About Bible Thianghlim | ©

BibleThianghlim – 2 TIMOTHY

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

2 TIMOTHY

  • A ngantu: Paul
  • A siartu: Timothy
  • Ngan kum: A.D. 67-68

Paul in Timothy cakuat pakhat a ngannak hi kum 3 kum 4 hrawng a rei thlang ih, himi cān sungah Paul in hna tam zet a ṭuan. Timothy kha Efesa kawhhran kilkhawi dingih a tān ta hnuah (1 Timothy Thuhmaihruai siar aw) Masidonia (1Tim 1:3), Korinth (2Tim 4:20), Khirit (Tit 1:5) le Mileṭas (2Tim 4:20) lamah a tlawng vivo. Cuihsin Efesa ah a kirsal (2Tim 1:18) ih, sak lamih a um mi Troas lamah a feh (2Tim 4:13). Cumi tikcu ah Paul cu a thawngtlaknak netnak a tuar. Cumi tikcu hrawngah, Neru in Khristianpawl cu Rom khawpi urkāngtu ah a puh. Himi ihsin Khristianpawl parah a nasazet mi tiduhdahnak a thăwk. Cutin Rom uknak hmuahhmuah ah a darh.

Himi hi Rom ah Paul a vei hnihnak thawng a tlaknak a si. A vei hnihnak hi a vei khatnak hnakin dinhmun a siasawn (Efesa cakuat Thuhmaihruai siar aw). A vei hnihnak ah cun Paul cu misual vekih dāntatnak a tuar (1:8; 2:9). A thim zet mi thawnginn sungah amah cu an ret. Amah ra vehtu an um phah nân (1:16), a rualpi tamsawn in amah an tlansan (4:10-12). Hitivek tuarnak lakah Paul cun Bawipaih umpinak thawngin (1:12; 4:17-18) le Pathian thu ih huham thawn (2:9-10) thazang nasazet a la. A rawngbawlnak cu ṭha zetin a ṭhehsuak. Curuangah Bawipa hnenih um ding a tiar a si (4:6-8).

Paul in a thih hlanah Timothy hnenah ca vei khat kuatsal a duh. Curuangah Timothy cakuat pahnihnak cu A.D. 67-68 hrawngah a ngan. Cuih cān ah Timothy cu Efesa kawhhran kilkhawiin a rak um rero a si men thei. Timothy cun phurrit a phur rero, curuangah Paul in amah tha a pek a ṭul. A cabu sungah phurrit thlentu phun thum in a lang. Cupawl tla cu: thuthangṭha hrangah tiduhdah tuar ruangih ningzahnak (1:3-2:13), a ṭuanvopawl ihsin rawngbawltu dirhlo theitu a ṭha lo mi câkhiarnakpawl (2:14-26) le zumtu in thuthangṭha humhim a ṭulnak pawl tla an si (3:1-4:8).

Hivek phurrit hi zumtu dangpawl hnakin rawngbawltupawl in an tuar hleice ṭheu. Asinan cumi cu zumtu hmuahhmuah in an do a ṭul ve. Timothy hrangih Paul ih thucah cu zumtu hmuahhmuah hnenih thucah tluk a si. Cumi cu thutak ah umpeh vivo uh ti mi a si (3:14).

Thuhlawm Ṭhen

  • I. Thuhmaihruai (1:1-2)
  • II. Timothy cu Bawipa ih a rinum vekin, ningzahmualphonak cu a neh ding a si (1:3-2:13)
  • III. Timothy cun rawngbawltu a ṭuanvo ihsi dirthlatu câkhiarnak ṭha lo cu a do ding a si (2:14-26)
  • IV. Timothy cu thuthangṭha hum dingin a rinum ding a si (3:1-4:8)
  • V. Thukharnak (4:9-22)

1

Cibaibûknak

1 Khrih Jesu ih um mi nunnak thutiam bangtukin, Pathian duhzawngih Jesu Khrih-ih apostol, Paul in,

2 Ka duhdawt zet mi ka fapa, Timothy hnenah:

Pa Pathian le kan Bawipa Khrih Jesu hnen ihsin zangfahnak, zahngainak le hnangamdaihnak um hram seh.

Lungawi Thu Simnak le Thapeknak

3 Pupápawl in an rak rĕn bangin sia le ṭha theihnak thiang thawi ka rĕn mi, Pathian hnenah ka lung a awi, cuticun bâng loin sun le zan ka thlacamnak ah ka lo máng ringring. 4 Aipuannak thawi ka khah theinak dingah, nangmah lo hmuh ka hiar zet, na mitthlipawl ka ngaihsak ringring. 5 Zumnak diktak nangmah ih um mi cu ka cîng ringring ih, cuih zumnak cu a tirin na pi Lois hnenah le na nu Zunis hnenah a um. Cucu nangmah khalah a um ti ka theifiang. 6 Curuangah na parih ka kut ka suannak ihsin nangmah ih um mi Pathian thilpek cu sēmalh tharsal dingin ka lo theihtersal a si. 7 Ziangahtile Pathian in ṭihnak thlarau in pe lo ih, thiltitheinak thlarau, duhdawtnak thlarau le thununawk theinak thlarau in pe sawn a si.

8 Curuangah kan Bawipaih thuhla theihter cu zahpi hlah awla, amai thawngtla kei khal hi i zahpi hlah. Thuthangṭha ruangih harsat tuarnak Pathian huham vekin i tuarpi sawn aw. 9 Anih cun kan hnaṭuan vek si loin, amai tumdān le zangfahnak vek sawnin in rundam ih, kawhnak thianghlim in in ko a si. Cuih zangfahnak cu leilung sēm hlanin Khrih Jesu ah pek zo kan si. 10 Asinan in Rundamtu Jesu Khrih lăngnak zarah, cuih zangfahnak cu atu ah lăngter a si zo. Anih cun thihnak cu a ṭhiathlo ih, nunnak le thih theilonak cu thuthangṭha hmangin a langter zo. 11 Cuih thuthangṭha simtu ah, apostol ah le Zentelpawl zirhtu ah ruat ka si. 12 Cumi ruangah hih thilpawl hi ka tuar a si, sihmansehla ka ning a zak lo, ziangahtile ka zum mi cu zo a si ti ka thei ih, cuih Ni hrangih a hnenih ka ap mi cu a kilhim thei ti ka theifiang.

13 Khrih Jesu ih um zumnak le duhdawtnak in a ziktluak mi ṭawngkampawl zohṭhim ding mi ka hnen ihsi na theih mi kha kaihnget aw. 14 Cuih thil ṭha na hnenih ap mi cu kan sungih cêng Thlarau Thianghlim hmangin kilhim aw.

15 Asia peng ih umpawl hmuahhmuah in in tlansan ti kha na thei, cupawl lakah Fikel le Harmokens an tel.

16 Onisiforas cun i harhtharter ṭheu. Ka cikcin khal in zahpi lo ruangah, Bawipa cun a sungkuapawl hnenah zahngainak pe hram seh. 17 Rom ih a um laiah, anih cun ngunngaih zetin in hawl ih, in hmu. 18 Cuih Ni ah Bawipa hnen ihsin zahngainak a hmuh theinak dingah, Bawipa in a hnenah pe hram seh. Cule Efesa khua ah anih in ziangtluk nasain i rian ti kha na theifiang a si.

2

Khrih Ralkap Ṭha

1 Curuangah nang, ka fapa, Khrih Jesu ih um zangfahnak ah cak zetin um aw. 2 Cule theihpitu tampi lakah ka hnen ihsin na theih mi thupawl kha mirinum, mi dang va zirhsâwngsin theitu dingpawl hnenah ap aw. 3 Curuangah nang cu Jesu Khrih ralkap ṭha vekin retheihzăwnzaihnak tuar aw. 4 Ralkap si dingih amah a hriltu a lunghmuiter theinak dingah raldo laiah hi damsung khawsaknak thupawl thawn zohman an hnawihnihaw lo. 5 Cule mi pakhat in zuamawknak ah zuam vein, dān vekih a zuam lo asile, nehnak lukhum pek a si lo. 6 Lo ṭuantu bāng zetih a ṭuantu cu a rah sĕng hmaisabiktu a si ding a si. 7 Ka sim mi hi ruat aw, Bawipa in thil ziangkim ah theihthiamnak lo pe hram seh.

8 Ka thuthangṭha bangtukih mithi lak ihsi kaihthawh mi, David cithlah Jesu Khrih kha cîng ringring aw. 9 Cuih thuthangṭha ruangah thil ṭhalo tuahtu bangin, cikcin ih ṭemṭawnnak tiang harsatnak ka tuar; asinan Pathian kamsuakthu cu ṭemṭawn a si lo. 10 Curuangah Khrih Jesu ih a um mi rundamnak cu sankhuk ropitnak thawn annih khal in an co ve theinak dingah, hril mipawl hrangah thil ziangkim hi ka tuar a si.

11 «Ziangahtile amai zawngih kan thih asile,
Amai zawngah kan nung ding.
12 Kan tuar asile,
Amai zawngah kan uk ve ding.
Amah kan phatsan asile,
Anih khal in in phatsan ve ding.
13 Kan zum lo a si khalle,
Anih cu a rinum ringring,
Amah le amah a phatsanaw thei lo,»

ti ṭawngkam hi rinsantlak a si.

Pathian Pawm Mi Hnaṭuantu

14 Hi thilpawl hi zumtupawl cingkengter ringring hai aw, hlawknak si lo, a ngaithlatupawl siatnak sawn a si mi ṭawngkam menmenih an elawklonak dingah, Bawipa hmaika-ah nā zetin thu pe hai aw. 15 Pathian pawm mi vekin nangmah le nangmah Pathian hnenih peaw dingin nasazetin taima aw. Hnaṭuantu ningzak lo, thutak kamsuakthu dik zetih ṭhenfeltu si aw. 16 Asinan Pathian zahlonak le sullam nei lo phunnawinakpawl cu hrial aw, ziangahtile cupawl cun Pathian ngaihsak lo sinsinnak lamah an lo hruai ding. 17 Cule an thusim mi cun akhensa mi ei vekin mi a ei ding. Cupawl lakah Haimenias le Fileṭas an tel. 18 Annih cun, «Thawhsalnak cu a thleng zo,» tiin thutak an ṭhelh. Cule mi hrekkhat ih zumnak an hlorálter. 19 Sihmansehla Pathian-ih ṭohram hnget cu a dîng ringring ih, hi hminsinnak hi a nei:

2:17a khensa: Nathri phun khat nā zet a si ih, taksa vun nemnak eisiattu hmasia, thihnak tiang thlen thei a si.

«Bawipa in amai tapawl cu a thei,»

ti le, «Khrih hmin saltu pauhpauh cun dingfellonak tlansan seh,» ti hi.

20 Asinan inn ropi sungah sui le ngun bungbelpawl lawng si loin, thing le lei bungbelpawl khal an um. A hrekkhat cu sunlawih ding mi an si ih, a hrekkhat cu sunlawih lo ding mi an si. 21 Curuangah hipawl ihsin mi a thianfaiawk asile, anih cu sunlawihtlak bungbel, tithianhlim le Bawipa hrangih hmantlak le hnaṭuan ṭha tinkim hrangih timlam mi bungbel a si ding.

22 No lai câkhiarnakpawl khal tlansan aw, thinlung thiang ih Bawipa a kotupawl thawn dingfelnak, zumnak, duhdawtnak, hnangamdaihnak pawl cu dawi sawn aw. 23 Sikhalsehla atthlak le sullam nei lo thusuhnakpawl cun buainak a suakter ti na theih ruangah cupawl cu hrial aw. 24 Cule Bawipaih siahhlawh cun mi a elbuai ding a si lo, mi hmuahhmuah hnenah a zaidam ding, mi a zirh thei ding ih, thinsaunak a nei sawn ding a si. 25 Dokalhtupawl cu nunnem zetin nunsim hai aw. Cuticun Pathian in anmah cu thutak theihnak lamah lungthlengnak a pe hai mahna. 26 Cule ṭhangharhsalin amai duh zawng ti dingih ralkaih ih rak kaitu Diabol-ih tháng sung ihsin an tlânsuak thei ding.

3

Ni neta ah Pathian Ngaihsaknak a Kiam Ding

1 Cule hihi thei aw, ni neta ah cun cān ṭihnungza a ra thleng ding. 2 Ziangahtile minungpawl cu mah le mah ngainaawtu, paisa ngainatu, mitluangkhâwng, mipuarthau, mithangsiathmang, nu le paih thulung lo, lungawihna thiam lo, thianghlim lo, 3 suahpi duhdawtnak nei lo, remnak siatsuahtu, mi relsiathmang, sūpaw thei lo, minunrâwng, thil ṭha duh lo tu, 4 miphatsanhmang, pawisak nei lo, miduhaw, Pathian duhdawt hnakih năwmcen ngaina sawntu an si ding. 5 Pathian ngaihsak hmel an pu nân, a huham cu an êl. Cuvek mipawl cu va tlansan aw.

6 Ziangahtile cupawl cu innpawl ah lutthupin, nunau â-pawl cu sál ah an kai ih, cuvek nunaupawl cu sualpawl ih nĕn mi le câkhiarnak phun zakip ih hruai rero mi an si. 7 Cupawl cu zir rero na cingih thutak theihnak ih thleng bān thei lo pawl an si. 8 Cun Jannes le Jambres in Mosi an dokalh vek khan, hipawl khal in thutak an dokalh. Lungthin se thluh zo mi, zumnak thu ih tling lo mi an si. 9 Asinan Jannes le Jambres atzia a lăng vek khan an atzia cu mi hmuahhmuah hmaika-ah phuansuah a si ding ruangah, hlapi cu an feh thei lo ding.

Paul in Timothy Thu a Pe

10 Asinan nang cun ka zirh mi thu, ka umtudān, ka tumtah mi, ka zumnak, ka thinsaunak, ka duhdawtnak, ka tuarfainak, 11 tiduhdahnak ka tuar mipawl le ka zăwnzaihnakpawl Anṭiok, Ikoniam le Listra khuapawl ah ka parih a thleng mi, ziang tiduhdahnakpawl ka tuar ti khal na thei thluh zo. Asinan cupawl hmuahhmuah sung ihsin Bawipa in i runsuak a si. 12 A si, Khrih Jesu ah Pathian ngaihsak ih nun a duhtu hmuahhmuah cun tiduhdahnak an tuar ding. 13 Asinan miṭha lopawl le mi bumhmangpawl cu mi bumin le bumih umin an sual sinsin ding. 14 Sikhalsehla nang cu na zir zo mi le a dik a si tiih na theih mi thilpawl kha zo hnen ihsin ka zir ti theiin, cumipawl ah umlan vivo aw. 15 Cule nauhakte na si lai ihsin Cathianghlim cu na rak thei zo, cumi cun Khrih Jesu zumnak ruangih rundamnak ngah ding tiangin a lo fimter thei a si.

16 Cathianghlim hmuahhmuah hi Pathian thawtkhumnak in pek a si ih, zirhawknak hrang, kawkawknak hrang, nunrĕmawknak hrang, dingfelnak zirhawknak hrangah hlawknak a si. 17 Cuticun Pathian mi cu a tling mi le hnaṭuan ṭha hmuahhmuah tuah dingah thăwm famkim a si thei ding.

4

Pathian Kamsuakthu Phuang Aw

1 Curuangah a rung lăngnak le a uknak ih mithipawl le minungpawl thuṭhentu ding Bawi Jesu Khrih le Pathian hmaika-ah thu ka lo cah a si. 2 Kamsuakthu cu phuang aw! A tikcu ah siseh, a tikcu lo khalah siseh tiar ringring aw. Thinsaunak hmuahhmuah le zirhnak hmuahhmuah thawn an mawhzia theihter aw, kawk awla, thape aw. 3 Ziangahtile minungpawl in zirhnak ziktluak an pawm thei lo cān a ra thleng ding ruangah an hnaza dirĕmternak ah anmai câkhiarnak zulhin, zirhtupawl anmai hnenah an khawm sawn ding. 4 Cule thutak ihsin an hna cu an her ding ih, phuahcawp thuanthu lamah an pial ding. 5 Asinan nang cu thil ziangkim ah ralring aw, zăwnzaihnakpawl cu tuar ṭenṭo aw, evangelist hna cu ṭuan aw, na rawngbawlnak zaten hlĕnsuak aw.

6 Ziangahtile kei cu Inding Thilhlăn vekin, thletbung ka si rero zo ih, ka fehsuak cān a nâi thlang. 7 Doawknak ṭha cu ka do zo, ka hna ka ṭheh zo ih, zumnak cu ka kilhim zo. 8 Ka hrangah dingfelnak lallukhum cu lehhnu hrangah ret a si zo, cumi cu Bawipa, Thuṭhentu dingfel cun cuih Ni ah i pe ding. Ka hnen lawngah si loin a lăngnak hngakhlaptupawl hmuahhmuah hnen khalah a pe ding.

Pumpak Thuhlapawl

9 Ka hnenih rat zâng zuam aw. 10 Ziangahtile Demas cun tulai khawvel a ngainat ruangah i tlansan ih, Thessalonika khua ah a feh. Kresen cu Galatia peng ah a feh ih, Tita khal Dalmaṭia peng ah a feh. 11 Luke lawng ka hnenah a um. Mark kha sawm awla, na zawngah rak hruai ve aw. Ziangahtile anih cu rawngbawlnak ah miṭhahnem a si. 12 Cule Ṭaikikas cu Efesa khua ah ka rak thlah zo. 13 Troas khua, Karpas hnenih ka kâwrfual ka tān mi kha, na rat tikah cazualpawl thawn rak keng aw, a hleicein savun cazualpawl kha.

14 Dar serthiam, Alexander in ka parah thil ṭhalo tampi a tuah. Bawipa in a hnaṭuan mipawl vekin lehrūl seh. 15 Kan ṭawngkampawl a dokalh nasat ruangah, nang khal a lakah ralring aw.

16 Humawknak thu ka rel hmaisak ṭum ah zohman in in dinpi lo, an zaten in tlansan thluh sawn. An parah mawh thleng lo dingin Pathian hnenah thla ka cam. 17 Cuti va si hman sehla, thuthangṭha cu keimah hmangin phuankim a si theinak dingah le Zentelpawl hmuahhmuah in an ngaingah theinak dingah Bawipa cun i dinpi ih, cahnak i pe. Kiosa kâ sung ihsin i runsuak. 18 Cule Bawipa cun hnaṭuan ṭhalo tinkim ihsin i runsuak ding ih, a vancung uknak sung tiang i kilhim ding. A hnenah ropitnak cu kumkhuain kumkhua tiang um seh. Amen.

Cibaibûknak Netabik

19 Prisilla le Akuila le Onisiforas teih sungkua kha cibai i bûksak aw. 20 Erasṭas cu Korinth khua ah a cām ih, Trofimas cu Mileṭas ah dam loin ka tān ta. 21 Thlatang hlanah ra tlawn thei tum hramhram aw. Zubulas, Pudens, Linas, Klaudia le unaupawl hmuahhmuah in cibai an lo bûk.

22 Bawi Jesu Khrih cu na thlarau ah um seh. Zangfahnak na hnenah um hram seh. Amen.