BibleThianghlim – EZRA
Old Testament
Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi
New Testament
Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation
EZRA
- A ngantu: Ezra
- A siartu: Sáltan hnuih Israel-mipawl
- Ngan kum: B.C. 430 hrawng
Hebru Bible ah cun Ezra cabu le Nehemiah cabu hi Ezra ih ngan mi cabu pakhat a si (Neh 8:2). Persia siangpahrang Artazerzes I in hi Jew-mi mi pahnih te hi cān dangdangah, Jerusalem ih kirsal dingin thu a rak pe hai. Puithiam le cangantu si kăwp Ezra cu temple an saksal hnu kum 60 zikte, B.C. 458 ah a kirsal. Artazerzes I ih thupek bangtukin, Ezra in Jerusalem ah Pathian biaknak a dĭnsal, Pathian Dān mi senpi a zirh ih, cuzah pek mi thuneihnak cu bikhiah neiin a hmang (7:1-26).
Babilon ihsi a hmaisabik an kirsalnak săn cu «Jehovah inn» saksalnak ding hrangah a si; cumi cu saksal tengteng ding a si. Ezra cabu sungah (a hleicein bung 1-6), «Pathian inn» asilole «Jehovah temple» relnak hmun 70 zikte a um. «Pathian kut» (7:6, 9, 28; 8:18, 22, 31) ti mi a bu pumpi ah a lang. Jew-pawl cu an kirsal ih temple an saksal theinak dingah, Pathian in Siangpahrang Sairas (1:1), Jew-mi mi tampi (1:5) le hruaitupawl (Hag 1:14) a căwktho hai.
Jew-mipawl thawi pehzawmawknak nei lo pawl cu Persia lalram ṭawng Aramik hmangih Ezr 4:8-6:18 le 7:12-26 ngan a si. Hih bung le cângpawl ah cuzah thawi dawrawknak le Jew-mi kiangkapih cêng an ralpawl in Siangpahrang Artazerzes I hnenih Jew-mi hēknak ah Aramik ṭawng an hmang. Hih Bible bung le cângpawl cun Jew-mipawl a hmuitin lo ruangah Aramik ṭawng ih ngan a si.
Cule cucu Jeremiah ih simsung mi bangtukih tuah a si (Jer 29:10-14). Thuanthu umdān ah cun, hi cabu hin Jew-pawl ziangtin an kirsal ti le ziangtin temple an saksal ti in sim.
Pathian thuhla zawng cun, Pathian Lalnak, Pathian rinumnak le milai mawhphurhnak a tarlang. Nunpinak lamah cun, Pathian miphun cun miphun dangpawl hnen ihsin an thiarfihlimaw ding ih (danglam takih nun) Jehovah an hawldān ding hi cabu hin a uar (6:21).
Hi cabu ṭhen khatnak (bung 1-6) cu amai hlan (B.C. 538 hrawng) kum 80 ih Babilon ihsin a hmaisabik kirsalnak thuhla Ezra in a ngannak le a netnakih temple an saksalnak thuhla a si (B.C. 516). (Profet Haggai le Zekariah cu a hmaisabik kirsalnak cān ih profet an si; 5:1 zoh aw). Hi cabu ṭhen hnihnak (bung 7-10) cu Jew bur dangpawl thawn a kirsal ih (B.C. 458), mi senpi a tundinsaldān Ezra ih a ngankhumnak a si.
Thuhlawm Ṭhen
- I. Jerusalem ah Jew-pawl kir an thawk ih, Temple an saksal (bung 1-6)
- II. Jerusalem ah Ezra in Jew-mipawl tam sinsin a hruai ih, Pathian hnenah mipi a hruaikir (bung 7-10)
Judah-mipawl Kirsalnak
1 Persia siangpahrang Sairas a lal a kum khatnak ah Jeremiah kâ hmangih Jehovah kamsuakthu a thlenkim theinak dingah, Persia siangpahrang Sairas thinlung cu Jehovah in a căwktho, cutin a lalram hmuahhmuah ah thawngthannak a tuah ih, ca sungah,
2 «Persia siangpahrang Sairas in, ‹Leilung tlun lalrampawl hmuahhmuah hi van Pathian in i pe ṭheh zo. Cule Judah ram Jerusalem ah inn amah saksak dingin i ruat. 3 Nan lakih a mi a si mi zokhal, a Pathian in umpi sehla, Judah ram ih Jerusalem ah hung so seh, cule Israel-ih Pathian Jehovah inn sak seh, amah cu Jerusalem ih um Pathian a si. 4 Cule a cēnnak khui hmun khalih a tāng tâ tu zokhal, amai hmun ih um mipawl in Jerusalem ih um Pathian inn hrangih palungsuak thawhhlawm hleiah, sui le ngun, thilripawl le rannungpawl in bawm seh,› a ti,» tiin a ngan.
5 Cun Judah le Benjamin sungza pupápawlih lubânpawl, puithiampawl le Levi-mipawl cu an thinlung Pathian in a thawhter mi hmuahhmuah thawn Jerusalem ih um Jehovah inn sak dingin le hung so dingin an tho. 6 Cule mai palungsuakih an thawh mi hmuahhmuah hleiah, an kimvelih um hmuahhmuah in ngun thilri, sui thilri, bungruapawl le rannungpawl le thil mankhungpawl thawn tha an rak pe.
7 Siangpahrang Sairas khal in Nebukhadnezzar in Jehovah inn ih bungruapawl Jerusalem ihsin la tahratin a pathianpawlih temple ih a ret mipawl cu a kengsuak. 8 Cule cupawl cu Persia siangpahrang Sairas in sumkiltu Mithredath kut ihsin a lasuak ih, a siar, cule Judah mipawimawh Sheshbazzar a pe. 9 A zât cu hihi a si: sui khēngdau 30, ngun khēngdau 1000, nâmte 29; 10 sui cawhtawlh 30, khavek phun thotho ngun cawhtawlh 410 le a dang bungbel 1000 an si. 11 Sui le ngun bungbel a zaten 5400 an si. Cupawl hmuahhmuah cu ralkaihpawl, Babilon ihsin Jerusalem ih hruai an si tikah, Sheshbazzar in a la.
Jerusalem ih Kirsal Dawisuah Mipawl
1 Ralkaihnak ihsi hung kirsal ramṭhen minung, hruaihloh mi, Babilon siangpahrang Nebukhadnezzar in Babilon ih ralkaih ih a hruaihloh mi, Jerusalem le Judah ih kirleh, mi kip mai khua cio ih tlung cu hipawl hi an si:
2 Jerubbabel zawngih ra kirpawl cu Jeshua, Nehemiah, Seraiah, Reelaiah, Mordekai, Bilshan, Mispar, Bigvai, Rehum le Baanah an si. Israel mipa mipum cu: 3 Parosh tefa 2172; 4 Shefatiah tefa 372; 5 Arah tefa 775; 6 Pahath-Moab tefapawl lakih Jeshua le Joab tefa 2812; 7 Elam tefa 1254; 8 Zattu tefa 945; 9 Zakkai tefa 760; 10 Bani tefa 642; 11 Bebai tefa 623; 12 Azgad tefa 1222; 13 Adonikam tefa 666; 14 Bigvai tefa 2056; 15 Adin tefa 454; 16 Hezekiah-mipawl lakih Ater tefa 98; 17 Bezai tefa 323; 18 Jorah tefa 112; 19 Hashum tefa 223; 20 Gibbar tefa 95; 21 Bethlehem tefa 123; 22 Netofah mipa 56; 23 Anathoth mipa 128; 24 Azmaveth tefa 42; 25 Kirjath Arim, Kefirah le Beeroth tefa 743; 26 Ramah le Geba tefa 621; 27 Mikmas mipa 122; 28 Bethel le Ai khaw mipa 223; 29 Nebo-ih tefa 52; 30 Magbish tefa 156; 31 A dang Elam-ih tefa 1254; 32 Harim-ih tefa 320; 33 Lod, Hadid le Ono tefa 725; 34 Jeriko-ih tefa 345; 35 Senaah-ih tefa 3630.
36 Puithiampawl: Jeshua sungza lakih Jedaiah tefa 973; 37 Immer tefa 1052; 38 Pashhur tefa 1247; 39 Harim tefa 1017 an si.
40 Levi-mipawl: Hodaviah tefa Jeshua le Kadmiel teih tefa 74 an si.
41 Hlasaktupawl: Asaf tefapawl cu 128 an si.
42 Kăwtkakiltupawlih tefapawl: Shallum tefapawl, Ater tefapawl, Talmon tefapawl, Akkub tefapawl, Hatita tefapawl le Shobai tefapawl cu an zaten 139 an si.
43 Nethin-mipawl: Ziha tefapawl, Hasufa tefapawl, Tabbaoth tefapawl; 44 Keros tefapawl, Siaha tefapawl, Padon tefapawl, 45 Lebanah tefapawl, Hagabah tefapawl, Akkub tefapawl, 46 Hagab tefapawl, Shalmai tefapawl, Hanan tefapawl, 47 Giddel tefapawl, Gahar tefapawl, Reaiah tefapawl, 48 Rezin tefapawl, Nekoda tefapawl, Gazzam tefapawl, 49 Uzza tefapawl, Paseah tefapawl, Besai tefapawl, 50 Asnah tefapawl, Meunim tefapawl, Nefusim tefapawl, 51 Bakbuk tefapawl, Hakufa tefapawl, Harhur tefapawl, 52 Bazluth tefapawl, Mehida tefapawl, Harsha tefapawl, 53 Barkos tefapawl, Sisera tefapawl, Tamah tefapawl, 54 Neziah tefapawl le Hatifa tefapawl.
55 Solomon siahhlawhpawlih tefapawl: Sotai tefapawl, Sofereth tefapawl, Peruda tefapawl, 56 Jaala tefapawl, Darkon tefapawl, Giddel tefapawl, 57 Shefatiah tefapawl, Hattil tefapawl, Zebaim-mi Pokereth tefapawl le Ami tefapawl. 58 Nethin-mi hmuahhmuah le Solomon siahhlawhpawlih tefapawl cu 392 an si.
59 Cule hipawl hi Tel Melah, Tel Harsha, Kerub, Addan le Immer ihsi hung suakpawl an si; asinan an pupápawlih sungza asilole an cithlah, Israel an si le si lo an hliakhlai thei lo mipawl cu: 60 Delaiah tefa, Tobiah tefa le Nekoda tefa 652 an si. 61 Cule puithiam tefapawl lakah: Habaiah tefapawl, Koz tefapawl, Gilead-mi Barzillai fanupawl lakih mi nupi ah ṭhi ih an hmin pu cih Barzillai tefapawl in, 62 cithlahsâwngawknak hmin khumnak cazual ah an hmin an hawl, asinan an hmu lo; curuangah annih cu an bawrhbang tiin puithiam sinak ah an telh lo. 63 Cule aTirshatha in an hnenah puithiam cu Urim le Thummim thawi thu an răwn thei hlanlo thil thianghlim zet cu an ei lo pei tiah a ti.
2:63a Tirshatha: Aramik ṭawng ih uktu kawhnak hmin a si.
64 Mipungkhawm pumpi cu 42360 an si, 65 an mipa siahhlawh le nunau siahhlawh 7337 tel loin; cule hla saktu mipa le nunau 200 an nei. 66 An rángpawl cu 736 an si ih, an lākrangpawl cu 245 an si, 67 an kalaukpawl cu 435 le an lākpawl cu 6720 an si.
68 Jerusalem ih Jehovah inn an thlen tikah, pupápawlih lubân hrekkhat in Pathian inn cu amai hmun ih tungding dingin lungpuak thawhhlawm an pe: 69 anmai tithei dān vekin, hnaṭuannak hrangah thawhhlawm retnak ah sui darakma 61000 le ngun amina 5000 le puithiam sinfen 100 an pe.
2:69a mina: Bible ih tahnak phunphun simfiangnak zoh aw.
70 Cun puithiampawl le Levi-mipawl, mipi lak ihsin mi hrekkhat, hla saktupawl, kăwtkakiltupawl le Nethin-mipawl cu anmai khuapawl ah an cêng ih, Israel hmuahhmuah khal anmai khuapawl ah an cêng.
Jerusalem ah Pathian Biaknak Tundĭnsal a Si
1 A thla sarihnak a ra thleng ih, Israel tefa khawpipawl ih an um tikah, mipi cu mi pakhat vekin Jerusalem ah an fĭnkhawmaw. 2 Cun Jozadak fapa Jeshua le a unau puithiampawl, Shealtial fapa Zerubbabel le a unaupawl cu an tho ih, Pathian mi Mosi Dān sungih ngan bangtukin, a parih Meiur Thilhlănpawl hlan dingah Israel Pathian-ih biakṭheng an dâwl. 3 Cuih rampawl luahtu minungpawl ruangah ṭihnak an parah a thleng na cingin, biakṭheng cu a hmun dingah an dâwl, cule cumi parah Jehovah hnenah Meiur Thilhlănpawl an hlan, zing lam le zan lamah Meiur Thilhlănpawl an hlan. 4 Ngan mi zulhin Bûkte Puai khal an tuah ih, ni tin Meiur Thilhlănpawl cu ni tin hrangah cīn le dān ih a ngĕn zât in an hlan. 5 Cuihhnu ah tuah ṭheu mi Meiur Thilhlăn, Thla Thar Thilhlănpawl le serhhran mi Jehovah hrangih ruat mi puaipawl hmuahhmuah le palungsuak thawhhlawm lungtho teih Jehovah hnenih an hlăn mi cu an pe. 6 Jehovah Temple lungphum cu phum a si hrih lo nain, thla sarihnak a ni khatnak ihsin Jehovah hnenah Meiur Thilhlănpawl hlăn an thăwk. 7 Lungserthiampawl le lettamapawl hnen khalah tangka an pe, cule Persia siangpahrang Sairas hnen ihsin siannak an ngah mi vekin, sidar thingpawl Lebanon ihsin tifinriat ah, Joppa ah run keng dingin Sidon-mipawl le Ṭaiar-mipawl cu rawl, in ding le hriak an pe.
Temple Dĭnsal an Thăwk
8 Jerusalem ah, Pathian inn ih an thlen kum hnihnak, a thla hnihnak ah Shealtial fapa Zerubabbel, Jozadak fapa Jeshua le a tāng mi an unau puithiampawl le Levi-mipawl le ralkaihnak ihsi Jerusalem ih ra tlungpawl hmuahhmuah cu hna an ṭuan thăwk ih, kum 20 ihsin a tlun lam Levi-mipawl cu Jehovah inn hnaṭuan hotu dingah an ruat. 9 Cun Jeshua cu a fapapawl le a unaupawl thawn, Kadmiel cu a fapapawl thawn, cule Judah fapapawl cu Pathian inn hnaṭuan hoha dingin mi pakhat vekin an tho: Henadad fapapawl cu an fapapawl le an unau Levi-mipawl thawn.
10 Inn saktupawl in Jehovah temple lungphum an phum tikah, Israel siangpahrang David-ih cīn le dān bangtukin Jehovah thangṭhat dingah puithiampawl cu an thuam thuamawin tawtawrawtpawl thawn le Levi-mi Asaf fapapawl cu sumselpawl thawn an ding. 11 Jehovah hnenah sawnawin hla an sak, an thangṭhat ih, lungawi thu an sim,
«Ziangahtile anih cu a ṭha,
Ziangahtile a zahngainak cu Israel lamah kumkhuain a hmun a si,»
tiah an ti.
Jehovah an thangṭhat tikah, Jehovah inn lungphum cu phum ṭheh a si ruangah mipi zaten nasazetin an au.
12 Asinan puithiam tampi le Levi-mipawl le pupápawlih sungza lubânpawl, Temple hmaisa rak hmutu putarpawl cu an mithmuhih Temple lungphum an phum tikah aw ring zetin an ṭap. Asinan mi tampi cu aipuan ruangah ringpin an au. 13 Cutin mipi in aipuan authâwm maw, mipi ṭap thâwm ti an thleidang thei lo, ziangahtile mipi cu ring tukin an au ih, thâwm cu hmun hlatpi ihsin theih a si.
Temple Saksal Dodalnak
1 Judah le Benjamin ih doralpawl in sáltang tefapawl in Israel-ih Pathian Jehovah Temple an sak rero ti an theih tikah, 2 Zerubbabel le pupápawlih lubânpawl hnenah an ra ih an hnenah, «Kan lo sak bawm ding, ziangahtile kannih khal nanmah bangin nan Pathian kan hawl ve a si; cule hitawk ih in hruaitu Assiria siangpahrang Esarhaddon san ihsin a hnenah rai kan thawi,» tiah an ti. 3 Asinan Zerubabbel le Jeshua le Israel pupápawlih lubân a tāng mipawl in an hnenah, «Kan Pathian hrang inn sak dingah kan zawngah zianghman nan tuah thei lo; Persia siangparhang Sairas ih thu in pek vekin, Israel-ih Pathian Jehovah hnenah kanmah lawngin kan sak ding a si,» tiah an ti.
4 Cun cuih rammipawl in Judah-mipawl thanauter ding an zuam. An inn saknak ah buainak an tuah ih, 5 Persia siangpahrang Sairas san hmuahhmuah ihsin Persia siangpahrang Darias in a uk tiang an tumtah tlawlhter dingin anmah dokalhin thurawnpetu an hlâng.
Jerusalem Dĭnsal Dodalnak
6 Ahasuras a lal lai, a lal thawkpekah, Judah le Jerusalem luahtupawl dokalhin hēknak ca an ngan.
7 Artazerzis san khalah Bishlam, Mithredath, Tabel le a dang an hawipipawl in Persia siangpahrang Artazerzis hnenah ca an ngan, cule an kuat mi ca cu Aram cafáng ih ngan a si ih, Aram ṭawng in an let. 8 Ralkap hotu Rehum le cangantu Shimshai in Jerusalem dokalhin hitivekin siangpahrang Artazerzis hnenah ca an ngan,
9 Ralkap hotu Rehum hnen, cangantu Shimshai hnenin le a dang an hawipi: Dinai-mipawl, Afarsath-mipawl, Tarpeli-mipawl, Persia-mipawl, Erek-mipawl, Babilon-mipawl, Shushan-mipawl, Dehav-mipawl, Elam-mipawl le, 10 a tāng mi miphun dangpawl cu miropi le mipawimawh aOsnapper in ralkaih ah a hruai hai ih Samaria khawpipawl ah umhmun a khuarter, cule a tāng mipawl cu Tivapi khat lam ral hmun dangdangah umhmun a khuarter.
4:10a Osnapper: Hi pa hi Esarhaddon fapa Ashurbanipal-ih hmin dang a ni.
11 Hihi an hnenih an kuat mi cakuat ngansâwng mi a si:
«Siangpahrang Artazerzis hnenah, Tivapi hi lam ralih um na siahhlawhpawl in: 12 Na hnen ihsi hung so Jew-mipawl cu kan hnenah Jerusalem ah an ra ih, khawpi helhmang le ṭha lo cu an dĭn rero ih, a kulh cu an ṭheh rero thlang, cule a lungphumpawl an rĕmṭha rero ti siangpahrang in rak thei seh. 13 Hi khawpi hi dĭn a si ih, a kulhpawl ṭhehfel a si ahcun, siah, ngunkhuai asilole thilri siah an pe lo ding, cule siangpahrang-ih sum retnak inn cu a kiam ding ti atu ah siangpahrang in rak thei seh. 14 Siangpahrang inn ihsin băwmnak kan ngah ruangah, siangpahrang zahlonak hmuh cu kan hrangah thil ṭha a si lo, curuangah mi kan thlah ih, siangpahrang kan theihter, 15 cutin na pupápawl cazual ih ngankhum mi na hawl thei ding. Cule cazual sungih ngankhum mi na hmu ding ih, hi khawpi cu helhmang khawpi, siangpahrang le a ramṭhenpawl hrangah siatnak a si, cule hlanlai ah hi khawpi sungah hin hél dingin an rak tăwkphirh, cumi ruangah hi khawpi cu a siat ti na thei ding. 16 Hih khawpi hi dĭnsal a si ih, a kulhpawl ṭhehfel a si ahcun, a rahsuah cu Tivapi hi lam ralah covo na nei lo ding tiah siangpahrang thu kan theihter a si,» tiin.
17 Siangpahrang in sannak a kuat,
«Ralkap hotu Rehum, cangantu Shimshai, Samaria ih cêng an hawipi dang le Tivapi hi lam ralih a tāng mipawl hnenah: Remdaihnak um hram seh, ti vekpawl.
18 «Ca in kuat mi cu ka hmaiah fiangteih siar a si. 19 Cule thu ka pe ih, hawlsuahnak cu tuah a si, cule hlanlai ah hi khua in siangpahrangpawl a do ṭheu, a sungah helnak le dodalnak a rak câwm ti hmuhsuah a si. 20 Jerusalem ah siangpahrang cak zetzet, Tivapi hi lam ralih ram hmuahhmuah tlunih uktu khal an rak um; cule anmah hnenah siah, ngunkhuai le thilri siah an rak pe. 21 Keimah in thupek ka pek hlanlo, hi khawpi dĭn a silonak dingah atu ah hi minungpawl cawl dingin thupek pe uh. 22 Himi tuah tlawlh lo dingin fimkhur uh. Ziangahso siangpahrang hrangah siatnak a luar ding?» tiin.
23 Cule siangpahrang Artazerzis-ih cakuat ngansâwngsin mi cu Rehum, cangantu Shimshai le an hawipipawl hmaiih siar a si tikah, Jerusalem ih um Jew-mipawl dokalhin manhlap zetin an so ih, thuneihnak thawn duh lo theih loin an cawlter. 24 Cutivekin Jerusalem ih Pathian inn hnaṭuan cu a cawl, cule Persia siangpahrang Darias a lal a kum hnihnak tiang hna cu cawlhsan a si.
Temple Dĭnsal Tharthawhsalnak
1 Profetpawl, profet Haggai le Iddo fapa profet Zekariah in Judah ram le Jerusalem ih um Jew-pawl hnenah an tlunih uktu Israel Pathian hmin in thu an phuang. 2 Cutin Shealtiel fapa Zerubbabel le Jozadak fapa Jeshua cu an tho ih, Jerusalem ih Pathian inn sak an thăwk, cule Pathian profetpawl in an umpi ih an bawm.
3 Cu laiah Tivapi hi lam ral ram uktu Tattenai le Shethar-Boznai le an hawipipawl cu anmah hnenah an ra ih an hnenah hitin an ti, «Hi Temple sak dingin le hi khawkulh ṭheh dingin zo in thu a lo pe?» tiah an ti. 4 Cun an hnenah hitin an sut, «Hi inn sak rero tupawlih hmin cu zo an si?» 5 Asinan an Pathian mit cu Jew-mipawlih upapawl parah a fu, cutin Darias hnenih thuhla theihter mi a thlen hlanlo, annih cu an cawlter thei lo. Cun hi thuhla ih ngan mi sannak cu kuatkir a si. 6 Hihi Tattenai-ih cakuat ngansâwng mi kuat mi cu a si:
Tivapi hi lam ral ram uktu Tattenai le Shethar-Boznai le a hawipipawl, Tivapi hi lam ral ram ih um Persia-mipawl cun siangpahrang Darias hnenah.
7 A hnenih ca an kuat mi ah hitiih ngan a si:
«Siangpahrang Darias hnenah, Remdaihnak hmuahhmuah um hram seh.
8 «Judia ramṭhen ah, Pathian ropiih inn ah, lung tumpi pi thawi sak le phăr ih thing rĕmkhawm mi ah kan feh, cule hi hna cu rang zetin a feh ih, an kut ah a hmuingil a si ti siangpahrang in thei seh.
9 «Cun cuih upapawl cu kan sut ih, an hnenah, ‹Hih inn sak dingin le hi khawkulhpawl ṭhehfel dingin zo in thu a lo pe,› tiah kan ti. 10 An lakih hotu lupawlih hmin kan ngan theinak dingah le nangmah lo theihter dingin an hminpawl khal anmah kan sut.
11 «Annih in hitin sannak in pekir, ‹Kannih cu lei le van Pathian siahhlawh kan si ih, Israel siangpahrang ropi in kum reipi laiih a rak sak ih a ṭheh mi inn cu kannih in kan saksal a si. 12 Asinan kan pupápawl in van Pathian thinling ko an căwkthawh ruangah, anmah cu Kaldia-mi Babilon siangpahrang Nebukhadnezzar kut ah a pek hai, anih cun hi inn hi a siatbăl ih mipi cu Babilon ah a thiarhlo. 13 Sihmansehla Babilon siangpahrang Sairas a lal a kum khatnak ah, siangpahrang Sairas in hi Pathian inn sak dingin thusuah a suah. 14 Cuihhleiah Jerusalem ih um Temple ihsin Nebukhadnezzar in Pathian inn ihta sui le ngun bungbelpawl a lâk ih, Babilon temple sungih a thiar mipawl cu siangpahrang Sairas in Babilon temple ihsin a la ih, cupawl cu ram uktu ih a tuah mi mi pakhat a hmin Shesbazzar hnenah a pek. 15 Cule anih in a hnenah, «Hi bungbelpawl hi la awla, feh aw, Jerusalem ih um Temple ah thiar aw, cule Pathian inn cu a hmun kēl ah saksal si seh,» tiah a ti. 16 Cun Sheshbazzar thotho cu a ra ih Jerusalem ih um Pathian inn lungphum cu a phum, asinan cuih cān thăwkin atu tiang, cumi cu sak rero a si ih, ṭheh a si hrih lo,› tiin.
17 «Curuangah atu ah siangpahrang in ṭha a ti asile, Babilon ih siangpahrang hlawnthil inn ah hawlsuahnak cu tuah si sehla, Jerusalem ih himi Pathian inn hi sak dingin siangpahrang Sairas in thupek a suah maw ti fiangter seh, cule siangpahrang in himi thuhla ah a rem tidān in kuat seh,» tiah an ti.
Darias Thusuah
1 Siangpahrang Darias in thusuah a suah ih, Babilon ih hlawnthil retkhawmnak hmun cazualpawl innpi ah hawlsuahnak cu an tuah. 2 Media ramṭhen ih um, Akmetha khawpi ih siangpahrang inn ah cazual cu hmuh a si, cule cumi sungah hitin ngankhum mi cu a nganaw,
3 «Siangpahrang Sairas a lal a kum khatnak ah, Jerusalem ih Pathian inn thuhla ah siangpahrang Sairas in thusuah a suah, ‹Raithawinakpawl an hlănnak hmun ah, inn cu dĭnsal si seh, cule a lungphumpawl cu hnget zetin phum si seh, a san lam dawng 60 le a kauh lam dawng 60 si seh, 4 lungto tumpi pi thawn tlar thum in, tlar khat cu thing in tuah si seh. A cem zât cu siangpahrang sum retnak ihsin pek si seh. 5 Cuihtlunah Nebukhadnezzar in Jerusalem ih um temple ihsin Pathian inn ihta sui bungbelpawl le ngun bungbelpawl a lâk ih, Babilon ih a thiar mipawl cu pekkir si sehla, Jerusalem ih um temple ah kenkir si seh, anmai hmun kēl cio ah, cule Pathian inn ah ret si hai seh,› tiin.
6 «Curuangah atu ah, Tivapi hi lam ral ram uktu Tattenai le Shethar-Boznai le Tivapi ralkhat ih um Afarsak-mi, na hawipipawl, cuih hmun ihsin hla ah sīp uh. 7 Hih Pathian inn sak hna cu hnaihnăwk hlah uh, Jew-mipawlih ram uktu le Jew-pawlih upapawl in hi Pathian inn cu a hmun kēl ah sak hai seh.
8 «Cuihtlunah hi Pathian inn saknak ding hrangah, hi Jew-mipawlih upapawl hrangih na tuah ding mi thusuah ka suah a si, a man zât cu Tivapi hi lam ral ram siah, siangpahrang-ih thilri ihsin pek si seh, an cawlhlonak dingah cumi cu hi minungpawl hnenah pek lohli si seh. 9 Cule van Pathian hnenih Meiur Thilhlănpawl hrangih an ṭul mi câwpa tûaipawl, tuucangpawl le tuufa nopawl, cun sangvut, cite, sabitzu le hriak cu Jerusalem ih um puithiampawlih dilnak zulhin pelh lo ten ni tin pek si hai seh, 10 cutin van Pathian hnenah rimthaw thawinakpawl an hlan thei ding ih, siangpahrang le a fapapawl nunnak hrangah thla an cam thei ding.
11 «Cuihtlunah thusuah a danglamtertu zokhal a inn ṭhuam pakhat phawisuakin phun si sehla, amah cu cumi parah thlai si seh, cule cumi ruangah a inn cu êk penkhawm ah tuah si seh tiah thusuah ka suah. 12 Cule cutawk ih a hmin cêngtertu Pathian cun siangpahrang pauhpauh simaw, cuih thu tidanglam dingih kut suahtu minungpawl simaw, Jerusalem ih um hi Pathian inn siatbăl dingih kut suahtu minungpawl simaw cu siatsuah seh. Keimah Darias in thusuah ka suah a si, cumi cu manhlap zetih tuahsuak si seh,» tiin.
Temple Ṭheh le Hlănnak
13 Tivapi hi lam ral ram uktu Tattenai, Shethar-Boznai le an hawipipawl in siangpahrang Darias ih a rak kuat mi bangtukin manhlap zetin an tuah. 14 Jew-mipawlih upapawl in an sak ih, profet Haggai le Iddo fapa Zekariah teih thu an phuannak thawngin an hlawhtling. Cule Israel Pathian-ih thupeknak bangtuk le Sairas, Darias le Persia siangpahrang Artazerzis pawlih thupek bangtukin an sak ih an ṭheh. 15 Cule hi inn cu Adar thla, a ni thumnak ah an ṭheh, cucu siangpahrang Darias a lal a kum ruknak a si.
16 Cun Israel tefapawl, puithiampawl le Levi-mipawl le a dang sáltangpawlih tefapawl in hi Pathian inn hlăn lăwmnak cu aipuang zetin an tuah. 17 Cule hi Pathian inn hlănnak ah, câwpa 100, tuucang 200, tuufa no 400 le Israel hmuahhmuah hrang Sual Thilhlăn hrangah Israel hnám zât zulhin mecang hleihnih thawinakpawl an hlan. 18 Mosi Cazual sungih ngan vekin, Jerusalem ih Pathian rawngbawl dingin puithiampawl cu anmai zulvo cio vekin le Levi-mipawl cu anmai burṭhen cio vekin ṭuanvo an pe.
Lantâpuai Hmannak
19 Sáltang tefapawl in Lanta puai cu thla hmaisabik a ni hleilitnak ah an hmang. 20 Ziangahtile puithiampawl le Levi-mipawl cu an thianfaiaw, an zaten an thiangfai a si. Cule sáltang tefapawl hmuahhmuah hrang, an unau puithiampawl hrang le anmai hrangah Lanta tuufa nopawl an that. 21 Cun sáltannak ihsi ra tlungkir Israel tefapawl le Israel-ih Pathian Jehovah hawl dingih cuih ram miphunpawlih thianlonak ihsi thiarfihlimaw mipawl hmuahhmuah cu an eitlang. 22 Cule Thilnu telh lo Sang Puai aipuang zetin ni sarih sung an hmang, ziangahtile Pathian, Israel Pathian inn hna ah an kut cakter dingin, Jehovah in aipuang ko le Assiria siangpahrang thinlung cu anmah lam hawi ko a tuah a si.
Jerusalem ah Ezra a Thleng
1 Hi thilpawl hnuah Persia siangpahrang Artazerzis a lal laiah, Ezra cu Babilon ihsin a hung so, cumi cu Seraiah fapa a si, cumi cu Azariah fapa a si, cumi cu Hilkiah fapa a si, 2 cumi cu Shallum fapa a si, cumi cu Zadok fapa a si, cumi cu Ahitub fapa a si, 3 cumi cu Amariah fapa a si, cumi cu Azariah fapa a si, cumi cu Meraioth fapa a si, 4 cumi cu Zerahiah fapa a si, cumi cu Uzzi fapa a si, cumi cu Bukki fapa a si ih, 5 cumi cu Abishua fapa a si, cumi cu Finehas fapa a si, cumi cu Eleazar fapa a si, cumi cu puithiam lubik Aaron fapa a si: 6 hi Ezra cu Babilon ihsin a hung so, cule anih cu Israel-ih Pathian Jehovah ih a rak pek mi Mosi Dān nganthiam a si. Jehovah a Pathian-ih kut a parih a um bangtukin, a dil mi hmuahhmuah cu siangpahrang in a pe.
7 Israel tefapawl lakih mi hrekkhat, puithiampawl, Levi-mipawl, hla saktupawl, kăwtkakiltupawl le Nethin-mipawl cu Jerusalem ah siangpahrang Artazerzis a lal a kum sarihnak ah an hung so. 8 Cule siangpahrang a lal a kum sarihnak, a thla ngatnak ah Ezra cu Jerusalem ah a thleng. 9 Thla khatnak, a ni khatnak ah amah cu Babilon ihsin a păwk ih, a Pathian kut ṭha a parih a um vekin, thla ngatnak a ni khatnak ah Jerusalem a thleng. 10 Ziangahtile Ezra cu Jehovah Dān hawl ih tuahsuak dingin le sakhaw dānpawl le cīn le dānpawl cu Israel ram ah zirh dingin a thinlung a rak timtuah.
Ezra hnenih Artazerzis Cakuat
11 Himi hi siangpahrang Artazerzis in puithiam le cangantu Ezra, Israel hnenih Jehovah thupek kamsuakthupawl le a sakhaw dānpawl ngantu hnenih a pek mi ngansâwng mi cakuat a si:
12 Artazerzis, siangpahrangpawlih siangpahrang in, van Pathian Dān ngantu, puithiam Ezra hnenah:
«Daihnak famkim le tivekpawl um hram seh.
13 «Ka ram sungih Israel-mi hmuahhmuah le an puithiampawl le Levi-mipawl ih mai palungsuakih Jerusalem ih feh duhtu hmuahhmuah cu na zawngah an feh thei tiin thusuah ka suah a si. 14 Ziangahtile nang cu na kut ih na Pathian Dān thuhla ah Judah le Jerusalem suthliah dingin siangpahrang in a thurawnpetu mi pasarih thawn a lo thlah a si, 15 cule nang cu Jerusalem cêncilhtu Israel Pathian hnenah siangpahrang le a thurawnpetupawl in siang zetih an hlăn mi sui le ngun rak keng ding na si, 16 cule Babilon ram hmuahhmuah ih na hmuh mi sui le ngun hmuahhmuah, mipi le puithiampawl ih palungsuak thawhhlawm, Jerusalem ih an Pathian inn hrangih siang zetih an pek mipawl thawn. 17 Curuangah atu ah hi tangka in câwpapawl, tuucangpawl le tuufa nopawl, an Thlairawl Thilhlănpawl le Inding Thilhlănpawl lei dingin taima aw, cule cupawl cu Jerusalem ih nan Pathian inn ih biakṭheng parah na hlan pei.
18 «Cule sui le ngun hman hlei mi thawn nangmah le na unaupawl in tuah dingih ṭha nan ti mi pauhpauh cu nan Pathian duhdān vekin tuah uh. 19 Pathian inn ih rawngbawlnak dingah bungbel an lo pek mipawl khal Jerusalem Pathian hnenah hlan thluh aw. 20 Cule na Pathian inn hrangih ṭulsăm mi ziangkhal, phihruksak a remcâng asile, siangpahrang hlawnthil inn ihsin rak tum seh.
21 «Cule kei, siangpahrang Artazerzis in Tivapi khat lam ral ram ih hlawnthil kiltupawl hmuahhmuah hnenah puithiam Ezra, van Pathian Dān ngantu in a lo dil mi ziangkhal manhlap zetih tuah si seh tiin thusuah ka suah a si, 22 ngun talent 100, sangvut kor 100, sabitzu bath 100, hriak bath 100 tiang le cite cu bikhiah um loin si seh. 23 Vancung Pathian ih thupek pauhpauh, van Pathian inn hrangah taima zetih tuah si seh. Ziangahtile thinlingnak cu ziangahso siangpahrang le a fapapawl parah a um ding? 24 Cuihhleiah puithiampawl, Levi-mipawl, hla saktupawl, kăwtkakiltupawl, Nethin-mipawl asilole hi Pathian inn siahhlawhpawl hi siah, ngunkhuai asilole thilri siah pekter dān in a siang lo ding ti kan lo theihter a si.
25 «Cule nang Ezra, na Pathian-ih lo pek mi fimnak zulhin, Tivapi hi lam ral ram ih umpawl hmuahhmuah thu an ṭhensak theinak dingah na Pathian Dān theitupawl hmuahhmuah cu uktupawl le laireltupawl ah ret aw, cule cuih dān thei lo tupawl cu zirh aw. 26 Na Pathian Dān le siangpahrang dān thlun lo tu ding pauhpauh cu thihnak simaw, ram ihsin dawisuah simaw, an thilripawl laksak simaw, thawngthlak simaw a parah rang zetin thuṭhennak tuah si seh,» tiin.
Ezra in Pathian a Thangṭhat
27 Jerusalem ih Jehovah inn ceimawi dingih siangpahrang thinlung ih hivek thil rettu le siangpahrang hmai le a thurawnpetupawl hmaiah le, 28 siangpahrang-ih micak pawimawhpawl hmaiih zahngainak i rak petu kan pupápawlih Pathian Jehovah cu thangṭhatin um seh. Ka Pathian Jehovah kut ka parih a um vekin, kei cu thazang i neiter ih, ka zawngih hung so dingin Israel hruaitu deuhdeuhpawl cu ka fĭnkhawm a si.
Ezra thawi a Kirsal mi Sungkua Lubânpawl
1 Hipawl hi siangpahrang Artazerzis a lal laiih, Babilon ihsin ka zawngih hung so an pupápawlih lubânpawl le an cithlahsâwngpawl an si: 2 Finehas tefapawl lak ihsin Gershom; Ithamar tefapawl lak ihsin Daniel; David tefapawl lak ihsin Hattush; 3 Shekaniah tefapawl, Parosh tefapawl lak ihsin Zekariah; amah thawi suahkehnak hmin khum mi mipa 150 an si; 4 Pahath-Moab tefapawl lak ihsin Zerahiah fapa Eliehoenai, amah zawngih mipa 200; 5 Shekaniah tefapawl lak ihsin Ben Jahaziel, amah zawngih mipa 300; 6 Adin tefapawl lak ihsin Jonathan fapa Ebed, amah zawngih mipa 50; 7 Elam tefapawl lak ihsin Athaliah fapa Jeshaiah, amah zawngih mipa 70; 8 Shefatiah tefapawl lak ihsin Maikal fapa Zebadiah, a zawngih mipa 80; 9 Joab tefapawl lak ihsin Jehiel fapa Obadiah, a zawngih mipa 218; 10 Shelomith tefapawl lak ihsin Ben-Josifiah, a zawngih mipa 160; 11 Bebai tefapawl lak ihsin Bebai fapa Zekariah, a zawngih mipa 28; 12 Azgad tefapawl lak ihsin Hakkatan fapa Johanan, a zawngih mipa 110; 13 Adonikam tefa netabikpawl lak ihsin an hminpawl tla cu Elifelet, Jeiel, Shemaiah le an zawngah mipa 60; 14 cuihtlunah Bigvai tefapawl lak ihsin Uthai le Zabbud, an zawngih mipa 70 an si.
Temple Siahhlawhpawl
15 Anmah cu Ahava ih luang tiva kapah ka fĭnkhawm hai ih, cu tawkah ni thum sung riahhmun kan khuar. Mipi le puithiampawl lak ka zoh ih, cu tawkah Levi tefa zohman ka hmu lo. 16 Cun hruaitu a si mi Eliezer, Ariel, Shemaiah, Elnathan, Jarib, Elnathan, Nathan, Zekariah, Meshullam pawl cu ka cah hai, theihthiamnak nei Joiarib le Elnathan khal. 17 Kasifia hmun ih hotu Iddo cah dingin thupek ka pe hai, cule kan Pathian inn ih rawngbawltu ding run hruai dingin Kasifia hmun ih Iddo le a unau Nethin-mipawl hnenih an sim ding mi ka sim hai. 18 Cun kan parih kan Pathian kut ṭha a um ruangah, theihthiamnak nei mipa kan hnenah an run hruai, Mahli tefapawl lak ihsin Levi fapa, Israel fapa, a hmin cu Sherebiah, a fapapawl le a unaupawl thawn mi hleiriat; 19 cule Hashabiah, a zawngih Merari tefapawl lak ihsin Jeshaiah, a unaupawl le an fapapawl thawn mipa 20 an si; 20 Nethin-mipawl lak ihsin David le hruaitupawl in Levi-mipawlih rawngbawlhna hrangih an ruat mi Nethin-mi 220 an si. An zaten an hmin cio ih thiah an si.
Humhimnak hrangih Rawlulh le Thlacam
21 Kan Pathian hmaiah kan phahniamaw ih, a hnenah kanmah le kan fanau tete le kan neih mi hmuahhmuah hrangah a hnen ihsin zin dik hawl dingin cutawk Ahava tiva ah rawlulh ka phuang. 22 Ziangahtile lamzin ah ral lak ihsin in bawm dingah kiltu ding ralkappawl le rángtothiampawl dil ding cun ka ning a zak, ziangruangahtile siangpahrang hnenah, «Kan Pathian kut cu thil ṭha hrangih amah hawltu hmuahhmuah tlunah a um, asinan amah thlauthlatupawl hmuahhmuah dokalhin a huham le a thinlingnak a um a si,» tiah kan rak sim zo. 23 Cutin rawl kan ul ih himi hrangah kan Pathian kan ngen, cule anih in kan thlacamnak in sâng.
Temple hrang Thawhhlawm
24 Cule puithiampawl hotu hleihnih Sherebiah, Hashabiah le an zawngih an unau pahra cu ka rethran hai. 25 Siangpahrang le a thurawnpetupawl le a mipawimawhpawl le cutawk ih um Israel hmuahhmuah in Pathian inn hrangih an thawh mi sui, ngun le bungbelpawl rih zât cu khīng ka khaisak hai ih ka rak hlan. 26 Khīng ka khai ih an kut ih ka pek mi cu ngun talent 650, ngun bungbel talent 100 rit, sui talent 100, 27 darakma 1000 man sui cawhtawlh 20 le sui vekih mankhung dar tleu ih tuah mi bungbel pahnih an si. 28 Cule kei in an hnenah, «Nannih cu Jehovah hrangah nan thianghlim a si, bungbelpawl khal an thianghlim, cule sui le ngun pawl cu nan pupápawlih Pathian Jehovah hnenih palungsuak thawhhlawm an si. 29 Puithiam hotupawl le Levi-mipawl le Israel pupápawlih lubânpawl hmai Jerusalem ih Jehovah inn pindan sungih khīng nan khai hlanlo, kil uhla ret uh» tiah ka ti. 30 Cun puithiampawl le Levi-mipawl cun Jerusalem ah kan Pathian inn ih ken dingah khīngkhai mi sui le ngun le bungbelpawl cu an cohlang.
Jerusalem an Thleng
31 Cun thla hmaisabik, a ni hleihnihnak ah Jerusalem pan dingin, Ahava tiva ihsin kan păwk. Kan Pathian kut cu kan parah a um ih, anih cun ral kut ihsin le lamzin tluanih bawhthupnak ihsin in runsuak. 32 Cutin Jerusalem kan thleng ih, cu tawkah ni thum kan câm.
33 Ni litnak ah sui, ngun le bungbelpawl cu kan Pathian inn ah puithiam Uriah fapa Meremoth kut in khīngkhai an si ih, a zawngah Finehas fapa Eleazar a um, anmah zawngah Levi-mipawl, Jeshua fapa Jozabad le Binnui fapa Noadiah an um. 34 Ziangkim siar thluh le khīngkhai thluh a si. Cuih cān ah a rih zât cu ngan thluh a si.
35 Ralkaih ih hruaihloh mipawlih tefa, sáltannak ihsi ra tlungpawl in Israel Pathian hnenah Meiur Thilhlănpawl an hlan: Israel hmuahhmuah hrangah câwpa hleihnih, tuucang 96, tuufa no 77 le Sual Thilhlăn hrangah mepa hleihnih. Cupawl hmuahhmuah cu Jehovah hnenih Meiur Thilhlăn a si. 36 Cule siangpahrang thupekpawl cu siangpahrang-ih bawi tumpipawl hnen le Tivapi hi lam ral ram uktupawl hnenah an sim. Cule annih in mipi hnen le Pathian inn băwmnak ah an pe.
Hnám dang mi thawi Ṭhitawknak
1 Hi thilpawl tla ṭheh an si tikah, hotupawl ka hnenah an ra ih, «Israel-mipawl le puithiampawl le Levi-mipawl cu hi ram minungpawl lakah thiarfihlimaw loin, Kanaan-mipawl, Het-mipawl, Perizz-mipawl, Jebus-mipawl, Ammon-mipawl, Moab-mipawl, Izip-mipawl le Amor-mipawl ih thil fihnungza an tuah mi vekin an tuah ve. 2 Ziangahtile an fanu hrekkhat cu anmai hrang le an fapapawlih nupi ah an ṭhi, cutin ci thianghlim cu cuih ram miphunpawl thawn a căwkrawiaw. A si, hotupawl le uktupawlih kut cu hi rinumlonak ah hmaihruaitu an si,» tiah an ti. 3 Cule hi thil ka theih tikah, ka sinfen le ka kâwrfual ka thlek ih, ka lusám le ka khabe hmul ka phawi, cule khawruahharin ka to. 4 Cun ralkaih ih hruaihloh mi ra tlungkirpawlih rinumlonak ruangah, Israel Pathian kamsuakthupawl ih a khūr mi mi kip cu ka hnenah an ra pungkhawm, cule kei cu zan lam raithawi cān tiang khawruahharin ka to.
5 Zan lam raithawi cān a thlen tikah, rawlulhnak ihsin ka tho, cule ka sinfen le ka kâwrfual tlek thawn ka khuk ka bil ih, Jehovah ka Pathian hnenah ka kut ka phar. 6 Cule, «Maw ka Pathian, nangmah lam hawi dingin ka ning a zak ih, ka hmai a sen ṭheh a si, ka Pathian; ziangahtile kan mawhsualnakpawl cu kan lu hnakin a sângsawn ih, kan mawhnak cu vanpawl tiang a thleng. 7 Kan pupápawl san ihsin tuihni tiang nasazetin kan rak mawh, cule kan mawhsualnak ruangah, kanmah, kan siangpahrangpawl le kan puithiampawl cu tuihni ih kan dinhmun vek hin, hi ram siangpahrangpawl kut ah siseh, ralnâm ah siseh, ralkaih ah siseh, rămsiatnak ah le mualphonak ah siseh pek kan si. 8 Kan Pathian in kan mit in vanter theinak dingah le kan sáltannak ih ṭhangphawknak ziangmawcin in peknak dingah, tlânsuak dingah a tāngsŭn ah in tuah dingin le a hmun thianghlim ah ahimnak in pe dingin, atu ah Jehovah kan Pathian hnen ihsin rei lo te sung zangfahnak hmuhter kan si. 9 Kannih cu sál kan si ko na cingin, kan Pathian in kan sáltannak ah in thlauthla lo, cuhnakin in ṭhangphawk dingah, kan Pathian inn rĕm dingah, a siatnak rĕmsal dingah, Judah ram le Jerusalem ih khawkulh in pe dingah, Persia siangpahrang mithmuhah anih in kan parah zahngainak a karhter sawn a si.
9:8a himnak: Hebru ṭawng ah cun kilhnak lole tlawngkhen tinak a si.
10 «Cule atu ah, Maw kan Pathian, himi hnuah ziangso kan sim ding? Na thupekpawl kan rak thlauthla si ih, 11 na siahhlawh profetpawl hmangih, ‹Nan va fehnak ding, nan ram luah ding mi cu a ram luahtupawlih thianlonak ruangah a thianglo ih, khat lam dĕng ihsin khat lam dĕng tiang an fihnunnak in a khat thluh, an thianlonak thawn. 12 Curuangah nan fanupawl cu an fapapawl nupi dingah pe hlah uhla, nan fapapawl hrangah an fanupawl la fawn hlah uh, cule nan cak ih cuih ram ṭhatnak nan ei theinak dingah le nan tefapawl hnenih ro ding nan tān kumkhua theinak dingah, an remdaihnak asilole an hmuingilnak hawl dah hlah uh,› tiih thu na pek kha. 13 Kan thil tiṭha lo pawl ruangah le a nasazet mi kan mawhnak ruangah hi thil hmuahhmuah kan parih a thlen hnuah, nang kan Pathian in kan mawhsualnak in a phutawk hnakih nêp ih dān in tat hnuah hivekin runsuahnak in pek na cingin, 14 na thupekpawl cu kan pahbălsal ih, hi thil fihnungza titu minungpawl thawn kan ṭhi cawkpawlhaw lai hrih thotho ding maw si? Tāngsŭn lole nungdam um loih in hlorálter tiangin kan parah na thin a heng lo ding maw? 15 Maw Jehovah Israel Pathian, nang cu na dingfel a si, ziangahtile kannih cu tuihni ih kan dinhmun vek hin a tāngsŭn ah kan tâng a si hi. Ngai hnik, na hmaiah mawhnak neiin kan um, himi ruangah na hmaiah zohman kan ding thei lo,» tiah an ti.
Ṭhitawknak Ṭhiṭhalo ruangih Sualphuannak
1 Pathian inn hmaiah băwkkhupin Ezra thla a cam rero lai le sual phuangin a ṭah rero laiah, Israel ihsin mipa, nunau le nauhak pungkhawm tumpi a hnenah an tawngkhawmaw, ziangahtile lungzûr zetin mipi an ṭap. 2 Cule Elam fapapawl lakih pakhat Jehiel fapa Shekaniah in Ezra hnenah a ṭawngsuak ih, «Kan Pathian parah rinum loin kan rak um ih, hi ram miphunpawl hnen ihsin ram dang mi nupi kan rak ṭhi, cuticingkhalin atu ah Israel hrangah ruahsan ding a um lai hrih. 3 Cuti a si ruangah atu ah ka bawipa le kan Pathian thupek parih khūrtu hmuahhmuah ih thurawnpek bangtukin, cuih nupipawl hmuahhmuah le an lakih hrin mipawl cu hlăwnhlo dingin, kan Pathian hnenah thukham tuah uhsi, cule cumi cu dān bangtukin tuah si seh. 4 Tho aw, ziangahtile hi thuhla cu na mawhphurh a si. Kannih khal na lamah kan ṭang a si. Ralṭhain um awla, cumi cu tuah aw,» tiah a ti.
5 Cun Ezra cu a tho ih, puithiam hotupawl, Levi-mipawl le Israel zate cu himi ṭawngkam bangtukih tuah dingin sesămin thukamnak a tuahter hai. Cutivekin sesăm thukamnak an tuah. 6 Cun Ezra cu Pathian inn hmai ihsin a tho ih, Eliashib fapa Jehohanan-ih pindan sungah a lut, cule cutawk ih a luh tikah, rawl zianghman a ei lo ih, tidai khal a in lo, sáltangpawlih mawhnak ruangah a ṭap.
7 Cule Judah ram hmuahhmuah le Jerusalem ih sáltang tefapawl hmuahhmuah hnenah an hotupawl le an upapawl ih thurawnpek vekih Jerusalem ih fĭnkhawmaw ih, 8 ni thum sungih ra lo tu zokhal a thilri hmuahhmuah lawnsak thluh ih, amah rori khal sáltangpawl punkhawmnak lak ihsin ṭhenhran a si ding tiin thuphuan an suah.
9 Cun Judah-mipawl le Benjamin-mipawl cu ni thum sungah Jerusalem ah an fĭnkhawmaw thluh. Cumi cu a thla kuatnak ni 20 ni a si, Pathian inn tualrawn ah mipi hmuahhmuah cu an to ih, cuih thuhla ruangah le ruahpi nasazet a sur ruangah an khūr ciamco. 10 Cun puithiam Ezra cu a ding ih an hnenah, «Israel mawhnak bêtin, rinum loin nan rak um ih, ram dang mi nupi nan rak ṭhi. 11 Curuangah nan pupápawlih Pathian Jehovah hnenah sualphuang uhla, a duh zawng tuah uh, hi ram miphunpawl le ram dang mi nupipawl hnen ihsin thiarfihlim aw uh,» tiah a ti.
12 Cun mipungkhawm zate in an sâng ih, aw ring zetin, «A si! Na sim vek rori in kan tuah tengteng ding,» tiah an ti. 13 Asinan mi kan tam tuk; ruah le a taktuk lai, lengah kan ding thei lo. Cun himi cu ni hnihkhat hna men a si lo, ziangahtile hih thuhla ah kan lakih mi tampi le an rak hél fawn si. 14 Kan mipungkhawm zate hotupawl ding hai seh, cule kan hnen ihsin himi thuhla ah kan Pathian thinlingnak nasazet hi a kianhloh hlanlo, kan khawpipawl ih um ram dang mi nupi ṭhitupawl hmuahhmuah cu, khaw tin upapawl le laireltupawl thawn cān bikhiah ah ra hai seh,» tiah an ti. 15 Hih thu cu Asahel fapa Jonathan le Tikvah fapa Jahaziah lawngin an dokalh ih, Meshullam le Levi-mi Shabbethai in an bawm.
16 Cun cutivekcun sáltang tefapawl in an rak tuah. Puithiam Ezra in an pupápawlih sungkua vek cio in, an hmin ciar tarlangin pupápawlih lubânpawl a serhhran hai, cule a thla hratnak ni khatnak ah cuih thuhla tifel dingin an to. 17 Thla khatnak a ni khatnak ah ram dang mi nupi ṭhitupawl mipa hmuahhmuah zawifel an ṭheh.
Ram dang Nupipawl Hlăwnhlohnak
18 Puithiam fapapawl lakah mi hrekkhat ram dang mi nupi ṭhitupawl hmuh an si, cupawl cu Jozadak-ih fapa Jeshua fapapawl le a unau Maaseiah, Eliezer, Jarib le Gedaliah pawl an si. 19 Cule annih in an nupipawl hlăwnhlo dingin an tiamkamnak an pe, cule an mawh ruangah Mawh Thilhlăn ah an rante rualpawl lak ihsin tuucang an pe.
20 Cuihhleiah Immer fapapawl lak ihsin Hanani le Zebadiah; 21 Harim fapapawl lak ihsin, Maaseiah, Elijah, Shemaiah, Jehiel le Uzziah; 22 Pashhur fapapawl lak ihsin, Elioenai, Maaseiah, Ishmael, Nethanel, Jozabad le Elasah an si.
23 Cuihtlunah Levi-mipawl lak ihsin Jozabad, Shimei le Kelaiah (cucu Kelita a si) Pethahiah, Judah le Eliezer an si. 24 Hlasaktupawl lak ihsi khalin Eliashib; cule kăwtkakiltupawl lak ihsin Shallum, Telem le Uri an si.
25 Cule a dang Israel lak, Parosh fapapawl lak ihsin Ramiah, Jeziah, Malkiah, Mijamin, Eleazar, Malkijah le Benaiah; 26 Elam fapapawl lak ihsin Mattaniah, Zekariah, Jehiel, Abdi, Jeremoth le Eliah; 27 Zattu fapapawl lak ihsin Elioenai, Eliashib, Mattaniah, Jeremoth, Zabad le Aziza; 28 Bebai fapapawl lak ihsin Jehohanan, Hananiah, Zabbai le Athlai; 29 Bani fapapawl lak ihsin Meshullam, Malluk, Adaiah, Jashub, Sheal le Ramoth; 30 Pathath-Moab fapapawl lak ihsin Adna, Khelal, Benaiah, Maaseiah, Mattaniah, Bezalel, Binnui le Manasseh; 31 Harim fapapawl lak ihsin Eliezer, Ishijah, Malkijah, Shemaiah, Shimeon, 32 Benjamin, Malluk le Shemariah: 33 Hashum fapapawl lak ihsin Mattenai, Mattattah, Zabad, Elifelet, Jeremai, Manasseh le Shimei; 34 Bani fapapawl lak ihsin Maadai, Amram, Uel, 35 Benaiah, Bedeiah, Keluh, 36 Vaniah, Meremoth, Eliashib, 37 Mattaniah, Mattenai, Jaasai, 38 Bani, Binnui, Shimei, 39 Shelemiah, Nathan, Adaiah, 40 Maknadebai, Shashai, Sharai, 41 Azarel, Shelemiah, Shemairah, 42 Shallum, Amariah le Joseph; 43 Nebo fapapawl lak ihsin Jeiel, Mattithiah, Zabad, Zebina, Jaddai, Joel le Benaiah tla an si.
44 Hipawl hmuahhmuah in ram dang nupi an ṭhi ih, mi hrekkhat cun an nupipawl hnen ihsin faletla an nei.