About Bible Thianghlim | ©

BibleThianghlim – HAGGAI

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

HAGGAI

  • A ngantu: Haggai
  • A siartu: Persia-mipawlih uk laiih Jew-pawl
  • A huap sung cān: B.C. 519

Bible sungah profet Haggai le profet Zekariah an lăng hmaisabiknak cu Ezra cabu hi a si. Babilon le Persia ih Jew-pawl sál an tān hnuah, Jerusalem temple thar saksalnak ah ṭan an la. Persia Siangpahrang Sairas in Jew-pawl temple saksal dingin Jerusalem ih kir ding siannak a pe. Cule B.C. 536 ah a lungphum an ṭhehfel. Asinan Sairas a thih hnu tawkfang ah (B.C. 529 hrawngah), Jew-pawlih ralpawl in Persia Siangpahrang dang hnenah ca an ngan ih, Jerusalem ih temple saktupawl cun amah do an tum tiah an puh. Cumi hlanih Jerusalem khawpi uktu siangpahrangpawl in miphun dang siangpahrangpawl parih helhmang an sinak thupawl a hliakhlaifel hnuah, Jew-pawlih ralpawl ih an puhnak cu a dik men thei tiah a zum. Cule Jew-pawlih temple sak cu hranhramih cawlter dingin thu a pe.

Sairas in hi hlan kum tampi ah temple saksal dingin thu a rak pe ko nân (Ezr 1:1-4), Jew-pawl cun siangpahrang neta ih thupek cu an cohlang. Jew-pawl in «Jehovah inn sak ding cān» a thleng hrih lo tiah an pawm (Hag 1:2). Asinan Haggai le Zekariah in an hnenih thu an sim hnuah, mipi cu cuih hna hrangah an thinlung an thartersal ih an ṭuansal. Cuih ṭum ah cun siangpahrang thar hnenah Sairas ih thu a rak suah mi cu an sim (Ezr 5:13-16; 6:1-5). Zerubbabel cu temple saktupawl hruaitu ṭuanvo neitu a si ruangah Haggai in a hnenah a thucah cu a sim (1:1; cf. 1:12, 14; 2:2, 4, 21, 23).

Profet Haggai in a thuphuan cu B.C 519 laifang hrawngin a thăwk ih, cumi cu thla thum hnuah ṭhehfel a si. A thuken laimu cu: Jehovah lalram hna ah amai duhzawngin um uhla, a thutiam thukham malsawmpawl tla nan co ding ti a si. Hi cabu ah thucah pali a um. A pakhatnak ah, Haggai in hnaṭuantupawl kha Jehovah hna ih daithlan bansan dingin nun a sim ih, Jehovah hna ih kirsal dingin tha a pe hai (1:1-15). A pahnihnak ah, Pathian khawkhannak ah an hnaṭuan cu hna ropi a si tiin Haggai in a theihtersal hai (2:1-9). A pathumnak ah, Pathian ih malsawm a tiamkam hai thu mipi a theihtersal. A thu an lun ruangah a liam cia ih camsiatnak cu thaihloh a si zo ih, Pathian malsawm cu peksal a si zo (2:10-19). A palitnak ah, leitlun lalrampawl tisiat si khal hai sehla, Israel lalram cu Jehovah hril mi a si vekin a hmun ding ti thutiamkam cu Haggai in a phuang (2:20-23).

Pathian in a khawkhan a hlensuak ding ih, a khawkhan mi thupibikih rettupawl cu thlawsuah a pe ding.

Thuhlawm Ṭhen

  • I. Haggai in Temple sak daithlan bāng dingin mipi nun a sim (1:1-15)
  • II. Haggai in Pathian khawkhannak ih ralṭhatnak la dingin mipi a theihtersal (2:1-9)
  • III. Haggai in Pathian ih malsawm a tiamkam thu thawn pehparawin mipi tha a pe (2:10-19)
  • IV. Haggai in Pathian in leitlun lalrampawl a siatbăl ding, asinan Israel lalram cu a ding kumkhua ding tiah a phuang (2:20-23)

1

Pathian Inn Sak dingih Thupek

1 Siangpahrang Darias a lal a kum hnihnak, a thla ruknak a ni hmaisabikah Jehozadak fapa puithiam lubik Joshua le Judah ram uktu Shealtiel fapa Zerubbabel hnenah profet Haggai hmangin Jehovah kamsuakthu a thleng: 2 «Ralkap rualpawlih Jehovah ih sim mi cu hihi a si: hi minungpawl in, ‹A cān a thleng hrih lo, Jehovah inn sak ding cān cu,› » tiah an ti.

3 Cun Jehovah kamsuakthu cu profet Haggai hmangin a thleng, 4 «Hi temple hmuah siat ih a tlûk laiah, nanmah hrangah nan ceimawi mi innpawl sungih um cān a si maw?» tiin.

5 Curuangah atu ah ralkap rualpawlih Jehovah ih sim mi cu hihi a si:

«Nan lamzinpawl ruat hnik uh!
6 Tampi nan tuh ih, málte nan ngah;
Nan ei, asinan khăwpkham nan nei lo;
Nan in, asinan nan khawp lo;
Hnipuan nan hruh, asinan zohman nan hlum cuang lo;
Cule hlawhman ngahtu in, dip păwp sungah a ngah mi hlawhman cu a săn a si,» tiin.

7 Ralkap rualpawlih Jehovah ih sim mi cu hitin a si: «Nan lamzinpawl ruat hnik uh! 8 Ka lung a awi ih sunlawih ka si theinak dingah tlang ah kai in zanthing run keng uhla, ainn sak uh, Jehovah in a ti. 9 Tampi ngah nan beisei ih, ngai hnik uh, málte lawng nan ngah; cule inn ih nan tlun tikah, ka lo sēmhlohsak. Ziangruangah so? Ralkap rualpawlih Jehovah in a ti. Ka inn siatih a um laiah nan zaten mai inn cio ih nan tlān men ruangah a si. 10 Curuangah nan tlunih vanpawl in daifim an sūp ih, leilung in a rah a sûp. 11 Ziangahtile leiram le tlangpawl parah, thlairawl le sabitzu thar le hriak thar parah, lei in a rahsuah mi pauhpauh parah, minung le sumhnám parah le na kut ṭuan mi hmuahhmuah parah khuakheng dingin ka ko a si,» tiin.

1:8:a inn: Temple a relnak a si.

Mipi in Thu an Lung

12 Cun Shealtiel fapa Zerubbabel le Jehozadak fapa puithiam lubik Joshua cu a tāngsŭn mipi thawn Jehovah an Pathian aw le Jehovah an Pathian in a rak thlah vekin, profet Haggai-ih aw an ngaithla, cule mipi in Jehovah an ṭihzah. 13 Cun Jehovah thuphurtu Haggai in mipi hnenah Jehovah thucah a phuang ih, «Ka lo umpi, tiah Jehovah in a ti,» tiin. 14 Cule Judah ram uktu Shealtiel fapa Zerubbabel le Jehozadak fapa puithiam lubik Joshua-ih thinlung le a tāngsŭn mipi thinlung cu Jehovah in a căwktho; cule an feh ih, ralkap rualpawlih Jehovah an Pathian inn an sak, 15 cucu siangpahrang Darias a lal a kum hnihnak, a thla ruknak, ni 24-nak ah a si.

2

Pathian Inn a Ropi leh Ding

1 Thla sarihnak, cuih thla ni 21-nak ah Jehovah kamsuakthu cu profet Haggai hmangin a thleng ih, hitin a ti: 2 «Atu ah Judah ram uktu Shealtiel fapa Zerubbabel le Jehozadak fapa puithiam lubik Joshua hnen le a tāngsŭn mipi hnenah, 3 ‹Hihlan ih hi ainn ropitzia hmutu hi tawkah zo tal a tang nan um maw? Cun atu ah teh ziangti vekin nan hmu? A hlan ta thawn khaikhin ah cun nan mithmuhah atu ihta cu zianghmanlo men a si maw? 4 Cutisikhalsehla Zerubbabel, atu ah cak zetin um aw, Jehovah in a ti. Cule nang Jehozadak fapa puithiam lubik Joshua le rammi hmuahhmuah tla, cak zetin um uh, Jehovah in a ti. Cule ṭuan uh; ziangahtile keimah in ka lo umpi a si, ralkap rualpawlih Jehovah in a ti. 5 Cucu Izip ihsi nan ra suah tikih nanmah thawi thukham ka rak tuah mi a si; ka Thlarau cu nan lakah a um, ṭih hlah uh,› tiah a ti,» tiin.

2:3a inn: Temple a relnak a si.

6 Ziangahtile ralkap rualpawlih Jehovah ih sim mi cu hihi a si: a rei hlanah vanpawl le leilung, tifinriat le khawmual vei khat ka hnîn leh ding; 7 cule miphunpawl hmuahhmuah khal ka hnîn ding ih, miphunpawl hmuahhmuah ih hlawnthilpawl cu a ra thleng ding, cule hi ainn cu ropitnak in ka khatter ding, ralkap rualpawlih Jehovah in a ti. 8 Sui cu ka ta a si ih, ngun khal ka ta a si, ralkap rualpawlih Jehovah in a ti. 9 Himi a netadeuh binn ropitzia cu hmaisata hnakin a nasadeuh ding, ralkap rualpawlih Jehovah in a ti. Cule hi hmun ah hnangamdaihnak ka umter ding, ralkap rualpawlih Jehovah in a ti,› tiin sim aw,» tiin.

2:7a inn: Câng 3 simfiangnak zoh aw.

2:9b inn: Câng 3 simfiangnak zoh aw.

Mipi an Bawrhbang

10 Darias a lal a kum hnihnak, a thla kuatnak, a ni 24-nak ah Jehovah kamsuakthu cu profet Haggai hnenah hitin a thleng, 11 «Ralkap rualpawlih Jehovah ih sim mi cu hitin a si, ‹Atu ah dān thuhla puithiampawl sut uh: 12 «Mi pakhat in serhhran mi sa cu a sinfen in tuamin a keng ih, cuih a fun mi cun a zimten, sang simaw, suan mi simaw, sabitzu simaw, hriak simaw, ziang rawl khal simaw, a daingah pang asile, a rung thiang pei maw?» tiin,› tiah a ti a si,» tiin.

Cun puithiampawl in an sâng ih, «Thiang hlah,» tiah an ti.

13 Cule Haggai in, «Mithi ruak a tham ruangih thianglo mi pakhat in hi thilpawl lakih pakhat khat thâm sehla, cuih thil cu thiang loin a rung um ve pei maw?» tiah a ti.

Puithiampawl in an sâng ih, «Thiang lo ah a cang ding,» tiah an ti.

14 Cun Haggai in a sâng ih, «Ka hmaiah hi mipi khal cuvek an si ih, hi miphun khal cuvek thotho an si ve, Jehovah in a ti, cule an kut ih an tuah mi kip in cuvek a si ih, an hlăn mi pauhpauh cu a thianglo a si.

Malsawm Tiamkamnak

15 «Cule atu ah, tuihni ihsin hi hlan thil khâ ruat hnik uh: Jehovah temple sungih lungto pakhat parah lungto dang an suan hlan, 16 mi pakhat in thlairawl efa 20 beiseiin a ra ih, pahra lawng a um ih, mi pakhat cu sabit sawrnak ah bath 50 khaisuak dingin a ra ih, bath 20 lawng a um ni ihsi khan. 17 Nan kut ṭuan mi hmuahhmuah ah thil hring rocarnak, thil hring pangmăn kainak le rial pawl tla hmangin ka lo vaw hai; cuticingkhalin, ka hnenah nan kir cuang lo, Jehovah in a thăn. 18 Hi hlan thil kha ruat hnik uh: tuihni, a thla kuatnak ni 24 ihsin Jehovah temple lungphum phum ni tiang kha ruat uh. 19 Cuam sungah thlairawl mu pakhat tal a um maw? A si, sabit hri, theipi kung, talê kung le olif kung pawl tla in rah an suah lo. Asinan tuihni thăwkin mal ka lo sawm hai ding,» tiah a ti.

Zerubbabel hnenih Pathian Thutiamkam

20 Cule cuih thla ni 24-nak ah Jehovah kamsuakthu cu Haggai hnenah hitin a thlengsal, 21 «Judah ram uktu Zerubbabel hnenah hitin sim aw,

‹Lei le vanpawl ka hnîn ding.
22 Lalrampawlih laltokhampawl ka linglet ding;
Miphunpawlih lalrampawl cahnak ka ṭhiatbăl ding.
Ránglêngpawl le a parih topawl ka linglet ding;
Rángpawl le an parih totupawl an ṭumthla ding,
Mi tin anmai unaupaih ralnâm in an thi ding,› tiah a ti.

23 «Cuih ni ah, ralkap rualpawlih Jehovah in a phuang, Shealtiel fapa Zerubbabel, ka siahhlawh ka lo kai ding, Jehovah in a phuang, nangmah cu ka zunghruk tacik vekin ka lo tuah ding, ziangahtile ka lo hril zo, tiah ralkap rualpawlih Jehovah in a ti,» tiin.