About Bible Thianghlim | ©

BibleThianghlim – 2 SIANGPAHRANG

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

2 SIANGPAHRANG

  • A ngantu: Theih a si lo
  • Thil cang kum: B.C. 853-560
  • Ngan kum: B.C. 586 hnu

Siangpahrang cabu pakhatnak le pahnihnak hi a thăwk ah cun bu khat a si. (Siangpahrang cabu pakhatnak Thuhmaihruai zoh aw.) Siangpahrang cabu pakhatnak cu siangpahrang mipawimawh pahnih: Israel siangpahrang Ahab le Judah siangpahrang Jehoshafat teih thihnak in a net.

Siangpahrang cabu pahnihnak cu siangpahrang thar pahnih: Israel laltokham parih Ahaziah le Judah laltokham parih Jehoram thu in a thăwk. A thupi sinsin mi cu, Siangpahrang cabu pahnihnak thăwknak ah profet Elijah-ih rawngbawlnak kha profet Elisha-ih rawngbawlnak ih a sunzăwmnak kan hmu. «Jehovah kamsuakthu» ti mi le cuih kamsuakthu phuangtu profetpawl cu Siangpahrang cabupawl ah an uar hleice ti cu Siangpahrang cabu pakhatnak Thuhmaihruai ah tarlăng a si zo.

Profet Elijah le Elisha-ih rawngbawlnak in Siangpahrang cabu pakhatnak le pahnihnak ṭhen thum ṭhen khat an luah. Siangpahrang cabu pakhatnak bung 17 ihsin Siangpahrang cabu pahnihnak bung 8 cu hi profet pahnih thuhla in a khat. Siangpahrang bu khatnak le Siangpahrang bu hnihnak ah Elijah-ih hmin vei 66 a lang ih (Sansiarnak cabupawl ah cun vei 2 lawng), Elisha-ih hmin vei 58 a lang (Sansiarnak cabupawl ah a lang lo). Profet ropi dang Isaiah khal Siangpahrang cabu pahnihnak sungah a lang ve (19-20). Siangpahrang cabu pakhatnak ih kan hmuh vekin, profetpawl in anmai hnám nun ah mawhphurhnak pawimawh zet an la.

Sikhalsehla, a cemnakah lalram pahnih hruaitupawl le mi senpi in Pathian siahhlawh profetpawlih rawngbawlnak cu a netnakah cun an ngaihthah (17:13-23; 24:1-4).

B.C. 722 kum ah Assiria kut ah sak lam lalram a tluk thu (2 Siangpahrang bung 17) le B.C. 586 kum ah Babilon kut ah thlang lam lalram a tluk thu (2 Siangpahrang bung 24-25) Siangpahrang cabu pahnihnak in in sim. Cuticingin hi cabu cu ruahsannak málte thawn a net. Babilon ah sál ih an hruai mi Judah siangpahrang netabik Jehoiakin cu thawng ihsin suah a si ih, ṭha zetih tuamhlawm a si.

Sáltannak hnuih ṭha zetih Jehoiakin tuamhlawm a sinak hin, Judah khal a netnakah suah a sinak ding a hmuhsak a si men thei. Judah sáltang suahnak cu profet Jeremiah in a simsung cia. Kum reipi hnuah an thuhla hi siarin kan zingzăwi leh ding ti hi siangpahrangpawl lakih pakhat hmanin an rak ruat dah lo. Siangpahrang pakhat thu na siar ih a thuhla na ruah tinten hi thusuhnakpawl hi nangmah te sutaw aw.

«Ka nun diktak Bible ah ngan si bang sehla ziang a bang pei?» «Ka thuhla ah Pathian in ziang a rel pei?» «Ka nun ihsin ziang zir ding a um ve pei?» «A tamsawn hi a ṭha lam maw a se lam a si pei?» Siangpahrangpawl hin siangpahrang sinak dinhmun hleice an rak nei, asinan kanmah bangin mi menmen khal an rak si ve.

Thuhlawm Ṭhen

  • I. Israel le Judah an ṭangtlang (bung 1-8)
  • II. Israel a ṭumsuk ih Assiria kut ah a tlu (bung 9-19)
  • III. Judah amah lawng a lal, cule Babilon kut ah a tlu (bung 18-24)

1

Pathian in Ahaziah Thu a Ṭhen

1 Ahab a thih hnuah Moab ram cu Israel dokalhin a hél.

2 Cule Ahaziah cu Samaria ih a pindan tlunta tukvirh kalhpaṭheng ihsin a tla ih hriamhma a pu, cule palaipawl a thlah ih an hnenah, «Feh uhla, himi hriamhma ihsin ka damsal pei maw tiin Baal-Zebub, Ekron khaw pathian va sut uh,» tiah a ti.

3 Asinan Tishbi-mi Elijah hnenah Jehovah-ih vancungmi in, «Tho aw, Samaria siangpahrang-ih palaipawl táwng dingin so awla, an hnenah, ‹Israel ram ah Pathian a um lo ruangah maw, Ekron khaw pathian Baal-Zebub thusut dingih nan feh?› 4 Curuangah atu ah, Jehovah in hitin a ti: ‹Na rak kaisohnak ihkhun ihsin na ṭum lo ding, na thi rori sawn ding a si, tiin,› ti aw,» tiah a ti. Cun Elijah cu a fehsuak.

5 Cule palaipawl a hnenih an kirsal tikah, an hnenah, «Ziangah so nan ra kirsal?» tiah a ti hai.

6 Cun annih in a hnenah, «Kanmah táwng dingin mi pakhat a ra ih kan hnenah, ‹Feh uh, a lo thlahtu siangpahrang hnenah kirsal uhla a hnenah, «Israel ram ah Pathian a um lo ruangah maw Ekron khaw pathian Baal-Zebub thusut dingih mi na thlah? Curuangah na rak kaisohnak ihkhun ihsin na ṭum lo ding, na thi rori sawn ding a si, Jehovah in a ti,» tiin sim uh› in ti,» tiah an ti.

7 Cun anih in an hnenah, «Nanmah lo táwng dingih ra tahratih himi ṭawngkampawl a lo simtupa cu ziang vek minung a si?» tiah a ti.

8 Cule annih in a hnenah, «Hmul tam zet nei, a tâi ih savun taikap khapaw a si,» tiah an ti.

Cule anih in, «Cu pa cu Tishbi-mi Elijah a si cu,» tiah a ti.

9 Cun siangpahrang in a hnenah mipa 50 hotu pakhat cu a mi 50 pawl thawn a thlah. Cule a hnenah a feh ih, zoh hnik, anih cu tlang zimah a rak to. Cule a hnenah, «Pathian mi, siangpahrang in, ‹Rung ṭum aw!› a lo ti,» tiah a ti.

10 Cule Elijah in mi 50 hotu cu a sawn ih a hnenah, «Keimah cu Pathian mi ka si ahcun, van ihsin meisa rung tla-in nangmah le na mi 50 pawl cu lo kangrál seh,» tiah a ti. Cule van ihsin meisa a tla ih amah le a mi 50 pawl cu a kangrál hai. 11 Cun anih in a dang mi 50 hotu, a mi 50 pawl thawn a hnenah a thlahsal.

Cule anih in a sawn ih a hnenah, «Pathian mi, ‹Zamrangten rung ṭum aw,› tiin siangpahrang in a lo ti,» tiah a ti.

12 Cun Elijah in a sawn ih an hnenah, «Keimah cu Pathian mi ka si ahcun, van ihsin meisa tla-in nangmah le na mi 50 pawl cu lo kangrál seh,» tiah a ti. Cule van ihsin meisa a tla ih amah le a mi 50 pawl cu a kāngral hai.

13 Anih in mi 50 hotu a pathumnak cu a mi 50 pawl thawn a thlah hai lala. Cule mi 50 hotu cu a so ih a thleng, cule Elijah hmaiah a khuk a bil, cun amah cu ngenin a hnenah, «Pathian mi, zangfahten ka nunnak le hi na siahhlawh 50 pawlih nunnak hi na mithmuhah sunglawi hram seh. 14 Zoh hnik, a hmaisa mi 50 hotu pahnih cu van ihsin meisa a tla ih an mi 50 pawl thawn an kangrál thluh. Asinan atu ah, ka nunnak hi na mithmuhah sunglawi hram seh,» tiah a ti.

15 Cule Jehovah-ih vancungmi in Elijah hnenah, «Amai zawngah suk awla, amah cu ṭih hlah,» tiah a ti. Cule Elijah cu a tho ih, cu pa zawngah siangpahrang hnenah a suk.

16 Cun Elijah cun a hnenah, « ‹Israel ram ah suh ding Pathian a um lo ruangah maw si Ekron khaw pathian, Baal-Zebub thusut dingin palaipawl na rak thlah? Curuangah na kaisohnak ihkhun ihsin na ṭum nawn lo ding, na thi rori sawn ding a si,› Jehovah in a ti,» tiah a ti.

17 Cule Ahaziah cu Elijah ih a rak sim mi Jehovah kamsuakthu vekin a thi. Anih in fapa a neih lo ruangah, Judah siangpahrang Jehoshafat-ih fapa Jehoram a lal a kum hnihnak ah, amah aiawhin Jehoram cu siangpahrang ah a cang. 18 Cun a tāng lai mi Ahaziah ih tuah mi a căngvaihnakpawl cu Israel siangpahrangpawlih sansiarnak cazual sungah ngan an si lo maw?

2

Elijah Van a Kai

1 Cule hitin a si, Jehovah in phusîng hmangin van ah Elijah a laksoh zik tikah, Elijah cu Elisha thawn Gilgal ihsin a fehsuak. 2 Cun Elijah in Elisha hnenah, «Zangfahten hi tawkah cām aw, ziangahtile kei cu Jehovah in Bethel ah i thlah a si,» tiah a ti.

Asinan Elisha in, «Jehovah a nun bangin le nangmah na nun bangin, ka lo tlansan lo ding!» tiah a ti. Cule Bethel ah an suk.

3 Cun Bethel ih um profet fapapawl cu Elisha hnenah an ra suak ih a hnenah, «Tuihsun ah Jehovah in na lu tlun ihsin na bawipa cu a lahlo ding ti na thei maw?» tiah an ti.

Cule anih in, «A si, ka thei, daiten um uh!» tiah a ti.

4 Cun Elijah in a hnenah, «Elisha, zangfahten hi tawkah cām aw, ziangahtile Jehovah in Jeriko ah i thlah a si,» tiah a ti.

Asinan anih in, «Jehovah a nun rori bangin le nangmah na nun bangin, ka lo tlansan lo ding!» tiah a ti. Cule Jeriko ah an feh.

5 Cule Bethel ih um profet fapapawl cun Elisha an ra naih ih a hnenah, «Tuihsun ah Jehovah in na lu tlun ihsin na bawipa a lahlo ding ti na thei maw?» tiah an ti.

Cule anih in, «A si, ka thei, daiten um uh!» tiah a ti.

6 Cun Elijah in a hnenah, «Zangfahten hi tawkah cām aw, ziangahtile Jehovah in Jordan ah i thlah a si,» tiah a ti.

Asinan anih in, «Jehovah a nun rori bangin le nangmah na nun bangin, ka lo tlansan lo ding!» tiah a ti. Cule annih pahnih cu an feh vivo. 7 Cun profet fapa mi 50 pawl cu an feh ih, Jordan tiva kapih an pahnih ih an din laiah, hlaral ihsin anmah thlirin an ding. 8 Cun Elijah cun a puan a la, a zual ih, tidai cu a vuak, cule khat lam le khat lamah a ṭhenaw, cule an pahnih cun leiro parin an tánkai.

9 Cule hitin a si, an tankai hnuah Elijah in Elisha hnenah, «Dil aw! Na hnen ihsin lakhlo ka si hlanah ziang ka lo tuahsak ding?» tiah a ti.

Elisha in, «Zangfahten, na thlarau co mi alet in ka parah um seh,» tiah a ti.

10 Cutikah anih in, «Thil harsa na dil a si. Sikhalsehla na hnen ihsin laksoh ka si lai i hmuh asile, na hrangah cuvekin a si ding. Culole cuvekin a si lo ding,» tiah a ti. 11 Cun hitin a si, feh phah vivo in an ṭawng rero laiah, ngai hnik, meisa rángpawl thawn meisa ránglêng pakhat a lang ih, an pahnih cu a ṭhenawter. Cule Elijah cu van ah phusîng hmangin a kaiso.

12 Cule Elisha in cumi cu a hmu ih, «Ka pa, ka pa, Israel ránglêng le rángmâwngtupawl!» tiin a ausuak. Cule amah cu a hmu nawn lo. Cun amai hnipuan a kai ih ṭhen hnih ah a thlek. 13 Elijah hnen ihsin a tla mi a puan khal a la, cule a kir ih Jordan tiva kapah a ding. 14 Cun a hnen ihsin a tla mi Elijah-ih puan cu a la ih, tidai cu a vuak, cule, «Elijah Pathian Jehovah cu khuiah so?» tiah a ti. Cule tidai a vuak tikah khat lam le khat lam a ṭhenaw ih Elisha cun a tánkai.

15 Cule Jeriko ihsin a ra mi profet fapapawl in amah an hmuh tikah, «Elisha parah Elijah thlarau a um,» tiah an ti. Cule amah táwng dingah an ra thleng ih, a hmaiih lei ah an băwkkhup. 16 Cun annih in a hnenah, «Atu ah zoh hnik, na siahhlawhpawl hnenah mipa cakvak 50 an um. Zangfahten anmah cu fehter hai awla, na bawipa cu hawl hai seh, amah cu Jehovah Thlarau in a lakso ih tlang pakhat khat ah simaw, phaikuam pakhat khat ah simaw a thlak men tla a si ding sokhaw,» tiah an ti.

Cule anih in, «Zohman nan thlah lo pei,» tiah a ti.

17 Asinan a ning a zah tiangin amah an ngen ih, anih in, «Thlah uh!» tiah a ti. Curuangah mipa 50 pawl cu an thlah ih, ni thum sung an hawl, asinan amah cu an hmu lo. 18 Cule a hnenih an thlensal tikah, anih cu Jeriko ah a cām ih an hnenah, «Feh hlah uh, ka lo ti ko lo maw?» tiah a ti hai.

Elisha in Thilmak a Tuah

19 Cun cuih khua mipapawl in Elisha hnenah, «Ngai hnik, ka bawipa in a hmuh bangin, hi khawpi dinhmun cu a nuam, asinan tidai a ṭha lo, leiram khal a cíng,» tiah an ti.

20 Cule anih in, «Khēng thar in run kĕn uhla, cumi sungah cite ret uh,» tiah a ti. Cun annih in cumi cu a hnenah an keng. 21 Cule anih cu tidai dawhhna ah a fehsuak ih cu tawkah cite cu a vawrh, cule, «Jehovah in hitin a ti: ‹Hi tidai cu ka damter zo, cumi ihsin thihnak simaw, cĭnnak simaw a um nawn lo ding,›tiin,» tiah a ti. 22 Cutin Elisha ih sim mi ṭawngkam vekin tuihni tiangin tidai cu a dam.

23 Cun anih cu cutawk ihsin Bethel ah a so, cule lamzin ih a fehso rero laiah tleirawl hrekkhat cu khawpi ihsin an ra ih amah hmuhsuamin a hnenah, «Lukawlh pa, fehso aw! Lukawlh pa, fehso aw!» tiah an ti.

24 Cule a heraw ih anmah cu a zoh ih, Jehovah hmin in a camsiat hai. Cule saváwmnu pahnih thingrûl lak ihsin an ra suak ih tleirawl 42 pawl cu an thlek. 25 Cun cutawk ihsin Karmel Tlang ah a feh, cule cutawk ihsin Samaria ah a kir.

3

Israel Parah Moab a Hél

1 Judah siangpahrang Jehoshafat a lal a kum hleiriatnak ah Ahab fapa Jehoram cu Samaria ah Israel siangpahrang ah a cang ih, kum 12 sung a lal. 2 Cule anih cun Jehovah mithmuhah thil ṭhalo a tuah, asinan a nu le a pa ih tuah mi vek cu a si lo, ziangahtile a pa ih rak tuah mi Baal ṭhuamserh cu a hlăwn. 3 Sikhalsehla Israel sual tuahtertu, Nebat fapa Jeroboam-ih sualpawl ah a kăwpbet, cupawl a fehsan lo.

4 Cule Moab siangpahrang Mesha cu tuu vulhtu a si ih, Israel siangpahrang hnenah tuufa no ting khat le tuucang ting khat cu an hmul thawn a pe ṭheu. 5 Asinan hitin a si, Ahab a thih tikah, Moab siangpahrang cu Israel siangpahrang dokalhin a hél.

6 Cu laiah Siangpahrang Jehoram cu Samaria ihsin a suak ih, Israel hmuahhmuah a khawm. 7 Cun feh in mi a thlah ih Judah siangpahrang Jehoshafat hnenah, «Moab siangpahrang cu keimah dokalhin a hél. Moab do dingah ka zawngah na feh lo ding maw?» tiin.

Cule anih in, «Ka fehso ding, keimah cu nangmah, ka mipawl cu na mipawl, ka rángpawl cu na rángpawl tluk an si,» tiah a ti. 8 Cun anih in, «Khui tawk zin in kan feh pei?» tiah a ti.

Cule anih in, «Edom Ramṭhing zin in,» tiah a sang.

9 Cutin Israel siangpahrang cu Judah siangpahrang le Edom siangpahrang thawn an feh ih, ni sarih sung cu tawkah an fehkûal, cule ralkap hrangah le anmah thluntu ṭilvapawl hrang khalah tidai a um lo. 10 Cule Israel siangpahrang in, «E heu law! Jehovah in hi siangpahrang pathum pawl hi Moab kut ih pek dingah a kokhawm hai a si hi,» tiah a ti.

11 Asinan Jehoshafat in, «Amah hmangin Jehovah kan suh theinak dingah, hi tawkah Jehovah-ih profet a um lo maw?» tiah a ti.

Cun Israel siangpahrangih siahhlawhpawl lakih pakhat in a let ih, «Hi tawkah Elijah kut tidai tawih ṭheu tu, Shafat-ih fapa Elisha a um,» tiah a ti.

12 Cule Jehoshafat in, «Jehovah kamsuakthu cu a hnenah a um a si,» tiah a ti. Curuangah Israel siangpahrang, Judah siangpahrang le Edom siangpahrang pawl cu a hnenah an suk.

13 Cun Elisha in Israel siangpahrang hnenah, «Nang le kei hi ziang pehtlaihawknak so kan neih? Na paih profetpawl hnenah le na nuih profetpawl hnenah feh aw,» tiah a ti.

Cule Israel siangpahrang in a hnenah, «Si lo e, hi siangpahrang pathum pawl hi Moab kut ih pek dingah Jehovah in a kokhawm hai a si,» tiah a ti.

14 Cule Elisha in, «A hmaiih ka din ṭheu mi ralkap rualpawlih Jehovah a nun rori bangin, thungaiten Judah siangpahrang Jehoshafat mithmai zoh lo ningna cu, na lam ka hawi lo ding ih, ka lo hmu fawn lo ding. 15 Asinan atu ah ka hnenah awnmawi tumtu run hruai uh,» tiah a ti.

Cun hitin a si, awnmawi tumtu in a tum tikah a parah Jehovah kut a thleng. 16 Cule anih in, «Jehovah in hitin a ti, ‹Himi phaikuam hi tiluannak kâwr in khatter uh,› tiin. 17 Ziangahtile Jehovah in hitin a ti: ‹Thli nan hmu lo ding ih, ruah khal nan hmu lo ding, sikhalsehla khaih phaikuam cu tidai in a khat ding, cutin nanmah, nan sumhnám le nan ṭilva pawl in nan in ding.› 18 Cule himi hi Jehovah mithmuhah thil fate men a si. Amah in nan kut ah Moab-mipawl khal a lo pe ding. 19 Cun kulh nei khawpi kip le khawpi ṭhabik bik nan siatsuah ding ih, thing ṭha hmuahhmuah nan hauthlu ding, cule tihna kip nan phit ding ih, lungto thawn ram ṭhatnak hmun kip nan siatsuah ding a si,» tiin.

20 Cule zing ah hitin a si, Thlairawl Thilhlăn a cût tikah, zoh hnik, Edom zin ihsin tidai a luang ih, cuih ram cu tidai in a khat. 21 Cule Moab-mipawl hmuahhmuah in anmah do dingin siangpahrangpawl an thleng ti an theih tikah, ralthuam keng thei mi hmuahhmuah le a tlun lam pawl cu fĭnkhawmawin, ramri ah an ding. 22 Cun annih cu zingten an tho, cule tidai parah ni a tlang; Moab-mipawl in tidai cu thisen vekih sen in khat lam ral in an hmu. 23 Cule annih in, «Himi hi thisen a si, siangpahrangpawl pakhat le pakhat satawin an thataw a si rori ding, curuangah atu ah ralthillawn cu Moab ta a si!» tiah an ti.

24 Cun Israel ṭanhmun khuarnak an thlen tikah, Israel-mipawl cu an tho ih, Moab-mipawl cu an sat, cutin annih cu an hmaiah an tlân ih, Moab-mipawl thatin an ram ah an lut. 25 Cun khawpipawl an siatsuah ih, mi kip in ram ṭhatnak hmun ah lungto pakhat cio an hlăwn ih, an khatter, tihna hmuahhmuah an phit ih, thing ṭha hmuahhmuah an hauthlu. Kir Haraseth-ih lungtopawl cu an tān ta. Cumi hman cu herhli saitupawl in an kulh ih an that.

26 Cule Moab siangpahrang in a hrangah doawknak a nasatuk ti a hmuh tikah, Edom siangpahrang pahtlăng dingin a hnenah ralnâm kengtu mipa 700 a hruai, asinan an ti thei lo. 27 Cun amah aiawhih uktu ding a fapa upabik a hruai ih, kulh parah Meiur Thilhlăn ah a hlan, cule Israel parah an ai a thăwk ciamco. Cuticun annih cu a hnen ihsin an fehsuak ih anmai ram ah an kir.

4

Elisha le Nuhmeinuih Hriak

1 Profet fapapawlih nupipawl lakih nunau pakhat in Elisha hnenah auin, «Na siahhlawh ka pasal a thi zo ih, na siahhlawh in Jehovah a ṭihzia cu na thei ko. Lei a baknak pa in a sál dingah ka fapa pahnih la dingin a ra,» tiah a ti.

2 Cun Elisha in a hnenah, «Na hrangah ziang ka tuah ding? Inn sungah ziang na nei, i sim aw?» tiah a ti.

Cule anih in, «Na siahhlawhnu in hriak thâwl khat ti lo cu inn ah zianghman a nei lo,» tiah a ti.

3 Cutikah anih in, «Feh awla, na innhnenpawl hmuahhmuah hnen ihsin bungbel, a lawng mi bungbelpawl va sâng aw, málte lawng sang hlah. 4 Inn sung na luh tikah nangmah le na fapapawl dungih sângka khar aw. Cun cumi cu cuih bungbelpawl hmuahhmuah sungah thun awla a khat mipawl a dangah ret aw,» tiah a ti.

5 Cule nuhmeinu cu Elisha hnen ihsin a feh ih amah le a fapapawl dungih sângka cu a khar, a fapapawl cun bungbelpawl cu a hnenah an rak keng ih, anih in a thun vivo. 6 Cule hitin a si, bungbelpawl an khah tikah anih in a fapa hnenah, «Bungbel dang i rak kĕn aw,» tiah a ti.

Cule a fapa in a hnenah, «Bungbel dang a um nawn lo,» tiah a ti. Cule hriak cu a káng.

7 Cun nuhmeinu cu a feh ih Pathian mi cu a sim. Cule anih in, «Feh aw, cuih hriak cu zuar awla na leiba rūl aw. Cule a tāng mi thawn nangmah le na fapapawl cu nung uh,» tiah a ti.

Elisha in Shunemnuih Fapa a Nungsalter

8 Cule hitin a si, ni khat cu milangsar nunaunuih umnak hmun Shunem khua ah Elisha cu a feh ih, nunaunu in rawl mallai ei dingin amah cu a fial. Cule hitin a si, a paltlăng tinten, cu tawkah rawl ei dingin a pial phah ṭheu. 9 Cule nunaunu in a pasal hnenah, «Zoh hnik, in pál phah ringring tu hi Pathian mi mithianghlim a si ti ka thei. 10 Zangfahten, inn tlun pindan fate tuah uh sila, cu tawkah ihkhun pakhat, cabuai pakhat, tokham pakhat le meitoṭhuam pakhat hunsak uhsi. Cule hitin a si ding, kan hnenih a rat tinten cu tawkah a pial phah ṭheu ding,» tiah a ti.

11 Cule ni khat cu hitin a si, cu tawkah a ra ih, inn tlun pindan ah a pial ih cu tawkah cun a zau. 12 Cun a siahhlawh Gehazi hnenah, «Hih Shunam nunaunu hi va ko aw,» tiah a ti. Anih in cu nu cu a va ko ih, a hmaiah a ding. 13 Cule Elisha in a siahlawh hnenah, «Hih nunaunu hnenah, ‹Zoh hnik, nang in hivek kilkhawinak hmuahhmuah thawn in ngaihsak. Ziang ka lo tuahsak ding? Siangpahrang simaw, ralkap bawipi simaw lo biaksak na duh maw?› tiin atu ah a hnenah sim aw,» tiah a ti.

Cu nu in, «Ka mipawl lakah ka cêng ko si,» tiah a sang.

14 Cule Elisha in, «Cuti asile ziang tuahsak sehla a ṭha pei?» tiah a ti.

Gehazi in, «Thungaite ti ah cun amah in fapa a nei lo ih a pasal le a tar fawn,» tiah a sawn.

15 Cule Elisha in, «Amah cu ko aw,» tiah a ti. Amah a kawh tikah, cu nu cu sângka ah a ding. 16 Cule Elisha in, «Hmai kum tuvek tikcu ah fapa na pawm ding,» tiah a ti.

Cun anih in, «Lamlam ah, ka bawipa. Pathian mi, na siahhlawhnu hnenah thuphan per hlah!» tiah a ti.

17 Asinan nunau cu nau a pai ih, a hnenah Elisha ih a sim mi tikcu, cān khiah a thlen tikah fapa a hring.

18 Cule naute cu a ṭhang. Ni khat cu hitin a si, nauhakpa cu a pa hnen, rawl khawmtupawl hnenah a feh. 19 Cule anih in a pa hnenah, «Ka lu, ka lu!» tiah a ti.

Cun a pa in a siahhlawh hnenah, «Amah kha a nu hnenah cawi aw,» tiah a ti.

20 Anih in a cawi ih a nu hnen a thlenpi tikah, nauhak cu a nuih khuk parah sundir tiang a to, cule a thi. 21 Cun nunaunu cu a kaiso ih Pathian miih ihkhun parah nauhak cu a hlum, sângka a kharkhum ih a fehsuak. 22 Cun anih in a pasal a ko ih, «Zangfahten Pathian mi hnenah ka tlân ih ka ra kirsal theinak dingah, tlangvalpawl lakih pakhat le lākpawl lakih pakhat ka hnenah thlah aw,» tiah a ti.

23 Cule anih in, «Ziangah so amah hnenah tuihsun ih na feh ding? Thla Thar a si lo ih, Sabbath khal a si fawn lo,» tiah a ti.

Cule nunaunu cun, «A ṭha ko,» tiah a ti. 24 Cun a lāk a dăm ih a siahhlawh hnenah, «Mâwng aw, feh vivo aw, ka lo sim lo ah cun muangcângin i mawnsak hlah,» tiah a ti. 25 Cule cuticun a fehsuak ih Karmel Tlang ih Pathian mi hnenah a feh.

Cule hitin a si, Pathian mi in hlaral ihsin amah a hmuh tikah a siahhlawh Gehazi hnenah, «Zoh hnik, Shunam nunaunu khi! 26 Zangfahten atu ah amah táwng dingin tlân awla a hnenah, ‹Na dam maw? Na pasal teh a dam maw? Nauhak teh a dam maw?› tiin sut aw,» tiah a ti.

Cule nunaunu cun, «A ṭha» tiah a ti. 27 Cun nunaunu cu tlang parah Pathian mi hnen a thlen tikah, a ke a kai, cule cu nu tûlkiang dingin, Gehazi in a rak naih. Asinan Pathian mi in, «Um ko seh, ziangahtile nasazetin a thinlung a buai a si hi, cumi cu Jehovah in ka hnen ihsin a thup ih, i sim hrih lo,» tiah a ti.

28 Cule nunaunu in, «Ka bawipa, fapa ka lo dil maw? ‹I bum hlah,› ka lo ti a si lo maw?» tiah a ti.

29 Cun Elisha in Gehazi hnenah, «Na tâi ṭawn awla, na kut in ka kianghrăwl keng aw, cule feh aw. Mi pakhat khat na tawn asile amah cu cibaibûk hlah, cun mi pakhat khat in a lo cibai asile amah cu sawn hlah, cule nauhak hmai parah ka kianghrăwl ret aw,» tiah a ti.

30 Cule nauhakpaih nu in, «Jehovah a nun rori le nangmah na nun bangin, ka lo tlansan lo ding,» tiah a ti. Cule Elisha cu a tho ih cu nu cu a thlun. 31 Cule anmai hmaiah Gehazi cu a feh vivo ih nauhakpaih hmai parah kianghrăwl a ret, asinan awka le theihnak a nei nawn lo. Curuangah Elisha táwng dingin a va kirsal ih, «Nauhakpa a ṭhang lo,» tiah a sim.

32 Inn sungih Elisha a luh tikah, zoh hnik nauhakpa cu a rak thi, a ihkhun parih hlum a si. 33 Curuangah a feh ih an pahnih dungih sângka cu a khar, cule Jehovah hnenah thla a cam. 34 Cun Elisha cu a kaiso ih nauhakpaih parah a băwk, a kâ zawnah a kâ, a mit zawnah a mit le a kut zawnah a kut a ret. Cule nauhakpaih parah a dăwkaw ih nauhakpaih taksa cu a hung hlum. 35 Elisha cu a kirsal ih inn sungah dung le hmaiah a fehkûal, cule a kaiso lala ih, nauhakpaih parah a dăwkaw. Cun nauhakpa cu vei sarih a hahthiau ih, a mit a hun meng. 36 Cule anih in Gehazi a ko ih, «Hih Shunam nunaunu hi ko aw,» tiah a ti. Cutin amahnu cu a ko. Cule a hnenih a vung luh tikah, Elisha cun «Na fapa hi cawi aw,» tiah a ti. 37 Cule cu nu cu a lut ih, a ke hramah a tlu, cun lei ah a băwkkhup, cule a fapa cu a cawi ih a fehsuak.

Elisha in Rawl a Thianfai

38 Cule Elisha cu Gilgal ah a kir, cule cuih ram ah mangṭam a rak um. Cun a hmaiah profet fapapawl an to ih, a siahhlawh hnenah, «Bel tumpi toh awla, profet fapapawl hrangah cencerh sûang aw,» tiah a ti. 39 Cule mi pakhat cu thlai ṭăwt dingin ló ah a fehsuak, cule ramlak hri a va hmu, cumi ihsin ramlak ûm pawm khat a ṭăwtkhawm. Cule cupawl cu ziang a si ti an thei lo nân, cencerh bel sungah a hmál. 40 Cun cumi cu ei dingah mipapawl hnenah an suah tikah, hitin a si, cencerh an ei rero laiah an ausuak ih, «Pathian mi, bel sungah thihnak a um!» tiah an ti. Cule an ei thei lo.

41 Cutikah anih in, «Sangphŭt rak keng uh,» tiah a ti. Cule anih in cumi cu bel sungah a thlak ih, «Mipi hrangah suak uhla, ei hai seh,» tiah a ti. Cule bel sungah mi tina thei zianghman a um lo.

Elisha in Mipa 100 Rawl a Do

42 Cun Baal Shalisha ihsin mipa pakhat a ra ih Pathian mi hnenah thlaithar ih tuah mi sang, barli sang hlawm 20 le thlaithar cu dip in a rak keng. Cule anih in, «Mipi hnenah pe awla, ei hai seh,» tiah a ti.

43 Asinan a siahhlawh in, «Ziang e? Himi hi mipa 100 ka hun ding maw?» tiah a ti.

Anih in a simsal ih, «An ei dingah, mipi hnenah cumi cu pe aw, ziangahtile Jehovah in hitin a ti, ‹An ei ding ih, a hlei an nei ding› tiin,» tiah a ti. 44 Cun anih in an hmaiah a hûng, cule an ei ih, Jehovah kamsuakthu vekin a hlei an nei.

5

Miphar Naaman a Dam

1 Siria siangpahrang-ih ralbawipi Naaman cu a bawipaih mithmuhah miropi le upattlak a si, ziangruangahtile amah hmangin Siria hnenah Jehovah in runsuahnak a rak pe ṭheu. Amah cu micak ralṭha khal a si, asinan amah cu a phâr. 2 Cule Siria-mipawl cu a bur a bur in an fehsuak ih, Israel ram ihsin fala tleirawl pakhat ralkaih ah an rak hruai. Cu nu cun Naaman-ih nupi a rian. 3 Cun anih in a bawinu hnenah, «Samaria ih a um mi profet hnenah ka bawipa hi um sehla maw! Ziangahtile amah in a phārnat cu a damter ding,» tiah a ti.

4 Cule Naaman cu a va lut ih, «Israel ram ihsin nunaunute in cutin khatin a ti,» tiah a bawipa cu a sim.

5 Cutikah Siria siangpahrang in, «Atu ah feh aw, cule Israel siangpahrang hnenah ca ka kuat ding,» tiah a ti.

Cule Naaman cu a păwk ih a zawngah ngun talent hra, sui tlep 6000 le hnipuan thlengawknak zun hra a keng. 6 Cun anih in Israel siangpahrang hnenah cakuat a keng, cumi ah cun, «Na hnenah himi cakuat a thlen tikah, zoh hnik, a phārnat na tidamsak dingah na hnenah ka siahhlawh Naaman ka rak thlah a si,» tiih ngan a si.

7 Cule hitin a si, Israel siangpahrang in cakuat a siar tikah a hnipuan a thlek ih, «That dingah le nungter dingah, Pathian maw ka si ih hi pa in ka hnenah a phārnat damter dingah mi pakhat a thlah hi! Curuangah zangfahten ruat hnik uh, anih in keimah thawn toaw dingin ziangti vekin a hawl ti thei uh,» tiah a ti.

8 Cule hitin a si, Israel siangpahrang in a hnipuan a thlek ti Pathian mi Elisha in hna in a theih tikah, siangpahrang hnenah mi a thlah ih, «Ziangah so na hnipuan na thlek? Zangfahten amah cu ka hnenah rater awla, Israel ram ah profet a um ti a thei ding a si,» tiah a ti.

9 Cun Naaman cu a rángpawl le a ránglêng thawn a feh ih, Elisha-ih inn sângka ah a ding. 10 Cule Elisha in a hnenah palai pakhat a thlah ih, «Fehin Jordan tiva ah vei sarih khawlhaw awla, na taksa cu a kēl ah a cangsal ding ih, na thiang ding,» tiah a ti. 11 Asinan Naaman cu thinaithawkin a um ih, a fehhlo, cule, «Zoh hnik, ‹Anih cu ka hnenah a ra rori ding ih, ding tahratin Jehovah a Pathian hmin a ko ding, cule a natnak laiah a kut a văi ding ih, phārnat a damter ding,› tiah ka rak ruat. 12 Damaskas khua ih tivapawl, Abanah le Farpar tla hi Israel ram tidai hmuahhmuah hnakin an ṭhasawn lo maw si? Cupawl ah khawlhawin ka thiang thei lo maw si?» tiah a ti. Cuticun a pial ih thinsosain a fehhlo.

13 Cule a siahhlawhpawl in an ra naih ih a hnenah, «Ka pa, profet in thil khirhkhan sawn tuah dingah lo sim sehla na tuah lo ding maw? Na hnenah, ‹Khawlhaw awla thiang aw,› a lo ti tikah tuah sawn awm a si lo maw?» tiah an ti. 14 Cule anih cu a suk ih, Pathian mi ih sim mi vekin, Jordan tiva sungah vei sarih a hnimaw. Cule a taksa cu nauhak taksa vekin a ṭhasal ih, amah cu a thiang.

15 Cule anih cu Pathian mi hnenah a kir, amah le a hopawl hmuahhmuah thawn, cule a thleng ih a hmaiah a ding, cun anih in, «Zoh hnik, atu ah cun Israel ram siarlo ah, leilung hmuahhmuah ah Pathian a um lo ti ka thei; curuangah atu ah, zangfahten na siahhlawh hnen ihsin laksawng la aw,» tiah a ti.

16 Asinan anih cun, «A hmaiih ka din ṭheu nak Jehovah a nun rori bangin, zianghman ka cohlang lo ding,» tiah a ti. Cule la dingin a ngen nân, anih cun a êl.

17 Cun Naaman in, «Cutin a si lo ahcun, zangfahten na siahhlawh hi lākrang pahnih phur khawp leilung pek si seh, ziangahtile na siahhlawh in Jehovah hnen ti lo ah cun pathian dangpawl hnenah Meiur Thilhlăn siseh, thawinak siseh a hlan nawn lo ding. 18 Cuticingin himi thil ah hin Jehovah in na siahhlawh hi ngaithiam hram seh. Ka bawipa cu Rimmon temple ah pathian be dingin a feh tikah, anih cun ka kut a ngauhsan ih kei cu Rimmon temple sungah ka kûn, cule Rimmon temple sungih ka kun tikah, himi thil ah hin Jehovah in na siahhlawh ngaithiam hram seh,» tiah a ti.

19 Cun anih in a hnenah, «Hnangamten feh aw,» tiah a ti. Cutin anih cu a hnen ihsin hla tuk a feh lo.

20 Sikhalsehla Pathian mi Elisha-ih siahhlawh, Gehazi cun, «Zoh hnik, ka bawipa cun Siria-mi Naaman cu a rak ken mi thil cohlang loin a suah. Jehovah a nun rori bangin amai dungah ka tlân dingih a hnen ihsin thil hrekkhat ka la ding,» tiah a ti. 21 Cule Gehazi in Naaman cu a dawi, Naaman in a dungih tlân rero a hmuh tikah amah táwng dingin ránglêng ihsin a ṭum ih, «Ziangkim a ṭha maw?» tiah a ti.

22 Cule anih in, «Ziangkim a ṭha. Ka bawipa in i thlah ih, ‹Zoh hnik, atu teah Efraim tlang ram ihsin profet fapa tlangval pahnih ka hnenah an ra thleng. Zangfahten ngun talent khat le sinfen thlengawknak zun hnih in anmah cu pe aw,› a ti,» tiah a ti.

23 Cun Naaman in, «Zangfahten talent hnih la aw,» tiah a ti. Cule amah cu a ngen ih dip pahnih sungah ngun talent hnih cu thlengawknak sinfen zun hnih thawn a tuam ih a siahhlawh pahnih hnenah a hlan. Cule a hmaiah cupawl cu an rak phur.

24 Kulhhnget a thlen tikah an kut ihsin a lâk ih inn sungah a ret, cun mipapawl cu a fehter hai ih, an fehsuak. 25 Cule anih cu a lut ih a bawipaih hmaiah a ding. Elisha in a hnenah, «Khuitawk ah na feh, Gehazi?» tiah a ti.

Cule anih in, «Na siahhlawh hi khui hmanah a feh lo,» tiah a ti.

26 Cun anih in, «Mi pakhat in nangmah lo táwng dingin a ránglêng ihsin a kir laiah ka thinlung cu na hnenah a feh a si lo maw? Paisa siseh, hnipuan siseh, olif hmuanpawl le sabit hmuanpawl siseh, tuupawl le câwcangpawl siseh, siahhlawh mipapawl le siahhlawh nunaupawl siseh, cohlan cān a si maw si? 27 Curuangah Naaman-ih phārnat cu na hnenah le na tesinfapawl hnenah kumkhuain a bĕt ding,» tiah a ti. Cule a hmai ihsin vur vekih varih phārin a fehsuak.

6

Hreifáng a Lâng

1 Profet fapapawl in Elisha hnenah, «Zoh hnik, nangmah thawi kan cēnnak hmun hi kan hrangah a fate tuk. 2 Zangfahten Jordan tiva ah feh uh sila, cutawk ihsin thingtlâng pakhat cio la fingfing in, cu tawkah kan cēnnak ding hmun tuah uhsi,» tiah an ti.

Cule anih in, «Feh uh,» tiah a sâng hai.

3 Cun pakhat in, «Zangfahten na siahhlawhpawl zawngih ra feh ve ding rem ti hram aw,» tiah a ti.

Cule anih in, «Ka feh ding,» tiah a sâng. 4 Cutin an zawngah a feh. Jordan an thlen tikah, thingkungpawl an hauthlu. 5 Asinan mi pakhat cu thing a hau rero laiah, hreifáng cu ti sungah a tla, cule a ausuak ih, «A ze law, bawipa! Ka sancawp si maw a si,» tiah a ti.

6 Cule Pathian mi cun, «Cumi cu khuitawkah a tla?» tiah a ti. Anih in a tlaknak zawn cu a hmuh. Cule anih in fung pakhat a sattán ih, cu tawkah cun a hlăwn, cule thir cu a lâng. 7 Cule anih in, «Na hrangah lasuak aw,» tiah a ti. Cule a kut a suah ih cumi cu a la.

Siria Ralkappawl Mitcâwtnak

8 Cule Siria siangpahrang in Israel dokalhin doawknak a tuah, cule a siahhlawhpawl a răwn ih, «Ka riahhmun cu cutawk kha tawkah a si ding,» tiah a ti. 9 Cule Pathian mi in Israel siangpahrang hnenah mi a thlah ih, «Hitawk hmun pál lo dingin ralring uh, ziangahtile cu tawkah Siria-mipawl an suk,» tiah a ti. 10 Cun Israel siangpahrang in, Pathian mi in amah a rak sim le ralrin a peknak hmun ah mi a thlah ih vei hnih vei khat lawng si loin a him phah ṭheu.

11 Curuangah himi thil in nasazetin Siria siangpahrang thinlung a buaiter, cule a siahhlawhpawl a ko ih an hnenah, «Kan lakah zopawl hi saw, Israel siangpahrang lamih ṭang, in hmuh lo ding maw?» tiah a ti.

12 Cule a siahhlawhpawl lakih pakhat in, «Zohman an ṭang lo, Maw siangpahrang ka bawipa, Israel ram ih a um mi profet Elisha lawngin na ihnak pindan ih na ṭawng mi ṭawngkampawl tla Israel siangpahrang a sim ṭheu a si,» tiah a ti.

13 Cule anih in, «Mi ka thlah ih, ka kaihngah theinak dingah, feh uhla, khuiah a um ti va thlingthla uh,» tiah a ti.

Cule, «Zoh hnik, Dothan khua ah a um,» tiah amah cu an sim.

14 Curuangah cu tawkah rángpawl le ránglêngpawl le ralkap tam zet a thlah, cule annih cu zan ah an thleng ih, khua cu an kulh. 15 Cule Pathian miih siahhlawh cu zingten a tho ih a va suak, zoh hnik, ralkappawl cun khua cu rángpawl le ránglêngpawl thawn an kulh. Cule a siahhlawh in a hnenah, «Ai maw, ka bawipa! Ziangtin so kan ti ding?» tiah a ti.

16 Cun anih in, «Ṭih hlah, ziangahtile kan lamṭangtupawl cu an lamṭangtupawl hnakin an tamsawn a si,» tiah a ti. 17 Cule Elisha cu thla a cam ih, «Jehovah, amah in a hmuh theinak dingah a mit vângter hram aw,» tiah a ti. Cun Jehovah in tlangvalpaih mit cu a vângter, cule a hmu. Cun zoh hnik, Elisha kiangkap hmuahhmuah ah tlang cu rángpawl le meisa ránglêngpawl in an khat reprep. 18 Cule a hnenih Siria-mipawl an ra suk tikah, Elisha cu Jehovah hnenah thla a cam ih, «Hi miphunpawl hi mitcâwtnak in vaw hai hram aw,» tiah a ti. Cule anih in Elisha-ih ṭawngkam vekin mitcâwtnak in a vuak hai.

19 Cun Elisha in an hnenah, «Himi cu lamzin a si lo, khawpi khal a si lo. I thlun uhla, nan hawl mi pa hnenah ka lo hruai ding,» tiah a ti hai. Samaria lam sawnah anmah cu a hruai.

20 Cule hitin a si, Samaria an luh tikah, Elisha in, «Jehovah, an hmuh theinak dingah hi pawlih mit vângter aw,» tiah a ti. Cule Jehovah in an mit a vângter ih Samaria khaw sungih um an si ti an hmu!

21 Cun Israel siangpahrang in anmah cu a hmu hai ih anih in Elisha hnenah, «Ka pa, ka that hai pei maw? Ka that hai pei maw?» tiah a ti.

22 Asinan anih in, «Na that hai lo pei. Na ralnâm le na thál in na ralkaih mi na that ding maw? An ei, an in ih an bawipa hnenih an feh theinak dingah an hmaiah rawl le tidai hŭn hai aw,» tiah a ti. 23 Cun an hrangah puai ropi a timtuah ih, an ei, an in hnuah anmah cu a thlahliam hai, cule an bawipa hnenah an feh. Cutin Siria-mi misîmtupawl cu Israel ram ah an ra nawn lo.

Siria-mipawl in Samaria an Kulh

24 Cule himi hnuah hitin a si, Siria siangpahrang Ben-Hadad in a ralkap hmuahhmuah a khawm, cule a hung so ih Samaria a kulh. 25 Cule Samaria ah mangṭam nasazet a tlung, cun zoh hnik, lāk lu pakhat cu ngun shekel 80 in le thuro êk akab hmun li ṭhen ih hmun khat cu ngun shekel nga ih zuar a si tiang an kulh ringring.

6:25a kab: kab khat cu no li hrawng a si.

26 Cun Israel siangpahrang cu khawkulh parih a feh rero laiah a hnenah nunau pakhat a ausuak ih, «In bawm aw, ka bawipa, Maw siangpahrang!» tiah a ti.

27 Cule anih in, «Jehovah in a lo băwm lo ah cun, khuitawkah na hrangah băwmnak ka hmu ding? Hruihhmun ihsin maw, sabit sawrnak khur ihsin so?» tiah a ti. 28 Cun siangpahrang in cu nu hnenah, «Ziang in so lo buaiter?» tiah a ti.

Cule anih in, «Hih nunaunu in ka hnenah, ‹Tuihsun ah kan ei dingah na fapa hi thawh aw, cule thaizing ah ka fapa kan ei ding› tiah i ti. 29 Curuangah ka fapa cu kan sûang ih kan ei. Cule a thaisun ah cu nu hnenah, ‹Kan ei dingah na fapa thawh ve thlang aw,› tiah ka ti; asinan anih in a fapa cu a thup,» tiah a ti.

30 Cule hitin a si, siangpahrang in nunaunuih ṭawngkampawl a theih tikah, a hnipuan a thlek, cule khawkulh parih a feh rero laiah mipi in amah cu an thlir ih, zoh hnik, sunghruh ah a taksa depah buri-hnipuan a hruk. 31 Cun anih in, «Tuihsun ah Shafat fapa Elisha-ih lu cu a parih a um hrih asile, Pathian in cuvekin i tuah seh, cuhnakih nasa khalin!» tiah a ti.

32 Asinan Elisha cu a inn sungah a to, cule upapawl a zawngah an to. Cun siangpahrang in a hmaiah mi pakhat a thlah, asinan a hnenih palai a thlen hlanah upapawl hnenah, «Hi laithat fapa in ka lu lahlo dingin ziangti vekin mi a rak thlah ti nan thei maw? Zoh hnik uh, palai a thlen tikah sângka khar uhla, sângka ah amah rak kaibĕt uh. A dung ihta cu a bawipaih ke thâwm a si lo maw?» tiah a ti.

33 Cule an hnenih a ṭawng rero laiah, zoh hnik, palai cu a hnenah a thleng. Cule siangpahrang in, «Thungaiten hi vanduainak cu Jehovah hnen ihsin a si, Jehovah cu ziangahso maw ka hngah hrih ding?» tiah a ti.

7

1 Cun Elisha in, «Jehovah kamsuakthu ngai aw, Jehovah in hitin a ti: ‹Thaizing atu tikcu ah sangvut phŭt aseah khat cu shekel khat ah le barli sangvut seah hnih cu shekel khat ah Samaria kăwtka ah zuar a si ding,› tiin a ti,» tiah a ti.

7:1a seah: 1Sp 18:32 simfiangnak zoh aw.

2 Cule siangpahrang ih a kut a hngauhsan mi hotu pakhat in Pathian mi cu a sawn ih, «Zoh hnik, Jehovah in van ah tukvirhpawl a tuah hmanah hi thil cu a cang thei ding maw?» tiah a ti.

Cule anih in, «Thungaiin, na mit in na hmu tengteng ding, asinan cumi ihta na ei lo ding,» tiah a ti.

Siria-mipawl an Tlân

3 Cun kăwtsuah ah miphar pali an um, cule pakhat le pakhat, «Ziangah so maw kan thih tiang hitawk ih kan to rero ding? 4 ‹Khawpi sungah kan lut ding,› ti sehla khawpi sungah mangṭam a um si ih, cu tawkah kan thi zik si. Cule hi tawkah kan to asile kan thi thotho zik si. Curuangah atu ah, ra uh, Siria ralkappawl hnenah ap aw uhsi. Annih in nungdamih in ret asile, kan nung pei ih, in thah asile kan thi mai pei,» tiah an tiaw. 5 Cule Siria-mipawlih ṭanhmun khuarnak ih feh dingin khawthim zawngah an tho ih, Siria-mipawlih ṭanhmun khuarnak tăwntir an va thlen tikah, zoh hnik, cu tawkah zohman an um lo. 6 Ziangahtile Bawipa in Siria-mipawl cu ránglêngpawl thâwm le rángpawl thâwm, ralkap tam zet thâwm a theiter hai, cule pakhat le pakhat, «Zoh hnik, Israel siangpahrang in kanmah do dingah Heth-mipawlih siangpahrangpawl le Izip-mipawlih siangpahrangpawl a ruai a si hi!» tiah an tiaw. 7 Curuangah annih cu an tho ih, khawthim zawngah an tlân, cule an thlampawl, an rángpawl, an lākpawl tlansan le an ṭanhmun khuarnak tiang a kel vekten tânin an nunnak dingah an tlân. 8 Cule hi mipharpawl cu ṭanhmun khuarnak tăwntir an thlen tikah, thlam pakhat sungah an lut ih an ei ih an in, cun cumi ihsin ngun le sui le hnipuan an phur, cule an feh ih an thup. Cule an kirsal ih, thlam dangah an feh ih cutawk ihsi khalin ziangmaw zât an la, cule an feh ih an thup.

9 Cun pakhat le pakhat, «Thil kan tidik lo. Tuihni hi thuthang ṭha thlen ni a si ih, daiteih kan um men hi. Zing khawvan tiang kan hngak a si ahcun, kan parah dāntatnak a thleng ding. Curuangah atu ah, ra uh, feh uh sila, siangpahrang sungkua sim uhsi,» tiah an tiaw. 10 Cule an feh ih khawpi kăwtkakiltupawl an ko ih an sim, «Siria-mipawlih ṭanhmun khuarnak ah kan feh ih, zoh hnik uh, zohman an um lo, minung thâwm a um lo, hren mi rángpawl, lākpawl le a kel vek teih um thlampawl lawng an um,» tiah an ti. 11 Cule kăwtkakiltupawl in an kosuak ih, a sungih siangpahrang sungkua cu an sim.

12 Cun siangpahrang cu zan ah a tho ih, a siahhlawhpawl hnenah, «Atu ah Siria-mipawl in kan hnenih an tuah mi ka lo sim ding. Annih in kan ril a râwng ti an thei, curuangah ramlak ah relh dingin ṭanhmun khuarnak ihsin an fehsuak, ‹Khawpi ihsin an ra suah tikah nung cingin anmah kan kai ding ih, khawpi sungah kan lut ding,› an ti a si,» tiah a ti.

13 Cule a siahhlawhpawl lakih pakhat in a sawn ih, «Zangfahten, mipa ziangmaw zât in khawpi sungih a tāng mi rángpawl lak ihsin a tāng lai mi panga hruai hai seh. Zoh hnik, annih cu khawpi sungih a tāng mi Israel mipi zate tluk simaw, siatralter a si mi Israel mipi zate bangtuk an si ding. Curuangah anmah cu thlah uh sila, zoh uhsi,» tiah a ti.

14 Curuangah rángpawl thawn ránglêng pahnih an hruai ih, siangpahrang in anmah cu Siria ralkappawl dungah a thlah hai ih, «Feh in va zoh uh,» tiah a ti. 15 Cule Jordan tiva tiang an dung ihsin an feh ih, zoh hnik, zinpi hmuahhmuah cu sinfenpawl le an manhlap ruangih Siria-mipawl ih an hlăwn mi hriamhreipawl in a khat. Cule palaipawl cu an kir ih siangpahrang an sim.

16 Cun mipi cu an fehsuak ih Siria-mipawlih ṭanhmun khuarnak cu an răm. Cule Jehovah kamsuakthu vekin, sangvut phŭt seah khat cu shekel khat ah le barli sangvut seah hnih cu shekel khat ah an zuar. 17 Cun siangpahrang ih a kut a hngauhsan mi bawi cu kăwtka ṭuanvo latu ah a ruat. Asinan a hnenih siangpahrang a rat laiih a ṭawngtu Pathian mi ih a rak sim bangin, mipi in amah cu kăwtka ah an pál ih a thi.

18 Cule Pathian mi in siangpahrang hnenah, «Barli sangvut seah hnih cu shekel khat ah le sangvut phŭt seah khat cu shekel khat ah thaizing tuvek tikcu ah Samaria kăwtka ah zuar a si ding,» tiih a ti tikah, 19 cuih bawi in Pathian mi cu a sâng ih, «Atu ah zoh hnik, Jehovah in van ah tukvirhpawl tuah hmansehla, cuvek thil a cang thei pei maw?» tiin a rak sâng.

Cule anih in, «Thungaiten, na mit in na hmu ding nân, cumi ihta na eingah lo ding,» tiin a ti. 20 Cule a parah cutivek cekci cun a thleng, ziangahtile amah cu mipi in kăwtka ah an pál ih, a thi a si.

8

Shunnemnuih Ló Pekkirsalnak

1 Elisha in a fapa a nunter mi nunaunu hnenah a sim ih, «Tho awla feh aw, nangmah le na sungkua cu, na um theinak hmun pauhpauh ah va cām aw. Ziangahtile Jehovah in mangṭam a ko zo ih, ram sungah kum sarih sung a thleng ding,» tiah a ti. 2 Cule nunaunu cu a tho ih Pathian mi ih sim vekin a tuah, cule a sungkua thawn a feh ih Filisṭia-mipawlih ram ah kum sarih sung an va cêng.

3 Kum sarih a cem tikah, hitin a si, nunaunu cu Filisṭia-mipawlih ram ihsin a kir ih a inn hrang le a ló hrang siangpahrang dil dingin a feh. 4 Cule siangpahrang in Pathian miih siahhlawh Gehazi cu a bia ih, «Zangfahten, Elisha ih thil ropi a tuah mipawl hmuahhmuah i sim aw,» tiah a ti. 5 Cun hitin a si, Elisha in mithi a nuntersal thu Gehazi in siangpahrang a sim rero laiah, zoh hnik, a fapa a nuntersal mi nunau cun siangpahrang hnenah inn le ló a ra dil. Cule Gehazi in, «Ka bawipa, Maw siangpahrang, hi nunaunu hi a si, hihi a fapa, Elisha ih a nuntersal mi cu a si,» tiah a ti. 6 Cule siangpahrang in nunaunu a suh tikah, nunaunu cun a sim.

Cun siangpahrang in cu nuih hrangah bawi pakhat a ruat ih, «Cu nuih ta hmuahhmuah le ram a suahsan ni ihsin tu tiangih ram in a suah mi hmuahhmuah cu pesal thluh aw,» tiah a ti.

Ben-Hadad Thihnak

7 Elisha cu Damaskas ah a ra, cule Siria siangpahrang Ben-Hadad cu a dam lo. Cule, «Hi tawkah Pathian mi a thleng,» tiah amah cu an sim. 8 Siangpahrang in Hazael hnenah, «Na kut in laksawng keng awla, Pathian mi táwng dingin feh aw, cule amah hmangin, ‹Hih nathri ihsin ka damsal pei maw?› tiah Jehovah sut aw,» tiah a ti. 9 Cutin Hazael cu amah táwng dingin a feh ih, a zawngah laksawng, Damaskas-ih thil ṭha tinkim, kalauk 40 phur a keng. Cule a va thleng ih Pathian mi hmaiah cun a ding, cule, «Na fapa Ben-Hadad, Siria siangpahrang in, ‹Hih nathri ihsin ka damsal pei maw?› tiin na hnenah i thlah,» tiah a ti.

10 Cule Elisha in a hnenah, «Feh aw, ‹Na damsal tengteng ding,› tiin amah sim aw. Sikhalsehla a thi hrimhrim ding ti Jehovah in i rak hmuh zo,» tiah a ti. 11 Cun anih cun a ning a zah tiangin a hmai a zoh ringring ih Pathian mi cu a ṭap.

12 Cule Hazael in, «Ziangah ka bawipa cu a ṭap?» tiah a ti.

Anih in, «Ziangruangahtile Israel tefapawl hnenih na tuah ding mi thil ṭhalo ka thei: An ralhruangkulhpawl meisa in na ur ding ih, an tlangvalpawl cu ralnâm in na that ding, cule an fātepawl na hlăwn ding ih, naupai mi nunaupawl cu na raitlek ding,» tiah a sawn.

13 Cule Hazael in, «Na siahhlawh, uico men hin hivek thil nasa a tuah ding maw si?» tiah a ti.

Cule Elisha in, «Siria tlunah siangpahrang ah na cang ding ti Jehovah in i rak hmuh zo,» tiah a sawn.

14 Cun anih cu Elisha hnen ihsin a suak ih, «Elisha in na hnenah ziang a sim?» titu a bawipa hnenah a thleng.

Cule anih in, «Na dam tengteng ding i ti,» tiah a sawn. 15 Asinan a thaisun ah hitin a si, anih cun puan sahpi a la ih tidai ah a hnim, cule a thih theinak dingah cumi cun a hmai a tuamsak; cule a aiawhin Hazael a lal.

Judah Siangpahrang Jehoram

16 Cule Israel siangpahrang Ahab fapa Joram a lal a kum ngatnak ah Judah siangpahrang Jehoshafat fapa Jehoram in uk a thăwk (cu laiah Jehoshafat cu Judah siangpahrang a si). 17 Siangpahrang a hung si tikah amah cu kum 32 a si ih, Jerusalem ah kum 8 sung a lal. 18 Cule Ahab sungza ih an rak tuah vekin, anih cun Israel siangpahrangpawlih lamzin a zawh, ziangahtile nupi ah Ahab fanu a nei; Jehovah mithmuhah thil ṭhalo a tuah. 19 Cuticingin a siahhlawh David ruangah, amah le a fapapawl hnenah tlaitluanin meito pek a tiamkam vekin, Jehovah in Judah ram cu siatsuah a duh lo.

20 Amai san ah Edom cu Judah thuneihnak dokalhin a hél ih, anmah uktu ding siangpahrang an tuah. 21 Cule Joram cu a ránglêngpawl hmuahhmuah thawn Zair khua ah a feh. Cun zan ah a tho ih, amah le a ránglêng ralbawipawl kulhtu Edom-mipawl cu a do ih ralkappawl cu anmai thlampawl ah an tlânsia. 22 Cuticun Edom cu tuihni tiangin Judah thuneihnak dokalhin a hél. Cule cuih cān ah Libnah khua khal an hél ve.

23 Cun a tāng lai mi Joram-ih căngvaihnakpawl le a tuah mi hmuahhmuah cu Judah siangpahrangpawlih sansiarnak cazual ah ngan an si lo maw? 24 Cun Joram cu a pupápawl hnenah a cawl ih, David Khawpi ah a pupápawl hnenah phum a si. Cun a fapa Ahaziah cu a aiah a lal.

Judah Siangpahrang Ahaziah

25 Israel siangpahrang Ahab fapa Joram a lal a kum hleihnihnak ah Judah siangpahrang Jehoram fapa Ahaziah in uk a thăwk. 26 Ahaziah cu siangpahrang a can tikah kum 22 a si ih, Jerusalem ah kum khat a lal. A nuih hmin cu Athaliah, Israel siangpahrang Omri-ih fanu a si. 27 Cule anih cu Ahab sungza lamzin a zawh ih, Ahab sungza vekin, Jehovah mithmuhah thil ṭhalo a tuah, ziangahtile anih cu Ahab sungza mâkpa a si.

28 Cule anih cu Siria siangpahrang Hazael do dingin Ahab fapa Joram hnenah Ramoth Gilead khua ah a feh, cule Siria-mipawl in Joram cu an tuahmawh. 29 Siangpahrang Joram cu Siria siangpahrang Hazael a do laiih, Siria-mipawl in Ramah khua ih hma an baih mi hriamhmapawl ihsin damsal dingah Jezreel khua ah a fehkir. Cule Jehoram fapa Judah siangpahrang Ahaziah cu Jezreel khua ah Ahab fapa Joram leng dingin a feh, ziangruangahtile anih cu a nâ.

9

Israel Siangpahrang Jehu

1 Cule Elisha in profet fapapawl lakih pakhat a ko ih a hnenah, «Na tâi khap awla, na kut ah hi hriak bâwm hi keng awla, Ramoth Gilead khua ah feh aw. 2 Cun cuih hmun na thlen tikah, Nimshi fa Jehoshafat-ih fapa Jehu va hawlsuak aw, cule va lut awla, a unaupawl lak ihta thoterin, pindan sungta ah amah cu hruai aw. 3 Cun hriak bâwm la awla, a lu parah burh aw, cule, ‹Jehovah in hitin a ti: «Israel tlunih siangpahrang ah hriak ka lo thih zo,» tiin,› ti aw. Cun sângka áwng awla tlân aw, muangcâng hlah,» tiah a ti.

4 Cun profet-ih siahhlawh tlangval cu Ramoth Gilead khua ah a feh. 5 Cule a va thlen tikah, cu tawkah ralbawipawl an rak tokhawm ih anih in, «Ralbawipa, na hrangah thucah ka nei,» tiah a ti.

Jehu in, «Kanmah lakih zo bik saw?» tiah a ti.

Cule anih in, «Ralbawipa, nangmah hrangah,» tiah a ti. 6 Cun a tho ih inn sungah a lut. Cule a lu parah hriak a burh ih a hnenah, «Israel-ih Pathian Jehovah in hitin a ti: ‹Jehovah-ih minungpawl tlun, Israel tlunih siangpahrang ah hriak ka lo thih zo. 7 Ka siahhlawh profetpawlih thisen le Jezebel kut ih Jehovah siahhlawhpawl hmuahhmuah ih thisen phuba ka lâk theinak dingah, na bawi Ahab sungza na that pei. 8 Ziangahtile Ahab sungza pumpi cu an hlorál ding a si, cule Israel ram ih mipa hmuahhmuah, sál siseh, miluat siseh Ahab ihsin ka sâtcat thluh ding. 9 Cuticun Ahab sungza cu Nebat fapa Jeroboam-ih sungza le Ahijah fapa Baasha-ih sungza vekah ka tuah ding. 10 Uicopawl in Jezebel cu Jezreel lei parah an ei ding ih, amah phumtu ding zohman an um lo ding,› tiin,» tiah a ti. Cule sângka a áwng ih a tlân.

11 Cun Jehu cu a bawipaih siahhlawhpawl hnenah a ra suak ih mi pakhat in a hnenah, «Ziangkim a ṭha maw? Ziangahso hi mi-âpa hi na hnenih a rat?» tiah a ti.

Cule anih in an hnenah, «Nannih in cu pa le a sim mi thu cu nan theih kha,» tiah a ti.

12 Cule annih in, «Kan thei lo! Atu ah in sim aw,» tiah an ti.

Cun anih in, «Cutin khatin ka hnenah a ṭawng, ‹Jehovah in hitin a ti: Israel tlunih siangpahrang ah hriak ka lo thih zo,› tiin, a ti,» tiah a ti.

13 Cun mi kip mai sinfen ciar an hlít hlauhhlo ih, kailawn tlun amai hnuaiah an phah, cule tuupa ki an phaw ih, «Jehu cu siangpahrang a si!» tiah an ti.

Israel Siangpahrang Joram Thah a Si

14 Nimshi fa Jehoshafat-ih fapa Jehu in Joram a phiarthup. Joram cun Ramoth Gilead khua cu amah le Israel hmuahhmuah thawn Siria siangpahrang Hazael lak ihsin a hum. 15 Asinan Siangpahrang Joram cu Siria siangpahrang Hazael thawi an doawk laiih, Siria-mipawl ih an rak tuahmawh mi hriamhma kha tidamaw dingin Jezreel ah a kir. Cule Jehu in, «Cumi cu nan lungput a si ahcun, zohman Jezreel khua ah hi thu hi sim dingah khua ihsin fehsuakter hlah uh,» tiah a ti. 16 Cule Jehu cu ránglêng parah a to ih Jezreel ah a feh, ziangahtile cu tawkah Joram cu hlŭm a si, cule Judah siangpahrang Ahaziah cu Joram zoh dingah a rung suk.

17 Cule Jezreel ih ralvennak parah kiltu pakhat a ding ih, anih cun Jehu-ih hopawl ra thleng a hmu ih, «Mipa rual ka hmu,» tiah a ti.

Cule Joram in, «Anmah táwng dingah rángtothiam pakhat thlah awla, ‹Remdaihnak a si maw?› va ti seh,» tiah a ti.

18 Cutin rángtothiam cu amah táwng dingin a feh ih, «Siangpahrang in hitin a ti: ‹Remdaihnak a si maw?› tiin,» tiah a than.

Cule Jehu in, «Remdaihnak cu nang ih theih ding ziang a um? Heraw awla i thlun aw,» tiah a ti.

Cule ralvengtu in, «An hnenah palai a feh nân a kirsal lo,» tiah a ti.

19 Cun a pahnihnak rángtothiam a thlah lehsal ih, an hnenah a va thleng, cule, «Siangpahrang in hitin a ti: ‹Remdaihnak a si maw?› tiin,» tiah a ti.

Cule Jehu in, «Remdaihnak cu nang ih theih ding ziang a um? Heraw awla i thlun aw,» tiah a sawn.

20 Cule ralvengtu in a phuang ih, «An hnenah a va feh ih a kirsal lo, a mawndān cu Nimshi fapa Jehu ih mawndān vek a si, ziangahtile anih cun nasatakin a mâwng!» tiah a ti.

21 Cun Joram in, «Timtuah aw uh,» tiah a ti. Cule a ránglêng cu tiar cia-in tuah a si. Cun Israel siangpahrang Joram le Judah siangpahrang Ahaziah cu anmai ránglêng veve in an fehsuak. Jehu táwng dingin an fehsuak ih, Jezreel-mi Naboth-ih hmuan ah amah cu an va táwng. 22 Cule hitin a si, Joram in Jehu a hmuh tikah, «Jehu, remdaihnak a si maw?» tiah a ti.

Cule anih in, «Na nu Jezebel-ih hlawhhlannak le a thilcamthiamnak a tam tuk laiah ziang remdaihnak so maw a um ding?» tiah a ti.

23 Cun aJoram cu a heraw ih a tlân, cule Ahaziah hnenah, «Ahaziah, phiarthupnak a si!» tiah a ti.

9:23a Joram: Câng 24 ih Jehoram kha a si.

24 Cule Jehu in a tha neih hmuah in a thál a nawp ih Jehoram-ih liang le liang karlakah a saingah, cule thálfung cu a lung ah a tlăngsuak, amah cu a ránglêng ah a tlu. 25 Cun Jehu in a ralkap hotu Bidkar hnenah, «Amah cu la awla, Jezreel-mi Naboth-ih ló ah hlăwn aw, ziangahtile nangmah le keimah in a pa Ahab dungih rángparih kan to laiah a parah Jehovah-ih thucah kha mang aw. 26 Jehovah in ‹Thungaiten, mizansun ah Naboth thisen le a fapapawlih thisen ka hmu,› tiah a ti, cule Jehovah thotho in, ‹Hih hmun ah phuba ka lo sam ding,› tiah a ti leh. Curuangah atu ah, Jehovah kamsuakthu vekin amah cu la awla, hi hmun ah hin hlăwn aw,» tiah a ti.

Judah Siangpahrang Ahaziah Thah a Si

27 Cumi cu Judah siangpahrang Ahaziah in a hmuh tikah, Beth Haggan zinpi lamah a tlân. Cule amah cu Jehu in a dawi ih, «Ranglêng sungah amah khal sai uh,» tiah a ti. Cule Ibleam kiang, Gur lam sohnak ah amah cu an sai. Cun amah cu Megiddo ah a tlân ih cu tawkah a thi. 28 Cule a siahhlawhpawl in amah cu ránglêng in Jerusalem ah an phur ih, amai thlān ah, a pupápawl hnenah, David Khawpi ah an phum. 29 Ahab fapa Joram a lal a kum hleikhatnak ah Ahaziah cu Judah tlunah siangpahrang ah a cang.

Thih Sia in Jezebel a Thi

30 Jehu cu Jezreel ah a thleng ti Jezebel in hna in a theih tikah a mit a ṭialter ih a lu a cei, cule tukvirh ihsin a cuan. 31 Cun Jehu cu kăwtka ah a lut ih Jezebel cun, «Remdaihnak a si maw, Zimri, na bawipa thattu?» tiah a ti.

32 Cule anih in tukvirh lam cu a hun zoh ih, «Zo si ka lamih ṭang? Zo a si?» tiah a ti. Cule tilper mi pahnih maw pathum simaw in amah cu an hei zoh.

33 Cun anih in, «Jezebel cu hlăwnthla uh,» tiah a ti. Cule annih in amahnu cu an hlăwnthla ih a thisen hrekkhat cu khawkulh parah le rángpawl parah an ṭekdarh, cule amah cu a ke hnuaiah a pal. 34 Cule anih cu a lut ih a ei ih a in. Cun anih in, «Atu ah feh uh, hi camsiat mi nunaunu hi va zohfel uhla phum uh, ziangahtile amah cu siangpahrang fanu a si,» tiah a ti. 35 Cule amah phum dingin an feh, asinan a lu ruh le a kepawl le a kut zaphakpawl ti lo cu a dang an hmu nawn lo. 36 Curuangah an ra kirsal ih amah cu an sim. Cule anih in, «Himi hi Jehovah kamsuakthu, a siahhlawh Tishbi-mi Elijah hmangih a sim mi a si, ‹Jezreel lei parah uicopawl in Jezebel-ih sa an ei ding ih, 37 Jezebel-ih ruang cu Jezreel hmun ah, ló parih êk vek a si ding, cutin «Hi tawkah Jezebel a um,» an ti lo ding,› tiih a sim mi kha a si,» tiah a ti.

10

Ahab Fapa 70 Thah an Si

1 Ahab in Samaria ah fapa 70 a nei. Cule Jehu in ca a ngan ih Samaria ah, Jezreel khaw uktupawl hnen, upapawl hnen le Ahab-ih fapa kilkhawitupawl hnenah, 2 «Hi cakuat nan hnen a thlen veten, nan bawipaih fapapawl nan zawngah an um ih, ránglêngpawl le rángpawl siseh, kulh mi khawpi le hriamhreipawl khal nan neih ruangah, 3 nan bawipaih fapapawl lak ihsin a tlingbik mi hril uhla a paih laltokham ah toter uh, cule nan bawipaih innsang hrangah do uh,» tiin ca a kuat.

4 Asinan annih cun nasatukin an ṭih ih, «Zoh hnik uh, siangpahrang pahnih hmanih an do thei lo mi cu kannih in ziangtin kan do thei ding?» tiah an ti. 5 Cule cuih inn hohatu, khawpi ṭuanvo neitu, upapawl le fapapawl rak kilkhawitupawl in Jehu hnenah mi an thlah ih, «Kannih cu na siahhlawh kan si, in fial mi hmuahhmuah kan tuah ding; asinan siangpahrang ah zohman kan tuah lo ding. Na mithmuhih ṭha na ti mi tuah aw,» tiah an ti.

6 Cule anih in a vei hnihnak an hnenah, «Nannih cu keimai hrang nan si ih ka aw nan ngaithlak asile, nan bawipaih fapapawlih lupawl la uhla, thaizing atu tikcu ah Jezreel khua ah ka hnenah ra uh,» tiah ca a ngan.

Cule siangpahrang fapa 70 pawl cu anmah kilkhawitu khawpi mipawimawhpawl hnenah an um. 7 Cule hitin a si, an hnenih ca a thlen tikah, siangpahrang fapapawl cu an kai ih mi 70 pawl cu an that, an lu cu khopawl sungah an ret ih Jezreel khua ah a hnenah an kuat.

8 Cun palai pakhat a thleng ih a hnenah a sim, «Siangpahrang fapapawlih lu an rak keng zo,» tiah a ti.

Cule anih in, «Cupawl cu zing lam tiangin kăwtsuah ah pen hnih in pengkhawm uh,» tiah a ti.

9 Cule a thaizing ah hitin a si, anih cu a fehsuak ih a ding, cule mipi zate hnenah, «Nannih cu nan dingfel. Zoh hnik uh, ka bawipa ka rak phiar ih amah ka that, asinan hipawl hmuahhmuah thattu hi zo a si? 10 Curuangah Ahab sungza thuhla ih Jehovah ih a sim mi Jehovah kamsuakthu zianghman leilung ah a tla lo ding ti thei uh; ziangahtile Jehovah in a siahhlawh Elijah hmangih a sim mi cu a tuah zo,» tiah a ti. 11 Cule Jehu in Jezreel khua ih a tāng mi Ahab sungza hmuahhmuah, a mipawimawhpawl le a rualpi nâipawl le a puithiampawl zaten pakhat hman an tān nawn lo tiangin a that.

Ahaziah-ih Unau Mipa 42 Thah an Si

12 Cule anih cu a tho ih a suak, cule Samaria ah a feh. Lamzin ih, tuukhālpawlih tuuhmulmehnak ah, 13 Jehu in Judah siangpahrang Ahaziah-ih unaupawl a táwng ih, «Zo nan si?» tiah a ti.

Cule annih in, «Kannih cu Ahaziah-ih unau kan si, siangpahrang fapapawl le siangpahrang bawinuih fapapawl cibai dingah kan rung suk a si,» tiah an sawn.

14 Cule anih in, «A nungin kai hai uh,» tiah a ti. Curuangah anmah cu a nungin an kai ih, tuuhmulmehnak ih khur ah an that, mipa 42 an si ih an lakih pakhat hman a zuah lo.

A tāng mi Ahab Sungkuapawl Thah an Si

15 Cule cutawk ihsin a fehsuak tikah, amah táwng tumtu Rekab fapa Jehonadab cu a táwng, cule amah cu cibai a bûk ih a hnenah, «Ka thinlung cu na thinlung lamih a dik vekin na thinlung a dik maw?» tiah a ti.

Cule Jehonadab in, «Dik e» tiah a sawn.

Jehu in, «Cuti asile na kut i san aw,» tiah a ti. Cun a kut a san ih amah cu ránglêng sungah a hnenah a hruai.

16 Cun anih in, «Ka zawngah ra awla, Jehovah hrangih ṭhahnem ka ngaizia hi zoh aw,» tiah a ti. Cutin a ránglêng parah amah cu an toter. 17 Cule Samaria a thlen tikah, Elijah hnenih a sim mi, Jehovah kamsuakthu vekin, Ahab-ih milai Samaria ih tāngsŭnpawl hmuahhmuah a thah thluh hlanlo a that vivo.

Baal Betupawl Thah an Si

18 Cun Jehu cun mipi zaten a khawm ih an hnenah, «Ahab in málte lawng Baal a rian, Jehu in tam zet a rian ding. 19 Curuangah atu ah, Baal profetpawl hmuahhmuah, a siahhlawhpawl hmuahhmuah le a puithiampawl hmuahhmuah cu ka hnenah ko uh. Pakhat hman kim lo um hlah hai seh, ziangahtile Baal hrangah thawinak ropi ka nei. A tel lo tu cu zohman an nung lo ding a si,» tiah a ti. Asinan Jehu cu Baal betupawl thah tumin, fimvar zetin a cāngvai. 20 Cule Jehu in, «Baal hrangah tawnkhawmawknak hleice phuang uh,» tiah a ti. Cule thu an phuang.

21 Cun Jehu cun Israel zate hnenah mi a thlah ih, Baal riantupawl zaten an ra thleng, a ra lo mi zohman an um lo. Cule Baal temple sungah an ra thleng ih Baal temple cu khat lam ihsin khat lam tiang an khat ṭheh. 22 Cule thuamawknak ṭuanvo neitu hnenah, «Baal betu zate hrangah thuamawknakpawl kengsuak aw,» tiah a ti. Cule an hrangah thuamawknakpawl a kengsuak. 23 Cun Jehu le Rekab fapa Jehonadab cu Baal temple sungah an lut ih Baal riantupawl hnenah, «Baal betupawl siarlo Jehovah siahhlawhpawl nan hnenah an um maw ti hawl uhla, zoh hnik uh,» tiah an ti. 24 Cule thawinakpawl le Meiur Thilhlănpawl hlan dingah an lut. Cule Jehu in amai hrangah mipa 80 a lengah a ruat hai ih, «Nan kut sungih ka rak hruai mi mipapawl lak ihta a tlânsuaktertu cu cu paih nunnak aiah a nunnak a si ding,» tiah a ti.

25 Cule hitin a si, Meiur Thilhlăn a hlăn ṭheh veten ralvengtu le ralbawipawl hnenah, «Lut uhla anmah that uh, pakhat hman suakter hlah uh!» tiah a ti. Cule ralnâm hriam in anmah cu an that, cun ralvengtu le ralbawipawl in anmahpawl cu an hlăwnsuak ih Baal temple pindan sungta ah an lut. 26 Cule Baal temple ihsin ṭhuamserhpawl an kengsuak ih an ur. 27 Cun Baal ṭhuamserhpawl an ṭhiat ih Baal temple an băl, cule cumi cu tuihni tiangin êkinn ah an hmang. 28 Cuticun Jehu in Israel ihsin Baal a siatrálter.

29 Sikhalsehla Jehu cu Israel sual tuahtertu Nebat fapa Jeroboam-ih sualpawl cu a bansan cuang lo, cucu Bethel khua le Dān khua ih sui câwpa nopawl biak a si. 30 Cule Jehovah in Jehu hnenah, «Ka mithmuhah a dik mi tuahin thil ṭha na tuah ih, ka thinlung ih um hmuahhmuah Ahab sungza ah na rak tuah ruangah, na fapapawl in san litnak tiangin Israel laltokham parah an to ding,» tiah a ti. 31 Asinan Jehu cun a thinlung zaten Israel-ih Pathian Jehovah Dān thlun dingin a ngaihsak lo, ziangahtile Israel sual tuahtertu, Jeroboam-ih sualpawl a tlânsan lo.

Jehu Thihnak

32 Cu laiah Jehovah in Israel-mi mi hrekkhat sahcat a thăwk, cule Hazael in Israel ramṭhen, 33 Jordan tiva ihsin nisuahnak lam: Gilead ram hmuahhmuah, Gad, Reuben le Manasseh, Arnon Tiva kiangih um Aroer ihsin, Gilead le Bashan telin a la vivo. 34 Cule a tāng lai mi Jehu-ih căngvaihnakpawl, a tuah mi hmuahhmuah le a cahnak hmuahhmuah cu Israel siangpahrangpawlih sansiarnak cazualpawl ah ngan an si lo maw? 35 Cun Jehu cu a pupápawl hnenah a cawl, cule Samaria ah amah cu an phum. Cun a fapa Jehoahaz cu a aiah a lal. 36 Cule Jehu in Samaria ih Israel a uk sung cu kum 28 a si.

11

Judah Siangpahrang Athaliah

1 Ahaziah nu Athaliah in a fapa a thi ti a hmuh tikah, a tho ih siangpahrang cithlah hmuahhmuah a that ṭheh. 2 Asinan Jehosheba, Siangpahrang Joram fanu, Ahaziah-ih unaunu in Ahaziah fapa Joash cu a la ih, thah mi siangpahrang fapapawl lak ihsin a rûkhlo ih a umtu thawn ihnak pindan sungah a ret, cule Athaliah hnen ihsin an thup ih cutin anih cu thah a si lo. 3 Cule anih cu kum ruk sung cu nu thawn Jehovah inn ah, Athaliah in cuih ram a uk sung cu thuh a si.

Judah Siangpahrang Joash

4 A kum sarihnak ah Jehoiada in mi a thlah ih aKereth le ralvengtupawl lak ihsin ralkap 100 hotupawl a ko hai ih, anmah cu Jehovah inn sungah a hnenah a hruailutter hai. Cule anih cun anmah thawn thukham a tuah ih, Jehovah inn sungah an hnen ihsin thukamnak a la, cule an hnenah siangpahrang fapa cu a hmuh hai. 5 Cun anih cun, «Hihi nan tuah ding mi a si: nan lakih ṭhen thum ṭhen khat Sabbath ni ih ratu ding le siangpahrang inn kiltu ding pawl in, 6 inn tisiat a silonak dingah nan kil pei. Cule ṭhen thum ih ṭhen khat cu Sur kăwtka ah nan um pei ih, ṭhen thum ih ṭhen khat cu ralvengtupawlih dung kăwtka ah nan um pei. 7 Nan lakih bur hnih, Sabbath ni ih kiltu ṭuanvo nei lo pawl in siangpahrang hrangah Jehovah inn nan kil pei. 8 Asinan mi kip mai kut ciar ah hriamhrei kengin kil kip in siangpahrang nan kulh pei, cule zokhal cuih kulh sungih ra cu thah si seh. Nannih cu a fehsuak le a luh ah siangpahrang zawngah nan um ding a si,» tiah thu a pe hai.

11:4a Kereth: Siangpahrang inn le Temple kiltu ralkappawl tinak a si.

9 Cule puithiam Jehoiada ih thupek vekin ralkap 100 hotupawl cun an tuah. Cule anmah cio in Sabbath ni ih kiltu ding an mipapawl, Sabbath ni ih kil lo tu dingpawl thawn an hruai ih puithiam Jehoiada hnenah an ra. 10 Cule puithiam in ralkap 100 hotupawl hnenah Siangpahrang David-ih feipawl le ralphawpawl Jehovah temple sung ihta a pe hai. 11 Cun mi kip in an kut ah hriamhrei an keng ih, siangpahrang cu kulhin, temple vawrh lam ihsin temple keh lam tiang, biakṭheng le inn kiangah ralvengtupawl cu an ding. 12 Cule anih in siangpahrang fapa cu a hruaisuak, a parah lallukhum retin le Thutheihpinak pe-in, siangpahrang ah an tuah ih hriak an thih, cule an kut an bēng ih, «Siangpahrang a nunkhua sau hram seh!» tiah an ti.

Athaliah Thihnak

13 Cule Athaliah in ralvengtupawl le mipi thâwm a theih tikah, Jehovah temple ih mipi hnenah a ra. 14 A zoh tikah, zoh hnik, tidān kēl vekin ṭhuam kiangih siangpahrang ding le siangpahrang kiangih hotupawl le tawtawrawt phawtupawl cu a hmu. Ram mipi hmuahhmuah cu lungawiaipuangin tawtawrawt an phaw. Cule Athaliah cun a hnipuan a thlek ih, «Phiarawknak! Phiarawknak!» tiin a au.

15 Cule puithiam Jehoiada in ralkap 100 hotupawl, ralkap thuneitupawl cu thu a pe ih an hnenah, «Amah kha kil phahin hruaisuak uhla, amah thluntu pauhpauh cu ralnâm in that uh,» tiah a ti. Ziangahtile puithiam in, «Jehovah ih inn ah cun amah thah si hlah seh,» tiah a ti. 16 Cule Athaliah cu an kai, cule anih cu siangpahrang inn ih rángpawl luhnak zin in a feh ih, amah cu cu tawkah thah a si.

17 Cun Jehoiada in Jehovah le siangpahrang le mipi karlakah, Jehovah-ih mi an sinak ding thukham a tuah, siangpahrang le mipi karlak khalah. 18 Cule cuih ram mipi hmuahhmuah cu Baal temple ah an feh ih, cumi cu an băl. A biakṭhengpawl le milimpawl cu zâm seksekin an băl thluh ih biakṭhengpawl hmaiah Baal puithiam Mattan cu an that. Cule puithiam in Jehovah inn ih thuneitu dingpawl a ruat. 19 Cun anih in ralkap 100 hotu, kerethpawl, ralvengtupawl le rammipawl hmuahhmuah a hruai hai, cule Jehovah inn ihsin siangpahrang an run hruai ih, ralvengtupawlih kăwtka zin ihsin siangpahrang inn ah an feh. Cule anih cu siangpahrangpawlih laltokham parah a to. 20 Cutin cuih ram mipi hmuahhmuah cu lungawiaipuangin an um, cule Athaliah cu ralnâm in an rak thah zo ruangah khawpi cu ralmuangin a um. 21 Siangpahrang a can tikah Jehoash cu kum sarih mi a si.

12

Jehoash in Temple a Rĕm

1 Jehu a lal a kum sarihnak ah Jehoash cu siangpahrang ah a cang ih, Jerusalem ah kum 40 a lal. A nuih hmin cu Zibiah, Beersheba khawmi a si. 2 Jehoash cun puithiam Jehoiada in amah a zirh sung hmuahhmuah cu Jehovah mithmuhah thildik a tuah. 3 Asinan hmun sângpawl cu lakhlo an si lo, mipi in hmun sângpawl ah an thawiaw ih rimhmui an ur thotho.

4 Jehoash in puithiampawl hnenah, «Jehovah inn sungih rak ken mi serhhran mi thilpek paisa hmuahhmuah, mi kip ih mipum siarnak paisa, mi kip ih nun tlennak paisa le mi in an thinlung ih Jehovah inn sungih ken ding an tumtah mi paisa hmuahhmuah cu, 5 puithiampawl in an hmeltheih hnen ihsin anmai hrangah la hai seh, cule temple siatnakpawl, a siat hmuhnak hmun kip rĕm hai seh,» tiah a ti.

6 Cule hitin a si, Siangpahrang Jehoash a lal a kum 23-nak tiangah puithiampawl in temple siatnakpawl an rĕm hrih lo. 7 Siangpahrang Jehoash cun puithiam Jehoiada le puithiam dangpawl a ko ih an hnenah, «Ziangah so temple siatnakpawl nan rĕm lo? Curuangah atu ah nan hmeltheih hnen ihsin paisa labêt nawn hlah uh, cuhnakin temple siatnakpawl tuahnak hrangah hmangsuak sawn uh,» tiah a ti. 8 Cule puithiampawl cun mipi hnen ihsin paisa cohlang nawn lo dingin le temple siatnakpawl khal rĕm lo dingin an lung a kim.

9 Cun puithiam Jehoiada in kuang a la ih a sīn a vittlăng, cule cumi cu biakṭheng kiang, Jehovah inn sung luhnak vawrh lamah a ret. Cule sângka kiltu puithiampawl in Jehovah inn sungih rak ken mi paisa hmuahhmuah cu tawkah an ret. 10 Cule hitin a si, kuang sungah paisa tampi a um ti an hmuh tikah, siangpahrang-ih cangantu le puithiam lubik cu an so ih, cumi cu dippawl sungah an săn, cule Jehovah inn sungih hmuh mi paisa cu an siar. 11 Cun an tuk mi paisa cu Jehovah inn vilvengtu, hna a ṭuansuaktupawl kut ah an pe. Cule cumi cu Jehovah inn ṭuantu lettamapawl le inn saktupawl hnenah, 12 lungserthiampawl le lung attupawl hnenah, thing le ser mi lung leinak ah, Jehovah inn siatnak rĕmnak dingah an pesuak. Cule cupawl hmuahhmuah cu temple rĕmnak dingih peksuah mi an si. 13 Sikhalsehla Jehovah inn sungih ken mi paisa ihsin Jehovah inn hrangah ngun cawhtawlhpawl, caicehpawl, khengkûmpawl, tawtawrawtpawl, sui bungruapawl le ngun bungruapawl cu tuah a si lo. 14 Asinan cumi cu hnaṭuantupawl an pe ih, cumi thawn Jehovah inn an rĕm. 15 Cuihhleiah paisa an pek mi mipapawl hnen ihsin hnaṭuantupawl pek ding mi paisa hmandān thu an dil lo, ziangahtile annih cun rinumten an tuah. 16 Mawh Thilhlănpawl ihsin le Sual Thilhlănpawl ihsin paisa cu Jehovah inn ah ken a si lo, cumi cu puithiampawlih ta a si.

Hazael in Jerusalem a Hro

17 Siria siangpahrang Hazael cu a so ih Gath khua a do ih, a la. Cun Hazael cu Jerusalem ih feh dingin a hmai a hawi. 18 Cule siangpahrang Jehoash in a pupápawl, Jehoshafat le Jehoram le Ahaziah, Judah siangpahrangpawl ih serhhran mi thil hmuahhmuah le amai serhhran mi thil hmuahhmuah, Jehovah inn le siangpahrang inn hlawnthilpawl lakih hmuh mi sui hmuahhmuah cu a la ih, Siria siangpahrang Hazael hnenah a kuat. Cun amah cu Jerusalem ihsin a fehhlo.

Joash Thihnak

19 Cun a tāng lai mi Joash-ih căngvaihnakpawl le a tuah mi hmuahhmuah cu Judah siangpahrangpawlih sansiarnak cazualpawl ah ngan an si lo maw?

20 Cule a siahhlawhpawl cu an tho ih phiarthupnak an tuah, cule Joash cu Silla pannak zin ih Millo inn ah an that. 21 Ziangahtile a siahhlawh Shimeath fapa Jozakar le Shomer fapa Jehozabad in amah cu an vuak ih, a thi; cule David Khawpi ah a pupápawl hnenah an phum. Cun a fapa Amaziah cu a aiah a lal.

13

Israel Siangpahrang Jehoahaz

1 Judah siangpahrang Ahaziah fapa Joash a lal a kum 23-nak ah Jehu fapa Jehoahaz cu Samaria ah Israel tlunih siangpahrang ah a cang ih, kum hleisarih sung a lal. 2 Cule Jehovah mithmuhah thil ṭhalo a tuah ih, Israel sualtertu, Nebat fapa Jeroboam-ih sualpawl cu a thlun. Cupawl cu a suahsan lo.

3 Cun Israel parah Jehovah thinhengnak cu a alh ih, an damsung hmuahhmuah Siria siangpahrang Hazael kut ah le Hazael fapa Ben-Hadad kut ah a pek hai. 4 Cule Jehoahaz cun Jehovah duhsaknak a hawl, cule Jehovah in amah cu a ngaisak, ziangahtile anih in Israel palbĕtnak cu a hmu, ziangruangahtile Siria siangpahrang in anmah a palbĕt a si. 5 Cun Israel cu Siria-mipawl kut hnuai ihsin an suahnak dingah, Jehovah in runsuaktu a pe, cule Israel tefapawl cu a hlan vekin anmai thlampawl ah an cêng. 6 Sikhalsehla Israel sualtertu Jeroboam sungkua ih sualpawl cu tlansan loin, an tuah sawn riangri. Cule Asherah khal Samaria ah a tāng lai. 7 Ziangahtile Jehoahaz hnenah rángtothiam mi 50, ránglêng pahra le ralkap 10000 lawng a tâng, ziangahtile Siria siangpahrang in anmah cu a that hai ih, hruihhmun ih leivut vekin anmah cu a tuah.

8 Cule a tāng lai mi Jehoahaz-ih căngvaihnakpawl, a tuah mi hmuahhmuah le a cahnak cu Israel siangpahrangpawlih sansiarnak cazualpawl ah ngan an si lo maw? 9 Cun Jehoahaz cu a pupápawl hnenah a cawl ih, Samaria ah an phum. Cun a fapa Joash cu a aiah a lal.

Israel Siangpahrang Jehoash

10 Judah siangpahrang Joash a lal a kum 37-nak ah Jehoahaz fapa Jehoash cu Samaria ah Israel tlunih siangpahrang ah a cang ih, kum 16 sung a lal. 11 Cule anih cu Jehovah mithmuhah thil ṭhalo a tuah. Israel sualtertu Nebat fapa Jeroboam-ih sualpawl hmuahhmuah a tlansan lo, cuhnakin cupawl cu a tuah sawn riangri.

12 Cule a tāng lai mi Joash-ih căngvaihnakpawl, a tuah mi hmuahhmuah le Judah siangpahrang Amaziah a donak cahnak cu Israel siangpahrangpawlih sansiarnak cazualpawl ah ngan an si lo maw? 13 Cun Joash cu a pupápawl hnenah a cawl. Cun a laltokham parah Jeroboam a to. Cule Joash cu Israel siangpahrangpawl hnenah Samaria ah phum a si.

Elisha Thihnak

14 Elisha cu a thihpi ding mi natnak in a nâ. Cun Israel siangpahrang Joash cu a hnenah a suk ih, a hmaiah a ṭap, «Maw ka pa, ka pa, Israel ránglêngpawl le an rángtothiampawl,» tiah a ti.

15 Cule Elisha in a hnenah, «Thál le thálfung hrekkhat la aw,» tiah a ti. Cun anih in thál le thálfungpawl cu a la. 16 Cun anih in Israel siangpahrang hnenah, «Thál parah na kut ret aw,» tiah a ti. Cule cumi parah a kut a ret ih Elisha in siangpahrang kut parah a kut a ret. 17 Cule, «Nisuahnak lam sângkate áwng aw,» tiah a ti ih, anih in a áwng. Cun Elisha in, «Sai aw,» a ti ih, a sai. Cule, «Jehovah-ih runsuahnak thálfung le Siria ihsin runsuahnak thálfung a si, ziangahtile Afek khua ah Siria-mipawl cu hlorál tiang na neh hai ding,» tiah a ti. 18 Cun anih in, «Thálfungpawl la aw,» tiah a ti, cule anih in a la. Cule anih in Israel siangpahrang hnenah, «Lei sun aw,» a ti ih, anih in vei thum a sun, cule a bâng. 19 Cule Pathian mi cu a parah a thin a heng ih, «Vei nga vei ruk lai sun ding na si nân; cutisisehla cu Siria-mipawl cu an hlohral tiangin na neh hai ding. Asinan atu ah cun vei thum lawng Siria na neh ding,» tiah a ti.

20 Cun Elisha cu a thi ih an phum. Cule kum thăwktir ah, Moab misîmtupawl in ram an sîm. 21 Cule hitin a si, annih cun mi pakhat an phum rero laiah, zoh hnik, misîmtu bur khat rinlopiah an hmu, cule cu pa cu Elisha-ih thlān ah an hlăwn. Cun cu pa cu an vun thlak ih, Elisha ruhpawl a dai tikah, a nungsal ih, a ke in a ding.

Israel in Siria hnen ihsin Khawpipawl a Lasal

22 Cule Siria siangpahrang Hazael in Israel cu Jehoahaz damsung hmuahhmuah a palbĕt. 23 Asinan Jehovah cu Abraham, Isak le Jakob thawi a thukham ruangah, an parah zangfahnak a nei, a lainat hai ih, anmah a ngaihsak, cule anmah cu a hlorálter hai lo ih, a hmai ihsin a hlăwn hai hrih lo.

24 Cule Siria siangpahrang Hazael cu a thi. Cun a fapa Ben-Hadad cu a aiah a lal. 25 Cule Jehoahaz fapa Jehoash in Hazael fapa Ben-Hadad ih kut ihsin doawknak in a pa Jehoahaz kut ihta a rak lâk mi khawpipawl cu a lasal. Joash in vei thum sung amah a neh ih Israel khawpipawl a lasal.

14

Judah Siangpahrang Amaziah

1 Jehoahaz-ih fapa, Israel siangpahrang Joash a lal a kum hnihnak ah Judah siangpahrang Joash fapa Amaziah cu siangpahrang ah a cang. 2 Siangpahrang a hung si tikah amah cu kum 25 mi a si ih, Jerusalem ah kum 29 sung a lal. A nuih hmin cu Jehoaddan, Jerusalem-mi a si. 3 Cule anih cun Jehovah mithmuhah thildik a tuah nân a pupá David vek cu a si lo. A pa Joash ih rak tuah mi pauhpauh a tuah. 4 Sikhalsehla hmun sângpawl cu lakhlo an si lo ih, mipi in hmun sângpawl ah thawiawin rimhmui an ur hrih thotho.

5 Cule hitin a si, uknak cu a kut ih dĭnhngeh a si veten a pa siangpahrang rak thattu a siahhlawhpawl cu a that hai. 6 Asinan laithattupawlih fātepawl cu a that lo, Mosi Dān Cazual sungih, «Falepawl ruangah palepawl thah an si lo ding ih, palepawl ruangah falepawl khal thah an si lo ding, mi pakhat cu amai sual ruangih thah a si sawn ding a si,» tiih Jehovah thupek ngan mi vekin.

7 Anih in Cite Phaikuam ah Edom-mi 10000 a that ih, doawknak ihsin Sela a la, cule cumi hmin cu tuihni tiangin Joktheel tiah a ko.

8 Cun Amaziah in Israel siangpahrang, Jehu fapa Jehoahaz-ih fa Jehoash hnenah palaipawl a thlah ih, «Ra aw, pakhat le pakhat hmaităwnin zoh aw uhsi,» tiah a ti.

9 Cule Israel siangpahrang Joash in Judah siangpahrang Amaziah hnenah, «Lebanon tlang ih hlingbûr in Lebanon tlang ih sidar thing hnenah, ‹Na fanu hi ka fapa hnenah nupi ah pe aw,› tiin mi a thlah. Cule Lebanon tlang ih ramsa pakhat a vak ih cuih hlingbûr cu a pal. 10 Edom cu na neh tak ngai, na thinlung in a lo khaisâng. Cumi ah sunlawihaw awla, inn ah cambâng men aw, ziangahtile nangmah le Judah ram thawi nan tlûknak dingah ziangahso maw buainak taw na thawh ding?» tiah a ti.

11 Sikhalsehla Amaziah in a ngaithla duh lo. Curuangah Israel siangpahrang Jehoash cu a fehsuak ih, Judah siangpahrang Amaziah thawn Judah ram Beth Shemesh khua ah hmaităwnin an zoh aw. 12 Cule Judah cu Israel in a neh ih, mipa kip cu anmai thlam ciar ah an tlân. 13 Cun Israel siangpahrang Jehoash in Judah siangpahrang Ahaziah fapa Jehoash fa Amaziah cu Beth Shemesh ah a kai ih, Jerusalem ah a feh, Jerusalem kulh cu Efraim Kăwtka ihsin Kil Kăwtka tiangin dawng 400 a ṭhiatbăl. 14 Cule anih in sui le ngun hmuahhmuah, Jehovah inn le siangpahrang inn ih hlawnthilpawl lakih hmuh mi bungrua hmuahhmuah, ralkaih mipawl thawn Samaria ah a kir.

15 Cule a tāng lai mi Jehoash ih tuah mi căngvaihnakpawl, a cahnak le Judah siangpahrang Amaziah a dodān cu Israel siangpahrangpawlih sansiarnak cazualpawl ah ngan an si lo maw? 16 Cun Jehoash cu a pupápawl hnenah a cawl ih Israel siangpahrangpawl hnenah Samaria ah phum a si. Cun a fapa Jeroboam cu a aiah a lal.

17 Joash fapa Judah siangpahrang Amaziah cu Jehoahaz fapa Israel siangpahrang Jehoash thih hnuah kum hleinga a nungdam. 18 Cule a tāng lai mi Amaziah-ih căngvaihnakpawl cu Judah siangpahrangpawlih sansiarnak cazualpawl ah ngan an si lo maw? 19 Cule annih in Jerusalem ah amah an phiarthup ih, anih cu Lakish khua ah a tlân; asinan a dungthlunin Lakish ah mi an thlah ih, cu tawkah amah cu an that. 20 Cun amah cu rángpawl in an phur ih, David Khawpi ah a pupápawl hnen Jerusalem ah an phum.

21 Cule Judah-mipawl hmuahhmuah in kum hleiruk mi Azariah cu an hruai ih a pa Amaziah aiah siangpahrang ah an tuah. 22 Anih cun Elath a dĭn ih, cumi cu Judah ram ah a telhsal, cuihhnu ah siangpahrang cu a pupápawl hnenah a cawl.

Israel Siangpahrang Jeroboam II

23 Joash fapa, Judah siangpahrang Amaziah a lal a kum hleingatnak ah Israel siangpahrang Joash fapa Jeroboam cu Samaria ah siangpahrang ah a cang ih, kum 41 sung a lal. 24 Cule anih cun Jehovah mithmuhah thil ṭhalo a tuah, Israel sualtertu Nebat fapa Jeroboam-ih sualpawl hmuahhmuah a tlansan lo. 25 Israel-ih Pathian Jehovah in a siahhlawh, Gath Hefer khawmi Amittai fapa profet Jonah hmangih a rak sim mi vekin, Israel ramri cu Hamath luhnak ihsin Arabah Tipi tiang a lasal. 26 Ziangahtile Jehovah in Israel-ih zăwnzaihnak cu a khâ tuk ti a hmu, cule sál le miluat khal an tâng lo, Israel hrangah bawmtu a um lo. 27 Cule Jehovah in van hnuai ihsin Israel hmin thaihlo dingin a rel lo, Joash fapa Jeroboam kut hmangin anmah a run hai sawn a si.

28 Cule a tāng lai mi Jeroboam-ih căngvaihnakpawl le a tuah mi hmuahhmuah, a cahnak, ral a dodān le Judah ta a si mi Damaskas ihsin Hamath tiang Israel hrangih a lâksaldān pawl cu Israel siangpahrangpawlih sansiarnak cazualpawl ah ngan an si lo maw? 29 Cun Jeroboam cu a pupápawl, Israel siangpahrangpawl hnenah a cawl. Cun a aiawhah a fapa Zekariah a lal.

15

Judah Siangpahrang Azariah

1 Israel siangpahrang Jeroboam a lal a kum 27-nak ah Judah siangpahrang Amaziah fapa Azariah cu siangpahrang ah a cang. 2 Siangpahrang a can tikah amah cu kum 16 mi a si ih, Jerusalem ah kum 52 sung a lal. A nuih hmin cu Jekoliah, Jerusalem-mi a si. 3 Cule a pa Amaziah ih tuah mi hmuahhmuah bangtukin Jehovah mithmuhah thildik a tuah, 4 hmun sângpawl lawngte lakhlo an si lo; mipi cu hmun sângpawl ah an thawiaw ih, rimhmui an ur lai. 5 Cun Jehovah in siangpahrang cu a vua ih, anih cu a thih ni tiangin a phâr. Cun anih cu inn pâk pakhat ah a cêng. Cule siangpahrang fapa Jotham cu siangpahrang sungkua hohatu siin, Judah rammipawl thu a ṭhen.

6 Cule a tāng lai mi Azariah-ih căngvaihnakpawl le a tuah mi hmuahhmuah cu Judah siangpahrangpawlih sansiarnak cazualpawl ah ngan an si lo maw? 7 Cule Azariah cu a pupápawl hnenah a cawl ih, David Khawpi ah a pupápawl hnenah an phum. Cun a fapa Jotham cu a aiah a lal.

Israel Siangpahrang Zekariah

8 Judah siangpahrang Azariah a lal a kum 38-nak ah Jeroboam fapa Zekariah in thla ruk sung Samaria ah Israel a uk. 9 Cule a pupápawl ih tuah mi bangin Jehovah mithmuhah thil ṭhalo a tuah. Israel sualtertu Nebat fapa Jeroboam-ih sualpawl cu a tlansan lo. 10 Cun Jabesh fapa Shallum in amah dokalhin a phiar ih amah cu mipi hmaiah a parah a kut a thlak ih a that, cule a aiawhin amah in a uk.

11 Cule zoh hnik, a tāng lai mi Zekariah-ih căngvaihnakpawl cu Israel siangpahrangpawlih sansiarnak cazualpawl ah ngan an si.

12 Himi hi Jehovah kamsuakthu, Jehu hnenih, «Na fapapawl in Israel laltokham parah san li tiangin an to ding,» tiih a sim mi a si. Cule cutin a rak cang.

Israel Siangpahrang Shallum

13 Judah siangpahrang Uzziah a lal a kum 39-nak ah, Jabesh fapa Shallum cu siangpahrang ah a cang, cule anih in Samaria ah thla khat pumhlum a lal. 14 Cule Gadi fapa Menahem cu Tirzah khua ihsin a so ih Samaria ah a thleng, cule Jabesh fapa Shallum cu Samaria ah a parah a kut a thlak ih a that. Cule a aiawhin amah a lal.

15 Cun a tāng lai mi Shallum-ih căngvaihnakpawl le a tawthawh mi phiarthupnak cu, zoh hnik, Israel siangpahrangpawlih sansiarnak cazualpawl ah ngan an si.

16 Cun Menahem in Tirzah khua ihsin Tifsah khua ih um mi hmuahhmuah le a ramṭhen cu a do hai. Annih cu an pekawk lo ruangah, an parah a kut a thlak a si. Cutawk ih naupai nunau hmuahhmuah cu a raitlek thluh.

Israel Siangpahrang Menahem

17 Judah siangpahrang Azariah a lal a kum 39-nak ah, Gadi fapa Menahem cu Israel siangpahrang ah a cang ih, Samaria ah kum 10 a lal. 18 Cule anih cun Jehovah mithmuhah thil ṭhalo a tuah, a damsung hmuahhmuah ah Israel sualtertu Nebat fapa Jeroboam-ih sualpawl a tlansan lo. 19 Assiria siangpahrang Pul cu cuih ram dokalhin a ra, cule Menahem in amai kut ah lalram hngetter dingin a kut cu a hnenih a umnak dingah, Pul hnenah ngun talent 1000 a pe. 20 Cule Menahem in Assiria siangpahrang hnenih pek dingah Israel ram ihsin, milian zetzet hmuahhmuah hnen ihsin mi pakhat ah ngun shekel 50 cio a kháwng. Cun Assiria siangpahrang cu a kirsal ih, cuih ram ah cun a câm lo.

21 Cun a tāng lai mi Menahem-ih căngvaihnakpawl le a tuah mi hmuahhmuah cu Israel siangpahrangpawlih sansiarnak cazualpawl ah ngan an si lo maw? 22 Cun Menahem cu a pupápawl hnenah a cawl. Cule a fapa Pekahiah cu a aiah a lal.

Israel Siangpahrang Pekahiah

23 Judah siangpahrang Azariah a lal a kum 50-nak ah, Menahem fapa Pekahiah cu Samaria ah Israel siangpahrang ah a cang ih, kum hnih sung a lal. 24 Cule anih cun Jehovah mithmuhah thil ṭhalo a tuah, Israel sualtertu Nebat fapa Jeroboam-ih sualpawl cu a tlansan lo. 25 Cun a ralbawi pakhat, Remaliah-ih fapa Pekah in amah cu a phiarthup ih, Samaria ah siangpahrang inn ih kulhhnget sungah a parah a kut a thlak, Argob le Arieh khal. Cule a zawngah Gilead-mi mipa 50 an tel. Anih in amah cu a that ih a aiah a lal.

26 Cule a tāng lai mi Pekahiah-ih căngvaihnakpawl le a tuah mi hmuahhmuah cu, ngai hnik, Israel siangpahrangpawlih sansiarnak cazualpawl ah ngan an si.

Israel Siangpahrang Pekah

27 Judah siangpahrang Azariah a lal a kum 52-nak ah Remaliah fapa Pekah cu Samaria ah Israel siangpahrang ah a cang ih, kum 20 sung a lal. 28 Cule anih cun Jehovah mithmuhah thil ṭhalo a tuah, Israel sualtertu Nebat fapa Jeroboam-ih sualpawl cu a tlansan lo. 29 Israel siangpahrang Pekah-ih san laiah, Assiria siangpahrang Tiglath-Pileser a ra ih Ijon khua, Abel Beth Maakah khua, Janoah khua, Kedesh khua, Hazor khua, Gilead le Galili ram, Naftali ram hmuahhmuah cu a la, cule anmah cu Assiria ram ah a hruaihlo hai. 30 Cun Elah fapa Hoshea in Remaliah fapa Pekah cu a phiarthup, cule a parah a kut a thlak ih a that. Cun anih cu Uzziah-ih fapa Jotham a lal a kum 20-nak ah a aiah a lal.

31 Cule a tāng lai mi Pekah-ih căngvaihnakpawl le a tuah mi hmuahhmuah cu, zoh hnik, Israel siangpahrangpawlih sansiarnak cazualpawl ah ngan an si.

Judah Siangpahrang Jotham

32 Remaliah fapa, Israel siangpahrang Pekah a lal a kum hnihnak ah, Judah siangpahrang Uzziah fapa Jotham in uk a thăwk. 33 Amah cu siangpahrang a hung can tikah kum 25 mi a si ih, Jerusalem ah kum hleiruk sung a lal. A nuih hmin cu Jerusha ti mi Zadok fanu a si. 34 Cule anih cun Jehovah mithmuhah thildik a tuah, a pa Uzziah ih rak tuah mi hmuahhmuah vekin a tuah. 35 Sikhalsehla hmun sângpawl cu lakhlo an si lo. Mipi cu hmun sângpawl ah an thawiaw ih, rimhmui an ur hrih lai. Anih in Jehovah inn ih Kăwtka Tlunta a sak.

36 Cun a tāng lai mi Jotham-ih căngvaihnakpawl le a tuah mi hmuahhmuah cu Judah siangpahrangpawlih sansiarnak cazualpawl ah ngan an si lo maw? 37 Cu laiah Jehovah in Judah dokalhin Siria siangpahrang Rezin le Remaliah fapa Pekah thlah a rak thăwk. 38 Cule Jotham cu a pupápawl hnenah a cawl ih, a pa David Khawpi ah a pupápawl hnenah phum a si. Cun a fapa Ahaz cu a aiah a lal.

16

Judah Siangpahrang Ahaz

1 Remaliah fapa Pekah a lal a kum 17-nak ah, Judah siangpahrang Jotham fapa Ahaz in uk a thăwk. 2 Ahaz cu siangpahrang a hung can tikah, kum 20 mi a si ih Jerusalem ah kum 16 sung a lal. Anih cun a pa David ih tuah vek si loin, Jehovah a Pathian mithmuhah thil ṭhalo a tuah. 3 Israel siangpahrangpawlih zin a zawh sawn, a si, Jehovah in Israel tefapawl hmaika ihsi a hlăwn mi miphunpawlih thil fihnungzapawl vekin, a fapa cu meisa a paltlăngter. 4 Cule hmun sângpawl par, tlangmualpawl par le thingbŭknîm hnuai kip ah rai a thawi ih rimhmui a ur.

5 Cun Siria siangpahrang Rezin le Remaliah fapa Israel siangpahrang Pekah cu doawknak tuah dingin Jerusalem ah an so ih, Ahaz cu an kulh, asinan an neh thei lo. 6 Cu laiah Siria siangpahrang Rezin in Siria hrangah Elath khua a lakirsal ih, Elath khua ihsin Judah mipapawl a hnawhsuak. Cun Edom-mipawl cu Elath khua ah an feh ih tuihni tiangin cu tawkah an cêng.

7 Cun Ahaz in Assiria siangpahrang Tiglath-Pileser hnenah palaipawl a thlah ih, «Kei cu na siahhlawh le na fapa ka si. Ra awla, i do dingih tho, Siria siangpahrang kut ihsin le Israel siangpahrang kut ihsin i run aw,» tiah a ti. 8 Cule Jehovah inn sungih hmuh mi ngun le sui, siangpahrang inn ih hlawnthilpawl lak ihta thawn Ahaz in a la ih, Assiria siangpahrang hnenah laksawng ah a kuat. 9 Cun Assiria siangpahrang in amah cu a ngaisak, cule Assiria siangpahrang cu Damaskas khua dokalhin a so ih, a la, a minungpawl cu Kir ram ah a hruaihlo hai ih, Rezin cu a that.

10 Cule Siangpahrang Ahaz cu Assiria siangpahrang Tiglath-Pileser táwng dingin Damaskas khua ah a feh ih, Damaskas khua ih a um mi biakṭheng cu a hmu, cule Siangpahrang Ahaz in puithiam Urijah hnenah biakṭheng tuahdān le pianzia, cumi tuahserdān hmuahhmuah vekin a kuat. 11 Cun Siangpahrang Ahaz in Damaskas khua ihsin a kuat mi hmuahhmuah vekin, puithiam Urijah cun biakṭheng pakhat a dâwl. Cule Damaskas khua ihsin Siangpahrang Ahaz a thlenkir hlanah, puithiam Urijah in a rak tuah. 12 Cule siangpahrang cu Damaskas khua ihsin a thlenkir tikah, siangpahrang in biakṭheng a hmu ih, siangpahrang in cumi cu a naih, cule cumi parah thilhlănpawl a hlan. 13 Cun a Meiur Thilhlăn le a Thlairawl Thilhlăn cu a ur, cule a Inding Thilhlăn cu a burh ih, biakṭheng parah a Remnak Thilhlănpawlih thisen a theh. 14 Jehovah hmaika-ih um mi dar biakṭheng khal temple hmai ihsin, a biakṭheng le Jehovah inn karlak ihta a la ih, cumi cu a biakṭheng ih sak lam kilah a ret. 15 Cun Siangpahrang Ahaz in puithiam Urijah cu thu a pe ih, «Biakṭheng tumpi thar parah zing lam Meiur Thilhlăn siseh, zan lam Thlairawl Thilhlăn siseh, siangpahrang-ih meiur thawinak le a Thlairawl Thilhlăn siseh, rammi hmuahhmuah ih Meiur Thilhlăn thawn, an Thlairawl Thilhlăn siseh, an Inding Thilhlănpawl siseh, ur aw, cule cumi parah Meiur Thilhlăn thisen hmuahhmuah le thawiawknak thisen hmuahhmuah cu theh aw. Cule dar biakṭheng cu ka hrangah thuzawinak a si ding,» tiah a ti. 16 Cuticun puithiam Urijah in Siangpahrang Ahaz ih thupek mi hmuahhmuah vekin a tuah.

17 Cule Siangpahrang Ahaz in tohkāl tlângpawl a sâttan ih, cupawl ihsin Tikuangpi cu a ṭhawn, cule tibelpi cu a hnuaiih dar câwcangpawl ihsin a lathla ih, cumi cu lungtopawl rĕmkhawm mi parah a ret. 18 Temple sungih an rak sak mi, Sabbath hulhliap le Jehovah inn ihsin siangpahrang-ih luhkâ lengta cu Assiria siangpahrang ruangah a ṭhawn.

19 Cule a tāng lai mi Ahaz ih tuah mi căngvaihnakpawl cu Judah siangpahrangpawlih sansiarnak cazualpawl ah ngan an si lo maw? 20 Cun Ahaz cu a pupápawl hnenah a cawl ih, David Khawpi ah a pupápawl hnenah phum a si. Cule a fapa Hezekiah cu a aiah a lal.

17

Israel Siangpahrang Hoshea

1 Judah siangpahrang Ahaz a lal a kum 12-nak ah, Elah fapa Hoshea cu Samaria ah Israel siangpahrang ah a hung cang ih, kum kua sung a lal. 2 Cule Jehovah mithmuhah thil ṭhalo a tuah, asinan amai hlanih Israel siangpahrangpawl vek cu a si lo. 3 Amah dokalhin Assiria siangpahrang Shalmaneser a ra suak, cule Hoshea cu a siahhlawh ah a cang ih, a hnenah ngunkhuai a pe. 4 Cule Assiria siangpahrang in Hoshea ih phiarthupnak cu a hmusuak, ziangahtile anih in Izip siangpahrang So hnenah palaipawl a rak thlah ih, kum tin ih a tuah vekin, Assiria siangpahrang hnenah ngunkhuai a keng lo. Curuangah Assiria siangpahrang in amah cu a kharkhum ih thawnginn sungah a ṭawn.

Israel cu Assiria Sál ah Hruai a si

5 Cule Assiria siangpahrang cu ram pumpuluk hmuahhmuah ah a feh ih, Samaria tiang a so, cule kum thum sung a kulh.

6 Hoshea a lal a kum kuatnak ah Assiria siangpahrang in Samaria a la ih, Israel cu Assiria ram ah a hruaihlo, cule Halah khawpi le Habor tiva kiang, Gozan tiva le Medes khawpipawl ah a ret hai.

7 Ziangahtile hitin a si, Israel tefapawl cu Izip siangpahrang Faro kut hnuai ihsin, Izip ram ihsin anmah rak hruaisuaktu Jehovah an Pathian dokalhin thilsual an rak tuah, cule pathian dangpawl an ṭih ih, 8 Jehovah in Israel tefapawl hmaika ihsin a dawisuah mi miphunpawl ih an rak tuah mi sakhaw dānpawl le Israel siangpahrangpawlih sualnak an thlun. 9 Israel tefapawl cun Jehovah an Pathian parah a diklo mi thilpawl athupten an rak tuah, an khawpipawl hmuahhmuah ah, ralvennak dawlsâng ihsin kulh nei khawpi tiangin anmai hrangah hmun sângpawl an dĭn. 10 Anmai hrangah tlang sâng kip parah le thingbŭknîm hnuai kip ah, ṭhuamserhpawl le Asherah-pawl an dĭn. 11 Annih in cutawk ih hmun sângpawl hmuahhmuah ah, Jehovah in an hmaiih a dawisuah mi miphunpawl vekin rimhmui an ur, cule Jehovah thinheng dingih căwktho dingin sualralnak thilpawl an tuah. 12 Jehovah in an hnenah, «Hih thil nan tuah lo pei,» tiih a ti mi milempawl an rian.

13 Cuticingin Jehovah in, «Nan pupápawl thu ka pek mi Dān hmuahhmuah le ka siahhlawh profetpawl hmangin nan hnenih ka thlah mi bangtukin, nan lamzin ṭhalo pawl ihsin kir uhla, ka thupekpawl le ka sakhaw dānpawl thlun uh,» tiin Israel le Judah hnenah a profet hmuahhmuah le hmutu hmuahhmuah hmangin a theihter. 14 Sikhalsehla annih in an ngaithla lo, Jehovah an Pathian rak zum lo tu an pupápawlih rĭng bangin an rĭng an khăwngter sawn. 15 Cule a sakhaw dānpawl, an pupápawl hnenih a rak tuah mi a thukham le anmah dokalhih a theihter mi a thutheihtermipawl tla an hnáwng, milempawl an thlun, milem betu ah an cang ih, anmah vekin nan tuah lo pei tiih Jehovah in a rak cah mi, an kimvelih um miphunpawl an rak thlun. 16 Cule annih cun Jehovah an Pathian-ih thupekpawl hmuahhmuah cu tlansanin, anmai hrangah burcawp câwpa no lem pahnih an tuah, Asherah pakhat an tuah ih, van ih thilmak rual hmuahhmuah an bia, cule Baal an rian. 17 Cule an fapapawl le an fanupawl meisa an paltlăngter, thilcamthiamnak le aizohthiamnak an hmang ih, Jehovah mithmuhih thil ṭhalo tuah dingin, a thinheng ko căwktho dingin anmah le anmah an zuaraw. 18 Curuangah Jehovah cu Israel parah a thin a heng tuk ih, a mithmuh ihsin anmah cu a ṭhawn, Judah hnám siarlo a tāng mi zohman an um lo.

19 Judah khal in Jehovah an Pathian-ih thupekpawl a thlun lo, cuhnakin Israel ih tuah mi sakhaw dānpawl a thlun sawn. 20 Cule Jehovah in Israel tesinfapawl hmuahhmuah a hnáwng, anmah cu a zawnzaiter hai ih, a mithmuh ihsin anmah a hlăwnhloh hai hlanlo, misuamtupawlih kut ah anmah cu a pe.

21 Ziangahtile anih in Israel cu David sungza ihsin a ṭhen ih, annih in Nebat fapa Jeroboam cu siangpahrang ah an tuah. Cun Jeroboam cun Israel in Jehovah a thlunnak ihsin a hruaipêng ih anmah cu sual rapthlak a tuahter. 22 Ziangahtile Israel tefapawl cun Jeroboam ih tuah mi sualpawl hmuahhmuah an thlun, cucu an tlansan lo, 23 Jehovah in a siahhlawh profetpawl hmuahhmuah hmangih a rak sim vekin, a mithmuh ihsin Israel a ṭhawnhloh tiangin. Cule Israel cu anmai ram ihsin Assiria ram ah tuihni tiang hruaihlo an si.

Assiria in Samaria a Dĭnsal

24 Cun Assiria siangpahrang in Babilon khawmipawl, Kuthah khawmipawl, Ava khawmipawl, Hamath khawmipawl le Sefarvaim khawmipawl cu a hruai hai ih, Israel tefapawl aiah Samaria khawpipawl ah a ret. Cule Samaria cu an nei ih, a khawpipawl ah an cêng. 25 Cule hitin a si, cutawk ih an cēn thăwktir ah Jehovah an ṭih lo, curuangah Jehovah in an lakah kiosapawl a thlah ih, an lakih mi hrekkhat an dehthat. 26 Cun Assiria siangpahrang hnenah an sim ih, «Na rak ṭhawn ih Samaria khawpipawl ih na ret mi miphunpawl in, hih ram Pathian biakdān an thei lo, curuangah anih in an lakah kiosapawl a thlah, cule zoh hnik, cupawl in anmah cu an dehthat, ziangruangahtile annih in cuih ram Pathian biakdān an thei lo,» tiah an ti.

27 Cun Assiria siangpahrang in thu a pe ih, «Cutawk ihsin nan hruai mi puithiampawl lakih pakhat thlah uh, anih cu feh sehla, cu tawkah cêng seh. Cule anih in cuih ram Pathian biakdān cu anmah zirh seh,» tiah a ti. 28 Cun Samaria ihsin an rak hruai mi puithiampawl lakih pakhat a thleng ih, Bethel ah a cêng, cule Jehovah ṭihdān ding anmah a zirh.

29 Sikhalsehla miphun kip in mai pathian cio an tuah vivo ih, cupawl cu Samaria-mipawl ih tuah mi hmun sângpawl ih innpawl parah, miphun kip in an cēnnak khawpipawl ah an ret. 30 Babilon-mipawl in Sukkoth Benoth an tuah, Kuth-mipawl in Nergal an tuah, Hamath-mipawl in Ashima an tuah ih, 31 Avit-mipawl in Nibhas le Tartak an tuah, cule Sefarvit-mipawl in an pathian Adrammelek le Anammelek hnenah an fātepawl meisa ah an ur. 32 Cun annih cun Jehovah an ṭih ih, anmai lak ihsin an duh mimi kha hmun sâng puithiampawl ah an tuah ih, hmun sâng innpawl ah thawinak an tuahsak. 33 Jehovah an ṭih, cucingin hruaisuah an sinak miphunpawlih tidān vekin, anmai pathianpawl an rian.

34 Tuihni tiangin hlanlai tidanpawl an hmang vivo. Jehovah an ṭih lo ih, amah in Israel tiih a kawh mi Jakob tefapawl hnenah Jehovah in thu a rak pek mi an sakhaw dān siseh, an cīn le dānpawl siseh, dān le thupekpawl khal an thlun lo. 35 Anmah thawn Jehovah in thukham a tuah ih, «Nannih in pathian dangpawl nan ṭih lo pei, anmah cu nan be lo pei ih, anmah nan rian lo pei, an hnenah nan thawiaw fawn lo pei. 36 Izip ram ihsin huham ropi le bān suahih a lo hruaisuaktu Jehovah cu nan ṭih pei, amah nan be pei, cule a hnenah thawinak nan hlan pei. 37 Cule nan hrangih a ngan mi sakhaw dānpawl, cīn le dānpawl, dān le thupek thlun kumkhua dingin nan ralring pei, pathian dangpawl nan ṭih lo pei. 38 Cule nanmah thawi ka rak tuah mi thukham nan hngilh lo pei ih, pathian dangpawl khal nan ṭih fawn lo pei. 39 Cuhnakin Jehovah nan Pathian nan ṭih sawn pei, cule anih in nan ralpawl hmuahhmuah kut ihsin a lo runsuak ding a si,» tiah a cah hai. 40 Sikhalsehla annih in an rak ngaithla lo, cuhnakin an hlanlai tidanpawl an thlun sawn.

41 Cun hi miphunpawl in Jehovah an ṭih ih, an milimpawl khal an riancêm. An fātepawl le an fātepawlih fātepawl khal in tuihni tiangin an pupápawl vekin an tuah vivo.

18

Judah Siangpahrang Hezekiah

1 Elah fapa Israel siangpahrang Hoshea a lal a kum thumnak ah hitin a si, Ahaz fapa Judah siangpahrang Hezekiah lal a thăwk. 2 Amah cu siangpahrang a hung si tikah kum 25 mi a si ih, Jerusalem ah kum 29 sung a lal. A nuih hmin cu Abi a si ih, Zekariah fanu a si. 3 Cule anih cun a pa David ih rak tuah mi hmuahhmuah vekin, Jehovah mithmuhah thildik a tuah.

4 Hmun sângpawl a ṭhiat ih ṭhuamserhpawl a siatsuah, Asherah a hauthlu ih, Mosi ih rak tuah mi dar rul khal a khuaidarh ṭheh, ziangahtile cuih cān tiangah Israel tefapawl in cu tawkah rimhmui an ur ih, cumi cu aNehushtan tiah an ko. 5 Anih cun Israel-ih Pathian Jehovah a rinsan ih, Judah siangpahrang hmuahhmuah lakah amai hnuah siseh, amai hlanah siseh, mi pakhat hman amah vek an um lo. 6 Ziangahtile anih cun hnget zetin Jehovah a pawkbĕt, amah thlun cu a tlansan lo, Jehovah in Mosi thu a rak pek mi, a thupekpawl cu a thlun. 7 A hnenah Jehovah a um, a fehnak kip ah a hmuingil. Cule Assiria siangpahrang dokalhin a hél ih amah a rian lo. 8 Amah in Gaza khua le a ramri tiangin, ralvennak dawlsâng ihsin kulh nei khawpi tiang Filisṭia-mipawl a neh.

18:4a Nehushtan: Himi thuanthu ih micuktu rulngân kha Hebru ah Nakhash ti a si. Cuih rulngân dar ih tuah mi kha an bia ih, a hmin ah Nehushtan tiah an ko.

9 Cun Siangpahrang Hezekiah a lal a kum litnak ah, cumi cu Elah fapa Israel siangpahrang Hoshea a lal a kum sarihnak a si, hitin a si, Assiria siangpahrang Shalmaneser cun Samaria a hung do ih a kulh. 10 Cule kum thum a cem tikah, cumi cu an la. Hezekiah a lal a kum ruknak, Israel siangpahrang Hoshea a lal a kum kuatnak ah Samaria cu lâk a si. 11 Cun Assiria siangpahrang in Assiria-ih ralkaih ah Israel cu a hruaihlo ih, Halah le Habor tiva kiang, Gozan tiva le Medes khawpipawl ah a ret, 12 ziangruangahtile annih cun Jehovah an Pathian aw an ngaithla lo ih, a thukham le Jehovah siahhlawh Mosi ih thu a pek mi hmuahhmuah an pahbăl sawn, cule cupawl cu an ngaithla duh lo ih, an thlun duh fawn lo.

13 Cule Siangpahrang Hezekiah a lal a kum hleilitnak ah Assiria siangpahrang Sennakerib cu a hung so ih Judah ram ih kulh nei khawpipawl hmuahhmuah a la ṭheh. 14 Cun Judah siangpahrang Hezekiah in Lakish khua ah mi a thlah ih, Assiria siangpahrang hnenah, «Ka rak tisual a si, ka hnen ihsin kir aw. Nangmah ih i phût mi pauhpauh cu ka tuah ding,» tiah a ti. Cule Assiria siangpahrang in Judah siangpahrang Hezekiah cu ngun talent 300 le sui talent 30 a tuk. 15 Cun Hezekiah in Jehovah inn ih hmuh mi ngun hmuahhmuah le siangpahrang inn ih hlawnthilpawl lak ihsin a pe. 16 Cuih cān ah Hezekiah in Jehovah temple sângkapawl ihta le Judah siangpahrang Hezekiah ih a rak khût mi ṭhuampawl ihta sui cu a khăwk ih cumi cu Assiria siangpahrang a pe.

Sennakerib Tluang a Khâwng

17 Assiria siangpahrang in Lakish ihsin Tartan, Rabsaris le Rabshakeh pawl cu ralkap tampi thawn Jerusalem dokalhin Siangpahrang Hezekiah hnenah a thlah. Cule an so ih Jerusalem an thleng. An thlen tikah, an feh ih puan sawptuih hmunram fehnak zinpi tili sakta sawn tidai lâknak kiangah an ding. 18 Cule annih in siangpahrang an kawh tikah, inn hohatu a si mi Hilkiah fapa Eliakim, cangantu Shebna le Asaf fapa ngankhumtu Joah pawl tla an hnenah an ra suak.

19 Cule Rabshakeh in an hnenah, «Hezekiah hnenah atu ah, ‹Siangpahrang ropi Assiria siangpahrang in hitin a ti: Nan rinsan mi rinawknak hi ziang a si? 20 Doawknak hrangah khawkhannakpawl le huham neiin na sim, sikhalsehla cupawl cu ṭawngkam men lawng an si. Atu ah zo na rinsan ih keimah dokalhih na hél? 21 Atu ah zoh hnik! A kiak mi himi câlte kianghrăwl, Izip na rinsan a si hi, a parih mi a ṭhumawk asile, a kut sungah a lut ding ih a sun ding. Cuvekin Izip siangpahrang Faro a rinsantu hmuahhmuah an cang ding. 22 Asinan ka hnenah, «Jehovah kan Pathian kan rinsan,» na ti asile, cumi cu a hmun sângpawl le a biakṭhengpawl cu Hezekiah in a lahlo zo ih, Judah le Jerusalem ah, «Jerusalem ih himi biakṭheng hmaika-ah nan be ding,» a ti a si lo maw? 23 Curuangah atu ah, ka lo dil a si, Assiria siangpahrang ka bawipa hnenah thukamnak pe awla, nangmah lamin an parih totu dingpawl na ret thei ding asile, ráng 2000 ka lo pe ding! 24 Ránglêngpawl le rángtothiampawl hrangah Izip rinsanin, ka bawipaih siahhlawhpawl lakih a tebikpawl lakih ralbawi pakhat hman ziangtin so na khir thei ding? 25 Atu ah Jehovah tel loin, cumi siatsuah dingah hitawk hmun dokalhih ra maw ka si? Jehovah in ka hnenah, «Himi ram dokalhin so awla, cumi cu siatbăl aw,» tiah i ti a si,› tiin sim uh,» tiah a ti.

26 Cun Shebna, Joah le Hilkiah fapa Eliakim tepawl in Rabshakeh hnenah, «Zangfahten na siahhlawhpawl hnenah Aramik ṭawng in ṭawng aw, ziangahtile cucu kan thei, cule khawkulh parih um mipi hnatheihah Hebru ṭawng in kan hnenah ṭawng hlah,» tiah an ti.

27 Asinan Rabshakeh in an hnenah, «Ka bawipa in nan bawipa le nanmah hnenah hi thu sim dingin in thlah maw si? Khawkulh parih to ih nanmah thawn anmai êk ei le anmai zin in ding mipawl hnenah in thlah a si lo maw» tiah a ti.

28 Cun Rabshakeh cu a ding ih Hebru ṭawng in aw ring zetin a ausuak ih a ṭawng, «Siangpahrang ropi, Assiria siangpahrang-ih ṭawngkam ngai uh! 29 Siangpahrang in hitin a ti: ‹Hezekiah in lo bum hlah seh, ziangahtile anih in amai kut ihsin a lo run thei lo ding, 30 Hezekiah in, «Jehovah in in runsuak tengteng ding, hi khawpi cu Assiria siangpahrang kut ah pek a si lo ding,» tiin Jehovah lo rinsanter fawn hlah seh,› a ti. 31 Hezekiah cu ngaithla hlah uh, ziangahtile Assiria siangpahrang in hitin a ti: ‹Laksawng hmangin keimah thawn remnak tuah uhla, ka hnenah ra suak uh; cule nan lakih mi kip in anmai sabit hri ihsin le mi kip in anmai theipi kung ihsin an ei ding ih, mi kip in anmai tikhur cio ih ti an in ding. 32 Ka ra thlen ih nanmai ram vek, thlairawl le sabitzu ram, sang le sabit hmuan ram, olif hriak thar le khuaitizu thar ram ih ka lo hruaihloh hlanlo, nan nun ih nan thihlonak dingah, atu rori ah thilpek hmangin keimah thawn remnak tuah uhla, ka hnenah ra suak uh. Hezekiah cu ngaithla hrimhrim hlah uh, culoasile, «Jehovah in in run ding,» tiin a lo lēm ding. 33 Miphunpawl pathian lakih pakhat tal in a ram cu Assiria siangpahrang kut ihsin a rundam maw si? 34 Hamath le Arpad ih pathianpawl cu khuiah so? Sefarvaim le Hena le Ivah ih pathianpawl teh khuiah so? Ka kut ihsin Samaria kha an runsuak maw si? 35 Rampawlih pathianpawl hmuahhmuah lakin zopawl in so ka kut ihsin an rampawl rak runsuak? Cuti asile Jehovah in ka kut ihsin Jerusalem a runsuak thei ding maw si?› a ti,» tiah a ti.

36 Asinan mipi cu daiten an um ih, kam khat hman an let lo, ziangahtile siangpahrang-ih thupek cu, «Amah sawn hlah uh,» ti a si. 37 Cun inn hohatu, Hilkiah fapa Eliakim, cangantu Shebna le Asaf fapa ngankhumtu Joah cu an hnipuan tlekpi thawn Hezekiah hnenah an thleng ih, a hnenah Rabshakeh-ih ṭawngkampawl cu an sim.

19

Isaiah in Runsuahnak a Fiangter

1 Cule hitin a si, siangpahrang Hezekiah in cuih thu a theih tikah, a hnipuan a thlek ih, buri-hnipuan a khuhaw ih, Jehovah inn ah a lut. 2 Cun anih in siangpahrang sungkua hohatu Eliakim, cangantu Shebna le puithiampawl lakih upapawl cu buri-hnipuan khuhawin Amoz fapa profet Isaiah hnenah a thlah hai. 3 Cule annih in a hnenah, «Hitin Hezekiah in a ti, ‹Tuihni cu buainak le kawkawknak le thangsiatawknak ni a si, ziangahtile naute suah a cu thlang, asinan sangsuak dingin tha a nei lo. 4 A nung mi Pathian simse dingih a bawipa Assiria siangpahrang in a thlah mi Rabshakeh ṭawngkampawl cu Jehovah na Pathian in a theih ka zum, cule Jehovah na Pathian in a theih mi ṭawngkampawl hmuahhmuah ruangah amah cu a kawk ding. Curuangah tān mi a tāngsŭnpawl hrangah thlacam aw,› tiin,» tiah an ti.

5 Cun siangpahrang Hezekiah siahhlawhpawl cu Isaiah hnenah an feh. 6 Cule Isaiah in an hnenah, «Nan bawipa hnenah hitin nan sim pei, ‹Jehovah in, «Assiria siangpahrang siahhlawhpawlih in thangsiatnak na theih mi ṭawngkampawl kha ṭih hlah. 7 Ngai hnik, a parah thlarau pakhat ka ret ding ih, anih in thuthang a thei ding, cule amai ram ah a kir ding; cule amai ram ah ralnâm ih tlu dingin ka tuah ding,» a lo ti,› tiah nan ti pei,» tiah a ti hai.

Hezekiah Thlacamnak

8 Cun Rabshakeh cu a kirsal ih, Assiria siangpahrang in Libnah khua a do rero lai a va hmu, ziangahtile anih cu Lakish khua ihsin a suak zo ti a thei. 9 Cule siangpahrang in, «Zoh hnik, anih cu nangmah thawi doaw dingin a fehsuak zo,» tiah Kush siangpahrang Tirhakah-ih thuhla a thei. Cun anih cun Hezekiah hnenah palaipawl a thlahsal ih, 10 «Judah siangpahrang hnenah hitin nan sim pei, ‹Na rinsan mi na Pathian in, «Jerusalem cu Assiria siangpahrang kut ah pek a si lo ding,» tiin lo bum hlah seh. 11 Zoh hnik! Assiria siangpahrangpawl in siatbăl ṭheh verver ko ram hmuahhmuah parih an tuah mi cu na hna in na thei zo. Cuti a si ahcun nang cu runsuahin na um ding maw? 12 Miphunpawlih pathianpawl in ka pupápawlih an rak siatbăl mi, Gozan le Haran le Rezef le Telassar ih a um mi Eden-mipawl kha an rak runsuak dah maw? 13 Hamath siangpahrang, Arpad siangpahrang, Sefarvaim khawpi siangpahrang, Hena siangpahrang le Ivah siangpahrang kha khuiah so?› tiin nan va sim pei,» tiah a ti hai.

14 Cule Hezekiah cun palaipawl kut ihsin cakuat a ngah ih a siar. Cule Hezekiah cu Jehovah inn ah a so ih, cumi cu Jehovah hmaiah a pharh. 15 Cun Hezekiah in Jehovah hmaiah, «Maw Jehovah, Israel Pathian, cherub-pawl karlakih cêng, nang cu Pathian na si, leitlun lalram hmuahhmuah ah nangmah lawng na si. Nangmah in van le leilung na tuah. 16 Maw Jehovah, na hna tháwng awla, rak ngai aw; Maw Jehovah, na mit meng awla, zoh hnik; a nung mi Pathian simse dingih a kuat mi Sennakerib-ih ṭawngkampawl hi ngaithla aw. 17 Maw Jehovah, Assiria siangpahrangpawl in miphunpawl le an rampawl cu an ṭhingter thluh ngaingai ih, 18 an pathianpawl cu meisa ah an urkāng, ziangahtile annih cu pathian taktak an si lo, milai kutsuak thing le lung an si sawn. Curuangah cupawl cu annih in an rak siatbăl ṭheh a si. 19 Curuangah, atu ah Maw Jehovah kan Pathian, leitlun lalrampawl hmuahhmuah in nangmah lawng hi Jehovah Pathian na si ti an theihnak dingah, a kut ihsin in rundam hram aw,» tiin thla a cam.

Sennakerib Thuhla ih Jehovah Ṭawngkam

20 Amoz fapa Isaiah in Hezekiah hnenah, «Israel-ih Pathian Jehovah in, ‹Assiria siangpahrang Sennakerib thuhla ah ka hnenih thla na cam mi ka rak theih ruangah, 21 hihi Jehovah in amah dokalhih a rel mi a kamsuakthu cu a si:

‹Fala him, Zion fanu cun,
A lo nautat ih, hmuhsuamin a lo hnihsan;
Jerusalem fanu cun
aNa dung ihsin a lu a lo thĭn!
22 Zo so na simsiat ih na thangsiat?
Zo dokalhin saw na aw na suah ih,
Na mit sâng ih na ngauhnawh?
Israel Mi Thianghlim dokalhin a si lo maw?
23 Na palaipawl hmangin Bawipa rak simsia in,
«Ka ránglêng tampi thawn
Tlang sângpi pi ah ka kai,
Lebanon tlang sannakbik ah cun;
A sidar thing sângpi pi le,
A mirang far thing ṭhaṭhapawl ka hau ding;
Ramri dĕng cēnnakpawl ah ka lut ding,
A leiram ṭha tupi sungah.
24 Tikhur ka lai ih tidai danglam ka in,
Cule ka ke zaphak in kilhimnak tivate hmuahhmuah ka kāngter ṭheh,» tiah na ti.
25 Hihi hna in na thei dah lo maw si?
Tuan le māng laiah cumi cu ka rak ruatfel zo,
Khuahlan ihsin cumi cu ka rak tum zo,
Kulhhnget nei khawpipawl siatbălin thilse penkhawm menih na canter dingah,
Atu ah cumi cu ka cangsuakter a si.
26 Curuangah an sungih cêngpawl in huham málte an nei.
Annih cu an thla a ṭem ih an ān a hai;
Annih cu ramlak hrampi le
Thlai hring vek an si,
A pitlin man hlanih ni ih a emro mi inn luanglu rāwn parih hrampi vek an si.
27 Asinan na cēnnak hmun,
Na thil ti mi hmuahhmuah le,
Ka parih na thinsosatnak ka thei.
28 Ka parih na thinsosatnak le na vaivungawknak cu
Ka hna ih a hung thlen ruangah,
Ka sio cu na hnar ah ka thluah ding ih,
Ka kakharh cu na kâ ah;
Cule na ratnak zin in ka lo kirter ding.
29 ‹Hihi na hrangih hminsinnak a si pei:
Tuih kum ah amah teih kho mi nan ei ding ih,
A kum hnihnak khal cumi ihsin a kho mi thotho nan ei ding;
A kum thumnak khalah nan tuh ding ih nan ât ding,
Sabit hmuanpawl tla tuah uhla, a rah ei uh.
30 Cule Judah sungza lakih a tlânsuak minung tāngsŭn cu
Hnuai lamih hramthla le
Tlun lamih rahsuahin an umsal ding.
31 Ziangahtile Jerusalem ihsin mitāngsŭnpawl an feh ding,
A tlânsuakmipawl cu Zion Tlang ihsin.
Ralkap rualpawlih Jehovah-ih ṭhahnemngainak in himi hi a tuah ding a si.›

19:21a Na dung ihsin: Assiria a si.

32 Curuangah Jehovah in Assiria siangpahrang thuhla ah hitin a sim:

‹Anih cu hi khawpi sungah a lut lo ding ih,
Cu tawkah thálfung khal a sai lo ding,
Khawpi hmaiah ralphaw keng khalin a ra fawn lo ding,
Khawpi kulhkhŭmnak lei sunpâwng dâwl fawn lo ding.
33 A ratnak zin thothoin a tlungkir ding,
Cule anih cu hi khawpi sungah a lut lo ding,› Jehovah in a ti.
34 ‹Ziangahtile hi khawpi run dingin ka kilveng ding,
Keimah ruangah le ka siahhlawh David ruangah,›

tiah a ti,» tiin.

Sennakerib Sunnak le Thihnak

35 Cule cuih zan ah hitin a si, Jehovah-ih vancungmi cu a fehsuak ih, Assiria-mipawlih ṭanhmun khuarnak ah mi ting khat le thawng sawmriat le thawngnga a that; cule zingteih mipi an thawh tikah, zoh hnik, mithi ruang hlir an um. 36 Cun Assiria siangpahrang Sennakerib cu a suak ih a feh, inn ah a kir ih, Nineveh ah a va um. 37 Cule hitin a si, a pathian Nisrok temple ih pathian a biak laiah, amai fapa Adrammelek le Sharezer in amah cu ralnâm in an sahthluk; cule anmah cu Ararat ram ah an tlânhlo. Cun a aiah a fapa Esarhaddon a lal.

20

Hezekiah a Dam Lo

1 Cu laiah Hezekiah cu a na ih a thi zikte. Cule Amoz fapa profet Isaiah cu a hnenah a feh ih, «Jehovah in hitin a ti: ‹Thupek vekin na inn hi dĭn aw, ziangahtile na thi ding ih, na nung lo ding,› a lo ti,» tiah a ti.

2 Cun anih cu phăr lam a hawi ih, Jehovah hnenah thla a cam ih, 3 «Maw Jehovah, ka lo ngen a si, thungaithlak le rinumnak thinlung thawi na hmaika-ih ka nundān le na mithmuhih thil ṭha ka tuah mipawl kha cing hram aw,» tiah a ti. Cule Hezekiah cu nasazetin a ṭap.

4 Cule hitin a si, Isaiah cu tualrawn laifang a thlenngah hlanah a hnenah Jehovah kamsuakthu a thleng ih, 5 «Kirsal awla, ka mipawl hotu Hezekiah kha sim aw, ‹Jehovah, na pa David-ih Pathian in hitin a sim: «Na thlacam ka thei, na mitthlipawl tla ka hmu, zoh hnik, ka lo tidam ding. A ni thumnak ah Jehovah inn ah na so ding. 6 Cule na damsung nipawl cu kum hleinga ka bêt ding. Assiria siangpahrang kut ihsin nangmah le hi khawpi cu ka runsuak ding, cule keimai ruangah le ka siahhlawh David ruangah hi khawpi cu ka hum ding,» tiin,› » tiah a ti.

7 Cun Isaiah in, «Theipi rah hmeh mi hlawm khat la uh,» tiah a ti. Cule annih in an la ih khuaihli parah an bĕn, cule anih cu a dam.

8 Cule Hezekiah in Isaiah hnenah, «Jehovah in i damter ding ih, a ni thumnak ah Jehovah inn ah ka so ding ti hminsinnak cu ziang a si?» tiah a ti.

9 Cule Isaiah in, «Himi hi na hnenah Jehovah hnen ihsin hminsinnak a si, Jehovah in a sim zo mi thil a tuah ding: thlahlim cu hmai lamah dikari pahra simaw, dung lamah dikari pahra simaw a feh ding?» tiah a ti.

10 Cule Hezekiah in, «Thlahlim dikari pahra ṭum ding cu thil ăwl a si aw, cuticun si hlah seh, thlahlim cu dung lamah dikari pahra kir sawn seh,» tiah a ti.

11 Cun profet Isaiah cu Jehovah hnenah a au ih, amah in dung lamah dikari pahra in thlahlim cu a kirter, cumi hmangin cumi cu Ahaz-ih kailawn tiang a kir.

Babilon ihsin Palaipawl

12 Cu laiah Baladan fapa, Babilon siangpahrang Berodakh-Baladan in Hezekiah hnenah cakuatpawl le laksawng a kuat, ziangahtile anih cun Hezekiah a dam lo ti a thei. 13 Cule Hezekiah cun anmah a ngaihsak ih, a hlawnthil retnak inn hmuahhmuah, sui le ngun, rimhmuipawl le hnih mi hriak mankhung le a ralthuam retnak inn, a hlawnthilpawl lakih an hmuh mi hmuahhmuah a zohter hai. A inn sungah le a uknak hmuahhmuah ah Hezekiah in anmah a zohter lo mi zianghman a um lo.

14 Cun profet Isaiah cu Siangpahrang Hezekiah hnenah a feh ih, a hnenah, «Hi milaipawl in ziangso an rel ih, khui ihsin so na hnenih an rat?» tiah a ti.

Cule Hezekiah in, «Ram hlapi, Babilon ihsin an ra,» tiah a ti.

15 Cule anih in, «Na inn ah ziangso an hmuh?» tiah a ti.

Cun Hezekiah in, «Ka inn sungih um mi hmuahhmuah an hmu ṭheh; ka hlawnthil retnak innpawl ah anmah ka zohter lo mi pakhat hman a um lo,» tiah a ti.

16 Cun Isaiah in Hezekiah hnenah, «Jehovah kamsuakthu hi rak ngai aw: 17 ‹Ngai hnik, na inn sungih a um mi hmuahhmuah le na pupápawl in tuihni tiangih an rak khawl mipawl hmuahhmuah, Babilon ih an thiar thluh ding cān a ra thleng ding; zianghman tān mi an nei lo ding,› tiah Jehovah in a ti. 18 ‹Cule nangmah ihsin a suak ding mi, na hrin ding mi na fapa hrekkhat khal an hruaihlo ding ih, Babilon siangpahrang-ih siangpahrang inn ah tilper mi ah an cang ding,› a ti,» tiah a ti.

19 Cun Hezekiah in Isaiah hnenah, «Na rak sim mi Jehovah kamsuakthu cu a ṭha!» tiah a ti. Ziangahtile amah in, «Ka damsung ah daihnak le thutak a um cun a ṭha ko lo maw?» tiah a ti.

Hezekiah Thihnak

20 Cun a tāng lai mi Hezekiah-ih căngvaihnakpawl, a cahnak hmuahhmuah, tili le tikáwng a tuahdān le khawpi sungih tidai a hruaidān pawl cu Judah siangpahrangpawlih sansiarnak cazualpawl ah ngan an si lo maw? 21 Cule Hezekiah cu a pupápawl hnenah a cawl. Cun a fapa Manasseh cu a aiah a lal.

21

Judah Siangpahrang Manasseh

1 Manasseh cu siangpahrang a hung si tikah, kum hleihnih mi a si ih, Jerusalem ah kum 55 sung a lal. A nuih hmin cu Hefzibah a si. 2 Cule anih cun Jehovah in Israel tefapawl hmaiih a rak hlăwnsuak zo mi miphunpawlih thil fihnungzapawl zulhin Jehovah mithmuhah thil ṭhalo a tuah. 3 Anih cun a pa Hezekiah ih rak siatbăl mi hmun sângpawl a dĭnsal. Baal hrangah biakṭhengpawl a dâwl ih, Israel siangpahrang Ahab ih rak tuah mi vekin Asherah pakhat a tuah, cule van ih thilmak rual hmuahhmuah a bia ih a rian. 4 Jehovah in, «Jerusalem ah ka hmin ka ret ding,» a tinak Jehovah inn ah biakṭhengpawl khal a dâwl. 5 Cule Jehovah inn tualrawn pahnih ah van ih thilmak rual hmuahhmuah hrangah biakṭhengpawl a dâwl. 6 Cuihhleiah a fapa meisa a paltlăngter, aizoh a hmang, thilcam a hmang ih, thlaraupawl le thlarau kawhthiampawl a ráwn. A thinhengnak căwktho dingah Jehovah hmaiah thil ṭhalo tam tuk a tuah. 7–8 Jehovah in David le a fapa Solomon hnenah, «Israel hnám hmuahhmuah lak ihsin ka hril mi hi inn ah le Jerusalem ah kumkhuain ka hmin ka ret ding, cule thu ka pek mi hmuahhmuah vekin le ka siahhlawh Mosi in anmah dān a pek mi hmuahhmuah vekih tuah dingih an ralrin a si ahcun, an pupápawl ka rak pek mi ram ihsin Israel ke cu vâkvaiin ka tuah lo ding,» a rak tinak inn ah anih in kher ih a tuah mi Asherah tiangin a ret. 9 Asinan annih cun an ngaithla lo ih, Manasseh cun Jehovah in Israel tefapawl hmaiih a rak siatsuah mi miphunpawl hnakih thil ṭhalo sawn tuah dingin anmah cu a thlem.

10 Cule Jehovah in a siahhlawh profetpawl hmangin a sim ih, 11 «Judah siangpahrang Manasseh in himi thil fihnungzapawl hi a tuah, a hmaiih Amor-mi hmuahhmuah hnakih sualrálsawnin a cāngvai ih, a milempawl thawn Judah a sualter ruangah, 12 Israel-ih Pathian Jehovah in hitin a ti: ‹Zoh hnik, Jerusalem le Judah tlunah vanduainak ka thlĕn ding, cumi a theitu zokhal a hna a pahnih in a khīng ding. 13 Cule Jerusalem tlunah Samaria-ih tahnak hri le Ahab inn ih darhlumthlai hri ka thlai ding. Jerusalem cu mi in khēng a hnawt ih, a ling a let ih a hnawt bangin ka hnawt ding.

14 Cun ka roco mitangsŭn cu ka thlauthla hai ding ih an ralpawl kut ah ka pe hai ding, cule an ralpawl hmuahhmuah ih ralkaih le rallâksum ah an cang ding, 15 ziangahtile ka mithmuhah thil ṭhalo an rak tuah ih, Izip ihsin an pupápawl an ra suah ni ihsin tuihni tiangin thinheng dingah keimah in căwktho,› tiin,» a ti.

16 Jehovah mithmuhih thil ṭhalo tuahin Judah a sualternak sual hleiah, Manasseh cun Jerusalem khat lam ihsin khat lam khat ko tiangin mawh nei lo thisen tam zet a suah.

17 Cun a tāng lai mi Manasseh-ih căngvaihnakpawl, a tuah mi hmuahhmuah le thilsual a tuah mi cu Judah siangpahrangpawlih sansiarnak cazualpawl ah ngan an si lo maw? 18 Cule Manasseh cu a pupápawl hnenah a cawl ih, Uzza hmuan ih amai inn hmuan ah phum a si. Cun a fapa Amon cu a aiah a lal.

Judah Siangpahrang Amon

19 Amon cu siangpahrang a hung si tikah kum 22 a si ih, Jerusalem ah kum hnih sung a lal. A nuih hmin cu Meshullemeth, Jotbah-mi Haruz fanu a si. 20 Cule anih cu a pa Manasseh ih rak tuah vekin Jehovah mithmuhah thil ṭhalo a tuah. 21 Cun a pa ih zawh mi lamzin hmuahhmuah a zawh ih, a pa ih rĕn mi milempawl a rian ih a bia. 22 A pupápawlih Pathian Jehovah a tlansan ih, Jehovah lamzin a zawh lo. 23 Cun Amon-ih siahhlawhpawl in amah an phiarthup ih siangpahrang cu amai inn ah an that. 24 Asinan rammipawl in Siangpahrang Amon phiarthuptu hmuahhmuah cu an that. Cun rammipawl in a fapa Josiah cu a aiawhin siangpahrang ah an tuah.

25 Cun a tāng lai mi Amon ih tuah mi căngvaihnakpawl cu Judah siangpahrangpawlih sansiarnak cazualpawl ah ngan an si lo maw? 26 Cule anih cu Uzza hmuan sungih amai thlān ah phum a si. Cun a fapa Josiah cu a aiah a lal.

22

Judah Siangpahrang Josiah

1 Josiah cu siangpahrang a hung si tikah kum riat mi a si ih, Jerusalem ah kum 31 sung a lal. A nuih hmin cu Jedidah, Bozkath khawmi Adaiah fanu a si. 2 Cule anih cun Jehovah mithmuhah thil ṭha a tuah ih, a pa David lamzin hmuahhmuah a zawh. Anih cu vawrh lamah simaw, keh lamah simaw a pial lo.

Hilkiah in Dān Cazual a Hmusuak

3 Cun hitin a si, Siangpahrang Josiah a lal a kum hleiriatnak ah Siangpahrang in Meshullam fa Azaliah-ih fapa cangantu Shafan cu Jehovah inn ah a thlah ih, 4 «Puithiam lubik Hilkiah hnenah feh awla, Jehovah inn sungih rak ken mi, mipi hnen ihsin sângka kiltupawlih khawnkhawm mi paisa siar seh. 5 Cule cumi cu Jehovah inn ih hna vilvengtu kut ah pe hai seh. Cule annih in cumi cu Jehovah inn sungih inn se rĕmtu hnaṭuantu, 6 lettamapawl le inn saktupawl le lung sertupawl hnenah thing le ser mi lung leinak ah le inn rĕmnak ah pe hai seh. 7 Sikhalsehla an kut sungih ap mi paisa cu cek ṭulih ruah ding a si lo, ziangahtile annih in rinumten an hmang a si,» tiah a ti.

8 Cun puithiam lubik Hilkiah in cangantu Shafan hnenah, «Jehovah inn sungah Dān Cazual ka sar,» tiah a ti. Cule Hilkiah in Shafan hnenah cuih cazual cu a pe ih anih in cumi cu a siar.

9 Cun cangantu Shafan cu siangpahrang hnenah a feh ih thu a phursal, «Na siahhlawhpawl in inn sungih hmuh mi paisa an khawm ih, cumi cu Jehovah inn vilvengtu, hna a ṭuantupawlih kut ah an ap,» tiah a ti. 10 Cun cangantu Shafan in, «Puithiam Hilkiah in cazual pakhat i pe,» tiin siangpahrang cu a hmuh. Cule cumi cu Shafan in siangpahrang hmaiah a siar.

11 Cun hitin a si, siangpahrang in Dān Cazual sungih kamsuakthupawl a theih tikah a hnipuan a thlek. 12 Cun siangpahrang in puithiam Hilkiah, Shafan fapa Ahikam, Mikaiah fapa Akbor, cangantu Shafan le siangpahrang siahhlawh Asaiah cu thu a pe hai ih, 13 «Feh uh, ka hrang, mipi hrang le Judah hmuahhmuah hrangih sar a si mi hi cazual sungih kamsuakthupawl thuhla ah Jehovah sut uh, ziangahtile kanmah dokalhih a tho mi Jehovah thinlingnak hi a nasatuk, ziangahtile kanmai thuhla ngan a si mi hmuahhmuah vekih tuah dingin kan pupápawl in hi cabu sungih kamsuakthupawl an rak thlun lo,» tiah a ti.

14 Cun puithiam Hilkiah, Ahikam, Akbor, Shafan le Asaiah cu hnipuan kiltu Harhas fapa Tikvah fapa Shallum nupi profet Huldah hnenah an feh. Cu nu cu Jerusalem khua Veng Thar ih cêng a si. Cule amah cu an bia. 15 Cun anih in an hnenah, «Israel-ih Pathian Jehovah in hitin a ti, ‹Ka hnenih lo thlahtupa hnenah sim uh. 16 «Jehovah in hitin a sim: ‹Zoh hnik uh, Judah siangpahrang in a siar mi cazual sungih kamsuakthupawl vekin, hitawk hmun le a luahtupawl parah vanduainak ka thlĕn ding, 17 ziangruangahtile annih cun anmai kut ih tuah mi hmuahhmuah thawn ka thinhengnak căwktho dingah, keimah in tlansan ih pathian dangpawl hnenah rimhmui an ur. Curuangah hi hmun ah ka thinhengnak a alh ding ih, a mit lo ding,› tiin,» a ti› tiin. 18 Asinan Jehovah sut dingih nanmah lo thlahtu Judah siangpahrang hrangah cun a hnenah hitin nan sim pei, ‹Israel-ih Pathian Jehovah in hitin a sim: «Na rak theih mi kamsuakthupawl thuhla ah, 19 na thinlung a nem ih, himi hmun le cutawk hlumtupawl dokalhih răm mi le camsiat mi an si ding tiih ka ṭawng mi na theih tikah na hnipuan na thlek, ka hmaiah na ṭap ih, Jehovah hmaiih na tăngdawrawkter ruangah, kei khal in ka lo ngaithla ve a si. 20 Curuangah zoh hnik, na pupápawl hnenah ka lo fĭn ding ih, na thlān ah hnangamten fĭn na si ding, cule hi hmun ih ka thlenter ding mi vanduainak hmuahhmuah cu na mit in a hmu lo ding,» tiah Jehovah in a ti› tiin,» a ti. Cule siangpahrang hnenah thu an phurkir.

23

Josiah in Pathian Biak a Tungdingsal

1 Siangpahrang in mi a thlah hai ih, Judah ram le Jerusalem ih upapawl hmuahhmuah a hnenah an kokhawm. 2 Siangpahrang cu Judah ram ih mipapawl hmuahhmuah thawn, Jerusalem luahtu hmuahhmuah thawn, puithiampawl le profetpawl thawn, mipi hmuahhmuah thawn, a tûm a te in Jehovah inn ah an hung so. Cule anih in Jehovah inn sungih sarsuah mi Thukham Cazual sungih kamsuakthupawl hmuahhmuah cu an hnatheihah a siar.

3 Cun siangpahrang cu ṭhuam pakhat kiangah a ding ih, Jehovah hmaiah a thinlung hmuahhmuah le a nunnak hmuahhmuah in, hi cazual sungih ngan mi hi thukhamih kamsuakthupawl cu tuahsuak in, Jehovah thlunih a thupekpawl le a thutheihtermipawl le a sakhaw dānpawl tla thlun dingin thukham a tuah. Cule mipi zaten thukham ah cun an ding. 4 Cule siangpahrang in puithiam lubik Hilkiah, a sangtu puithiampawl le sângka kiltupawl cu Jehovah temple sungih Baal hrang, Asherah hrang le van ih thilmak rual hmuahhmuah hrangih tuah mi bungruapawl hmuahhmuah cu lasuak dingin thu a pe hai. Cun Jerusalem lengih Kidron ramlak ah a ur ih an vutcâm cu Bethel ah a phur. 5 Cun Judah khawpipawl le Jerusalem kiangkap hmuahhmuah ih hmun sângpawl parih rimhmui ur dingah Judah siangpahrangpawlih rak ruat mi milem bia puithiampawl le Baal hnen, ni hnen, thlapi hnen, arsipawl hnen le van ih thilmak rual hmuahhmuah hnenih rimhmui urtupawl a ṭhawnhlo. 6 Cule Jehovah inn ihta Asherah cu Jerusalem lengih Kidron Tivate ah a lasuak ih Kidron Tivate kapah a ur, cule a rialdip thluh ih a vutcâm cu mivantlangpawlih thlān parah a vawrh. 7 Cun anih cun Jehovah inn sungih nunaupawl in Asherah hrangih puanzar an tuahnak, amipa hlawhhlâng bûkpawl cu a cimter. 8 Cule Judah khawpipawl ih puithiampawl hmuahhmuah a ko hai ih, Geba ihsin Beersheba tiangin puithiampawlih rimhmui urnak hmun sângpawl a bawrhbangter. Khawpi kăwtka keh lamih um, khawpi uktu Joshua-ih Kăwtsuah kăwtkapawl ih hmun sângpawl khal a siatbăl. 9 Sikhalsehla hmun sâng puithiampawl cu Jerusalem ih Jehovah biakṭheng ah an so ve lo, asinan an unaupawl lakah thilnu telh lo sang cu an ei ve.

23:7a mipa hlawhhlâng: Biaknaksakhua thawi pehtlaiaw mi hlawhhlâng a si. An biaknaksakhua temple ah an um ṭheu.

10 Cule zohman in an fapa simaw, an fanu simaw Molek hnenih mei an paltlăngter nawn lonak dingah, Hinnom Fapapawl Phaikuam ih um aTofeth cu a bawrhbangter. 11 Cun Jehovah inn luhnak, tualrawn ih um, pindan kiltu Nathan-Melek pindan kiangih Judah siangpahrangpawl in ni hnenih an rak hlăn mi rángpawl cu a ṭhawnhlo ih, meisa in ni ránglêngpawl cu a ur. 12 Siangpahrang cun Judah siangpahrangpawl ih rak tuah mi Ahaz pindan tlunta, luanglu parih biakṭhengpawl le Jehovah inn tual pahnih ah Manasseh ih rak tuah mi biakṭhengpawl a bălthla ih, cu tawkah a rawtzâm ih an vutcâm cu Kidron Tivate sungah a hlăwn. 13 Cun Jerusalem nisuahnak lam, Bawrhhlawhnak Tlang thlang lamih um, Israel siangpahrang Solomon in Sidon-mipawlih fihnungza bAshtoreth hrang, Moab rammipawlih fihnungza Kemosh hrang le Ammon-mipawlih fihnungza Milkom hrangih an dĭn mi hmun sângpawl cu siangpahrang in a bawrhbangter. 14 Cule ṭhuampawl cu cip seksekin a khuai ih Asherahpawl a hauthlu, cule mipapawl ruh in an hmunpawl cu a khatter.

23:10a Tofeth: Aramik ṭawngfáng ihsi lâk mi a si men thei, a sullam cu «meisa kāng hmun» tinak a si; Jerusalem thlang lam, Hinnom phaikuam hmun ih hmun hleice pakhat a si.

23:13b Ashtoreth: Fonisia-mipawlih nunau pathian a si. «Astarte» ti khalih kawh a si.

15 Cuihhleiah Bethel ih biakṭheng le Israel sualtertu Nebat fapa Jeroboam in a rak tuah mi hmun sâng, cuih biakṭheng le hmun sâng a ṭhiatbăl, cule hmun sâng cu a ur ih, a rawtdip thluh, cule Asherah cu meisa in a ur. 16 Josiah cu a heraw ih tlang parih um thlānpawl a hmu. Cule mi a thlah ih thlānpawl ihta ruhpawl a la ih biakṭheng parah a ur, cumi cu hi thu rak phuangtu Pathian mi ih phuan mi Jehovah kamsuakthu vekin a bawrhbangter. 17 Cun anih in, «Hih ka hmuh mi thlānlung cu ziang a si?» tiah a ti.

Cun khaw sung mipapawl in, «Bethel biakṭheng dokalhin na tuah mi hih thilpawl rak phuangtu, Judah ram ihsi ra, Pathian miih thlān a si,» tiin amah an sim.

18 Cule anih in, «Um ko seh, zohman in a ruhpawl ṭhawn hlah uh,» tiah a ti. Cun annih in a ruhpawl cu Samaria ihsi ra profet-ih ruhpawl thawn zianghman an ti lo.

19 Cun Josiah in Jehovah thinhengnak căwktho dingah Israel siangpahrangpawlih rak tuah mi, Samaria khawpipawlih um hmun sângpawl ih innpawl hmuahhmuah khal a lahlo ih, Bethel khua ih rak tuah mi thil ti hmuahhmuah vekin anmah parah a tuah.

20 Cutawk ih um hmun sângpawl ih puithiampawl hmuahhmuah cu biakṭhengpawl parah a that hai ih, an parah mipapawlih ruhpawl cu a ur, cule anih cu Jerusalem ah a kir.

21 Cule siangpahrang in mipi hmuahhmuah cu thu a pe ih, «Himi Thukham Cazual sungih ngan mi vekin, Jehovah nan Pathian hnenah Lanta puai hmang uh,» tiah a ti. 22 Cuvek Lanta puai cu Israel thu rak ṭhentu laireltupawl san ihsin siseh, Israel siangpahrangpawl le Judah siangpahrangpawlih san hmuahhmuah khalah rak hman a si dah hrimhrim lo. 23 Asinan Siangpahrang Josiah a lal a kum hleiriatnak ah cun Jerusalem ah Jehovah hmaiah hi Lanta puai cu hman a si.

24 Cuihhleiah Josiah in thlarau kawhthiampawl le thlaraurawntupawl, sungkaw milempawl le milimpawl, Judah ram le Jerusalem ih hmuh mi thil fihnungzapawl hmuahhmuah cu puithiam Hilkiah in Jehovah inn sungih a hmuh mi cazual sungih ngan mi dān ṭawngkampawl a tuahsuaknak dingah a hlăwn. 25 Cun zohman amai hlanah Mosi Dān hmuahhmuah vekih thinlung zate, nunnak zate le cahnak zateih Jehovah hnenih kirtu siangpahrang an um lo ih, amai hnu khalah an suak lo.

Judah parih Thuṭhennak

26 Sikhalsehla Jehovah cu Manasseh ih a căwkthawh mi a aithawhnak hmuahhmuah ruangah Judah parih a alh mi a thinhengnak, ṭihnungza a thinlingnak nasazet ihsin a lamlêt cuang lo. 27 Cule Jehovah in, «Israel ka ṭhawnhlo vekin, Judah khal ka mithmuh ihsin ka ṭhawnhlo ding, ka rak hril mi himi khawpi Jerusalem le, ‹Cu tawkah ka hmin a um ding,› ka rak tinak inn khal ka hlăwn ding,» tiah a ti.

Doawknak ah Josiah a Thi

28 Cule a tāng lai mi Josiah-ih căngvaihnakpawl le a tuah mi hmuahhmuah cu Judah siangpahrangpawlih sansiarnak cazualpawl ah ngan an si lo maw? 29 A san laiah Izip siangpahrang Faro Neko cu Assiria siangpahrang dokalhin Zufraṭis Tiva ah a feh. Siangpahrang Josiah cu amah dokalhin a feh ih a va tawn tikah Megiddo ah Faro Neko in amah cu a rak that. 30 Cun a ruak cu a siahhlawhpawl in Megiddo ihsin ránglêng thawn an phur, Jerusalem ah an tlunpi ih, amai thlān ah an phum. Cule rammipawl in Josiah fapa Jehoahaz cu an hruai ih hriak an thih, cule a pa aiah siangpahrang ah an tuah.

Judah Siangpahrang Jehoahaz

31 Jehoahaz cu siangpahrang a hung si tikah, kum 23 mi a si ih, Jerusalem ah thla thum sung a lal. A nuih hmin cu Hamutal a si ih, Libnah khawmi Jeremiah fanu a si. 32 Cule anih cu a pupápawl ih rak tuah mi hmuahhmuah vekin Jehovah mithmuhah thil ṭhalo a tuah. 33 Cule amah cu Jerusalem ih a lal theilonak dingah, Faro Neko in Hamath ram sungih Riblah ah a ṭemṭawn ih, cuih ram parah ngun tale­nt 100 le sui talent khat ngunkhuai a tuk. 34 Cun Faro Neko in Josiah fapa Eliakim cu a pa Josiah aiawhah siangpahrang ah a tuah. A hmin khal Jehoiakim tiin a thlengsak. Cule Faro in Jehoahaz cu a hruai ih, Izip ram ah a feh, cule cu tawkah a thi.

Judah Siangpahrang Jehoiakim

35 Cun Jehoiakim cun Faro hnenah ngun le sui a pe, cuih ram cu Faro thupek vekin paisa pe dingin siah a khuanter; Faro Neko hnenih pe dingih mi kip khuan dingih a tuk zât cio vekin, cuih rammipawlih ngun le sui a khuanter. 36 Jehoiakim cu siangpahrang a hung si tikah, kum 25 mi a si ih, Jerusalem ah kum hleikhat a lal. A nuih hmin cu Zebudah a si ih, Rumah khawmi Pedaiah fanu a si. 37 Cule anih cu a pupápawl ih rak tuah mi hmuahhmuah vekin, Jehovah mithmuhah thil ṭhalo a tuah.

24

Ralpawl in Judah Ram an Do

1 Amai san ah Babilon siangpahrang Nebukhadnezzar cu a hung so ih, Jehoiakim cu kum thum sung a siahhlawh ah a cang. Cun Jehoiakim cu a pial ih amah dokalhin a hél. 2 Cule Jehovah in amah do dingah Kaldia mi burpawl, Siria mi burpawl, Moab mi burpawl le Ammon mi burpawl a thlah. A siahhlawh profetpawl hmangih a rak sim mi, Jehovah kamsuakthu vekin Judah ram tisiat dingin anmah cu a thlah hai. 3–4 Thungaiten himi hi, Manasseh ih a rak tuah mi sualpawl hmuahhmuah ruangah le mawh nei lo thisen tiang a suah ruangah, a mithmuh ihsi anmah ṭhawnhloh ding cu Judah parih Jehovah thupek vekin a si. Ziangahtile anih cun Jehovah in a ngaithiam lo ding mi mawh nei lo thisen in Jerusalem a khatter.

5 Cun a tāng lai mi Jehoiakim-ih căngvaihnakpawl le a tuah mi hmuahhmuah cu Judah siangpahrangpawlih sansiarnak cazualpawl ah ngan an si lo maw? 6 Cule Jehoiakim cu a pupápawl hnenah a cawl ih a aiawhin a fapa Jehoiakin in a uk.

7 Babilon siangpahrang in Izip siangpahrangih neih mi Izip Tivate ihsin Zufraṭis Tiva tiang ram hmuahhmuah a lak ruangah Izip siangpahrang cu a ram ihsin a suakvak nawn lo.

Judah Siangpahrang Jehoiakin

8 Jehoiakin cu siangpahrang a hung si tikah kum 18 mi a si ih, Jerusalem ah thla thum sung a lal. A nuih hmin cu Nehushta, Jerusalem-mi Elnathan fanu a si. 9 Cule anih cu a pa ih rak tuah mi hmuahhmuah vekin, Jehovah mithmuhah thil ṭhalo a tuah.

10 Cuih cān ah Babilon siangpahrang Nebukhadnezzar-ih siahhlawhpawl cu Jerusalem dokalhin an hung so ih, khawpi cu an kulh. 11 Cule Babilon siangpahrang Nebukhadnezzar cu a siahhlawhpawl in cumi cu an kulh laiah, khawpi ah a ra thleng. 12 Cun Judah siangpahrang Jehoiakin cu a nu, a siahhlawhpawl, a ralbawipawl le a bawipawl thawn Babilon siangpahrang hnenah an fehsuak, cule Babilon siangpahrang a lal a kum riatnak ah amah cu a hruaihlo.

Jerusalem Sáltannak

13 Cule anih in Jehovah inn ih hlawnthil hmuahhmuah le siangpahrang inn ih hlawnthil a phursuak ih, Israel siangpahrang Solomon in Jehovah ih sim vekin, Jehovah temple sungih a rak tuah mi sui bungrua hmuahhmuah cu a satdarh thluh. 14 Cuihtlunah Jerusalem ih mi hmuahhmuah: ralbawi hmuahhmuah le micak ralṭha hmuahhmuah, dawisuah mi 10000 le zungthiam hmuahhmuah le thirserthiampawl cu a hruaihlo thluh, cuih ram ih mifarahbikpawl ti lo cu zohman an tâng lo. 15 Cule Jehoiakin khal Babilon ah a hruai. Siangpahrang-ih nu, siangpahrang-ih nupipawl, a bawipawl le ram micakpawl cu Jerusalem ihsin Babilon ah a hruaihlo hai. 16 Micak hmuahhmuah mi 7000 le zungthiam le thirserthiam mi 1000, raldonak hrangih cak le tling hmuahhmuah cu Babilon siangpahrang in Babilon ah ralkaih ah a hruai thluh.

Judah Siangpahrang Zedekiah

17 Babilon siangpahrang in Jehoiakin-ih paseu Mattaniah cu a aiawhin siangpahrang ah a tuah ih, Zedekiah tiin a hmin a thlengsak.

18 Zedekiah cu siangpahrang a si tikah kum 21 mi a si ih, Jerusalem ah kum hleikhat sung a lal. A nuih hmin cu Hamutal a si ih, Libnah khawmi Jeremiah fanu a si. 19 Anih khal Jehoiakim ih rak tuah mi hmuahhmuah vekin Jehovah mithmuhah thil ṭhalo a tuah. 20 Jehovah thinhengnak ruangah Jerusalem le Judah ah hitin a si ih, a hmaika ihsin anmah cu a khaksuah tiangin Zedekiah cu Babilon siangpahrang dokalhin a hél.

25

Judah Tlûknak le Sáltannak

1 Cun hitn a si, a lal a kum kuatnak, a thla hratnak, a ni hratnak ah Babilon siangpahrang Nebukhadnezzar le a ralkap rual zaten Jerusalem an do ih, ṭanhmun an khuar. Cule cumi kimvel hmuahhmuah ah kulhkhŭmnak sunpâwng an tuah. 2 Cun Siangpahrang Zedekiah a lal a kum hleikhatnak tiang khawpi cu kulh a si. 3 A thla litnak, a ni kuatnak ah khawpi sungah mangṭam a nasatuk ih rammipawl hrangah rawl a um nawn lo.

4 Cun khawpikulh cu siatbăl a si ih, Kaldia-mipawl in khawpi kimvel hmuahhmuah ah ṭanhmun an khuar na cingin, ral do mipa hmuahhmuah cu zan ah siangpahrang hmuan kiang, phăr pahnih karlak kăwtka zin ihsin an tlânsuak thluh. Cule siangpahrang cu Arabah lam panin a feh. 5 Asinan Kaldia ralkappawl in siangpahrang cu an dawi ih Jeriko phairawn ah an man. A ralkappawl hmuahhmuah cu amai hnen ihsin an ṭekdarh ṭheh. 6 Siangpahrang cu an kai ih, Riblah khua ih Babilon siangpahrang hnenah an hruai, cule a parah thuṭhennak an tuah. 7 Cun Zedekiah fapapawl cu a mithmuhah an that ih, Zedekiah-ih mit cu an phawrhsuak ih, dar kol an bun, cule Babilon ah an hruai.

8 Babilon siangpahrang, siangpahrang Nebukhadnezzar a lal a kum hleikuatnak, thla ngatnak, a ni sarihnak ah, kiltupawl hotu Nebuzaradan, Babilon siangpahrang-ih siahhlawh cu Jerusalem ah a ra. 9 Anih cun Jehovah inn le siangpahrang inn a ur; Jerusalem inn hmuahhmuah, miropi inn hmuahhmuah cu meisa in a ur. 10 Cule kiltupawl hotu hnenih a um mi Kaldia ralkap hmuahhmuah in Jerusalem kulh cu a kil kip in an bălthla.

11 Cun kiltupawl hotu Nebuzaradan in khawpi sungih um a tāng lai mipawl le Babilon siangpahrang hnenah apaw ih rak peawtupawl cu a tāng lai mi mipi thawn a hruaihlo hai. 12 Asinan kiltupawl hotu in cuih ram ih mifarah hrekkhat cu sabit hri kilkhawitu dingah le ló thlotu dingah a tân.

13 Jehovah inn ih dar ṭhuampawl le tohkālpawl le Jehovah inn sungih dar Tikuangpi cu Kaldia-mipawl in ṭekdarh ko an siatbăl ih, dar cu Babilon ah an phur. 14 Belpawl, suahdurpawl, caicehpawl, haidaupawl le rawngbawlnak ih hman mi dar bungbel hmuahhmuah khal an la thluh. 15 Meiling suahdurpawl le cawhtawlhpawl, sui hlirhlăng le ngun hlirhlăng thilpawl cu kiltupawl hotu in a lahlo. 16 Solomon in Jehovah inn hrangih a tuah mi ṭhuam pahnih le Tikuangpi pakhat le a tohkālpawl, himi dar bungruapawl hmuahhmuah cu tah cawk a si lo. 17 Ṭhuam pakhat ih san lam cu dawng 18 a si ih, a zimah dar lubol a um. Cumi dar lubol san lam cu dawng thum a si ih, dar lubol kimvelih ṭelh mi le talê rahpawl cu dar hlir an si. Ṭhuam pahnihnak khal ṭelh mi thawn an bangaw.

18 Cule kiltupawl hotu in puithiam lubik Seraiah, puithiam pahnihnak Zefaniah le sângka kiltu pathum cu a hruai hai. 19 Ral do mipapawl parih ṭuanvo neitu bawi pakhat, siangpahrangih hawipi khawpi sungih pacang panga, ram mipi khawmtu a si mi ralkap sungṭuan lubik, khawpi sungih tawn mi ram mipipawlih pacang 60 pawl khal khawpi sung ihsin a hruai hai. 20 Kiltupawl hotu Nebuzaradan in hipawl cu a hruai hai ih, Riblah ah, Babilon siangpahrang hnenah a thlenpi hai. 21 Cun Babilon siangpahrang in cupawl cu Hamath ram Riblah ah a sat hai ih, a that hai. Cuticun Judah cu amai ram ihsin ralkaih ih hruaihlo a si.

Judah Ram Uktu Gedaliah

22 Cun Shafan-ih fa, Ahikam fapa Gedaliah cu Judah ram ah Babilon siangpahrang Nebukhadnezzar ih tān mi, a tāng mipawl uktu ah a tuah. 23 Cule ralkappawlih bawipawl hmuahhmuah, anmah le an mipapawl in Babilon siangpahrang in ram uktu ah Gedaliah a tuah ti an theih tikah, Mizpah khua ah Gedaliah hnenah an feh, cupawl cu: Nethaniah fapa Ishmael, Kareah fapa Johanan, Netofah-mi Tanhumeth fapa Seraiah le Maakath-mi paih fapa Jaazaniah, anmah le an hopawl thawn an si. 24 Cule Gedaliah in annih-ih hmaika le an mipapawl hmaika-ah sia a săm ih an hnenah, «Kaldia-mipawlih siahhlawhpawl cu ṭih hlah uh. Ram sungah cêng uhla, Babilon siangpahrang cu rian uh, cule cumi cu nan hrangah a ṭha ding,» tiah a ti.

25 Asinan a thla sarihnak ah hitin a si, siangpahrang cikuang ihta Elishama fa Nethaniah-ih fapa Ishmael cu mipa pahra thawn a feh ih Gedaliah, Judah-pawl le Mizpah khua ih a hnenih um Kaldia-mipawl thawn an bei ih an that. 26 Cule mi hmuahhmuah, a tûm a te in, ralkap hotupawl thawn Kaldia-mipawl cu an ṭih ruangah an tho ih Izip ram ah an feh.

Thawng ihsin Jehoiakin Suah a Si

27 Judah siangpahrang Jehoiakin sál ih hruai a si kum 37-nak ah hitin a si, a thla hleihnihnak, cuih thla ni 27 ah, Babilon siangpahrang Evil-Merodak a lal thăwk kum ah Judah siangpahrang Jehoiakin cu thawng ihsin a suah. 28 Amah cu ngil nei zetin a bia ih, Babilon ih a hnenih um siangpahrangpawl hnakih tokham cungnungsawn a pe. 29 Cule Jehoiakin cun a thawngtla sinfen cu a thleng ih, a damsung hmuahhmuah siangpahrang hmaika-ah rawl a ei ringring. 30 Cule amah cawmnak ah, siangpahrang in tlaitluanin a covo, a damsung hmuahhmuah, a ni tin covo cu amah a pe.