About Bible Thianghlim | ©

BibleThianghlim – PUITHIAM HNAṬUANNAK

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

PUITHIAM HNAṬUANNAK

12345678910
11121314151617181920
21222324252627

• A ngantu: Mosi
• A huap sung cān: B.C. 1445 hrawng
• Ngan kum: B.C. 1445 hrawng

Pathian in amai «Puithiam miphun» si dingah Israel a hril. Leitlun miphunpawl lakah miphun thianghlim pakhat vekih nung dingah Pathian in anmah a rak hril (Pui 19:6). Suahlannak cabu neta lamin cuih thu in sim thawk, asinan Puithiam Hnaṭuannak cabu in cuih thu cu kimcâng sinsinin a rêl. Hih cabu sungah «thianhlimnak» ṭawngfángpawl vei 150 lênglo a lang. Thianhlimnak cu thiarfihlimawknak tinak a si, a hleicein nuncan ṭha lo lak ihsi thiarfihlimawknak a rel duh. Pathian in Israel-mipawl in amai thianhlimnak an langter ding a duh. Hih hmuitin mi thleng thei dingin Puithiam Hnaṭuannak cabu hi cipciar zetih zohṭhim dingah anmah a pe.

Puithiam Hnaṭuannak cabu hi a tlangpiin thuhlawm pahnih ah ṭhen a si. Bung 1-10 in raithawinak hmangin a thianghlim mi Pathian cu ziangtin kan pan ding ti thu a rêl. Himi bungpawl in Biakbûk ah Israel-mipawl ih an hlăn ding mi raithawinak thuhla tampi in sim. A sual mi minungpawl in raithawinak hmangin a thianghlim mi Pathian thawn pehzăwmawknak ziangtin an nei thei ih, an neipeh vivo thei ding ti kha hmuhsaknak hmangin in sim. Himi bungpawl in puithiampawlih covo khal an simfiang fawn. An raithawinakpawl tla pawmsak an si theinak dingah milai in a tling mi aiawhtu an ṭul ti khal himi simfiangnakpawl in in rak hmuh. Riahsiatumzain, Pathian in puithiam hmaisabik pahnih Nadab le Abihu te cu a rak that, ziangahtile Pathian ih thu a rak pek hai mi tidān dingpawl kha annih in an rak thlun lo.

Bung 11-27 in a thianghlim mi Pathian hmaiah ziangtin nun thiangin kan nung thei ding ti an simfiang. Hitawk ih dānpawl hin ziangtin Israel-mipawl in Pathian thianhlimnak an langter ding ti an langfiangter. Himi dānpawl lakih hrekkhat, a hleicein thiannak le thianlonak dānpawl in (bung 11-15), hmuhsaknakpawl hmangin thianhlimdan ding an zirh. A dang dān tamtakpawl in sual ihsin an nuncan kilhim dingah Israel-mipawl a bawm. Cupawl in hibang innsungsang thu, innhnen thu, nunau le mipa sinak thu, hnaṭuan thu le hnipuan thu ih ni tin nundān ding tampi an rêl. Bung 16 hi bung thupi zet a si ih, Sualkhuhthawinak Ni a tarlang.

Mosi in Puithiam Hnaṭuannak cabu a ngan ihsi thăwkin thil umdān nasazetin a rak thlengaw. Asinan hi cabu ih in zirh mi cu tuihni ih kan nunpi dingah a tāng lai thotho. Hi cabu hin Jesu Khrih cu sual hrangih raithawinak famkim le Pathian hnenih in hruaitu puithiam tlamtling a sinak a sawhkhih. Ziangti vekin zumtupawl in kan nun tinkim ah thianhlimnak kan dawi a ṭul ti khal a fiangter fawn. Apostol Peter ih a ngan vekin, amah Pathian a thianhlim ruangah thianghlim ve dingin Pathian in in duh a si (1Pe 1:16).

1

Meiur Thilhlăn

1 Jehovah in Mosi a ko ih, Tawnawknak Puanthlam ihsin a hnenah, 2 «Israel tefapawl sim awla, an hnenah, ‹Nan lakih zokhal in Jehovah hnenah thilhlăn a rak ken tikah, sumhnám lakih ranpi rual lak ihta maw, rante rual lak ihta simaw a keng pei.

3 ‹A thilhlăn cu Meiur Thilhlăn ding ranpi rual lak ihta asile, sawisel ding um lo mi a pa a hlan pei, Jehovah hmaiih Tawnawknak Puanthlam luhnak hmaiah amai lungpuak rori in a hlan ding a si. 4 Cun Meiur Thilhlăn lu parah a kut a suang pei, cule amah aiah a hrangih sualkhuhthawinak tuahnak ah cumi cu cohlansak a si ding. 5 Jehovah hmaiah câwpa a that pei, cule Aaron fapa puithiampawl in a thisen an la pei ih, Tawnawknak Puanthlam luhnak kiangih Biakṭheng kimvel hmuahhmuah an theh pei. 6 Cule Meiur Thilhlăn cu a vun a lip pei ih, a sa a cánnâwi ṭheh ding a si. 7 Puithiam Aaron fapapawl in Biakṭheng parah meisa an ret pei ih, meisa parah remten thing an peng pei. 8 Cun Aaron fapa puithiampawl in a sa can cia pawl, a lu le a thaupawl cu Biakṭheng par meisa tlunih thing parah remten an ret pei, 9 asinan a sungrilpawl le a kepawl cu tidai in a khawlh pei. Cule puithiam in Jehovah hnenih rimthaw hrang meisa ih ur mi thilhlăn cu, Meiur Thilhlăn hrangah Biakṭheng parah a zaten a ur ding a si.

10 ‹A thilhlăn cu Meiur Thilhlăn ding rante rualpawl ihta me asilole tuu a si ahcun, sawisel ding um lo mi a pa a rak keng pei. 11 Jehovah hmaiah Biakṭheng sak lam sirah a that pei, cule Aaron fapa puithiampawl in a thisen cu Biakṭheng kimvel hmuahhmuah an theh pei. 12 Cule a lu le a thau thawn a sa a cánnâwi ṭheh ding ih, puithiam in Biakṭheng par mei tlunih thing parah remten a ret pei, 13 asinan a sungrilpawl le a kepawl cu tidai in a khawlh pei. Cun puithiam in a zaten a keng pei ih, Biakṭheng parah a ur pei, cumi cu Jehovah hnenih rimthaw, meisa ih ur mi thilhlăn, Meiur Thilhlăn a si.

14 ‹Cule Jehovah hnenih a thilhlăn Meiur Thilhlăn cu vâtepawl lak ihta asile, a thilhlăn hrangah thuropawl simaw, laileng notepawl simaw a rak keng pei. 15 Puithiam in cumi cu Biakṭheng ah a rak keng pei ih, a lu a merhtan hnuah, Biakṭheng parah a ur pei, a thisen cu Biakṭheng sirah a thlawrkâng pei. 16 Cule a cûr cu a hmulpawl thawn a thianfai pei ih, Biakṭheng nisuahnak lam sir, vutcâm retnak hmun ah a hlăwn pei. 17 Cun a thlapawl ṭhenawcat lo dingin a âwm a băuhthlek pei, cule puithiam cun Biakṭheng parih meisa tlun thing parah a ur pei. Cumi cu Jehovah hnenih rimthaw, meisa ih ur mi thilhlăn, Meiur Thilhlăn a si.

2

Thlairawl Thilhlăn

1 ‹Mi pakhat khat in Jehovah hnenah Thlairawl Thilhlăn a ken tikah, a thilhlăn cu sangvut phŭt a si pei. Cule a parah hriak a tawih pei ih, a parah frankinsense a hnih pei. 2 Aaron fapa puithiampawl hnenah a rak keng pei ih, an lakih mi pakhat in sangvut phŭt zate khat le hriak cu frankinsense zate thawn a la pei. Cule puithiam in cumi cu a zate aiah Biakṭheng parah a ur pei, cumi cu meisa ih ur mi thilhlăn, Jehovah hnenih rimthaw a si. 3 Thlairawl Thilhlăn hlei cu Aaron le a fapapawl hrangah a si pei. Cumi cu meisa ih ur mi Jehovah hrangih thilhlănpawl lakah a thianghlim zet mi a si.

4 ‹Cule thŭk ih kăn mi thilhlăn pakhat Thlairawl Thilhlăn hrangih na rak ken asile, hriak rawi mi sangvut phŭt ih tuah mi thilnu telh lo sangperpawl simaw, hriak măn mi thilnu telh lo sangper pátepawl simaw a si pei. 5 Asinan na thilhlăn cu khēngdau ih kăn mi Thlairawl Thilhlăn a si ahcun, sangvut phŭt ih tuah mi thilnu telh lo hriak thawi rawi mi a si pei. 6 Cumi cu na phelnâwi ṭheh pei ih, a parah hriak na tawih pei, cumi cu Thlairawl Thilhlăn a si.

7 ‹Na thilhlăn cu khuh mi beldau ih kăn mi Thlairawl Thilhlăn asile, sangvut phŭt le hriak ih tuah mi a si pei. 8 Himi thilpawl ih tuah mi Thlairawl Thilhlăn cu Jehovah hnenah na rak keng pei. Cule puithiam hnenih ap a si hnuah, anih in Biakṭheng kiangnaiah a rak keng pei. 9 Cun puithiam in Thlairawl Thilhlăn ziangmaw zât cu a zate aiah a la pei ih, Biakṭheng ah a ur pei. Cumi cu Jehovah hnenih rimthaw meisa ih ur mi thilhlăn a si. 10 Cule Thlairawl Thilhlăn hlei mi cu Aaron le a fapapawlih covo a si pei. Cumi cu meisa ih ur mi Jehovah hrangih thilhlănpawl lakah a thianghlim zet mi a si.

11 ‹Jehovah hnenih na rak ken mi Thlairawl Thilhlăn cu thilnu thawi tuah mi a si lo pei, ziangahtile Jehovah hnenah meisa ih ur mi ziang vek thilhlăn lak khalah thilnu simaw, khuaitizu simaw na ur cih lo pei. 12 Rah Hmaisabik Thilhlăn thuhla ah cun cupawl cu Jehovah hnenah nan keng ding a si, asinan rimthaw hrangah Biakṭheng parah ^aur ding an si lo. 13 Cule na Thlairawl Thilhlăn kip in cite na phulh pei ih, na Thlairawl Thilhlăn ah na Pathian thawi thukham cite na tuahnak beheuter sian ding a si lo. Na thilhlăn hmuahhmuah zawngah cite na keng ding a si.

2:12^a ur: A ṭawng hrampi ah cun, «kaisohter» ti a si.

14 ‹Jehovah hnenah rah hmaisabikpawl lak ihta Thlairawl Thilhlăn na ken asile, Thlairawl Thilhlăn cu rah hmaisabikpawl vui hlâmte dēndip cia zo mi le meisa ih kăn mi na keng pei. 15 Cule a parah hriak na tawih pei ih, a parah frankinsense na culh pei. Cumi cu Thlairawl Thilhlăn a si. 16 Cun puithiam in a zate aiah a hrekkhat, thlairawl dēndip cia ziangmaw zât, hriak ziangmaw zât le frankinsense zate cu Jehovah hnenih meisa ih ur mi thilhlăn hrangah a ur ding a si.

3

Remnak Thilhlăn

1 ‹A thilhlăn cu Remnak Thilhlăn raithawinak a si ih, ranpi rual lak ihta a nu maw a pa simaw a ken asile, cumi cu Jehovah hmaiah sawisel ding um lo a keng pei. 2 Cule a thilhlăn mi lu parah a kut a suang pei ih, Tawnawknak Puanthlam luhnak hramah a that pei, cule Aaron fapa puithiampawl in a thisen cu Biakṭheng kimvel hmuahhmuah an theh pei. 3 Cun Remnak Thilhlăn raithawinak ihta Jehovah hnenih meisa ih ur mi thilhlăn a keng pei. A sungrilpawl tuamtu thau le a sungrilpawl bawhtu thau hmuahhmuah, 4 a kaileng pahnih le a hnak kapih um cuih kaileng pahnih bawhtu thau le kailengpawl tlunih a thinhnûn thaupawl tla a phawrh pei, 5 cule Aaron fapapawl in Jehovah hnenih rimthaw, meisa ih ur mi thilhlăn hrangah meisa tlun thing parih a um mi Meiur Thilhlănnak thawn cupawl cu Biakṭheng parah an ur cih ding a si.

6 ‹Jehovah hnenih Remnak Thilhlăn raithawinak hrangih a hlăn mi cu rante rual lak ihta asile, a nu a si ah simaw, a pa a si ah simaw sawisel ding um lo a keng pei. 7 A thilhlăn dingah tuufa no a ken a si ahcun, Jehovah hmaiah hitin a keng ding a si. 8 A thilhlăn mi lu parah a kut a suang pei ih, Tawnawknak Puanthlam hmaiah a that pei, cule Aaron fapapawl in a thisen cu Biakṭheng kimvel hmuahhmuah an theh pei.

9 ‹Cun Jehovah hnenih meisa ih ur mi thilhlăn dingah Remnak Thilhlăn raithawinak ihta a hlan ding a si, a thau le a zāngruh thawi a naihnak a mei thau pumpi a phawrh ding a si. Cule a sungrilpawl tuamtu a thau le a sungrilpawl bawhtu thau hmuahhmuah, 10 a kaileng pahnih le a hnak kapih um cuih kaileng pahnih bawhtu thau le a kailengpawl tlunih a thinhnûn thaupawl cu a phawrh ding a si, 11 cule cupawl cu rawl vekin puithiam in Jehovah hnenih meisa ih ur mi thilhlăn ah Biakṭheng parah a ur pei.

12 ‹Cule a thilhlăn cu me asile, cumi cu Jehovah hmaiah hitin a keng pei. 13 Anih cun a lu parah a kut a suang pei ih, Tawnawknak Puanthlam hmaiah a that pei, cule Aaron fapapawl in a thisen cu Biakṭheng kimvel hmuahhmuah an theh pei. 14 Cun a thilhlăn ihta Jehovah hnenih meisa ih ur mi thilhlăn dingah a keng pei. A sungrilpawl tuamtu thau le a sungrilpawl bawhtu thau hmuahhmuah, 15 a kaileng pahnih le a hnak kapih um cuih kaileng pahnih bawhtu thau le a kailengpawl tlunih a thinhnûn thaupawl cu a phawrh pei, 16 cule cupawl cu rawl vekin puithiam in rimthaw hrangah meisa ih ur mi thilhlăn ah Biakṭheng parah a ur pei, a thau hmuahhmuah cu Jehovah ta a si.

17 ‹A thau siseh, a thisen siseh, nan ei lo pei ti mi hi nan cēnnak hmuahhmuah ah nan tesinfa san tiangin kumkhaw sakhaw dān a si pei,› tiah sim aw,» tiah a ti.

4

Sual Thilhlăn

1 Jehovah in Mosi hnenah, 2 «Israel tefapawl hnenah, ‹Mi pakhat in Jehovah thupekpawl lakih pakhat khat dokalhih tum lo piin sual a tuah pang ih, tuah dingih mawi lo mi cupawl lakih pakhat khat a tuah pang asile, hitivekin na tuah ding a si.

Puithiam hrang Sual Thilhlăn

3 ‹Hriak thih puithiam in sual a tuah ih mipi parah mawhnak a thlenter asile, sual a tuah mi hrang Sual Thilhlăn dingah Jehovah hnenah sawisel ding um lo câwpa tûai keng seh. 4 Jehovah hmaiih Tawnawknak Puanthlam luhnak ah câwpa tûai cu a rak keng pei ih, cuih câwpa lu parah a kut a suang pei, cule Jehovah hmaiah câwpa cu a that pei. 5 Cun hriak thih puithiam in câwpa tûai thisen ziangmaw zât a la pei ih, Tawnawknak Puanthlam ah a rak keng pei. 6 Puithiam in thisen sungah a kutzung a vun hnim pei ih, thisen ziangmaw zât cu Hmun Thianghlim puanzar hmaiih Jehovah hmaiah vei sarih a theh pei. 7 Cule puithiam in Tawnawknak Puanthlam sungih a um mi Jehovah hmaiih rimhmui thaw urnak Biakṭheng kipawl parah thisen ziangmaw zât a mān pei, cule a tāng mi câwpa tûai thisen cu Tawnawknak Puanthlam luhnak hmaiih a um mi Meiur Thilhlăn Biakṭheng tawphah ah a thle ṭheh pei. 8 Anih in Sual Thilhlăn hrangah câwpa thau hmuahhmuah cu cumi ihsin a la ṭheh pei. A sungrilpawl tuamtu thau le a sungrilpawl bawhtu thau hmuahhmuah, 9 kaileng pahnih le a hnak kapih um cuih kaileng pahnih bawhtu thau le kailengpawl tlunih a thinhnûn thaupawl cu, 10 Remnak Thilhlăn raithawinak câwpa ihsin phawrh a si vekin a phawrhsuak pei. Cule cupawl cu puithiam in Meiur Thilhlănnak Biakṭheng parah a ur pei. 11 Asinan câwpa vun le a sa hmuahhmuah cu a lu le a kepawl, a sungrilpawl le a êk thawn, 12 câwpa cu a pumhlum in riahhmun khuarnak lengih vutcâm thletnak hmunfai ah a thiar ṭheh pei ih, thingpen parah mei in a ur pei; vutcâm thletnak hmun ah cumi cu ur ding a si.

Mipi hrang Sual Thilhlăn

13 ‹Cun Israel mipi-umkhawm zaten tum lo piin sual an tuah ih, cuih sualnak cu mipungkhawmpawlih hmuh loin Jehovah thupek mi pakhat khat dokalhin tuah mawi lo thil pakhat khat an tuah asile, an mawh a si; 14 an sual tuah mi cu theihsuak a si tikah mipungkhawm in sual hrangah câwpa tûai an hlan pei ih, Tawnawknak Puanthlam hmaiah an rak keng pei. 15 Cule mipi-umkhawm upapawl in Jehovah hmaiih câwpa lu parah an kut an suang pei. Cun câwpa cu Jehovah hmaiah thah a si pei. 16 Hriak thih puithiam in Tawnawknak Puanthlam ah câwpa thisen ziangmaw zât a rak keng pei. 17 Cun puithiam in thisen sungah a kutzung a hnim pei ih, Jehovah hmaiih puanzar hmai lam kha thisen in vei sarih a theh pei. 18 Cule Tawnawknak Puanthlam sungih Jehovah hmaiih Biakṭheng kipawl parah thisen ziangmaw zât a mān pei, cule a tāng mi thisen cu Tawnawknak Puanthlam luhnak hmaiih a um mi Meiur Thilhlănnak Biakṭheng tawphah ah a thle ṭheh pei. 19 Anih in a thau hmuahhmuah cu a la pei ih, Biakṭheng parah a ur pei. 20 Cule Sual Thilhlăn câwpa parih a tuah vek cekci in cuih câwpa parah a tuah pei, cutivekcun a tuah ding a si. Cutin puithiam in an hrangah sualkhuhthawinak a tuah pei ih, an sual ngaidam a si ding. 21 Cun câwpa cu riahhmun lengah a thiar pei ih, a hmaisa câwpa a ur vekin a ur ding a si. Cumi cu mipungkhawm hrangih Sual Thilhlăn a si.

Hotu hrang Sual Thilhlăn

22 ‹Hotu pakhat in sual a tuah ih, tuah mawi lo mi thil ziang simaw Jehovah a Pathian thupekpawl lakih pakhat khat tum lo piin a tuah asile, amah cu a mawh a si, 23 asilole sual a tuah mi a sual a theihsuakawk asile, amai thilhlăn hrangah sawisel ding um lo mepa, me rual lakih mepa tuaite pakhat a rak keng pei. 24 Cule me lu parah a kut a suang pei ih, Meiur Thilhlăn ran an thahnak hmun ah Jehovah hmaiah a that pei. Cumi cu Sual Thilhlăn a si. 25 Puithiam in a kutzung in Sual Thilhlăn thisen ziangmaw zât a la pei ih, Meiur Thilhlănnak Biakṭheng kipawl ah a mān pei, cule a thisen cu Meiur Thilhlănnak Biakṭheng tawphah ah a thle pei. 26 Cule Remnak Thilhlăn raithawinak sathau vek cekci in a thau cu Biakṭheng parah a ur pei. Cule puithiam in a sualnak thuhla ah sualkhuhthawinak a tuahsak pei ih, a sual ngaidam a si ding.

Bulpak hrang Sual Thilhlăn

27 ‹^aMivantlang lakih mi pakhat khat in tuah mawi lo mi pakhat khat Jehovah thupekpawl lak ihta ziang simaw tuahnak in tum lo piin sual a tuah pang asile, anih cu a mawh a si, 28 asilole sual a tuah mi a sualnak a theihsuakawk asile, sual a tuah mi a sualnak hrangah thilhlăn ah sawisel ding um lo menu pakhat, mepawl lakih menu note pakhat a rak keng pei. 29 Cule Sual Thilhlăn lu parah a kut a suang pei ih, Meiur Thilhlănnak hmun ah Sual Thilhlănnak a that pei. 30 Cun puithiam in a kutzung in cuih thisen ziangmaw zât a la pei ih, Meiur Thilhlănnak Biakṭheng kipawl parah a mān pei, cule a hlei mi thisen hmuahhmuah cu Biakṭheng tawphah ah a thle ṭheh pei. 31 Remnak Thilhlăn raithawinak thau a phawrh vek cekci in a thau hmuahhmuah a phawrh pei, cule puithiam in Jehovah hnenih rimthaw si dingah Biakṭheng parah a ur pei. Cule puithiam in a hrangah sualkhuhthawinak a tuah pei ih, a sual ngaidam a si ding.

4:27^a Mivantlang: Hebru cun «ram-mi» tinak a si.

32 ‹A Sual Thilhlăn dingah tuufa no a rak ken asile, sawisel ding um lo a nu a rak keng pei. 33 Cun Sual Thilhlăn lu parah a kut a suang pei ih, Meiur Thilhlăn ran an thahnak hmun ah Sual Thilhlăn dingah a that pei. 34 Puithiam in a kutzung in cuih Sual Thilhlăn thisen ziangmaw zât a la pei ih, Meiur Thilhlănnak Biakṭheng kipawl parah a mān pei, a hlei mi thisen hmuahhmuah cu Biakṭheng tawphah ah a thle ṭheh pei. 35 Remnak Thilhlăn raithawinak ihta tuufa no thau a phawrh vek cekci in a thau hmuahhmuah a phawrh pei. Cun cumi cu puithiam in Jehovah hnenih meisa ih ur mi thilhlănpawl bangtukin Biakṭheng parah a ur pei. Cutin sual a tuah mi a sualnak hrangah puithiam in sualkhuhthawinak a tuah pei, cule a sual ngaidam a si ding.

5

Mawh Thilhlăn

1 ‹Mi pakhat cu mi ih thukamnak tuah awthâwm hna ih theiin a thil hmuh mi thuhla ah simaw, a thil theih mi thuhla ah simaw theihpitu a si ih, thuṭhennak hmaiih phuang dingih fial a si hnu khalah rel duh loin, sual a tuah asile, a mawhsualnak cu amah in a phur ding.

2 ‹Asilole mi pakhat in a thianglo mi ziangkhal, a thianglo mi ramsa simaw, a thianglo mi sumhnám ruak simaw, a thianglo mi băwkvâk thilnung ruak simaw a thamngah asile, thei lo piih a tham mi a si hmanah amah khal a thianglo mi le mimawh a si thotho. 3 Asilole minung thianlonak a thamngah asile, milai bawrhbangter theitu ziang vek thianlonak a si khalle, thei lo piih a tham mi a si hmanah a theihsuah tiktikah cun mimawh a si ding.

4 ‹Asilole mi pakhat cu a ṭha simaw, a sia simaw tuah dingin ruat lo pi ih sia a săm zuahzo asile, milai in a thukamnak in ziang vek a phuan a si khalle, thei lo piih tuah a si hmanah, a theihsuah tiktikah cun himi thuhla pauhpauh ah mimawh a si ding.

5 ‹Cule hitin a si ding, himi thuhlapawl lakih pakhat khat ah a mawh ti a lăng ah cun, sual ka rak tuah ngai tiah a phuang pei, 6 cule Sual Thilhlăn dingah rante rual lak ihta a nu, tuufa no a nu asilole mefano a nu cu sual a tuah mi a sualnak hrangah Jehovah hnenah amai Mawh Thilhlăn ah a rak keng pei. Cule puithiam in a sualnak thuhla ah a hrangah sualkhuhthawinak a tuah pei.

7 ‹Tuufano a rak ken thei lo asile, a sual tuah mi amai mawh hrangah thuro pahnih asilole laileng no pahnih cu Jehovah hnenah a rak keng pei, pakhat cu Sual Thilhlăn dingah, a dang pakhat cu Meiur Thilhlăn dingah a si pei. 8 Cule puithiam hnenah a rak keng hai pei ih, puithiam in Sual Thilhlăn hrang a hlan hmaisa pei, cule tánsuak ngaingai lo dingin a hngawng in a lu a merh ding a si. 9 Cun puithiam in Sual Thilhlănnak thisen ziangmaw zât kha Biakṭheng sirah a theh pei, cule thisen hlei mi cu Biakṭheng tawphah ah a thlawrkâng pei. Cumi cu Sual Thilhlăn a si. 10 Cule a pahnihnak cu cīn le dān bangtukin Meiur Thilhlăn ah a hlan ding a si. Cule sual a tuah mi a sualnak hrangah puithiam in amai aiawhin sualkhuhthawinak a tuah pei, cule a sual ngaidam a si ding.

11 ‹Asinan thuro pahnih le laileng no pahnih khal a keng thei cuang lo asile, sual a tuahtupa in Sual Thilhlăn dingah sangvut phŭt efa khat ih ṭhen hra ṭhen khat a rak keng pei. Cumi parah hriak a tawih lo pei ih, frankinsense khal a culh lo pei, ziangahtile cumi cu Sual Thilhlăn a si. 12 Cun cumi cu puithiam hnenah a rak keng pei, cule puithiam in a zate aiah zate khat in a la pei ih, Jehovah hnenih meisa ih ur mi thilhlănpawl bangtukin Biakṭheng parah a ur pei. Cumi cu Sual Thilhlăn a si. 13 Puithiam in cu pa hrangah sualkhuhthawinak a tuah pei, hi thilpawl lakih pakhat khat a tuah mi a sualnak ruangah a si ih, a sual ngaidam a si ding. Thlairawl Thilhlăn vek thothoin a hlei cu puithiam covo a si pei,› tiin sim aw,» tiah a sim.

Rulhsalnak

14 Cun Jehovah in Mosi hnenah, 15 «Mi pakhat rinum loin a nung ih, Jehovah-ih ^athil thianghlimpawl thawi pehparin tum lo piih sual a tuah asile, Mawh Thilhlăn hrangah rante rualpawl lak ihta sawisel ding lo tuucang pakhat, hmun thianghlim shekel bangtukin ngun tangka shekel man awmtawk na ti zăt cu Mawh Thilhlăn hrangah Jehovah hnenah a rak keng ding a si. 16 Cule thil thianghlim thawi pehparih sual a tuah mi hrangah rĕmṭhatsalnak a tuah pei, cule ṭhen nga ṭhen khat bêtin puithiam a pe ding a si. Cule puithiam in Mawh Thilhlăn tuucang thawn a hrangah sualkhuhthawinak a tuah pei, cule a sualnak cu ngaidam a si ding.

5:15^a thil thianghlimpawl: ṭhen hra ṭhen khat, thlaithar lam thu siseh, thilhlăn ei lam thu a simnak a si.

17 «Mi pakhat in sual a tuah ih, Jehovah thupekpawl in tuah lo dingih a kham mi hi thilpawl lakih pakhat khat sual a tuah asile, thei lo piih a tuah mi a si hmanah, a mawhsual thotho ih, amai mawhsualnak cu a phur ding a si. 18 Cule Mawh Thilhlăn dingah a man a awmtawk na ti zât in rante rual lak ihta sawisel ding um lo tuucang pakhat puithiam hnenah a rak keng pei. Cule tum lo piih sual a tuah mi a theihlonak thu ah puithiam in a hrangah sualkhuhthawinak a tuah pei, cule a sualnak cu ngaidam a si ding. 19 Cumi cu Mawh Thilhlăn a si, Jehovah dokalhin a mawh taktak a si,» tiin a sim.

6

Bulpak Mawh Thilhlăn

1 Jehovah in Mosi hnenah, 2 «Mi pakhat in a kilhim dingih amah an ap mi thu ah simaw, tiamkam mi thu ah simaw, mi a suamnak thu ah simaw a innhnenpa bumnak in Jehovah parah sual tuahin rinum loih a um asile, asilole a innhnen thil a lawnsak ah simaw, 3 asilole anih in thil hlo sarin le cumi thu cu pheh tahratin, dik lo takin sia a săm ah simaw, mi pakhat khat in hi thilpawl lakih pakhat khat tuahnak in a sual asile, hitin a si ding. 4 Sual a tuah ih mimawh a si ruangah, a rûk mi siseh, a laksak mi thil siseh, kilhim dingih a hnenih ap mi siseh, a thil hlo sar mi siseh, 5 dik lo takih sia a săm zo mi thu hmuahhmuah siseh, a rūlsal ṭheh ding a si. Kimcângten a rulh hleiah ṭhen nga ṭhen khat a bêt pei, cule a Mawh Thilhlăn a hlăn ni ah a neitu pauhpauh hnenah a pe ding a si. 6 Cule Jehovah hnenah a Mawh Thilhlăn a rak keng pei, Mawh Thilhlăn hrangah rante rual lak ihta sawisel ding um lo tuucang pakhat cu a man awmtawk na ti zât in puithiam hnenah a rak keng pei. 7 Cutin puithiam in Jehovah hmaiah a hrangah sualkhuhthawinak a tuah pei, cule hi thilpawl lakih pakhat khat a rak tuah mi mawh cu ngaidam a si ding,» tiin a sim.

Meiur Thilhlăn Dān

8 Cun Jehovah in Mosi hnenah, 9 «Aaron le a fapapawl hnenah, ‹Himi hi Meiur Thilhlăn hrang dān a si, Meiur Thilhlăn cu zanvarten zing lam tiang Biakṭheng thŭk parah a um pei, cule Biakṭheng meisa cu a alh ringring ding a si. 10 Cule puithiam in a patzai sinfen a hruk pei ih, a patzai bâwngbite cu a taksa sangtubik ah a hruk pei, cule Biakṭheng parih meisa in a ur zo mi Meiur Thilhlănnak vutcâm cu a rût pei ih, Biakṭheng sirah a ret pei. 11 Cun a sinfen a hlít pei ih, sinfen dangpawl a hruk pei, riahhmun leng hmunfai ah vutcâm a thiar pei. 12 Cule Biakṭheng parih meisa cu a alh ringring pei; cumi cu a mit ding a si lo. Cule puithiam in zing tin zanthing a tik ṭheu pei ih, a parah Meiur Thilhlăn remten a ret ṭheu pei, cule a parah Remnak Thilhlănpawlih thau a ur pei. 13 Biakṭheng parah meisa a alh ringring pei; cumi cu a mit dah lo pei.

Thlairawl Thilhlăn Dān

14 ‹Himi cu Thlairawl Thilhlăn dān a si. Aaron fapapawl in cumi cu Jehovah hmaiih Biakṭheng parah an hlan pei. 15 Thlairawl Thilhlăn sangvut phŭt ṭhuam khat cu Thlairawl Thilhlăn parih hriak le frankinsense zate thawn a la pei, cule rimthaw hrangah a zate aiah Jehovah hnenah Biakṭheng parah a ur pei. 16 Cule Aaron le a fapapawl in a hlei mi cu an ei pei, hmun thianghlim ah thilnu telh lo sang thawn an ei pei, Tawnawknak Puanthlam tualrawn ah an ei ding a si. 17 Cumi cu thilnu thawi kăn ding a si lo. Meisa ih ur mi keimai thilhlănpawl sung ihsin an covo dingah anmah ka pe hai a si, cumi cu Sual Thilhlăn le Mawh Thilhlăn bangin a thianghlim zet mi a si. 18 Aaron tefapawl lakih mipa hmuahhmuah in an ei pei. Cumi cu Jehovah hnenah meisa ih ur mi thilhlănpawl thawn pehparawin nan tesinfanau san tiangin sakhaw dān a si kumkhua pei. Cupawl a daitu pauhpauh cu an thianghlim pei,› tiin thu pe aw,» tiin a sim.

Puithiam hrang Thlairawl Thilhlăn Dān

19 Jehovah in Mosi hnenah, 20 «Himi cu amah hriak thih a si ni ah, Aaron le a fapapawl in Jehovah hnenih an hlăn ding mi thilhlăn a si. Sangvut phŭt efa khat ih ṭhen hra ṭhen khat cu ni tin Thlairawl Thilhlăn hrangah, a hrek zing lamah, a hrek sîm lamah an hlan ding a si. 21 Cumi cu khēngdau pakhat ah hriak thawn tuah ding a si. Cumi cu a rawiawkngah tikah na run kenglut pei. Thlairawl Thilhlăn kăn ih phel mi cu Jehovah hnenih rimthaw dingah na hlan pei. 22 A fapapawl lak ihsin a aiawhtu dingih hriak thih puithiam in a hlan pei. Cumi cu Jehovah hrangah sakhaw dān a si kumkhua. A pumhlum ih ur ṭheh a si pei. 23 Ziangahtile puithiam hrangih Thlairawl Thilhlăn kip cu a pumhlum ih ur ding a si. Cumi cu ei ding a si lo,» tiin a sim.

Sual Thilhlăn Dān

24 Jehovah in Mosi hnenah, 25 «Aaron le a fapapawl hnenah, ‹Himi cu Sual Thilhlăn dān a si, Meiur Thilhlăn an thahnak hmun ah Jehovah hmaiah Sual Thilhlăn hrangah thah a si pei. Cumi cu a thianghlim zet mi a si. 26 Sual hrangih a hlantu puithiam in cumi cu a ei pei. Cumi cu Tawnawknak Puanthlam tualrawn sungih hmun thianghlim ah ei ding a si. 27 Sa a daitu pauhpauh cu an thianghlim pei. Cule a thisen in a thehngah mi sinfen pauhpauh cu hmun thianghlim ah a thehngahnak zawn na sawp pei. 28 Asinan a suannak leibel cu khuai ṭheh ding a si. Cule darbel ih suan asile, hnulfai ih tidai ih tleŭhfai ding a si. 29 Puithiampawl lakih mipa hmuahhmuah cun cumi cu an ei thei. Cumi cu a thianghlim zet mi a si. 30 Asinan hmun thianghlim ah sualkhuhthawinak tuah dingih Tawnawknak Puanthlam sungih kenluh mi Sual Thilhlăn thisen cu ei ding a si lo. Cumi cu meisa ih ur ding a si.

7

Mawh Thilhlăn Dān

1 ‹Cuvek thothoin himi cu Mawh Thilhlăn dān a si, cumi cu a thianghlim zet mi a si. 2 Meiur Thilhlăn ran an thahnak hmun ah Mawh Thilhlăn an that pei. Cule anih in cuih thisen in Biakṭheng par kimvel hmuahhmuah a theh pei. 3 Cule cumi ihta a thau hmuahhmuah a keng pei. A mei thau le a sungrilpawl tuamtu thau, 4 a kaileng pahnih le a hnak kapih um cuih kaileng pahnih bawhtu thau, a kailengpawl tlunih a thinhnûn thaupawl a phawrh pei. 5 Cule puithiam in cupawl cu Jehovah hnenih meisa ih ur mi thilhlăn dingah Biakṭheng parah a ur hai pei. Cumi cu Mawh Thilhlăn a si. 6 Puithiampawl lakih mipa pauhpauh in cumi cu an ei thei. Cumi cu hmun thianghlim ah ei ding a si. Cumi cu a thianghlim zet mi a si.

7 ‹Mawh Thilhlăn cu Sual Thilhlăn vek thotho a si, an pahnih hrangah dān pakhat lawng a um. Sualkhuhthawinak tuahtu puithiam in cuih thilhlăn cu a co pei. 8 Cule mi pakhat khat ih Meiur Thilhlăn hlantu puithiam in a ken mi Meiur Thilhlăn-ih phaw cu amai hrangah a co pei. 9 Thlairawl Thilhlăn thŭk ih kăn mi le sĭn mi beldau asilole khēngdau ih kăn mi hmuahhmuah khal cumi a kengtu puithiam covo a si ṭheh pei. 10 Thlairawl Thilhlăn pauhpauh hriak rawi le rawi lo khal, Aaron fapapawl in zatrepten an co pei.

Remnak Thilhlăn Dān

11 ‹Himi cu Jehovah hnenih anih in a hlăn ding mi Remnak Thilhlăn raithawinak dān a si. 12 Anih in lungawi thu simnak hrangih a hlăn asile, lungawi thu sim raithawinak thawn, hriak rawi mi thilnu telh lo sangperpawl thawn, hriak măn mi thilnu telh lo sangper pátepawl asilole hriak rawi mi sangphŭt ṭha zetih nāwn mi sang thawn a hlan pei. 13 Cuih sangperpawl hleiah amai Remnak Thilhlăn lungawi thu sim raithawinak cu thilnu rawi mi sang thawn amai thilhlăn ah a keng cih ding a si. 14 Cule cumi sung ihsin Jehovah hnenih cawikhai thilhlăn hrangah thilhlăn pakhat ah sang pakhat fingfing a keng pei. Cumi cu Remnak Thilhlăn thisen thehtu puithiam ta a si pei.

15 ‹Lungawi thu simnak hrangih amai Remnak Thilhlăn raithawinak sa cu a hlăn ni lala ah ei a si pei. A thaizing tiang pakhat hman a hlah lo pei. 16 Asinan amai thilhlăn thawinak cu thutiam simaw, lungpuak thawhhlawm simaw asile, cumi cu a raithawinak a ken ni lala ah ei a si pei, asinan a hlei cu a thaisun khalah ei theih a si pei, 17 a ni thumnak ih a tāng mi raithawinak sa cu meisa in ur tengteng ding a si. 18 Cule a Remnak Thilhlăn raithawinak sa pakhat khat a ni thumnak ah ei a si pang asile, cohlan a si lo ding ih, a thilhlăn mi khal hlan ih siarsak a si lo pei, cumi cu a hlantuih hrangah fihnungza a si ding ih, cumi a eitu tu in mawh an phur ding.

19 ‹Thil thianglo pakhat khat a daingahtu sa cu ei si hlah seh. Cumi cu meisa ih ur ding a si. Cule a thiang mi sa lawngte cu mithiang hmuahhmuah in an ei thei. 20 Asinan mi a thianlo laiih Jehovah ta a si mi Remnak Thilhlăn raithawinak sa a eitu cu a mipawl lak ihsin sahcat a si pei. 21 Cuihhleiah milai thianlonak siseh, rannung thianlonak siseh, asilole fihnungza thil pakhat khat ti vek thil thianglo pakhat khat a thâmtu le Jehovah ta a si mi Remnak Thilhlăn raithawinak sa a eitu cu a mipawl lak ihsin sahcat a si pei,› tiin sim uh,» tiah a sim.

Thau le Thisen Ei lo Ding

22 Jehovah in Mosi hnenah, 23 «Israel tefapawl hnenah, ‹Câwpa thau siseh, tuu thau siseh, me thau siseh zianghman nan ei lo pei. 24 Cule amah teih a thi mi ran thau le sahrangpawl ih deh mi thaupawl cu thil dangah cun ziang vek khalah hman theih a si, asinan a ei lawngte nan ei hrimhrim lo pei. 25 Ziangahtile zokhal Jehovah hnenih meisa ih ur mi thilhlăn milaipawl ih an hlăn mi ṭilva thau a eitu, cumi a eitu cu an mipawl lak ihsin sahcat a si pei. 26 Cuihhleiah vâte siseh, rannung siseh, nan cēnnak pauhpauh ah ziang thisen hman nan ei lo pei. 27 Thisen pakhat khat a eitu pauhpauh, cu pa cu a mipawl lak ihsin sahcat a si pei,› tiin sim aw,» tiah a sim.

28 Cun Jehovah in Mosi hnenah, 29 «Israel tefapawl hnenah, ‹Jehovah hnenih Remnak Thilhlăn raithawinak a hlantu cun a Remnak Thilhlăn thawinak sung ihta Jehovah hnenah a thilhlăn a keng ding a si. 30 Jehovah hnenih meisa ih ur mi thilhlănpawl cu amai kut rori in a rak keng pei. A ṭāng cu Jehovah hmaiih sēp thilhlăn dingah sēp a si theinak dingah a thau cu a ṭāng thawn a rak keng pei. 31 Cule puithiam in a thau cu Biakṭheng parah a ur pei, a ṭāng lawngte Aaron le a fapapawlih covo a si pei. 32 Na Remnak Thilhlăn raithawinak sung ihsin cawikhai thilhlăn dingah a vawrh lam cāwn khal puithiam na pe pei. 33 Aaron fapapawl lakih Remnak Thilhlăn thisen le a thau a hlantu pauhpauh cun anmai vo ah a vawrh lam cāwn an co pei. 34 Ziangahtile an Remnak Thilhlăn raithawinakpawl ihsin Israel tefapawl hnenin sēp thilhlăn-ih a ṭâng le cawikhai thilhlăn a cāwn cu ka laksak hai zo ih, kumkhaw sakhaw dān dingah Israel-mipawl hnen ihsin puithiam Aaron le a fapapawl ka pe zo,› tiah sim aw,» tiin a sim.

35 Himi cu Mosi in puithiam dinhmun in Jehovah rian dingah a ap hai ni ah, Jehovah hnenih meisa ih ur mi thilhlăn lak ihta Aaron le a fapapawl covo dingih a serhhran mi a si. 36 An tesinfa san tiangin kumkhaw sakhaw dān dingih anmah hriak a thih hai ni ah himi cu Israel tefapawl in anmah pe dingah Jehovah in thu a rak pe.

37 Himi cu Meiur Thilhlăn, Thlairawl Thilhlăn, Sual Thilhlăn, Mawh Thilhlăn, serhhrannak le Remnak Thilhlăn raithawinak pawl hrangih dān a si, 38 cumi cu Sinai Ramṭhing ah an thilhlănpawl Jehovah hnenih hlan dingin Israel tefapawl thu a pek ni ah Jehovah in Sinai Tlang parah Mosi hnenih thu a rak pek mi a si.

8

Puithiampawl Serhhrannak

1 Jehovah in Mosi hnenah, 2 «Aaron le a hnenih um a fapapawl, sinfenpawl, hnih mi hriak, Sual Thilhlăn câwpa tûai pakhat, tuucang pahnih le thilnu telh lo sang kho khat rak keng aw, 3 cule Tawnawknak Puanthlam luhnak hmaiah mipi-umkhawm hmuahhmuah fĭnkhawmawter hai aw,» tiin a sim.

4 Cule Jehovah in amah thu a pek vekin Mosi cun a tuah. Cule mipi-umkhawm cu Tawnawknak Puanthlam luhnak hmaiah an fĭnkhawmaw.

Aaron in Puithiam Lubik Hnipuan a Hruh

5 Cule Mosi in mipi-umkhawm hnenah, «Himi cu tuah dingih Jehovah ih thu a pek mi a si,» tiah a ti. 6 Cun Mosi in Aaron le a fapapawl cu a hruai ih, tidai in a khawlh hai. 7 Cule Aaron cu kâwrfualpi a hruhter ih, taikhap a khapsak, kâwrfual a hruhter ih Puithiam Kâwrcung a hruhter, cule thiam zetih tah mi Puithiam Kâwrcung taiṭēm a khăpsak ih, cumi in a parah Puithiam Kâwrcung cu a ṭawn. 8 Cun a parah ṭāngbĕn a hruhter ih, ṭāngbĕn sungah Urim le Thummim a ret. 9 Cule a lu ah puithiam lubik lupâwng a pâwngter. Jehovah in Mosi thu a rak pek vekin lukhap thianghlim sui tlep khal puithiam lubik lupâwng hmai lamah a bĕn.

Biakbûk le Aaron Hriak Thihnak

10 Mosi in hnih mi hriak khal a la ih, Biakbûk le a sungih um thil hmuahhmuah a hnih ih, a serhhran hai. 11 Hriak in Biakṭheng vei sarih a theh ih, Biakṭheng le a bungrua hmuahhmuah, Maihum le a tohkualpawl cu serhhran hai dingah a hnih. 12 Cule amah serhhran dingah, Aaron-ih lu ah hnih mi hriak ziangmaw zât a thlerh ih, a thih.

13 Cun Jehovah in Mosi thu a rak pek vekin, Mosi in Aaron fapapawl cu a hruai ih, kâwrfualpi a hruhter hai, taiṭawn in an tâi a ṭawnsak hai ih, an parah lupâwng a pâwngter.

Serhhrannak hrang Thawhhlawm

14 Cule Mosi in Sual Thilhlăn hrangah câwpa a rak keng. Cun Aaron le a fapapawl in Sual Thilhlăn câwpa tûai lu parah an kut an suang, 15 cule Mosi in cumi cu a that. Cun a thisen a la ih, a kutzung in Biakṭheng kimvel hmuahhmuah ih kipawl ah a mān ṭheh, cule Biakṭheng cu a thianfai. Cule thisen cu Biakṭheng tawphah ah a thle ih, a parih sualkhuhthawinak tuah dingah Biakṭheng cu a serhhran. 16 Cun a sungrilpawl parih thau hmuahhmuah, a thinhnûn thau le a kaileng pahnih le an thaupawl cu a la ih, Mosi in cupawl cu Biakṭheng parah a ur. 17 Asinan câwpa cu a vun, a sa le a êk tla Jehovah in Mosi thu a rak pek vekin riahhmun khuarnak lengah meisa in a ur.

18 Cun Meiur Thilhlăn dingah Mosi in tuucang a rak keng. Cule Aaron le a fapapawl in tuucang lu parah an kut an suang, 19 cule Mosi in cumi cu a that. Cun anih in Biakṭheng kimvel hmuahhmuah thisen a theh. 20 Cule anih in tuucang sa cu a cánnâwi ṭheh ih, Mosi in a lu, a sa cannāwi mipawl le a thaupawl cu a ur. 21 Cun tidai in a sungrilpawl le a kepawl a khawlh. Cule tuucang cu Mosi in Biakṭheng parah a zaten a ur ṭheh. Cumi cu Jehovah in Mosi thu a rak pek vekin Jehovah hnenih meisa ih ur mi thilhlăn, rimthaw Meiur Thilhlăn a si.

22 Cule Mosi in serhhrannak tuucang a si mi, a pahnihnak tuucang a rak keng. Cun Aaron le a fapapawl in tuucang lu parah an kut an rak suang, 23 cule Mosi in cumi cu a that. A thisen hrekkhat a lâk ih, Aaron-ih vawrh lam hna zimah le a vawrh lam kut zungpi le a vawrh lam ke zungpi ah a hnih. 24 Cun anih in Aaron fapapawl cu a rak hruai hai. Cule Mosi in an vawrh lam hna zimah le an vawrh lam kut zungpi le an vawrh lam ke zungpi ah thisen ziangmaw zât a măn. Cule Mosi in Biakṭheng kimvel hmuahhmuah cu thisen a theh. 25 Cun anih in sathau, a mei thau, a sungrilpawl bawhtu thau hmuahhmuah, a thinhnûn thaupawl, a kaileng pahnih le an parih thau le a vawrh lam cāwnpawl cu a la. 26 Cule Jehovah hmaiih a um mi thilnu telh lo sang kho sung ihta thilnu telh lo sangper pakhat, hriak măn mi sangper pakhat le sangper páte pakhat a la ih, a thau par le a vawrh lam cāwn parah a ret hai, 27 cule anih in hipawl hmuahhmuah cu Aaron-ih kut le a fapapawlih kut ah a ret ih, Jehovah hmaiih sēp thilhlăn hrangah cupawl cu a sēp. 28 Cun Mosi in cupawl cu an kut ihsin a lâk ih, Biakṭheng parih Meiur Thilhlăn hrangah a ur. Cupawl cu rimthaw hrangih serhhran thilhlănpawl an si. Cumi cu Jehovah hnenih meisa ih ur mi thilhlăn a si. 29 Cule Mosi in a ṭāng cu a lâk ih, Jehovah hmaiih sēp thilhlăn hrangah a sēp. Jehovah in Mosi thu a rak pek vekin serhhrannak tuucangih ṭāng cu Mosi vo a si.

Aaron le a Fapapawl Tithianghlimnak

30 Mosi in hnih mi hriak hrekkhat le Biakṭheng parih um thisen hrekkhat a lâk ih, Aaron le a sinfen le a fapapawl le a hnenih um a fapapawlih sinfen cu a theh. Cule anih in Aaron, a sinfen, a fapapawl le a hnenih um a fapapawlih sinfen cu a serhhran.

31 Cule Mosi in Aaron le a fapapawl hnenah, «Tawnkhawmawknak Puanthlam luhnak ah sa sûang uhla, ‹Aaron le a fapapawl in an ei pei,› tiih thu ka lo pek vekin serhhranawknak thilhlăn kho sungih sang cu cu tawkah ei uh. 32 Sa hlei le sang hlei pawl cu meisa in nan ur pei. 33 Cule nan serhhranawknak nipawl a cem hlanlo ni sarih sung Tawnawknak Puanthlam luhnak leng nan suak lo pei. Anih in ni sarih sung a lo serhhran hai ding a si. 34 Anih in tuihsun ih a tuah vek cekci hin nan hrangih sualkhuhthawinak lo tuahsak dingin Jehovah in thu a rak pe zo a si. 35 Curuangah thupek ka si zo bangin nan thihlonak dingah, ni sarih sung a sun a zanin Tawnawknak Puanthlam luhnak hmaiah nan um pei ih, Jehovah thucah cu nan thlun ringring pei,» tiah a ti. 36 Cule Mosi hmangih Jehovah in thu a rak pek mi hmuahhmuah cu Aaron le a fapapawl in an tuah ṭheh.

9

Puithiampawl Rawngbawl an Thăwk

1 Mosi in Aaron le a fapapawl le Israel upapawl a kawh hnu a ni riatnak ah hitin a si. 2 Anih in Aaron hnenah, «Sual Thilhlăn hrangah sawisel ding um lo câwpa no pakhat le Meiur Thilhlăn hrangah sawisel ding um lo tuucang pakhat na hrangah la awla, cupawl cu Jehovah hmaiah keng hai aw. 3 Cule Israel tefapawl hnenah, ‹Sual Thilhlăn hrangah mepawl lakih mepa no pakhat, Meiur Thilhlăn hrangah sawisel ding um lo kum khat ti veve mi câwpa no pakhat le tuufa no pakhat, 4 Jehovah hmaiih raithawi dingah, Remnak Thilhlănpawl hrangah câwpa pakhat le tuucang pakhat le hriak rawi mi Thlairawl Thilhlăn khal la uh, ziangahtile tuihsun ah Jehovah cu nan hnenah a lang ding,› tiin na sim pei,» tiah a ti.

5 Cule Tawnawknak Puanthlam hmaiah Mosi ih thu a pek mi cu an rak keng. Cule mipi-umkhawm hmuahhmuah in an rak naih ih, Jehovah hmaiah an ding. 6 Cun Mosi in, «Himi cu tuah dingah Jehovah in thu a lo pek mi thil a si ih, Jehovah ropitnak nan hnenah a lang ding,» tiah a ti. 7 Cule Mosi in Aaron hnenah, «Biakṭheng kiangah feh awla, nangmai Sual Thilhlăn le Meiur Thilhlăn hlan aw, cule nangmai hrang le mipi hrangah sualkhuhthawinak tuah aw. Jehovah ih thupek vekin mipi thilhlăn hlan awla, an hrangah sualkhuhthawinak tuah aw,» tiah a ti.

8 Curuangah Aaron cu Biakṭheng kiangah a feh ih, amai hrangah Sual Thilhlăn câwpa no a that. 9 Cun Aaron fapapawl in thisen cu a hnenah an rak keng. Cule thisen sungah a kutzung a vun hnim ih, Biakṭheng kipawl parah a mân, cule Biakṭheng tawphah ah thisen cu a thlet. 10 Asinan Mosi hnenih Jehovah in thu a rak pek vekin Sual Thilhlăn ihta a thau, a kailengpawl le a thinhnûn thaupawl cu Biakṭheng parah a ur. 11 A sa le a vun cu riahhmun khuarnak lengah meisa in a ur.

12 Cule anih in Meiur Thilhlăn hrangah ran a that, cule Aaron fapapawl in a thisen cu amah an pe ih, cumi in Biakṭheng kimvel hmuahhmuah a theh ṭheh. 13 Cun Meiur Thilhlăn cu a sa cannāwi mi le a lu thawn amah an pe ih, anih in cupawl cu Biakṭheng parah a ur hai. 14 Cule anih in a sungrilpawl le a kepawl cu tidai in a khawlh ih, Biakṭheng parah Meiur Thilhlăn thawn a ur cih hai.

Jehovah hnenin Meisa

15 Cun anih in mipi thilhlăn a rak keng ih, mipi hrangih Sual Thilhlăn a si mi mepa a la ih a that, cule a hmaisa bangtukin sual hrangah a hlan. 16 Cule anih in Meiur Thilhlăn a rak keng ih, a dān bangtukten a hlan. 17 Cun anih in Thlairawl Thilhlăn a rak keng, ṭhuam khat in a la ih, zing lam Meiur Thilhlăn zawngah cumi cu Biakṭheng parah a ur.

18 Anih in mipi hrang a si mi Remnak Thilhlăn raithawinakpawl hrangah câwpa le tuucang pawl khal a that. Cule Aaron fapapawl in a hnenah thisen an pe ih, anih in Biakṭheng kimvel hmuahhmuah a theh ṭheh. 19 Cule câwpa thau le tuucang thau, a mei thau, a sungrilpawl tuamtu le a kailengpawl le a thinhnûn thaupawl khal a hnenah an run pe. 20 Cule a thau cu a ṭâng parah an ret. Cun anih in a thau cu Biakṭheng parah a ur. 21 Asinan a ṭâng le a vawrh lam cāwn cu Mosi in thu a rak pek vekin Aaron in Jehovah hmaiah sēp thilhlăn ah a sêp.

22 Cun Aaron cu mipi lamah a kut a hei thlir ih, mal a sawm hai, cule Sual Thilhlăn le Meiur Thilhlăn le Remnak Thilhlănpawl a hlănnak ihsin a rung ṭum. 23 Cule Mosi le Aaron cu Tawnawknak Puanthlam ah an lut. Cule an ra suak ih, mipi mal an sawm. Cun Jehovah ropitnak cu mipi hmuahhmuah hnenah a lang, 24 cule Jehovah hmai ihsin meisa a ra suak ih, Meiur Thilhlăn le Biakṭheng parih thau cu a kangrál ṭheh. Mipi hmuahhmuah in cumi an hmuh tikah an au ih, an băwkkhup ṭheh.

10

Meisa Danglam

1 Aaron fapa Nadab le Abihu in meiling suahdur an la veve ih, a sungah meisa an ret, a parah rimhmui an paih, cule Jehovah ih thupek loin, Jehovah hmaiah meisa danglam an hlan. 2 Cule Jehovah hnen ihsin meisa a ra suak ih, anmah cu a kāng hai ih, Jehovah hmaiah an thi. 3 Cule Mosi in Aaron hnenah, «Jehovah in,

‹Keimah i naihtu cun,
Thianghlim ah i ruat tengteng hai seh;
Cule mipi hmuahhmuah hmaiah sunlawih ka si ding,›

tiin a sim,» tiah a ti.

Cule Aaron cu daiten a um.

4 Mosi in Aaron paseu Uzziel fapa Mishael le Elzafan a ko hai ih, an hnenah, «Ra nâi uh, nan unaupawl hi Hmun Thianghlim hmai ihsin riahhmun khuarnak lengah thiarsuak uh,» tiah a ti hai. 5 Cutin annih cun an rak naih ih, Mosi ih sim vekin riahhmun khuarnak lengah an kâwrfualpi in an hei thiarsuak hai.

6 Cule Mosi in Aaron le a fapa Eleazar le Ithamar tepawl hnenah, «Nan lukhuh nan hlîp lo pei ih, nan hnipuan nan thlek lo pei, culoasile nan thi ding, cule mipi-umkhawm hmuahhmuah parah thinlingnak a rung tla ding. Asinan nan unau Israel sungza pumpi cun Jehovah ih a urkăng mi, mikāngpawl cu ṭah ko hai seh. 7 Tawnawknak Puanthlam luhnak ihsin nan pâwtsuak lo pei, culoasile nan thi ding, ziangahtile Jehovah ih hnih mi hriak cu nan parah a um,» tiah a ti. Cule Mosi-ih ṭawngkam bangtukin annih in an tuah.

Sabitzu Khamnak

8 Cun Jehovah in Aaron hnenah, 9 «Tawnkhawmawknak Puanthlam ih nan luh tikah, nangmah in siseh, na hnenih um na fapapawl in siseh, sabitzu simaw, zureu simaw nan in lo pei, culole nan thi ding. Cumi cu nan tesinfa san tiangin sakhaw dān a si kumkhua ding. 10 Cutin a thianghlim le thianghlim lo, a thiang le thianglo nan thliardang thei ding. 11 Cule Jehovah in Mosi hmangin an hnenih a rel zo mi sakhaw dān hmuahhmuah cu Israel tefapawl nan zirh thei ding a si,» tiin a sim.

12 Cule Mosi in Aaron le a tāng lai mi a fapa Eleazar le Ithamar hnenah, «Jehovah hnenih meisa ih ur mi thilhlănpawl lakih a hlei mi Thlairawl Thilhlăn cu la uhla, Biakṭheng kiangah thilnu telh loin ei uh, ziangahtile cumi cu a thianghlim zet mi a si. 13 Cumi cu hmun thianghlim ah nan ei pei, ziangruangahtile cumi cu Jehovah hnenih meisa ih ur mi thilhlănpawl ihta nangmai covo le na fapapawlih covo a si, ziangahtile cuvekih thupek zo mi ka si. 14 Sēp thilhlăn-ih a ṭâng le cawikhai thilhlăn-ih a cāwn cu nangmah, na fapapawl le na hnenih um na fanupawl in hmunfai ah nan ei pei. Ziangahtile cupawl cu Israel tefapawlih Remnak Thilhlănpawlih raithawinakpawl ihsin an pek mi na covo le na fapapawlih covo an si. 15 Cawikhai thilhlăn a cāwn le sēp thilhlăn a ṭāng cu sēp thilhlăn hrangih hlăn dingah thau thawn meisa ih ur mi thilhlănpawl Jehovah hmaiah an rak keng pei. Jehovah in thu a rak pek vekin kumkhaw sakhaw dān hmangin, cumi cu na covo le na hnenih um na fapapawlih covo a si pei,» tiin a sim.

16 Sual Thilhlăn mepa thuhla kha Mosi in ṭhateih a zingzăwi tikah, ngai hnik, me cu urkăng a rak si zo. Cule a tāng lai mi Aaron fapa Eleazar le Ithamar tlunah a thin a heng ih an hnenah, 17 «Sual Thilhlăn cu a thianghlim zet mi a si ih, mipi-umkhawm mawh phurin an hrangih sualkhuhthawinak Jehovah hmaiih tuah dingah Pathian in cumi cu a lo pe zo fawn, ziangahso cumi cu hmun thianghlim ih nan rak ei lo? 18 Zoh hnik uh! A thisen cu hmun thianghlim ih luhpi a si lo, thu ka lo pek vekten hmun thianghlim ah ei taktak ding nan si nan!» tiah a ti.

19 Cule Aaron in Mosi hnenah, «Zoh hman, an Sual Thilhlăn le an Meiur Thilhlăn pawl cu Jehovah hmaiah tuihni ah an hlan a si, cubang thilpawl ka parih a thlen cu le! Sual Thilhlăn cu tuihsun ah rak ei ningla, Jehovah mithmuhah cohlan a si cuang ding maw?» tiah a ti. 20 Cun cumi cu Mosi in a theih tikah a lung a kim.

11

Sa Thiang le Thianglo

1 Jehovah in Mosi le Aaron hnenah, 2 «Israel tefapawl hnenah, ‹Leilung tlunih a um mi rannung hmuahhmuah lakah nan ei thei ding mi thilnung cu hipawl hi an si: 3 rannung lakah ketin kâk mi, ketin pahnih ih ṭêk mi le rawl irhsuaksal ih ṭhialsal mi pauhpauh cu nan ei thei. 4 Sikhalsehla rawl irhsuaksal ih ṭhialsal le ketin kâkpawl lakah hipawl cu nan ei lo pei: kalauk cu rawl irhsuaksalin a ṭhial ko nân, a ketin a kâk lo ruangah nan hrangah a thiang lo; 5 shafan cu rawl irhsuaksalin a ṭhialsal ko nân, a ketin a kâk lo ruangah nan hrangah a thiang lo; 6 sabek cu rawl irhsuaksalin a ṭhialsal ko nân, a ketin a ṭêk lo ruangah nan hrangah a thianglo a si; 7 cule văwk cu a ketin a kâk ih, ketin pahnih ih ṭêk a nei nain, rawl irhsuaksal in, a ṭhialsal lo ruangah nan hrangah a thiang lo; 8 an sa nan ei lo pei ih, an ruak khal nan dai fawn lo pei. Cupawl cu nan hrangah an thianglo a si.

9 ‹Ti sungih a um mipawl lakah hipawl hmuahhmuah cu nan ei thei: ti sungih a um mi thla te le phawhir nei mi pauhpauh cu tifinriat sung ihta simaw, tiva ihta simaw nan ei thei. 10 Asinan thla te le phawhir nei lo mi tifinriat le tiva sungih a um mi hmuahhmuah, ti sungih a cāngvai mi hmuahhmuah le ti sungih a um mi thilnung pauhpauh cu nan hrangah fihnungza an si. 11 Annih cu nan hrangah fihnungza an si; an sa nan ei lo pei, an ruak cu thil fihnungza ah nan ruat sawn pei. 12 Ti sungih um thla te le phawhir a nei lo mi pauhpauh cu nan hrangah fihnungza an si pei.

13 ‹Cule vâte hmuahhmuah lakah hipawl cu fihnungza ah nan ruat pei, ei ding an si lo, fihnungza an si. Muvanlai, mulukawlh, khaupi, 14 kilaw le khau phun pauhpauh; 15 tlangâk phun pauhpauh, 16 kalauk va, sambak, tifinriat va, khaute phun pauhpauh; 17 sumbuh te, ngathûr va phun khat, sumbuh hrangkír, 18 sumbuh râng, ^aka-at va, saruak ei mulukawlh; 19 ngathûr, hngawngdâk va phun pauhpauh, vasuangtuâr le palâp pawl tla an si.

11:18^a ka-at va: Sumbuk vek vâte phun khat a si.

20 ‹Zam thei ih ke li thawi băwkih a vâk mi cucikkharbawk hmuahhmuah cu nan hrangah fihnungza an si. 21 Cutisikhalsehla hibang a zam thei mi ke li thawi băwkih a vâk mi cucikkharbawk hmuahhmuah cu nan ei thei, cupawl cu, leilung parih an pehnak dingah an ke tlunih an khuk a suak mipawl an si. 22 Khaukhuap phun pauhpauh, mi siatsuahhmang khaukhuap phun pauhpauh, kharbawk te phun pauhpauh le kharbawk phun pauhpauh pawl cu nan ei thei. 23 Asinan a zam thei mi ke li nei cucikkharbawk dang hmuahhmuah cu nan hrangah fihnungza an si.

24 ‹Hipawl ruangah mithiang lo ah nan cang ding; zokhal saruak lakih pakhat khat a daingahtu cu zan lam tiang mithiang lo a si pei; 25 zokhal saruak lakih pakhat khat a thiartu cu a hnipuan a sawp pei ih, zan lam tiang mithiang lo a si pei. 26 A ke a kâk nain a ketin pahnih ih a ṭêk lo mi le rawl irhsuaksal ih a ṭhialsal lo mi ṭilva pauhpauh cu nan hrangah a thianglo a si. A daitu kip in mithiang lo an si pei. 27 Cule ke li ih feh sa hmuahhmuah lakah tín kebawr ih a feh mi pauhpauh cu nan hrangah an thiang lo. Cubangpawlih ruak pakhat khat a daingahtu pauhpauh cu zan lam tiang mithiang lo a si pei. 28 Cuvek ruak pakhat khat a thiartu cu a hnipuan a sawp pei ih, zan lam tiang mithiang lo a si pei. Cumi cu nan hrangah a thianglo a si.

29 ‹Leilung parih băwkih a vâk mi băwkvâk thilnungpawl lak khalah hipawl cu nan hrangah thil thianglo an si pei. Cupawl cu: sinthir, zinghnam, laiking tûm phun pauhpauh; 30 dekdēr, thangkāwng, vunnel laiking tumpi, vunnel ngangdáwl le laiking tla an si. 31 Băwkvâk hmuahhmuah lakah hipawl cu nan hrangah a thianglo a si. Hipawl an thih tikih a daingahtu pauhpauh cu zan lam tiangin an thiang lo. 32 An thih tikah an lakih pakhat khat in a tlakngah mi pauhpauh cu thianglo an si ding, zanthing a si ah maw, hnipuan a si ah maw, saphaw a si ah maw, dip a si ah maw, ziang vek hmanrua a si khalle, cumi cu tidai sungah hnim ding a si. Cule zan lam tiang thil thianglo a si ding, cuṭhehin a thiang ding. 33 Cuih thil pakhat khat leibel pakhat khat sungih a tla mi cu nan khuai pei; cule a sungih um pauhpauh cu thil thianglo a si. 34 Cubangtuk leibel sungih tidai in ei ṭha rawl pakhat khat a fawrhngah mi cu thil thianglo ah a cang ih, cutawk sungih in ding ṭha pauhpauh khal thil thianglo ah a cang. 35 Cule cubangtuk ruak sathêm in a tlakngah mi ziangtinkim cu thianglo an si pei; thŭk a si ah simaw, suanbel a si ah simaw khuaikek a si pei; ziangahtile cupawl cu thianglo an si ih, nan hrangah thil thianglo an si. 36 Cuti a si hmanah tidai tampi umnak cirhti le ticawm cu an thiang pei, asinan cubangtuk saruak a daingahtu pauhpauh cu thianglo ah an cang. 37 Cule tuh ding mi thlaici pakhat khat parah cubangtuk saruak thêm a tlakngah asile a thiang hrih lai thotho. 38 Asinan tidai ih ciah zo mi thlaici a si ahcun, cubangtuk saruak thêm a parih a tlakngah tikah nan hrangah thianglo ah a cang.

39 ‹Cule nan ei thei mi ṭilva ziangkhal a thih asile, a ruak daingahtu cu zan lam tiang mithiang lo ah a cang. 40 A ruaksa a eitu cu a hnipuan a sawp pei ih, zan lam tiang mithiang lo a si pei. A ruak thiartu khal in a hnipuan a sawp pei ih, zan lam tiang mithiang lo a si pei.

41 ‹Cule leilung parih băwkih a vâk mi băwkvâk thilnung kip in thil fihnungza an si pei. Ei ding an si lo. 42 Ziangkhal pum ih băwkvâk pauhpauh, ke li nei băwkvâk pauhpauh le ke tampi nei ih leilung parah băwkih vâk mi băwkvâk hmuahhmuah cu nan ei lo pei, ziangahtile fihnungza an si. 43 Băwkih a vâk mi băwkvâk ziang vek thaw hmanin nanmah le nanmah fihnungza ah nan tuahaw lo pei; anmah thawn nanmah le nanmah mithiang lo ah nan tuahaw fawn lo pei, culoasile anmah hmangin nan bawrhhlawh pang ding. 44 Ziangahtile keimah cu Jehovah nan Pathian ka si. Curuangah nan serhhran aw pei ih, nan thianghlim pei; ziangahtile kei cu ka thianghlim a si. Leilung parih băwkih a vâk mi băwkvâk ziang vek thaw khalin mithiang lo ah nan tuah aw ding a si lo. 45 Ziangahtile keimah cu nan Pathian si dingah Izip ram ihsi lo hruaisuaksotu Jehovah ka si. Curuangah nan thianghlim pei, ziangahtile kei cu ka thianghlim a si.

46 ‹Himi cu rannungpawl, vâtepawl le tipi sungih a tlanglêng mi sersiam mi thilnung kip le leilung parih băwkih a vâk mi sersiam mi kip hrangih dān a si. 47 A thiang le thianglo thleidănnak dingah le ei ding thilnung le ei lo ding thilnung thleidănnak hrangih dān a si,› tiin sim hai aw,» tiah a sim.

12

Nau Neih hnuih Thianfaiawknak

1 Jehovah in Mosi hnenah, 2 «Israel-mipawl hnenah, ‹Nunau in fa a vun ih, mipa a hrin asile, ni sarih sung mithiang lo a si pei, amai nunau dankēl ruangih a thianlo lai nipawl vekin mithiang lo a si pei. 3 Cule a ni riatnak ah a fapaih serh vun zim titsa tansak a si pei. 4 Cun a nu cu a thisen thianawkternak ah ni 33 a peh pei. Thil thianghlim zianghman a dai lo pei ih, a thianawkternak ni a kim hlanlo hmun thianghlim ah a lut fawn lo pei. 5 Asinan nunau a hrin asile, amai nunau dankēl vekin zarh hnih sung thianglo a si pei ih, a thisen thianawkternak ah ni 66 sung a pehzăwm pei.

6 ‹A thianawkternak ni a kim tikah, fapa a si ah simaw, fanu a si ah simaw, Meiur Thilhlăn dingah kum khat ti tuufa no le Sual Thilhlăn dingah laileng no pakhat asilole thuro pakhat Tawnawknak Puanthlam luhnak ih puithiam hnenah a rak keng pei. 7 Cun Jehovah hmaiah a hlan pei ih, a hrangah sualkhuhthawinak a tuah pei. Cule amah cu a thisen pût mi lak ihsin a thiang ding a si. Himi hi mipa simaw, nunau simaw a hringtunu hrangih dān a si.

8 ‹Cule tuufa no a rak ken thei lo asile, thuro pahnih simaw, laileng no pahnih simaw a rak keng pei ih, pakhat cu Meiur Thilhlăn hrangah, a dang pakhat cu Sual Thilhlăn hrangah a si pei. Cule puithiam in a hrangah sualkhuhthawinak a tuah pei ih, a thiang ding,› tiin sim aw,» tiah a sim.

13

Phār Thuhla Dān

1 Jehovah in Mosi le Aaron hnenah, 2 «Mi pakhat in a vun parah bol, hmahnâi asilole ṭhĕk, a taksa vun parah phārnat ih cang mi a neih tikah, puithiam Aaron asilole a fapa puithiam pakhat khat hnenah hruai ding a si. 3 Puithiam in a taksa vun parih hma cu a zohhliah pei, cule a hma sungih hmul kha a var ah a thlengaw ih, a hma cu a taksa vun hmun dang hnakin phāi deuhih a lăng asile, cumi cu phārnat a si. Cun puithiam in a zohfel pei ih, mithiang lo a si tiah a thăn pei. 4 Asinan a ṭhĕk cu a taksa vun parah a rāng nân, hmun dang hnakin phāi deuhin a lang cuang lo ih, a hmul khal a var ih a thlengawk lo asile, hma neitu cu puithiam in ni sarih sung a kharkhum lawk pei. 5 Cule a ni sarihnak ah amah cu puithiam in a zohfel pei, cule ngai hnik, a mithmuhah hma cu cekfel le hma cu a vun parah a rak karhzai lo asile, puithiam in ni sarih dang a kharkhumbêt pei. 6 Cun puithiam in a ni sarihnak ah a zohfelsal pei, cule ngai hnik, a hma cu a hîl ih, cuih hma cu a vun parah a rak karhzai lo a si ahcun, puithiam in a thiang tiah a thăn pei; cumi cu hmahnâi menmen a si ih, a hnipuan a sawp pei ih, mithiang a si ding. 7 Asinan a thiang tiah puithiam in a thăn hnuah a vun parah a hmahnâi a karhzaibêt a si ahcun, puithiam in a zohsal pei. 8 Cule zoh hnik, puithiam in a hmahnâi cu a vun ah a karhzai ti a hmuh asile, mithiang lo a si tiah puithiam in a thăn pei. Cumi cu phārnat a si.

9 «Mi pakhat parah phārnat a um tikah, amah cu puithiam hnenih hruai a si pei. 10 Cule puithiam in a zohfel pei, ngai hnik, a vun parih bol cu a var, a hmul khal a var ah a thlengaw ih, a bol ah titsa durh a um asile, 11 cumi cu a taksa vun parih phārhma hlun a si. Puithiam in mithiang lo a si tiah a thăn pei, cule anih cu a kharkhum lo pei, ziangahtile anih cu mithiang lo a si.

12 «Cule a vun pumpi ah phārnat a puaksuak ih, a phārnat in hma neituih vun hmuahhmuah, a lu ihsin a ke zim tiang, puithiam ih zohnak hmun kip a khuh ṭheh asile, 13 puithiam in a zoh pei, cule ngai hnik, phār in a taksa a khuh thluh zo a si ahcun, hma neitu cu a thiang tiah a thăn pei. A zaten a var ah a thlengaw ṭheh zo. Anih cu mithiang a si. 14 Asinan a parah titsa durh a lăng tikah, amah cu mithiang lo a si pei. 15 Cule puithiam in a titsa durh cu a zohfel pei ih, mithiang lo a si tiah a thăn pei; ziangahtile titsa durh cu a thianglo a si. Cumi cu phâr a si. 16 Cuti si loin titsa durh cu thlengawin a varsal asile, puithiam hnenah a feh pei. 17 Cule puithiam in a rak zohfel pei; cule ngai hnik, a hma cu a var ah a thlengawk a si ahcun, hma neitu cu puithiam in a thiang tiah a thăn pei. Anih cu mithiang a si.

Khuaihli Thuhla Dān

18 «Taksa in vun ah khuaihli a nei ih, cumi cu a dam zo, 19 cule cuih khuaihli hmun ah bol var simaw, ṭhĕk sen-ngo thlak simaw a puak asile, cumi cu puithiam hnenih hmuh ding a si; 20 cule puithiam in cumi a zoh tikah, ngai hnik, cumi cu hmun dang hnakin phāi deuhin a lang, cule a hmul cu a var ih a thlengawk a si ahcun, puithiam in anih cu mithiang lo a si tiah a thăn pei. Cumi cu phārnat, khuaihli ih rak puaksuak mi a si. 21 Asinan puithiam in cumi cu a rak zohfel, cule ngai hnik, cumi cu hmul var um loin, hmun dang hnakin phāi deuh cuang loin, a rak hîl sawn lam asile, puithiam in ni sarih sung a kharkhum pei; 22 cule cumi cu a vun parah a rak karhzai asile, puithiam in anih cu mithiang lo a si tiah a thăn pei. Cumi cu phārnat a si. 23 Asinan ṭhĕk kha hmunkhatah tâng ringring in, a rak karh lo a si ahcun, khuaihli hmasi men a si ih, puithiam in anih cu mithiang a si tiah a thăn pei.

Meikāng Thuhla Dān

24 «Cuti si loin a taksa vun meisa in a kāng ih, a kăngnak titsa durh cu ṭhĕk sen-ngo thlak asilole a var ih a can asile, 25 puithiam in a zohfel pei, cule ngai hnik, a ṭhĕk hmul cu a var ah a thlengaw ih, hmun dang hnakin phāi deuhih a lăng a si ahcun, a kăngnak ah phārnat a puak a si. Curuangah puithiam in anih cu mithiang lo a si tiah a thăn pei. Cumi cu phārnat a si. 26 Asinan puithiam in cumi cu a zohfel, cule ngai hnik, a ṭhĕk ah hmul var um loin, a vun hmun dang hnakin phāi deuh cuang loin, a rak hîl sawn a si ahcun, puithiam in anih cu ni sarih sung a kharkhum pei. 27 Cule puithiam in a ni sarihnak ah a zohfel pei. Cumi cu a vun parah a rak karhzai a si ahcun, puithiam in anih cu mithiang lo a si tiah a thăn pei. Cumi cu phārnat a si. 28 Asinan a ṭhĕk cu hmunkhatah rak tâng ringring in, a vun ah rak karh loin, a rak hîl sawn a si ahcun, cumi cu kāngthling men a si. Puithiam in anih cu mithiang a si tiah a thăn pei, ziangahtile cumi cu kāng hmasi men a si.

Lu Hma Thuhla Dān

29 «Mipa simaw, nunau in simaw a lu asilole a khabe ah hma a neih asile, 30 puithiam in a hma cu a zohfelsak pei; cule ngai hnik, a vun hmun dang hnakin phāi deuhin a lang ih, hmul aire nemte a rak um a si ahcun, puithiam in anih cu mithiang lo a si tiah a thăn pei. Cumi cu lu asilole khabe ih a um mi builiah phārnat a si. 31 Asinan puithiam in builiahhma cu a zohfel, cule zoh hnik, a vun hmun dang hnakin phāi deuhin a lang cuang lo nân, hmul dum a keuh lo a si ahcun, puithiam in builiah neitu cu ni sarih sung a kharkhum pei. 32 Cule puithiam in a ni sarihnak ah a builiah cu a zohfel pei; cule ngai hnik, hma cu rak karhzai loin, cumi ah hmul aire khal um loin, a vun hmun dang hnakin a builiah cu phāi deuhin a lăng cuang lo a si ahcun, 33 amah ten a hmul a ziat pei, a builiah zawn lawngte a ziat lo pei. Cule puithiam in builiah neitu cu a dang ni sarih a kharkhum pei. 34 A ni sarihnak ah puithiam in a builiah cu a zohfel pei; cule ngai hnik, a vun parah a builiah rak karhzai loin, a vun hmun dang hnakin phāi cuangih a lăng lo a si ahcun, puithiam in anih cu mithiang a si tiah a thăn pei. Anih cun a hnipuan a sawp pei ih, a thiang ding a si. 35 Asinan a thiang tiih thăn hnuah a vun parah a builiah a rak karhzai a si ahcun, 36 puithiam in a zohfel pei; cule ngai hnik, a vun parah a builiah a rak karhzai a si ahcun, puithiam in a hmul aire a hawl a ṭul nawn lo. Anih cu mithiang lo a si. 37 Asinan a builiah cu kēlawhin, hmul dum a keuh a si ahcun, a builiah cu a dam a si. Anih cu mithiang a si ih, puithiam in anih cu mithiang a si tiah a thăn pei.

38 «Mipa simaw, nunau in simaw a taksa vun parah ṭhĕk var, a hleicein ṭhĕk var zet a neih asile, 39 puithiam in a zoh pei; cule zoh hnik, a taksa vun parih a ṭhĕkpawl cu dál nawn te a si ahcun, cumi cu vun parih darhzai mi ṭhek var menmen a si. Anih cu mithiang a si.

40 «A lu ihsin sám tlatupa lawngte cu, thlungkawlh a si, asinan anih cu mithiang a si. 41 A lu hmai lam ihsin sám tlatupa cu, calngawlh a si, asinan anih cu mithiang a si. 42 Cule thlungkawlh parah simaw, calngawlh parah simaw sen-ngo thlak hma a um asile, cumi cu a thlungkawlh ah asilole a calngawlh ah phārnat a puak a si. 43 Cun puithiam in cumi cu a zohfel pei; cule ngai hnik, a thlungkawlh par asilole a calngawlh parih hma bol cu sen-ngo thlakin, taksa vun parih phārnat vekih a lăng a si ahcun, 44 amah cu miphar a si. Amah cu mithiang lo a si. Puithiam in anih cu mithiang lo a si tiah a thăn tengteng pei; a hma cu a lu ah a um a si.

45 «Hma nei miphar cu a hnipuan thlek a si pei ih, a lu khuh a si lo pei; cule a hmur tlun lam a tuam pei ih, ‹A thiang lo! A thiang lo!› tiin a au pei. 46 Cu pa cu mithiang lo a si pei. Anih cu hma a neih kulh sung mithiang lo a si pei. Anih cu mithiang lo a si ih, amah te lawng a cêng pei; a cēnnak cu riahhmun khuarnak lengah a si pei.

Sinfen Phâr

47 «Sinfen khal a parih phārnathri a um asile, sahmul sinfen simaw, patzai sinfen simaw, 48 patzai fêmte simaw, sahmul simaw ih bān mi ah simaw, a hrawlh mi ah simaw a si ah siseh, savun simaw, savun ih tuah mi thil pakhat khat a si ah simaw, 49 cule cuih nathri cu sinfen ah simaw, savun ah simaw, a bān mi ah simaw, a hrawlh mi ah simaw, savun ih tuah mi thil pakhat khat ah simaw, hring nawnin maw sen nawnin simaw, a um a si ahcun, cumi cu phārnathri a si ih, puithiam hnenih hmuh ding a si. 50 Puithiam in nathri cu a zohfel pei ih, nathri umnak thil cu ni sarih sung a kharkhum pei. 51 Cule a ni sarihnak ah nathri cu a zohfel pei. Nathri cu a bān mi ah siseh, a hrawlh mi ah siseh, savun asilole savun ih tuah mi thil pakhat khat ah siseh, sinfen parih a rak karhzai asile, cumi nathri cu phārnat ṭihnung a si. Cumi cu a thianglo a si. 52 Curuangah nathri umnak sinfen cu bān mi a si ah siseh, hrawlh mi a si ah siseh, sahmul maw patzai fêmte a si ah simaw, asilole savun ih tuah mi thil pakhat khat a si khalah simaw a ur pei; ziangahtile cumi cu phārnat ṭihnung a si; cuih sinfen cu meisa ih ur tengteng ding a si.

53 «Asinan puithiam in cumi cu a zohfel, cule ngai hnik, sinfen a bān mi ah maw, a hrawlh mi ah maw, asilole savun ih tuah mi thil pakhat khat ah simaw, a nathri cu a rak karhzai lo asile, 54 puithiam in nathri umnak thil cu sawp dingin thu a pe pei, cule cumi cu anih in a dang ni sarih a kharkhum pei. 55 Hnipuan cu sawp a si hnuah, puithiam in nathri a zohfel pei, cule ngai hnik, a nathri cu a rak karhzai lo nain, nathri rak umnak hmun a lăngdān a danglam cuang lo asile, cumi cu a thianglo a si. Cumi cu meisa ah na ur pei; hnipuan cu a dung lam asilole a hmai lam mawih vivo ko nathri cun a eirál vivo. 56 Puithiam in cumi cu a zohfel, cule ngai hnik, cumi cu sawp a si hnuah a nathri a rak reh a si ahcun, a bān mi simaw a hrawlh mi simaw, asilole savun a si khalle anih in a sinfen ih nathri kainak zawn cu a thlek pei. 57 Asinan cuih sinfen ah nathri a lăngsal asile, a bān mi ah maw a hrawlh mi ah maw, asilole savun ih tuah mi thil pakhat khat ah maw a si khalle, cumi cu a karhzai thei mi nathri a si; nathri um mi cu meisa ah na ur tengteng pei. 58 Cule cuih sinfen cu na sawp ih, a bān mi ah siseh, a hrawlh mi ah siseh, asilole savun ih tuah mi ziang vek khal siseh, cumi ihsin nathri a hloh a si ahcun, cumi cu a vei hnihnak sawp a si pei ih, a thiang mi a si ding.

59 «Himi cu phārnathri kainak sinfen, sahmul maw patzai fêmte simaw, a bān mi ah maw a hrawlh mi ah simaw, asilole savun ih tuah mi thil pauhpauh ah simaw hrangih a thiang tiih thăn dingah asilole a thianglo tiih thăn ding hrangih dān a si,» tiin a sim.

14

Phâr Thenfainak

1 Jehovah in Mosi hnenah, 2 «Himi cu miphar thianter ni ih thlun ding mi dān a si: amah cu puithiam hnenah hruai a si pei. 3 Cule puithiam cu riahhmun khuarnak lengah a suak pei ih, cu pa kha a zohfel pei; cule ngai hnik, phārnathri cu miphar parih a dam asile, 4 puithiam in thianter ding mi pa hrangah, a thiang mi vâte nung pahnih, sidar thing, patphâng senlar le hissop la dingin thu a pe pei. 5 Cule puithiam in vâte pakhat deuh kha ti luanglai retnak leibel ah that dingin thu a pe pei. 6 A nung mi vâte lawngte cu a la pei ih, sidar thing, patphâng senlar le hissop thawn vâte nung cu ti luanglai tlunih thah mi vâte thisen sungah a hnim pei. 7 Cule puithiam in phār ihsi thianter ding mi pa cu, thisen in vei sarih a theh pei ih, anih cu a thiang tiah a thăn pei; cule a nung mi vâte cu ramlak ah a thlah pei. 8 Thianter ding mi pa cun a hnipuan a sawp pei, a sám hmuahhmuah a ziat pei ih, tidai in a khawlh aw pei, cutin mithiang a si ding. Cuihhnu ah riahhmun khuarnak ah a ra lut pei ih, amai puanthlam lengah ni sarih sung a um pei. 9 Asinan a ni sarihnak ah a lusám hmuahhmuah, a khabe hmul le a mittlâng hmul a ziat pei, cutin a hmul hmuahhmuah a ziat thluh pei. A hnipuan a sawp pei ih, tidai in a taksa a khawlh pei, cule anih cu mithiang a si ding.

10 «Cule a ni riatnak ah sawisel ding um lo tuufa no a pa pahnih le sawisel ding um lo kum khat ti tuufa no a nu pakhat le Thlairawl Thilhlăn hrangah hriak rawi cia sangvut phŭt efa khat ih ṭhen hra ṭhen thum le hriak ^alog khat a la pei. 11 Cun a thiangtertu puithiam in thianter ding mi pa le cuih thilpawl cu Tawnawknak Puanthlam luhnak ih Jehovah hmaiah a rak ap pei. 12 Cule puithiam in tuufa no a pa a la pei ih, Mawh Thilhlăn a hlan pei, cule hriak log khat thawn Jehovah hmaiih sēp thilhlăn ah a sēp pei. 13 Cun Sual Thilhlăn le Meiur Thilhlăn ran a thah ṭheu nak hmun, hmun thianghlim ah tuufa no cu a that pei; ziangahtile Mawh Thilhlăn sa cu Sual Thilhlăn sa vek thothoin puithiam covo a si. Cumi cu a thianghlim zet mi a si. 14 Puithiam in Mawh Thilhlăn thisen hrekkhat a la pei ih, puithiam in thianter ding mi paih vawrh lam hna zimah, a vawrh lam kut zungpi le a vawrh lam ke zungpi pawl parah a hnih pei. 15 Cule puithiam in cuih log ihta hriak ziangmaw zât a la pei ih, amai keh lam kut zaphak ah a thlerh pei. 16 Cun puithiam in a kut keh lamih hriak sungah a vawrh lam kutzung a hnim pei ih, a kutzung in hriak ziangmaw zât cu Jehovah hmaiah vei sarih a theh pei. 17 Cule puithiam in a kut ih hriak tāng mi lakih ziangmaw zât kha thianter ding mi paih vawrh lam hna zimah, a vawrh lam kut zungpi le a vawrh lam ke zungpi pawl parih Mawh Thilhlăn thisen tlunah a hnih pei. 18 Puithiam kut ih a tāng mi hriak cu thianter ding mi paih lu ah a culh pei. Cule puithiam in a hrangah Jehovah hmaiah sualkhuhthawinak a tuah ding a si.

14:10^a log: Log khat cu liter 0.3 a si.

19 «Cun puithiam in Sual Thilhlăn a hlan pei ih, a thianlonak ihsi thianter ding mi pa hrangah sualkhuhthawinak a tuahsak pei. Cumi hnuah Meiur Thilhlăn ran a that pei. 20 Cule puithiam in Biakṭheng parah Meiur Thilhlăn le Thlairawl Thilhlăn a hlan pei. Cutin puithiam in a hrangah sualkhuhthawinak a tuahsak pei ih, anih cu mithiang a si ding.

21 «Asinan cu pa cu a farah ih a tlin lo asile, a hrangah, sēp ih sualkhuhthawinak tuah dingah Mawh Thilhlăn hrangah tuufa no a pa pakhat le Thlairawl Thilhlăn hrangah hriak rawi cia sangvut phŭt efa khat ih ṭhen hra ṭhen khat cu hriak log khat thawn le, 22 thuro pahnih simaw, laileng no pahnih simaw a tlin tawkten a rak keng pei; pakhat cu Sual Thilhlăn hrangah, a dang pakhat cu Meiur Thilhlăn hrangah a si pei.

23 «A thianawkternak hrangah, a ni riatnak ah Tawnawknak Puanthlam luhnak ah, Jehovah hmaiah cupawl cu puithiam hnenah a rak keng pei. 24 Cule puithiam in Mawh Thilhlăn tuufa no cu hriak log khat thawn a la pei ih, puithiam in Jehovah hmaiih sēp thilhlăn ah a sēp pei. 25 Cun Mawh Thilhlăn tuufa no a that pei ih, puithiam in Mawh Thilhlăn thisen ziangmaw zât a la pei, cule thianter ding mi paih vawrh lam hna zimah le a vawrh lam kut zungpi le a vawrh lam ke zungpi pawl parah a hnih pei. 26 Cule puithiam in a keh lam kut zaphak ah hriak a thlerh pei. 27 Cule puithiam in a vawrh lam kutzung in a keh lam kut ih hriak hrekkhat cu Jehovah hmaiah vei sarih a theh pei. 28 Cule puithiam in a kut ih hriak cu thianter ding mi paih vawrh lam hna zimah le a vawrh lam kut zungpi le a vawrh lam ke zungpi pawl parih Mawh Thilhlăn thisen tlunah a hnih pei. 29 Puithiam kut sungih hriak tāng lai mi cu Jehovah hmaiah a hrangah sualkhuhthawinak tuahnak ah thianter ding mi paih lu ah a culh pei. 30 Cule anih in thuropawl lakih pakhat simaw, laileng nopawl lakih pakhat simaw amai tlinbăn tawkin a hlan pei. 31 Amai tlinbăn tawkin Sual Thilhlăn hrangah pakhat le Meiur Thilhlăn hrangah a dang pakhat, Thlairawl Thilhlăn zawngah a hlan pei. Cule puithiam in Jehovah hmaiah thianter ding mi pa hrangah sualkhuhthawinak a tuah pei. 32 Himi cu thianawkternak dan kêl a tlin lo tu phārhma neitu hrangih dān a si,» tiin a sim.

Phârnathri Nei Innpawl

33 Cule Jehovah in Mosi le Aaron hnenah, 34 «Nan co dingih ka lo pek hai mi Kanaan ram nan thlen tikah, nan co mi ram ih inn ah phārnathri ka ret asile, 35 a inn neitupa a ra pei ih, puithiam hnenah, ‹Inn ah ziang nathri simaw a um a bang,› tiin a ra ti pei, 36 nathri zohfel dingih a luh hlanah, inn rak lawngter dingin puithiam in thu a pe hai pei; cutin inn sungih thil hmuahhmuah cu thil thianglo an si thluh lo ding. Cumi hnu lawngah inn zohfel dingin puithiam a lut pei. 37 Cule nathri cu a zohfel pei, cule ngai hnik, inn phărpawl ah a hring nawnin maw, a sen nawnin simaw a rak bĕt ih, phăr eikuar deuhih a lăng asile, 38 puithiam cu inn lengah a suak pei ih, ni sarih sung sângka a kharpit pei. 39 Cule puithiam cu a ni sarihnak ah a rasal pei ih, a zohfel pei; cule ngai hnik, inn phărpawl parih nathri a karhzai asile, 40 puithiam in thu a pe hai pei ih, nathri umnak lungtopawl cu an phăwk pei ih, khaw leng hmun thianglo ah an hlăwn pei. 41 Cule inn sung kimvel hmuahhmuah cu a ziatter hai pei ih, an ziah mi bālnâwi cu khaw leng hmun thianglo ah an sûng pei. 42 Cun lungto dang an la pei ih, cuih lungtopawl aiah an ret pei, cule anih in tlak dang a la pei ih inn cu a erh pei.

43 «Cule cuih lungtopawl a phawh hnu le inn a ziah hnu le a erh hnuah, inn ah nathri a umsal ih, a puaksal a si ahcun, 44 puithiam a ra pei ih a zoh pei; cule ngai hnik, inn ah nathri a rak karhzai a si ahcun, inn ah phārnat ṭihnung a um a si. Cumi cu a thianglo a si. 45 Cule puithiam in inn cu a băl pei ih, a lungtopawl, a zanthing le a erhnak hmuahhmuah cu khaw leng hmun thianglo ah a thiar hai pei. 46 Cuihhleiah inn kharpit a si laiih a sungih a luttu cu zan lam tiang mithiang lo a si pei. 47 Cule cuih inn sungih a ittu cun a hnipuan a sawp pei ih, cuih inn sungih rawl a eitu khal in a hnipuan a sawp pei.

48 «Asinan puithiam cu lut tahratin cumi cu a zohfel, cule ngai hnik, inn an erhṭhat hnuah inn ah nathri a rak karhzai lo asile, puithiam in inn cu a thiang tiah a thăn pei, ziangruangahtile nathri cu a dam. 49 Cule anih in inn thianfai dingah vâte pahnih, sidar thing, patphâng senlar le hissop a la pei. 50 Cun ti luanglai retnak leibel sungah vâte pakhat deuh kha a that pei; 51 cule anih in sidar thing, hissop, patphâng senlar le vâte nung cu a la pei ih, cupawl cu thah mi vâte thisen ah le ti luanglai sungah a hnim hai pei, cule inn cu vei sarih a theh pei. 52 Cule inn cu vâte thisen le ti luanglai le vâte nung, cun sidar thing, hissop le patphâng senlar thawn a thianfai pei. 53 Cun vâte nung cu khaw leng, ram ah a thlah pei ih, inn hrangah sualkhuhthawinak a tuah pei, cule cumi cu a thiang ding.

54 «Himi cu phārhma le builiah pauhpauh hrangih dān a si, 55 phārnathri kai sinfen le phārnathri kai inn hrang, 56 bol le hmahnâi le ṭhĕk hrang a si. 57 Himi phārnat hrang dān cu thil pakhat khat a thian cān le a thianlo cān ih zirh ding mi a si,» tiin a sim hai.

15

Mipa Thilput hrang Dān

1 Jehovah in Mosi le Aaron hnenah, 2 «Israel tefapawl be hai uhla, an hnenah, ‹Mipa pakhat in a taksa ihsin thilput mi a neih tikah, a thilput mi ruangah amah cu a thianglo a si. 3 Cule a thilput cu a taksa ihsi a dăwk laiah siseh, a taksa ihsi thilput a reh ah siseh, himi hi a thilput in amah a thianloterdăn cu a si. Amah cu a thianglo a si. 4 Thilput neitupaih ihnak ihkhun kip cu a thianglo ih, a tonak thil kip cu a thianglo ding. 5 Cule zokhal a ihkhun a daingahtu cun a hnipuan a sawp pei ih, tidai in a khawlh aw pei, cule zan lam tiang mithiang lo a si ding. 6 Thilput neitupaih to dahnak ziang par khalih a totu cu a hnipuan a sawp pei ih, tidai in a khawlh aw pei, cule zan lam tiang mithiang lo a si ding. 7 Cule thilput neitupaih taksa a daingahtu cun a hnipuan a sawp pei ih, tidai in a khawlh aw pei, cule zan lam tiang mithiang lo a si ding. 8 Thilput neitupa in mithiangpa kha cil a phuingah asile, anih in a hnipuan a sawp pei ih, tidai in a khawlh aw pei, cule zan lam tiang mithiang lo a si ding. 9 Thilput neitupaih tonak kung tophah pauhpauh cu thianglo a si ding. 10 Cu paih tăngih thil pakhat khat a daingahtu pauhpauh cu zan lam tiang mithiang lo an si ding. Cuih thil pakhat khat a thiartu cun a hnipuan a sawp pei ih, tidai in a khawlh aw pei, cule zan lam tiang mithiang lo a si ding. 11 Cule thilput neitupaih daingah mi le tidai ih a kut a khawlhfai lo tu pauhpauh cu an hnipuan an sawp pei ih, tidai in a khawlh aw pei, cule zan lam tiang mithiang lo a si ding. 12 Thilput neitupaih a daingah mi leibel cu khuai a si pei ih, thing bungbel pauhpauh cu tidai ih tleŭhfai ding a si.

13 ‹Cule thilput a neitupa cu a thilput ihsin thianter a si tikah, anih in a thian ni ihsin a hrangah ni sarih siar sehla, a hnipuan a sawp pei ih, ti luanglai ah a taksa a khawlh pei; cun anih cu mithiang a si ding. 14 A ni riatnak ah thuro pahnih simaw, laileng no pahnih simaw a hrangah a la pei ih, Tawnawknak Puanthlam luhnak ih Jehovah hmaiah a ra pei, cule puithiam hnenah a pe hai pei. 15 Cun puithiam in Sual Thilhlăn hrangah pakhat, Meiur Thilhlăn hrangah a dang pakhat a hlan pei. Cule a thilput ruangah a hrangah puithiam in sualkhuhthawinak Jehovah hmaiah a tuah pei.

16 ‹Cule mipa zokhal a cihnâng a suak asile, tidai in a taksa zaten a khawlh pei, cule zan lam tiang mithiang lo a si ding. 17 Cule cihnâng kainak sinfen le savun pauhpauh cu tidai in sawp ding a si, cule zan lam tiang thil thianglo a si ding. 18 Nunau pakhat cu mipa hnenah a it ih, cihnâng suak a um tikah, tidai in an khawlh aw pei, cule zan lam tiang mithiang lo an si ding.

Nunau Thilput hrang Dān

19 ‹Nunau pakhat in thilput a nei ih, a taksa ihsi thilput cu thisen a si ahcun, ni sarih sung a dangten ret a si pei; cule zokhal amah a daingahtu cu zan lam tiang mithiang lo a si ding. 20 A thianlo sungih a ihnak thil kip cu thil thianglo an si ding; a tonak thil tinkim khal thil thianglo an si ding. 21 Cu nuih ihkhun a daingahtu pauhpauh cun an hnipuan an sawp pei ih, tidai ah an khawlh aw pei, cule zan lam tiang mithiang lo an si ding. 22 Cule zokhal a tonak thil ziangkhal a daingahtu cun a hnipuan a sawp pei ih, tidai ah a khawlh aw pei, cule zan lam tiang mithiang lo a si ding. 23 A ihkhun parah simaw, a tonak parah simaw thil pakhat khat a um asile, cumi a thâmngahtupa cu, zan lam tiang mithiang lo a si ding. 24 Cule mipa zokhal cuih nunau thawn an ihtlang asile, nunaunuih thianlonak cu a parah a um pei ih, anih cu ni sarih sung mithiang lo a si ding; cule a ihnak ihkhun kip cu thianglo an si ding.

25 ‹Nunau pakhat cu amai thianlonak dankēl hnakih ni tamdeuh maw, asilole amai thianlonak dan kêl hnakih thi tamdeuhin simaw ni tampi a thi a pût asile, a thiput thianlo sung hmuahhmuah cu a thianlonak dan kêl tikcucān vek thothoin a si pei. Cu nu cu mithiang lo a si ding. 26 A thilput sung hmuahhmuah ih a ihnak ihkhun kip cu a hrangah amai dankēl ih a thianlonak cān ih a ihkhun vek thothoin a si ding; cule a thian lo cān ih thianlonak vek thothoin a tonak kip cu an thianglo ding. 27 Cuih thilpawl a daingahtu pauhpauh cu mithiang lo an si ding; annih cun an hnipuan an sawp pei ih, tidai ah an khawlh aw pei, cule zan lam tiang mithiang lo an si ding.

28 ‹Asinan a thilputnak thianter asile, anih in a hrangah ni sarih a siar pei ih, cumi ṭhehin amah cu mithiang a si ding. 29 Cule a ni riatnak ah anih in a hrangah thuro pahnih simaw, laileng no pahnih simaw a la pei ih, puithiam hnen, Tawnawknak Puanthlam luhnak ah a rak keng pei. 30 Cun puithiam in Sual Thilhlăn hrangah pakhat le Meiur Thilhlăn hrangah a dang pakhat a hlan pei ih, puithiam in a thianlonak thilput hrangah Jehovah hmaiah cu nuih hrangah sualkhuhthawinak a tuah pei.

31 ‹Hiti hin an thianlonak ihsin Israel tefapawl cu na serhhranawter hai ding a si, culoasile an lakih ka Biakbûk an bawrhbanter tikah an thianlonak ah an thi pang ding. 32 Himi cu thilput neitu le a cihnâng a suahnak ruangih a thianglo mi pa hrang le 33 a thianlonak dankēl ruangih midamlonu le nunau a si ah siseh, mipa a si ah siseh, thilput a dăwk mi le mithiang lo nunau a ihpitu mithiang lopawl hrangih dān a si,› tiah sim aw,» tiin a sim hai.

16

Sualkhuhthawinak Ni

1 Aaron fapa pahnih in Jehovah hmaiih meisa danglam an hlăn tikah, an thi; an thih hnuah Jehovah in Mosi a bia; 2 cule Jehovah in Mosi hnenah, «Kuang parih Tlăwnlungawithawinak Hmun hmaiih puanzar sung lam Hmun Thianghlim sungah cān tapauh ah lut lo dingin na unaupa Aaron kha sim aw, culole a thi pang ding, ziangahtile Tlăwnlungawithawinak Hmun tlunih mero lakah ka rung lang ṭheu ding.

3 «Hitin Sual Thilhlăn hrangah câwpa tûai pakhat thisen le Meiur Thilhlăn hrangah tuucang pakhat thisen thawn Aaron cu Hmun Thianghlim ah a lut pei. 4 Anih in a taksa ah a thianghlim mi patzai kâwrfualpi le patzai bâwngbite a hruk pei; anih in patzai ih tah mi taikhap a khap pei ih, anih cu patzai ih tah mi puithiam lubik lupâwng thawn a thuam aw pei. Hipawl cu sinfen thianghlim an si. Curuangah anih cu tidai in a taksa a khawlh pei ih, cuih hnipuan cu a hruk pei. 5 Cule Israel tefa umkhawm hnen ihsin Sual Thilhlăn hrangah mepawl lak ihsin mepa tûai pahnih le Meiur Thilhlăn hrangah tuucang pakhat a la pei.

6 «Aaron in amai bulpak hrangah Sual Thilhlăn ah câwpa a hlan pei ih, amah le a sungkua hrangah sualkhuhthawinak a tuah pei. 7 Anih in mepa pahnih a la pei ih, cupawl cu Tawnawknak Puanthlam luhnak ih Jehovah hmaiah a suahpi pei. 8 Cun Aaron in mepa pahnih cu camcawhfung a zûk pei: pakhat cu Jehovah hrangah, a dang pakhat cu thlah ding mi mepa hrangah a si pei. 9 Cule Aaron in Jehovah-ih camcawhfung tlûknak mepa cu a hruai pei ih, Sual Thilhlăn hrangah a hlan pei. 10 Asinan thlah ding mi mepa si dingih camcawhfung a tlaknak mepa cu, ramṭhing ih thlah mi mepa fehsuakternak in sualkhuhthawinak tuah dingah a nungin Jehovah hmaiah a suahpi pei.

11 «Cule Aaron in amai bulpak hrangah Sual Thilhlăn ah câwpa a rak keng pei ih, amah le a sungkua hrangah sualkhuhthawinak a tuah pei, cule amai bulpak hrangah Sual Thilhlăn ah câwpa a that pei. 12 Cun Jehovah hmaiih Biakṭheng ihsin meiling vâm thawi a khat mi meiling suahdur a la pei ih, dēndip cia rimhmui thaw thawn sumpi khat in puanzar sungah a kenglut pei. 13 Cule anih in Jehovah hmaiih meisa parah rimhmui a ret pei, cutin rimhmui khu in Theihpinak Kuang tlunih Tlăwnlungawithawinak Hmun a khuh pei, culole a thi ding. 14 Câwpa thisen hrekkhat a la pei ih, nisuahnak lam sirih Tlăwnlungawithawinak Hmun parah a kutzung in a theh pei; cule anih in a kutzung in thisen hrekkhat cu Tlăwnlungawithawinak Hmun hmai cu vei sarih a theh pei.

15 «Cun mipi hrangah Sual Thilhlăn mepa a that pei ih, puanzar sung lamah a thisen a kenglut pei, a thisen cu câwpa thisen a tidān vek cekci in a ti pei ih, Tlăwnlungawithawinak Hmun par le Tlăwnlungawithawinak Hmun hmai a theh pei. 16 Cule Israel tefapawlih an thianlonak ruangah le an dānpahbălnakpawl ruangih an sualpawl hmuahhmuah hrangah, Hmun Thianghlim hrangah sualkhuhthawinak a tuah pei; cutin mithiang lopawl lakih a um mi Tawnawknak Puanthlam hrangah sualkhuhthawinak a tuah pei. 17 Anih cu sualkhuhthawinak tuah dingin Hmun Thianghlim ih a luh tikah a ra suahsal hlanlo Tawnawknak Puanthlam ah mi zohman an um lo pei, cutin amai hrang, a sungkua hrang le Israel mipungkhawm hmuahhmuah hrangah sualkhuhthawinak a tuah thei ding a si.

18 «Cule anih cu Jehovah hmaiih Biakṭheng ah a ra suak pei ih, Biakṭheng hrangah sualkhuhthawinak a tuah pei, cule câwpa thisen hrekkhat le mepa thisen hrekkhat a la pei ih, Biakṭheng kimvelih kipawl ah a mān pei. 19 Cun Biakṭheng parah thisen ziangmaw zât a kutzung in vei sarih a theh pei ih, Biakṭheng cu a thianter pei, cule Israel tefapawlih thianlonak ihsin cumi cu a serhhran pei.

20 «Cule anih in Hmun Thianghlim le Tawnawknak Puanthlam le Biakṭheng hrang sualkhuhthawinak a tuah ṭheh tikah, mepa nung a hruai pei. 21 Aaron in mepa nung lu parah a kut pahnih a suang pei ih, Israel tefapawlih mawhsualnak hmuahhmuah le an dānpahbălnak hmuahhmuah ih an sualpawl hmuahhmuah thuhla ah sual a phuang pei, cupawl cu mepa lu parah ṭhumin mirintlakpaih kut in ramṭhing ah a thlahhlo pei. 22 Mecang in an mawhsualnak hmuahhmuah cu minung cēnlonak hmun ah a phur pei; cule anih in ramṭhing ah mepa cu a va thlah pei.

23 «Cun Aaron cu Hmun Thianghlim sung a luh tikih a rak hruh mi patzai sinfen kha a hlít pei, cule cupawl cu cu tawkah a tân ta pei. Cule Tawnawknak Puanthlam sungah a ra lut pei. 24 Cule anih cu hmun thianghlim ah ti in a taksa a khawlh pei, a sinfen a hruk pei, a ra suak pei ih a hrang le mipi hrangah Meiur Thilhlăn a hlan pei, cule amai hrang le mipi hrangah sualkhuhthawinak a tuah pei. 25 Sual Thilhlăn thau cu Biakṭheng parah a ur pei. 26 Cule thlah ding mi mepa si dingih mepa a va thlahtupa cu a hnipuan a sawp pei ih, ti ah a taksa a khawlh aw pei, cule cumi hnuah anih cu riahhmun khuarnak ah a lut ding. 27 Hmun Thianghlim sungih sualkhuhthawinak tuah dingih an rak ken mi Sual Thilhlăn câwpa le mepa thisen cu riahhmun khuarnak lengah thiar ding a si. Cule an vun, an sa le an êkpawl cu meisa ah an ur pei. 28 Cun a urtu cun a hnipuan a sawp pei ih, ti in a taksa a khawlh pei, cule cumi hnuah anih cu riahhmun khuarnak ah a lut ding a si.

29 «Himi cu nan hrangah kumkhaw sakhaw dān a si pei: a thla sarihnak, cuih thla a ni hratnak ah phahniam aw uhla, nan rammi in siseh, nan lakih cêng ram dang mi khal in siseh, ziang hna hman nan ṭuan lo pei. 30 Ziangahtile cuih ni ah puithiam in nanmah lo thiangter dingin nan hrangah sualkhuhthawinak a tuah ding, cutin Jehovah hmaiah nan sualpawl hmuahhmuah ihsin nan thiang thei ding a si. 31 Cumi cu nan hrangih cawlhnak Sabbath hleice a si ih, nan phahniam aw pei. Cumi cu kumkhaw sakhaw dān a si. 32 Cule a pa aiih puithiam si dingih hriak an thih mi le an serhhran mi puithiam in sualkhuhthawinak a tuah pei, cule sinfen thianghlim a si mi patzai hnipuan a hruk pei; 33 cun anih in Hmun Thianghlim hrangah sualkhuhthawinak a tuah pei ih, Tawnawknak Puanthlam le Biakṭheng hrangah sualkhuhthawinak a tuah pei, cule puithiampawl le a mipungkhawm mi senpi hmuahhmuah hrangah sualkhuhthawinak a tuah pei. 34 Himi cu Israel tefapawl le an sualpawl hmuahhmuah hrangih sualkhuhthawinak kum khat vei khat tuah dingah nan hrangih kumkhaw sakhaw dān a si pei,» tiah a ti. Cule anih in Jehovah in Mosi hnenih thu a pek vekin a tuah.

17

Raithawinak hrang Hmun Pakhat

1 Jehovah in Mosi hnenah, 2 «Aaron le a fapapawl le Israel-mi hmuahhmuah be awla, an hnenah, ‹Himi hi Jehovah in, 3 «Israel sungza mi pakhat khat in câwpa maw, tuu maw, me simaw, riahhmun khuarnak sung asilole riahhmun khuarnak leng ah a that ih, 4 Jehovah-ih Biakbûk hmaiih Jehovah hmaiah thilhlăn hlan dingin Tawnawknak Puanthlam luhnak ah a rak keng lo tu cu, cu pa parah a thisen mawh phurhter a si pei. Anih in thisen a rak suah a si; cu pa cu a mipawl lak ihsin sahcat a si pei, 5 a netnakah ram ih an hlăn mi an raithawinakpawl kha Israel tefapawl in an rak keng pang ding ih, Tawnawknak Puanthlam luhnak ih Jehovah hmaiih puithiam hnenah an rak keng pang ding, cule Remnak Thilhlănpawl hrangah Jehovah hnenah an rak hlan hai pang ding. 6 Cule puithiam in Tawnawknak Puanthlam luhnak ih Jehovah Biakṭheng parah thisen a theh pei, cule Jehovah hnenih rimthaw si dingah a thau a ur pei. 7 Hlawhhlâng vekih khawsiapawl an rak thlun dah zo bang kha cun khawsepawl hnenah an raithawinakpawl an hlan nawn lo pei. Himi cu an tesinfa san tiangin an hrangah sakhaw dān a si kumkhua pei,» tiin thu a pek mi thil a si,› tiah sim aw.

8 «Nang in an hnenah, ‹Israel sungza mi pakhat khat in simaw, nan lakih a cêng mi ram dang mi pakhat khat in simaw, Meiur Thilhlăn simaw, raithawinak simaw a hlan ih, 9 Jehovah hnenih hlan dingah Tawnawknak Puanthlam luhnak ih a rak keng lo tu, cu pa cu a mipawl lak ihsin sahcat a si pei.

Thisen Ei Khamsalnak

10 ‹Cule Israel sungza mi pakhat khat simaw, nan lakih cêng ram dang mi pakhat khat simaw, ziang vek thisen khal a eitu cu, thisen eitupa dokalhin ka hmai ka hawih ding ih, a mipawl lak ihsin ka sâtcat ding. 11 Ziangahtile taksa nunnak cu thisen ah a um ih, nan nunnak hrangah Biakṭheng parah sualkhuhthawinak tuah dingin thisen ka lo pe hai zo; ziangahtile nunnak hrangih sualkhuhthawinak tuahtu cu thisen a si,› tiah na sim pei. 12 Curuangah Israel tefapawl hnenah, ‹Nan lakah zohman in thisen nan ei lo pei, nan lakih cêng zo vek ram dang mi khal in thisen a ei lo pei,› tiah ka lo sim.

Thisen in Nunnak a Pe

13 «Israel tefapawl lakih mi pakhat simaw, nan lakih cêng ram dang mipawl lakih mi pakhat simaw in ram a tawi ih ei thiang mi thilnung asilole vâte pakhat khat a kaihngah mi pauhpauh cu an thisen a thle pei ih, an thisen cu leivut in a khuh ta pei; 14 ziangahtile thisen cu taksa hmuahhmuah ih nunnak a si. A thisen in a nunnak a pe. Curuangah Israel tefapawl hnenah, ‹Ziangvek titsa thisen hman nan ei lo pei, ziangahtile taksa hmuahhmuah ih nunnak cu an thisen a si. Cumi a eitu pauhpauh cu sahcat an si pei,› tiah ka lo sim.

15 «Cule amah teih thi mi simaw, sahrang ih deh mi simaw, a eitu pauhpauh cu nan rammi a si ah siseh, ram dang mi a si ah siseh, a hnipuan a sawp pei ih, tidai in a khawlh aw pei, cule zan lam tiang anih cu mithiang lo a si pei. Cuṭhehin anih cu mithiang a si ding. 16 Asinan a hnipuan a sawp lo ih, a taksa a khawlh lo asile, amai mawhsualnak amah in a phur pei,» tiin a sim.

18

Hursualnak hrang Dān

1 Jehovah in Mosi hnenah, 2 «Israel tefapawl be awla, an hnenah, ‹Keimah cu Jehovah nan Pathian ka si. 3 Nan rak cēn dahnak Izip ram ih an tuah mipawl vekin nan tuah lo pei ih, ka lo hruailuhnak ding Kanaan ram ih tuah mipawl vek khalin nan tuah lo pei; an sakhaw dān vek khalin nan nung lo pei. 4 Ka cīn le dānpawl nan thlun pei ih, nunpi dingin ka sakhaw dānpawl nan thlun pei, keimah cu Jehovah nan Pathian ka si. 5 Curuangah ka sakhaw dānpawl le ka cīn le dānpawl nan thlun pei, mi in cumi a thlun asile, cupawl in a nung ding, keimah cu Jehovah ka si.

6 ‹Nan lakih zohman in a taklawngnak hlîp dingah amai sungkhat nâi zokhal nan pan lo pei, keimah cu Jehovah ka si. 7 Na paih taklawngnak simaw, na nuih taklawngnak simaw na hlîp lo pei. Anih cu na nu a si; a taklawngnak na hlîp lo pei. 8 Na nu-eiih taklawngnak na hlîp lo pei; cumi cu na paih taklawngnak a si. 9 Nan inn ih a suak mi asilole hmun dangih a suak mi a si khalah na paih fanu asilole na nuih fanu a si mi na farnuih taklawngnak, an taklawngnak na hlîp lo pei. 10 Na fapaih fanu simaw, na fanuih fanu simaw ih taklawngnak na hlîp lo pei; ziangahtile annihih taklawngnak cu nangmai taklawngnak khal a si. 11 Na paih nupi-ih fanu, na pa ih hrin miih taklawngnak na hlîp lo pei, anih cu na farnu a si. 12 Na ni-ih taklawngnak na hlîp lo pei; anih cu na paih sungkhat nâi a si. 13 Na nuseuih taklawngnak na hlîp lo pei, ziangahtile anih cu na nuih sungkhat nâi a si. 14 Na paseuih taklawngnak na hlîp lo pei. A nupi na pan lo pei; anih cu na nute a si. 15 Na fapa nupi-ih taklawngnak na hlîp lo pei, anih cu na fapa nupi a si, a taklawngnak na hlîp lo pei. 16 Na unaupaih nupi-ih taklawngnak na hlîp lo pei, cumi cu na unaupaih taklawngnak a si. 17 Nunau pakhat le a fanuih taklawngnak na hlîp lo pei, cu nuih taklawngnak hlîp ding khalin, a fapaih fanu siseh, a fanuih fanu siseh na ṭhi lo pei. Annih cu cu nuih sungkhat nâi an si. Cumi cu sualralnak a si. 18 A unau dang a nun laiah a taklawngnak hlîp dingin nunau pakhat cu a unau khîngpi si dingin na nei cih fawn lo pei.

19 ‹A thianlonak dan kêl a neih laiah a taklawngnak hlîp dingin nunau pakhat na pan fawn lo pei. 20 Cuihhleiah amah thawn bawrhbangawter dingah, na innhnen nupi na ihpi fawn lo pei. 21 Cule na cithlahpawl zohman Molek hrangah mei sungah na lutter lo pei, na Pathian hmin khal na bawrhbangter lo pei, keimah cu Jehovah ka si.

Mipa le Mipa Pawlawk Khamnak

22 ‹Nunau ihpi vekin mipa na ihpi lo pei. Cumi cu thil fihnungza a si. 23 Amah thawn bawrhbangawter dingin ṭilva pakhat khat khal na pâwl lo pei. Rannung thawn pawlaw dingin nunau cu rannung hmaiah a ding lo pei. Cumi cu thil linglet a si.

24 ‹Hi thilpawl lakih pakhat khat thawn bawrhbangawter hlah uh; hipawl ruangah a si, nan hmaiih ka dawisuak ding mi miphunpawl an bawrhbang ṭheh. 25 Ziangahtile ram cu a bawrhbang a si; curuangah a mawhsualnak a parah ka lehrūl ding ih, ram in a luahtupawl a kháksuak ṭheh a si. 26 Curuangah ka sakhaw dānpawl le ka cīn le dānpawl nan thlun pei ih, nanmai miphun lakih pakhat khat in siseh, nan lakih cêng ram dang mi pakhat khat in siseh, hi thil fihnungzapawl hi pakhat hman nan tuah lo pei. 27 Ziangahtile nan hlanih a rak um mi cuih rammipawl in hi thil fihnungzapawl hmuahhmuah hi an rak tuah ih, cutin ram cu a bawrhbang a si. 28 Culoasile nan hlanih miphunpawl a rak kháksuak bangin, cuih ram nan bawrhbanter tikah nannih khal cuih ram cun a lo kháksuak ve pang ding.

29 ‹Ziangahtile zokhal himi fihnungza thilpawl lakih pakhat khat a tuahsualtu cu an mipawl lak ihsin sahcat a si ding. 30 Curuangah nannih in ka thucah nan thlun pei, cutin nan hlanih an rak tuahsual mi himi fihnungza nunphungpawl lakih pakhat hman tuahsual hlah uh, cutin cupawl hmangin nanmah le nanmah nan bawrhbangawter lo ding a si, keimah cu Jehovah nan Pathian ka si,› tiin sim aw,» tiah a ti.

19

Ni Tin Nun Dān

1 Jehovah in Mosi hnenah, 2 «Israel tefa umkhawm hmuahhmuah be awla, an hnenah, ‹Nan thianghlim ding a si, ziangahtile kei, Jehovah nan Pathian cu ka thianghlim a si.

3 ‹Nan lakih mi tin in nan nu le nan pa nan upat pei ih, ka Sabbath-pawl nan ul pei. Keimah cu Jehovah nan Pathian ka si.

4 ‹Milempawl lam nan hawi lo pei, nan hrangah burcawp pathianpawl khal nan tuah lo pei. Keimah cu Jehovah nan Pathian ka si.

5 ‹Cule Jehovah hnenah Remnak Thilhlăn raithawinak nan hlăn asile, cumi cu nanmai lungpuak rori in nan hlan pei. 6 Cumi cu nan thawi ni lala le a thaisun ah ei a si pei, cule a ni thumnak tiang a tāng mi a um asile, cumi cu meisa in ur a si pei. 7 A ni thumnak ih ei asilen, cumi cu thil fihnungza a si. Cumi cu cohlan a si lo pei. 8 Curuangah mi kip a eitu cun anmai mawhsualnak an phur pei, ziangruangahtile Jehovah-ih thilhlăn thianghlim a thangseter a si; cule cu pa cu a mipawl lak ihsin sahcat a si pei.

9 ‹Nan ram ah thlairawl rah nan ah tikah, na ló kĕlkawm ihta tiang na at thluh lo pei ih, na thlairawl rah hrelh mipawl khal na sar fawn lo pei. 10 Cule na sabit ṭil na sar lo pei ih, na sabit hmuan ih sabit rah hmuahhmuah na khawm thluh lo pei; mifarah le mikhual hrangah na hlah ding a si. Keimah cu Jehovah nan Pathian ka si.

11 ‹Rûk nan ru lo pei, thuphan nan per lo pei, pakhat le pakhat nan bum aw lo pei. 12 Cule dik lo takin ka hmin sâlin sia nan săm lo pei, na Pathian hmin na bawrhbangter lo pei. Keimah cu Jehovah ka si.

13 ‹Na innhnen thil dik lo zetin na laksak lo pei, na innhnen khal na suam fawn lo pei. Na hlawhfa-ih nihlawh man cu zing lam tiang zanvar na hnenah na hrensak lo pei. 14 Hnaset na camse lo pei, mitcaw hmaiah bahnak na ret fawn lo pei, cuhnakin na Pathian na ṭihzah sawn pei. Keimah cu Jehovah ka si.

15 ‹Thuṭhennak ah diklonak na tuah lo pei. Mifarah na thleidang lo pei, milian na upat cuangce fawn lo pei. Dingfelnak in na innhnen thu na ṭhensak pei. 16 Na mipawl lakah mirelsetu siin na vakkûal lo pei; na innhnen ^anunnak dokalhin thutheihpitu na si fawn lo pei. Keimah cu Jehovah ka si.

19:16^a nunnak: A ṭawng hrampi Hebru ah cun thisen ti a si.

17 ‹Na thinlung in na unau na hua lo pei. Amah ruangah sual na phurhlonak dingah na innhnen na kawk tengteng pei. 18 Phulei na sám lo pei, na phunpipawlih tefapawl parah thincin na nei fawn lo pei, cuhnakin nangmah le nangmah na duhdawtawk vekin na innhnen na duhdaw sawn pei. Keimah cu Jehovah ka si.

Ka Sakhaw Dānpawl Thlun Uh

19 ‹Ka sakhaw dānpawl nan thlun pei. Sumhnám phun dangdang ci na thlahawter lo pei. Na ló ah thlaici dangdang na cingrawi lo pei. Patzai fêmte le tuu hmul tahrawi mi sinfen na hruh lo pei.

20 ‹Tlen hrih lo mi simaw, luatter hrih lo mi simaw, mipa pakhat ih siahhlawh si dingah, ham cia mi nunau pakhat a ihpitu pauhpauh cu himi ruangah hremnak a um pei; asinan anmah cu thah an si lo pei, ziangruangahtile cuih nunau cu miluat a si lo. 21 Cule Mawh Thilhlăn hrangah tuucang pakhat cu Tawnawknak Puanthlam luhnak ih Jehovah hnenah amai Mawh Thilhlăn hrangah a rak keng pei. 22 Puithiam in a tuahsual zo mi a sualnak ruangah Jehovah hmaiah Mawh Thilhlăn tuucang in a hrangah sualkhuhthawinak a tuah pei. Cule a tuahsual zo mi a sualnak cu ngaidam a si ding.

23 ‹Kanaan ram nan luh ih, rawl hrangih thingkung a phunphun nan phun tikah, an rah cu thianglo zetah nan ruat pei. Kum thum sung nan hrangah thianglo zet an si pei. Cumi cu ei ding a si lo. 24 Asinan a kum litnak ah cun thingtheirah hmuahhmuah cu Jehovah thangṭhatnak hrangah an thianghlim ṭheh ding a si. 25 Cule a kum ngatnak ah an rah nan ei ding, cutin thingkungpawl in nan hrangah rah tam sinsinin an rah ding. Keimah cu Jehovah nan Pathian ka si.

26 ‹Zianghman thisen thawn nan ei lo pei, simsungthiamnak simaw, aizohthiamnak simaw nan hmang lo pei. 27 Nan lu kimvelin nan met lo pei, pianze nei loin na khabe hmul sirpawl na ziat fawn lo pei. 28 Mithi ruangah nan taksa nan hriatpem lo pei, nan taksa parah hminsinnak ṭial nan tuah fawn lo pei. Keimah cu Jehovah ka si.

29 ‹Na fanu cu hlawhhlâng cang dingah, na zuarawter lo pei, culole ram cu hlawhhlannak ah a tlulut ding ih, ram cu sualralnak in a khat pang ding.

Sabbath Ul Uh

30 ‹Ka Sabbath-pawl nan ul pei ih, ka hmun thianghlim nan zah pei. Keimah cu Jehovah ka si.

31 ‹Thlarau kawhthiampawl le polpawl pan hlah uh; lo bawrhbangter dingin annihpawl cu hawl hlah uh, keimah cu Jehovah nan Pathian ka si.

32 ‹Ṭuakpar hmaiah na tho pei ih, patar mithmai cu na zah pei, cule na Pathian ṭihzah aw. Keimah cu Jehovah ka si.

33 ‹Cule nan ram sungah na zawngih ram dang mi a cēn asile, amah cu na tuahse lo pei. 34 Nan lakih cêng ram dang mi cu nanmai miphun lakih mi pakhat vek rori a si pei, cule nangmah na duhdawtawk vekin amah cu na duhdaw pei; ziangahtile nannih khal Izip ram ah mikhual nan rak si dah ve. Keimah cu Jehovah nan Pathian ka si.

35 ‹A sau lam, a rih lam asilole a tum lam tahnak ah thuṭhennak dik lo nan tuah lo pei. 36 Khīngkhainak dik, cuailung dik, efa dik le kalān dik nan hmang pei. Keimah cu Izip ram ihsin a lo hruaisuaktu Jehovah nan Pathian ka si.

37 ‹Curuangah ka sakhaw dānpawl hmuahhmuah le ka cīn le dānpawl hmuahhmuah nan thlun pei ih, cupawl cu nan tuah pei. Keimah cu Jehovah ka si,› tiah sim hai aw,» tiin a sim.

20

Pathian Biaknak Dānpahbăltu hrang Dāntatnak

1 Jehovah in Mosi hnenah, 2 «Nang in Israel-mipawl hnenah, ‹Israel tefapawl siseh, Israel ram ih um ram dang mi siseh, Molek hnenih a cithlahpawl lakih pakhat khat a petu pauhpauh cu thah tengteng an si pei. A ram mi senpi in amah cu lungto in an deng pei. 3 Ka hmun thianghlim le ka hmin thianghlim bawrhbangter dingin, Molek hnenih a cithlah hrekkhat a pek ruangah, cu pa dokalhin ka hmai ka hawih ding ih, a mipawl lak ihsin ka ^asâtcat ding. 4 Cule Molek hnenih a cithlah hrekkhat a pek laiah, cu pa cu ram mi senpi in ziangti zawng khalin an mit huhsanin, amah cu an thah lo asile, 5 cu pa dokalhin siseh, a hrin dokalhin siseh, ka hmai ka hawih ding; cule Molek hnenih hlawhhlannak sual tuah dingih amah thawi tawzuar hmuahhmuah le cu pa cu a mipawl lak ihsin ka sâtcat ding.

20:3^a sâtcat: Sem 17:14 simfiangnak zoh aw.

6 ‹Cule thlarau kawhthiampawl le polpawl pan ih, anmah thawi mah le mah tawzuar cu, amah dokalhin ka hmai ka hawih ding ih, amah cu a mipawl lak ihsin ka sâtcat ding. 7 Curuangah nanmah le nanmah serhhran aw uhla, thianghlim uh, ziangahtile keimah cu Jehovah nan Pathian ka si. 8 Cule ka sakhaw dānpawl nan thlun pei ih, nan tuah pei, keimah cu a lo tithianghlimtu Jehovah ka si.

Innsungsang Dānpahbăltu hrang Dāntatnak

9 ‹Ziangahtile a pa simaw, a nu simaw camsetu pauhpauh cu thah tengteng ding a si. Anih in a pa simaw, a nu simaw a camsiat a si. Amai thisen cu a parah a um ding.

10 ‹Mi nupi thawi uiretu cu a innhnen nupi thawi uire a si ih, a uiretupa le a uiretunu cu thah tengteng ding an si. 11 A paih nupi a ihpitupa cun a paih taklawngnak a hlîp a si; an pahnih in thah tengteng ding an si. An thisen cu anmai parah a um ding. 12 Mi pakhat cu a fapaih nupi a ihpi asile, an pahnih in thah tengteng ding an si. Thil linglet an tuah a si. An thisen mawh cu anmai parah a um ding.

Hursualnak parih Dāntatnak

13 ‹Mi pakhat cu nunau a ihpi vekin mipa a ihpi asile, an pahnih in fihnungza sual an tuah a si. Anmah cu thah tengteng ding an si. An thisen mawh cu anmai parah a um ding. 14 Mi pakhat in nunau pakhat le a nu a ṭhit asile, cumi cu sualralnak a si. Nan lakih sualralnak a um nawn lonak dingah, cu pa le anmah cu meisa ih ur ding an si. 15 Mi pakhat cu ṭilva a pāwl asile, cu pa cu thah tengteng ding a si ih, cuih ṭilva khal nan that pei. 16 Nunau pakhat cu ṭilva panin a pawl asile, cu nu le cuih ṭilva cu na that pei. Anmah cu thah tengteng ding an si. An thisen mawh cu anmai parah a um.

17 ‹Mi pakhat in a paih fanu maw, a nuih fanu a si mi a farnu simaw neiin, cu nuih taklawngnak a hmu ih, cu nu in cu paih taklawngnak a hmuh asile, cucu thil zahthlak a si. Cule anmah cu an mi senpi mithmuh ihsin sahcat an si pei. A farnuih taklawngnak a hlîp a si. Amai mawhsualnak cu amah in a phur ding. 18 Mi pakhat cu nunau pakhat kha a nunau dān a neih laiah a ihpi ih a taklawngnak a hlîp asile, a thiput mi kha a langter ih, cu nu khal in a thiputnak a hlîp a si. An pahnih in an mipawl lak ihsin sahcat an si ding.

19 ‹Na nuih unaunu simaw, na paih farnu simaw ih taklawngnak na hlîp ding a si lo, ziangahtile amai sungkhat nâi hlîp a si ding. An mawhsualnak anmah in an phur ding. 20 Mi pakhat in a paseu nupi a ihpi asile, a paih unauih taklawngnak a hlîp a si. An sualnak anmah in an phur ding; fa loin an thi ding. 21 Mi pakhat in a unauih nupi a neih asile, cucu thil thianglo a si. A unaupaih taklawngnak a hlîp a si. Fa loin an um ding.

22 ‹Curuangah ka sakhaw dānpawl hmuahhmuah le ka cīn le dānpawl hmuahhmuah nan thlun pei ih, nan tuah pei, cutin nan cēnnak dingih ka lo hruainak ram in a lo kháksuak lo ding. 23 Cule nan hmaiih ka dawisuak ding mi miphunih sakhaw dānpawl nan thlun lo pei; ziangahtile annih in hi thil hmuahhmuah hi an rak tuah ih, curuangah ka fih hai a si. 24 Asinan kei in nan hnenah, «An ram cu ro ah nan co ding ih, hnawiti le khuaitizu luannak ram, cuih ram cu nan neih dingah ka lo pe ding,»tiah ka lo sim zo kha! Keimah cu miphun dang lak ihsin a lo thliardangtu Jehovah nan Pathian ka si.

25 ‹Curuangah rannung thiang le thianglo, vâte thiang le thianglo nan thleidang pei ih, nan hnen ihsin thianglo ih ka thliardan mi ramsa in simaw, vâte in simaw, leilung parih băwkvâk thilnung phun khat khat in simaw, nanmah le nanmah fihnungza ah nan tuah aw lo pei. 26 Cule nannih cu ka hrangah nan thianghlim ding a si, ziangahtile kei Jehovah cu ka thianghlim ih, keimai ta si dingah, miphun dangpawl lak ihsin ka lo thliardang zo.

27 ‹Mipa simaw, nunau simaw, thlarau kawhthiampawl le polpawl cu thah tengteng ding an si; annih in cupawl cu lungto in an deng pei. An thisen mawh cu anmai parah a um ding,› tiin na sim pei,» tiah a ti.

21

Puithiampawl hrang Dān

1 Jehovah in Mosi hnenah, «Aaron fapa puithiampawl sim awla, an hnenah, ‹Zohman in a mipawl lakih mithi ruangah a bawrhbangawter lo pei, 2 amah naihbiktu a sungkhat a si mi: a nu, a pa, a fapa, a fanu le a unaupa le 3 amah naihtu a farnu fala him, pasal nei dah lo pawl ruang lawngah a bawrhbangawter thei. 4 Asinan a mipawl lakih hotu a si ruangah amah le amah bawrhbangawter dingin mithiang lo ah a tuah aw lo pei. 5 Puithiampawl cun an lu par khuitawk hman an metkawlh lo pei, an khabe hmul zim khal an ziat lo pei ih, an taksa an riatpém lo pei. 6 Annih cu an Pathian hrangah an thianghlim pei ih, an Pathian hmin an bawrhbangter lo pei, ziangahtile meisa ih ur mi Jehovah-ih thilhlănpawl le an Pathian-ih rawl an hlan; curuangah annih cu an thianghlim ding a si. 7 Hlawhhlâng siseh, a bawrhbang mi nunau siseh, nupi ah an ṭhi lo pei, a pasal ih mâk zo mi nunau khal an ṭhi fawn lo pei; ziangahtile puithiam cu a Pathian hrangah a thianghlim a si. 8 Curuangah amah cu na serhhran pei, ziangahtile anih cun na Pathian-ih rawl a hlan a si. Anih cu nan hrangah a thianghlim pei, ziangahtile kei Jehovah, a lo tithianghlimtu cu ka thianghlim a si. 9 Puithiam pakhat khat ih fanu cu hlawhhlâng cannak in a bawrhbangawter asile, a pa a bawrhbangter a si. Cu nu cu meisa ih ur ding a si.

10 ‹A lu ih hnih mi hriak tawih zo mi le sinfen hruh dingih serhhran zo mi, a unaupawl lakih puithiam lubik cun a lukhuh a hlîp lo pei ih, a hnipuan a thlek fawn lo pei; 11 anih cu mithi ruak kiangah a feh lo pei, a nuih ruang, a paih ruang khalah a bawrhbangawter fawn lo pei; 12 hmun thianghlim ihsin a suak lo pei, a Pathian-ih hmun thianghlim a bawrhbangter fawn lo pei; ziangahtile a Pathian-ih serhhrannak hnih mi hriak cu a parah a um a si, keimah cu Jehovah ka si. 13 Cule anih cun nupi ah fala him a nei pei. 14 Anih cun hibang nuhmei maw, mâk mi nunau maw, a bawrhbang mi nunau maw, hlawhhlâng simaw cu a ṭhi lo pei; a miphun lakih fala him kha a nupi ah a ṭhi sawn pei. 15 A miphun lakah a cithlah a bawrhbangter lo pei, ziangahtile keimah cu amah tithianghlimtu Jehovah ka si,› tiin sim aw,» tiah a ti.

16 Cule Jehovah in Mosi hnenah, 17 «Aaron hnenah, ‹Na cithlah thlahsâwng vivo ah, taksa him lo mi cun, zohman in a Pathian rawl hlan dingin a pan thei lo ding. 18 Ziangahtile taksa him lo mipa pauhpauh cun an pan lo pei, cupawl cu: mitcaw, kebái, mithmai beheu mi, kutke hleifuan nei, 19 ke kiak, kut kiak, 20 cun elkûn, mipingkirh, mit siat, vunthak nei, hmahnâi nei le tilmu kûai mipawl an si. 21 Puithiam Aaron cithlahpawl lakih taksa him lo mipa zohman in Jehovah hnenah meisa ih ur mi thilhlănpawl hlan dingin an ra naih lo pei. Anih cu taksa him lo a si; anih cun a Pathian-ih rawl hlan dingin a ra naih lo pei. 22 Anih cun a thianghlim zet mi le a thianghlim mi a Pathian-ih rawl cu a phun hnih in a ei thei; 23 puanzar lawngte a rak naih lo pei, asilole Biakṭheng a rak pan lo pei, ziangruangahtile anih cu a taksa a him lo, culoasile ka hmun thianghlimpawl a bawrhbangter pang ding; ziangahtile keimah cu anmah tithianghlimtu Jehovah ka si,› tiin sim aw,» tiah a ti. 24 Cule cumi cu Mosi in Aaron le a fapapawl le Israel-mi hmuahhmuah a sim hai.

22

Rawl Thianghlim Ei Theitu

1 Jehovah in Mosi hnenah, 2 «Israel-mipawlih thil thianghlimpawl lak ihsin an serhhranawk theinak dingah le ka hrangih an serhhran mi hmangin ka hmin thianghlim an bawrhbanterlonak dingah Aaron le a fapapawl sim hai aw, keimah cu Jehovah ka si. 3 An hnenah, ‹Nan tesinfa san tiangin nan cithlah hmuahhmuah lakih thianlonak a parih a um laifangih, Israel tefapawl in Jehovah hnenih an serhhran mi thil thianghlimpawl a naihtu pauhpauh cu ka hmaika ihsin sahcat an si pei. Keimah cu Jehovah ka si.

4 ‹Aaron cithlahpawl lakih miphar simaw, thilput nei mi simaw in amah a thianngah hlanlo, ziang vek thilhlăn thianghlim khal a ei lo pei. Cule zokhal mithi ruak ruangih a thianglo mi thil asilole a cihnâng a suak mi pa a daingahtu, 5 asilole zokhal amah thiangloter theitu băwkvâk thil a daingahtu, asilole mithiang lo ih a cangtu mi pakhat khat a daingahtu pauhpauh cu, a thianlonak cu ziang vek a si khalle, 6 cuvek thil a daingahtu cu zan lam tiang mithiang lo a si pei ih, tidai in a taksa a khawlh lo ahcun, thilhlăn thianghlimpawl a ei lo pei. 7 Cule ni a tlak tikah anih cu a thiang pei; cule cuih hnuin thilhlăn thianghlimpawl a ei thei pei, ziangruangahtile cumi cu amai rawl a si. 8 Ziangkhal amah te a thi mi le sahrang ih a deh mi cu amah bawrhbangter dingin a ei lo pei. Keimah cu Jehovah ka si.

9 ‹Curuangah ka thucah an thlun pei, culoasile cumi hrangah an sualnak phurin, ka thucah an bawrhbanter tikah, cumi ruangah an thi ding. Kei Jehovah in anmah cu ka tithianghlim hai a si.

10 ‹Mi dang zohman in thilhlăn thianghlim an ei lo pei; puithiam hnenih a cêngtu mikhual le hlawhfa cun thil thianghlim an ei lo pei. 11 Asinan puithiam in a ta dingah paisa in mi a lei asile, cu pa cun a ei thei; cule a inn ih a suaktu khal in a rawl cu a ei thei. 12 Puithiam fanu in ^aa leng mi a neih asile, cu nu cun thawhhlawm thianghlimpawl a ei thei lo ding. 13 Asinan puithiam fanu cu a nuhmei asilole mâk a tuar ih, fa nei loin a paih inn ah a no lai vekin a ra kir a si ahcun, a paih rawl a ei ve thei ding; asinan mi dang zohman in cumi cu an ei lo pei. 14 Cule mi pakhat in tum lo piin thilhlăn thianghlim a ei pang asile, thilhlăn thianghlim cu puithiam a rūlsal pei ih, cumi ah ṭhen nga ṭhen khat a bêt pei. 15 Jehovah hnenih an hlăn mi Israel tefapawlih thilhlăn thianghlimpawl cu an bawrhbangter lo pei, 16 asilole an thilhlăn thianghlimpawl einak in mi senpi cu mawhsualnak man phurhter sian ding an si lo; ziangahtile kei Jehovah in anmah cu ka tithianghlim hai a si,› tiin sim aw,» tiah a sim.

22:12^a a leng mi: Jew-mi si thotho siin, puithiam si lo mi a simnak a si.

Sawisel ding um lo Thilhlănpawl

17 Jehovah in Mosi hnenah, 18 «Aaron le a fapapawl le Israel tefapawl hmuahhmuah sim awla, an hnenah, ‹Israel sungza mi pakhat khat in asilole Israel ram sungih um ram dang mipawl lakih mi pakhat khat in Meiur Thilhlăn hrangih Jehovah hnenih an hlăn mi, amai thutiampawl lakih pakhat khat hrang asilole amai lungpuak thawhhlawmpawl lakih pakhat khat hrangah a raithawinak a hlantu cun, 19 nanmai lungpuak in ranpi rual lak ihta maw, tuu rual lak ihta maw, me rual lak ihta simaw, sawisel ding um lo a pa nan hlan pei. 20 Taksa him lo pauhpauh cu nan hlan lo pei, ziangahtile cumi cu nan aiawhih cohlan theih a si lo pei. 21 Cule zokhal a thutiam asilole a lungpuak thawhhlawm tlamtlingter dingah ranpi rualpawl lak ihta simaw, rante rualpawl lak ihta simaw, Jehovah hnenah Remnak Thilhlăn raithawinak a hlăntu cu cohlan an sinak dingah sawisel ding um lo a si tengteng pei; a parah him lo a um ding a si lo. 22 Rannung mitcaw, ruhkiak, taksa kim lo, hmahnâi pût nei, vunthak nei le hmahnâi nei pawl cu Jehovah hnenah nan hlan lo pei, Biakṭheng parah anmah hmangin Jehovah hnenah meisa ih thilhlăn nan tuah fawn lo pei. 23 Taksa hleifuan a sau simaw, a tawi simaw a neitu câwpa siseh, tuu siseh, lungpuak thawhhlawm hrangah na hlan thei, asinan thutiam hrangah cun cumi cu cohlan a si lo pei. 24 Ṭilva hmabaih mi siseh, taksa dup mi siseh, a pem mi siseh, sahpem mi siseh, Jehovah hnenah nan hlan lo pei; cupawl cu nan ram ah ziang vek thilhlăn khalah nan tuah fawn lo pei. 25 Ram dang mi kut in hipawl lakih pakhat hman nan Pathian rawl dingah nan hlan fawn lo pei, ziangruangahtile cupawl ah ṭhatlonak le himlonak an um. Nan aiah cohlan an si lo pei,› tiah sim aw,» tiin a sim.

26 Cule Jehovah in Mosi hnenah, 27 «Câw maw, tuu maw, me simaw a suah tikah a pî hnenah ni sarih sung a um pei; cule a ni riatnak ihsin le cuih hnuin cumi cu Jehovah hnenih meisa ih ur mi thilhlăn si dingah cohlan a si pei. 28 Câwpi siseh, tuupi siseh, ni khat ni ah a fāte thawn an pahnih in thattlang hlah uh. 29 Cule Jehovah hnenah lungawi thu sim thawinak nan hlăn tikah, nanmai lungpuak rori in hlan uh. 30 Nan hlăn mi cu a ni lala ah nan ei pei; a thaizing tiang zianghman nan hlah lo pei. Keimah cu Jehovah ka si.

31 «Curuangah ka thupekpawl nan thlun pei ih, nan tuah pei. Keimah cu Jehovah ka si. 32 Ka hmin thianghlim nan bawrhbangter lo pei, cuhnakin Israel tefapawl lakah mithianghlim ka si sawn pei. Keimah cu ^aJehovah Mekkadesh, 33 nan Pathian si dingih Izip ram ihsi a lo hruaisuaktu ka si. Keimah cu Jehovah ka si,» tiin a sim.

22:32^a Jehovah Mekkadesh: «A lo tithianghlimtu Jehovah» tinak a si.

23

Puaipawl

1 Jehovah in Mosi hnenah, 2 «Israel tefapawl sim awla, an hnenah, ‹Jehovah-ih puaipawl, tawnkhawmawknak thianghlimpawl tiih nan phuan ding mi, ka puaipawl cu hipawl hi an si. 3 Ni ruk sung hna nan ṭuan pei, asinan a ni sarihnak cu cawlhnak Sabbath hleice, tawnkhawmawknak thianghlim a si. Cuih ni ah zianghman nan ṭuan lo pei; cumi cu nan cēnnak hmunpawl hmuahhmuah ah Jehovah-ih Sabbath a si.

Lanta Puai le Thilnu telh lo Sang Puai

4 ‹Hipawl cu anmai cān khiah ciar ih nan phuan ding mi, tawnkhawmawknak thianghlimpawl, Jehovah-ih puaipawl an si. 5 A thla khatnak ni hleilitnak khawthim zawng cu Jehovah-ih Lanta Puai a si. 6 Cule cuih thla a ni hleingatnak cu Jehovah hrangih Thilnu telh lo Sang Puai a si; ni sarih sung thilnu telh lo sang nan ei tengteng pei. 7 A ni khatnak ah tawnkhawmawknak thianghlim nan nei pei, hna kêl nan ṭuan lo pei. 8 Asinan Jehovah hnenah meisa ih ur mi thilhlăn ni sarih sung nan hlan pei. A ni sarihnak cu tawnkhawmawknak thianghlim a si pei, hna kêl nan ṭuan lo pei,› tiah sim hai aw,» tiin a sim.

Rah Hmaisabik Puai

9 Jehovah in Mosi hnenah, 10 «Israel tefapawl sim awla, an hnenah, ‹Ka lo pek mi ram ih nan luh tikah, cuih ram ih thlairawl rah nan at ding, cun nan thlairawl khâwm mi lakih rah hmaisabik têl khat cu puithiam hnenah nan rak keng pei. 11 Nan aiih cohlan a sinak dingah, anih in Jehovah hmaiah thlaithar tēl cu a sēp pei; cumi cu puithiam in Sabbath thaisun ah a sēp pei. 12 Cule cuih sun ih thlaithar têl nan sēp tikah, Meiur Thilhlăn dingah, kum khat ti sawisel ding um lo tuufa no a pa kha Jehovah hnenah nan hlan pei. 13 Cuih Thlairawl Thilhlăn cu hriak rawi cia sangvut phŭt efa khat ih ṭhen hra ṭhen hnih a si pei. Cumi cu rimthaw si dingah Jehovah hnenih meisa ih ur mi thilhlăn a si; cule cumiih Inding Thilhlăn cu, sabitzu kalān khat ih ṭhen li ṭhen khat a si pei. 14 Nan Pathian hnenih thilhlăn nan rak ken ni tiangin sang siseh, kăn mi thlairawl siseh, thlairawl hring siseh, nan ei lo pei. Cumi cu nan cēnnak hmuahhmuah ah nan tesinfa san tiangin sakhaw dān a si kumkhua pei.

Zarhkar Sarih hnu Puai

15 ‹Sēp thilhlăn thlaithar têl nan rak ken ni, Sabbath ni a thaisun ihsin nanmai hrangah nan siar pei, Sabbath vei sarih a kim ding a si. 16 A vei sarihnak Sabbath ni ih a thaisun tiang ni 50 siar uh; cun cuih sun ah Jehovah hnenah Thlairawl Thilhlăn thar nan hlan pei. 17 Nan cēnnak hmun ihsin efa khat ih ṭhen hra ṭhen hnih a ti mi sēp thilhlăn hrangah sang hlawm hnih nan rak keng pei. Cupawl cu sangvut phŭt an si pei, cupawl cu thilnu thawn kăn an si pei. Jehovah hrangih rah hmaisabik an si. 18 Cule sang thawn kum khat a ti mi, sawisel ding um lo tuufa no pasarih le câwpa tûai pakhat le tuucang pahnih nan hlan cih pei. Jehovah hrangih rimthaw si dingah, meisa ih ur mi thilhlăn a si mi an Thlairawl Thilhlăn le an Inding Thilhlănpawl thawn, cupawl cu Jehovah hnenih Meiur Thilhlăn a si. 19 Cun Sual Thilhlăn hrangah mepawl lak ihsin mepa tûai pakhat le Remnak Thilhlăn raithawinak hrangah kum khat ti tuufa no a pa pahnih in rai nan thawi pei. 20 Cupawl cu puithiam in Jehovah hmaiih sēp thilhlăn hrangah rah hmaisabik sang le tuufa no pahnih thawn a sēp pei. Cupawl cu puithiam hrangah Jehovah hnenah an thianghlim ding. 21 Cule cuih ni lala ah himi cu nan hrangah tawnkhawmawknak thianghlim a si tiah nan phuang pei. Cuih ni ah cun hna kêl zianghman nan ṭuan lo pei. Cumi cu nan cēnnak hmun hmuahhmuah ah nan tesinfa san tiangin sakhaw dān a si kumkhua pei.

22 ‹Nan ram ih thlairawl rah nan ah tikah, na ló kĕlkawm tiangin na at thluh lo pei ih, na thlairawl rah hrelh mi pakhat hman na sar fawn lo pei. Cupawl cu mifarah le mikhual hrangah na hlah pei, keimah cu Jehovah nan Pathian ka si,› tiah sim hai aw,» tiin a sim.

Tawtawrawt Phawt Puai

23 Jehovah in Mosi hnenah, 24 «Israel tefapawl hnenah, ‹Thla sarihnak, cuih thla a ni khatnak ah hngilhlonak tawtawrawtpawl phawtnak, tawnkhawmawknak thianghlim pakhat, Sabbath cawlh nan nei pei. 25 Cuih ni ah cun hna kêl zianghman nan ṭuan lo pei ih, Jehovah hnenih meisa ih ur mi thilhlăn nan hlan pei,› tiin sim aw,» tiah a ti.

Sualkhuhthawinak Ni

26 Jehovah in Mosi hnenah, 27 «Himi thla sarihnak a ni hratnak khal Sualkhuhthawinak Ni a si pei. Cuih ni cu nan hrangah tawnkhawmawknak thianghlim a si pei. Nan phahniam aw pei ih, Jehovah hnenih meisa ih ur mi thilhlăn nan hlan pei. 28 Cule cuih ni ah hna nan ṭuan lo pei, ziangahtile cumi cu nan hrangah Jehovah nan Pathian hmaiih Sualkhuhthawinak Ni a si. 29 Ziangahtile zokhal cuih ni thotho ih phahniamaw lo tu cu, a mipawl lak ihsin sahcat a si pei. 30 Cule zokhal cuih ni thotho ih hna pakhat khat a ṭuantu cu, cu pa cu a mipawl lak ihsin ka hlorálter ding. 31 Ziang vek hna phun hman nan ṭuan lo pei; cumi cu nan cēnnak hmunpawl hmuahhmuah ah nan tesinfa san tiangin kumkhaw sakhaw dān a si pei. 32 Cumi cu nan hrangah cawlhnak Sabbath hleice a si ih, nan phahniam aw pei; cuih thla a ni kuatnak zan lam ihsi thăwkin a thaisun zan lam tiang nan Sabbath nan hmang pei,» tiin a sim.

Bûkte Puai

33 Cun Jehovah in Mosi hnenah, 34 «Israel tefapawl hnenah, ‹Himi thla sarihnak ih ni hleingatnak cu Jehovah hrangih ni sarih Bûkte Puai a si pei. 35 A ni khatnak ah tawnkhawmawknak thianghlim a um pei. Cuih ni ah hna kêl nan ṭuan lo pei. 36 Ni sarih sung Jehovah hnenih meisa ih ur mi thilhlăn nan hlan pei. A ni riatnak ah tawnkhawmawknak thianghlim nan nei pei ih, Jehovah hnenih meisa ih ur mi thilhlăn nan hlan pei. Cumi cu tawnkhawmawknak hleice a si ih, cuih ni ah hna kêl zianghman nan ṭuan lo pei.

37 ‹Hipawl cu Jehovah hnenih meisa ih ur mi thilhlăn a si mi Meiur Thilhlăn le Thlairawl Thilhlăn, raithawinak le Inding Thilhlănpawl, ziangkim anmai ni ciar ah hlan dingin tawnkhawmawknak thianghlim si dingih nan phuan ding mi; 38 Jehovah-ih Sabbath-pawl hleiah, nan thilpekpawl hleiah, nan thutiampawl hmuahhmuah hleiah le Jehovah hnenih nan pek mi nan lungpuak thawhhlawmpawl thawn Jehovah-ih puaipawl tla an si.

39 ‹Cuih ram ih a rahsuah mi nan khawm ṭheh tikah, a thla sarihnak ni hleingatnak khalah, ni sarih sung Jehovah-ih puai nan tuah pei; a ni khatnak ah Sabbath cawlh a um pei ih, a ni riatnak ah Sabbath cawlh a um pei. 40 Cule a ni khatnak ah a mawi zetzet mi thingkung rah, ṭhulhfau hnge, hnah bŭk taktak hnge le tivate kapih partiam pawl cu nan hrangah nan la pei ih, Jehovah nan Pathian hmaiah ni sarih sung lungawiaipuangin nan um pei. 41 Cumi cu Jehovah hrangih puai si dingah kum tin ni sarih sung nan hmang pei. Cumi cu nan tesinfa san tiangin kumkhaw sakhaw dān a si pei. Cumi cu a thla sarihnak ah nan hmang pei. 42 Ni sarih sung bûkte sungah nan cêng pei. Suahkeh ihsin Israel a si mi hmuahhmuah cu bûkte sungah an cêng pei, 43 cutin nan tesinfanaupawl in Izip ram ihsin anmah ka hruaisuah hai laiah, Israel tefapawl cu bûkte sungah ka cêngter hai ti an thei ding. Keimah cu Jehovah nan Pathian ka si,› tiin sim aw,» tiah a ti. 44 Cule Mosi in Jehovah-ih puaipawl cu Israel tefapawl hnenah a thăn.

24

Meito hrang Hriak

1 Jehovah in Mosi hnenah, 2 «Catlak loih meitopawl ^avang dingin, meitleu hrangah sawr mi olif hriak fimte na hnenih rak keng dingin Israel tefapawl thu pe hai aw. 3 Tawnawknak Puanthlam sungih Theihpinak puanzar leng lamah, cuih hna cu Aaron in zan lam ihsin zing lam tiang Jehovah hmaiah a kilkhawi ringring pei; cumi cu nan tesinfa san tiangin kumkhaw sakhaw dān a si pei. 4 Jehovah hmaiah sui hlirhlăng ih tuah mi Meitoṭhuam parih meitopawl cu anih in a kilkhawi ringring pei.

24:2^a van: A ṭawng hrampi ah cun, «kaisohter» ti a si.

Sanghlăn

5 «Cule sangvut phŭt na la pei ih, cumi in sangper hleihnih na kăng pei. Sangper pakhat ah efa khat ih ṭhen hra ṭhen hnih ciar a si pei. 6 Sui hlirhlăng ih tuah mi Cabuai parah tlar khat ah paruk veve in tlar hnih in Jehovah hmaiah cupawl cu na ret pei. 7 Cule sang par, a tlar veve parah frankinsense hlirhlăng na ret pei, cutin cumi cu hngilhlonak, Jehovah hnenih meisa ih ur mi thilhlăn a si ding. 8 Jehovah hmaiah Sabbath ni tinten cat loin remten anih in sanghlăn cu a ret ṭheu pei, Israel tefapawl in cutiih tuah ding ṭuanvo kumkhaw thukham an nei a si. 9 Cule cumi cu Aaron le a fapapawl ihta a si pei ih, hmun thianghlim ah an ei pei; ziangahtile cumi cu kumkhaw sakhaw dān zulhin Jehovah hrangih meisa ih ur mi thilhlănpawl lak ihta a si ih, a hrangah a thianghlim zet mi a si,» tiin a sim.

Thangsiattu hrang Dāntatnak

10 Israel-mipawl lakih a hung fehtel ve mi, a pa Izip-mi a si mi, Israel nunau pakhat ih fapa a rak um; cule riahhmun khuarnak sungah hi Israel nunau fapa le Israel-mi pakhat an sualaw. 11 Cule Israel nunauih fapa cun Jehovah hmin a thangsiat ih a camsiat; cule cutin cu pa cu Mosi hnenah an hei hruai. A nuih hmin cu Shelomith a si ih, Dân hnám Dibri fanu a si. 12 Cun Jehovah-ih thusuak thutitluknak hmuhter an sinak dingah cu pa cu khumnak hmun ah an ret.

13 Cule Jehovah in Mosi hnenah, 14 «I camsetupa cu riahhmun khuarnak ihsin hruaisuak uhla, cu paih ṭawng a theitu hmuahhmuah in a lu parah an kut suang hai seh, cule amah cu mipi-umkhawm hmuahhmuah in lungto in deng hai seh. 15 Cun Israel tefapawl hnenah, ‹Zokhal a Pathian a camsetu cun anmai sual a phur pei. 16 Cule zokhal Jehovah hmin a thangsiattu cu thah tengteng ding a si. Rammi vek cekci in ram dang mi khal mipi-umkhawm hmuahhmuah in an deng tengteng pei. Jehovah hmin a thangsiat tikah, amah cu thah a si pei.

17 ‹Mi pakhat khat thattu pauhpauh cu thah tengteng an si pei. 18 Ṭilva thattu pauhpauh cun ṭilva aiah ṭilva lala in an rūl pei. 19 Mi pakhat in a innhnen selan ta ko a tuahmawh asile, amai tuahdān vek cekci in amai parah tuah a si ve pei. 20 Ruhkiak aiah ruhkiak, mit aiah mit, ha aiah ha, selan ta ko mi a tuahmawh vekin a parah tuah a si ve pei. 21 Cule zokhal ṭilva a thattu cun cumi cu a rūlsal pei; asinan zokhal mi a thattu cu thah a si ve pei. 22 Ram dang mi le nanmai rammi hrangah cīn le dān bangrep nan nei ding a si. Ziangahtile keimah cu Jehovah nan Pathian ka si,› tiin na sim pei,» tiah a sim.

23 Mosi in Israel tefapawl a be hai; cule Pathian a camsetupa cu riahhmun khuarnak lengah an hruaisuak ih, lungto in an dêng. Cutin Jehovah in Mosi thu a pek vekin Israel-mipawl cun an tuah.

25

Sabbath Kum

1 Sinai Tlang parah Jehovah in Mosi hnenah, 2 «Israel tefapawl be hai awla, an hnenah, ‹Ka lo pek mi ram ih nan luh tikah, Jehovah hrangah cuih ram cun Sabbath a ul pei. 3 Na ló ah kum ruk sung thlai na cing pei ih, kum ruk sung na sabit hmuan na simsial pei, cule a rah na khawm pei; 4 asinan a kum sarihnak ah cun cuih ram hrangah cawlhnak Sabbath hleice a um pei, Jehovah hrangih Sabbath a si. Na ló thlai na cîng lo pei ih, na sabit hmuan khal na simsial lo pei. 5 Amah teih a ṭo mi na thlairawl rah ziangkhal na at lo pei, na hleŭhfai lo mi na sabit khal na khâwm fawn lo pei, ziangahtile cuih kum cu cuih ram hrangih cawlh kum a si. 6 Cule Sabbath in a ram ihsin rah a lo suahsak ding mi kha nan hrangah rawl a si ding: nangmah, na siahhlawh mipa le nunau, na hlawhfa le na hnenih a cêng mi mikhualpawl hrangah le 7 na sumhnám le na ram sungih a um mi ramsapawl hrangah. Sabbath kum in a rahsuah mi hmuahhmuah cu rawl hrangah a si pei.

Jubili Kum

8 ‹Cule na hrangah Sabbath kum, kum sarih na siar pei, cumi cu kum sarih hmun sarih a si; cule Sabbath kum, kum sarihnak tikcucān cu na hrangah kum 49 a si pei. 9 Cun thla sarihnak ni hratnak ah Jubili tuupa ki na phawter pei ih, Sualkhuhthawinak Ni dingah nan ram pumpi ah tuupa ki na phawter pei. 10 Cule a kum 50-nak cu nan serhhran pei ih, ram pumpi ih ram luahtu hmuahhmuah hnenah zalĕnnak nan phuang pei. Cumi cu nan hrangah Jubili a si; cule anmah cu an co mi ram lala ah nan kirtersal cio pei ih, mai hrin ciar ah nan kirsal fingfing pei. 11 Cuih kum 50-nak cu nan hrangah Jubili a si; cuih kum sung cu zianghman nan cîng lo pei ih, amah te a kho mi khal zianghman nan at lo pei, nan hleŭhfai lo mi nan sabit khal nan khawm fawn lo pei. 12 Ziangahtile cumi cu Jubili a si; cumi cu nan hrangah a thianghlim pei; ló ihsin cuih kum in rah a suah mi nan ei pei.

13 ‹Himi Jubili kum ah hin mi kip anmai co mi ram ah nan kirtersal pei. 14 Cule na innhnen hnenah thil ziang simaw na zuar asilole na innhnen kut ihsin thil pakhat khat na lei asile, pakhat le pakhat nan palbĕt aw lo pei. 15 Jubili hnuih a tāng zât kum izirin na innhnen thil na lei pei ih, thlai cīn kum ding zât izirin a lo zawrh pei. 16 Kum a tamdān izirin a man na ṭhan pei ih, kum a maldān izirin a man na ṭhum pei; ziangahtile thlai cīn kum a tam le a mal ding izirin a lo zawrh a si. 17 Curuangah pakhat le pakhat nan palbĕt aw lo pei, cuhnakin na Pathian na ṭihzah sawn ding a si. Ziangahtile keimah cu Jehovah nan Pathian ka si.

18 ‹Cutin ka sakhaw dānpawl nan thlun pei ih, ka cīn le dānpawl nan pawm pei, cule cupawl cu nan tuah pei; cule cuih ram ah himdamten nan cêng ding. 19 Cun ram in rah a suah ding ih, khăwpkhamten nan ei ding, cule cu tawkah himdamten nan cêng ding. 20 Cule nannih in, «Thlai cîng lo le kan thlairah khawm loin, zoh hnik, a kum sarihnak ah ziangso kan ei ding?» tiah nan ti asile, 21 a kum ruknak ah nan parah ka thlawsuah thu ka pe ding ih, cumi cun kum thum daihin rah a lo suahsak ding. 22 Cule a kum riatnak ah thlai nan cîng pei ih, a kum kuatnak tiangin rawl hlun nan ei pei; rah a suah hlanlo thlairawl rah hlun nan ei ding a si.

23 ‹Ram nan zuar lan ta lo pei, ziangahtile ram cu keimai ta a si; ziangahtile nannih cu ka hnenih um ram dang mi le mikhual men nan si. 24 Cule nan co mi ram pumpi ah, ram tlen theinak nan pe pei.

25 ‹Na unau lakih mi pakhat cu a rung farah ih, a co mi hrekkhat a rak zuar zo asile, tlen dingah a tlensaktu ding a sungkhatpa a ra a si ahcun, a unaupaih zuar zo mi cu a tlen thei. 26 Asilole mi pakhat cu a thil tlensaktu ding zohman a nei lo, asinan amah rori kha a hmuingil ih tlennak ding daihtawk a hmuh a si ahcun, 27 a zuar mi ihsin a siar pei ih, a tāng lai mi kumpawl hrangah a zawrhnakpa cu a samsâl thluh pei, cutin a co mi ram ah a kirsalter ding. 28 Asinan samsālnak ding daihtawk a hmuh lo a si ahcun, a zawrh mi leiram cu Jubili tiang a leitupaih kut ah a um hrih pei; cule Jubili ah cumi cu phawih a si pei ih, a co mi ram ah a kirsalter pei.

29 ‹Mi pakhat in kulh nei khawpi sungih a inn a zuar asile, a zuar ihsi kum khat pumhlum sungah a tlen thei; tlen theinak dingah kum khat pumhlum a nei. 30 Asinan kum khat pumhlum a kim tikah a tlen lo asile, cuih kulh nei khawpi inn cu a leitu in a tesinfa san tiangin a nei lan ta ding a si. Cumi cu Jubili khalah phawih a si nawn lo ding. 31 Sikhalsehla an kimvelih kulh nei lo mi khawte innpawl cu lóram vekah rel an si pei. Cupawl cu tlen theih an si ih, Jubili ah phawih an si pei.

32 ‹Cutisikhalsehla Levi-mipawlih khawpipawl le khawpipawl ih an neih mi innpawl cu Levi-mipawl in ziang tikcān pauh khalah an tlen thei. 33 Cule mi pakhat in Levi-mi hnen ihsin inn a lei asile, khawpi sungih a neih mi a zuar mi a inn cu Jubili ah phawih a si pei; ziangahtile Levi-mipawlih khawpi sungih innpawl cu Israel tefapawl lakah anmai ta a si. 34 Asinan an khawpipawlih ran tlannak lóram cu zuar theih a si lo, ziangahtile cumi cu a kumkhuain anmai ta a si.

35 ‹Na unau pakhat a rung farah ih, nan lakah a tlaksiat asile, amah cu ram dang mi le mikhual vekin na bawm pei, cutin anih cu na hnenah a um thei ding. 36 A hnen ihsin a faṭhang siseh, sum ṭhang siseh zianghman na la lo pei; cuhnakin na Pathian ṭihzah sawn aw, cutin na unaupa cu na hnenah a um thei ding. 37 A hnenah na paisa a faṭhangin na cawih lo pei, na rawl a pungin na cawih fawn lo pei. 38 Keimah cu Kanaan ram nanmah lo pe ding le nan Pathian si dingih Izip ram ihsi nanmah lo hruaisuaktu Jehovah nan Pathian ka si.

Sál Thuhla Dān

39 ‹Na kiangih cêng, na unau pakhat a rung farah ih, na hnenih a zuarawk asile, sál vekih hnaṭuan dingin amah cu na năwr lo pei. 40 Anih cu na hnenah hlawhfa le mikhual vekin a um pei, cule Jubili kum tiang a lo rian pei. 41 Cule amah le a tefapawl thawn a lo suahsan pei ih, amai hrin ah a kirsal pei. A pupápawlih neih mi ram ah a kirsal pei. 42 Ziangahtile annih cu Izip ram ihsin ka hruaisuah mi ka siahhlawh an si; sál vekih zuar ding an si lo. 43 Khohkhah tukin na uk hai lo pei, cuhnakin na Pathian ṭihzah sawn aw.

44 ‹Cule na neih ding mi na siahhlawh nunau le na siahhlawh mipa pawl lawngte cu nan kiangkapih a um mi miphun dangpawl lak ihta an si pei, anmahpawl hnen ihsin sálnu le sálpa pawl tla nan lei thei. 45 Cuihhleiah nan lakih cêng mikhualpawlih fātepawl le nan ram ih an hrin mi, nan hnenih um, an innsungsangpawl cu nan lei thei; cule nan thilri vekah an cang pei. 46 Cule annihpawl cu nan hnuih nan tefapawl hrangah ro ih an neih dingah nan la thei; annih cu nan sál an si lan ta ding. Asinan nan unau Israel-mipawl thuhla ah cun, pakhat le pakhat khohkhah tukin nan uk aw ding a si lo.

47 ‹Na kiangnaiih a um mi mikhual simaw, ram dang mi simaw a hung lian ih, a kiangih a cêng mi na unau pakhat a rung farah ih, na kiangnaiih a um mi ram dang mi asilole mikhual hnenah, asilole ram dang mi hrin pakhat khat hnenih a zuarawk asile, 48 zuar a si hnuah anih cu tlen theih a si. A unau lakih pakhat khat in an tlen thei; 49 asilole a paseu maw, a paseuih fapa in simaw amah cu a thlensal thei; asilole a hrin lakih a sungkhat nâi pakhat khat in a tlen thei; asilole amah te a ti thei a si ahcun, amah le amah a tlenaw thei. 50 Cuticun amah le a leitupa thawn a zuarawk kum ihsin Jubili tiang an tuak pei ih, amah phawihnak man cu a um zât kum thawn an mil aw pei; cumi cu hlawhfa-ih nihlawh man thawi bangawin a si pei. 51 Kum tampi a tāng lai hrih asile, amah an lei kumpawl milin a tlenawknak ding man paisa cu a khirhsal pei. 52 Cule Jubili hlanah kum málte lawng a tān asile, an siartlang pei ih, a kum tāng zât izirin a tlenawknak man cu amai hnenah a khirhsal pei. 53 Anih cu kum tin hlawhfa vekin a hnenah a um pei ih, na mithmuhah khohkhah tukin a uk lo pei.

54 ‹Cule anih cu hi kumpawl sungah tlen asilole, amah le a hnenih a tefapawl thawn Jubili kum ah phawih an si pei. 55 Ziangahtile Israel tefapawl cu ka siahhlawh an si; annih cu Izip ram ihsi ka hruaisuak mi ka siahhlawh an si. Keimah cu Jehovah nan Pathian ka si.

26

Malsawm Dăwnnak Lamzin

1 ‹An hmaiih băwkkhup dingah nan hrangah milempawl nan tuah lo pei; nan hrangah khercawp milim siseh, ṭhuamserh siseh, nan phun lo pei; nan ram sungah lem kher mi lung nan dĭn fawn lo pei. Ziangahtile keimah cu Jehovah nan Pathian ka si. 2 Ka Sabbath-pawl nan ul tengteng pei ih, ka hmun thianghlim nan zah pei, keimah cu Jehovah ka si.

3 ‹Ka sakhaw dānpawl nan nunpi ih, ka thupekpawl thlun in, nan tuahsuak asile, 4 a tikcu teah ruahpi ka lo pe ding, leiram in a rahsuah a suah ding ih, lóram ih thingkungpawl in an rah an suah ding. 5 Sabit khawm tikcu tiang rawl nan khawm ding ih, rawlci cīn tikcu tiang sabit nan khawm ding; puarkhawpin rawl nan ei ding ih, nan ram ah himdamten nan cêng ding. 6 Ram sungah daihnak ka umter ding ih, nan cawlhahdam ding, cule zohman in ṭihnak an lo thlĕn lo ding; ram sungih sahrangpawl ka rehter ding ih, nan ram pumpi ah ralnâm a lêng lo ding. 7 Nan ralpawl nan dûm ding ih, nan hmaiah nan ralnâm hmangin an thi ding. 8 Mi panga in mi 100 nan dûm ding ih, mi 100 in mi 10000 nan tlânter ding; nan hmaiah nan ralnâm hmangin nan ralpawl an thi ding. 9 Ziangahtile duhsak zetin ka lo zoh ding ih, ci tampi ka lo zaihter ding, ka lo karhzaiter ding ih, nanmah thawi ka thukham ka hngetter ding. 10 Thlairawl rah hlun nan ei ding ih, a thar ruangah a hlun cu nan thian ding. 11 Nan lakah ka Biakbûk ka ret ding ih, ka nunnak in a lo fih lo ding. 12 Nan lakah ka tlanglêng ding ih, nan Pathian ka si ding, cule nannih cu ka mi nan si ding. 13 Keimah cu Izip ram ihsin an sál si lo dingih a lo hruaisuaktu Jehovah nan Pathian ka si; nan hngawngkol tlângpawl ka lo bălsak ih, fel zetih feh ko ka lo tuah.

Thulung lo Dāntatnak

14 ‹Asinan ka thu nan lung lo ih, hi thupekpawl hmuahhmuah nan thlun lo, 15 cule ka sakhaw dānpawl nan hnáwng ih, ka cīn le dānpawl nan nunnak in a fih, cutin ka thupekpawl hmuahhmuah thlun loin, ka thukham nan pahbăl asile, 16 kei khal in himi hi nan hnenah ka tuah ve ding:

Dāntatnak Pakhatnak

‹Ṭihnak rapthlak, cuap nat, mit tisetu ding khawsiknat le thinhartertu ding tiang nan parah ka ruat ding. Cule nan thlaici tuh mi cu a lak menah a cang ding, ziangahtile nan ralpawl in cumi cu an ei ding.

17 ‹Nanmah dokalhin ka hmai ka lo hawih ding ih, nan ralpawlih nehin nan um ding. A lo huatupawl in an lo uk ding ih, zohman ih an lo dawi lo laiah nan tlân ding.

Dāntatnak Pahnihnak

18 ‹Cule cuticingkhalih ka thu in lun cuang lo asile, nan sualpawl ruangah alet sarih ih tam in nun ka lo sim ding. 19 Nan thiltitheinak ruangih nan hngalnak cu ka siatsuah ding ih, nan vanpawl cu thir vekah le nan leilung cu dar vekah ka canter ding. 20 Cun nan cahnak cu a lak menih hman a si ding; ziangahtile nan leiram in rahsuah a suah lo ding ih, ram thingkungpawl khal in rah an suah lo ding.

Dāntatnak Pathumnak

21 ‹Cun keimah kalhzawngin nan nung ih, ka thu nan lun duh lo asile, nan sualnakpawl zulhin alet sarih tam in nan parah hremnak ka thlengterbêt ding. 22 Nan lakah sahrang ka thlah ding, cupawl cun nan tefapawl an thiarhlo ding ih, nan sumhnámpawl an deh ding, cule ka lo málter deuhdeuh ding ih, nan zinpipawl an ṭhing thluh ding.

Dāntatnak Palitnak

23 ‹Cun hi thilpawl hmangin ka lo rĕm thei cuang lo ih, keimah dokalh zawngih nan nun sawn asile, 24 kei khal nanmah dokalh zawngin ka nung ding ih, nan sualpawl ruangah alet sarih tiangin dān ka lo tat ding. 25 Cule thukham hrangih phulei samnak thlentu ding ralnâm nan parah ka run thlen ding; nan khuapawl ih nan umkhawm tikah nan lakah a rapthlak zet mi nathrisia ka thlah ding ih, ral kut ah pek nan si ding. 26 Nan rawl ngahnak hrampi ka sahcat tikah, nunau pahra in thŭk pakhat ah nan sang an káng ding ih, nan sang cu tahcawp teten an lo zemsal ding, nan ei ding ih, nan khawp cuang lo ding.

Dāntatnak Pangatnak

27 ‹Cuticingkhalin ka thu in lung cuang lo ih, keimah dokalh zawngih nan nun sawn asile, 28 thinsoin nanmah dokalh zawngin ka nung ve ding; cule kei, keimah rori in nan sualpawl ruangah alet sarih in nun ka lo sim ding. 29 Nan fapapawlih sa nan ei ding ih, nan fanupawlih sa khal nan ei ding. 30 Nan hmun sângpawl ka siatbăl ding, nan rimhmui urnak biakṭhengpawl ka cimter ding ih, nan ruak cu nan milem ruangpawl parah ka hlăwn ding; cule ka nunnak in a lo fih ding. 31 Nan khuapawl ka rămter ding ih, nan hmun thianghlimpawl ka ṭhingter ding. Nan rimthaw ka hnim lo ding.

Dāntatnak Paruknak

32 ‹Ram cu ka ṭhingter ding ih, cutawk ih cêng nan ralpawl cu, cumi ah an khawruah a har ding. 33 Miphun dangpawl lakah ka lo ṭekdarhter ding ih, a lo dawitu ding ralnâm ka phawi ding. Nan ram a ṭhing ding ih, nan khuapawl khal an răm ding. 34 Cun ram a ṭhin sung le nan ralpawl ram ih nan um sung cu ram cu a Sabbath-pawl ah a nuamaw ding; cule ram cu a cawl ding ih, a Sabbath-pawl ah a nuamaw ding. 35 Nan ram ih nan cēn laiah nan ram cu nan Sabbath-pawl ah a rak cawlh lo ruangah ram cu a ṭhin sung hmuahhmuah a cawl ding a si.

36 ‹Nan lakah a tāng mipawl cu an ralpawl ram ah cauhnak an thinlung ah ka thlah ding; thinghnah cāng thâwm in a tlânter hai ding; ralnâm ih dawi mi bangin an tlân ding ih, zohman in an dawi lo laiah an tlu ding. 37 Zohman ih dawi loin ralnâm hmaiih tlân bangin thuahawin an tlu ding; nan ral hmaiih din theinak thazang nan nei lo ding. 38 Miphun dang lakah nan hlorál ding ih, nan ralpawlih ram in a lo ei thluh ding. 39 Cule nan lakih a tangsŭnpawl cu nan ralpawlih rampawl ah an mawhsualnak ah an cimit ding; an hnenih um mi, an pupápawlih mawhsualnak khalah an cimit ding.

Thukham Hngilhlonak

40 ‹Asinan an mawhsualnak le an pupápawlih mawhsualnak thawn, ka parah rinum loih an umnak an rinumlonak le keimah dokalh zawngih an nun zonakpawl khal an phuan asile, 41 anmah dokalh zawngih ka nun zonak le an ralpawl ram ih ka rak hruai zonak khal, an thinlung serh tanlonak tla an hnuaidawr ih an mawhsualnak an pawm asile, 42 Jakob thawi ka thukham ka máng ding ih, Isak thawi ka thukham le Abraham thawi ka thukham ka máng ding; cule ram khal ka máng ding. 43 Ram cu anmah tel loin lawng ko tān a si ding ih, anmah tel loih a ṭhin sung cu a Sabbath-pawl ah a nuamaw ding. Ka cīn le dānpawl an hnawn ruangah le ka sakhaw dānpawl an thinlung ih a fih ruangah an mawhsualnak an pawm ding. 44 Cuticingkhalin anmah siatsuah ṭheh dingin le anmah thawi ka thukham pahbăl thluh dingin, an ralpawl ram ih an um laiah ka dawihlo hai lo ding ih, ka fih hai fawn lo ding. Ziangahtile keimah cu Jehovah an Pathian ka si. 45 Sikhalsehla an Pathian ka si theinak dingih miphun dangpawl mithmuhah Izip ram ihsin ka hruaisuah mi an thlahtupawlih thukham cu anmah ruangah ka cîng ringring ding, keimah cu an Pathian ka si ding ih, keimah cu Jehovah ka si,› tiah sim aw,» tiin a sim. 46 Hipawl hi, Sinai Tlang ah Mosi kut in Jehovah in amah le Israel tefapawl karlakih a tuah mi sakhaw dānpawl, cīn le dānpawl le dānpawl an si.

27

Mipi Tlennak Man

1 Jehovah in Mosi hnenah, 2 «Israel tefapawl sim awla, an hnenah, ‹Nangmah ih a man na khiah mi milih mi pakhat in thutiamnak in mi hrekkhat Jehovah hnenih a serhhran tikah, 3 mipa kum 20 ihsin kum 60 tiang mipa hrangih a man na khiah asile, hmun thianghlim shekel tangka tăwnin a man na khiah zât cu ngun tangka shekel 50 a si pei. 4 Cumi cu nunau asile, a man na khiah mi cu shekel 30 a si pei; 5 cule kum nga ihsin kum 20 mi tiang mipa hrangih a man na khiah zât ding cu shekel 20 a si pei ih, nunau hrangah cun shekel hra a si pei; 6 cule thla khat ihsin kum nga mi tiang mipa hrangih a man na khiah zât ding cu ngun tangka shekel nga a si pei ih, nunau hrangih a man na khiah zât ding cu ngun tangka shekel thum a si pei; 7 mipa kum 60 ihsin a tlun lam hrangih a man na khiah zât ding cu shekel hleinga a si pei ih, nunau hrangah cun shekel hra a si pei. 8 Asinan a man na khiah zât pe dingah a farah tuk a si ahcun, puithiam hmaiah a va suak pei ih, puithiam in thutiam tuahtupaih tlin thei ding tawkten a hrangah a man a rak khiah pei, puithiam in a man a khiah ding a si.

Ṭilva Tlennak Man

9 ‹Mi in Jehovah hnenih thilhlăn an rak ken ding mi cu ṭilva a si ahcun, zokhal in Jehovah hnenih an pek mi hmuahhmuah cu an thianghlim pei. 10 Anih in a sia aiah a ṭha simaw, a ṭha aiah a sia simaw tiin ai a awhter lo pei, a thleng khal a thleng lo pei; ṭilva aiah ṭilva lala a thleng ceng asile, a thlengnak thawn an pahnih in thil thianghlim veve an si pei. 11 Cumi cu Jehovah hnenah thilhlăn ih hlăn kêl lo mi ṭilva thianglo a si ahcun, cu pa in a ṭilva cu puithiam hnenah a rak hmuh pei; 12 cule a ṭhat le a siat izirin puithiam in cumi cu a man a rak khiah pei; nang, puithiam in a man na khiah zâtzât cu a man a si pei. 13 Asinan cu pa in cumi cu tlen a duh ceng asile, a man na khiah zât tlunah ṭhen nga ṭhen khat a bêt pei.

Inn le Ló Tlennak Man

14 ‹Mi pakhat in Jehovah hnenih thianghlim dingih a inn a hlăn tikah, a ṭhat le a siat izirin puithiam in a man a khiah pei; puithiam in a man a khiah zâtzât cu a man a si pei. 15 Mai inn hlantu in tlen a duh asile, a man na khiah zâtih ṭhen nga ṭhen khat paisa a bêt pei ih, cumi cu a ta ah a cang ding.

16 ‹Mi pakhat in Jehovah hnenah a ló neih miih a ṭhen a zâr a hlăn asile, a man na khiah ding mi cu a thlaici cīn ding mi zulhin a si pei. Barli sangvut ci ^ahomer pakhat man cu ngun tangka shekel 50 a si pei. 17 Jubili kum ihsin a ló a hlăn asile, a man na khiah zâtzât cu a man a si lan ta pei. 18 Asinan Jubili hnuah a ló a hlăn a si ahcun, puithiam in Jubili tiangih kum tāng lai zât in a man ding paisa a tuaksak pei ih, cumi cu a man na khiah mi sung ihsin na dirsal pei. 19 Cule a hlăn mi ló cu tlen a duh asile, a man na khiah mi paisa ṭhen nga ṭhen khat a pebêt pei ih, cumi cu amah in a nei pei. 20 Asinan ló cu tlen a duh lo ah simaw, mi dang hnenah a zuar zo simaw asile, tlen theih a si nawn lo pei; 21 ló cu Jubili ah phawih a si tikah, serhhran mi ló a si vekin Jehovah hrangah thil thianghlim a si sawn pei ih, cumi cu puithiam covo ah a cang pei.

27:16^a homer: Homer khat cu pung 4 hrawng a si.

22 ‹Mi in amai ta a si lo mi a leicawp mi lóram kha, Jehovah hnenih a hlăn asile, 23 Jubili kum tiang hrang a man awmtawk na khiahsak mi cu, puithiam in cu pa hrangah a siarsak pei ih, cuih ni lala ah a man na khiahsak mi paisa cu Jehovah hnenih thilhlăn thianghlim si dingah a pe pei. 24 Jubili kum a thlen tikah cuih lóram cu a leinak pa, a ram neitu ngaingai hnenah a ta dingah khirhsal a si pei. 25 Cule thil man na khiah mi hmuahhmuah cu hmun thianghlim shekel zulhin an si thluh pei ih, shekel pakhat ah gerah 20 a si pei.

Fatir Tlennak Man

26 ‹Asinan Jehovah-ih fatir si ding mi, ṭilva fatir cu mi zohman in an serhhran lo pei. Cumi cu câw a si ah siseh, rante a si ah siseh Jehovah ta a si. 27 Cule cumi cu ṭilva thianglo a si ahcun, a man na khiah zât izirin a tlen pei ih, ṭhen nga ṭhen khat a bêt pei; asilole tlen a si lo ahcun, a man na khiah zâtzât in cumi cu zuar a si pei.

Hlăn Mi Thil Tlennak Man

28 ‹Cutisikhalsehla mi in a neih mi hmuahhmuah lak ihta Jehovah hnenih serhhran ding mi serh mi thil cu milai siseh, ṭilva siseh, a ta a si mi lóram siseh, zuar ding a si lo, tlen ding khal a si lo. Serhhran mi tinkim cu Jehovah hrangah a thianghlim zet mi a si.

29 ‹Thi dingih hlăn zo mi, milai pauhpauh cu tlen ding an si lo, thah tengteng ding an si.

Ṭhen hra ṭhen khat Tlennak Man

30 ‹Cule ram in a suah miih ṭhen hra ṭhen khat zaten, cuih ram thlaici le thingtheirah cu Jehovah ta a si. Cumi cu Jehovah hrangah thil thianghlim a si. 31 Mi pakhat in amai ṭhen hra ṭhen khat a tlen duh ceng asile, ṭhen nga ṭhen khat a bêt pei. 32 Ranpi rual le rante rual ṭhen hra ṭhen khat thuhla ah, kianghrăwl hnuaiih a tlanglêng mi pauhpauh ih ṭhen hra ṭhen khat cu Jehovah hrangah a thianghlim pei. 33 Anih in cumi cu a sia maw a ṭha ti a zingzăwi lo pei, a thleng khal a thleng fawn lo pei; a thleng ceng asile, a thlengnak thawn an pahnih in thil thianghlim an si pei; cumi cu tlen ding a si lo,› tiah sim aw,» tiin a sim.

34 Hipawl cu Sinai Tlang parah Israel tefapawl hrangih Jehovah in Mosi hnenih a pek mi thupek an si.