About Bible Thianghlim | ©

BibleThianghlim – SOLOMON HLA

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

SOLOMON HLA

  • A ngantu: Solomon
  • Ngan tikcucān: B.C. 971-941

Hebru ṭawng in hi cabu hminih sullam cu Hlapawlih Hla (Hlapawl lakih ṭhabik) tinak a si. Hih cabu hin neihawknak cu mipa pakhat le nunau pakhat hrang lawngih pehzăwmawknak vekin a rel. Hih hla ah hin miphun dangdang an tel: Shulam-mi mo (6:13), tuukhāltupawl (1:8), Jerusalem fanupawl (1:4, 11; 5:9; 6:1); Shulam-miih ṭapapawl (8:8-9) le Solomon (1:1; 3:7, 9, 11, 8:11-12). Shulam-mi cu hi cabu-ih ṭawng hmaisabiktu (1:2) le ṭawng netabiktu a si ih (8:13), hi cabu sungah mi dang hmuahhmuah hnakin anih cu a ṭawng tambik.

Hih hla hin ralṭha zetih a rel mi cu neihawk hnuih mipa le nunau hrangih Pathian ih a pek mi duhdawtnak thianghlim a si. Neihawknak ruangih rung um pehtlaihawknak cu milai hrangih Pathian tuah mi pehtlaihawknak hmaisabik a si. Hih cabu in nunau le mipa sinak ih pawlawknak thuhla ih ruahdān dik in tuahsak. Mipa le nunau sinak hmannak cu nupa hrang lawngih tuah a si thu le nupa duhdawtawkdān ding a reluar.

Thuhlawm Ṭhen

  • I. Duatawktăwn (1:1-2:7)
  • II. Ngai duahdoawktăwn (2:8-3:5)
  • III. Pakhat le pakhat parih năwmawktăwn (3:6-5:1)
  • IV. Lăwmawktăwn le upatawktăwn (5:2-8:4)
  • V. Duhdawtnak pitling langterawktăwn (8:5-14)

1

1 Hlapawlih hla a si mi, Solomon hla.

Shulam Fala

2 Anih cun a mi hnămnak kâ in i hnam seh,
Ziangahtile na duhdawtnak cu sabitzu hnakin a ṭhasawn.
3 Na hriak ṭha cu a rim a thaw,
Na hmin cu thletbŭng mi hriak vek a si;
Curuangah fala himpawl in an lo duhdawt.

Jerusalem Fanupawl

4 I hruai law, tlantlang nung.
Siangpahrang in a pindanpawl sungah i hruailut e.
Nangmah ah kan lungawi ding ih, kan ai a puang ding.
Sabitzu hnakin na duhdawtnak kan lāwm sawn ding.
Annih in an lo duhdawt ngaingai.

Shulam Fala

5 Ka dum nân, iang ka nei,
Maw Jerusalem fanupawl,
Kedar puanthlampawl len,
Solomon puanzarpawl len.
6 I zoh hlah uh, ziangruangahtile kei cu ka dum aw,
Ziangruangahtile ni in i rak em.
Ka nuih fapapawl ka parah an thin a heng;
Annih in sabit hmuanpawl kiltu ah in tuah,
Keimai sabit hmuan hman rak kil loin.
7 I sim hnik law, nang ka nunnak ih a duhdawt mi,
Khuiah si maw na rante rual na thlah,
Sun ah khuiah na cawlhahdamter?
Rante rual kiangih um na hawipipawl lakah nu pakhat hmai tuamaw bangin ziangah ka um ding?

Jerusalem Fanupawl

8 Na theih lo asile, Maw nunaupawl lakih mawi hlei,
Rante rual nehpawl zâwt awla,
Rankhāltupawlih cēnnakpawl kiangah na me fāte tepawl tlangter hai aw.

Solomon in Shulam Fala Kiangah

9 Ka duhdawt mi,
Faro lêng dirtu arángpapawl lakih ráng nu vek na si.
10 Na biangpawl cu ceiawknakpawl thawn duhnungza si na khaw,
Na hngawng khal sui ṭhifáng rualpawl thawn.

1:9a rángpapawl: Ráng nu le ráng tilper hmang loin, Faro cun tilper lo kherkher a hmang ṭheu.

Jerusalem Fanupawl

11 Sui ceiawknakpawl kan lo tuahsak ding,
Ngun ṭhifáng rualpawl thawn.

Shulam Fala

12 Siangpahrang a cabuai ih a to laiah,
Ka aspaiknard zihmui in a rimhmui te a thlahsuak.
13 Ka lungduh cu kei hrangah cun,
Ka siangṭâng ih zankhua zau mura têl a si.
14 Ka lungduh cu kei hrangah En Gedi sabit hmuanpawl sungih
Hena par mûm bawrte a iang.

1:12a spaiknard: Nard kung ihsi an tuah mi hriak rimhmui.

Tlangval

15 Ngai hman, ka duhdawt mi, mawi ciaici ci!
Ngai hman, mawi ciaici ci e!
Na mit thuro mit iangin.

Shulam Fala

16 Zoh hman, ka lungduh aw, na mawi hleice!
Si rori e, duhnungza!
Kan zalnakte khal mawi diaidi e.
17 Kan rūninn kānpawl sidar si hai khawh,
Kan innbopawl cu far thing si e.

2

1 Kei cu Saron rose par le,
Phaikuam lily par si ing e.

Tlangval

2 Hlingrûl lakih lily par bang,
Ka duhdawt mi cu falapawl lakah.

Shulam Fala

3 Tupi thingpawl lakih epal kung báng,
Ka lungduh cu tlangvalpawl lakah.
Nuam zetin a phēnthlam ah ka to,
Cule a rah thlumte ka tep.
4 Anih cun puai tuahnak arūninn ah i hruai,
Cule ka parih a zārpuan cu duhdawtnak si ai e.
5 Sabit rah car thawn i cakter aw,
Epal rah thawn i hlipárter aw,
Ziangahtile zūn tuarin ka nâ.
6 A keh lam zaṭial kut cu ka lu thuaiah,
Cule a vawrh lam zaṭial kut in i rak pawm.

2:4a puai tuahnak rūninn: A ṭawng hrampi ah, «sabtizu inn,» ti a si.

Tlangval

7 Maw Jerusalem fanule tla,
Ramlak sakhipawl hmin sâlin asilole sakhinu hmin sâlin, thu ka lo cah:
A lunghmui hlanlo căwkphur hlah uhla,
Duhdawtnak ṭhangharh fawn hlah uh.

Shulam Fala

8 Ka lungduh aw cu!
Ngai hman, anih cu tlang ah khirin le mualpâwng lanin a ra.
9 Ka lungduh cu sakhi le zuknêng tûai a iang.
Zoh law, kan phăr dungah a ding;
Tukvirh ihsin khua a cuan,
Tukvirh kalhpaṭheng ăwng ihsin a bih.
10 Ka lungduh in ankâ i hlan, kei hnenah ṭawng e:
«Ka duhdawt mi, mawi hlei ka ta, tho thlang awla,
Ra hnik law.
11 Cuan law, thlatâng a liam,
Ruahti a hān ih a káng.
12 Lei parah pangpar ṭo hai e;
aHlasak cān thlengta khawh,
Kan lungrāwn khua ah thuro aiawn theih si e.
13 Theikung in a rah hring suah khaw,
Sabit hri in a par in rimthaw a suah.
Ka duhdawt mi, ka hrang bihzun, tho awla,
Ra thlang aw!

2:12a Hlasak cān: Sabit hmuan ih hna an ṭuan cān ah hla an sa ṭheu.

Tlangval

14 «Maw ka thurote, lungpi karlakpawl ah,
Lungkhām hmun thup sungah,
Na hmelte lo hmu ning,
Na awte rak thei ning;
Na aw a thlum ih,
Na hmel a duhnung si.

Thunawn

15 Sihálpawl in kaihsak uh,
Sabit hmuan siatsuahtu sihal fanote tepawl,
Ziangahtile kan sabit hri in rah note te a nei,» tiin.

Shulam Fala

16 Ka lungduh cu ka ta a si ih, kei khal a ta ka si.
Anih cun lily par lakah a rante rual a khāl.
17 Khua a van hlan le
Thlahlim an kian hlanah,
Ra kir aw, ka lungduh,
Bether tlang parih sakhi le zuknêng tûai bang len.

3

1 Zan ah ka tlingkhāndâng parah ka duhdawt mi cu ka hawl;
Amah ka hawl, hmanseh ka táwng lo.
2 Atu thoin khaw sungah ka feh ding,
Cule kăwtthler ah le lamṭêkpawl ah ka nunnak ih a duhdawt mi cu hawl ning.
Amah ka hawl, hmanseh amah cu ka táwng cuang lo.
3 Khawpi hrawhih vâk zān hngaktu in i táwng e;
«Ka lung duh cu nan hmu maw?» tiah ka sut.
4 Cupawl málte ka lan hnuah,
Lungduh val cu ka táwng.
Ka kai ih, ka nuih rūninn le i paituih pindan sungih ka hruailuh hlanlo,
Amah cu ka fehter siang nawn lo.

Tlangval

5 Maw Jerusalem fanule tla,
Ramlak sakhipawl hmin sâlin asilole zuknêngnu hmin sâlin, thu ka lo cah hai:
A lunghmui hlanlo căwkphur hlah uhla,
Duhdawtnak ṭhangharh fawn hlah uh.

Mo Neitupa Ratnak

6 Zo si maw meikhu ṭhuam bang,
Thlaler ihsi ra suak hi,
Mura le frankinsence rimhmui nam vungvawn,
Sumdâwngpaih podar zate rimhmui thawi ra suak khi?
7 Hei cuan hnik hman, ihkhun nuam cu Solomon ta si e,
A velkimah miralṭha pacang 60,
Israel ralṭhapawl um hai.
8 Ralnâm an kai an zaten,
Ral do thiam si hai khawh.
Ralnâm thlaih hai an khēl ah pacang tin in,
Zan ih ṭihnungpawl kilveng dingah.
9 Amai hrangah Siangpahrang Solomon in zawn mi doṭhiang tuah e,
Lebanon thing in:
10 A ṭhuam a tuah ngun in,
A dotu cu sui,
A tonak cu puan sendup,
Jerusalem fanupawl in duhdawtnak in an cei a sung lam.
11 Suak thlang u law, Maw Zion fanupawl,
Cuan hman uh, lallukhum khum e
Siangpahrang Solomon in,
Sunghno a nuih khumter cu,
Khūndim ni ah si e,
A thinlung lungawi ni ah si e.

4

Tlangval

1 Ngai hman, ka duhdawt mi, mawi ciaici ci e!
Ngai hman, mawi ciaici ci!
Na hmaikhuh phenah na mit cu thuro mit iang in.
Na sám cu ame rual Gilead Tlang ihsi sukthla bang len!
2 bNa ha cu tuu hmul meh khawlhfai hung suak bang,
Faphir hring cio hai khawh,
Cing hlah hai e an lakah pakhat hman.
3 Pat senlar bang e na hmur,
Na hmurkâ duhnungza si e.
Talê rah phel hluan e na cbekpawl in, na hmaikhuh phenah.
4 dNa hngawng cu lung tianrem David dawlsâng iang e,
Ralphaw a thawngin thlaiaw e cuih parah,
Miralṭha ralphaw si e a zaten.
5 Na pawhte pahnih zuknêng fano pahnih iang e,
Lili par lakih,
Sakhi faphir pawh fawp hluanin.
6 Khawvan hlan le thlahlim an kian hlanah,
Mura tlang le frankinsense mualpâwng lamah feh ning naw.
7 Ṭhat fum ci e, ka duhdawt mi,
Sawi ding um lawn nangmah ah.
8 Ka thainu, Lebanon in ra law ka zawngah,
Lebanon in ka zawngah.
Cuan law Amana zimin,
Senir le Hermon zimin,
Kiosa pûkin,
Keiṭial tlangin.
9 Ka farnu, ka thainu, ka lungthin mawlh ci e;
Na mit sir melh khat le na awrh ṭhi rual khat menin ka lungthin mawlh ci e.
10 A mawi hluan e na dawtnak,
Ka farnu, ka thainu!
Sabitzu hnakin ṭhasawn e na dawtnak,
Rimhmui hmuahhmuah hnak khalin ṭhasawn e na hriak cu!
11 Maw ka thainu,
Na hmur in fawr e khuaithlar bang,
Na lei hnuaiah khuaitizu le hnawiti um e,
Na sinfen rimhmui Lebanon rimhmui iangin.
12 eKhar mi hmuan si ci e,
Ka farnu, ka thainu,
Hrĕn mi cirhti,
Phih mi tihna si ci e.
13 Na thlai kungpawl tla rah duhum zetzet nei talê hmuan,
Hena rimhmui le fspaiknard thawn,
14 Spaiknard le safaron,
Kane le thingthak,
Frankinsense kung hmuahhmuah thawn,
Mura le aloe,
Rimhmui cuanghlei hmuahhmuah tla si hai e.
15 Nang cu hmuan tihna,
Tinung tihna le,
Lebanon ihsi luangthla tivate vek si ci e.

4:1a me rual: Palisṭin ram ih me rual cu an dum, a năkin an năk, a umtuzia cu a duh mi nuih sám cu a dum ih, a liang tiang a uaithla.

4:2b Na ha cu tuu hmul meh khawlhfai: Hih Bible câng ih umtuzia cu nunau khan ha var zet a nei ih, pakhat hman kim lo a um lo tinak a si.

4:3c bekpawl: Himi hin a biang a huaptel a zumum; tale thawi tahṭhimnak hin a răwng lung mankhung sen vek le an pianhmang lam a uar.

4:4d Sol 4:4: Hih Bible câng hin nunau nuih hngawng sâng mawi zet ṭhi thawi ceimawi mi a fak a si men thei. Zoh aw Eze 27:11 ziangahtile ceimawinak ah khawpikulh parah phaw an bâng.

4:12e Sol 4:12: Hi Bible câng ih khaikhinnakpawl hin nunaunuih neihawknak hrangih a hlanawknak a sim duh.

4:13f spaiknard: Nard kung ihsi an tuah mi hriak rimhmui a si. Hih Bible câng le câng 14 ih rimhmui phunphun zate hi Palisṭin ram ih phurhluh mi an si, curuangah an man a khung zet. Khuahlan san laiah cuih rimhmuipawl cu duhdawtnak thawn a kawpaw ṭheu. Tlangval khan khaih rimhmui phunphun kha a mo ding a mawizia hlirnak ah a hmang.

Mo

16 Maw zo thli, ṭhang thlang law,
Maw sim thli, hung hrang law!
A rimhmui suah dingin ka hmuan sēm aw.
Ra seh law ka lungduh cu a hmuan ah,
Ei seh hmuan rah duhum zetzet tla.

5

Mo Neitu

1 Ka ra thleng e, ka farnu, ka thainu, ka hmuan ah;
Khawm ing e, ka mura cu ka rimhmui thawn;
Ka rak ei e, ka khuaithlar cu ka khuaiti thawn;
Ka rak in e, ka sabitzu cu ka hnawi thawn.
Ei u law, Maw ruallenuh!
In u law, Maw duhdawt mi tla,
Si ngai e, khawpten in uh!

Mo

2 Ka zau zawnah merem thiam lawn;
Cucu ka lungduh aw si ai!
Ka duhdawt mi cun,
«Ka farnu, ka lungduh te,
Ka thuro, ka mifamkim sângka i rak ăwn law;
Ziangahtile ka lu cu daifimtla in a tuam,
Ka samzaipawl tla zan daitla in a khuh,» tiin king ai.
3 Ka kâwrfual hlít zo ing e;
Ziangtin hruhsal thei lai ing?
Ka ke khawlh zo ing e;
Ziangtin bawrhbangter thei lai ing?
4 Ka lungduh cun sângka kalh ah a kut ret e,
Ka lungthin in amah ngai ruangmang e.
5 Ka lungduh ăwnsak dingin tho ing khaw,
Ka zaṭial kut ihsin mura fawr e,
Ka kutzungpawl ihsin mura ti,
Kalhnak thing kutkaih cungah.
6 Ka lungduh cu ăwnsak ing e,
Asinan ka lungduh cu kir na khaw fehhlo ai.
A ṭawng tikah ka thinlung a khîr.
Amah ka hawl, asinan ka hmu thei lo;
Amah ka ko, asinan anih in i sawn lo.
7 Khawpi hrawhih vâk zan hngaktupawl in in táwng.
Annih cun in vua, in hriam;
Kulh kiltupawl in ka hmaikhuh ka hnen ihsin an lahlo.
8 Maw Jerusalem fanupawl, thu ka lo cah,
Ka lungduh nan tawn le,
«Zūn tuarin a nâ e,» tiah sim uh!

Jerusalem Fanupawl

9 Maw nunau lakih mawi hlei,
Hiti rori ih thu in cah cu,
Ziang a si cuangce, na lungduh cu mi dang lungduh hnakin?
Na lungduh cu ziang a si cuangce mi dang lungduh hnakin?

Mo

10 Ka lungduh cu a ngo ih sen nawn te si e,
Mi 10000 lakah a lăwrbik ko.
11 A lu cu sui ṭhabik vek si e;
A sám kir khaw,
Tlangâk bang dum e.
12 A mit cu tiva kiangih thuro,
Hnawiti thawi khawlhaw,
Rem zetih to bang hluan e.
13 A biangpawl cu rimhmui umnak hmuan,
Hrampi rimhmui pen bang si e.
A hmurpawl cu mura zihmui ti fawrnak lily par si e.
14 A kutpawl cu birul lung mankhung thawi ceimawi mi sui tluan si hai e.
A ruangpum cu safaira thawi ceimawi mi vuiho si e.
15 A kepawl cu sui hlirhlăng ih tuah mi thil retnak parih tŭn mi marbal lung ṭhuam si hai e.
A hmel cu Lebanon bang,
Sidar thingpawl vekih cuanghleice si ai.
16 A kâ cu a thlumbik,
Si ngai e, anih cu duhnungza famkim si e.
Hihi ka lungduh si ai,
Hihi ka ṭhianrual si e,
Maw Jerusalem fanupawl!

6

Jerusalem Fanupawl

1 Maw nunau lakih mawi hlei,
Na lungduh cu khuiah so a rak pial?
Nangmah thawn amah kan hawltlang pei kan ti asile,
Na lungduh cu khui lamah rak pial maw?

Mo

2 Ka lungduh cu,
A ran rualpawl hmuan sungih khāl dingin le,
Lili parpawl tla ṭăwtkhawm dingin rimhmui umnak hmuan ah a rak feh.
3 Kei cu ka lungduh ta si ing khaw,
Ka lungduh cu keimai ta si ai.
Anih cu lily par lakah nuam zetin um ai e.

Mo Neitu

4 Maw ka duhdawt mi, nang cu Tirzah iangin na mawi,
Jerusalem iangin duh na nung,
Thantar thawi ralkap rual feh bangin akhawruahharza na si.
5 I hawisan aw,
Ziangahtile na mit in kei in rak neh aw.
Na sám cu me rual Gilead ihsi sukthla a bang.
6 Na ha cu tuunu rual khawlhfai hung suak bang,
Faphir hring cio hai khawh,
Cing hlah hai e an lakah pakhat hman.
7 Talê rah phel hluan e na bekpawl in, na hmaikhuh phenah.
8 Siangpahrangnu 60 rual le nusûn 80 le,
Fala him siar cawk lo um hai e.
9 Ka thuro, ka mifamkim,
Amah lawng cu,
A nuih neihsŭn te,
A hringtuih duatbik si ai.
Fanupawl in hmu hai khawh,
Mihualvanṭha tiah ko hai,
Siangpahrangnupawl le nusûnpawl in,
Amah cu fak hai.
10 Zing khawfingcat bang, thlapa bang mawi,
Ni bang fim kilkel,
Thantarpawl thawi ralkap rual bang bkhawruahharza cu zo si ngai?

6:4a khawruahharza: A mawizia reluarnak a si.

6:10b khawruahharza: 6:4 simfiangnak zoh aw.

Mo

11 aKûamrawn hring dildel zoh dingah,
Sabit hri an cerh maw ti le,
Talê an mûm maw ti zoh awk ah
Thingthei hmuan ah suk ing e.
12 Ka tiar man hlanah,
Ka thinlung cu ka mizahumpawlih ránglêng to vek si ai ing.

6:11a Sol 6:11: Câng 11-12 ih ṭawngkampawl hi tlangvalpaih ṭawng a si thei men.

Jerusalem Fanupawl

13 aMaw Shulamnu, ra kirsal aw, ra kirsal aw:
Kan lo thlir theinak dingah ra kirsal aw, ra kirsal aw!
Ralkap bur hnih ralṭhuang tuah zoh hluanin,
Ziangahso Shulamnu cu nan thlir?

6:13a Sol 6:13: Hi Bible câng hi zawi ṭawng mi a si ti theihfiang a si lo.

7

Mo Neitu

1 Maw fanu zahum,
Kedan sungih na ke cu ziangtluk mawi na maw!
Na cāwn kūlpawl cu kutthiam nei kutsuak, keplung bang.
2 Na laimu cu sabitzu cawhrawi tlasam dah lo khengkûm bial si e;
Na pum cu lily par thawi ceimawi mi sangvut sūnkhawm si e.
3 Na pawhte pahnih cu sakhi note pahnih,
Sakhi faphir bang.
4 Na hngawng cu vuiho dawlsâng bang,
Na mitpawl cu Bath Rabbim kulh kăwtka kiangih Heshbon adilpawl bangtuk si e.
Na hnar cu Damaskas lam hawi,
Lebanon bdawlsâng vek si ai.
5 Karmel Tlang bangin na lu in lallukhum khum khaw,
Cule na lu parih na sám cu sendup bang;
Siangpahrang cu na sámphiar mite in kaitâng e.
6 Na duhumnak thawn, nang cu ziangtluk dawh le mawi si ci,
Maw duh mi!
7 Na ruangrai cu ṭhulhfau kung bang khawh,
Na pawhtepawl cun a rah bawr an iang.
8 Kei in, «Ṭhulhfau kung parah kaiding lai ing khawh,
A kâupawl tla kaihnget lang,» tiah ka ti.
Na hnawipawl cu sabit bawr bang seh,
Na thaw rimhmui te cu epal bang seh law.

7:4a dilpawl: A mit mawizia cu dil ti tle thawn a khaikhin zum a um.

7:4b dawlsâng: A hnar a mawizia a khaikhinnak a si men thei.

Mo

9 Na sangkhâr cu sabitzu ṭhabik bang seh law.
Sabitzu cu ka lungduh hrangah luang ziaizo seh,
Ihhmupawl hmur ah tawlhlut diaido seh.
10 Kei cu ka lungduh ta si ing khaw,
A ngai mi cu keimah si ing e.
11 Ka lungduh, ra law,
Ramlak ah feh nung naw;
Khawtepawl ah va riak nung naw.
12 Zingten sabit hmuan ah păwk pung e;
Sabit hri hnah no a cerh maw, a par mûmte a par maw ti le,
Talê a par lai a si maw ti zoh nung naw.
Cu tawkah ka duhdawtnak lo hlan lang.
13 aDudei kung in rimhmui suah khaw,
Ka rak lo retkhawmsak mi,
Kan kăwtpawl ah theirah duhumza tintian,
A hlun a thar um hai e,
Ka lungduh aw.

7:13a Dudei kung: Ram thlai phun khat tawba nei mi a si ih, Palisṭin ram le Siria ram ih um a si, fa neih theinak si vekih ruattu an um.

8

1 Maw, nang cu ka nuih hnawi ih cawm mi,
Ka unaupa hluan ci e!
Khaw lengah lo táwng ningna, lo hnam lang;
Hmuhsuam ka si lo ding.
2 Nun i rak sim ṭheu tu, ka nuih rūninn sungah,
Ka lo hruai ding ih, ka lo lawipi ding.
Sabitzu hmui le,
Ka talê rah uam mi ti ka lo inter ding.
3 A keh lam kut cu ka lu thuaiah,
Cule a vawrh lam kut in i rak kuah.

Mo Neitu

4 Maw Jerusalem fanupawl, thu ka lo cah,
A lunghmui hlanlo căwkphur hlah uhla,
Duhdawtnak cu ṭhangharh fawn hlah uh.

A Sungkhatpawl

5 A lungduh hngauhsan tahratih,
Thlaler ihsi ra suak hi zo a si?
Epal kung hnuaiah ka rak lo ṭhang.
Cu tawkah na nu in a lo hring;
Cu tawkah a lo hringtunu in a lo hring.

Mo

6 Na lungthin ah tacik bangin i re law,
Na bân parah tacik bangin.
Ziangahtile duhdawtnak cu thihnak tlukin a cak,
Thîkthusiatnak cu Sheol tlukin a nun a râwng;
A alh cu meisa alh a si,
Meisa alh nasabik vek.
7 Duhdawtnak cu tidai tampi in a mitter thei lo,
Tivapawl khal in an fĕn thei lo.
Duhdawtnak hrangah mi in a inn ih
A lennak hmuahhmuah pe thluh hnik hmansehla,
Cumi cu nasazetih hmuhsuam a si ding.

Mo Ṭapapawl

8 Farnu tlawlsamte nei ung khaw,
Anih cun hnawi nei hlah e.
Amai thuhla an rel ni ah
Kan farnu hrangah ziang tuah lai ung e?
9 Amah cu khawkulh si sehla cu,
A parah ngun ih tuah mi ralkahnak ăwng kan sak ding nân;
Amah cu sângka si sehla,
Sidar thingpheng in amah cu kharkhum lai ung e.

Mo

10 Kei cu khawkulh si ing khaw,
Ka pawhtepawl in dawlsâng iang e;
Cun kei cu a mit ah hnangamdaihnak hmungahtu vek si ing.
11 Baal Hamon ah Solomon in sabit hmuan rak nei e.
Cuih a sabit hmuan cu kiltupawl hnenah rak sān e;
Mi kip in a rah hrangah
Ngun paisa 1000 cio pek ding si ai.
12 Ka sabit hmuan cu ka kut ah um e.
Maw Solomon, nang cun 1000 le,
A rah kiltu mi 200 lai nei na hman ci maw.

Mo Neitu

13 Nang ka hmuan sungih cêng,
Na hawipipawl in na aw ngai hai,
Kei khal in thei ve ning!

Mo

14 Zamrang law, ka lungduh,
Cule sakhi asilole rimhmui tlang ih
Zuknêng tûai bang len.