah rawngbawl dingin an ding thei lo; ziangahtile Jehovah ropitnak in Pathian inn cu a luahkhat a si.

6

Solomon-ih Hlănnak Thlacam

1 Cun Solomon in,

«Mero thim lakah ka cêng ding Jehovah in a ti.
2 Umnak inn ka lo saksak tengteng ding,
Cule kumkhua na cēnnak ding hmun cu,»

tiah a ti.

3 Cun siangpahrang cu a heraw ih Israel mipungkhawm zate an din laiah, Israel mipungkhawm pumpi cu thlawsuah a pe. 4–6 Cule anih in, «Ka pa David hnenah a kâ in, ‹Izip ram ihsin ka mi Israel ka hruaisuah ni ihsin Israel hnám lakih khui khua hman ka hmin umnak ding inn saknak dingah ka hril dah lo, ka mi Israel uktu dingah zo hman ka hril fawn lo. Asinan ka hmin umnak dingah Jerusalem ka hril ih, ka mi Israel tlunih um dingah David ka hril a si,› tiih titu, amai kut rori ih famkimtertu Israel-ih Pathian Jehovah cu thanghṭhatin um seh.

7 «Israel-ih Pathian Jehovah hmin hrangih temple sak ding ka pa David thinlung ah a rak um. 8 Asinan Jehovah in ka pa David hnenah, ‹Ka hmin hrangah temple sak ding cu na thinlung sungah a um, cutiih na thinlung ih a um cu na tiṭha a si. 9 Sikhalsehla nang in temple cu na sak lo ding, na taksa ihsi a suak ding mi na fapa sawnin ka hmin hrangah temple a sak ding a si,› tiah a ti. 10 Jehovah in a ṭawngsuak mi a kamsuakthu cu a tlamtlingter, cule Jehovah ih a rak tiamkam vekin ka pa David-ih dinhmun cu ka luah ih, Israel laltokham parah ka to; cule Israel-ih Pathian Jehovah hmin hrangah Temple ka sak a si. 11 Cule cu tawkah Israel tefapawl hnenih a rak tuah mi Jehovah Thukham umnak Kuang cu ka ret,» tiah a ti.

12 Cun Jehovah biakṭheng hmaiah Israel mipungkhawm zate hmuh ah Solomon cu a ding ih, a kut a pharh, 13 ziangahtile Solomon in dawng nga sau, dawng nga kau, dawng thum sâng dar dawnsâng a tuah ih, tualrawn laiah a ret; cule a parah amah cu a ding, Israel mipungkhawm zate hmaiah a khuk a bil ih, van lam hawiin a kut a pharh; 14 cule anih in, «Jehovah, Israel Pathian, an thinlung zateih na hmaiih a fehtu, na siahhlawhpawl thawn na thukham le zahngainak kilhimtu lei ah le van ah nangmah vek Pathian an um lo. 15 Nang cun na siahhlawh ka pa David na tiamkam mi na rak kilhim. Tuihsun ih a si bangin, nang cun na kâ in na rak sim ih na kut in na famkimter. 16 Curuangah Jehovah Israel Pathian, atu ah na siahhlawh ka pa David hnenih, ‹Na fapapawl in an nundān an fimkhur ih ka hmaiih nangmah na rak feh bangin ka dān ih an feh a si ahcun, ka hmaiah Israel laltokham parih totu ding pa na tlasam lo ding,› tiih na rak sim mi hlĕnsuak aw. 17 Cule atu ah, Maw Jehovah, Israel Pathian, na siahhlawh David hnenih na rak sim mi, na kamsuakthu cu thleng dik hram seh.

18 «Asinan Pathian cun leitlun milai a umcilh taktak pei maw? Zoh hnik, van le vanpawlih van hmanah na tlem lo si khawh, ka sak mi hi Temple cu ziangtluk a te sinsin pei! 19 Cuticingin na siahhlawhih thlacam le a dilnak ngaihsakin, Maw Jehovah ka Pathian, na hmaiih na siahhlawhih auaw le thlacamnak thlacam cu ngaithla hram aw: 20 himi hmun lam hawiih na siahhlawhih thlacam cu na theihsak theinak dingah, ‹Cu tawkah ka hmin a um ding,› na tinak hmun rori, hi Temple lamah sun le zan na mit na men ringring theinak dingah a si. 21 Cule hi hmun lam hawiih thla an cam tikah, na siahhlawh le na mi Israel-ih dilnak ngaithla hram aw. Na cennak hmun van ihsin ngaithla awla, na theih tikah, ngaidam hai hram aw.

22 «Mi pakhat khat a innhnen dokalhin thilsual a tuah ih, thukam la dingih fial a si ih, a ra ih hi Temple sungih na biakṭheng hmaiah thukam a lak asile, 23 van ihsin ngaithla awla, na siahhlawh parah cāngvai aw, cule misualrál parih a tuah mi vekin amai lu par rori ah thlenternak ih lehrūlin, midingfel cu amai dingfelnak bangtukih thiam coternak in thuṭhensak aw.

24 «Asilole na mi Israel cu na parih thilsual an tuah ruangah an doral hmaiah neh an si, cule hawikirin na hmin hlâmin le himi Temple sungah na hmaiah thlacamin dilnak an tuah asile, 25 van ihsin ngaithla awla, na mi Israel-ih sual cu ngaithiamin an pupápawl hnen le anmah hnenih na rak pek mi ram ah hruaikirsal hai aw.

26 «Na parih thilsual an tuah ruangah vanpawl khar a si ih, ruah a um lo tikah, hi hmun lam hawiin thla an cam ih, na hmin an hlâm ih, anmah na zawnzaiter hai ruangih an sual ihsin an kir asile, 27 van ihsin thei hai awla, na mi Israel, na siahhlawhpawlih sual ngaidam aw, a si, an zawh ding mi lamzin ṭha zirh hai awla, na mipawl hnenih ro ih na rak pek mi na ram parah ruah surter aw.

28 «Ram sungah mangṭam siseh, nathrisia siseh, rocarnak siseh, ṭawihnak siseh, kharbawkpawl siseh le khaukhuappawl siseh an um ih, ralpawl in an ram sung ^akhawpipawl ih anmah an kulhkhŭm tikah siseh, ziang vek nathri le ziang vek natnak a tlun tikah siseh, 29 mi zokhal in asiloe na mi Israel zaten mi pakhat cio in mai phurrit cio le mai thinnatnak cio an thei ih, himi Temple lamah an kut pharhin ziang vek thlacamnak siseh, ziang vek dilnak siseh an tuah tikah: 30 na umnak hmun van ihsin run thei awla ngaidam hai aw, cule mi kip an umdān vek cio in pe hai aw, an thinlung na thei a si, ziangahtile nangmah lawng in minung fātepawlih thinlung na thei, 31 cutin kan pupápawl hnenih na pek mi ram ah an nunsung na lamzinpawl zawhin an lo ṭihzah ding.

6:28^a khawpipawl: A ṭawng hrampi ah, «kăwtkapawl,» ti a si.

32 «Cuihtlunah na mi Israel si lo, ram dang mi thuhla ah, na hmin ropi le na kut cak le na bân suah mi zarah ram hlapi ihsin an rat ih, cutin ra in himi Temple sungih thla an cam asile, 33 na umnak hmun van ihsin ngaithla awla, ram dang mi cu an lo kawhdān hmuahhmuah bangtukin tuahsak hai aw, culawngah na mi Israel vekin leilung milai hmuahhmuah in na hmin an thei ding ih, an lo ṭihzah ding, cule ka sak mi hi Temple hi nangmai hmin ih kawh mi a si ti an thei ding.

34 «Na mipawl na thlah hainak hmun kip ah an ralpawl do dingin an fehsuak ih, na hril mi hi khawpi lam hawi le na hmin hrangih ka sak mi Temple lam hawiih thla an cam asile, 35 van ihsin an thlacam le an dilnak cu ngaithla awla, an thuhla pawmsak hram aw.

36 «Na parah thilsual an tuah, ziangahtile thilsual tuah lo mi pakhat hman an um lo, an parah na thinhengin anmah cu ralpawl hnenah na ap, cule anmahpawl cu a hla ah simaw, a nâi ah simaw, ram ah ralkaih ah an hruai, 37 cucingin ralkaih ih hruai an sinak ram ah an hmusuakaw ih, ralkaih ih hruai an sinak ram ah lungthlengin, ‹Thilsual kan rak tuah ih, thil kan tipalh, sualrálnak kan rak tuah a si,› tiin na hnenah dilnak an tuah ih, 38 ralkaih ih an hruainak hmun sáltannak ram ah, an thinlung hmuahhmuah le an ruahnak hmuahhmuah thawn na hnenah an lamlêt ih an pupápawl na pek mi ram lam le na hril mi na khawpi le na hmin hrangih ka sak mi Temple lam hawiih na hnenih thla an cam asile, 39 na umnnak hmun van ihsin an thlacam le an dilnakpawl cu ngaithla awla, an thuhla pawmsak hram aw, cule na parih thilsual tuahtu na mipawl ngaidam hai hram aw.

40 «Atu ah, ka Pathian, ka lo ngen a si, hi hmun ih tuah mi thlacamnak lamah na mit meng awla, na hna tháwng aw.

41 «Curuangah atu ah,
Tho aw, Maw Jehovah Pathian, na cawlhnak hmun ah,
Nangmah le na cahnak Kuang cu.
Maw Jehovah Pathian, na puithiampawl cu runsuahnak thawn thăwm si hai sehla,
Na mithiangpawl cu ṭhatnak ah lungawiaipuangin um hai seh.
42 Maw Jehovah Pathian, na hriak thih miih hmai hawikirter hlah,
Na siahhlawh David hnenih zahngainakpawl mang aw,»

tiah a ti.

7

Temple Hlănnak Cemnak

1 Solomon in thlacam a ṭheh tikah, van ihsin meisa a rung tla ih, Meiur Thilhlăn le thawinakpawl a kāngfai ṭheh; cule Jehovah ropitnak in Temple a luahkhat. 2 Cule Jehovah ropitnak in Jehovah inn a luahkhat ruangah Jehovah inn sungah puithiampawl an lut thei lo. 3 Israel tefapawl hmuahhmuah in meisa a rung tlakdān le Temple parih Jehovah ropitnak a um mi an hmuh tikah, lungrĕm mi parah an hmai leisin bihin an kûn, cule Jehovah cu an bia ih,

«Ziangahtile anih cu a ṭha,
Ziangahtile a zahngainak cu kumkhuain a hmun,»

tiin an thangṭhat.

4 Cun siangpahrang le mipi zaten Jehovah hmaiah thawinakpawl an hlan. 5 Siangpahrang Solomon in thawinak câwpa 22000 le tuu tingkhat le thawngkul a hlan. Cutivekcun siangpahrang le mipi zaten Pathian inn cu an hlan a si. 6 Cule «Ziangahtile a zahngainak cu kumkhuain a hmun,» tiih David in a ti tikah, puithiampawl cu an rawngbawlnak hmun ah Levi-mipawl thawn Jehovah thangṭhatnak dingih Siangpahrang David ih a rak tuah mi Jehovah-ih awnmawi hmanruapawl kengin an ding. Cule puithiampawl cun an hmaiah tawtawrawt an phaw ih, Israel-mi zaten an ding thluh.

7 Cuihhleiah Solomon in Jehovah inn hmai tualrawn laifang cu a serhhran; ziangahtile cu tawkah Meiur Thilhlănpawl le Remnak Thilhlănpawlih thau a hlan a si, ziangahtile Meiur Thihlănpawl, Thlairawl Thihlănpawl le sathau cu Solomon ih tuah mi dar biakṭheng ah a tlem lo.

8 Cuih cān ah Solomon in a hnenih um Israel hmuahhmuah thawn, Hamath khawluhnak ihsin Izip Tivate tiangih mipungkhawm nasazet thawn ni sarih sung puai a tuah. 9 Cule a ni riatnak ah tawnkhawmawknak hleice an nei, ziangahtile biakṭheng apnak ni sarih sung an hmang ih, ni sarih sung puai an tuah a si. 10 Cule David, Solomon le a mi Israel parih Jehovah in ṭhatnak a lăngter ruangah thla sarih, ni 23-nak ah mipipawl cu anmai puanthlam cio ah thinlung aipuang le lungawiin a tlunter hai. 11 Cutivekin Solomon in Jehovah inn le siangpahrang inn cu a ṭheh; cule Solomon in Jehovah inn le amai inn hrangah tuah dingih a thinlung ih ra thleng hmuahhmuah cu hlawhtling zetin a tuahsuak ṭheh.

Solomon hnenah Pathian a Langsal

12 Cun zan ah Solomon hnenah Jehovah a lang ih a hnenah, «Na thlacam ka thei ih, hi hmun cu keimai hrangih raithawinak inn si dingah ka hril a si. 13 Van ka khar ih ruah a sur lo tikah siseh, ram eicem dingin kharbawk thu ka pek tikah siseh ka mipawl lakih nathrisia ka thlenter tikah siseh, 14 ka hmin ih kawh mi ka mipawl in phahniamawin thla an cam ih, ka mithmai hawlin, an sualralnak lamzin ihsin an kir asile, van ihsin ka ngaithla hai ding, cule an sual ngaidamin an ram ka tidam ding. 15 Atu ah cun ka mit ka meng ding ih, hi hmun ih thlacam mi lamah ka hna ka thăwng thlang ding. 16 Ziangahtile cutawk ih ka hmin kumkhuaih a um theinak dingah hi inn hi ka hril ih ka tithianghlim a si; cule cu tawkah ka mit le ka thinlung cu a um tlaitluan ding. 17 Nangmah cu na pa David ih a tuah bangin, ka hmaiah na feh ih thu ka lo pek mi hmuahhmuah bangtukin na tuah ih, ka sakhaw dānpawl le ka cīn le dānpawl na thlun asile, 18 ‹Israel parah uktu ding mi na tlasam dah lo ding,› tiin na pa David hnenih thukham ka tuah bangin, na laltokham ka dĭnhnget ding.

19 «Asinan nan hmaiih ka ret mi ka sakhaw dānpawl le ka thupekpawl pialsan in, nan thlauthlak ih, pathian dangpawl hnenah feh in nan rian ih anmah nan biak asile, 20 anmah ka pek mi ka ram ihsin anmah cu ka phawi hai ding; cule ka hmin hrangih ka tithianhlim zo mi hih inn cu ka hmuh băn lo ah ka hlăwnsuak ding ih, miphunpawl hmuahhmuah lakah cumi cu phungthluk le puahcăwk ah ka tuah ding.

21 «Cule hih inn ropi khal hi, a kiangih fehtu pauhpauh in mak an ti ding ih, ‹Ziangruangah hih ram le hih inn parah Jehovah in hitin a tuah,› tiah an ti ding. 22 Cutikah annih in, ‹Jehovah an pupápawlih Pathian, Izip ram ihsi anmah hruaisuaktu cu an thlauthla ih a dang pathianpawl an pawm, cupawl cu an bia ih, an rĕn ruangah hih thil ṭhalo hmuahhmuah hi an parah a thlengter,› tiin an sâng ding a si,» tiah a ti.

8

Solomon-ih Khawpipawl

1 Kum 20 cem zawngah hitin a si, Solomon in Jehovah inn le amai inn a sak, 2 Hiram in Solomon a pek mi khawpipawl cu, Solomon in a sak hai ih, cu tawkah Israel tefapawl a umter. 3 Cule Hamath Zobah ah Solomon a feh ih a kulhkhŭm ih a la. 4 Ramṭhing ah Tadmor khal a dĭn ih Hamath ah thilri khawlnak khawpipawl a sak. 5 Beth Horon tlunta le Beth Horon hnuaita, khawkulh nei khawpipawl cu an hruangpawl thawn, kăwtkapawl le a kalhnak tlângpawl tla neiin, 6 Baalath le Solomon-ih a neih mi thilri khawlnak khawpipawl le ránglêng khawpipawl zate, rángtothiam khawpipawl, Solomon in Jerusalem, Lebanon le a uknak ram hmuahhmuah ih sak a duh mi hmuahhmuah cu a sak ṭheh fawn.

Solomon-ih Hnaṭuantupawl

7 Israel a si ve lo mi, Heth-mipawl, Amor-mipawl, Periz-mipawl, Hiv-mipawl, Jebus-mipawl lakih a tāng mipawl, 8 cupawl cu, an hnuih cuih ram ih an tān mi an tesinfapawl, Israel tefapawl ih an rak hlohralter lo mi, cupawl lak ihsin tuihni ih a si vekhin, Solomon in hranhramih ṭuanter mi hnaṭuantupawl a dĭn. 9 Asinan Solomon in Israel tefapawl cu a hna hrangih siahhlawh ah a tuah hai lo. Mi hrekhat cu ral do thiampawl, ralkap hotu bawipawl, a ránglêngpawl le rángtothiampawl hotu an si. 10 Cule mi dang 250 pawl cu Siangpahrang Solomon-ih bawipawl hotu an si ih, anmah cu mipi uktu an si.

Temple Rawngbawlnak

11 Cule Solomon in David Khawpi ihsin Faro fanu cu a hrangih a sak mi inn ah a hruaiso, ziangahtile anih in, «Ka nupi cu Israel siangpahrang David-ih inn ah khua a sa lo pei, ziangruangahtile Jehovah Kuang a rak thlennak hmunpawl cu an thianghlim a si,» tiah a ti.

12 Cun Solomon in hulhliap hmaiih a rak dawl mi Jehovah biakṭheng parah Jehovah hnenah Meiur Thilhlănpawl a hlan, 13 ni tin bituk tawk bangtukin, Mosi thupek bangtukih thilhlăn, Sabbath ah, Thla Thar ah le khiah mi puai, kum khat ah vei thum: Thilnu telh lo Sang Puai, Zarhkar Sarih hnu Puai le Bûkte Puai hrangah a hlan. 14 Cule a pa David ih remruat cia bangtukin puithiampawl cu an rawngbawlnak hrangah burṭhen a ruat ih, Levi-mipawl cu an ṭuanvo a ruatsak. An ṭuanvo cu an ni tin ṭuanvo ih a phût vekin thangṭhatnak hla sak le puithiampawl hmaiih rawngbawl a si. Kăwtka kip kiltupawl khal a bur a bur in a ruat, ziangahtile cutivekcun Pathian mi David in thu a rak pe a si. 15 Puithiampawl le Levi-mipawl cu siangpahrang thupek ihsin ziang thu khalah siseh, hlawnthil thuhla khalah siseh an pialsan lo.

16 Jehovah inn lungphum ni ihsin an ṭhehfel tiangin Solomon-ih hnaṭuan hmuahhmuah cu felfaiteih tuah a si. Cutivekcun Jehovah inn cu ṭhehfel a si.

Edom ihsin Sui

17 Cun Solomon cu Edom ram ih tifinriat kap tluan Ezion Geber le Elath ah a feh. 18 Cule Hiram in a siahhlawhpawlih kut in lăwngpawl le tifinriat theitu siahhlawhpawl a hei kuat. Annih cu Solomon-ih siahhlawhpawl thawn Ofir ah an feh ih, cutawk ihta sui talent 450 an ngah, cule Siangpahrang Solomon hnenah an run keng.

9

Sheba Siangpahrangnu in Solomon a Tlawng

1 Sheba siangpahrang bawinu in Solomon hminthanzia a theih tikah, thusuhnak har zetzet thawn Solomon hniksak dingin, thluntu tam zet hruaiin kalaukpawl in rimhmuipawl, sui tam zet le lung mankhungpawl phurin Jesusalem ah a feh ih, Solomon hnen a thlen tikah a thinlung ih um mi hmuahhmuah cu a va sim ṭheh. 2 A suh mi zaten Solomon in a sâng ṭheh; a simfiang thei lo mi thil harsa zianghman Solomon hrangah a um lo. 3 Cule Sheba siangpahrang bawinu in Solomon fimnak, a sak mi inn, 4 cabuai parih rawlpawl, a siahhlawhpawl an todan, a rawngbawltupawl căngvaihdān le an thuamawkdān, a no kengtupawl le an thuamawkdān le Jehovah inn a luhsonak zin pawl a hmuh tikah, thinlung mumal a nei nawn lo.

5 Cule anih in siangpahrang hnenah, «Na ṭawngkam le na fimnak thu ka ram ihsi ka rak theih mi hi thuthang cu a dik a si. 6 Sikhalsehla ka rat ih ka mit rori ih ka hmuh hlan sung cu an ṭawngkampawl cu ka rak zum lo; cule ngai hnik, na fimnak a ropizia a hrek hman in rak sim lo hi a si. Na hminthannak ka theih mi cu na lan riaiaw. 7 Na mipawl cu mithlawsuak an si, na siahhlawh na hmaiih ding camcin ih na fimnak theitupawl cu mithlawsuak an si. 8 Jehovah na Pathian hrangih siangpahrang dingih a laltokham ih lo toter dingih na parih lungsinak neitu Jehovah na Pathian cu thangṭhatin um seh! Ziangahtile na Pathian in Israel a duhdawt ih, kumkhuaih anmah dĭnhngeh an sinak dingah le nangmah cu diknak le dingfelnak tuah dingah an tlunih siangpahrang ah a lo tuah a si,» tiah a ti.

9 Cule siangpahrang hnenah sui talent 120, rimhmui a tawri tawr le lung mankhungpawl a pe; Sheba siangpahrang bawinu in Siangpahrang Solomon a pek mi rimhmui vek hi a um dah lo.

10 Ofir ihsi sui rak kengtu, Hiram-ih siahhlawhpawl le Solomon-ih siahhlawhpawl khal in algum thing le lung mankhungpawl an rak keng. 11 Cule siangpahrang cun algum thing cu Jehovah inn le siangpahrang inn fehnak hrangah le hlasatupawl hrang ṭingṭang le hri nei tum mipawl ah a tuah. Cule Judah ram ah hi hlanah hivek hi hmuh a rak si dah lo.

12 Siangpahrang Solomon in Sheba siangpahrang bawinu hnenah siangpahrang hnenih an run ken mi hnakih tam a duh mi hmuahhmuah, a dil mi pauhpauh a pe. Cun a her ih amai ram ah a tlung, amah le a siahhlawhpawl thawn.

Solomon in Sui le Vuiho tam zet a Nei

13 Solomon hnenih kum tin a thleng mi sui cu talent 666 rit a si, 14 cumi sungah khualtlawngpawl le sumtuahpawl ih ken mi a tel hrih lo. Cule Arabia ram siangpahrangpawl hmuahhmuah le ram uktupawl in Solomon hnenah sui le ngun an rak keng. 15 Cule Siangpahrang Solomon in sŭt pheng mi sui ralphaw hlai zetzet 200 a tuah; ralphaw pakhat ah sŭt pheng mi sui tlap shekel 600 a hmang. 16 Sŭt pheng mi sui ralphaw te 300 khal a tuah; ralphaw pakhat ah sui shekel 300 a hmang. Cupawl cu siangpahrang in Lebanon Tupi Inn ah a ret hai.

17 Cuihtlunah siangpahrang in vuiho laltokham tumpi a tuah ih, cumi cu sui hlirhlăng a khût. 18 Cuih laltokham ah cun kaisohnak karbak paruk cu sui keretnak thawn, laltokham thawn pehawin a um; a tonak sir veve ah kuthngahnak a um ih, kuthngahnak kiangah kiosa lem ding pahnih an um. 19 Cu tawkah, karbak paruk pakhat cio ih khat lam le khat lam sirah kiosa lem ding hleihnih an um; cuvek cu khuitawk lalram khalah tuah a si dah lo.

20 Siangpahrang Solomon-ih thil innak bungbel hmuahhmuah cu sui an si ih, Lebanon Tupi Inn ih bungbel hmuahhmuah cu sui hlirhlăng an si. Pakhat hman ngun a um lo, ziangahtile Solomon san ahcun ngun cu ziang hmanah an siar lo. 21 Ziangahtile siangpahrang-ih lăwngpawl cu Hiram-ih siahhlawhpawl thawn Tarshish ah an feh. Kum thum dan ah vei khat sumdawnnak lăwngpawl cu Tarshish in an ra thleng, sui, ngun, vuiho, zawng tumpipawl le utâwngpawl tla an rak phur.

Solomon-ih Neihnunnak

22 Siangpahrang Solomon cun leilung siangpahrang hmuahhmuah cu lennak ah le fimnak ah a hleih thluh hai. 23 Pathian in a thinlung sungih a ret mi fimnak ngai dingah, leilung siangpahrang hmuahhmuah cu Solomon umnak an ra hawl. 24 Mi kip in anmai laksawng cio kum tin pek bikhiah neiin ngun le sui bungbelpawl, sinfenpawl, ralthuampawl, rimhmuipawl, rángpawl le lākrangpawl tla an rak keng.

25 Solomon in rángpawl le ránglêng retnak dingah ráng retnak pindante te 4000 le rángtothiam 12000 a nei. Cupawl cu ránglêng khuapawl ah le Jerusalem ih siangpahrang hnenah a ret hai.

26 Anih in Tiva ihsin Filisṭia-mipawlih ram tiang, Izip ramri tiang siangpahrang hmuahhmuah a uk. 27 Siangpahrang in Jerusalem ah lungto vekin ngun a umter ih, phairawn ih ^asikamor thingpawl zâtih tam in sidar thingkungpawl a umter. 28 Cule Izip le ram kip ihsin Solomon hnenah ráng an rak hruai.

9:27^a sikamor: 1Sp 10:27 simfiangnak zoh aw.

Solomon-ih Uknak Cemnetnak

29 Solomon-ih căngvaihnak a dang, a hmaisabik ihsin a netabik tiangin profet Nathan-ih cazual sungah le Shilon-mi Ahijah thuphuan mi sungah le Nebat fapa Jeroboam thuhla ih hmutu Iddo larawknak hmuh mi cazual sungah ngan an si lo maw? 30 Solomon in Israel-mi zate tlunah kum 40 sung Jerusalem in a uk. 31 Cun Solomon cu a pupápawl hnenah a itthat ih, amah cu a pá David Khawpi ah phum a si. Cule a fapa Rehoboam cu a aiah a lal.

10

Siangpahrang Rehoboam

1 Cule Shekem ah Rehoboam a feh, ziangahtile amah cu siangpahrang ih tuah dingah Israel zaten Shekem ah an rak feh. 2 Cun hitin a si, Nebat fapa Jeroboam in cuih thu a rak theih tikah, Jeroboam cu Izip ihsin a ra tlungkir (amah cu siangpahrang Solomon hnen ihsin a rak tlân ih Izip ah a rak um dah). 3 Cun mi an thlah ih amah cu an ko. Cule Jeroboam le Israel zate an ra ih Rehoboam hnenah, 4 «Na pa in kan hngawngkol harsa zetin a tuah; curuangah atu ah na paih rawngbawlhna harsa le kan parih a ṭhum mi a hngawngkol rit zet cu zângter aw, cule nangmah kan lo rian ding,» tiin an sim.

5 Cule anih in an hnenah, «Ni thum hnuah ka hnenah rasal uh,» tiah a ti hai. Cule mipi cu an suak.

6 Cun Siangpahrang Rehoboam in «Hih mipi săwnkirnak dingah ziangtin ruahnak i pe pei?» tiin, a pa Solomon dam laiih a hmaiih ding ṭheu tu upapawl cu a ráwn hai.

7 Cule annih in a hnenah, «Hih mipi parah ngil na nei ih, an lung na hmuiter ih, an hnenih ṭawngkam ṭha na ṭawng asile, kumkhuain na siahhlawh an si ding,» tiah an ti.

8 Asinan upapawl ih ruahnak an pek mi cu a hnáwng ih, a hmaiih ding, amah zawngih ṭhanglian tlangvalpawl cu thu a ráwn hai. 9 Cule anih in an hnenah, «Ziang ruahnak in pe pei? Hih mipi ka hnenih, ‹Na pa in kan parih a ṭhum mi hngawngkol hi zângter aw,› tiih i titupawl hi ziangtin kan sâng pei,» tiah a ti hai.

10 Cun a zawngih ṭhanglian tlangvalpawl in a hnenah, «Hih mipi, ‹Na pa in kan hngawngkol rit zetin a tuah, asinan nang in kan parah zângter aw,› tiih na hnenih lo titupawl hnenah hitin ti hai aw, hitivekin an hnenah sim aw, ‹Ka paih tâi hnakin ka kutzungte a tumsawn ding. 11 Atu ah ka pa in nan parah a rit zet mi hngawngkol a ṭhum, nan hngawngkol cu ka bêt sinsin ding; ka pa in mivuaknak in nun a lo sim, asinan kei cun tlangkaikuangpawl in nun ka lo sim ding,› tiin,» tiah an ti.

12 Jeroboam le mipi hmuahhmuah cu siangpahrang in, «Ni thumnak ah ka hnenah rasal uh,» tiih a sim hai vekin a ni thum ni ah cun Rehoboam hnenah an ra.

13 Cun siangpahrang in an hnenah hrohrang zetin a sawn hai. Siangpahrang Rehoboam in upapawl ih ruahnak an pek mi cu a hnáwng ih, 14 tlangvalpawl ih ruahnakpek mi vekin an hnenah, «Ka pa in nan hngawngkol rit zetin a lo tuah, nan hngawngkol parah ka bêt sinsin ding; ka pa in mivuaknak in nun a lo sim, asinan kei cun tlangkaikuangpawl in nun ka lo sim ding,» tiah a rak ti hai.

15 Siangpahrang in mipi cu a ngaithla hai lo; ziangahtile cucu Pathian ruangah a si, Jehovah in Shilon-mi Ahijah hmangih Nebat fapa Jeroboam hnenih thu a rak sim mi a tlamtlinter theinak dingah a si.

16 Israel zaten siangpahrang in a ngaithla hai lo ti an hmuh tikah, mipi in siangpahrang hnenah,

«David ah ziang covo so kan neih?
Jessi fapa ah ro kan nei lo.
Maw Israel, mi tin mai puanthlam cio ah!
Maw David, atu ah nangmai sungkua zoh aw,»

tiin an let. Cun Israel zaten anmai puanthlam cio ah an feh.

17 Asinan Judah khawpipawl ih um Israel tefapawl cu Rehoboam in a uk hai. 18 Cun Siangpahrang Rehoboam in hranhramih ṭuanter mi hnaṭuantupawl hotu Hadoram cu a hei thlah; asinan Israel tefapawl in amah cu lungto in an deng ih, a thi. Curuangah Siangpahrang Rehoboam cu Jerusalem ih tlân dingin a ránglêng parah hmanhmawh zetin a to. 19 Cule tuihni tiangin Israel cu David sungza parah a hél lan ta.

11

Rehoboam in Pathian a Thlun

1 Cule Jerusalem ih Rehoboam a thlen tikah, Israel do ih, Rehoboam hnenah lalram lasal dingin hril mi, ral do thiam Judah sungza le Benjamin sungza mi ting khat le thawng sawmriat a kokhawm. 2 Asinan Pathian mi Shemaiah hnenah Jehovah kamsuakthu a rung thleng ih, 3 «Judah siangpahrang, Solomon fapa Rehoboam hnenah le Judah ram le Benjamin ram ih Israel zate hnenah, 4 Jehovah in hitin a ti, ‹Nan hung so lo pei, nan unaupawl nan do fawn lo pei: mi tin mai inn cio ah tlung uh, ziangahtile hi thil hi keimai tuah mi a si,› a ti,» tiah a ti. Cule annih in Jehovah kamsuakthupawl cu an lung ih, Jeroboam do dingih an feh ding cu an kirsal.

Kilhimawknak Khawpipawl

5 Cule Rehoboam cu Jerusalem ah a cêng ih, Judah ram ah kilhimawknak hrangah khawpipawl a dĭn. 6 Bethlehem, Etam, Tekoa, 7 Beth Zur, Sokoh, Adullam, 8 Gath, Mareshah, Zif, 9 Adoraim, Lakish, Azekah, 10 Zorah, Aijalon le Hebron pawl a dĭn, cupawl cu Judah ram le Benjamin ram ih kulh nei khawpipawl an si. 11 Cule ralhruangkulhpawl a hngetter ih, cupawl ah hotupawl le rawl, hriak le sabitzu pawl khawlkhawmnak inn a ret. 12 Khaw kip ah ralphawpawl le feipawl a ret ih, cuih khuapawl cu nasazetin a cakter, Judah ram le Benjamin ram cu amai ta an si.

Judah-mipawl in Kum Thum sung Pathian an Thlun

13 Cule Israel ram pumpi ih puithiampawl le Levi-mipawl cu anmai ram cio ihsin a hnenah an ra. 14 Ziangahtile Levi-mipawl cun an ran tlannak ram lawnglakpawl le an neih thilpawl an tân ih, Judah ram le Jerusalem ah an ra, ziangahtile Jeroboam le a fapapawl in Jehovah hrangih puithiam hna ṭuan lo dingin an bānter. 15 Cule hmun sângpawl hrang, khawsiapawl hrang le câwpa no lem a tuah mipawl hrangah amai hrangah puithiampawl a ruat.

16 Cule Israel hnám hmuahhmuah lak ihsin Israel-ih Pathian Jehovah hawl dingih thinlung a rettupawl cun an thlun, an pupápawlih Pathian Jehovah hnenah raithawi dingin Jerusalem ah an feh. 17 Cutin Judah lalram cu an cakter ih, kum thum sung Solomon fapa Rehoboam cu an cakter, ziangahtile kum thum sung David le Solomon-ih lamzin an zawh.

Rehoboam-ih Innsungsang

18 Cule Rehoboam in David fapa Jerimoth fanu Mahalath cu nupi ah a ṭhi, cu nu cu Jesse fapa Eliab-ih fanu Abihail fanu a si; 19 cu nu in fāte Jeush, Shamariah le Zaham a hrinsak. 20 Cule cu nuih hnuah Absalom fanu Maakah a ṭhi, anih in Abijah, Attai, Ziza le Shelomith a hrinsak. 21 Cule Rehoboam cun Absalom fanu Maakah cu a nupipawl le a nusûnpawl hmuahhmuah hnakin a duhdawt hleice, ziangahtile nupi hleiriat le nusûn 60 a nei ih, fapa 28 le fanu 60 a nei. 22 Cule Rehoboam in Maakah fapa Abijah cu a unaupawl lakih uktu lubik ah a tuah; ziangahtile amah cu siangpahrang ih tuah dingah a ruat. 23 Cule anih cun fim zetin thil a ti ih, a fātepawl hmuahhmuah cu kulh nei khawpi lamah Judah ram le Benjamin ram pumpuluk ah a umdarhter ih ei ding tampi a pe hai. Cule nupi tampi a hawlsak hai.

12

Faro Shishak in Judah a Sîm

1 Cule hitin a si, Rehoboam in lalram a dĭnhnget tik le a ti cakawk tikah, amah le a hnenih um Israel-mipawl hmuahhmuah in Jehovah Dān an thlauthla.

2–3 Cule hitin a si, Rehoboam in kum nga a uknak ah, Jehovah parih rinum loih an um ruangah Izip siangpahrang Shishak cun ránglêng ting khat le kul, rángtothiam 60000 thawn Jerusalem dokalhin a hung so: Izip ihsin a hnenih ra mipi cu siar cawk lo an si; Libia-mi, Sukkoth-mi le Kush-mi an si. 4 Anih in Judah ram ih kulh nei khawpipawl a la ih, Jerusalem a thleng.

5 Cun profet Shemaiah cu Rehoboam le Judah hotupawl, Shishak ruangih Jerusalem ih pungkhawmpawl hnenah a feh ih an hnenah, «Jehovah in hitin a ti: ‹Nannih in in thlauthla zo, curuangah kei khal in Shishak kut ah ka lo tân ve a si,› a ti,» tiah a ti.

6 Cule Israel hotupawl le siangpahrang cu an phahniamaw ih, «Jehovah cu a dingfel a si,» tiah an ti.

7 Jehovah in an phahniamaw ti a hmuh tikah, Shemaiah hnenah Jehovah kamsuakthu cu, «An phahniamaw, curuangah anmah cu ka hlorálter lo ding, a hrekkhat ka runsuak hai sawn ding. Shishak kut hmangin Jerusalem ah ka thinlingnak ka thlebung lo ding. 8 Cuticingkhalin annih cu a siahhlawh an si thotho ding, cutin keimai rawngbawlhna le miphunpawlih lalram rawngbawlhna an thleidang thiam ding,» tiin a thleng.

9 Izip siangpahrang Shishak cu Jerusalem do dingin a so ih, Jehovah inn ih hlawnthilpawl le siangpahrang inn ih hlawnthilpawl a la, ziangtinkim a la thluh. Solomon ih tuah mi sui ralphawpawl khal a la. 10 Cun Siangpahrang Rehoboam in an aiah dar ralphawpawl a tuah ih, cupawl cu kiltu ralbawipawl, siangpahrang inn luhnak kiltupawl hnenah a ap. 11 Cule Jehovah inn ih siangpahrang a luh tinten kiltupawl an ra ih cupawl cu an lasuak, cun kilnak pindan sungah an retkirsal.

12 Rehoboam a phahniamawk tikah, Jehovah thinlingnak cu a hnen ihsin a ṭhawnhlo, cuticun amah cu a siatsuah verver lo ih, Judah ram khalah thil umtudān a ṭha.

Rehoboam-ih Uknak Cemnetnak

13 Cuticun Siangpahrang Rehoboam cu Jerusalem ah a ticakaw ih a uk. Siangpahrang a hung si tikah Rehoboam cu kum 41 a si ih, Jehovah in a hmin umnak dingih Israel hnám hmuahhmuah lak ihsin Jehovah in a hril mi khawpi Jerusalem ah kum hleisarih sung a lal. A nuih hmin cu Naamah a si ih, Ammon-mi a si. 14 Cule Jehovah hawl dingin a thinlung a timlam lo ruangah thil ṭhalo a tuah. 15 Rehoboam-ih căngvaihnakpawl, a hmaisabik ihsin a netabik tiang profet Shemaiah-ih cazual ah le hmutu Iddo-ih cithlahsâwngawknak cabu ah an ngan a si lo maw? An nunsung hmuahhmuah Jeroboam le Rehoboam karlakah doawknak a um. 16 Cule Rehoboam cu a pupápawl hnenah a itthat ih, David Khawpi ah phum a si. Cun a fapa Abijah cu a aiah a lal.

13

Siangpahrang Abijah

1 Siangpahrang Jeroboam a lal a kum hleiriatnak ah Abijah cu Judah ram ah siangpahrang ah a cang. 2 Jerusalem ah kum thum sung a lal. A nuih hmin cu Mikaiah a si, Uriel fanu, Gibeah-mi a si.

Cule Abijah le Jeroboam karlakah doawknak a um.

Israel thawi Doawknak

3 Abijah in hril mi ralkap doawknak ih micak ralṭha ting li cu ral do dingin a tlarter hai. Jeroboam khal in hril mi micak ralṭha ting riat thawn tlarawin a timlamaw ve.

4 Cun Abijah cu Efraim tlangtluanpawl parih Zemaraim Tlang parah a ding ih, «Jeroboam le Israel hmuahhmuah tla, i rak ngai hnik uh: 5 Israel-ih Pathian Jehovah in Israel lalram cu David hnenah kumkhaw hrangin amah le a fapapawl hnenah cite thukham in a pe ti cu thei ding mawi nan si lo maw? 6 Cuticingin David fapa Solomon siahhlawh Nebat-ih fapa Jeroboam cu a tho ih, amai bawi parah a hél. 7 Cun Rehoboam a no lai le a thinlung nem lai le a dodal thei hai hlanah, santlailo mihlothlaupawl cu a hnenah an khawmaw ih, Solomon fapa Rehoboam dokalhin an ticakaw.

8 «Cule David fapapawlih kut ih um Jehovah lalram cu kham thei dingin nan ruat; nannih cu mi tam ngaingai nan si ih nan hnenah Jeroboam in nan pathian dingih sui câwpa no lempawl a lo tuahsak mi khal an um. 9 Jehovah puithiam Aaron fapapawl le Levi-mipawl nan dawisuak ih, ram dang miphunpawl vekin nanmai hrangah puithiam nan tuah a si lo maw? Cutin câwcang tûai pakhat lole tuucang pasarih thawn mah te serhhranaw dingih ra zokhal pathian si hlei lo pawlih puithiam a si ding.

10 «Asinan kannih hrangah cun Jehovah cu kan Pathian a si ih, amah cu kan thlauthla lo; cule Jehovah hnenih rawngbawltu puithiampawl cu Aaron fapapawl an si ih, Levi-mipawl in anmai ṭuanvo an ṭuan. 11 Cule annihpawl in zing tin zan tin Jehovah hnenah Meiur Thilhlănpawl le rimhmui thaw an ur; cuihtlunah a cabuai thiang parah Sangserh khal remten an ret ih, zan tin sui meitoṭhuam cu a meitopawl thawn vâng dingin an ret; ziangahtile kannih cun Jehovah, kan Pathian thupek kan thlun a si, asinan nannih cun amah nan thlauthla. 12 Atu ah, ngai hnik uh, Pathian rori cu kan hnenah kan hotu vekin a um ih, a puithiampawl in tawtawrawtpawl an phaw ding, nanmah dokalhih ral doaw dingah. Maw Israel tefapawl tla, Jehovah, nan pupápawlih Pathian do hlah uh, ziangahtile nan hmuingil lo ding,» tiah a ti.

13 Asinan Jeroboam in an dung lamih ra ding mipawl a bawhthupter, cule annih cu Judah-pawl hmaiah an um ih, bawhthuptupawl cu an dungah an um. 14 Cule Judah cu a heraw ih, ngai hnik, raldonak tlar cu an hmai lam le an dung lamah a um, cule Jehovah hnenah an ausuak ih, puithiampawl in tawtawrawt an phaw. 15 Cun Judah-mipawl cu an au, cutiih Judah-mipawl an au tikah, hitin a si, Pathian in Jeroboam le Israel zate cu Abijah le Judah hmaiah Pathian in a vua. 16 Cule Israel tefapawl Judah hmaiah an zâm ih, annih cu Pathian in an kut ah a pek. 17 Cun Abijah le a milaipawl in annih cu thahnak nasazetin an neh; hril mi Israel ting nga an that.

18 Cuticun Israel tefapawl cu cuih cān ah an duai ih, Judah tefapawl in an neh, ziangruangahtile annih cun Jehovah an pupápawlih Pathian an rinsan a si.

19 Cule Abijah in Jeroboam a dawi ih, a hnen ihsin khawpipawl a la: Bethel le a khawṭekpawl, Jeshanah le a khawṭekpawl, Efrain le a khawṭekpawl thawn. 20 Abijah san sungah kēlawhin Jeroboam a caksal nawn lo; cule Jehovah in amah cu a vuak ih, a thi.

Abijah-ih Uknak Cemnetnak

21 Asinan Abijah cu a cak deuhdeuh, nupi hleili a nei ih, fapa kul hluanhnih le fanu hleiruk a hring. 22 Abijah-ih căngvaihnak dang, a lamzinpawl le a sim mi thupawl cu profet Iddo-ih zirhnak cazual ah ngan an si.

14

Siangpahrang Asa

1 Cule Abijah cu a pupápawl hnenah a cawl ih amah cu David Khawpi ah an phum. Cun a fapa Asa cu a aiah a lal. Amai san ah ram cu kum hra sung ralmuangin a um. 2 Asa in Jehovah a Pathian mithmuhih ṭha le dik a tuah, 3 ziangahtile ram dang pathianpawlih biakṭhengpawl le hmun sângpawl a ṭhawnhlo ih, ṭhuamserhpawl a ṭhiat, cule Asherah-pawl a hauthlu. 4 Jehovah an pupápawlih Pathian hawl ding le dān le thupek thlun dingin Judah cu thu a rak pe. 5 Judah khawpipawl hmuahhmuah ihsin hmun sângpawl le rimhmui biakṭhengpawl khal a ṭhawnhlo ih, amai hnuaiah lalram cu ralmuangin a um.

6 Cule Judah ram ah kulh nei khawpipawl tla a sak, ziangahtile ram cu a cawl; cuih kumpawl ah cun anih in ral do a nei lo, ziangahtile Jehovah in amah cu cawlhnak a pe. 7 Curuangah anih in Judah hnenah, «Hi khawpipawl hi dĭn uhsi, a kimvelin kulh, dawlsângpawl, kăwtkapawl, a kalhnak tlângpawl tla tuah uhsi. Ziangahtile Jehovah kan Pathian kan hawl ih ram cu kan hmaiah a um lai hrih ko. Amah kan hawl ih kil kip ah cawlhhahdamnak in pe a si,» tiah a ti. Cutin an dĭn ih an hmuingil.

Asa in Kush a Neh

8 Cun Asa in Judah ram ihsin ralphaw le fei keng ralkap ting thum le Benjamin ram ihsin ralphaw le thál hmang pacang ting hnih le thawng sawmriat a nei, cupawl cu an zaten micak ralṭha hlir an si.

9 Cun anmah do dingin Kush-mi Zerah cu ralkap mipa tinghra le ránglêng 300 thawn a ra suak ih, Mareshah ah a thleng. 10 Asa cu amah do dingin a fehsuak ih, Mareshah ah Zefathah Phaikuam ah ral do dingin ralkap burpi cu an tlarawter. 11 Cule Asa cu Jehovah a Pathian hnenah a ausuak ih, «Jehovah, na hrangah mi tam siseh, caknak nei lo siseh bawm dingin danglamnak a um lo, in bawm aw, Maw Jehovah kan Pathian, ziangahtile na parah kan ṭhumaw ih, na hmin in hi mi tampi dokalhin kan feh a si. Maw Jehovah, nang cu kan Pathian na si, minung in lo neh hlah seh,» tiah a ti.

12 Cun Asa le Judah hmaiah Kush-mipawl cu Jehovah in a vua hai ih, Kush-mipawl cu an zâm. 13 Cule Asa le a hnenih um mipi in cupawl cu Gerar tiang an dawi. Cutin Kush-mipawl cu an duai ih, kēl an awh thei nawn lo, ziangahtile Jehovah le a ralkappawl hmaiah siatsuah ṭheh an si. Cule ralthillawn tam ngaingai an la. 14 Cun Gerar kiangkapih khawpi zaten an neh thluh, ziangahtile Jehovah ṭihnak an parah a thleng; cule khawpipawl hmuahhmuah an răm, ziangahtile cuih khawpipawl ah ralthillawn tam ngaingai a um. 15 Sumhnám neipawlih puanthlam khal an siatsuah ih, tuupawl le kalaukpawl tampi an hruai, cule Jerusalem ah an tlung.

15

Asa in Thukamnak a Tuah

1 Oded fapa Azariah parah Pathian Thlarau a rung thleng. 2 Cule anih cu Asa táwng dingin a fehsuak ih a hnenah, «I rak ngai uh, Asa le Judah hnám le Benjamin hnám zaten. Amah lamih nan ṭan sung hmuah cu Jehovah in a lo umpi a si. Amah nan hawl asile, nan hmu ding; asinan amah nan thlauthlak asile, a lo thlauthla ve ding. 3 Atu ah cān reipi sung Israel cu Pathian dik nei lo, zirhtu puithiam nei lo le dān nei loin a um. 4 Asinan an harsat tikah Israel-ih Pathian Jehovah hnenah an hawikir ih, amah cu an hawl, cule an hmu. 5 Cule cu laiah a fehsuak le a ra tlung mi hnenah hnangamnak a rak um lo, ram luahtupawl hmuahhmuah parah buainak nasazetin a um. 6 Cutin miphun pakhat cu a dang miphun in a tisiat ih, khua pakhat cu a dang khua pakhat in, ziangahtile Pathian in anmah cu vanduainak phunkim in a buaiter hai. 7 Asinan nang cu cak zetin um awla, na kut cak loin umter hlah, ziangahtile na hnaṭuan cu lawmman pek a si ding,» tiah a ti.

8 Cule Asa in hi ṭawngkampawl le profet Oded ih thuphuan mi a theih tikah, thazang a la ih, Judah ram le Benjamin ram hmuahhmuah ihsin le Efraim tlang ram ih a lâk mi khawpipawl ihsin fihnungza milempawl a ṭhawnhlo, cule Jehovah hulhliap ih um Jehovah biakṭheng cu a dinṭhasal.

9 Cun Judah hnám le Benjamin hnám hmuahhmuah, a hnenih khawsa ve, Efraim hnám, Manase hnám le Simeon hnám pawl cu a kokhawm hai, ziangahtile a hnenah Jehovah a Pathian a um ti an hmuh tikah Israel ram ihsin a hnenah mi tam zetin an run pan a si.

10 Asa a lal a kum hleingatnak, thla thumnak ah Jerusalem ah an táwngawkhawm. 11 Cule cuih cān ah an rak lâk mi an ralthillawn lakih câwpa 700 le tuu 7000 cu Jehovah hnenah an hlan. 12 An thinlung zate le an nunnak zate thawn Jehovah an pupápawlih Pathian hawl dingin le, 13 Israel-ih Pathian Jehovah hawl lo tu zokhal a tûm a te, a nu a pa in thah si dingin thukham an tuah. 14 Cun Jehovah hnenah aw ring zetih auin, tawtawrawtpawl thawn, tuupa kipawl thawn thukamnak an la.

15 Cule Judah zaten thukamnak ah lungawiaipuangin an um, ziangahtile an thinlung hmuahhmuah in sia an săm ih, an duhnak hmuahhmuah in amah cu an hawl. Cule amah cu an hmu ih, Jehovah in kil i kip ah cawlhhahdamnak a pe hai.

16 Cuihhleiah Asherah bawrhhlawh a tuah ruangah siangpahrang Asa-ih nu Maakah cu siangpahrang bawinu sinak ihsin a hlăwn, Asa in a milim bawrhhlawh cu a hauthlu, cun a săwprăwpter ih Kidron tivate kiangah a ur. 17 Asinan Israel ram ih hmun sângpawl cu ṭhawnhloh an si cuang lo. Cuticingin Asa-ih thinlung cu a nunsung hmuah in a rinum thotho.

18 Cuihtlunah a pa ih a rak serhhran mi thilpawl le amah ih a rak serhhran mi: ngun, sui le bungbelpawl cu Pathian inn sungah a thiarlut. 19 Cule Asa ih a lal a kum 35-nak tiang doawknak a um lo.

16

Asa in Siria a Rinsan

1 Asa a lal a kum 36-nak ah, Israel siangpahrang Baasha cu Judah do dingin a hung so, cule Judah siangpahrang Asa hnen lamah zohman suak le lut thei lo dingin Ramah khua cu a dĭn. 2 Cun Asa in Jehovah inn le siangpaharng inn ih hlawnthilpawl lak ihsin sui le ngun a phawrhsuak ih, Damaskas ih cêng Siria siangpahrang Ben-Hadad a kuat ih, 3 «Na pa le ka pa karlakih a um vekin, nangmah le keimah karlak khalah thukham um ve seh. Zoh hnik, sui le ngun ka lo kuat, ka hnen ihsin a sīp theinak dingah, ra aw, Israel siangpahrang Baasha thawi nan thukham ṭhiat aw,» tiah a ti.

4 Ben-Hadad in siangpahrang Asa cu a ngaithla ih, Israel khawpipawl do dingin a ralkap bawipawl a thlah. Annih in Ijon, Dân, Abel Maim le Nafthali ram ih thilri khawlnak khawpipawl hmuahhmuah an bei thluh. 5 Cule hitin a si, Baasha in cuih thu a theih tikah, Ramah a sak lai cu a cawl ih a hnaṭuan a bansan. 6 Cun siangpahrang Asa in Judah-mi hmuahhmuah a hruai ih, Baasha in a hman mi Ramah ihta lungtopawl le thingpawl an thiar, cule cupawl thawn anih in Geba le Mizpah a dĭn.

7 Cule cuih cān ah Judah siangpahrang hnenah hmutu Hanani a ra ih a hnenah, «Jehovah na Pathian parah ṭhumaw loin, Siria siangpahrang parih na ṭhumawk ruangah, Siria siangpahrang ralkappawl cu na kut ihsin an tlânsuak a si. 8 Kush-mipawl le Libia-mipawl cu ránglêng tam zet thawn ralkap rual tam ngaingai le rángtothiam tam zet an si lo sawm? Sikhalsehla Jehovah parih na ṭhumawk ruangah na kut ah anmah a lo pe a si. 9 Ziangahtile amah lamih thinlung rinumpawl hnenih a cakzia langter dingin leilung pumpuluk ah Jehovah mit cu a lengvēl a si. Himi thuhla ah â zetin na rak cāngvai. Curuangah atu thăwkin ral do ding na nei thlang ding,» tiah a ti. 10 Cun Asa cu hmutu parah a thin a heng ih, amah cu thawng a thlak, ziangahtile hi thu ruangah hmutu parah Asa a thin a so. Cule Asa in cuih cān lala ah mi hrekkhat a palbĕt.

Asa Uknak Cemnetnak

11 Ngai hnik, Asa-ih căngvaihnakpawl cu a hmaisabik ihsin a netabik tiangin, ngai hnik, Judah le Israel siangpahrang pawlih cazual sungah ngan an si. 12 Cule siangpahrang a ṭuan kum 39-nak ah, Asa cu a ke ah nat a suak ih, a nat cu a besia zet; Cutiih na cingin Jehovah a hawl cuang lo, cuhnakin sibawipawl a hawl sawn riangri.

13 Cule Asa cu a pupápawl hnenah a itthat; a lal a kum 41-nak ah a thi. 14 David Khawpi ih amai hrangih a tuah mi amai thlān ah an phum, amah cu rimhmui le rimthaw tuahtu in a rawi mi, rimthaw phunphun ih khat ihkhun parah an hlum. A hrangah meipi nasazetin an sēp.

17

Siangpahrang Jehoshafat

1 Cun a fapa Jehoshafat cu a aiah a lal ih, Israel dokalhin a ticakaw. 2 Cule Judah ram ih kulh nei khawpipawl hmuahhmuah ah ralkap burpi a ret ih, Judah ram le a pa Asa ih a rak lâk mi Efraim ram khawpipawl ah ṭanhmun kiltu ralkappawl a ret. 3 Hlanlai ih a pa David zin a zawh ruangah Jehovah in Jehoshafat a umpi; Baalpawl a rak hawl lo, 4 Israel căngvaih bangtuk si loin, a pa David-ih Pathian a rak hawl sawn ih, a thupekpawl ah a feh sawn. 5 Curuangah Jehovah in a kut ah lalram a dĭnhnget ih, Judah hmuahhmuah in Jehoshafat hnenah laksawng an rak pe, cule anih in lennak le upatnak cu nasazetin a nei. 6 Cule Jehovah lamzin ah a thinlung a nuamaw, cuihtlunah Judah ram ihsin hmun sângpawl le Asherah-pawl a ṭhawnhlo.

Jehoshafat a Ropi Deuhdeuh

7 Cun a lal a kum thumnak ah a ralbawi: Benhail, Obadiah, Zekariah, Nethanel le Mikaiah pawl cu zirh dingin Judah khuapawl ah a thlah hai. 8 Cule an zawngah Levi-mi: Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah le Tobadonijah, Levi-mipawl, cule an zawngah puithiam Elishama le Jehoram khal an tel. 9 Judah ram ah an zirh, cule Jehovah Dān Cazual cu an hnenah a um; Judah ram ih khawpipawl hmuahhmuah hrawhsuakin an feh ih, mipi an zirh vivo.

10 Cule Judah ram kiangkapih um lalrampawl hmuahhmuah ah Jehovah ṭihnak a thleng, cutin Jehoshafat dokalhin ral an tho lo. 11 Filisṭia-mi mi hrekkhat in Jehoshafat hnenah ngunkhuai ah laksawng le ngun an rak keng; cule Arabia-mipawl in ranpi rual, tuucang 7700 le mecang 7700 an rak ken.

12 Cutin nasazetin Jehoshafat cu a ṭhangso sinsin ih, Judah ram ah kulhhngetpawl le thilri khawlnak khuapawl tla a sak. 13 Judah khawpipawl ah thil tampi a nei ih, Jerusalem ah ral do thiampawl, micak ralṭhapawl tla a nei.

14 An pupápawlih sungza zulhin an mipum cu hipawl hi an si: Judah hnám ih a thawng hotu ralbawipawl cu; an ralbawi cu Adnah a si ih, a hnenah micak ralṭha ting thum an um; 15 cule a sangtu ah ralbawi Jehohanan a si ih, a hnenah ting hnih le thawng sawmriat an um; 16 cule a sangtu ah Jehovah hnenih palungsuakih hlanaw, Zikri fapa Amasiah a si ih, a zawngah, micak ralṭha ting hnih an um. 17 Benjamin hnám ihsi ralbawi cu micak ralṭha Eliada a si ih, a hnenah thál le ralphaw thawn ting hnih an um; 18 cule a sangtu cu Jehozabad a si ih, a hnenah ting khat le thawng sawmriat cu ral do ding tiar cia-in an um. 19 Hipawl hi Judah ram pumpuluk hmuahhmuah ih kulh nei khawpipawl ih siangpahrang in a ret hai mi telh loin, siangpahrang riantu an si.

18

Jehoshafat in Ahab thawn Ṭantlangnak a Tuah

1 Jehoshafat in lennak le upatnak nasazet a co ih, ṭhitawknak hmangin Ahab thawn an ṭangtlang. 2 Kum tawkfang a rei hnuah Samaria ah Ahab leng dingin a vung feh. Cule Ahab in Jehoshafat hrang le a hnenih um mipi hrangah tuu le câw tam ngaingai a rak that, cule Ramoth Gilead do dingah a zawngih feh dingin a sawm. 3 Israel siangpahrang Ahab in Judah siangpahrang Jehoshafat hnenah, «Ramoth Gilead do dingin ka zawngah na feh pei maw?» tiah a ti.

Cule Jehoshafat in, «Kei cu nangmah tluk ka si ih, ka mipawl cu na mipawl tluk an si, raldonak ah na hnenah kan um ding,» tiah a ti.

4 Cuihtlunah Jehoshafat in Israel siangpahrang hnenah, «Zangfahten tuihsun ah Jehovah kamsuakthu sut aw,» tiah a ti.

5 Cun Israel siangpahrang in profetpawl a kokhawm hai ih, mipa 400 an si, cule an hnenah, «Ramoth Gilead do dingin kan feh pei maw, kan sīp ding saw?» tiah a ti.

Annih in, «Fehso uh, ziangahtile Pathian in siangpahrang kut ah annih cu a pe ding,» tiah an ti.

6 Asinan Jehoshafat in, «Kan răwn theinak dingah, hi tawkah Jehovah-ih profet pakhat tal an um hrih lai lo maw si?» tiah a ti.

7 Israel siangpahrang in Jehoshafat hnenah, «Amah hmangih Jehovah kan suh theinak ding mi pakhat cu a um lai; asinan anih cu ka hua, ziangruangahtile ka thuhla ah a ṭha lam a phuang dah lo, a se lam lawnglawng a phuang ṭheu. Amah cu Imla fapa Mikaiah a si,» tiah a ti.

Cule Jehoshafat in, «Siangpahrang in cuvek thil ṭawng hlah seh!» tiah a ti.

8 Cun Israel siangpahrang cun a bawipawl lakih pakhat a ko ih, «Imla fapa Mikaiah cu zamrangten va hruai aw!» tiah a ti.

9 Israel siangpahrang le Judah siangpahrang Jehoshafat cu an kâwrfual hruhin an laltokham par veve ah an to; Samaria kăwtsuah ih hruihhmun ah an to, cule profetpawl hmuahhmuah in an hmaiah thu an phuang. 10 Kenaanah fapa Zedekiah in amai hrangah thir kipawl a tuah, cule, «Jehovah in hitin a ti: ‹Hipawl thawn an siatrál hlanlo Siria-mipawl na khît ding a si,› tiin,» tiah a ti.

11 Cule profetpawl hmuahhmuah in cutivek hlir in an phuang, «Ramoth Gilead ah so uhla, hmuingil uh, ziangahtile Jehovah in siangpahrang kut ah a pe ding a si,» tiah an ti.

12 Cun Mikaiah ko dingih fehtu palai in a hnenah, «Ngai hnik, profetpawlih ṭawngkam cun thu khat kengin siangpahrang tha an pe. Curuangah zangfahten, na ṭawngkam cu anmahpawl lakih pakhat vek si sehla, thapeknak rel aw,» tiah a ti.

13 Cule Mikaiah in, «Jehovah a nun rori bangin, ka Pathian ih a sim mi ka sim ko ding,» tiah a ti.

14 Cun anih cu siangpahrang hnenah a feh ih, siangpahrang in a hnenah, «Mikaiah, Ramoth Gilead do dingin kan so pei maw, kan sīp ding saw?» tiah a ti.

Cule anih in, «Feh uhla hmuingil uh, anmah cu nan kut ih pek an si ding!» tiah a ti.

15 Cule siangpahrang in a hnenah, «Thutak siarlo ka hnenah Jehovah hmin ih sim lo dingin vei ziang zat meng so sia ka lo sămter ding?» tiah a ti.

16 Cun Mikaiah in, «Israel zaten khāltu nei lo tuu bangin tlang parah ṭekdarhin ka hmu. Cule Jehovah in, ‹Hipawl in hotu an nei lo. Mi kip mai inn cio ah hnangamten tlungkir hai seh,› a ti,» tiah a ti.

17 Cule Israel siangpahrang in Jehoshafat hnenah, «Keimai thuhla ah anih in thil ṭhalo siarlo, thil ṭha a phuang lo ding ka lo ti a si lo maw?» tiah a ti.

18 Cun Mikaiah in, «Curuangah Jehovah kamsuakthu ngaithla uh: Jehovah cu a laltokham parih to-in, van mipi hmuahhmuah a vawrh lam le a keh lamih dingin ka hmu. 19 Cule Jehovah in, ‹Israel siangpahrang Ahab hi Ramoth Gilead ih hung so ih, hung thi dingin zo in a lēm pei?› tiah a ti. Cule mi pakhat in, hitin a ti ih, a dang in, cutin a ti. 20 Cun thlarau pakhat hmaiah a ra suak ih, Jehovah hmaiah a ding ih, ‹Kei in amah cu ka lēm ding,› tiah a ti. Jehovah in a hnenah, ‹Ziangti zawngin?› tiah a ti. 21 Cule anih in, ‹Ka fehsuak ding ih a profetpawl hmuahhmuah ih kâ ah thuphan per thlarau ka si ding,› tiah a ti. Cun Jehovah in, ‹Amah cu na lēm pei ih, na neh fawn ding; fehsuak awla cuticun tuah aw,› tiah a ti. 22 Curuangah ngai hnik! Jehovah in hi na profetpawlih kâ ah thuphan per thlarau a ret ih, Jehovah in na parah siatnak a than a si,» tiah a ti.

23 Cun Kenaanah fapa Zedekiah in a rak naih ih, Mikaiah biang ah a bĕng, cule, «Na hnenih thusim dingin Jehovah thlarau cu ka hnen ihsin khui lamah so a feh?» tiah a ti.

24 Cun Mikaiah in, «Ngai hnik, relh dingin pindan sungta ih na luh ni ah na thei ding,» tiah a ti.

25 Cun Israel siangpahrang in, «Mikaiah cu hruai uhla, khawpi uktu Amon le siangpahrang fapa Joash hnenah fehkirpi uh; 26 cule, ‹Siangpahrang in hitin a ti: «Hi pa hi thawng ah thlak uhla, hnangamteih ka ra tlunkir hlanlo, zăwnzaihnak rawl le zăwnzaihnak tidai pe uh,» a ti,› tiin,» a ti.

27 Asinan Mikaiah cun, «Hnangamten na ra tlungkir asile, Jehovah in keimah hmangin thu a sim lo a si ding,» tiah a ti. Cule anih in, «Nannih mipi hmuahhmuah tla, fimkhur uh,» tiah a ti.

28 Cule Ramoth Gilead ah Israel siangpahrang le Judah siangpahrang Jehoshafat cu an hung so. 29 Israel siangpahrang in Jehoshafat hnenah, «Ka danglamawter ding ih doawknak ah ka feh ding, asinan nang cun na kâwrfual hruh aw,» tiah a ti. Cuticun Israel siangpahrang cu a danglamawter ih, doawknak ah an feh.

30 Cun Siria siangpahrang in a hnenih um a ránglêng hotupawl hnenah, «Israel siangpahrang siarlo mitûm siseh, mite siseh do hlah uh,» tiin thu a rak pe.

31 Cule hitin a si, ránglêng hotupawl in Jehoshafat an hmuh tikah, «Hihi Israel siangpahrang a si!» tiah an ti. Curuangah amah do dingin an kulh. Asinan Jehoshafat cu a ausuak ih, Jehovah in amah cu a bawm, cule Pathian in anmahpawl cu Jehoshafat hnen ihsin a pialter hai. 32 Cule hitin a si, ránglêng bawipawl in cumi cu Israel siangpahrang a si lo ti an hmuh tikah, amah dawinak ihsin an kirsal.

33 Cun mi pakhat in hmuitin nei loin a thál a nawp ih, Israel siangpahrang cu a ralthuam pehawknakpawl karlakah a saingah. Cule siangpahrang in a ránglêng mâwngtu hnenah, «Her awla, doawknak ihsin i suahpi aw, ziangahtile tuahmawh ka si aw,» tiah a ti. 34 Cuih ni ah doawknak cu a nasatuk ih, Israel siangpahrang cu Siria-mipawl lam hawiin a ránglêng ah tlai lam tiang a ding ih nitlak zawngah a thi.

19

1 Cun Judah siangpahrang Jehoshafat cu hnangamten Jerusalem ih amai inn ah a tlungkir. 2 Cule Hanani fapa hmutu Jehu cu amah táwng dingin a păwksuak ih, Siangpahrang Jehoshafat hnenah, «Misualrál cu bawm in Jehovah huatu cu na duhdawt ding maw si? Curuangah Jehovah thinlingnak cu na parah a um. 3 Cutisikhalsehla hi ram ihsin Asherah-pawl na ṭhawnhlo ih, Pathian hawl dingin na thinlung na timtuah ruangah nangmah ah thil ṭha hmuh an si,» tiah a ti.

Jehoshafat in Hotupawl a Ruat

4 Cule Jehoshafat cu Jerusalem ah a cêng ih Beersheba ihsin Efraim tlang ram mipi lakah a fehsuaksal, cule an pupápawlih Pathian Jehovah hnenah annih cu a hruaikirsal hai. 5 Cun Judah ram ih kulhhnget khawpipawl hmuahhmuah, khawpi pakhat hnu pakhat ah laireltupawl a ret vivo ih, 6 an hnenah, «Nan tuah mi ah fimkhur uh, ziangahtile minung hrangah thu nan ṭhen lo, cuhnakin thuṭhennak ih a lo umpitu Jehovah hrangah thu nan ṭhen sawn a si. 7 Curuangah atu ah, Jehovah ṭihzahnak cu nan parah um seh; fimkhur in thil ti uh, ziangahtile Jehovah kan Pathian ah dingfellonak a um lo, thleidănnak khal a um lo ih, nawhthuh lâknak a um fawn lo,» tiah a ti.

8 Cuihtlunah Jerusalem ih an tlunkir tikah, Jehoshafat in Jerusalem ah Jehovah thuṭhennak hrang le elbuaiawknak hrangah Levi-mi mi hrekkhat, puithiampawl le Israel pupápawlih lubân hrekkhat a ruat. 9 Cule anih in an hnenah, «Hitivekin Jehovah ṭihzahnak ah rinum zetin le thinlung takin nan tuah pei: 10 anmai khua cio ih um nan unaupawl lak ihsin ziang vek thubuai khal siseh nan hnenah, thisen suahawk thu maw, dān le thupek dokalhih thilsual tuahnak maw, sakhaw dānpawl le cīn le dān dokalhnak simaw a thleng asile, Jehovah dokalhin thil an tisuallonak dingah ralrinnak pe hai uh, culole nan parah le nan unaupawl parah thinlingnak a thleng pang ding. Cumi cu tuah uhla, mawh nei lo nan si ding. 11 Cule ngai hnik uh, Jehovah thuhla hmuahhmuah ah puithiam sâng Amariah cu nan tlunah a um; cule siangpahrang thuhla hmuahhmuah hrangah Ishmael fapa Zebadiah, Judah sungza uktu a um; Levi-mipawl khal nan hmaiah hotu an si ding. Ralṭha zetin tuah uhla, miṭhapawl cu Jehovah in a umpi hai ding,» tiah thu a pe.

20

Jehoshafat in Moab le Ammon a Do

1 Himi hnuah hitin a si, Moab-mipawl le Ammon-mipawl cu Jehosafat do dingin an ra. Ammon-mipawl hleiah mi dangpawl khal an zawngah an ra ve. 2 Cun mi hrekkhat an ra ih Jehoshafat hnenah, «Nangmah do dingin mipi tam ngaingai tifinriat ralkhat, Siria ihsin an ra, ngai hnik, anmah cu En Gedi ti mi Hazazon Tamar ah an um,» tiah an sim. 3 Cule Jehoshafat cun a ṭih ih, Jehovah hawl dingin a timtuahaw, cule Judah ram hmuahhmuah ah rawlulh a phuang. 4 Cutin Judah cu Jehovah hnenih băwmnak dil dingin hmunkhatah an fĭnnaw ih, Jehovah hawl dingin Judah khawpi hmuahhmuah ihsin an ra.

5 Cun Jehoshafat cu Jehovah inn, tualrawn thar hmaiah, Judah le Jerusalem ih mipungkhawm lakah a ding, 6 cule, «Maw Jehovah, kan pupápawlih Pathian, nangmah cu van Pathian na si lo maw? Miphunpawlih lalram hmuahhmuah tlunih uktu na si lo maw? Na kut ah thiltitheinak le cahnak a um, curuangah zohman in an lo do thei lo a si lo maw? 7 Na mi Israel hmaiah hi ram luahtupawl hnawhsuak ih, na rual Abraham tesinfapawl hnenih kumkhaw hrangih petu cu nangmah kan Pathian na si lo maw? 8 Cule a sungah an cêng ih, cuih hmun ah na hmin hrangah hmun thianghlim an lo saksak, 9 ‹Kan parah thil ṭhalo: ralnâm, dāntatnak, nathrisia le mangṭam a thlen asile, na hmaika-ah hi temple hmaiah kan ding ding, ziangahtile na hmin cu hi temple ah a um ih, na hnenah kan zăwnzaihnak ihsin kan au ding, cule nang in na thei ding ih in run ding,› tiah an ti ṭheu. 10 Cule atu ah ngai hnik, Israel-mipawl Izip ram ihsin an ra suah tikah, nang in Israel-mipawl kha Ammon-mipawl le Moab-mipawl le Seir Tlang lâk ding na sĕn hai lo. Cumi aiah cupawl hnen ihsin an pial ih, an tisiat lo. 11 Zoh hnik, annih in in lehrūl a si hi! Annih cu nang in ro ih co dingih in pek mi na neih mi ihsin in dawisuak dingin an ra. 12 Maw kan Pathian, anmah thu na ṭhen hai lo ding maw? Ziangahtile kanmah do dingih ra hi mipi tam zet hmaiah thiltitheinak kan nei lo, ziang tuah ding ti khal kan thei lo, asinan kan mit cu na parah a fu a si,» tiah a ti.

13 Judah-mi hmuahhmuah cu an fanau tete, an nupipawl le an fātepawl thawn Jehovah hmaiah an ding.

14 Cun mipungkhawm lakah, Levi mi Asaf tefa lakih Mattaniah fapa, Jeiel fapa, Benaiah fapa, Zekariah fapa Jahaziel parah Jehovah Thlarau a rung thleng. 15 Cule anih in, «Nannih Judah-mi hmuahhmuah le nannih Jerusalem luahtupawl le nang, Siangpahrang Jehoshafat, rak ngai hnik uh! Jehovah in nan hnenah hitin a ti: ‹Hih mipi tam zet ruangah ṭih hlah uhla, thlaphângin um fawn hlah uh, ziangahtile doawknak cu nan ta a si lo, Pathian ta a si sawn a si. 16 Thaisun ah anmah do dingin suk uh. Ngai hnik uh, Ziz sohnak ihsin an ra so ding ih, Jeruel Ramṭhing hmai kâwrte netnak ah nan hmu hai ding. 17 Hi doawknak ah nan do a ṭul lo ding. Tlar aw uh, daiten ding men uhla, a lo umpitu Jehovah-ih runsuahnak hi zoh uh, Maw Judah le Jerusalem!› tiin. Ṭih hlah uhla, thlaphângin um fawn hlah uh; thaisun ah anmah do dingin fehsuak uh, ziangahtile Jehovah in a lo umpi a si,» tiah a ti.

18 Cule Jehoshafat cu a hmai lei lam hawiin a lu a kûn ih, Jehovah bia-in Judah-mi zate le Jerusalem luahtupawl zate cu Jehovah hmaiah an kûn. 19 Cun Levi-mipawl lak ihsin Kohat tefapawl le Korah tefapawl cu aw nasazetih ringin Israel-ih Pathian Jehovah thangṭhat dingin an ding.

20 Zingpit ten an tho ih Tekoa Ramṭhing ah an feh; cutiih an fehsuak tikah, Jehoshafat cu a ding ih, «Maw Judah-mipawl le nannih Jeusalem luahtupawl i ngai hnik uh: Jehovah nan Pathian rinsan uh, cule dĭnhngeh nan si ding; a profetpawl rinsan uh, cule nan hmuingil ding,» tiah a ti. 21 Cule mipi thu a ráwn hnuah, ralkappawl hmaiah feh phahih Jehovah hnenih hla saktu dingpawl le a thianhlimnak mawizia thangṭhattu dingpawl a ruat:

«Jehovah cu thangṭhat uh,
Ziangahtile a zahngainak cu kumkhuain a hmun,»

tiin.

22 Cun hla sak le thangṭhat an thăwk tikah, Judah do dingih ra, Ammon-mipawl, Moab-mipawl le Seir Tlang mipawl dokalhih bawhtu ding Jehovah in a ret; cule annih cu neh an si. 23 Ziangahtile Ammon-mipawl le Moab-mipawl cu Seir Tlang luahtupawl that verver le siatsuah dingin an ding. Seir luahtupawl an thah thluh tikah, anmah le anmah thataw dingin an doaw.

24 Judah-mipawl ramṭhing căwnnak hmun an thlen tikah, mi senpi lam cu an vun cuan; cule ngai hnik, leilung ah an mithi ruangpawl an rīl teptep ih, zohman a luatsuak an um lo.

25 Jehoshafat le a mipawl cu ralthillawn la dingih an rat tikah, cupawl lakah thil mankhung tam ngaingai cu mithi ruangpawl parah an va hmu, cule anmai hrangih an phawihsuak mi ceiawknak thil mankhung zetzet pawl, an phurh theih lo tiangih tam in an la; cule a tam tuk ruangah ralthillawn cu ni thum sung an nâwl. 26 Cule ni litnak ah Berakah Phaikuam ah an pungkhawmaw, ziangahtile cu tawkah Jehovah an thangṭhat; curuangah cuih hmun cu Berakah Phaikuam tiin tuihni tiangih kawh a si. 27 Cun Judah mipa pauhpauh le Jerusalem mipa pauhpauh cu an tlungkir; Jehoshafat in Jerusalem ih aipuang zetih tlungkir dingin hmai a hruai, ziangahtile Jehovah in an ralpawl parah lungawiaipuang dingin a tuah hai. 28 Cun Jerusalem ah hri nei tum mipawl, ṭingṭangpawl le tawtawrawtpawl thawn Jehovah inn ah an feh. 29 Cule Israel doralpawl Jehovah in a do ti an theih tikah, cuih rampawlih lalram zate parah Pathian ṭihnak a um. 30 Cun Jehoshafat-ih lalram cu ralmuangin a um, ziangahtile kil i kip ah a Pathian in cawlhhahdamnak a pe.

Jehoshafat-ih Uknak Cemnetnak

31 Jehoshafat cu Judah tlunah siangpahrang a ṭuan. Siangpahrang a can tikah amah cu kum 35 a si ih, Jerusalem ah kum 25 sung a lal. A nuih hmin cu Azubah a si ih, Shilhi fanu a si. 32 Cule a pa Asa zin a zawh ih, cumi ihsin a pial lo, Jehovah mithmuhah thildik a tuah. 33 Sikhalsehla hmun sângpawl cu lakhloh an si lo, ziangahtile mipi cu an pupápawlih Pathian lamah an thinlung an rak timlam lo. 34 Jehoshafat-ih căngvaihnak dangpawl a hmaisabik ihsin a netabik tiang, ngai hnik, Hanani fapa Jehu-ih cazual sungah ngan an si, cucu Israel siangpahrangpawlih cazual sungah a cuang.

Jehoshafat le Ahaziah Hawipiawknak

35 Himi hnuah Judah siangpahrang Jehoshafat cu sualrál zetih cāngvaitu Israel siangpahrang Ahaziah a kăwp. 36 Cule Tarshish ih feh ding lăwng tuah dingin amah cu a kăwp ih, Ezion Geber ah lăwngpawl an tuah. 37 Asinan Mareshah-mi Dodavah fapa Eliezer in Jehoshafat dokalhin thu a phuang, «Ahaziah na kăwp ruangah, Jehovah in na hnaṭuanpawl a tisiat a si,» tiin. Cun lăwngpawl cu an kuai, cutin Tarshish ah an feh thei lo.

21

Siangpahrang Jehoram

1 Cule Jehoshafat cu a pupápawl hnenah a cawl ih, David Khawpi ah a pupápawl hnenih phum a si. Cun a fapa Jehoram cu a aiah a lal.

2 Anih cun unau a nei, Jehoshafat fapa a si mi: Azariah, Jehiel, Zekariah, Azariahu, Maikal le Shefatiah tla an si; hipawl hmuahhmuah hi Judah siangpahrang Jehoshafat-ih fapapawl an si. 3 An pa in thilpek ropi ngun, sui le thil mankhungpawl a pe hai, Judah ram ih kulh nei khawpipawl thawn; asinan lalram cu Jehoram a pe, ziangahtile anih cu fatir a si. 4 Jehoram cu a paih lalram tlunih dĭnhngeh a si tikah, a ticakaw ih ralnâm in a unau mipa zaten a that ih Israel mizahum hrekkhat khal a that.

5 Siangpahrang a hung si tikah Jehoram cu kum 32 a si ih, Jerusalem ah kum riat sung a lal. 6 Cule Ahab sungza ih an rak tuah vekin, anih cun Israel siangpahrangpawlih lamzin a zawh, ziangahtile nupi ah Ahab fanu a nei; Jehovah mithmuhah thil ṭhalo a tuah. 7 Cucingin Jehovah in David sungza cu a siatbăl duh lo, David thawi thukham a tuah mi ruangah le a fapapawl le amah parah kumkhuain meito pek a rak tiamkam ruangah a si.

Edom Helnak

8 Amai san ah Edom cu Judah-ih thuneihnak dokalhin a hél ih, anmah uktu ding siangpahrang an tuah. 9 Cule Jehoram cu a bawipawl le a hnenih um a ránglêngpawl hmuahhmuah thawn a fehsuak. Cule zan laiah a tho ih amah kulhtu Edom-mipawl le rangléngpawl hotupawl cu a do. 10 Cutivekin tuihni tiangin Edom cu Judah-ih thuneihnak dokalhin a hél. Cuih cān ah a uknak cu Libnah khal in a dokalh, ziangahtile Jehovah, a pupápawlih Pathian a thlauthla.

11 Cuihtlunah Judah tlangpawl parah hmun sângpawl a tuah ih, Jerusalem luahtupawl hlawhhlannak a tuahter hai, cule cu tawkah Judah a hruailut.

Elijah Cakuat

12 Cule profet Elijah hnen ihsin a hnenah cakuat a ra thleng,

«Na pa David-ih Pathian, Jehovah in hitin a sim:

‹Na pa Jehoshafat lamzin le Judah siangpahrang Asa lamzin na zawh lo ih, 13 Israel siangpahrangpawlih lamzin na zawh sawn ih, Judah le Jerusalem luahtupawl cu Ahab sungza hlawhhlannak vekin hlawhhlannak na tuahter hai ih, na paih sungkua nangmah hnakih ṭhasawn na unaupawl na thah hai ruangah, 14 ngai hnik, Jehovah in na mipawl, na fapapawl, na nupipawl le na neih mi zaten hremnak nasazetin a vaw ding; 15 cule rilnat thawn bese zetin na na ding, cuih natnak ruangah na rilpawl păwtsuak tiangin ni tin na na ding,› a ti,» tiin.

Jehoram-ih Uknak Cemnetnak

16 Cuihtlunah Jehovah in Jehoram dokalh zawngin Filisṭia-mipawl lungthin le Ethiopia-mipawl kiangih um Arab-mipawl a căwktho. 17 Cule annih cu Judah ram ah an hung so ih, an sîm, cule siangpahrang inn ih an hmuh mi thil hmuahhmuah an la ṭheh, a fapapawl le a nupipawl khal; cutin a fapapawl lakih a fapa nautabik Jehoahaz siarlo a hnenih tān mi fapa an um lo.

18 Hipawl hmuahhmuah hnuah, Jehovah in amah cu tidam theih lo rilnat in a vua. 19 Cun cuih cān sungah hitin a si, kum hnih a liam hnuah, a natnak ruangah a ril an pawtsuak; cule nâ ti zetin a thi. Cule a mipawl in a pupápawl hrangih meipi an sēp vekin a hrangah meipi an sēp ve lo.

20 Siangpahrang a hung si tikah amah cu kum 32 mi a si ih Jerusalem ah kum riat sung a lal. Cun zohman ih ui loin a fehliam. Cule amah cu David Khawpi ah an phum, asinan siangpahrangpawlih thlān ah cun a si lo.

22

Siangpahrang Ahaziah

1 Cun Jerusalem luahtupawl in a fapa nautabik Ahaziah cu a aiah siangpahrang ah an tuah, ziangahtile Arab-mipawl thawi ra mirămtupawl in ṭanhmun khuarnak ah fapa upa zaten an that. Cutin Judah siangpahrang, Jehoram fapa Ahaziah in a uk. 2 Siangpahrang a can tikah, Ahaziah cu ^akum 22 mi a si, Jerusalem ah kum khat a lal. A nuih hmin cu Athaliah a si ih, Omri fanu a si. 3 Anih khal Ahab sungza lamzin a zawh, ziangahtile a nu in sualrál zetih tuah dingin ruahnak a pe. 4 Curuangah Ahab sungza bangin Jehovah hmaiah thil ṭhalo a tuah, ziangahtile anmah cu amai siatralnak ah a paih thih hnuah a thurawnpetu an si.

22:2^a kum 22: Hebru ah cun kum 42 ti a si, asinan 2Sp 8:26 ah kum 22 ti a si. Cun Septuagint kutngan ca hrekkhat khal ah kum 22 ti a si.

Ahaziah Thihnak

5 An ruahnakpek mi khal a thlun ih, Ramoth Gilead ah Siria siangpahrang Hazael do dingin Israel siangpahrang Ahab fapa Jehoram zawngah a feh; cule Siria-mipawl in Joram hriamhma an putter. 6 Cun anih cu Siria siangpahrang Hazael a do tikih, Ramah ih a ngah mi hriamhma dam dingin Jezreel ah a tlungkir. Cule Judah siangpahrang Jehoram fapa Ahaziah cu Jezreel ah Ahab fapa Jehoram a nat ruangah veh dingin a suk.

7 Ahaziah-ih tlûknak cu Joram hnenih a va fehnak ihsin thleng dingin Pathian in a ruat, ziangahtile a thlen tikah, Ahab sungza that dingin Nimshi fapa Jehovah ih hriak thih Jehu táwng dingin Jehoram zawngah a fehsuak. 8 Cule hitin a si, Ahab sungza parih dāntatnak Jehu in a tuah laiah, Judah mizahumpawl le Ahaziah riantu Ahaziah unaupawlih fapapawl a hmu hai ih, a that hai. 9 Cun anih in Ahaziah a hawl. Samaria ih a relh laiah, amah cu an kai. Cun Jehu hnenah amah cu an hruai ih, an that. Cule an phum, ziangahtile, «Anih cu a thinlung hmuahhmuah ih Jehovah hawltu, Jehoshafat fapa a si,» tiah an ti. Cutin Ahaziah sungza in lalram kaitāngtu ding a nei lo.

Siangpahrang Joash

10 Ahaziah nu Athaliah in a fapa a thi ti a hmuh tikah, a tho ih Judah siangpahrang cikuang hmuahhmuah a that thluh. 11 Asinan Ahaziah fapa Joash cu siangpahrang fanu Jehoshabeath in an thah mi siangpahrang fapapawl lak ihsin a firhlo ih, ihnak pindan sungah amah umtu thawn a ret. Cutin siangpahrang Jehoram fanu Jehoshabeath, puithiam Jehoiada nupi cun Athaliah in a thahlonak dingah a hnen ihsin a rak thup (ziangahtile cu nu cu Ahaziah-ih farnu a si). 12 Cule anih cu kum ruk sung an hnenah Pathian inn ah thuh a si. Cun ram cu Athaliah in a uk.

23

1 Kum sarihnak ah Jehoiada cu a ticakaw ih, ralkap 100 rual uktupawl thawn thukham a tuah: Jehoram fapa Azariah, Jehohanan fapa Ishmael, Obed fapa Azariah, Adaiah fapa Maaseiah, Zikri fapa Elisafat tla an si. 2 Cule Judah ram pumpi ah an fehsuak ih Judah khawpi hmuahhmuah ihsin Levi-mipawl le Israel pupápawlih lubânpawl an fĭnkhawm ih, Jerusalem ah an ra.

3 Cun mipungkhawm zate cun Pathian inn ah siangpahrang thawn thukham an tuah. Cule Jehoiada in an hnenah, «Ngai hnik uh, David fapapawl thuhla Jehovah in a sim vekin siangpahrang fapa in a uk ding. 4 Himi hi na tuah ding mi a si: nannih Sabbath ni ih ra puithiampawl le Levi-mipawl lakih ṭhen thum ṭhen khat pawl in sângkapawl nan kil pei; 5 ṭhen thum ṭhen khat cu siangpahrang inn ah; cule ṭhen thum ṭhen khat cu Kăwtka Lungphum ah, mipi hmuahhmuah cu Jehovah inn tualrawnpawl ah an um pei. 6 Asinan puithiampawl le rawngbawl lai Levi-mipawl siarlo Jehovah inn ah zohman lut hlah hai seh. An thianhlim ruangah annih cu an lut thei, asinan mipi hmuahhmuah cun Jehovah an thlir hrih pei. 7 Cule Levi-mipawl in kil kip in siangpahrang an kulh pei, mi kip an kut ah anmai hriamnâm thawn; cule zokhal inn sungih luttu cu thah si seh. Nannih cu siangpahrang a luh le a suah tikah a zawngah nan um ding a si,» tiah a ti.

8 Cule Levi-mipawl le Judah-mipawl hmuahhmuah in puithiam Jehoiada ih thu a pek mi hmuahhmuah bangtukin an tuah. Cule mi tin mai milai cio Sabbath ni ih ṭuanvo nei ding le Sabbath ni ih cawl ding pawl cu an hruai; ziangahtile puithiam Jehoiada in ṭuanvo nei burṭhenpawl cu a tlungter hai lo. 9 Cule Pathian inn sungih Siangpahrang David ih neih cia mi feipawl le ralphaw a tûm le a te pawl cu a ralkap 100 rual hotupawl hnenah puithiam Jehoida in a pe. 10 Cun mipi zaten, mi kip mai hriamnâm cio mai kut ciar ah kengin, temple vawrh lam kap ihsin keh lam kap tiang, Biakṭheng kiang le temple kiangah, siangpahrang kimvel hmuahhmuah ah a ret. 11 Cule siangpahrang fapa cu an rak hruaisuak ih, lallukhum an khumter, cule Thutheihpinak an pe ih, amah cu siangpahrang ah an tuah. Cun Jehoiada le a fapapawl in amah cu hriak an thih ih, «Siangpahrang cu a nunkhua sau hram seh!» tiah an ti.

12 Athaliah in mipi tlânthawm le siangpahrang thangṭhat thâwm a theih tikah, mipi hnen Jehovah inn ah a ra. 13 Cu nu in a zoh tikah, ngai hnik, siangpahrang cu luhnak ah amai ṭhuam kiangah a ding, cule mizahumpawl le tawtawrawt phawtupawl cu siangpahrang kiangah an um. Cuih ram mipi zaten lungawiaipuangin le tawtawrawt phawin, hla saktupawl khal awnmawi hmanruapawl thawn thangṭhat hla an hruai. Cule Athaliah in a hnipuan a thlek ih, «Phiarthupnak, phiarthupnak!» tiah a ti.

14 Cule puithiam Jehoiada in ralkappawl tlunih a ret mi, ralkap 100 rual uktupawl cu a hruaisuak hai ih an hnenah, «Hi nu hi kiltupawl lakah hruaisuak uh, cule zokhal amah thluntu cu ralnâm ih thah si seh,» tiah a ti. Ziangahtile puithiam in, «Jehovah inn ah cu nu cu that hlah uh,» tiah a ti.

15 Cun cu nu cu an kai ih, siangpahrang inn kiang Ráng Kăwt luhnak lamzin ihsin an hruai ih cu tawkah an that.

Jehoiada in Temple a Tifel

16 Cun Jehoiada in amah le mipi zate le siangpahrang karlakah Jehovah milai si dingin thukham a tuah. 17 Cule mipi zaten Baal temple ah an feh ih, an ṭhiatbăl. A biakṭhengpawl le a milimpawl cip nêknêkin an khuai ih, biakṭhengpawl hmaiah Baal puithiam Mattan an that. 18 Cuihtlunah David in a rak ruat vekin, lungawiaipuang le hla saknak thawn Mosi Dān ih ngan a si vekin Jehovah-ih Meiur Thilhlănpawl hlan dingah, Jehoiada cun David in Jehovah inn hrangih a ruat mi, Levi-mi puithiampawl kut hmangin Jehovah inn kiltu a ruat. 19 Cule ziangti zawng khalih mithiang lo an luh theilonak dingah, anih in Jehovah inn kăwtkapawl ah kiltupawl a ret.

20 Cun anih in 100 rual uktu ralbawipawl, mizahumpawl, mipi uktupawl le ram mipi zaten a hruai hai ih siangpahrang cu Jehovah inn ihsin a hruaisuk; cule Tlunta Kăwt ihsin siangpahrang inn ah an feh, cun siangpahrang cu lalram tokham parah an toter. 21 Cutin cuih ram mipi hmuahhmuah cu lungawiaipuangin an um, cule Athaliah cu ralnâm in an rak thah zo ruangah khawpi cu ralmuangin a um.

24

Siangpahrang Joash

1 Joash cu siangpahrang a can tikah kum sarih mi a si ih, Jerusalem ah kum 40 sung a lal. A nuih hmin cu Zibiah a si ih, Beersheba-mi a si. 2 Puithiam Jehoiada damsung hmuahhmuah Jehovah mithmuhih thildik Joash in a tuah. 3 Cule Jehoiada in nupi pahnih a ṭhitsak ih, fanupawl le fapapawl a nei.

Joash in Temple a Rĕm

4 Himi hnuah hitin a si, Joash in Jehovah inn rĕmṭha dingin a ruat. 5 Cun puithiampawl le Levi-mipawl a kokhawm hai ih, an hnenah, «Judah khawpipawl ah feh uhla, Pathian inn rĕmnak dingah Israel zate hnen ihsin kum tinten paisa kháwngkhawm uh, cule cuih thu cu zamrang zetin tuah uh,» tiah a ti.

Asinan Levi-mipawl cun zamrangten cumi cu an tuah lo.

6 Cule siangpahrang in puithiam lubik Jehoiada cu a ko ih a hnenah, «Ziangah so Levi-mipawl cu Judah ram le Jerusalem ihsin siah run keng dingih nan phût lo? Jehovah siahhlawh Mosi in Israel mipungkhawm hnenah Theihpinak Puanthlam hrangah cumi cu a phût a si,» tiah a ti. 7 Ziangahtile misualrálnu Athaliah-ih fapapawl in Pathian inn cu an băuh ih Jehovah inn ih serhhran mi thil hmuahhmuah cu Baalpawl hrangah an hmang a si.

8 Cun siangpahrang thupek vekin kuang an tuah ih, cumi cu Jehovah inn kăwt lengah an ret. 9 Cule ramṭhing ah Pathian siahhlawh Mosi in Israel-mipawl a phût mi siah cu Jehovah hrangih run keng dingin Judah ram le Jerusalem ah thuthannak an tuah. 10 Cun hotupawl hmuahhmuah le mipi zate cu lungawiaipuangin an um, an siahpawl cu an run keng ih, a khah hlanlo kuang sungah an thlak. 11 Cule hitin a si, kuang cu Levi-mipawl kut in siangpahrang-ih khawnbawl hnenih ken a si ih, annih in tangka tampi a um ti an hmuh tikah, siangpahrang-ih cangantu le puithiam lubikih khawnbawl cu an ra ih, kuang cu an kawlawngter, cule kuang cu an la ih a hmun ah an retkir. Cutivekcun ni tin an tuah ih, tangka tam ngaingai an khawm.

12 Siangpahrang le Jehoiada in Jehovah inn ih rawngbawlhna ṭuantupawl hnenah cumi cu an pe; cule lungserthiam le lettamapawl cu Jehovah inn dĭnsal dingin le Jehovah inn rĕm dingah thir le dar ṭuantu khal an hlâng. 13 Cun hnaṭuantupawl cun an ṭuan ih, an dĭnṭhatnak hna cu a tluang zet; Pathian inn cu a dinhmun kēl ah an dĭnṭhasal ih, an hngetkhohter. 14 An ṭheh tikah, tangka hlei cu siangpahrang hmai le Jehoiada hmaiah an rak keng. Cumi ihsin Jehovah inn hrangah bungbelpawl, rawngbawlnak le Meiur Thilhlăn hrang bungbelpawl, sui le ngun haidaupawl le bungbelpawl an tuah. Cule Jehoiada damsung hmuahhmuah cu cat loin Jehovah inn ah Meiur Thilhlăn an hlan.

Jehoiada a Thi

15 Jehoiada cu a tar thlang ih, a kum a kim, cule a thi; a thih tikah amah cu kum 130 mi a si. 16 Cule amah cu David Khawpi ah siangpahrangpawl lakah an phum, ziangruangahtile Israel lakah Pathian lam le a inn lam ah thil ṭha a tuah a si.

Joash in Pathian a Hnáwng

17 Jehoiada a thih hnuah Judah hotupawl an ra ih siangpahrang hmaiah an kûn. Cule siangpahrang in a ngaithla hai. 18 An pupápawlih Pathian Jehovah inn an tlansan ih, Asherah-pawl le milempawl an rian. Cule an mawhsualnak ruangah Judah le Jerusalem parah thinlingnak a thleng. 19 Cule Jehovah hnenih kirtersal dingin an hnenah profetpawl a thlah, cule anmah dokalhin an theihter nân, an ngaithla lo.

20 Cun puithiam Jehoiada fapa Zekariah parah Pathian Thlarau a rung ^athleng, anih cu mipi tlunah a ding ih an hnenah, «Pathian in, ‹Ziangah so nan hmuingillonak dingah, Jehovah thupekpawl nan pahbăl? Jehovah nan thlauthlak ruangah, anih khal in a rak lo thlauthla ve a si,› tiin a ti,» tiah a ti hai. 21 Cutin amah an phiarthup ih siangpahrang thupeknak in Jehovah inn tualrawn ah amah cu lungto in an dêng. 22 Cutivekcun Zekariah pa Jehoiada in a parih a rak tuah mi ngilneihnak cu siangpahrang Joash in a cîng lo, cuhnakin a fapa a thahsak sawn riangri. Cule a thih zawngah, «Jehovah in cucu zoh sehla lehrūl seh,» tiah a ti.

24:20^a thleng: A ṭawng hrampi ah, «thuam,» ti a si.

23 Cule hitin a si, kum tawp lamah, Siria ralkappawl cu amah dokalhin an ra suak; cule Judah le Jerusalem ah an ra ih, mipi lak ihsin mipi hotupawl hmuahhmuah an hlorálter ih, an ralthillawn hmuahhmuah cu Damaskas siangpahrang hnenah an kuat ṭheh. 24 Cutin Siria ralkappawl cu mipum málte thawn an ra ih Jehovah in ralkap tam ngaingai cu an kut ah a pe, ziangruangahtile an pupápawlih Pathian Jehovah an thlauthla. Cuvekin Joash parah Siria-mipawl in dāntatnak an tuah. 25 Joash cu bese zetih hriamhma pu ih tân tain a hnen ihsin an sīp tikah, puithiam Jehoiada fapapawlih thisen ruangah, amai siahhlawhpawl in amah cu an phiarthup ih, a ihkhun parah an that. Cule anih cu a thi. Cun amah cu David Khawpi ah an phum, asinan siangpahrangpawlih thlān ah cun an phum lo. 26 Amah phiarthuptupawl cu: Ammon-nu Shimeath fapa Zabad le Moab-nu Shimrith fapa Jehozabad tla an si.

27 Amai thuhla simsungnakpawl, a fapapawl thuhla le Pathian inn remṭhat thuhla cu ngai hnik, siangpahrangpawlih thuanthu cazual sungah ngan an si. Cun a fapa Amaziah cu a aiah a lal.

25

Siangpahrang Amaziah

1 Amaziah cu siangpahrang a can tikah kum 25 mi a si ih, Jerusalem ah kum 29 sung a lal. A nuih hmin cu Jehoaddan a si ih, Jerusalem khawmi a si. 2 Cule Jehovah mithmuhih thildik anih in a tuah, asinan a thinlung pumhlum cun a si lo.

Mithattu Thuṭhensak a Si

3 Cule hitin a si, amai hrangih lalram dĭnhngeh a si leveten, a pa siangpahrang thattu a siahhlawhpawl cu a that hai. 4 Sihmansehla an fātepawl cu a that hai lo, cuhnakin Mosi Cazual, Dān sungih, «An fātepawl ruangah palepawl thah an si lo pei ih, palepawl ruang khalah fātepawl thah an si lo pei; cuhnakin mi pakhat cu amai sual ruangah a thi sawn pei,» tiih Jehovah thupek ngan mi vekin a tuah sawn a si.

Edom Donak

5 Cuihtlunah Amaziah in Judah le Benjamin ram hmuahhmuah ihsin Judah-mipawl a khawm hai ih an pupápawlih sungza sungza zulhin, thawng rual hotu, za rual hotu tiin a tuah hai. Cule kum 20 le a tlun lam mipum a siar hai ih, fei le ralphaw kai thei, ral do ih feh thei hril mi, ting thum a hmungah. 6 Israel-mipawl lak ihsin micak ralṭha ting khat khal ngun talent 100 in a hlâng. 7 Asinan a hnenah Pathian mi pakhat a ra ih, «Maw siangpahrang, Israel ralkappawl hi na zawngah fehter hai hlah, ziangahtile Jehovah in Israel a umpi lo ih, Efraim tefapawl zohman a umpi lo. 8 Asinan na feh thotho asile, feh ko! Doawknak ah cak zetin um aw! Cuticingkhalin doral hmaiah Pathian in a lo tluter ding, ziangahtile Pathian cun băwm theinak le tlukter theinak huham a nei a si,» tiah a ti.

9 Cun Amaziah in Pathian mi hnenah, «Israel ralkappawl hnenih ka pek mi talent 100 cu ziangtin so kan tuah ding?» tiah a ti.

Cule Pathian mi cun, «Jehovah cun himi hnakih tam ngaingai a lo pe thei a si,» tiah a ti.

10 Cule Efraim ihsin a hnenih ra ralkappawl cu Amaziah in inn lamih tlungkir dingin a thliardang. Curuangah an thinhengnak Judah parah nasazetin a tho ih thinheng zetin inn lamah an tlungkir.

11 Cun Amaziah cu a ticakaw ih, a mipawl hruaiin, Cite Phaikuam ah a feh, cule Seir tefa 10000 a that. 12 Judah tefapawl in nungdamin ralkaih 10000 an hruai ih, lungkhām lu zim ah an fehpi, cule cupawl cu lungkhām lu zim ihsin an hlăwnthla, cutin an zaten an săwprăwp ṭheh.

13 Asinan Amaziah in a hnenih ral do dingih feh lo dingih a thlahkirsal mi mipipawlih ralkappawl cun Judah khuapawl cu Samaria ihsin Beth Horon tiang an sîm, mi 3000 an that ih ralthillawn tam zet an la.

14 Cule hitin a si, Edom-mipawl nehnak ihsin Amaziah a tlun tikah, Seir-tefapawlih pathianpawl a tlŭn ih, cupawl cu a pathian dingah a ret hai, cule an hmaiah a kûn ih an hnenah rimthaw a ur. 15 Curuangah Jehovah thinhengnak cu Amaziah parah a tho, cule a hnenah, «Na kut ihsin amai mipi runsuak thei lo, miphun pathianpawl cu ziangahso na hawl?» tiih titu profet pakhat a thlah.

16 Cun hitin a si, amah a biak rero laiah, siangpahrang Amaziah in a hnenah, «Nangmah cu siangpahrang thurawnpetu ah tuah na si maw si? Bāng aw! Ziangahso thah na si ding?» tiah a ti.

Cun profet cu a bāng ih, «Himi na tuah ih ruahnak ka lo pek mi na ngaithlak lo ruangah, Pathian in lo hlorálter dingin a ruatcat zo ti ka thei,» tiah a ti.

Israel Donak

17 Cun Judah siangpahrang Amaziah in ruahnak a dil ih, Jehu fapa Jehoahaz-ih fa Israel siangpahrang Joash hnenah, «Ra aw, doawknak ah pakhat le pakhat hmai tăwn aw uhsi,» tiin mi a thlah.

18 Cule Israel siangpahrang Joash in Judah siangpahrang Amaziah hnenah, «Lebanon tlang ih hlingbûr in Lebanon tlang ih sidar thing hnenah, ‹Na fanu hi ka fapa hnenah nupi ah pe aw,› tiin mi a thlah. Cule Lebanon tlang ih ramsa pakhat a vak ih cuih hlingbûr cu a pál. 19 ‹Ngai hnik, Edom-mipawl ka neh,› tiah na ti ih, na thinlung cu tluangkhawnnak in a khat. Atu ah cun inn ah um men aw. Nangmah le Judah na zawngih um tlûknak ding buainak cu ziangahso na căwktho ding?» tiin mi a thlah ve.

20 Asinan Amaziah in a ngaithla cuang lo, ziangahtile Edom pathianpawl an hawl ruangah anmah cu an ralpawl kut ih pek dingah cumi cu Pathian ih tum mi a si. 21 Cun Israel siangpahrang Joash cu a fehsuak ih, Judah siangpahrang Amaziah thawn Judah ram Beth Shemesh ah pakhat le pakhat an hmai tăwnaw. 22 Cule Judah cu Israel in a neh ih, mi kip mai riahbûk cio ah an tlânsia. 23 Cun Israel siangpahrang Joash in Judah siangpahrang, ^aJehoahaz fapa Joash fapa Amaziah cu Beth Shemesh ah a kaingah, cule amah cu Jerusalem ah a hruai, cule Jerusalem kulh cu Efraim Kăwt ihsin Kil Kăwt tiang dawng 400 a băl. 24 Cule sui le ngun hmuahhmuah, Obed-Edom ih kilkhawi mi Pathian inn ih bungbel hmuahhmuah le siangpahrang inn ih hlawnthil hmuh mipawl cu a la ih, âmkhām hrangih kaih mipawl khal a hruai; cule Samaria ah a tlung.

25:23^a Jehoahaz: Ahaziah ti khalih kawh a si.

Amaziah Thihnak

25 Joash fapa Judah siangpahrang Amaziah cu ^aJehoahaz fapa Israel siangpahrang Joash thih hnuah kum hleinga a nungdam. 26 Cun Amaziah-ih căngvaihnak dangpawl cu a hmaisabik ihsin a netabik tiangin, ngai hnik, Judah le Israel siangpahrangpawlih cazual sungah ngan a si lo maw? 27 Jehovah hnen ihsi Amaziah a pial ihsin, Jerusalem ah amah phiarthupnak an tuah ih, Lakish ah a tlânsuak; asinan Lakish khua ah cun a dung ihsin mi an thlah ih, cu tawkah amah cu an that. 28 Cun amah cu rángpawl in an phur ih, Judah khawpi ah a pupápawl hnenah an phum.

25:25^a Jehoahaz: Câng 23 simfiangnak zoh aw.

26

Siangpahrang Uzziah

1 Judah mipi hmuahhmuah in kum hleiruk mi Uzziah cu an hril ih, a pa Amaziah aiah siangpahrang ah an tuah. 2 Siangpahrang cu a pupápawl hnenih a cawlh hnuah, Uzziah in Eloth khua a dĭnsal ih, cumi cu Judah ram ah a telhsal.

3 Uzziah cu siangpahrang a can tikah kum hleiruk mi a si ih, Jerusalem ah kum 52 sung a lal. A nuih hmin cu Jekoliah a si ih, Jerusalem khawmi a si. 4 Cule a pa Amaziah in a tuah mi hmuahhmuah bangtukin, Jehovah mithmuhih thildik a tuah. 5 Pathian larawknak theihthiamnak neitu Zekariah san ah anih cun Pathian a hawl. Jehovah a hawl sung cu Pathian in a hmuingilter.

Uzziah-ih Hlawhtlinnak

6 Filisṭia-mipawl do dingin a fehsuak ih, Gath kulh, Jabneh kulh le Ashdod kulh pawl a ṭhiatbăl, cule Ashdod kiangkap le Filisṭia-mipawl lakah khawpipawl a dĭn. 7 Filisṭia-mipawl, Gur Baal ih cêng Arab-mipawl le Maon-mipawl do dingin amah cu Pathian in a bawm. 8 Cule Ammon-mipawl in Uzziah hnenah ngunkhuai an rak keng. A hminthanzia cu Izip ramri a thleng, ziangahtile anih cu a cak tuk lawmmam.

9 Cun Uzziah cun Jerusalem ih Kil Kăwtka, Phaikuam Kăwt le kulh kĕlnak ṭhuampi ah dawlsângpawl a sak ih a hngetter. 10 Ramṭhing khalah dawlsângpawl a dĭn. Tikhur tampi a lai, ziangahtile phai ram ah le phairawn ah sumhnám tampi a nei. Tlang ram le Karmel ram ah lóthlopawl le sabit hri simsialtupawl a nei, ziangahtile anih cu lótlawh duh mi a si.

11 Cuihtlunah siangpahrang ralbawipawl lakih pakhat Hananiah kut hnuai mi cangantu Jeiel le bawi Maaseiah tepawl in mipum cazin an lak bangtukin ral do mi ralkap, a bur a bur ih raldo ih fehsuak mi khal Uzziah in a nei. 12 Micak ralṭhapawlih sungkua lubân mipum cu 2600 an si. 13 Cule an thuneihnak hnuaiah ralkap ting thum le thawng sarih le zanga an um. Annihpawl cu ralpawl dokalhih siangpahrang bawmtu, nasazetih ral do mi an si. 14 Cun Uzziah in ralkap zate hrangah ralphaw, fei, thir lukhum, taksa ralthuam, thál pawl le lungtopawl sainak ding herhlipawl a timlam. 15 Cule Jerusalem ah dawlsângpawl par le a kilpawl parih ret ih, thálfungpawl sainak le lungto tûm zetzet pawl ih dennak ding, mithiampawl ih hmuhsuah mi cetpawl a tuah. Cutin a hmin cu hmun tin ram tin ah a thang, ziangahtile anih cu micak a si tiang mangbangzaih băwm a si.

Uzziah-ih Sualnak

16 Asinan anih cu a cak vivo tikah, a thinlung cu amai siatnak thlĕn tiangin a hngal, ziangahtile Jehovah a Pathian lakah rinum loin a cāngvai, Rimhmui Biakṭheng parah rimhmui ur dingin Jehovah temple ah a lut. 17 Cule puithiam Azariah cu amah hnuah a lut ih, a zawngah Jehovah-ih puithiam miralṭha 80 an tel. 18 Cule annih in siangpahrang Uzziah cu an kalh ih a hnenah, «Uzziah, Jehovah hnenih rimhmui ur cu nang ih ti ding a si lo, rimhmui ur dingih serhhran Aaron fapa puithiampawl ih ti ding a si sawn a si. Hmun thianghlim ihsin suak aw, ziangahtile rinum loin na rak cāngvai a si! Jehovah Pathian hnen ihsin cawisannak na co lo ding,» tiah an ti.

19 Cun Uzziah cu a thin a so, rimhmui ur dingin a kut ah meiling suahdur a keng. Cule puithiampawl parih a thin a heng laiah Jehovah inn ih puithiampawl hmai Rimhmui Biakṭheng kiangah a cal ah phâr a suak. 20 Cule puithiam lubik Azariah le puithiam hmuahhmuah in amah cu an zoh, ngai hnik, a cal a phâr, cule cuih hmun ihsin anih cu an dawisuak. A si, Jehovah in amah cu a vuak ruangah amah khal suak dingin a manhlap zet.

21 Siangpahrang Uzziah cu a thih ni tiangin miphar a si. Miphar a si ruangah, anih cu a dangteih um inn ah a cêng, ziangahtile anih cu Jehovah inn ihsin sahcat a si. Cun a fapa Jotham cu siangpahrang sungza tlunah, ram mipi thuṭhenin a um.

22 Cule Uzziah-ih căngvaihnak dangpawl cu, a hmaisabik ihsin a netabik tiangin Amoz fapa profet Isaiah in a ngan. 23 Cutin Uzziah cu a pupápawl hnenah a itthat ih, siangpahrangpawl-ih ta a si mi phumawknak lóram ah a pupápawl hnenah an phum, ziangahtile, «Anih cu miphar a si,» tiah an ti. Cun a fapa Jotham cu a aiah a lal.

27

Siangpahrang Jotham

1 Jotham cu siangpahrang a can tikah kum 25 mi a si ih, Jerusalem ah kum hleiruk sung a lal. A nuih hmin cu Jerushah, Zadok fanu a si. 2 Cule a pa Uzziah ih a tuah mi hmuahhmuah bangtukin tuah vein, Jehovah mithmuhih thil dik a tuah. Sikhalsehla Jehovah Temple ah cun a lut lo. Asinan mipi cun thil bawrhhlawh an tuah vivo.

3 Jehovah inn Tlunta Kăwtka a sak ih, Ofel kulh cu nasazetin a sak. 4 Cuihtlunah Judah tlangpawl ah khawpipawl a dĭn ih, kulhhngetpawl le dawlsângpawl tupi lakah a dĭn.

5 Ammon-mipawlih siangpahrang khal a do ih a neh hai. Cule Ammon-mipawl in cuih kum ah ngun talent 100, sangvut kor 10000 le barli sangvut kor 10000 amah an pe. Ammon-mipawl in kum hnihnak le kum thumnak khalah cumi cu an pe thotho. 6 Cutin Jehovah a Pathian hmaiah felfaiten nung dingin thu a ṭhencat ruangah Jotham cu micak zetah a hung cang.

7 Jotham-ih căngvaihnak dangpawl le a raldonak le a nundānpawl cu, ngai hnik, Israel le Judah siangpahrang pawlih cazual sungah ngan an si. 8 Siangpahrang a can tikah amah cu kum 25 mi a si ih, Jerusalem ah kum hleiruk sung a lal. 9 Jotham cu a pupápawl hnenah a itthat, cule David Khawpi ah an phum. Cun a fapa Ahaz cu a aiah a lal.

28

Siangpahrang Ahaz

1 Ahaz cu siangpahrang a can tikah kum 20 mi a si ih, Jerusalem ah kum hleiruk sung a lal; cule a pupá David ih a rak tuah vek cun Jehovah mithmuhih thildik a tuah ve lo. 2 Cuhnakin Israel siangpahrangpawlih lamzin a zawh ih, Baalpawl hrangah burcawp milimpawl a tuah. 3 Ben-Hinnom Phaikuam ah rimhmui a ur ih, Israel tefapawl hmaiah Jehovah ih a dawisuak mi miphunpawl ih fihnungza thil ti vekin meisa ah a falepawl a urkāng. 4 Cule hmun sângpawl par, tlangmualpawl par le thingbŭknîm hnuai kip ah rai a thawi ih rimhmui a ur.

Ahaz Ralsunnak

5 Curuangah Jehovah a Pathian in amah cu Siria siangpahrang kut ah a pe. Amah cu an neh ih, anmah lak ihsin mipi tampi cu ralkaih ah an hruai ih, Damaskas ah an fehpi. Cun amah cu Pathian in Israel siangpahrang kut khalah a pe, cuih siangpahrang cun cu pa cu thahnak nasazet thawn a rak neh. 6 Ziangahtile Remaliah fapa Pekah in ni khat sungah Judah-mi ting khat le thawngkul a that, cupawl cu an zaten miralṭha hlir an si, ziangruangahtile an pupápawlih Pathian, Jehovah an thlauthla. 7 Efraim micak Zikri in siangpahrang fapa Maaseiah le inn uktu Azrikam le siangpahrang sangtu Elkanah a rak that. 8 Cule Israel tefapawl in an unau a si mi nunaupawl, an fapapawl le an fanupawl ting hnih cu ralkaih ah an hruai, cule an hnen ihsin ralthillawn tampi khal an la ih, cuih ralthillawn cu Samaria ah an thiar.

9 Asinan cu tawkah Pathian profet pakhat a um, a hmin cu Oded a si. Cule anih cu Samaria ih ra ralkappawl hmaiah a fehsuak ih an hnenah, «Ngai hnik uh, Jehovah, nan pupápawlih Pathian cu Judah parah a thin a heng ruangah nan kut ah anmah cu a lo pe, asinan anmah cu van táwng thinsonak in anmah cu nan that hai. 10 Cule atu ah Judah le Jerusalem tefapawl cu nan sálnu le nan sálpa dingah hranhramih tuah nan tum; asinan nannih khal Jehovah Pathian hmaiah mawhsualnak nan nei ve a si lo maw? 11 Curuangah atu ah in rak ngai uhla, nan unaupawl hnen ihsin ralkaih ih nan hruai mi ralkaihpawl kha kirter hai uh, ziangahtile Jehovah thinling sosâng cu nan parah a um a si,» tiah a ti.

12 Cun Efraim tefapawlih lubân hrekkhat a si mi Johanan fapa Azariah, Meshillemoth fapa Berekiah, Shallum fapa Jehizkiah le Hadlai fapa Amasa cu raldonak ihsi ra tlung mipawl dokalhin an tho. 13 Cule an hnenah, «Kan sualpawl le kan mawhnak bêtnak in Jehovah hmaika-ah kan parah mawhnak thlenter nan tum. Kan mawhsualnak cu a nasatuk cia zo ih Israel dokalhin thinlingnak a sosâng a si. Himi ruangah, ralkaihpawl cu hi tawkah nan hruai lo pei,» tiah an ti hai. 14 Hriamhrei kai mipapawl in ralkaihpawl le ralthillawnpawl cu hotupawl hmai le mipungkhawm zate hmaiah an tân ta. 15 Cun hmin sal ih thiah mi mipapawl an tho ih, ralkaihpawl cu an hruai, cule an lakih taklawngih umpawl cu ralthillawnpawl ihsin an thuam, an hruhter ih kedam an pe, rawl le in ding an pe ih hriak an hnih; cule miṭawnṭai hmuahhmuah cu lāk parah an toter. Cule cupawl cu an unaupawl hnen, ṭhulhfau kung khawpi Jeriko ah an hruai ih Samaria ah an kir.

16 Cuih cān ah siangpahrang Ahaz in Assiria siangpahrangpawl hnenah amah bawm dingin mi a thlah. 17 Ziangahtile Edom-mipawl an ra lehsal ih Judah an do ih, ralkaih ah an hruai. 18 Filisṭia-mipawl khal in Judah phai ram le Negev khuapawl an sîm ih, Beth Shemesh, Aijalon, Gederoth, Sokoh le a khawṭekpawl, Timnah le a khawṭekpawl, Gimzo le a khawṭekpawl an la ih cu tawkah an cêng. 19 Israel siangpahrang Ahaz ruangah Jehovah in Judah cu a hnûkniam, ziangahtile anih in Judah-mipawl cu sūpawknak a tlasamter ih Jehovah parah an rinum lo zet. 20 Cule Assiria siangpahrang Tiglath-Pileser cu a hnenah a ra ih, amah cu a van a sângter, cule amah cu a rak bawm lo. 21 Cuticingin Ahaz in Jehovah inn, siangpahrang inn le hotupawl hnen ihsin hlawnthilpawl a la ih, cupawl cu Assiria siangpahrang a pe; asinan anih cun amah cu a bawm cuang lo.

Ahaz a Sual Sinsin

22 Siangpahrang Ahaz cu a vansan lai cān ah, Jehovah parah rinum loin a cāngvai sinsin. 23 Cule amah nehtu Damaskas pathianpawl hnenah rai a thawi ih, «Siria siangpahrangpawlih pathianpawl in an băwm hai ruangah, keimah in băwm theinak dingah an hnenah rai ka thawi ding,» tiah a ti. Asinan cupawl cu amah le Israel zate siatnak ah an cang. 24 Ahaz in Pathian inn ih bungbelpawl a fĭnkhawm ih, Pathian inn ih bungbelpawl cu a satphel ṭheh, Jehovah inn sângkapawl a khar ih, amai hrangah Jerusalem kil kip ah biakṭheng a tuah. 25 Cule Judah khua pauhpauh ah pathian dangpawl hnenih rimhmui ur dingin hmun sângpawl a tuah, cule a pupápawlih Pathian Jehovah thinheng ko a căwktho.

26 A căngvaihnak dangpawl le a nundānpawl, a hmaisabik ihsin a netabik tiang, ngai hnik, Judah le Israel siangpahrangpawlih cazual sungah ngan an si. 27 Cutin Ahaz cu a pupápawl hnenah a itthat, cule amah cu khawpi sung, Jerusalem ah an phum. Asinan Israel siangpahrangpawlih thlān ah an ret lo. Cun a fapa Hezekiah cu a aiah a lal.

29

Siangpahrang Hezekiah

1 Hezekiah cu kum 25 a ti tikah siangpahrang ah a cang, cule Jerusalem ah kum 29 sung a lal. A nuih hmin cu Abijah, Zekariah fanu a si. 2 Cule a pupá David in a rak tuah mi hmuahhmuah zulhin Jehovah mithmuhih thildik a tuah.

Temple Thianfainak

3 A lal a kum khatnak, thla khatnak ah, Jehovah inn a áwng ih, a rĕm. 4 Cun puithiampawl le Levi-mipawl a hruailut hai ih nisuahnak lamih mual ah a fĭnkhawm hai, 5 cule an hnenah, «Maw Levi-mipawl, i ngai hnik uh! Atu ah serhhran aw uh, Jehovah, nan pupápawlih Pathian inn cu serhhran uhla, hmun thianghlim ihsin thilbawrhhlawhpawl cu thiarsuak uh. 6 Ziangahtile kan pupápawl rinum loin an cāngvai ih Jehovah kan Pathian mithmuhah thil ṭhalo an rak tuah a si; amah cu an thlauthla ih Jehovah-ih Biakbûk cu an hawisan ih, an dung an tŭn. 7 Hulhliap sângkapawl khal an khar ih meitopawl kha an hmit ih rimhmui an ur lo, cule Israel Pathian hnen hmun thianghlim ah Meiur Thilhlănpawl an hlan lo. 8 Curuangah Jehovah thinlingnak cu Judah le Jerusalem parah a thleng ih, anmah cu nan mit ih nan hmuh vekin tuksumza le lauumza le hnihsan mi ah a tuah hai a si. 9 Ngai hnik, himi ruangah, kan pupápawl cu ralnâm in an tlu, cule kan fapapawl, kan fanupawl le kan nupipawl cu ralkaih ih hruai an si.

10 «Atu ah kan hnen ihsin a thinlingnak sosa a pialhlo theinak dingah Israel-ih Pathian Jehovah thawn thukham tuah ding ka duh. 11 Ka fapapawl tla, atu ah daithlang hlah uh, ziangahtile a hmaiih ding dingah, amah rian dingah, a hrangih rawngbawl dingah le rimhmui ur dingah Jehovah in a lo hril zo a si,» tiah a ti hai.

12 Cun hi Levi-mipawl: Kohath tesinfapawl lak ihsin Amasai fapa Mahath le Azariah fapa Joel; Merari tesinfapawl lak ihsin Abdi fapa Kish le Jehallelel fapa Azariah; Gershon-mipawl lak ihsin, Zimmah fapa Joah le Joah fapa Eden; 13 Elizafan tesinfapawl lak ihsin, Shimri le Jeiel; Asaf tesinfapawl lak ihsin Zekariah le Mattaniah; 14 Heman tesinfapawl lak ihsin, Jehiel le Shimei; Jeduthun tesinfapawl lak ihsin Shemaiah le Uzziel tepawl cu an tho.

15 Cule an unaupawl an kokhawm, anmah te an serhhranaw ih, Jehovah kamsuakthupawl a dawngtu siangpahrang thupek bangtukin, Jehovah inn thianfai dingin an feh. 16 Cun puithiampawl cu thianfai dingin Jehovah inn sungta lamah an lut ih, Jehovah temple sungih thil thianglo an hmuh mi hmuahhmuah cu Jehovah inn tualrawn ah an suah ṭheh. Cule Levi-mipawl in cupawl cu an lasuak ih Kidron tivate ah an thiar.

17 Thla khatnak, a ni khatnak ah serhhrannak an thăwk ih, cuih thla ni riatnak ah Jehovah hulhliap an thleng. Cule ni riat sung Jehovah inn an serhhran ih thla khatnak a ni hleiruknak ah an ṭheh.

18 Cun Siangpahrang Hezekiah hnenah an lut ih, «Meiur Thilhlănpawl hrang biakṭheng cu a bungbelpawl hmuahhmuah le Sangserh retnak cabuai cu a bungbelpawl hmuahhmuah thawn Jehovah inn pumpi cu kan thianfai ṭheh. 19 Cuihtlunah Siangpahrang Ahaz a lal laiih rinum loih a căngvaih tikih a hnawn mi bungbelpawl hmuahhmuah cu kan timlam thluh ih kan serhhran; cule ngai hnik, cupawl cu Jehovah biakṭheng hmaiah an um,» tiah an ti.

Temple ih Biaknak Dĭnṭhaṭsalnak

20 Cun Siangpahrang Hezekiah cu zingten a tho, khawpi uktupawl a kokhawm ih Jehovah inn ah a hung so. 21 Cule câwpa pasarih, tuucang pasarih, tuufa no pasarih le mepa pasarih pawl cu lalram le hmun thianghlim le Judah-mipawl hrangih sual thilhlăn dingah an hruai. Cun Aaron fapa puithiampawl cu Jehovah Biakṭheng parih hlăn dingah thu a pe hai. 22 Cule câwpapawl an that ih puithiampawl in a thisen an la, cule Biakṭheng parah an theh. Cuvek thothoin, tuucangpawl khal an that ih, a thisen cu Biakṭheng parah an theh. Tuufa nopawl khal an that ih, a thisen cu Biakṭheng parah an theh. 23 Cun siangpahrang le mipungkhawm hmaiah Sual Thilhlăn hrangah mepapawl cu an suah ih, cupawl parah an kut an suang. 24 Cule Israel-mi zate hrangih sualkhuhthawinak tuah dingah puithiampawl in cupawl cu an that ih, an thisen cu Biakṭheng parah sual thilhlăn ah an pe; ziangahtile Israel-mi zate hrangah Meiur Thilhlănpawl le Sual Thilhlăn tuah dingin siangpahrang in thu a rak pe.

25 Cule anih in David le siangpahrang-ih hmutu Gad le profet Nathan pawlih thupek bangtukin Jehovah inn ah sumselpawl, hri nei tum mipawl, ṭingṭangpawl thawn Levi-mipawl cu a umter hai. Himi cu profetpawl hmangin Jehovah-ih thupek a si. 26 Levi-mipawl cu David-ih tuah mi tum mi thilpawl thawn le puithiampawl cu tawtawrawtpawl thawn an ding. 27 Cun Hezekiah in Biakṭheng parih Meiur Thilhlănpawl hlan dingin thu a pe hai. Cule Meiur Thilhlăn thawh a si tikah, Jehovah hla khal thawh a si ve, tawtawrawtpawl le Israel siangpahrang David ih tuah mi tum mi thilpawl thawn. 28 Cule mipungkhawm hmuahhmuah in Pathian an bia, hla saktupawl in hla an sak ih, tawtawrawt phawtupawl in awn ko an phaw; Meiur Thilhlănpawl ṭheh a si hlanlo cupawl hmuahhmuah cu peh vivo a si. 29 Meiur Thilhlăn an ṭheh tikah, siangpahrang le a hnenih um mi hmuahhmuah cu an khuk an bil ih Pathian an bia. 30 Cuihtlunah siangpahrang Hezekiah le hotupawl in Levi-mipawl cu David le hmutu Asaf-ih ṭawngkampawl thawn Jehovah hnenah thangṭhatnak hla sak dingin thu an rak pe. Lungawi zetin thangṭhatnak hla an sak ih khukbilin Pathian an bia.

31 Cun Hezekiah in a sâng ih, «Atu ah Jehovah hnenah nan serhhran aw zo. Rak naih uhla, thawinakpawl le lungawi thu sim thilhlănpawl cu Jehovah inn ah rak keng uh,» tiah a ti. Cule mipungkhawmpawl cun thawinakpawl le lungawi thu sim thilhlănpawl an run keng ih, duhnak thinlung a neitu hmuahhmuah in Meiur Thilhlănpawl an run keng. 32 Cule mipungkhawmpawlih Meiur Thilhlăn an run ken zât cu câwpa 70, tuucang 100 le tuufa no 200 an si; cupawl hmuahhmuah cu Jehovah hnenah Meiur Thilhlăn hrangih an run ken mi a si. 33 Cule serhhran mi thilpawl cu câwpa 600 le tuu 3000 an si. 34 Asinan puithiam an mal tuk ruangah Meiur Thilhlăn zaten an vun an lip cawk lo; curuangah an unau Levi-mipawl in hna a cem hlan sung le a dang puithiampawl anmah te an serhhranawk hlanlo an bawm, ziangahtile puithiampawl hnakin Levi-mipawl cu mah te serhhranawknak ah an fekfel sawn. 35 Meiur Thilhlăn tampi thawn Remnak Thilhlănpawlih thau le Meiur Thilhlăn kip hrang Inding Thilhlănpawl khal an um.

Cubangtukcun Jehovah inn ih rawngbawlhna cu an dĭnṭhasal. 36 Cun Pathian in mipi a timlam ruangah Hezekiah le mipi hmuahhmuah cu lungawiaipuangin an um: ziangahtile cuih thil cu rinlopiih tuah a si.

30

Lanta Puai Hman a Si

1 Cule Hezekiah in Israel-ih Pathian Jehovah hnenah Lanta Puai hmang dingin Jerusalem ih Jehovah inn ih ra dingin Israel-mi hmuahhmuah le Judah-mi hmuahhmuah hnenah mi a thlah ih Efraim le Manasseh hnen khalah ca a kuat. 2 Siangpahrang le a hotupawl le Jerusalem ih mipungkhawm zaten Lanta Puai cu a thla hnihnak ih hmang dingin an lung a kim. 3 Ziangahtile a serhhranaw mi puithiam mipum daihtawk an um lo ih, Jerusalem ah mipi an pungkhawm lo ruangah, a cān kēl ah Lanta Puai an hmang thei lo. 4 Cule cuih thuhla cu siangpahrang le mipungkhawm hmuahhmuah in ṭha an ti. 5 Cuticun Israel-mi hmuahhmuah hrawhsuakin Jerusalem ah Israel-ih Pathian Jehovah hnenah Lanta Puai hmang dingin an ra pei tiah Beersheba ihsin Dân tiang tlangau dingin thutluknak an tuah, ziangahtile cumi cu mipi tampi thawn ngan cia mi vekih hman a rak si ṭheu lo.

6 Cun thuphurtupawl cu siangpahrang le hotupawl ih ca kengin, Israel le Judah ram hmuahhmuah ah an feh ih, siangpahrang thupek vekin, «Israel tefapawl, Abraham, Isak le Israel Pathian Jehovah hnenah kir uh; cun nannih Assiria siangpahrangpawl kut ihsi tlânsuak mi a tāngsŭnpawl hnen lamah anih khal a kirsal ding. 7 Cule an pupápawlih Pathian Jehovah parih rinum loih thil an ti ruangih lauumza ih a tuah hai mi nan hmuh bangtukin nan pupápawl le nan unaupawl vek cu si hlah uh. 8 Atu ah nan pupápawl vekin lungruh hlah uh, cuhnakin Jehovah hnenah tlulut sawn uhla, kumkhua hrangih a serhhran mi a hmun thianghlim ah lut uh, cule nan Pathian Jehovah cu rian uh, cuticun a thinlingnak nasazet cu nan hnen ihsin a pialhlo ding. 9 Ziangahtile Jehovah hnenih nan ra kir asile, nan unaupawl le nan fātepawl cu ralkaih ih hruaitupawlih lainatnak an co ding ih, cutin hi ram ah an ra kirsal ding; ziangahtile nan Pathian Jehovah cu zangfahnak le lainatnak ih khat a si ih, a hnenih nan kirsal asile, a lo hawisan lo ding,» tiah a sim.

10 Thuphurtupawl cu khaw khat hnu khaw khat Efraim le Manasseh ram an hrawhsuak ih Zebulun tiang an thleng, asinan an rak hnihsan ih an nautat men. 11 Sikhalsehla Asher hnám, Manasseh hnám le Zebulun hnám pawl ihsin mi hrekkhat phahniamawin Jerusalem ah an ra. 12 Cuihtlunah siangpahrang le hotupawl ih thupek an thlunnak dingah, thinlung hmunkhat pe dingin Pathian kut cu Judah parah a um. Cuih thupek cu Jehovah kamsuakthu ihsi ra a si.

13 Cule thla hnihnak ah Thilnu telh lo Sang Puai hmang dingin mipi tam zet Jerusalem ah an pungkhawm ih mipungkhawm cu a nasa ngaingai. 14 An tho ih Jerusalem ih a um mi biakṭhengpawl an la, cule rimhmui urnak biakṭhengpawl hmuahhmuah cu an la ih Kidron tivate ah an hlăwn. 15 Cule Lanta Puai hrang tuufa nopawl cu thla hnihnak ni hleilitnak ah an that. Puithiampawl le Levi-mipawl cu an ning a zak ih an serhhranaw, cule Jehovah inn ah Meiur Thilhlănpawl an keng. 16 Pathian mi Mosi Dān bangtukin anmai hmun cio ah an phunglam vekin an ding. Puithiampawl in Levi-mipawl hnen ihsi an ngah mi thisen cu an theh. 17 Ziangahtile mipungkhawm lakah a serhhranaw lo mi tampi an rak um; curuangah mithiang lo kip hrangih Jehovah hrang serhhran dingin Levi-mipawl in Lanta Puai tuufa nopawl thah ding ṭuanvo an nei. 18–19 Efraim hnám le Manasseh hnám, Issakar hnám le Zebulun hnám ihsin mi tampi cu an thianfaiaw lo, cuticingin ngan mi kalhzawngin Lanta Puai cu an ei. Asinan Hezekiah in an hrangah thla a cam, «Pathian, a pupápawlih Pathian Jehovah hawl dingin a thinlung timlamtu kip cu hmun thianghlim thianfai vekin thianglo khal sehla, Jehovah ṭha cun sualkhuhthawinak pe seh,» tiah a ti. 20 Cule Jehovah in Hezekiah cu a ngaithla ih mipi a damter.

21 Cule Jerusalem ih um Israel tefapawl cun ni sarih sung Thilnu telh lo Sang Puai lungawi zetin an hmang; cun Levi-mipawl le puithiampawl cu awn ring zet tum mi thilpawl thawn ni tin Jehovah hnenah hla sakin, Jehovah an thangṭhat. 22 Cule Hezekiah in Jehovah rawngbawlhna thiam zettu Levi-mipawl hmuahhmuah hnenah ^athapeknak thu a sim hai, cule an pupápawlih Pathian Jehovah hnenah sual phuangin Remnak Thawinakpawl hlanin khiah mi ni sarih sung an ei. 23 Cun mipungkhawm hmuahhmuah in a dang ni sarih puai tuah leh an lung a kim, cule lungawi zetin a dang ni sarih puai an tuah lehsal. 24 Ziangahtile Judah siangpahrang Hezekiah in mipungkhawm hnenah câwpa 1000, tuu 7000 a pe ih, hotupawl in mipungkhawm hnenah câwpa 1000 le tuu 10000 an pe. Cule puithiam tam zet an serhhranaw.

30:22^a thapeknak: A ṭawng hrampi ah, «thinlung ah,» ti a si.

25 Judah mipungkhawm hmuahhmuah cu puithiampawl le Levi-mipawl le Israel ram ihsi ra mipungkhawm hmuahhmuah, Israel ram ihsin ra mikhualpawl le Judah ram ih cêngpawl cu lungawiaipuangin an um. 26 Jerusalem ah aipuannak nasazet a um, ziangahtile David fapa Israel siangpahrang Solomon san ihsin Jerusalem ah hivek a um dah kêl lo. 27 Cule puithiampawl le Levi-mipawl an tho ih mipi thlawsuah an pe, an aw cu theihsak a si ih an thlacam cu a cēnnak thianghlim van a thleng.

31

Milem an Siatbăl

1 Cun himi hmuahhmuah ṭhehfel a si tikah, a um mi Israel-mi hmuahhmuah cu Judah khawpipawl ah an feh ih, ṭhuamserhpawl an khiak, Asherah-pawl an hauthlu, cule hmun sângpawl le biakṭhengpawl cu Judah ram le Benjamin ram hmuahhmuah ihsin, Efraim ram le Manasseh ram ihsin an siatbăl ih, a zateih an siatbăl thluh tiangin an tuah. Cun Israel tefapawl hmuahhmuah cu mi kip anmai neih mi le anmai khua cio ah an tlung.

Mipi Ṭhen Hra Ṭhen Khat

2 Cule Hezekiah in a bur a bur in puithiampawl le Levi-mipawl cu a ruat hai, puithiampawl le Levi-mipawl cu mi kip mai rawngbawlhna fingfing vekin: Meiur Thilhlănpawl, Remnak Thilhlănpawl, Jehovah cēnnak kăwtpawl ih rawngbawl, lungawi thu sim le thangṭhatnak hla sak a si. 3 Jehovah Dān ih ngan vekin zing lam le zan lam ih Meiur Thilhlănpawl hrang le Sabbath-pawl le Thla Tharpawl le khiah mi puaipawl hrang Meiur Thilhlănpawl hrangah siangpahrang covo a neih mi sung ihsin Meiur Thilhlănpawl a ruat fawn. 4 Cuihtlunah Jehovah Dān ih an pumpekawk theinak dingah puithiampawl le Levi-mipawl covo pe dingin Jerusalem ih um mipi cu thu a pe hai.

5 Thupek cu a darh veten, Israel tefapawl in thlairawl, sabitzu, hriak thar le khuaitizu le ló ihsi suak hmuahhmuah ih rah hmaisabikpawl cu a tawrin an run keng ih ṭhen hra ṭhen khat hmuahhmuah a tawrin an run keng. 6 Cule Judah khawpipawl ih cêng, Israel le Judah tefapawl in ṭhen hra ṭhen khat câw le tuu pawl an run keng; an Pathian Jehovah hnenih serhhran mi thil thianghlim ihsin ṭhen hra ṭhen khat khal an keng ih an peng. 7 Thla thumnak ah penkhawm an thăwk ih, thla sarihnak ah an ṭheh.

8 Cule Hezekiah le hotupawl an ra ih penkhawmpawl cu an hmu, cule Jehovah le a mi Israel an thangṭhat. 9 Cun Hezekiah in penkhawmpawl thuhla ah puithiampawl le Levi-mipawl thu a sut. 10 Cule Zadok sungza a si mi, puithiam lubik Azariah in a sâng ih, «Mipi in Jehovah inn ih thawhhlawm run ken an thawh tir ihsin ei khawp kan hmu ih, tam zet a hlei, ziangahtile Jehovah in a mipawl thlawsuah a pe; cule hi tluk tam hi a hlei lai hrih a si,» tiah a ti.

11 Cule Hezekiah in Jehovah inn ah pindanpawl tla simsial dingin thu a pe, cule cupawl cu an simsial. 12 Cun annih in rinum zetin thawhhlawm siseh, ṭhen hra ṭhen khat le serhhran mi thilpawl cu an run keng; Levi-mi Konaniah cu cumi ṭuanvo hotu a si ih, a nau Shimei cu a sangtu a si. 13 Jehiel, Azaziah, Nahath, Asahel, Jerimoth, Jozabad, Eliel, Ismakhiah, Mahath le Benaiah cu Konaniah le a nau Shimei thuneihnak hnuaiih hohatu an si. Cupawl cu siangpahrang Hezekiah le Pathian inn uktu Azariah ih ruat mi an si. 14 Cun Levi-mi Imnah fapa Kore, nisuahnak lam kăwt kiltu, Pathian hnenih palungsuak thawhhlawmpawl tlunih ṭuanvo neitu cun Jehovah-ih thilhlănpawl le thil thianghlimbikpawl zem ding ṭuanvo a nei. 15 Cule amai hnuaiah puithiampawl umnak khuapawl ah amah bawmtu mirinum Eden, Miniamin, Jeshua, Shemaiah, Amariah le Shekaniah tla an um; cupawl cun an unaupawl cu a bur a bur in a tûm a sen in an covo ding an zem. 16 Cuihtlunah cithlahsâwng ngankhumnak ih tel, mipa kum thum le a tlun lam pawl khal, Jehovah inn ih an ni tin hna le an ṭuanvo ruangih anmai bur cio vekih luttupawl hnenah an zem.

17 Cule an pupápawlih sungza zulhin cithlahsâwng ngankhumnak ih tel puithiampawl hnen le Levi-mi kum 20 kim le a tlun lam hnenah anmai bur cio hnenah an ṭuanvo vekin an zem. 18 Cule cithlahsâwng ngankhumnak ih tel an fanau tete, an nupipawl, an fapapawl le fanupawl hmuahhmuah pungkhawm pumpi hnenah an zem, ziangahtile rinum zetin thianhlimnak ah anmah te an serhhran aw a si. 19 Cuihtlunah puithiam a si mi Aaron fapapawl cu an khawpipawlih ran tlannak lóram asilole khaw kip ih umpawl hnenah an zem. Puithiampawl lakih mipa hmuahhmuah le Levi-mipawl lakih mipa hmuahhmuah hnenah cithlahsâwng ngankhumnak ih tel pauhpauh covo zem dingih hmin ih ruat hleice mipa an um.

20 Cutivekin Hezekiah in Judah ram pumpi a tuah ih, a Pathian Jehovah hmaiah ṭha le dik le rinum zetin a tuah. 21 Cule Pathian inn ih rawngbawlhna, Dān le thupek thu ih hnaṭuan kip a thawhnak ah Pathian a hawl ṭheu. Cumi cu a thinlung hmuahhmuah in a tuah ih a hmuingil a si.

32

Sennakerib in Jerusalem a Do

1 Himi thil ti rinumpawl hnuah, Assiria siangpahrang Sennakerib a ra ih Judah ram ah a lut, cule kulh nei khawpipawl dokalhin ṭanhmun a khuar, bauh tahratih amai hrangih an hnenih lut dingin a ruat. 2 Cule Hezekiah in Sennakerib a ra ti a thei, Jerusalem do a tum ti khal a thei.

3 Cule khawpi lengih tihna silh dingin a hotupawl le a ralbawipipawl a ráwn, cule annih in amah cu an bawm. 4 Cuticun cirhti zate le ram sungih luang tivate silhtu mi tampi an pungkhawm ih, «Assiria siangpahrangpawl an rat tikah, tidai tampi hmu hlah hai seh,» tiah an ti.

5 Cule Hezekiah cu thazang a la ih a băl mi kulh hmuahhmuah cu a dinṭhasal, dawlsângpawl a dĭn ih, lengah kulh dang a dâwl. David Khawpi ah Millo a dinṭha ih, hriamhrei le ralphaw tampi a tuah. 6 Cun mipi tlunah ralbawipawl a ret ih, khawpi kăwt mual ah a hnenah a kokhawm hai, cule an hnenah thapeknak thu, 7 «Cak zetin um uhla ralṭha uh, Assiria siangpahrang hmai le a hnenih um mipi hmuahhhmuah hmaiah ṭihin um hlah uhla, thlaphângin um fawn hlah uh. A lamih ṭangtu hnakin kan lamih ṭangtu an tamsawn. 8 A lamih ṭang cu taksa bân a si, asinan kan lamih ṭang cu in bawmtu ding le kan doawknak in dosaktu ding kan Pathian Jehovah a si,» tiin a sim. Cule mipi cu Judah siangpahrang Hezekiah ṭawngkam cun an tha a tlungter hai.

9 Himi hnuah Assiria siangpahrang Sennakerib le a hnenih um ralkappawl hmuahhmuah in Lakish an kulh laiah, Judah siangpahrang Hezekiah le Jerusalem ih um Judah-mi hmuahhmuah hnen Jerusalem ah a siahhlawhpawl a thlah ih an hnenah, 10 «Assiria siangpahrang Sennakerib cun hitin a sim: ‹Ziang si maw nan rinsan ih, kulhkhŭm mi Jerusalem khaw sungih nan um lai thotho? 11 Hezekiah in, «Kan Pathian Jehovah in Assiria siangpahrang kut ihsin in runsuak ding,» tiin laiṭam le tihâlih thi men dingin a lo hruaisual a si lo maw? 12 Cuih Hezekiah thotho in Jehovah hmun sângpawl le a biakṭhengpawl lakhlohsak ih Judah le Jerusalem hnenah, «Biakṭheng pakhat hmaiah nan Pathian nan be ding ih, a parah rimhmui nan ur pei,» tiah thu a pe a si lo maw? 13 Ram dang miphunpawl parah kei le pupápawl in ziang kan tuah ti nan thei lo maw? Cuih ram miphunpawlih pathianpawl in ka kut ihsin ziangti ti talin an rampawl an runsuak thei maw? 14 Cuih miphunpawlih pathianpawl hmuahhmuah lakah zo in so ka kut ihsin a mipawl runsuak thei? Ka pupápawl in cuih miphunpawl cu an hloter verver. Curuangah ziangtin so nan Pathian cun ka kut ihsin a lo runsuak thei cuang ding? 15 Curuangah atu ah, Hezekiah in lo bum hlah sehla, hivekin lo hruaisual hlah seh, cule amah zum hlah uh, ziangahtile ziang miphun le ziang lalram pathian khal in ka kut le ka pupápawlih kut ihsin an mipawl an runsuak lo. Ziangtin saw nan Pathian sinsin cun ka kut ihsin a lo runsuah thei ding,› a ti,» tiin an sim.

16 Cule a siahhlawhpawl in Jehovah Pathian dokalhin le a siahhlawh Hezekiah dokalhin an ṭawngbêt. 17 Anih khal in Israel-ih Pathian Jehovah zăwkzetin le amah dokalhin a ṭawng ih, «Ram dang miphunpawlih pathianpawl in ka kut ihsin an mipawl an runsuak thei lo vekin, Hezekiah-ih Pathian khal in ka kut ihsin a mipawl a runsuak thei ve lo ding,» tiin ca a kuat leuhleuh.

18 Cun khua cu an lâk theinak dingah lungphangter ding le buaiter dingin, Jerusalem kulh parih um mipawl hnenah Hebru ṭawng in aw ring zetin an auh. 19 Cule milai kut ih tuah mi leitlun miphun pathianpawl dokalh vekin, Jerusalem Pathian dokalhin an ṭawng.

20 Cumi ruangah Siangpahrang Hezekiah le Amoz fapa profet Isaiah cu thla an cam ih van lamah an ausuak. 21 Cun Jehovah in vancungmi a thlah ih, cuih vancungmi cun Assiria siangpahrang ṭanhmun khuarnak ih micak ralṭha hmuahhmuah, hohatupawl le ralbawipawl a hlorálter. Cule anih cu amai ram ah ningzak mithmai thawn a tlung. Cule a pathian temple sungih a luh tikah, amai rilrahpawl lakih mi hrekkhat in cu tawkah amah cu ralnâm in an satthlu.

22 Cutivekcun Jehovah in Hezekiah le Jerusalem luahtupawl cu Assiria siangpahrang Sennakerib kut ihsin le mi dang hmuahhmuah kut ihsin a runsuak hai ih ziang tinkim ah a kaihruai hai. 23 Cule mi tampi in Jehovah hnenah Jerusalem ah thilpek an run keng ih, Judah siangpahrang Hezekiah hnenah laksawng mankhung zetzet an run keng. Cutin anih cu cuih cān thăwkin miphun hmuahhmuah mithmuhah khaisan a si.

Hezekiah-ih Hngalnak

24 Cu laiah Hezekiah cu a na ih a thi zikte, cule Jehovah hnenah thla a cam, cule a hnenah a sim ih hminsinnak a pe. 25 Asinan Hezekiah cun a hnenih duhsaknak lăngter a si vekin a rak sânglet lo, ziangahtile a thinlung a hngal. Curuangah thinlingnak cu a par le Judah par le Jerusalem parah a thleng. 26 Cun Hezekiah cu a thinglung hngalnak ihsin a phahniamaw, amah le Jerusalem luahtupawl thawn, cutin Jehovah thinlingnak cu an parah Hezekiah san ah a thleng lo.

27 Hezekiah in lennak le upatnak nasazet a ngah. Cule amai hrangah: ngun, sui, lung mankhungpawl, rimhmuipawl, ralphawpawl le thil mankhung phunphun khawlnak inn a sak. 28 Thlairawl, sabitzu thar, hriak thar khawlnak inn a sak ih, ṭilva phun zakip hrangah inn le rante rual hrangah hruangkulh a tuah. 29 Cuihtlunah amai hrangah khawpipawl a dĭn ih, rante rual le ranpi rual a tawrin a nei; ziangahtile Pathian in amah cu neihnunnak nasazet a pe.

30 Hi Hezekiah thotho hin Gihon Tlunta cirhti suahnak a phit ih, David Khawpi nitlaknak lamah tikawng in a luanter. A hna tinkim ah Hezekiah cu a hmuingil.

31 Cutin a ram ih mangbangza zingzăwi dingin a hnenah Babilon uktupawl ih an thlah mi palaipawl thuhla ah cun, a thinlung ih um mi hmuahhmuah a theih theinak dingah amah hniksak dingin, Pathian in amah lawng a tān ta.

Hezekiah Uknak Cemnak

32 Hezekiah-ih căngvaihnak dangpawl le a ṭhatnak cu, ngai hnik, Amoz fapa profet Isaiah-ih larnak ah le Judah le Israel siangpahrangpawl cazual sungih ngan an si. 33 Cule Hezekiah cu a pupápawl hnenah a itthat ih, David fapapawl thlān tlunta ah an phum; cule a thih tikah Judah-mi zate le Jerusalem luahtupawl in amah upatnak an tuah. Cun a fapa Manasseh cu a aiah a lal.

33

Siangpahrang Manasseh

1 Manasseh cu siangpahrang a hung si tikah kum hleihnih mi a si ih, Jerusalem ah kum 55 sung a lal. 2 Asinan anih cun Jehovah in Israel tefapawl hmaiih a rak hlăwnsuak zo mi miphunpawlih thil fihnungzapawl zulhin, Jehovah mithmuhah thil ṭhalo a tuah. 3 Cule a pa Hezekiah ih a băl zo mi hmun sângpawl a dâwlsal ih Baalpawl hrangah biakṭhengpawl a dâwl, Asherah-pawl a tuah, cule van ih thilmak rual a bia ih a rian hai. 4 Anih in, «Jerusalem ah kumkhuain ka hmin a um ding,» Jehovah ih a tinak Jehovah inn ah biakṭhengpawl khal a dâwl. 5 Cule Jehovah inn tualrawn pahnih ah van ih thilmak rual hrangah biakṭhengpawl a dâwl. 6 Cun Hinnom Fapa Phaikuam ah a fapapawl meisa a paltlăngter hai; aizohthiamnak a hmang, thilcamthiamnak le dawithiamnak a hmang ih, thlarau kawhthiampawl le polpawl a ráwn. A thinhengter dingin Jehovah mithmuhih thil ṭhalo tam zet a tuah.

7–8 Pathian in David le a fapa Solomon hnenah, «Israel hnám zate lak ihsi ka hrilsuah mi Jerusalem le hi inn ah hin ka hmin cu kumkhuain ka ret ding. Cule dān pumpi le sakhaw dānpawl le cīn le dānpawl Mosi kut hmangih thu ka pek hai mipawl hmuahhmuah bangtukih fimkhurteih an thlun asile, nan pupápawl hrangih ka ruat zo mi ram ihsin Israel ke cu ka ṭhawnsal nawn lo ding,» a tinak Pathian inn ah cun amai tuah mi milem, khercawp milim a ret. 9 Cun Manasseh in Judah le Jerusalem luahtupawl cu Israel tefapawl hmaiah Jehovah ih a tisiat mi miphunpawl hnakin thil ṭhalo tamsin tuah dingin a hruaisual hai.

Manasseh a Sual a Sir

10 Cule Jehovah in Manasseh le a mipi hnenah thu a sim hai, asinan an ngaithla lo. 11 Curuangah Jehovah in an parah Assiria siangpahrang ralkap bawipawl a thlah ih, Manasseh cu sio an thlaih, dar cikcin in an khit ih Babilon ah an hruai. 12 Cun amah cu zăwnzaihter a si tikah, a Pathian Jehovah a ngen ih, a pupápawlih Pathian hmaiah nasazetin a phahniamaw, 13 cule a hnenah thla a cam; a ngĕn mi cu a cohlansak ih a dilnak cu a theihsak, cule amah cu Jerusalem ah lal dingin hruaikirsal a si. Cun Manasseh in Jehovah cu Pathian a si ti a thei.

14 Cumi hnuah anih in David Khawpi lengah Gihon nitlaknak lam, phaikuam ah, Nga Kăwtka luhnak tiangin, kulh a dĭn; cule cumi cun Ofel a kulh ih sâng zetin a tuah. Cun kulh nei Judah khawpipawl hmuahhmuah ah ralkap bawipawl a ret. 15 Ram dang pathianpawl le milem cu Jehovah inn ihsin le Jehovah inn tlang par le Jerusalem ih a dawl mi biakṭheng hmuahhmuah cu a lahlo ih cupawl cu khaw lengah a hlăwn. 16 Jehovah biakṭheng a rĕm, cumi parah remnak thilhlănpawl le lungawinak thilhlănpawl a thawi, cule Israel-ih Pathian Jehovah rian dingin Judah cu thu a pe. 17 Cutisikhalsehla mipi cun hmun sângpawl ah rai an thawi lai hrih thotho, asinan an Pathian Jehovah hnen lawngah an thawi a si.

Manasseh Uknak Cemnak

18 Manasseh-ih căngvaihnak dang, a Pathian hnenih a thlacamnak le Israel-ih Pathian Jehovah hmin ih a hnenih ṭawngtu hmutupawlih kamsuakthu cu, ngai hnik, Israel siangpahrangpawlih cazual ah ngan an si. 19 A thlacamnak, Pathian in a ngĕnnak a sanzia, a phahniamawk hlanih a sualnak le rinum loih a thil ti mi hmuahhmuah, hmun sâng a dĭnnak, Asherah-pawl le khercawp milimpawl a dĭnnak hmunpawl cu, ngai hnik, Hozai-ih ngan mi thuhla lakah ngan an si. 20 Cutin Manasseh cu a pupápawl hnenah a itthat ih, amai inn rori ah an phum. Cun a fapa Amon cu a aiah a lal.

Siangpahrang Amon

21 Amon cu siangpahrang a hung si tikah kum 22 a si ih, Jerusalem ah kum hnih sung a lal. 22 Asinan a pa Manasseh in a rak tuah bangin, Jehovah mithmuhih thil ṭhalo a tuah, a pa Manasseh in a rak tuah mi khercawp milim hmuahhmuah hnenah Amon cun thawinak a tuah ih a rian hai. 23 Cule a pa Manasseh a phahniamawk vekin, Jehovah hmaiah a phahniamaw lo; cuhnakin Amon cun a mawhsualnak a karhter deuhdeuh. 24 Cun amai siahhlawhpawl in amah cu an phiarthup ih, amai inn rori ah an that. 25 Asinan cuih ram mipi in siangpahrang Amon phiartu hmuahhmuah cu an that ṭheh. Cun cuih ram mipi in a fapa Josiah cu a aiah siangpahrang ah an tuah.

34

Siangpahrang Josiah

1 Josiah cu siangpahrang a can tikah kum riat mi a si ih, Jerusalem ah kum 31 sung a lal. 2 Cule Jehovah mithmuhih thildik a tuah ih, a pupá David lamzinpawl a zawh; a vawrh lamah le a keh lamah a pial lo.

Josiah in Pathian Thlun a Thăwk

3 A lal kum riatnak mino a si laiah a pupá David-ih Pathian hawl a thăwk; cule kum hleihnihnak ah hmun sângpawl, Asherah-pawl, khercawp milimpawl le burcawp milimpawl lakah Judah le Jerusalem thianfai a thăwk. 4 A hmaika-ah Baalpawlih biakṭhengpawl an ṭhiatbăl ih cupawl tlunih rimhmui biakṭhengpawl a hautlu; cule Asherah-pawl, khercawp milimpawl le burcawp milimpawl cu a săwprăwpter ih, dip ko a tuah, cule cupawl hnenih thawiawtupawlih thlān parah a thehdarh hai. 5 Cule puithiam ruhpawl cu an biakṭhengpawl parah a ur ih, Judah le Jerusalem a thianfai. 6 Cule Manasseh le Efraim le Simeon khuapawl ah le Nafthali le a kiangkapih a bălsiat mi hmuahhmuah tiangin a thianfai ṭheh. 7 Israel ram pumpi ih biakṭhengpawl le Asherah-pawl a ṭhiatbăl, khercawp milimpawl dip ko a tuah ih rimhmui biakṭhengpawl hmuahhmuah a hautlu ṭheh, cule Jerusalem ah a tlung.

Josiah in Temple a Rĕm

8 A lal kum hleiriatnak ah, ram le temple a thianfai tikah, Azaliah fapa Shafan, khawpi uktu Maaseiah le Joahaz fapa ngankhumtu Joah cu Pathian Jehovah inn rĕm dingin a thlah hai. 9 Cun puithiam lubik Hilkiah hnen an thlen tikah, Pathian inn ih rak kĕn mi tangka, sângkapawl kiltu Levi-mipawl in Manasseh hnám le Efraim hnám, a tāngsŭn Israel miphun hmuahhmuah, Judah hnám le Benjamin hnám hmuahhmuah le Jerusalem luahtupawl hnen ihsi an khawnkhawm mi cu a hnenah an hlan. 10 Cun cumi cu Jehovah inn vilvengtu hnaṭuantupawl kut ah an pe; cule inn rĕm le tuahṭhasal dingin cumi cu Jehovah inn ih hnaṭuantupawl hnenah an pe. 11 Annih in zungthiampawl le inn saktupawl hnenah ser mi lungto, pehawknak hrang thing le Judah siangpahrangpawl in an rak siatbăl mi innpawlih luang tuahnak ding leinak hrangah an pe.

12 Mipapawl cun hna cu rinumten an ṭuan. Hoha dingih anmah vilvengtupawl cu: Merari fapapawl lak ihsin Levi-mi Jahath le Obadiah, Kohath-mipawlih fapapawl lak ihsin Zekariah le Meshullam pawl an si. Levi-mi mi dang, awnmawi tumthiampawl hmuahhmuah cu, 13 phur thiartupawl tlun le rawngbawlhna phun zakip a ṭuantupawl hohatu an si. Levi-mi mi hrekkhat cu cangantu, hotu le kăwtkakiltu an si.

Hilkiah in Dān Cazual a Sar

14 Jehovah inn ih an kenluh mi tangka an rak ken tikah, Mosi hmangih pek mi Mosi Dān Cazual cu puithiam Hilkiah in a sar. 15 Cun Hilkiah in a sawn ih, cangantu Shafan hnenah, «Jehovah inn ah Dān Cazual ka sar,» tiah a ti. Cule cuih cazual cu Hilkiah in Shafan a pe. 16 Cun Shafan in cuih cazual cu siangpahrang hnenah a keng ih, «Na siahhlawhpawl hnenih fial mi hmuahhmuah cu an tuah rero ko. 17 Cule Jehovah inn ih an hmuh mi tangka khal an lakhawm ih, cumi cu vilvengtupawl le hnaṭuantupawl kut ah an pe,» tiin siangpahang hnenah thu a thlĕnsal. 18 Cun cangantu Shafan in siangpahrang hnenah, «Puithiam Hilkiah in cazual i pe,» tiah a sim. Cule Shafan in cucu siangpahrang hmaika-ah a siar.

Josiah in Dān Thu a Nunpi

19 Cule hitin a si, Dān thupawl siangpahrang in a theih tikah, a hnipuan a thlek. 20 Cun siangpahrang in Hilkiah, Shafan fapa Ahikam, Mikah fapa Abdon, cangantu Shafan le siangpahrang siahhlawh Asaiah pawl cu, 21 «Feh uh, sar mi cazual sung thupawl thawn pehparawin keimai hrangah le Israel le Judah miphun lakih a tāng mipawl hrangah Jehovah sut uh; ziangahtile kan pupápawl in hi cazual sungih ngan mi hmuahhmuah bangtukih nung dingin Jehovah kamsuakthu an thlun lo ruangah kan parih burh mi Jehovah thinlingnak cu a nasatuk,» tiin thu a pe hai.

22 Cutin siangpahrang ih a thlah mipawl le Hilkiah cu Hasrah fapa Tikvath, cumi fapa Shallum nupi-ih hnipuan kiltu nunau profet Huldah hnenah an feh. Cu nu cu Jerusalem khua ih Veng Thar ah a um. Cule a hnenah cuih thuhla cu an sim.

23 Cun cu nu cun a sâng hai ih, «Israel-ih Pathian Jehovah in hitin a ti, ‹Ka hnenih a lo thlahtupa hnenah, 24 «Jehovah in hitin a ti: ‹Ngai hnik, Judah siangpahrang hmaika-ih an rak siar mi cazual sungih ngan mi camsiatnak hmuahhmuah vanduainak cu hi hmun le a luahtupawl parah ka thlengter cing ding, 25 ziangruangahtile an kut thil ti mi hmuahhmuah hmangin thinheng dingin in căwkthawh theinak dingah keimah in thlauthla ih, a dang pathianpawl hnenah rimhmui an ur. Curuangah ka thinlingnak cu hi hmun ah burh a si ding ih, mihter a si lo ding,› tiin,» nan ti pei,› tiah a ti.

26 Asinan Jehovah sut dingih lo thlahtu Judah siangpahrang hnenah cun hitin nan sim pei, ‹Israel-ih Pathian Jehovah in hitin a ti: «Na rak theih mi thupawl thawn pehparawin, 27 hi hmun dokalh le a luahtupawl dokalhih a kamsuakthupawl na hna ih na theih tikah, na thinlung a nem ih Pathian hmaiah na phahniamaw, cule ka hmaiah na phahniamaw ih na hnipuan na thlek ih ka hmaiah na ṭap, curuangah kei khal in ka lo thei a si,» tiin Jehovah in a ti. 28 «Zoh hnik, na pupápawl hnenah ka lo fĭn ding ih, na thlān ah hnangamten fĭn na si ding; cule hi hmun le a luahtupawl parih ka thlenter ding mi vanduainak hmuahhmuah cu na mit in a hmu lo ding,» tiin,› ti uh,» tiah a ti. Cun annih in siangpahrang hnenah thu cu an thlĕnkir.

Josiah ih Thukham

29 Cun siangpahrang cun mi a thlah ih Judah le Jerusalem upapawl hmuahhmuah a kokhawm. 30 Siangpahrang cu Judah mipa hmuahhmuah le Jerusalem luahtupawl le puithiampawl le Levi-mipawl le a tebikin a tumbik tiang mipi zate zawngah Jehovah inn ah a so. Cule Jehovah inn sungih hmuhsuah mi Thukham Cazual thupawl hmuahhmuah cu an hnatheihah a siar.

31 Cun siangpahrang cu amai hmun ah a ding ih Jehovah thlun dingin, a thupekpawl le a thutheihtermipawl le a sakhaw dānpawl a thinlung zate le a ruahnak zateih thlun dingin le hi cazual sungih ngan mi thukham thupawl tuahsuak dingin Jehovah hmaika-ah thukham a tuah. 32 Cule Jerusalem ih umpawl le Benjamin hnám hmuahhmuah cu cumi vekin a umter hai. Cun Jerusalem luahtupawl cun an pupápawlih Pathian, Pathian thukham bangtukin an tuah. 33 Cule Josiah in Israel tefapawl ta a si mi ram hmuahhmuah ihsin thil fihnungza hmuahhmuah cu a hlăwnhlo thluh, cule Israel ram ih um hmuahhmuah cu an Pathian Jehovah rian dingin a tuah hai. Cutin annih cu amah a nunsung hmuahhmuah an pupápawlih Pathian Jehovah thlunnak ihsin an pial lo.

35

Josiah in Lanta Puai a Hmang

1 Cule Josiah in Jehovah hnenah Lanta Puai cu Jerusalem ah a hmang ih, thla hmaisabik ni hleilitnak ah Lanta tuufa nopawl an that.

2 Cule puithiampawl cu anmai ṭuanvo cio ah a ruat hai ih, Jehovah inn rawngbawlhna hrangah tha a pe hai. 3 Cun Israel hmuahhmuah zirhtu, Jehovah hrangih serhhran mi Levi-mipawl hnenah, «David fapa Israel siangpahrang Solomon ih sak mi inn sungah Kuang thianghlim cu ret uh. Cumi cu nan liang in nan phur nawn lo ding. Atu ah nan Pathian Jehovah le a mi Israel rian uh. 4 Israel siangpahrang David ih ngan mi zulhin le a fapa Solomon ih ngan mi zulhin, nan pupápawlih sungza bangtuk ciar in, nanmai bur vek cio in timlam aw uh. 5 Cule nan unau mi senpipawlih pupá sungza burṭhen zulhin le Levi-mipawlih pupá sungza burṭhen zulhin hmun thianghlim ah ding uh. 6 Mosi kut hmangih a pek mi Jehovah kamsuakthu vekih an tuah theinak dingah, Lanta tuufa nopawl that uh, serhhran aw uhla nan unaupawl hrangah timlam uh.

7 Cun Josiah in a um mi mi senpi zate hnenah rante rual lak ihsin tuufa nopawl le menopawl tla a pe. Cupawl cu Lanta thilhlăn hrangah an si, a zaten rante rual 30000 le ranpi 3000 an si. Hibangpawl cu siangpahrang-ih neih mi lak ihsin an si. 8 Cule a hotupawl khal in mipi hnen, puithiampawl hnen, Levi-mipawl hnenah palungsuakin an pe. Pathian inn uktu Hilkiah le Zekariah le Jehiel khal in puithiampawl hnenah Lanta thilhlăn dingah rante rual lak ihsin 2600 le ranpi 300 an pe. 9 Levi-mi hotu Konaniah le a unaupa Shemaiah le Nethanel, Hashabiah, Jeiel, Jozabad pawl in Levi-mipawl hnenah Lanta thilhlăn dingah rante rual lak ihsin 5000 le ranpi 500 an pe.

10 Cutin rawngbawlhna cu timlam a si ih, siangpahrang-ih thupek bangtukin puithiampawl cu anmai hmun ah le Levi-mipawl cu anmai bur cio ah an ding. 11 Cule Lanta tuufa nopawl cu an that, cule Levi-mipawl in an ṭilva vun an hawh laiah, puithiampawl in an kut in thisen cu an theh. 12 Cun Mosi Cazual sungih ngan vekin Jehovah hnenih hlan dingah mi senpi pupápawlih sungza burṭhen zulhin pe dingah Meiur Thilhlănpawl cu an rethran. Cule câwpapawl khal cutin an tuah. 13 Cutin Lanta tuufa nopawl cu cīn le dān bangtukin meisa ah an em; asinan a dang serhhran mi thilhlănpawl cu bel, belpi le beldau pawl sungah an sûang ih, mipi zate hnenah zamrang zetin an keng.

14 Cuihhnu ah anmai hrang le puithiampawl hrangah vo an timtuah, ziangruangahtile Aaron tefa puithiampawl cu Meiur Thilhlănpawl le a thaupawl cu zan tiang an hlan; curuangah Levi-mipawl in anmai hrangah le Aaron tefa puithiampawl hrangah vo an timtuah. 15 Cule Asaf fapa hlasatupawl cu David, Asaf, Heman, siangpahrang-ih hmutu Jeduthun pawl ih thupek bangtukin anmai hmun ah an um. Kăwtkakiltupawl khal kăwtka kip ah an um ih an hna an suahsan dah lo, ziangruangahtile an unau Levi-mipawl in an hrangah vo an timtuah.

16 Cun Siangpahrang Josiah thupek vekih Lanta Puai hmang ding le Jehovah biakṭheng parih Meiur Thilhlăn hlan dingin Jehovah-ih rawngbawlhna hmuahhmuah cu cuih ni ah timlam a si. 17 Cule cutawk ih um mi Israel tefapawl in cuih cān ah Lanta Puai an hmang ih, Thilnu telh lo Sang Puai khal ni sarih sung an hmang. 18 Profet Samuel san ihsi thăwkin Israel ram ah Lanta Puai hitivekih hman a um dah lo; cule puithiampawl, Levi-mipawl, cutawk ih um Judah-mi le Israel-mi zate le Jerusalem luahtupawl thawn Josiah ih Lanta Puai a hman vekin Israel siangpahrangpawl zohman in an hmang lo. 19 Josiah a lal a kum hleiriatnak ah hi Lanta Puai hi hman a si.

Josiah Thihnak

20 Hipawl hmuahhmuah hnuah, Josiah in Temple a timtuah tikah, Izip siangpahrang Neko cu Zufraṭis kiang Karkemish khua do dingin a ra suak; cule amah do dingin Josiah cu a păwksuak. 21 Asinan Neko in a hnenah palaipawl a thlah ih, «Judah siangpahrang, nang le kei hi ziang pehtlaihawknak so kan neih? Tuihsun ah nangmah do dingin ka ra lo, cuhnakin ka do mi sungza do dingin ka ra sawn a si; ziangahtile Pathian in hmanhmawh dingin thu i pe. Pathian in a lo tisiatlonak dingah, i umpitu Pathian do hi bāng aw,» tiah a ti. 22 Cutisikhalsehla Josiah cu a hnen ihsin a kir lo, cuhnakin amah a do theinak dingah a danglamawter ih, Pathian kâ ihsi suak Neko-ih ṭawngkampawl cu a ngaithla lo. Cutin Megiddo phaikuam ah ral do dingin a feh.

23 Cun thálsaithiampawl in siangpahrang Josiah an saingah, cule siangpahrang in a siahhlawhpawl hnenah, «I thiarhlo uh, ziangahtile bese zetin hriamhma ka pu a si,» tiah a ti. 24 Curuangah a siahhlawhpawl in amah cu cuih ránglêng par ihta an lasuak ih, amai neih mi ránglêng pahnihnak ah an ret, cule Jerusalem ah an tlunpi. Cutin anih cu a thi, cule a pupápawlih thlān ah phum a si. Cule Judah-mi zate le Jerusalem in Josiah cu an sûn.

25 Jeremiah khal in Josiah cu ṭah hla a seh ve. Cule mipa hla sakpawl le nunau hla sakpawl hmuahhmuah in tuihni tiangin an ṭah hlapawl ah Josiah an sâl. Cucu Israel ram ih nunphung pakhat ah an tuah; cule ngai hnik, cupawl cu Ṭah hlapawl ah ngan an si.

26 Josiah-ih căngvaihnak dang le Jehovah Dān sungih ngan mi bangtukih a thil tiṭhat mi le, 27 a thil ti mipawl a hmaisabik ihsin a netabik tiang, ngai hnik, Israel le Judah siangpahrangpawlih cazual sungih ngan an si.

36

Siangpahrang Jehoahaz

1 Cun ram mipi in Josiah fapa Jehoahaz cu an hruai ih, a pa aiah Jerusalem ah siangpahrang ah an tuah. 2 Jehoahaz cu siangpahrang a can tikah kum 23 a si ih, Jerusalem ah thla thum sung a lal.

3 Izip siangpahrang in amah cu Jerusalem ah a lalnak ihsin a thlak ih, a ram parah ngun talent 100 le sui talent khat a tuk. 4 Cun Izip siangpahrang in a unaupa Eliakim cu Judah le Jerusalem tlunih siangpahrang ah a tuah ih, a hmin cu Jehoiakim tiin a thlengsak. Cule Neko in a unaupa Jehoahaz cu a hruai ih Izip ah a tlunpi.

Jehoiakim

5 Jehoiakim cu siangpahrang a can tikah kum 25 mi a si ih, Jerusalem ah kum hleikhat sung a lal. Cule a Pathian Jehovah mithmuhih thil ṭhalo a tuah. 6 Babilon siangpahrang Nebukhadnezzar cu amah do dingin a hung so ih, Babilon ih hruai dingin Jehoiakim cu dar cikcin in a khit. 7 Babilon siangpahrang Nebukhadnezzar in Jehovah inn ihsin bungbelpawl Babilon ah a keng ih, Babilon ih amai temple ah a ret hai.

8 Jehoiakim-ih căngvaihnak a dang le a tuah mi thil fihnungzapawl le amah dokalhnak hmuhsuah mi thilpawl cu, ngai hnik, Israel le Judah siangpahrangpawlih cazual sungih ngan an si. Cun a fapa Jehoiakin cu a aiah a lal.

Jehoiakin

9 Jehoiakin cu siangpahrang a si tikah ^akum riat a si ih, Jerusalem ah thla thum le ni hra sung a lal. Cule Jehovah mithmuhih thil ṭhalo a tuah. 10 Kum tirah siangpahrang Nebukhadnezzar in mi a thlah ih Jehovah inn ihta thil mankhungpawl thawn amah cu Babilon ah a hruai, cule amai sungkhat pakhat Zedekiah cu Judah le Jerusalem tlunih siangpahrang ah a tuah.

36:9^a kum riat: Hebru Bible hrekkhat le 2Sp 24:8 ah kum hleiriat tin a um.

Zedekiah

11 Zedekiah cu siangpahrang a si tikah kum 21 mi a si ih, Jerusalem ah kum hleikhat sung a lal. 12 Anih cun a Pathian Jehovah mithmuhih thil ṭhalo a tuah ih, Jehovah aiawhih thusimtu profet Jeremiah hmaika-ah a phahniamaw lo. 13 Cule Pathian hmin ih thukamnak rak sesămtertu Siangpahrang Nebukhadnezzar lak khalah a hél, asinan a lung a ruhter ih Israel-ih Pathian Jehovah hnenih kir dingah a thinlung a hakter.

14 Cuihtlunah puithiampawl hotu hmuahhmuah le mipi khal in miphunpawlih thil fihnungza hmuahhmuah vekin rinum lo zetin an cāngvai sinsin, cule Jerusalem ih serhhran mi Jehovah inn cu an bawrhbangter.

15 Cule an pupápawlih Pathian Jehovah in a mipi par le a cēnnak hmun parih lainatnak a neih ruangah an hnenah a palaipawl hmangin thu a cah leuhleuh hai. 16 Asinan annih cun Pathian palaipawl cu an nautat, a kamsuakthupawl ziang an siar lo ih, a profetpawl an hnihsan. A mipawl parih Jehovah thinlingnak a thawh hlanlo le tidamnak um nawn lo tiangin cutin an tuah.

17 Curuangah anih in an tlunah Kaldia-mipawlih siangpahrang ral a tlunter ih, anih in an tlangvalpawl cu an hmun thianghlim ah ralnâm in a that hai, cule tlangval le fala him par, tar le miṭawnṭai par khalah lainatnak a nei lo; a kut ah an zaten a pe ṭheh. 18 Cule Pathian inn ihta bungbel hmuahhmuah, a tûm a te ti loin, Jehovah inn ih hlawnthilpawl siseh, siangpahrang ih hlawnthilpawl siseh, a hotupawlih hlawnthilpawl hmuahhmuah siseh, Babilon ah a thiar thluh. 19 Cun Pathian inn cu an ur, Jerusalem kulh an bălsiat thluh, inn ropipawl hmuahhmuah meisa in an ur ih, a neih mi thil mankhungpawl hmuahhmuah cu an siatbăl ṭheh. 20 Cule ralnâm ihsi luatpawl hmuahhmuah cu Babilon ah a hruaihlo hai, cupawl cu Persia lalram uknak a thlen hlanlo a hrang le a fapapawl hrangah siahhlawh ah an cang.

21 Jeremiah hmangih sim mi Jehovah kamsuakthu thlengkimin ram in Sabbath a hman theinak dingah kum 70 sung ram cu a răm ih a cawl a si.

Sáltan Cemnak

22 Persia siangpahrang Sairas a lal a kum khatnak ah Jeremiah kâ ihsi Jehovah kamsuakthu a thlenkim theinak dingah, Jehovah in Persia siangpahrang Sairas-ih thinlung a căwktho, cutin a lalram hmuahhmuah ah tlawngthannak a tuah ih, ca sungah,

23 «Persia siangpahrang Sairas in,

‹Leilung tlun lalrampawl hmuahhhmuah hi van Pathian Jehovah in i pe ṭheh zo. Cule Judah ram Jerusalem ah inn amah saksak dingin i ruat. Nan lakih a mi a si mi zokhal hung so seh! A Pathian Jehovah in umpi hram seh,› a ti,» tiin a ngan.