About Bible Thianghlim | ©

BibleThianghlim – AMOS

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

AMOS

123456789

• A ngantu: Amos
• A siartu: Sak lam Lalram, Israel
• Ngan kum: B.C. 765-757 hrawng

Amos cu sak lam lalram ah thu a phuang, asinan amah cu thlang lam lalram Tekoa khawmi a si. Tekoa khua cu Juda ramṭhing zimah a um ih, Amos cu rankhāltu a si. Neta lamah mifarahpawl ih ei mi theirah phun, «Theikung rah kilkhawitu,» a si thu a rel (Amo 7:14). Hih cān ah Judah le Israel cun an lalram cu Solomon uk lai tiat in an kauh. Hih cān cu Israel hrangih hmuingil cān a si. Israel a hmuingil laiah, midingfel neinungin mifarahpawl an băwm ding Pathian in a beisei (Dnp 15:4-5). Cuti si loin, milem bia Israel mineinungpawl cun an sumpai le an thiltitheinak cu micaklo palbĕtnak ah an hmang.

Amos in a thuphuan cu miphunpawl parih thiamlo coternakpawl a dăwtdăwtin a thăwk (Amos 2:16). A netabik le a saubik thiamlo coternak cu Amos in Israel parah a phuang. Hih thiamlo coternak a phuan hnuah Amos in Pathian «Kamsuakthu hi ngaithla uh» tiin mipi a sawm. Pathian par le pakhat le pakhat karlakih an sualnakpawl a rel tikah «Kamsuakthu hi ngaithla uh» ti hi vei thum a rel (Amos 3:1-55:17). Sual in dāntatnak a thlen ih, Amos in hmakhawpihnak pahnih mipi parah a phuang (Amos 5:18-6:14). Hi cabu hi Bawipa in Amos a hmuh mi thil pahnih thawn a netter: a hmaisa ah dāntatnak, cuihhnu ah tundinsalnak (Amos 7:1-9:15). Amos in micaklopawl an palbĕt ruangah an parah Pathian in kharbawkpawl, ni ling le nehnak a thlenter ding thu a phuang. Asinan a siraw mipawl cu Pathian in a tundinsal hai ding thu khal a tiamkam. Ni khat ni ni ah David cithlah ihsin siangpahrang pakhat ih uk dingin, Israel cu a ram ah Pathian in a hruaikir leh ding.

A thuphuan mi a ngannakah, Amos cu Puithiam Hnaṭuannak bung 26 le Dān peksalnak bung 28 thu ah a ṭhumawsal cingcing. Israel in Pathian thu a lun lo asile, a parih thleng ding mi dāntatnakpawl kha hi bung pahnih hin cipciar zetin an rel. Hih dāntatnakpawl hi an thleng ding a si tiah mipi ralrinnak a pe. Amos hi Thukham Thar khalah hmun pawimawh a luah. David sungza tundinsal a si tikah, Zentelpawl cu Bawipaih hmin ih kawh an si ding tiah a sim (Amos 9:11-12). Khrih van a kai hnuah, hihi a thlengkim thăwk ih James in Apostolpawlih Cangvaihnak cabu 15:14-21 ah Amos 9:11-12 hi a vun la ih, cutawk ih a rel duh mi cu thuthangṭha thu ih Pathian ruahmannak ah miphunpawl an tel ti le thuthangṭha an zum tikah Jew-mi ih va can ṭul kherkher loin, Zentel an si kumkhua ding ti mi a si.

1

1 Judah siangpahrang Uzziah san lai le Israel siangpahrang Joash fapa Jeroboam san lai, linghnîn hlan kum hnih laiah, Israel thuhla ah Tekoa hmun ih rankhāltupawl lakih pakhat Amos ih hmuh mi kamsuakthupawl.

2 Cule anih in,

«Zion ihsin Jehovah a hûk ih,
Jerusalem ihsin a aw a suah;
Tuukhāltupawlih ran tlannak hmun a ṭap ih,
Karmel tlang zim a ro,»

tiah a ti.

Miphunpawl Dāntatnak

3 Jehovah in hitin a sim:

«Damaskas ih a thilsual tuah mi pathum ruang le pali ruangah,
A dāntatnak ka lakir lo ding,
Ziangruangahtile fangcīlnak thir thawn Gilead a cil.
4 Asinan Ben-Hadad siangpahrang innpawl kangráltu ding meisa,
Hazael inn sungah ka thlah ding.
5 Damaskas kăwtka tlâng khal ka băl ding ih,
Aven Phaikuam luahtupawl le
Beth Eden ih siangpahrang kianghrăwl kengtu ka sâtcat ding.
Siria-mipawl cu Kir ram ah ralkaih ah an feh ding,» tiah Jehovah in a ti.

6 Jehovah in hitin a sim:

«Gaza-ih thilsual tuah mi pathum ruang le pali ruangah,
A dāntatnak ka lakir lo ding,
Ziangruangahtile Edom pek dingah,
Mipi zaten an hruaihlo thluh.
7 Asinan Gaza khawkulh parah ka meisa ka thlah ding ih, cumi cun a hauhruangpawl a kāng ding.
8 Ashdod luahtu le Ashkelon siangpahrang kianghrăwl kengtu ka sâtcat ding;
Ekron dokalhin ka kut ka văi ding ih,
Filisṭia a tāngsŭn an hlorál ding,» tiah Bawipa Jehovah in a ti.

9 Jehovah in hitin a sim:

«Ṭaiar-ih thilsual tuah mi pathum ruang le pali ruangah,
A dāntatnak ka lakir lo ding.
Ziangruangahtile Edom pek dingah,
Mipi zaten an hruaihlo thluh ih,
Unau sinak thukham an cîng nawn lo.
10 Cule Ṭaiar khawkulh parah meisa ka thlah ding ih,
A hauhruangpawl an kangrál ding,» tiin.

11 Jehovah in hitin a sim:

«Edom ih thilsual tuah mi pathum ruang le pali ruangah,
A dāntatnak ka lakir lo ding,
Ziangruangahtile ralnâm thawn a unaupa a dawi ih,
Zawnruahnak hmuahhmuah a hlăwn thluh.
A thinhengnak a reh lo ih,
A thinlingnak cu kumkhuain a pai.
12 Cule Teman khaw parah meisa ka thlah ding ih,
Bozrah hauhruangpawl a kangrál ding,» tiin.

13 Jehovah in hitin a sim:

«Ammon-mipawlih thilsual tuah mi pathum ruang le pali ruangah,
A dāntatnak ka lakir lo ding.
Ziangruangahtile an ramri kauhter duh ah,
Gilead nunau faraipawl an ráipăwp hai.
14 Cule Rabbah khawkulh parah meisa ka muah ding ih,
Cumi cun a hauhruangpawl cu ral do ni ih ral auaw lakah le phusîng tlun tikih thli hrang lakah a kangrál ding.
15 An siangpahrang cu sáltannak ah a feh ding,
Amah le a ralbawipawl khal sál ah an fehtlang ding,» tiah Jehovah in a ti.

2

1 Jehovah in hitin a sim:

«Moab-ih thilsual tuah mi pathum ruang le pali ruangah,
Amah dāntatnak ka lakir lo ding,
Ziangruangahtile anih in Edom siangpahrang ruhpawl vâm dingin a ur.
2 Cule Moab parah meisa ka thlah ding ih,
Cumi cun Kerioth hauhruangpawl a kangrál ding;
Moab cu buai culcinak thawn,
Ral authâwm le tuupa ki phawt awn lakah a thi ding.
3 Cule hruaitupawl cu an lak ihsin ka that hai ding ih,
A ralbawipawl hmuahhmuah cu amai zawngah ka that hai ding,» tiah Jehovah in a ti.

Judah parih Dāntatnak

4 Jehovah in hitin a sim:

«Judah-ih thilsual tuah mi pathum ruang le pali ruangah,
Amah dāntatnak ding ka lakir lo ding,
Ziangruangahtile Jehovah Dān an hnáwng ih,
A thupekpawl an thlun lo.
Anmah cu an pupápawl ih thlun mi,
An thuphan per mi in a hruaipêng hai.
5 Cule Judah parah meisa ka thlah ding ih,
Cumi cun Jerusalem hauhruangpawl a kangrál ding,» tiin.

Israel parih Dāntatnak

6 Jehovah in hitin a sim:

«Israel-ih thilsual tuah mi pathum ruang le pali ruangah,
Amah dāntatnak cu ka lakir lo ding,
Ziangruangahtile midingfelpawl cu ngun ah an zuar ih,
Mifarahpawl cu kedam kăwp khat ah.
7 Mifarahpawlih lu cu leilung leivut parah an palbĕt,
Cule mităngdawrpawlih lamzin an merhkâwi.
Ka hmin thianghlim bawrhbangter dingah,
Mi pakhat le a pa in nunau pakhat an pantlang.
8 Tiamkamawknakih an lâk mi hnipuan phahin biakṭheng kiang i kip ah an zau ih,
Cawhkuan vekih an rak lâk mi sabitzu cu an pathian inn ah an in.
9 «Cucingin, Sidar thing vekih sâng le Elon thing vekih khoh Amor-mi an hmaiih thahsaktu cu keimah ka si.
Tlun lamih amai rah le hnuai lamih amai hrihrampawl ka tisiat.
10 Cuihtlunah Amor-mi ram luah dingin, Izip ram ihsi lo hruaisuaktu le ramṭhing ih kum 40 sung lo hruaitu khal keimah ka si.
11 Nan fapa hrekkhat cu profet ah ka tuah hai ih,
Nan tlangval hrekkhat cu Nazir-mipawl ah.
Maw Israel tefapawl, cuticun a si ko lo maw?» tiah Jehovah in a phuang.
12 «Asinan Nazir-mipawl cu sabitzu nan inter ih,
‹Thuphuang hlah uh,› tiin profetpawl thu nan rak pe.
13 Ngai hnik, fângtel thawi khat lêng a niam bangin,
Kei khal nannih in in niamter.
14 Curuangah mitlancakpawl khal in relhnak an nei lo ding.
Micak in cahnak a nei nawn lo ding ih,
Ral do thiam khal in amai nunnak a runhim fawn lo ding.
15 Thál kengtu a ding thei lo ding ih,
Mitlancak khal a tlânsuak lo ding,
Rángtotu in amai nunnak a runhim lo ding.
16 Cuih ni ah ral do thiampawl lakih ralṭhabik cu taklawngin a tlân ding,» tiah Jehovah in a phuang.

3

Profet Thucahih Thuneihnak

1 Maw Israel tefapawl nanmah dokalhih Jehovah kamsuakthu hi ngaithla uh. Cumi cu Izip ram ihsi ka hruaisuah mi sungkua pumpi dokalhnak thu a si:

2 «Leilung tlun sungkuapawl hmuahhmuah lakah nangmah lawng hi ka lo thei hleice;
Curuangah nan mawhsualnak ruangah dān ka lo tat ding.
3 An lung a rual lo asile, mi pahnih cu an fehtlang thei ding maw?
4 Kiosa in deh ding sa a neih lo tikah, tupi sungah a hûk maw si?
Kiosa vanglai in zianghman dehngah loin, a pûk ah a hngirhngir maw si?
5 Tarh mi tháng um loin, vâte cu leilung parih tháng sungah a ṭum maw si?
Thang in zianghman awk loin, lei par ihsin a pelh maw si?
6 Khawpi sungih tuupa ki an phawt asile, mipi an khūr lo ding maw?
Khawpi sungah vanduainak a um asile, Jehovah ih tuah mi a si lo ding maw?
7 A siahhlawh profetpawl hnenah a thuthup phuang loin,
Bawipa Jehovah in zianghman a tuah hrimhrim lo.
8 Kiosa a hûk e!
Zo so ṭih lo um ding?
Bawipa Jehovah a ṭawngsuak e!
Zo so thuphuang loih um thei ding?» tiin.

Israel Sualnak Dāntat a Si

9 Ashdod hauhruangpawl le
Izip ram ih hauhruangpawl ah phuang uh,
«Samaria tlang parah pungkhawmaw uh,
Amai sungih buainak maksak le amai sungih palbĕt mipawl cu zoh uh,» tiin.
10 «Ziangahtile a dik mi ziangti vekih tuah ding ti an thei lo, Jehovah in a ti.
Annih cun an hauhruangpawl ah nunrawnnak le misuamnak an khawlkhawm,» tiin.

11 Curuangah Bawipa Jehovah in hitin a sim:

«Ram kiangkap hmuahhmuah ah doral a um ding;
Na hnen ihsin na cahnak a băwtthlek ding ih,
Na hauhruangpawl cu răm an si ding,» tiin.

12 Jehovah in hitin a sim:

«Kiosa kâ sung ihsin tuukhāltu in a tuu ke pahnih asilole a hna themte a lawnsak bangin,
Ihkhun tlâng themte le tokham tuamnak puan themte thawn
Samaria ih cêng Israel tefapawl cu lăwnsak an si ding.
13 Ngaithla uhla Jakob sungza dokalhin theihter uh,» tiah Bawipa Jehovah, ralkap rualpawlih Pathian in a ti.
14 «An thilsual tuah mipawl ruangih Israel dān ka tat ni ah,
Bethel biakṭhengpawl khal dān ka tat ding;
Cule biakṭheng kipawl sahcat an si ding ih,
Lei ah an tla ding.
15 Thlatang inn cu ṭhâl inn zawngah ka tisiat ding;
Vuiho innpawl an hlorál ding ih,
Inn ropi zetzet pawl an cem ding,» Jehovah in a phuang.

4

1 Samaria tlang parih um nannih Bashan câwpipawl,
Mifarahpawl palbĕttu,
Mitlasampawl nambĕttu,
Nan pasalpawl hnenih, «Sabitzu rak keng uh, in uhsi,» tiih titupawl,
Hi kamsuakthu hi ngaithla uh.

2 «Bawipa Jehovah in a thianhlimnak in sia a săm:

Ngai hnik uh, sathurnak ih a lo lakhloh ni a ra thleng ding ih,
Nan lakih a netabik tiangin ngasio in a lahlo ding.
3 Khawkulh păwp ihsin nan pawtsuak ding ih,
Mi tin mai hmai zawn cio ah,
Cule nang cu Harmon tlang lamah hlăwn na si ding,» tiah Jehovah in a phuang.
4 «Bethel ah feh uhla, thilsual tuah uh,
Gilgal ah thilsual karhzaiter uh;
Zing tin nan raithawi mipawl rak keng uh,
Kum thum dan ah nan ṭhen hra ṭhen khat pawl khal.
5 Lungawi thu sim raithawinak cu thilnu thawn hlan uh,
Mai palungsuak thawhhlawmpawl phuang uhla thăn uh;
Ziangahtile nannih Israel tefapawl, cucu tuah nan duh mi a si!» tiah Bawipa Jehovah in a phuang.

Israel in Nunrĕmnak a Pawm Lo

6 «Nan khawpipawl hmuahhmuah ah, ^aha fainak ka lo pe.
Cule nan umnak kip ah sang tlaksămnak ka lo pe;
Sikhlahsehla ka hnenah nan ra kir cuang lo,» tiah Jehovah in a phuang.
7 «Cuihtlunah fâng ah cān thla thum duh ah ruah ka lo phihsak.
Khaw pakhat ah ruah ka surter,
Khaw dangah ruah ka kaitâng.
Hmun pakhat ah ruah a sur ih,
Hmun dang ah ruah sur loin a car.
8 Tidai in duh ah khaw hnih maw, khaw thum cu khaw dangah an vâkvai,
Asinan an khawp cuang lo.
Cuticingkhalin ka hnenah nan ra kir cuang lo,» tiah Jehovah in a phuang.
9 «Thil hring rocarnak le thil hring pangmăn kainak thawn ka lo vua.
Nan hmuanpawl,
Nan sabit hmuanpawl,
Nan theipi kungpawl le nan olif kungpawl an karh tikah,
Kharbawk in an lo eisak ṭheh.
Cuticingkhalin ka hnenah nan ra kir cuang lo,» tiah Jehovah in a phuang.
10 «Izip ih ka rak thlah bangin, nan lakah nathrisia ka thlah;
Nan minopawl ralnâm in ka that, nan rallak rángpawl thawn;
Nan ṭanhmun khuarnak rimthu cu nan hnar sungah ka lutter,
Sikhalsehla ka hnenah nan ra kir cuang lo,» tiah Jehovah in a phuang.
11 «Pathian in Sadom le Gomorrah a tisiat bangin ka lo tisiat,
Cule meisa sung ihsin thingthu zûk mi vek nan si;
Cuticingkhalin ka hnenah nan ra kir cuang lo,» tiah Jehovah in a phuang.
12 «Curuangah Maw Israel, hihi nan parah ka tuah ding:
Himi hi nan parih ka tuah ding ruangah,
Maw Israel, na Pathian táwng dingin timtuahaw aw!»
13 Ziangahtile ngai hnik,
Tlangpawl tuahtu,
Thli sersiamtu,
Minung hnenih a ruahnak phuangtu,
Zing khawvâng thim ko tuahtu,
Leilung sannak hmunpawl páltu,
A hmin cu ralkap rualpawlih Pathian Jehovah a si.

4:6^a ha fainak: Ei ding tlaksăm a simnak a si.

5

Israel hrangih Ṭahnak

1 Maw Israel sungza, nanmah dokalhih ṭah hla ka ken mi thu hi ngai hnik uh:

2 «Fala him Israel cu a tlu;
A thosal nawn lo ding.
Amai ram ah thlauthlakin a um;
Amah kaithotu ding zohman an um lo,» ti hi.

3 Ziangahtile Bawipa Jehovah in hitin a sim:

«Ralkap 1000 thlahsuaktu khawpi ah 100 lawng an tâng ding ih,
Ralkap 100 thlahsuaktu Israel sungza ah pahra lawng an tâng ding,» tiin.

Sual Sir dingih Kawhnak

4 Ziangahtile Israel sungza hnenah Jehovah in hitin a sim:

«I hawl uhla, nung uh;
5 Asinan Bethel hawl hlah uhla,
Gilgal ah lut fawn hlah uh,
Beersheba khal kân hlah uh;
Ziangahtile Gilgal cu ralkaih ah a feh tengteng ding ih,
Bethel cu zianghmanlo ah a cang ding,» tiin.
6 Jehovah hawl uhla nung uh,
Culoasile meisa bangin Joseph sungza a phiatfai pang ding,
A kangrál hai ding,
Zohman in Bethel hrangah an hmit thei lo ding.
7 Nannih diknak hnîtkhâ ih cangtertupawl le
Dingfelnak leilung ih hlăwnthlatupawl tla!
8 Anih cun Kimah le Kesil a tuah,
Thim mepmep cu zing khawvâng ah a cangter ih,
Sun cu zan khawthimah a tuah.
Tifinriat tipi a ko ih,
Leilung vangdâp parah a thlebung;
A hmin cu Jehovah a si.
9 Micakpawl hnenah siatnak a surter,
Cutin siatbălnak cu kulhhnget parah a thleng.
10 Kăwtsuah ih mi nunrĕmtu an hua ih,
Dik zetih thusimtu an fih.
11 Cule miretheipawl nan palbĕt ih,
An hnen ihsin thlairawl siahpawl nan lâk ruangah,
Lungto ser hlir in inn sak hman uhla,
A sungah nan cêng lo ding;
Sabit hmuan ṭha zet nan tuah ko nain,
Cumi ihsin sabitzu nan in cuang lo ding.
12 Ziangahtile nan thilsual tuah mi liangluang le nan sualpawl a nasatzia ka thei:
Midik cu harsatnak nan pe ih, nawhthuh nan la;
Kăwtsuah ah mifarahpawl nan hawisan.
13 Curuangah, cutivek cān ah cun khawruatthiampawl daiten an um men,
Ziangahtile cucu cān ṭhalo a si.
14 Nan nun theinak dingah thil ṭhalo hawl loin,
Thil ṭha hawl uh;
Nan rak ti bangkhan,
Ralkap rualpawlih Pathian Jehovah in a lo umpi ding.
15 Thil ṭhalo hua uh, thil ṭha duh uh;
Kăwtsuah ah diknak dĭn uh.
Ziangmaw ti talin ralkap rualpawlih Pathian Jehovah in
Joseph hnám tāngsŭn parah
Zangfahnak a nei na hman maw!

Jehovah Ni

16 Curuangah ralkap rualpawlih Pathian Jehovah, Bawipa in hihi a sim:

«Kăwtthler hmuahhmuah ah râk ruangronak a um ding ih,
Zinpipawl hmuahhmuah ah,
‹Ai law! Ai law!› tiah an ti ding.
Lóthlopawl cu ṭah dingin an ko ding ih,
Ṭahthiampawl cu râk ruangro dingin.
17 Sabit hmuan hmuahhmuah ah ṭahnak a um ding,
Ziangahtile nanmah ka lo hruttlăng ding,» tiah Jehovah in a ti.
18 Ai law, Jehovah ni a duhtupawl hnenah cun!
Ziangahtile nan hrangah Jehovah ni cu ziang a ṭhahnem?
Cuih ni cu thimnak le tleu umlonak a si ding.
19 Cumi cu mi pakhat kiosa hnen ihsin tlân ih,
Saváwm táwng thotho vek le,
A inn ah tlânlut ih,
Phăr parih kut ret ih, rul ih cuk vek a si.
20 Jehovah ni cu tleu si loin thim a si lo maw?
Cumi cu vâng um riai lo, thim mepmep a si lo maw?
21 Nan puai nipawl cu ka hua ih ka fih,
Cule nan tawnkhawmawknak hleicepawl par khalah lungsinak ka nei lo.
22 Nan Meiur Thilhlănpawl le nan Thlairawl Thilhlănpawl cu in pe khal uhla,
Ka lo cohlang hai cuang lo ding,
Nan ran thau Remnak Thilhlăn khal ka ngaihsak lo ding.
23 Nan hla thawmvângpawl tla ka hnen ihsin lahlo uh,
Ziangahtile nan hri nei tum mipawlih awnmawi ka ngaithla lo ding.
24 Cuhnakin diknak cu tiva bangin luang sawn sehla,
Dingfelnak cu tivate luang ringring bangin luang sawn seh.
25 «Maw Israel sungza, ramṭhing ah kum 40 sung raithawinakpawl le thilhlănpawl in rak pe maw?
26 Nan siangpahrang Sikkuth-ih milempawl le nan hrangih nan tuah mi nan arsi pathian Kiun khal nan rak zâwn.
27 Curuangah Damaskas pawn lamah ralkaih ah ka lo kuat ding,» tiah a hmin ralkap rualpawlih Pathian Jehovah in a ti.

6

Zion le Samaria Ralrin Peknak

1 Zion ih nuam huahhi ih umpawl le,
Samaria Tlang ih ralmûang zetih umpawl nan hmakhua a pit a si!
Nannih cu miphunpawl lakih a ṭhabikpawl lak ihsin hrilsin mi nan si,
Israel sungza ih run pan mi nan si.
2 Kalneh khua ah feh uhla, zoh hnik uh;
Cule cutawk ihsin hmun ropi Hamath lamah feh uh;
Cun Filisṭia-mipawlih khawpi Gath lamah suk uh.
Hih lalrampawl hnakin nan ṭhasawn maw si?
Asilole an ramkulh cu nan ramkulh hnakin a ropisawn maw si?
3 Nannih vansan ni hlăwnhlotupawl le, Nunrâwng lalnak run keng naitupawl?
4 Annih cu vuiho ihkhunpawl parah an zau,
Ihkhun nuam parah an lāwng tûalto,
Rante rual lak ihsi tuufa no le
Hruang sungih câwpa nopawl an ei;
5 Annih cun hri nei tum mipawl tumdān an phuahcawp ih,
David bangin anmai hrangah hla an phuahcawp;
6 No tumpi hmangin sabitzu an in ih,
Hriak ṭhabik an hnihaw,
Sihmansehla Joseph-ih zăwnzaihnak ah an thin a na lo.
7 Curuangah anmah cu ralkaih hmaisabikpawl vekin ralkaih ah an feh ding ih,
Puai hmun ih a zauhuahhipawl kha an um nawn lo ding.
8 Bawipa Jehovah in amai nunnak sālin sia a săm,
Ralkap rualpawlih Pathian Jehovah in,
«Jakob-ih hngalnak ka fih ih,
A hauhruangpawl ka hua;
Curuangah hi khawpi le
A sungih um minung zaten ka hlan ding,» tiah a ti.

9 Cun hitin a si ding, inn pakhat ah mi pahra an tān asile, an thi thluh ding. 10 Cule mithi sungkhat pakhat, phum dingih hriak thihtu, inn sung ihsin inn lengih ruh run cawisuak dingih dăwmtu cun inn sungrilbik ih um mi hnenah, «Na hnenah an um lai maw?» tiah a ti ding.

Cun anih in, «Um nawn lo,» tiah a ti ding.

Cule anih in, «Daiten um aw! Ziangahtile Jehovah hmin kan sal ngam lo,» tiah a ti ding.

11 Ziangahtile zoh hnik, Jehovah in thupek a pe ding ih:
Inn tumpi cu tlabăl remremin le,
Inn fate cu săwprăwp thluh ko a ṭhaitbăl ding.
12 Lungpi parah ráng an tlân maw si?
^aCuih hmun ah câwcangpawl in lei an let maw si?
Cuticingin nannih cun diknak cu thihsi ah nan canter ih,
Dingfelnak rah cu hnîtkhâ ah nan canter.
13 Nannih ^bLo Debar khawpi parih lungawiaipuangtupawl in,
«Kanmai cahnak in Karnaim khawpi kan la a si lo maw?» tiah nan ti.
14 «Asinan, zoh hnik, ralkap rualpawlih Pathian Jehovah in, Maw Israel sungza, nanmah dokalhin miphun ka tungding ding.
Annih in Hamath luhnak ihsin Arabah tivate tiang an lo dekcăwk vivo ding,» tiah a phuang.

6:12^a Cuih hmun: Tifinriat a si men thei.

6:13^b Lo Debar: Zianghmanlo tinak a si.

7

Kharbawk Larnak

1 Bawipa Jehovah ih i hmuh mi cu hihi a si: ngai hnik, ruah hmaisa thlairawl a keuh thăwk cān ah kharbawk burpi a suakter. Ngai hnik, cumi cu siangpahrang-ih ^afâng an ah hnuih ruah hmaisa thlairawl a si. 2 Cule hitin a si, cuih ram thlairawl cemviar an ei ṭheh tikah, kei in,

7:1^a fâng an ah hnuih: Siangpahrang tuu hmul meh hnu a si men thei.

«Maw Bawipa Jehovah, ngaidam hram aw!
Ziangtin Jakob cu a ding thei ding,
Ziangahtile anih cu a derthawm tuk,»

tiah ka ti.

3 Himi thuhla ah Jehovah a lamlêt lehsal. «A thleng lo ding,» tiah Jehovah in a ti.

Meisa Larnak

4 Bawipa Jehovah in in hmuh mi cu hihi a si: ngai hnik, Bawipa Jehovah in meisa hmangin buainak a ko ih, cumi cun ti thûk zet cu a eirál ih, ram tla a kangrál. 5 Cun kei in,

«Maw Bawipa Jehovah, zangfahten bāng aw!
Ziangtin Jakob a ding thei ding,
Ziangahtile anih cu a derthawm tuk!»

tiah ka ti.

6 Cule Jehovah cu himi thuhla ah a lamlêt lehsal. «Himi khal tuah a si lo ding,» tiah Bawipa Jehovah in a ti.

Tahdiknak Hri Larnak

7 Hihi anih ih i hmuh mi cu a si: zoh hnik, Bawipa cu a kut ah darhlumthlai hri kengin, darhlumthlai hri thawi dawl mi kulh kiangah a ding. 8 Cule Jehovah in ka hnenah, «Amos, ziang na hmu?» tiah i ti.

Cule kei in, «Darhlumthlai hri!» tiah ka ti.

Cun Bawipa in, «Zoh hnik, ka mi Israel lakah darhlumthlai hri ka ret. Anmah cu ka zuah hai nawn lo ding.

9 Isak ih hmun sângpawl cu a ṭhing ding ih,
Israel hmun thianghlimpawl cu a lawnglak ding.
Jeroboam sungza dokalhin ralnâm thawn ka tho ding,»

tiah a ti.

Amaziah-ih Phunzainak

10 Cun Bethel puithiam Amaziah in Israel siangpahrang Jeroboam hnenah hitin thu a cah, «Israel sungza lakah Amos in nangmah dokalhin a lo phiarthup a si. A ṭawngkampawl hmuahhmuah cu ram hin a phur thei lo ding. 11 Ziangahtile Amos ih sim mi cu hihi a si:

‹Jeroboam cu ralnâm in a thi ding ih,
Israel cu anmai ram ihsin ralkaih ih hruaihlo an si tengteng ding,› »

tiin.

12 Cun Amaziah in Amos hnenah,

«Nang hmutu, feh aw!
Judah ram ah tlân aw.
Cu tawkah rawl ei awla,
Cu tawkah thuphuang aw.
13 Asinan Bethel ah cun thuphuangsal nawn hlah,
Ziangahtile himi cu siangpahrang hmun thianghlim a si ih,
Siangpahrang inn a si,»

tiah a ti.

14 Cun Amos in a sâng ih, Amaziah hnenah,

«Kei cu profet ka si lo,
Profet fapa khal ka si lo,
Keimah cu tuukhāl le ^asikamor rah kilkhawitu men ka si sawn.
15 Cun rante rual ka thlun hai laiah Jehovah in i hruai ih,
Jehovah in ka hnenah, ‹Feh aw, ka mi Israel hnenah thuphuang aw,› tiah i ti.
16 Curuangah Jehovah kamsuakthu thei aw:
Nang in, ‹Israel dokalhin thuphuang hlah,
Cule Isak sungza dokalhin ṭawng hlah,› tiah na ti.

7:14^a sikamor: 1Sp 10:27 simfiangnak zoh aw.

17 «Curuangah himi hi Jehovah ih sim mi a si:

‹Na nupi cu khawpi sungah hlawhhlâng ah a cang ding;
Na fanupawl le fapapawl cu ralnâm in an thi ding;
Na ram cu tah a si ding ih, ṭhen a si ding;
Nang cu ram bawrhbang ah na thi ding ih,
Israel cu amai ram ihsin ralkaih ih hruaihlo tengteng a si ding,› tiin,»

tiah a ti.

8

Ṭhal Thing Rah Larnak

1 Bawipa Jehovah ih i hmuh mi cu hihi a si: ngai hnik, ṭhâl thing rah kho khat a um. 2 Cule anih in, «Amos, ziang na hmu?» tiah i ti.

Cule kei in, «Ṭhal thing rah kho khat,» tiah ka ti.

Cun Jehovah in ka hnenah,

«Ka mi Israel hrangah a cemnak a thleng thlang;
Ka zuah hai nawn lo ding.
3 Cule cuih ni ah, temple hlapawl cu
Ṭahaihramnak ah a cang ding, Bawipa Jehovah in a ti.
Hmun kip ah ruak a tawrin a um ding,
Cupawl cu thawmvâng um lo ten hlăwn an si ding,»

tiah i ti.

4 Nannih mitlasampawl dawlhthluhtu le
Ram sungih mifarahpawl palbĕttu, hihi ngaithla uh,
5–6 «Thlairawl kan zuar theinak dingah,
Ziang tikah Thla Thar a cem ding?
Sangvut kan zuar theinak dingah,
Efa kan fatetter theinak dingah,
Shekel kan tumter theinak dingah,
Cuaithlainak diklo hmangin mi kan bum theinak dingah,
Mifarahpawl ngun ih kan lei theinak dingah,
Mitlasampawl kedam kăwp khat ih kan lei theinak dingah le,
Sangvut ṭhalo tiangih kan zuar theinak dingah,
Ziang tikah Sabbath a cem ding?»

tiah nan ti.

7 Jakob-ih ^ahngalnak sālin Jehovah in sia a săm:

8:7^a hngalnak: Pathian a relnak a si.

«An tuah mi pauhpauh ka hngilh dah hrimhrim lo ding,» tiin.
8 Himi ruangah ram cu khūr loin le ram sungih um zaten ṭap loin an um ding maw?
A ram sung zaten Nile Tivapi bangin a tho ding,
Izip Tivapi bangin a tho ding, a suar ding ih a rehsal ding.
9 «Cule cuih ni ah hitin a si ding,» Bawipa Jehovah in a ti,
«Sun hnuah ni ka tlakter ding ih,
Sunvâng laiah leilung ka thimter ding.
10 Nan puaipawl cu lusûnṭahnak ah ka cangter ding ih,
Nan hlapawl hmuahhmuah cu ṭahnak ah ka cangter ding;
Cule mi kip tâi ah buri ka ret ding ih,
Mi kip lu cu ka kawngter ding.
Nan dinhmun cu fapa neihsŭn lusûn bangin ka tuah ding,
Cule a netnak cu a khâ mi ni vek a si ding.
11 «Ngai hnik, ram sungah pām ka thlenter ding ni cu a ra lai, Bawipa Jehovah in a ti,
Rawl pām a si lo,
Tihāl khal a si lo,
Jehovah kamsuakthupawl theihnak pām a si sawn,
12 Tifinriat pakhat ihsin tifinriat pakhat ah,
Sak lam ihsin nisuahnak lamah an vâkvai ding;
Jehovah kamsuakthu hawlin
Suk le so ah an tlân ding,
Asinan an hmu lo ding.
13 «Cuih ni ah fala himpawl le
Tlangvalpawl cu tihâlin an cau ding.
14 ^aSamaria sualnak sálih sesămtupawl le,
‹Na pathian a nun vekin, Maw Dan!› tiih sesămtupawl le,
‹Beersheba lamzin a nun vekin!› tiih sesămtupawl cu an tlu ding ih,
An thosal nawn lo ding,» tiin.

8:14^a Samaria sualnak: Siria-mipawlih nunau pathian (Ashimah) a relnak a si.

9

1 Biakṭheng kiangah Bawipa ding lai ka hmu ih, anih cun,

«Sângka hnuai zawn zialpawl hnîn dingin, a parih lubolpawl thawi aw,
Cule an zate lu parah bălthla hai aw.
Ralnâm in a tāng mipawl ka that hai ding.
Pakhat hman an tlânsuak lo ding ih,
Pakhat hman an luat lo ding.
2 Sheol tiang lai hman hai sehla,
Cutawk ihsin ka kut in a lasuak hai ding;
Van ah an kai a si khalle,
Cutawk ihsin ka dirthla hai thotho ding.
3 Cule Karmel tlang zimih an relh a si khalle,
Cutawk ihsin ka hawl hai ding ih ka la hai ding;
Ka hnen ihsin tifinriat tawdĕngah thupaw hman hai sehla,
Cutawk ihsin rul thu ka pe ding ih, a cuk hai ding.
4 An doralpawl hmaiah ralkaih ah feh khal hai sehla,
Cutawk ihsin ralnâm thu ka pe ding ih,
A that hai ding.
An parah ṭhatnak hrang si loin,
Siatnak hrangah ka mit ka ret ding,»

tiah a ti.

5–6 Ralkap rualpawlih Bawi Jehovah, a hmin cu Jehovah a si.
Anih in leilung a thâm ih, a zuprál,
Cutawk ih cêng mi zaten an ṭap,
Cuih leilung vangdâp parih um hmuahhmuah cu Nile Tivapi bangin an tho ih,
Izip Nile Tivapi bangin an rehsal.
Van ah a pindan tlunta a sak ih leilung ah lei hnuai pindan a dĭn;
Tifinriat tipi a ko ih leilung vangdâp parah a burh.
7 «Maw Israel tefapawl, nannih cu ka parah
Kush-mipawl vek nan si lo maw? Jehovah in a ti.
Israel cu Izip ram ihsin ka hruaisuak a si lo maw,
Filisṭia-mipawl cu Kaftor ihsin,
Siria-mipawl cu Kir ihsin?
8 Ngai hnik, Bawipa Jehovah mit cu lalram sualrál parah a fu ih,
Cuih ram cu leilung vangdâp ihsin ka thaihlo ding;
Sikhalsehla Jakob sungza cu ka thaihlo thluh hai lo ding,» tiah Jehovah in a phuang.
9 «Ziangahtile thu ka pe hrimhrim ding ih,
Israel sungza cu miphun hmuahhmuah lakah ṭangṭa ih fâng khei vekin ka khei ding;
Cuticingkhalin fáng khat hman lei ah a tla cuang lo.
10 Ka mipawl lakih misual hmuahhmuah cu ralnâm in an thi ding,
‹Vanduainak cun in man lo ding ih, in pah fawn lo ding,› tiih a titupawl thawn an thi ding.

Israel Tundinsal a Si Ding

11 «Cuih ni ah a tlu zo mi David-ih puanthlam ka tungding ding ih,
A băl mipawl ka rĕm ding;
A siatnakpawl ka rĕmṭha ding ih, hlanlai vekin ka dĭnsal ding.
12 Cutin Edom tāngsŭnpawl le ka hmin ih kawh mi,
Miphunpawl an congah thei ding,» tiah himi tuahtu Jehovah in a phuang.
13 «Ngai hnik, lei lettu in fâng attu a dawiman ding cān le
Sabit palsawrtu in a ci tuhtu a dawiman ding cān a thleng ding, Jehovah in a ti.
Tlangpawl ihsin sabitzu thlum a fawr ding ih,
Tlangmualpawl hmuahhmuah cu a ciapter thluh ding.
14 Ka minung Israel-ih vanneihnak ka tungdingsal ding;
Annih in khawpi ṭhingpawl an sakṭha ding ih, an luah ding.
Sabit hmuan khal an tuah ding ih, cumi ihsin sabitzu an in ding;
Hmuanpawl khal an tuah ding ih, cumi ihsin a rah an ei ding.
15 Annih cu anmai ram ah ka phun hai ding ih,
Anmah ka pek mi ram ihsin phawi an si dah nawn lo ding,» tiah Jehovah na Pathian in a ti.