About Bible Thianghlim | ©

BibleThianghlim – 1 SANSIARNAK

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 SANSIARNAK

  • A ngantu: Ezra
  • A siartu: Sáltan hnu Israel-mipawl
  • Thil cang kum: B.C. 1011-971

Sansiarnak bu khatnak le bu hnihnak hi a thăwk ah cun bu khat a si. Hi cabu hin Babilon sáltan thu (1San 9:1), sáltangpawl Jerusalem ih kir siannak Sairas-ih thusuah (2San 3:17-24) le sáltan hnuih rung nungdam David tesinfapawl (1San 3:17-24) thuhla a tarlang. Curuangah hi cabu hi hih thil cang mipawl hnu, B.C. 430 hrawngih lakkhawm mi a si ti a langter. Cabu ngantu in a hmin a ngan dah lo nân, Jew-pawlih thuanthu le a dang nĕmhngettupawl in cabu ngantu cu puithiam le cangantu si cih, Ezra a si ti an langter (7:1-6).

Sansiarnak cabu hin a thuanthu ngan mipawl hmangin Pathian thu pawimawh zetzet a tarlang. Sansiarnak cabu-ih Pathian thu laimu cu Pathian biak a si. Sansiarnak cabu pakhatnak le pahnihnak in puithiampawl thuhla le Jehovah biak nasazetin a uar.

Sansiarnak cabupawl in a burpi ih Jehovah biakdān dik a thupitzia a reluar. Siangpahrang bu khatnak le bu hnihnak hnakin nasazetin Levi-mipawl, Yahweh-ih puithiampawl le hla saknak ih Yahweh biak a thupitzia a rel. Sansiarnak cabupawl in siangpahrang tampi in Temple asilole Levi-mipawlih rawngbawlnak an ngaipawimawhzia a uar. Pathian cu Bible ih in zirh vekih biak ding a si.

Sansiarnak cabupawl in bulpak ih Jehovah biakdān dik khal a uar. Siangpahrang cabu sungih lang dah lo asilole málte lawng lang, Sansiarnak cabupawl ih lang leuhleuh mi ṭawngkampawl cu: Yahweh «hawl» asilole Yahweh «suh;» mah le mah «phahniamawk;» «rinumnak;» Yahweh parih «ṭhumawk,» tipawl hi an si.

Jehovah «tansan;» Pathian parih «rinum lo;» «Yahweh parih thilsual tuah,» tipawl tla hi Siangpahrang cabupawl ah málte lawng an lăng vekin, Sansiarnak cabupawl khalah málte lawng an lang. Sansiarnak cabupawl ih an uar mi «thinlung pumhlum» neih asilole «thinlung hmuahhmuah» ih Pathian rĕn (a hleicein Sansiarnak bu hnihnak) ti ṭawngkampawl hi Siangpahrang cabupawl ah an um lo ti tluk a si. Pathian cu bulpak rori ih biak ding a si.

«Sansiarnak» ti cabu hmin hi Jerome in Latin a leh mi ihsi thăwk mi a si (A.D. 400 hrawng). Sansiarnak cabupawl hi Septuagint (B.C. 200 hrawng) ah cun «Hrelh mi Thilpawl» tiin an ko, cumi umzia cu Samuel cabupawl le Siangpahrang cabupawl sunzăwmnak a si men thei. Hebru Bible ah hi cabu hmin hi «Sansiarnak cazin» ti a si ih, 1 Sansiarnak 27:24 ihsi lak mi a si. Sansiarnak bu khatnak in Adam ihsin Israel miphun thawhkehnak a rel (1:1). Bung 1-9 cu cithlahsâwngawknak thuhla hlir deuhthaw a si. Bung 10-29 in David-ih uknak thuhla a rel.

Thuhlawm Ṭhen

  • I. Adam ihsin David tiang cithlahsâwngawkdān (bung 1-9)
  • II. Israel tlunah David a lal (bung 10-29)

1

Adam ihsin Abraham Tiang

1 Adam, Seth, Enosh, 2 Kenan, Mahalalel, Jared, 3 Enok, Methuselah, Lamek, 4 Noah, Shem, Ham le Jafeth.

5 Jafeth fapapawl cu: Gomer, Magog, Madai, Javan, Tubal, Meshek le Tiras tla an si. 6 Gomer fapapawl cu: Ashkenaz, Difath le Togarmah tla an si. 7 Javan fapapawl cu: Elishah, Tarshish, Kit-mipawl le Rodan-mipawl tla an si.

8 Ham fapapawl cu: Kush, Mizraim, Put le Kanaan tla an si. 9 Kush fapapawl cu: Seba, Havilah, Sabta, Raama le Sabtekha tla an si ih, Raama fapapawl cu Sheba le Dedan an si. 10 Kush in Nimrod a hring, anih cun leilung tlunah micak si a thăwk. 11 Mizraim in Lud-mipawl, Anam-mipawl, Lehab-mipawl, Naftuh-mipawl, 12 Pathrus-mipawl, Kasluh-mipawl (cumi ihsin Filisṭia-mipawl le Kaftor-mipawl an ra suak), 13 Kanaan in a fatir Sidon, Heth, 14 Jebus-mi, Amor-mi, Girgash-mi, 15 Hiv-mi, Arki-mi, Sin-mi, 16 Arvad-mi, Zemar-mi le Hamath-mi tla a hring.

17 Shem-ih fapapawl cu: Elam, Asshur, Arfakshad, Lud, Aram, Uz, Hul, Gether le Meshek an si. 18 Arfasad in Shalah a hring ih, Shalah in Eber a hring. 19 Eber in fapa pahnih a nei: pakhat ih hmin cu Pelek a si, ziangahtile amai san ah leilung a ṭhenaw; a unaupaih hmin cu Joktan a si. 20 Joktan in Almodad, Shelef, Hazarmaveth, Jerah, 21 Hadoram, Uzal, Diklah, 22 Obal, Abimael, Sheba, 23 Ofir, Havilah le Jobab tla a hring. Hipawl hmuahhmuah cu Joktan-ih fapa an si.

24 Shem, Arfasad, Shelah, 25 Eber, Pelek, Reu 26 Seruk, Nahor, Terah, 27 le Abram, amah cu Abraham a si. 28 Abraham-ih fapa cu Isak le Ishmael an si.

Ishmael Tefapawl

29 Hipawl hi an thlahsâwngpawl an si: Ishmael-ih fatir cu Nebajoth a si; cun Kedar, Adbeel, Mibsam, 30 Mishma, Dumah, Massa, Hadad, Tema, 31 Jetur, Nafish, Kedemah tla an si. Hipawl hi Ishmael-ih fapapawl cu an si.

Keturah Tefapawl

32 Abraham-ih nusûn Keturah ih hrin mi fapapawl cu: Zimran, Jokshan, Medan, Midian, Ishbak le Shuah an si. Jokshan-ih fapapawl cu Sheba le Dedan an si. 33 Midian fapapawl cu Efah, Efer, Hanok, Abida le Elda an si. Hipawl hmuahhmuah cu Keturah-ih tefa an si.

Isak Tefapawl

34 Abraham in Isak a hring. Isak fapapawl cu Esau le Israel an si. 35 Esau fapapawl cu: Elifaz, Reuel, Jeush, Jaalam le Korah an si. 36 Elifaz fapapawl cu: Teman, Omar, Zefo, Gatam, Kenaz, Timna le Amalek an si. 37 Reuel fapapawl cu: Nahath, Zerah, Shammah le Mizzah an si.

Seir Tefapawl

38 Seir-ih fapapawl cu: Lotan, Shobal, Zibeon, Anah, Dishon, Ezer le Dishan an si. 39 Lotan-ih fapapawl cu: Hori le Hemam an si; Lotan-ih farnu cu Timna a si. 40 Shobal-ih fapapawl cu: Alian, Manahath, Ebal, Shefo le Onam an si. Zibeon-ih fapapawl cu Ajah le Anah an si. 41 Anah fapa cu Dishon a si. Dishon-ih fapapawl cu: Hemdan, Eshban, Ithran le Keran an si. 42 Ezer-ih fapapawl cu: Bilhan, Zaavan le Akan an si. Dishan-ih fapapawl cu Uz le Aran an si.

Edom Siangpahrangpawl

43 Hipawl hi Israel tefapawl tlunih siangpahrang in a uk hlanih Edom ram rak uktu siangpahrangpawl an si: Beor fapa Bela, a khaw hmin cu Dinhabah a si. 44 Bela a thih tikah, Bozrah hrin Zerah fapa Jobab in a airawlin a uk. 45 Jobab a thih tikah, Teman-mipawlih rammi Husham in a airawlin a uk. 46 Husham a thih tikah, Moab ram ih Midian-mi dotu, Bedad fapa Hadad in a airawlin a uk. A khaw hmin cu Avith a si. 47 Hadad a thih tikah, Masrekah-mi Samlah in a airawlin a uk. 48 Samlah a thih tikah, tiva kapih um Rehoboth-mi Saul in a airawlin a uk. 49 Saul a thih tikah, Akbor fapa Baal-Hanan in a airawlin a uk. 50 Baal-Hanan a thih tikah, Hadad in a airawlin a uk, a khaw hmin cu Pau a si. A nupi hmin cu Mehetabel, Matred fanu, Mezahab fanu a si. 51 Hadad khal a thi ve. Edom hotupawl cu: Hotu Timnah, Hotu Alvah, Hotu Jetheth, 52 Hotu Aholibamah, Hotu Elah, Hotu Pinon, 53 Hotu Kenaz, Hotu Teman, Hotu Mibzar, 54 Hotu Magdiel le Hotu Iram tla an si. Hipawl hi Edom hotupawl an si.

2

Israel Tefapawl

1 Hipawl hi Israel-ih fapapawl an si: Reuben, Simeon, Levi, Judah, Issakar, Zebulun, 2 Dân, Joseph, Benjamin, Naftali, Gad le Asher an si.

Judah ihsin David Tiang

3 Judah-ih fapapawl cu: Er, Onan le Shelah an si. Hite pathum cu Kanaan-mi Shua fanu ih a hrinsak mi an si. Judah-ih fatir Er cu Jehovah hmaiah a ṭha lo ih Jehovah in a that. 4 A monu, Tamar in Perez le Zerah a hrinsak. Judah-ih fapapawl cu an zaten panga an si.

5 Perez-ih fapapawl cu Hezron le Hamul an si. 6 Zerah-ih fapapawl cu: Zimri, Ethan, Heman, Kalkol le Dara, an zaten panga an si.

7 Karmi fapa cu aAkar a si, Israel buaitertu, camsiat mi thil dānpahbăltu a si.

2:7a Akar: Akar hi Joshua bung 7 ah Akhan tiih kawh a si. Hi tawkah cun Hebru ṭawngfáng «buainak thlentu» ti mi awsuah thlunin «Akhar» tiih thleng a si.

8 Ethan fapa cu Azariah a si.

9 A hrangih hrin mi Hezron fapapawl cu: Jerahmeel, Ram le Kelubai an si. 10 Ram in Amminadab a hring ih, Amminadab in Judah tefapawl hruaitu Nahshon a hring. 11 Nahshon in Salma a hring ih, Salma in Boaz a hring; 12 Boaz in Obed a hring ih, Obed in Jesse a hring; 13 Jesse in a fatir Eliab a hring, a pahnihnak ah Abinadab, a pathumnak ah Shimea, 14 a palitnak ah Nethanel, a pangatnak ah Raddai, 15 a paruknak ah Ozem, a pasarihnak ah David.

16 An farnupawl cu: Zeruiah le Abigail an si. Zeruiah-ih fapapawl cu Abishai, Joab le Asahel, pathum an si. 17 Abigail in Amasa a hring, Amasa-ih pa Jether cu Ishmael-mi a si.

Hezron Tefapawl

18 Hezron fapa Kaleb in a nupi Azubah le Jerioth thawn fapa an nei. Hipawl hi a fapapawl cu an si: Jesher, Shobab le Ardon. 19 Azubah a thih tikah, Kaleb in Efarath cu a nupi ah a ṭhi ih, anih in Hur a hrinsak. 20 Hur in Uri a hring ih, Uri in Bezalel a hring.

21 Cuihhnu ah Hezron cu Gilead-ih pa Makir fanu hnenah a lut, cu nu cu kum 60 a kim hnuih a ṭhit mi a si; cu nu in Segub a hrinsak. 22 Segub in Jair a hring, cu pa cun Gilead ram ah khawpi 23 a nei. 23 Geshur le Aram in Jair-ih khawtepawl cu an lâk, Kenath le a khawṭek khaw 60 thawn. Hipawl hmuahhmuah hi Gilead-ih pa Makir tefapawl cu an si. 24 Cuihhnu ah Hezron cu Kaleb Efrathah ah a thi, Hezron nupi Abijah in Tekoa-ih pa Ashur a hring.

Jerahmeel Tefapawl

25 Hezron-ih fatir Jerahmeel fapapawl cu, a fatir ah Ram, cule Bunah, Oren, Ozem le Ahijah tla an si. 26 Jerahmeel in a dang nupi a nei, a hmin cu Atarah a si, amah cu Onam-ih nu a si. 27 Jerahmeel-ih fatir Ram-ih fapapawl cu: Maaz, Jamin le Eker an si. 28 Onam-ih fapapawl cu Shammai le Jada an si. Shammai-ih fapapawl cu Nadab le Abishur an si.

29 Abishur-ih nupi hmin cu Abihail a si ih, anih in Ahban le Molid a hring. 30 Nadab fapapawl cu Seled le Appaim an si; Seled cu fa nei loin a thi. 31 Appaim-ih fapa cu Ishi a si, Ishi fapa cu Sheshan a si ih, Sheshan fapa cu Ahlai a si. 32 Shammai-ih unaupa Jada-ih fapapawl cu Jether le Jonathan an si; Jether cu fāte nei loin a thi. 33 Jonathan-ih fapapawl cu Peleth le Zaza an si. Hipawl hi Jerahmeel-ih tefapawl an si.

34 Sheshan in fapa a nei lo, fanupawl lawng a nei. Cule Sheshan in Izip-mi hnenum a nei, a hmin cu Jarha a si. 35 Sheshan in a fanu cu nupi dingah a siahhlawh Jarha a pek, cule anih in fapa Attai a hring. 36 Attai in Nathan a hring ih, Nathan in Zabad a hring; 37 Zabad in Eflal a hring ih, Eflal in Obed a hring; 38 Obed in Jehu a hring ih, Jehu in Azariah a hring; 39 Azariah in Helez a hring ih, Helez in Eleasah a hring; 40 Eleasah in Sismai a hring ih, Sismai in Shallum a hring; 41 Shallum in Jekamiah a hring ih, Jekamiah in Elishama a hring.

Kaleb Tefapawl

42 Jerahmeel-ih unaupa Kaleb-ih tesinfapawl cu: a fatir ah Mesha a si, amah cu Zif-ih pa a si, cule Hebron-ih pa Mareshah in fapa dangpawl tla a nei. 43 Hebron-ih fapapawl cu: Korah, Tappuah, Rekem le Shema an si. 44 Shema in Jorkoam-ih pa Raham a hring ih, Rekem in Shammai a hring. 45 Shammai-ih fapa cu Maon a si ih, Maon cu Beth Zur-ih pa a si.

46 Kaleb-ih nusûn Efah in Haran, Moza le Gazez a hring; cule Haran in Gazez a hring. 47 Jahdai-ih fapapawl cu Regem, Jotham, Geshan, Pelet, Efah le Shaaf an si.

48 Kaleb-ih nusûn Maakah in Sheber le Tirhanah a hring. 49 Cu nu in Madmannah-ih pa Shaaf, Makbenah-ih pa Sheva le Gibea-ih pa a hring. Kaleb fanu cu Akhsah a si.

50 Hipawl hi Kaleb-ih tesinfapawl an si: Hur-ih fa, Kirjath Jearim-ih pupá, Efrathah-ih fatir Shobal, 51 Bethlehem-ih pupá Salma le Beth Gader-ih pupá Haref tla an si.

52 Kirjath Jearim-ih pupá Shobal cun tesinfa a nei: Haroeh le Manuhoth sungza a hrek an si. 53 Kirjath Jearim hrinpawl cu Ithra-mipawl, Put-mipawl, Shumat-mipawl le Mishrait-mipawl an si.

54 Salma-ih fapapawl cu Bethlehem, Netofa-mipawl, Atroth Beth Joab, Manahath-mipawl a hrek le Zor-mipawl an si.

55 Jabez ih cêng, cangantupawlih hrinpawl cu: Tira-mipawl, Shimea-mipawl le Suka-mipawl tla an si. Cupawl cu Rekab sungzapawlih pupá Hammath hnen ihsi ra Ken-mi an si.

3

David Tefapawl

1 Hipawl hi Hebron khua ih suak David fapapawl an si: Amnon cu fatir a si ih, Jezereel-mi Ahinoam ihsin a si; a pahnihnak cu Karmel-mi Abigail ihsin Daniel a si; 2 a pathumnak cu Geshur siangpahrang Talmai-ih fanu Maakah fapa Absalom a si; a palitnak cu Haggith fapa Adonijah a si; 3 a pangatnak cu Abital hnen ihsin Shefatiah; a paruknak cu a nupi Eglah hnen ihsin Ithream a si. 4 Hite paruk cu Hebron a um laiih hrinsak mi an si. Cu tawkah kum sarih le thla ruk sung a lal, Jerusalem ah kum 33 sung a lal. 5 Hipawl hi Jerusalem ih hrinsak mipawl an si: Shimea, Shobab, Nathan le Solomon, an pali ten Ammiel-ih fanu aBathshua ihsin an si. 6 Cuihtlunah Ibhar, Elishama, Elifelet, 7 Nogah, Nefeg, Jafia, 8 Elishama, Eliada le Elifelet khal an um, an zaten pakua an si. 9 Hipawl hi a nusūnih fapapawl telh loin, an zaten David fapa an si ih, Tamar cu an farnu a si.

3:5a Bathshua: Bathshua hi Batsheba hmin dang a si.

Solomon Tefapawl

10 Solomon fapa cu Rehoboam a si; Abijah cu a fapa a si, cuih fapa cu Asa a si, cuih fapa cu Jehoshafat a si, 11 cuih fapa cu Joram a si, cuih fapa cu Ahaziah a si, cuih fapa cu Joash a si, 12 cuih fapa cu Amaziah a si, cuih fapa cu Azariah a si, cuih fapa cu Jotham a si, 13 cuih fapa cu Ahaz a si, cuih fapa cu Hezekiah a si, cuih fapa cu Manasseh a si, 14 cuih fapa cu Amon a si, cuih fapa cu Josiah a si. 15 Josiah-ih fapapawl cu fatir ah Johanan, a pahnihnak ah Jehoiakim, a pathumnak ah Zedekiah le a palitnak ah Shallum a si. 16 Jehoiakim-ih tefapawl cu: a fapa Jekoniah le a fapa Zedekiah an si.

Jekoniah Tefapawl

17 Thawngtla Jekoniah-ih fapapawl cu: a fapa Shealtial, 18 Malkiram, Pedaiah, Shenazzar, Jekamiah, Hoshama le Nedabiah an si. 19 Pedaiah fapapawl cu Zerubbabel le Shimei an si. Zerubbabel-ih fapapawl cu Meshullam, Hananiah le an farnu Shelomith le, 20 Hashubah, Ohel, Berekiah, Hasadiah le Jushab-Hesed, an zaten panga an si. 21 Hananiah-ih fapapawl cu Pelatiah, Jeshaiah, Refaiah-ih fapapawl, Arnan-ih fapapawl, Obadiah-ih fapapawl le Shekaniah-ih fapapawl an si. 22 Shekaniah-ih fapa cu Shemaiah a si. Shemaiah-ih fapapawl cu Hattush, Igal, Bariah, Neariah le Shafat, an zaten paruk an si. 23 Neariah-ih fapapawl cu Elioenai, Hezekiah le Azrikam, an zaten pathum an si. 24 Elioenai-ih fapapawl cu Hodaviah, Eliashib, Pelaiah, Akkub, Johanan, Delaiah le Anani, an zaten pasarih an si.

4

Judah Tefapawl

1 Judah-ih fapapawl cu Perez, Hezron, Karmi, Hur le Shobal an si. 2 Shobal fapa Reaiah in Jahath a hring ih, Jahath in Ahumai le Lahad a hring. Hipawl hi Zora-mipawlih hrinpawl an si. 3 Hipawl hi Etam-ih paih fapapawl an si: Jezreel, Ishma le Idbash; cule an farnuih hmin cu Hazelelponi a si. 4 Penuel cu Gedor-ih pa a si ih, Ezer cu Husah-ih pa a si. Hipawl hi Bethlehem-ih pupá Efrathah-ih fatir Hur-ih fapapawl an si.

5 Tekoah pa Ashur in nupi pahnih a nei, Helah le Naarah. 6 Naarah in Ahuzzam, Hefer, Temeni le Haahashtari a hrinsak. Hipawl hi Naarah-ih fapapawl an si. 7 Helah-ih fapapawl cu Zereth, Zohar le Ethnan an si. 8 Koz in Anub, Zobebah le Harum-ih fapa Aharhel hrinpawl tla a hring.

9 aJabez cu a unaupawl hnakin upattlak a si ih, a nu in a hmin ah Jabez a sak, «Ziangruangahtile nâ tuarin ka hring,» tiah a ti.

4:9a Jabez: «Jabez» ti hmin awsuah hi Hebru ṭawngfáng «na» ti awsuah vek a si.

10 Jabez in Israel Pathian cu, «Maw, mal i sawm taktak awla, ka ram kauter aw, na kut in i umpi sehla, nâ tuar lo dingin thil ṭhalo lakin i humhim aw,» tiin a ko. A dil mi cu Pathian in a pe.

11 Shuhah-ih unaupa Kelub in Eshton-ih pa Mehir a hring. 12 Eshton in Beth-Rafa, Paseah le Ir-Nahash-ih pa Tehinnah a hring. Hipawl hi Rekah-ih mipapawl an si. 13 Kenaz-ih fapapawl cu Othniel le Seraiah an si. Othniel-ih fapapawl cu Hathath le Meonothai an si. 14 Meonothai cu Ofrah-ih pa a si. Seraiah in Ge-Harashim-ih pa Joab a hring, annih cu zungthiam mi an si. 15 Jefunneh fapa Kaleb-ih fapapawl cu Iru, Elah le Naam tla an si. Elah-ih fapa cu Kenaz a si. 16 Jehallelel-ih fapapawl cu Zif, Zifah, Tiria le Asarel an si. 17 Ezrah-ih fapapawl cu Jether, Mered, Efer le Jalon an si. Mered-ih nupi in Miriam, Shammai le Eshtemoa-ih pa Ishbah a hring. 18 A nupi aJehudijah in Gedor-ih pa Jered le Sokoh-ih pa Heber le Zanoah-ih pa Jekuthiel a hring. Hipawl hi Mered ih ṭhit mi Faro fanu Bithiah-ih fapapawl an si.

4:18a Jehudijah: Judah hnám ihsin tinak a si men thei.

19 Naham-ih farnu, Hodiah nupi-ih fapapawl cu Gar-mi Keilah le Maakath-mi Eshtemoa an si. 20 Shimon-ih fapapawl cu Amnon, Rinnah, Ben-Hanan le Tilon an si. Ishi fapapawl cu Zoheth le Ben-Zoheth an si.

21 Judah fapa Shelah-ih fapapawl cu Lekah-ih pa Er, Mareshah-ih pa Laadah le Beth-Ashbea ih patzai ṭuantu umkhawm hrinpawl an si; 22 cuihtlunah Jokim, Kozeba-ih mipapawl le Joash; Moab ihsin uktu Saraf le Jashubi-Lehem an si. Ngankhum mipawl hi khuahlan ta an si.

23 Hipawl hi beltuahtupawl le Netaim le Gederah ih cêngpawl an si; annih cu cuih hmun ah siangpahrang hnenah a hna ṭuanin an cêng.

Simeon Tefapawl

24 Simeon-ih fapapawl cu Nemuel, Jamin, Jarib, Zerah le Shaul an si; 25 a fapa cu Shallum a si, cuih fapa cu Mibsam a si ih, cuih fapa cu Mishma a si. 26 Cule Mishma-ih fapapawl cu Hamuel a si, cuih fapa cu Zakkur a si ih, cuih fapa cu Shimei a si. 27 Shimei in fapa hleiruk le fanu paruk a nei; asinan a unaupawl in fāte tampi an nei lo, an hrinpawl lakih zokhal Judah tefapawl zât in an karhzai fawn lo.

28 Anmah cu Beersheba, Moladah le Hazar Shual, 29 Bilhah, Ezem, Tolad, 30 Bethuel, Hormah, Ziklag, 31 Beth Markaboth, Hazar Susim, Beth Biri le Shaaraim pawl ah an cêng. Hipawl hi David a lal tiangih an khawpipawl an si. 32 An khuapawl cu Etam, Ain, Rimmon, Token le Ashan, khaw nga an si; 33 cule cuih khawpi kimvel khawṭekpawl zaten Baal tiang a thleng. Hipawl hi an cēnnak hmunpawl an si ih, an cithlahsâwng an kilhim. 34 Meshobab, Jamlek le Amaziah fapa Joshah, 35 Joel le Joshibiah fapa Jehu, Seraiah fapa, Asiel fapa; 36 Elioenai, Jaakobah, Jeshohaiah, Asaiah, Adiel, Jesimiel, Benaiah; 37 Shifi cu Ziza fapa a si, amah cu Allon-ih fapa a si, cumi cu Jedaiah fapa a si, amah cu Shimri fapa a si ih, amah cu Shemaiah fapa a si. 38 An hmin tarlăng mipawl hi anmai hrin cio hruaitu an si ih, an pupáih sungza cu nasazetin a karh.

39 Annih cu Gedor luhnak ah an feh ih, an rante rual hrang tlannak ding hawlin phaikuam nisuahnak lam tiang an feh. 40 Cule ran tlannak ding hmunram duhnungza le ṭha an táwng, cuih hmunram cu kaupi le hmunreh, ralmuangza a si, ziangahtile cu tawkah hlanlai ah Ham-mipawl an rak um dah.

41 A tlunih ngankhum mi hminpawl hi Judah siangpahrang Hezekiah san ihsi ra um a si, cule annih in Ham-mipawlih thlampawl le cutawk ih tawn mi Meun-mipawl an do ih, an thatfai ṭheh, tuihsun ni tiangin. Cule annih cu cupawlih hmunram ah an cêng, ziangruangahtile an rante rual hrangah tlannak a um. 42 Anmah lakih mi hrekkhat, Simeon fapapawl lakih mi 500 cu Seir Tlang ah an feh ih, an hotu ah Ishi-ih fapapawl Pelatiah, Neariah, Refaiah le Uzziel tla an hmang. 43 Annih cun a tāng mi Amalek tlânsuak mipawl kha an neh. Annih cu tuihsun ni tiangin cu tawkah an cêng.

5

Reuben Tefapawl

1 Reuben cu Israel-ih fatir a si. A paih ihkhun a bawrhbanter ruangah, a fatir sinak cu Israel fapa Joseph-ih fapapawl hnenih pek a si, cutin cithlahsâwngawknak cu fatir dinhmun zulhih siar a si lo; 2 cutisikhalsehla Judah in a unaupawl a neh hai ih, amah ihsin uktu a ra, fatir sinak covo cu Joseph ta a si ko na cingin. 3 Israel fatir Reuben-ih fapapawl cu Hanok, Pallu, Hezron le Karmi an si.

4 Joel in fapapawl tla a nei, Shemaiah cu a fapa a si. Cuih fapa cu Gog a si, cuih fapa cu Shimei a si, 5 cuih fapa cu Mikah a si, cuih fapa cu Reaiah a si, cuih fapa cu Baal a si, 6 cuih fapa cu Beerah a si, anih cu Assiria siangpahrang Tiglath-Pileser in ralkaih ah a hruai. Anih cu Reuben-mipawl hruaitu a si. 7 A unaupawl cu an hrin vek cio in, an tesinfanaupawl cithlahsâwngawkdān khum a si tikah: lubân Jeiel, Zekariah, 8 Azaz fapa Bela, Azaz cu Shema fapa a si, cuih fapa cu Joel a si, amah cu Aroer ah a cêng, Nebo le Baal Meon tiang. 9 Gilead ram ah an sumhnám an karhzai ruangah, nisuahnak lamah Zufraṭis Tiva ihsin ramṭhing luhnak tiang umhmun an khuar.

10 Saul san laiah annih cu Hagar-mipawl thawn an doaw, cupawl cu an kut ah an duai, cule Gilead nisuahnak lam ram tluansuakin anmai thlam ah an cêng.

Gad Tefapawl

11 Gad tefapawl cu Bashan ram ralden Salkah tiang an cêng. 12 Joel cu an lubân a si ih, a sangtu cu Shafam a si, cun Jaanai le Shafat cu Bashan ah an um, 13 cule an pupá sungza-ih unaupawl cu: Maikal, Meshullam, Sheba, Jorai, Jakan, Zia le Eber, an zaten pasarih an si. 14 Hipawl hi Hur fapa Abihail-ih tefa an si, cumi cu Jaroah fapa a si ih, cumi cu Gilead fapa a si, cumi cu Maikal fapa a si, cumi cu Jeshishai fapa a si, cumi cu Jahdo fapa a si, cumi cu Buz fapa a si; 15 Ahi cu Abdiel fapa a si, cumi cu Guni fapa a si ih, an pupáih sungza hotu a si. 16 Gad-mipawl cun Gilead ram Bashan ah le a khuapawl le Sharon-ih ran tlannak ram lawnglakpawl hmuahhmuah an ramri cīn ah an cêng. 17 Hipawl hmuahhmuah cu Judah siangpahrang Jotham san le Israel siangpahrang Jeroboam san ih cithlahsâwng ih siar a si.

18 Reuben fapapawl, Gad-mipawl le Manasseh hnám a hrek cun miralṭha, ralphaw le ralnâm keng thei mipa, thálsaithiam le ral do dingih feh ral do thiam mipa 44760 an nei. 19 Annih cun Hagar-mipawl, Jatur, Nefis le Nodab an do. 20 Annih cu cupawl donak ah băwm an si ih, Hagar-mipawl le an zawngih um mipawl zaten an kut ah pek an si, ziangahtile ral an do tikah annih in Pathian an ko. Amah an rinsan ruangah anih in an thlacam a sâng. 21 Cun an sumhnámpawl an laksak, an kalauk 50000, an tuu ting hnih le thawng sawmnga, an lāk 2000 an si, mipa ting khat khal; 22 raldonak cu Pathian ta a si ruangah, mi tampi cu thi in an rīl. Cule annih cu sál ih hruai an si hlanlo cutepawlih hmunram ah an cêng.

Mannasseh Tefapawl

23 Manasseh hnám hrek pawlih tefapawl cu cuih ram ah an cêng. An mipum cu Bashan ihsin Baal, Senir, asilole Hermon Tlang tiang an karhzai. 24 Hipawl hi an pupápawlih sungza lubânpawl an si: Efer, Ishi, Eliel, Azriel, Jeremiah, Hodaviah le Jahdiel. Annihpawl cu micak ralṭha, mihminthang le an pupápawlih sungza lubânpawl an si.

25 Annih cu an pupápawlih Pathian lakah an rinum lo ih, an hmaiih Pathian ih a rak hlohralter mi, cuih ram minungpawlih pathianpawl lakah hlawhhlannak an rak tuah. 26 Israel Pathian in Assiria siangpahrang Pul-ih thinlung a căwktho, cucu Assiria siangpahrang Tiglath-Pileser a si. Anih in Reuben-mipawl, Gad-mipawl le Manasseh hnám hrek pawl cu a hruaihlo hai. Anih in annihpawl cu Halah, Habor, Hara le Gozan tiva ah a hruai hai, tuihni tiangin.

6

Levi Tefapawl

1 Levi fapapawl cu aGershon, Kohath le Merari an si. 2 Kohath fapapawl cu Amram, Izhar, Hebron le Uzziel an si. 3 Amram tefapawl cu Aaron, Mosi le Miriam an si. Aaron fapapawl cu Nadab, Abihu, Eleazar le Ithamar an si. 4 Eleazar in Finehas a hring ih, Finehas in Abishua a hring; 5 Abishua in Bukki a hring ih, Bukki in Uzzi a hring, 6 Uzzi in Zerahiah a hring, cule Zerahiah in Meraioth a hring; 7 Meraioth in Amariah a hring ih, Amariah in Ahitub a hring; 8 Ahitub in Zadok a hring ih, Zadok in Ahimaaz a hring, 9 Ahimaaz in Azariah a hring ih, Azariah in Johanan a hring; 10 Johanan in Azariah a hring (amah cu Jerusalem ih Solomon ih sak mi temple ih puithiam a si); 11 Azariah in Amariah a hring ih, Amariah in Ahitub a hring; 12 Ahitub in Zadok a hring ih, Zadok in Shallum a hring; 13 Shallum in Hilkiah a hring ih, Hilkiah in Azariah a hring; 14 Azariah in Seraiah a hring ih, Seraiah in Jehozadak a hring. 15 Jehovah in Judah le Jerusalem cu Nebukhadnezzar kut hmangin a hruaihloh hai tikah, Jehozadak khal hruaihloh a si.

6:1a Gershon: Himi hmin Gershon hi hih bung sung hmun dang ah cun Gershom ti a si.

16 Levi fapapawl cu Gershom, Kohath le Merari an si. 17 Hipawl hi Gershom fapapawlih hmin an si: Libni le Shimei. 18 Kohath fapapawl cu Amram, Izhar, Hebron le Uzziel an si. 19 Merari fapapawl cu Mahli le Mushi an si. Hipawl hi an pupápawl zulhin Levi-mipawlih hrinpawl cu an si: 20 Gershon fapa cu Libni a si, cuih fapa cu Jahath a si, cuih fapa cu Zimmah a si, 21 cuih fapa cu Joah a si, cuih fapa cu Iddo a si, cuih fapa cu Zerah a si ih, cuih fapa cu Jeatherai a si. 22 Kohath fapapawl cu a fapa Amminadab, cuih fapa cu Korah a si, cuih fapa cu Assir a si, 23 cuih fapa cu Elkanah a si, cuih fapa cu Ebiasaf a si, cuih fapa cu Assir a si, 24 cuih fapa cu Tahath a si, cuih fapa cu Uriel a si, cuih fapa cu Uzziah a si ih, cuih fapa cu Shaul a si. 25 Elkanah fapapawl cu Amasai le Ahimoth an si. 26 Elkanah thuhla ah cun, Elkanah fapapawl cu Zofai cu a fapa a si, cuih fapa cu Nahath a si, 27 cuih fapa cu Eliab a si, cuih fapa cu Jeroham a si ih, cuih fapa cu Elkanah a si. 28 Samuel-ih fapapawl cu a fatir ah Joel le a pahnihnak ah Abijah an si. 29 Merari fapapawl cu Mahli, cuih fapa cu Libni, cuih fapa cu Shimei, cuih fapa cu Uzzah, 30 cuih fapa cu Shimea, cuih fapa cu Haggiah a si ih, cuih fapa cu Asaiah a si.

Jehovah Inn ih Awnmawi Tumthiampawl

31 Hipawl hi cawl dingih Kuang a ra thlen hnuih, David in Jehovah inn sungih hla hruaitu dingih a ruat mipawl an si. 32 Solomon in Jerusalem ah Jehovah inn a sak hlan tiang, annih cun Tawnawknak Puanthlam Biakṭheng ah hla in rawng an bawl ṭheu, an rawngbawlhna cu an hnenih pek mi dān bangtukin an bâwl.

33 Hipawl hi an tesinfapawl thawi a dingtupawl an si: Kohat-mipawlih tesinfapawl ihsin hlasatu Heman, amah cu Samuel-ih fapa Joel-ih fapa a si. 34 Samuel cu Jeroham fapa Elkanah-ih fapa a si. Jeroham cu Toah fapa Eliel-ih fapa a si. 35 Toah cu Elkanah fapa Zuf-ih fapa a si ih, Elkanah cu Amasai fapa Mahath-ih fapa a si. 36 Amasai cu Joel fapa Elkanah-ih fapa a si ih, Joel cu Zefaniah fapa Azariah-ih fapa a si. 37 Zefaniah cu Assir fapa Tahath-ih fapa a si ih, Assir cu Korah fapa Ebiasaf-ih fapa a si. 38 Korah cu Kohath fapa Izhar-ih fapa a si ih, Kohath cu Israel fapa Levi-ih fapa a si. 39 Heman-ih unaupa Asaf cu a vawrh lamah a ding. Asaf cu Berakiah fapa a si, cuih fapa cu Simeah, 40 cuih fapa cu Maikal, cuih fapa cu Baaseiah, cuih fapa cu Malkijah, 41 cuih fapa cu Ethni, cuih fapa cu Zerah, cuih fapa cu Adaiah, 42 cuih fapa cu Ethan, cuih fapa cu Zimmah, cuih fapa cu Shimei, 43 cuih fapa cu Jahath, cuih fapa cu Gershom a si ih, cuih fapa cu Levi a si.

44 An sungkhat, Merari tesinfapawl cu keh lamah an um. Ethan cu Abdi fapa Kishi-ih fapa a si. Abdi cu Malluk fapa a si. 45 Malluk cu Amaziah fapa Hashabiah-ih fapa a si ih, Amaziah cu Hilkiah fapa a si. 46 Hilkiah cu Bani fapa Amzi-ih fapa a si ih, Bani cu Shemer fapa a si. 47 Shemer cu Mushi fapa Mahli-ih fapa a si ih, Mushi cu Levi fapa Merari-ih fapa a si.

48 Cule an unau Levi-mipawl cu Pathian inn Biakbûk rawngbawlhna tinkim hrangih ruat an si.

Aaron Tefapawl

49 Asinan Aaron le a tesinfapawl in Pathian siahhlawh Mosi in thu a rak pek mi hmuahhmuah bangtukin, Hmun Thianghlim Bik hna hmuahhmuah hrang le Israel hrangih sualkhuhthawinak tuah dingah Meiur Thilhlăn biakṭheng par le rimhmui biakṭheng parah thawinakpawl an hlan. 50 Hipawl hi Aaron-ih tesinfapawl an si: Eleazar cu a fapa a si, cuih fapa cu Finehas, cuih fapa cu Abishua, 51 cuih fapa cu Bukki, cuih fapa cu Uzzi, cuih fapa cu Zerahiah, 52 cuih fapa cu Meraioth, cuih fapa cu Amariah, cuih fapa cu Ahitub, 53 cuih fapa cu Zadok a si ih, cuih fapa cu Ahimaaz a si.

Levi-mipawlih Cēnnak Hmunrampawl

54 Hipawl hi an ram sungih an cēnnak hmunpawl le an umhmun khuarnak hrangah Aaron fapapawl lakih Kohath hrin hnenah camcawhfung zûknak hmangih pek an si: 55 Judah ram ih Hebron le a kimvelih ran tlannak ram lawnglakpawl cu anmah an pe. 56 Asinan khawpi lárampawl le a khawṭekpawl cu Jefunneh fapa Kaleb an pe. 57 Răwlhimnak khuapawl lakih pakhat Hebron, cuihtlunah Libnah khua le a ran tlannak ram lawnglakpawl, Jattir le a ran tlannak ram lawnglakpawl, Eshtemoa khua le a ran tlannak ram lawnglakpawl, 58 Hilen khua le a ran tlannak ram lawnglakpawl, Debir khua le a ran tlannak ram lawnglakpawl, 59 Ashan khua le a ran tlannak ram lawnglakpawl, cule Beth Shemesh khua le a ran tlannak ram lawnglakpawl cu Aaron fapapawl hnenah an pe. 60 Benjamin hnámih rampawl lak ihsin: Geba khua le a ran tlannak ram lawnglakpawl, Alemeth khua le a ran tlannak ram lawnglakpawl, Anathoth khua le a ran tlannak ram lawnglakpawl an pe. An hrinpawl lakih an khawpi zate cu khawpi hleithum a si.

61 A tāng lai mi Kohat-mipawlih hrinpawl hnenah camcawhfung zûknak hmangin Manasseh hnám hrek pawlih ta ihsin khawpi pahra an pe. 62 Gershom tesinfapawl hnenah, an hrin cio hnenah, Issakar hnám covo ihsin, Asher hnám covo ihsin, Naftali hnám covo ihsin le Bashan ram ih Manasseh hnám covo ihsin khawpi hleithum an pe. 63 Merari tesinfapawl hnenah, an hrin cio hnenah, Reuben hnám covo ihsin, Gad hnám covo ihsin le Zebulun hnám covo ihsin khawpi hleihnih an pe. 64 Israel tefapawl in hi khawpipawl cu a ran tlannak ram lawnglakpawl thawn Levi-mipawl an pe. 65 Camcawhfung zuknak hmangin Judah tefapawlih hnám covo ihsin, Simeon tefapawlih hnám covo ihsin le Benjamin tefapawlih hnám covo ihsin an hmin ih kawh mi hi khawpipawl cu an pe.

66 Kohat tesinfapawlih hrin hrekkhat cun Efraim hnám ramripawl sungah khawpipawl an nei. 67 Annih in Efraim tlang ram ih răwlhimnak khuapawl lakih pakhat Shekem cu a ran tlannak ram lawnglakpawl thawn an co, Gezer khua le a ran tlannak ram lawnglakpawl khal, 68 Jokmeam khua cu a ran tlannak ram lawnglakpawl thawn, Beth Horon khua cu a ran tlannak ram lawnglakpawl thawn, 69 Aijalon khua cu a ran tlannak ram lawnglakpawl thawn, cule Gath Rimmon khua cu a ran tlannak ram lawnglakpawl thawn an pe. 70 Manasseh hnám hrek hnen ihsin: Aner khua cu a ran tlannak ram lawnglakpawl thawn le Bileam cu a ran tlannak ram lawnglakpawl thawn a tāng mi Kohat cithlahpawl hrin hrangah an pe.

71 Manasseh hrin a hrek pawlih covo ihsin Gershom-ih tesinfapawl an pek mi cu Bashan ram ih Golan khua le a ran tlannak ram lawnglakpawl, Ashtaroth khua le a ran tlannak ram lawnglakpawl a si. 72 Issakar hnám covo ihsin Kedesh khua le a ran tlannak ram lawnglakpawl, Daberath khua le a ran tlannak ram lawnglakpawl, 73 Ramoth khua le a ran tlannak ram lawnglakpawl, Anem khua le a ran tlannak ram lawnglakpawl an pe. 74 Asher hnám covo ihsin Mashal khua le a ran tlannak ram lawnglakpawl, Abdon khua le a ran tlannak ram lawnglakpawl, 75 Hukok khua le a ran tlannak ram lawnglakpawl, Rehob khua le a ran tlannak ram lawnglakpawl an pe. 76 Naftali hnám covo ihsin Galilee ram ih Kedesh khua le a ran tlannak ram lawnglakpawl, Hammon khua le a ran tlannak ram lawnglakpawl, Kirjathaim khua le a ran tlannak ram lawnglakpawl an pe.

77 Zebulun hnám covo ihsin Merari tefa a tāng mipawl hnenah Rimmon khua le a ran tlannak ram lawnglakpawl, Tabor khua le a ran tlannak ram lawnglakpawl pek an si. 78 Jeriko ralden Jordan khat lam ral, Jordan nisuahnak lamah Reuben hnám covo ihsin ramṭhing ih Bezer khua le a ran tlannak ram lawnglakpawl, Jahzah khua le a ran tlannak ram lawnglakpawl, 79 Kedemoth khua le a ran tlannak ram lawnglakpawl, Mefaath khua le a ran tlannak ram lawnglakpawl khal an pe. 80 Gad hnám covo ihsin Gilead ram ih Ramoth khua le a ran tlannak ram lawnglakpawl, Mahanaim khua le a ran tlannak ram lawnglakpawl, 81 Hesbon khua le a ran tlannak ram lawnglakpawl, Jazer khua le a ran tlannak ram lawnglakpawl an pe.

7

Issakar Tefapawl

1 Issakar fapapawl cu Tola, Puah, Jashub, Shimron, an zaten pali an si. 2 Tola fapapawl cu Uzzi, Refaiah, Jeriel, Jahmai, Jibsam le Shemuel an si ih, an pupáih sungza lubân an si. Tola fapapawl cu anmai san ah micak ralṭha an si, David san ih an mipum cu 22600 an si. 3 Uzzi fapa cu Izrahiah a si ih, Izrahiah fapapawl cu Maikal, Obadiah, Joel le Ishiah an si. An panga in an zaten hotu an si. 4 Cupawl zawngah, anmai sungkua cio cun an pupápawlih sungza zulhin ral do dingih tiar cia ralkap 36000 an nei, ziangahtile annihpawl cun nupi tampi le fapa tampi an nei.

5 Issakar hrin hmuahhmuah ih an sungkhat micak ralṭha, an cithlahsâwng vekih siartelh mi mipum 87000 an um.

Benjamin Tefapawl

6 Benjamin fapapawl cu Bela, Beker le Jediael, an zaten pathum an si. 7 Bela fapapawl cu Ezbon, Uzzi, Uzziel, Jerimoth le Iri, an zaten panga an si. An pupápawlih sungza lubân, micak ralṭha an si ih, annihpawl cu an cithlahsâwng siarnak mipum 22034 lakih siartel an si.

8 Beker fapapawl cu Zemirah, Joash, Eliezer, Elioenai, Omri, Jerimoth, Abijah, Anathoth le Alemeth an si. Hipawl hmuahhmuah hi Beker fapa an si. 9 Annih cu an sungkua vek cio in cithlahsâwng ngankhumnak ah khum an si, an pupápawlih sungza lubân micak ralṭha 20200 an um. 10 Jediael fapa cu Bilhan a si ih, Bilhan fapapawl cu Jeush, Benjamin, Ehud, Kenaanah, Zethan, Tarshish le Ahishahar an si.

11 Hih fapapawl hmuahhmuah hi an pupápawlih sungza lubân an si; ral do le doawknak ih feh dingih tlingtlak micak ralṭha mipum 17200 an um. 12 Shuppim le Huppim cu Ir fapa an si ih, Hushim cu Aher fapa a si.

Naftali Tefapawl

13 Naftali fapapawl cu Jahziel, Guni, le Jezer an si ih, Bilhah-ih fapa an si.

Manasseh Tefapawl (Nitlaknak lamah)

14 Manasseh tesinfapawl cu a nusûn Siria-mi in Makir a hrinsak, amah cu Gilead-ih pa a si ih, cumi cu Asriel-ih pa a si. 15 Makir in Huppim le Shuppim hrangah nupi a ṭhi. A farnuih hmin cu Maakah a si. A pahnihnakih hmin cu Zelofehad a si, asinan Zelofehad cun fanu lawnglawng a hring. 16 Makir nupi Maakah in fapa a hring ih, a hmin ah Peresh a sak. A unaupaih hmin cu Sheresh a si ih, a fapapawl cu Ulam le Rakem an si. 17 Ulam fapa cu Bedan a si. Hipawl hi Manasseh fapa Makir-ih fapa Gilead-ih tesinfapawl an si.

18 A farnu Hammolekheth in Ishhod, Abiezer le Mahlah a hring.

19 Shemida fapapawl cu Ahian, Shekem, Liki le Aniam an si.

Efraim Tefapawl

20 Efraim tefapawl cu hipawl hi an si: Shuthelah cu a fapa a si, cuih fapa cu Bered, cuih fapa cu Tahath, cuih fapa Eleadah, cuih fapa Tahath, 21 cuih fapa Zabad, cuih fapa Shutelah (Shutelah fapa Ezer le Elead cu sumhnám ru dingin Gath ram ih an suk tikah, cutawk rammi Gath-mipawl in an rak that. 22 An pa Efraim in ni tampi sung a sûn hai, cule amah hnem dingin a sungkhatpawl an ra. 23 Anih cu a nupi hnenah a lut, a nupi cun fa a vun ih fapa a hring. A sungkua tlunah vanduainak a thlen ruangah a hmin ah aBeriah a sak. 24 Efraim-ih fanu cu Sheerah a si ih, anih in Beth Horon tlunta khua le tang ta khua le Uzzen-Sheerah khua a dĭn). 25 Cuih fapa Refah le Reshef, cuih fapa Telah, cuih fapa Tahan, 26 cuih fapa Ladan, cuih fapa Ammihud, cuih fapa Elishama, 27 cuih fapa Nun, cuih fapa cu Joshua a si.

7:23a Beriah: Hebru ṭawng ih a sullam cu «vanduainak ah» tinak a si.

28 An neih mi le an cēnnak hmunpawl cu Bethel le a kiangkap khawtepawl: nisuahnak lamah Naaran, nitlaknak lamah Gezer le a kiangkap khawtepawl, cule Shekem le a kiangkap khawtepawl, Ayyah le a kiangkap khawtepawl tiang a si, 29 cule Manasseh tefapawlih aramri lamah cun Beth Shean le a kiangkap khawtepawl, Taanak le a kiangkap khawtepawl, Megiddo le a kiangkap khawtepawl, Dor le a kiangkap khawtepawl an si. Hipawl ah Israel fapa, Joseph tefapawl an cêng.

7:29a ramri: A ṭawng hrampi ah, «kut» ti a si. Hebru ṭawng ih kut ti mi cun mi pakhat ih neih mi, ramṭhen, thuneihnak a aiawh thei.

Asher Tefapawl

30 Asher fapapawl cu Imnah, Ishvah, Ishvi, Beriah le an farnu Serah tla an si. 31 Beriah fapapawl cu Heber le Birzaith-ih pa Malkiel an si. 32 Heber in Jaflet, Shomer, Hotham le an farnu Shua a hring. 33 Jaflet fapapawl cu Pasak, Bimhal le Ashvath an si. Hipawl hi Jaflet-ih fale an si. 34 Shemer fapapawl cu Ahi, Rohgah, Jehubbah le Aram tla an si. 35 A unaupa Helem-ih fapapawl cu Zofah, Imna, Shelesh le Amal an si. 36 Zofah fapapawl cu Suah, Harnefer, Shual, Beri, Imrah, 37 Bezer, Hod, Shamma, Shilshah, Jithran le Beera an si. 38 Jether fapapawl cu Jefunneh, Pispah le Ara an si. 39 Ulla fapapawl cu Arah, Haniel le Rizia an si.

40 Hipawl hmuahhmuah hi Asher tefa, an pupápawlih sungza lubânpawl, mipa ṭhabikpawl, micak ralṭha, hotu lubikpawl an si. Cupawl cu ralkappawl lakah doawknak hrangih a tlingtlak mi ah an cithlahsâwng cio vekih ngankhum an si, an mipum cu 26000 an si.

8

Benjamin Tefapawl

1 Benjamin in a fatir Bela a hring, a pahnihnak ah Ashbel, a pathumnak ah Aharah, 2 a palitnak ah Nohah le a pangatnak cu Rafa a si. 3 Bela fapapawl cu Addar, Gera, Abihud, 4 Abishua, Naaman, Ahoah, 5 Gera, Sefufan le Huram an si.

6 Hipawl hi Ehud-ih fapa an si, annih cu Geba luahtu an pupápawlih sungza lubân an si ih, Manahath ah dawisuak an si: 7 Naaman, Ahijah le Gera pawl tla. Gera in Uzza le Ahihud a hring, anih in Geba luahtupawl a dawisuak hai.

8 A nupi Hushim le Baara a thlahhlo hnuah Shaharaim in Moab ram ah tefa a nei. 9 A nupi Hodesh hnenin Jobab, Zibia, Mesha, Malkam, 10 Jeuz, Sakiah le Mirmah a hring. Hipawl hi a fapapawl le an pupápawlih sungza lubânpawl an si.

11 Anih cun Hushim hnen ihsin Abitub le Elpaal a hring. 12 Elpaal fapapawl cu Eber, Misham le Ono khawpi le Lod khawpi le a kiangkap khawtepawl dĭntu Shemed, 13 cule Gath khawpi luahtupawl dawisuaktu, Beriah le Shema cu Aijalon khawpi luahtu an pupápawlih sungza lubân an si. 14 Ahio, Shashak Jeremoth, 15 Zebadiah, Arad, Eder, 16 Maikal, Ispah le Joha cu Beriah-ih fapa an si. 17 Zebadiah, Meshullam, Hizki, Heber, 18 Ishmerai, Jizliah le Jobab cu Elpaal-ih fapa an si. 19 Jakim, Zikri, Zabdi, 20 Elienai, Zillethai, Eliel, 21 Adaiah, Beraiah le Shimrath cu Shimei-ih fapa an si. 22 Ishpan, Eber, Eliel, 23 Abdon, Zikri, Hanan, 24 Hananiah, Elam, Antothijah, 25 Ifdeiah le Penuel cu Shashak-ih fapa an si. 26 Shamsherai, Shehariah, Athaliah, 27 Jaareshiah, Elijah le Zikri cu Jeroham-ih fapa an si.

28 Hipawl cu an cithlahsâwng zulhin an pupápawlih sungza lubân le hotu an si. Hipawl cu Jerusalem ah an cêng.

29 Gibeon khua ah Gibeon-ih pa a cêng, a nupi hmin cu Maakah a si. 30 A fapa upabik cu Abdon a si, a fapa dangpawl cu Zur, Kish, Baal, Nadab, 31 Gedor, Ahio, Zeker, 32 Shimeah hringtu Mikloth tla an si. Annih khal an sungkhatpawl kiangkungah Jerusalem ah an unaupawl thawn an cêng ve. 33 Ner in Kish a hring, Kish in Saul a hring, Saul in Jonathan, Malkishua, Abinadab le aEsh-Baal a hring. 34 Jonathan fapa cu Merib-Baal a si ih, Merib-Baal in Mikah a hring. 35 Mikah fapapawl cu Pithon, Melek, Tarea le Ahaz an si. 36 Ahaz in Jehoaddah a hring, Jehoaddad in Alemeth, Azmaveth le Zimri a hring ih, Zimri in Moza a hring. 37 Moza in Binea a hring, cuih fapa cu Rafah, cuih fapa cu Elasah, cuih fapa cu Azel a si.

8:33a Esh-Baal: Bible hmun dang ah cun Ish-Bosheth ti a si.

38 Azel in fapa paruk a nei ih an hmin cu: Azrikam, Bokeru, Ishmael, Sheariah, Obadiah le Hanan an si. Hipawl hmuahhmuah hi Aze fapa an si. 39 A unaupa Eshek-ih fapapawl cu a fatir ah Ulam, a pahnihnak ah Jeush, a pathumnak ah Elifelet a si.

40 Ulam fapapawl cu micak ralṭha le thálsaithiam an si. Annih cun fapa tampi le tupa tampi an nei, an zaten 150 an si. Hipawl hmuahhmuah hi Benjamin fapa an si.

9

1 Israel hmuahhmuah cithlahsâwngawkdān ngankhum a si. Cule ngai hnik, annih cu Israel siangpahrangpawlih cazual ah ngan an si. An rinumlonak ruangah Judah-mipawl cu Babilon ih hruaihloh an rak si. 2 Cun an co mi an khawpipawl luah hmaisabiktupawl cu Israel-mi mi hrekkhat, puithiampawl, Levi-mipawl le Nethin-mipawl an si.

Jerusalem ih Cêngpawl

3 Jerusalem ah Judah tefapawl, Benjamin tefa hrekkhat le Efraim tefa hrekkhat le Manasseh tefa hrekkhat an cêng. 4 Uthai cu Ammihud fapa a si, cumi cu Omri fapa a si, cumi cu Imri fapa a si, cumi cu Bani fapa a si, cupawl cu Judah fapa Perez-ih tesinfa an si. 5 Shilon-mipawl cu: fatir ah Asaiah le a fapapawl an si. 6 Zerah fapapawl cu Jeuel le a sungkhatpawl thawn mipum 690 an si. 7 Benjamin tefapawl cu: Sallu cu Meshullam fapa a si, cumi cu Hodaviah fapa a si, cumi cu Hassenuah fapa a si, 8 Ibneiah cu Jeroham fapa a si, Elah cu Uzzi fapa a si, cumi cu Mikri fapa a si, Meshullam cu Shefatiah fapa a si, cumi cu Reuel fapa a si, cumi cu Ibnijah fapa a si, 9 an sungkhat, an cithlahsâwng vekin mipum 956 an si. Cupawl hmuahhmuah cu lubân le anmai sungkua pa cio an si.

Puithiam Sungkuapawl

10 Puithiampawl lakah: Jedaiah, Jehoiarib le Jakin, 11 Hilkiah fapa Azariah pawl tla an si, cumi cu Meshullam fapa a si, cumi cu Zadok fapa a si, cumi cu Meraioth fapa a si, cumi cu Pathian inn ih hohatu Ahitub fapa a si, 12 Jeroham fapa Adaiah a si, cumi cu Pashur fapa a si, cumi cu Malkijah fapa a si; a dang leh cu Adiel fapa Maasai a si, cumi cu Jahzerah fapa a si, cumi cu Meshullam fapa a si, cumi cu Meshillemith fapa a si, cumi cu Immer fapa a si. 13 An sungkhat, an pupápawlih sungza lubânpawl cu mipum 1760 an si. Annih cu Pathian inn sungih rawngbawlhna ṭuan theinak ti theinak nei an si.

Levi Sungkuapawl

14 Levi-mipawl lakah: Hasshub fapa Shemaiah a si, cumi cu Azrikam fapa a si, cumi cu Hashabiah fapa a si, cupawl cu Merari fapa an si. 15 A dang Levi-mipawl cu Bakbakkar, Heresh, Galal, Mikah fapa Mattaniah tla an si. Mikah cu Zikri fapa a si, cumi cu Asaf fapa a si, 16 Shemaiah fapa Obadiah, cumi cu Galal fapa a si, cumi cu Jeduthun fapa a si; cule a dang leh cu Asa fapa Berekiah a si, cumi cu Netofat-mipawlih khuapawl ih um a si.

17 Kăwtkakiltupawl cu Shallum, Akkub, Talmon, Ahiman le an sungkhatpawl an si. Shallum cu hotu a si. 18 Tutiangin annih cu nisuahnak lam siangpahrang kăwtka ih Levi tefapawlih ṭanhmun khuarnak kăwtkakiltu an si.

19 Shallum cu Kore fapa a si, cumi cu Ebiasaf fapa a si, cumi cu Korah fapa a si. A pupáih sungza ihsin Shallum-ih sungkhat, Korah-mipawl cu biakbûk kăwtkakiltu rawngbawlhna ṭuanvo pek mi an si. An pupápawl cu Jehovah ṭanhmun khuarnak luhnak kiltu an rak si. 20 Eleazar fapa Finehas cu a liam cia cān ah anmah tlunih hotu a rak si; a hnenah Jehovah a um. 21 Meshelemiah fapa Zekariah cu tawnawknak biakbûk sângka kiltu a si.

22 Kăwtkakiltu dingih hril mi zaten mipum 212 an si. Annih cu anmai khua ciar ah an cithlahsâwng cio vekih ngankhum an si. David le hmutu Samuel in annih cu rinsantlak hna hrangah an ruat. 23 Anmah le an tefapawl cu Jehovah inn kăwtkapawl, cucu biakbûk inn a si, kiltu an si. 24 Kăwtkakiltupawl cu kap li ah, nisuahnak lam, nitlaknak lam, sak lam le thlang lamah an um. 25 An khawtepawl ih an sungkhatpawl cu ni sarih dan ah a haha in hnaṭuan dingin an ra. 26 Ziangahtile himi rinsantlak hna ah kăwtkakiltu hotu pali an um, cupawl cu Levi-mi an si. Annih cu Pathian inn pindanpawl le hlawnthil retnak kil ding ṭuanvo an nei. 27 An hna a si ruangah le zing tin kăwtka ăwn ṭuanvo an neih ruangah annih cu Pathian inn kimvelah an riak.

28 Mi hrekkhat cu rawngbawlnak bungbel an kilkhawi, ziangahtile annih in cupawl cu an suah le an luh tinten an siar ta ṭheu. 29 Mi hrekkhat cu bungbelpawl le bungbel thianghlimpawl hmuahhmuah le sangvut phŭt le sabitzu le hriak le rimhmui le hriak rimthaw kil dingih ruat an si. 30 Cule puithiam fapa hrekkhat pawl in hnih mi rimhmui an tuah.

31 Korah-mi Shallum-ih fatir Levi-mi Mattithiah cun khēngdaupawl parih kăn mi sangpawl tlunih rinsantlak hna a nei. 32 An sungkhat dang, Kohath tefa hrekkhat cu Sabbath ni tinten cabuai parih Sangserh timlam ding ṭuanvo pek an si.

33 Cupawl cu hla saktu, Levi-mi sungkua lubân, pindanpawl ih riak, ṭuanvo dang lakih âwl an si, ziangahtile annih cu a sun a zan cuih hna ṭuan dingih thiah an si. 34 Hih Levi-mi pupá lubânpawl cu an cithlahsâwng vivo tluansuakin lubân an rak si. Annih cu Jerusalem ah an cêng.

Siangpahrang Saul Tefapawl

35 Gibeon khua ah Gibeon-ih pa Jeiel a cêng, a nupi hmin cu Maakah a si. 36 A fapa upabik cu Abdon a si, a fapa dangpawl cu Zur, Kish, Baal, Ner, Nadab, 37 Gedor, Ahio, Zekariah le Mikloth tla an si. 38 Mikloth in Shimean a hring. Annih khal an sungkhatpawl kiangkungah Jerusalem ah an unaupawl thawn an cêng ve. 39 Ner in Kish a hring, Kish in Saul a hring, Saul in Jonathan, Malkishua, Abinadab le aEsh-Baal a hring. 40 Jonathan fapa cu Merib-Baal a si ih, Merib-Baal in Mikah a hring. 41 Mikah fapapawl cu Pithon, Melek, Tahrea le Ahaz tla an si. 42 Ahaz in Jarah a hring, Jarah in Alemeth, Azmaveth le Zimri a hring ih, Zimri in Moza a hring, 43 Moza in Binea a hring, cuih fapa cu Refaiah a si, cuih fapa cu Eleasah a si, cuih fapa cu Azel a si. 44 Azel in fapa paruk a nei ih an hmin cu: Azrikam, Bokeru, Ishmael, Sheariah, Obadiah le Hanan an si, hipawl hi Azel fapa an si.

9:39a Esh-Baal: 8:33 zoh aw.

10

Saul le a Fapapawl Thihnak

1 Filisṭia-mipawl in Israel an do ih, Filisṭia-mipawl hmaiah Israel mipapawl cu an tlânsia, cule an thah mipawl cu Gilboa Tlang ah an rīl teptep. 2 Filisṭia-mipawl in nasazetin Saul le a fapapawl cu an dawi ih, annih in Saul-ih fapa Jonathan, Abinadab le Malkishua cu an that. 3 Doawknak cu Saul kiangkapah a luar zet. Thálsaithiampawl in amah cu an rak hmungah ih, hma an baih. 4 Saul in a rálthuam kengtu hnenah, «Na ralnâm zûk awla, cumi in i dawttlăng aw, culole hi serh zim tan lo mipapawl an ra ding ih, in ra puahcăwk pang ding,» tiah a ti. Asinan a rálthuam kengtu in a ti duh lo, ziangahtile anih cun a ṭih tuk. Curuangah Saul in ralnâm a lâk ih, a parah a bawhhnawh. 5 A rálthuam kengtu in Saul a thi ti a hmuh tikah, anih khal a ralnâm a bawhhnawh ve ih a thi. 6 Cutin Saul le a fapa pathum cu an thi ih, a sungkuapawl cu an zaten an thitlang thluh. 7 Phaikuam ih um Israel mipapawl hmuahhmuah in ralkappawl an tlân ti le Saul le a fapapawl an thi ti an hmuh tikah, an khawpipawl cu an tān ta ih an tlân; cun Filisṭia-mipawl an ra ih, cuih khawpipawl ah cun an cêng.

8 Cun a thaisun ah hitin a si, Filisṭia-mipawl cu an mithipawlih thuam hlít dingih an rat tikah, Saul le a fapapawl cu Gilboa Tlang ah rīlin an hmu. 9 Saul cu an hlihsak ih, a lu le a rálthuam an lâk ih, temple sungih an milempawl hnenah le mipi hnenih thuthang thăn dingin Filisṭia-mipawlih ram pumpi ah thu an thlah. 10 A rálthuam cu an pathianpawlih temple sungah an ret ih, a lu cu Dagon temple sungah an tar.

11 Jabesh Gilead hmuahhmuah in Saul parih Filisṭia-mipawl ih an tuah mi an theih tikah, 12 mipa ralṭha hmuahhmuah an tho ih, Saul-ih ruang le a fapapawlih ruang cu an la. Cule cucu Jabesh ah an thiar ih, an ruhpawl cu Jabesh ah esel thingkung hnuaiah an phum, cule ni sarih sung rawl an ul.

13 Cun Saul cu Jehovah parih a rinumlonak thilsual a tuah ruangah a thi, Jehovah kamsuakthu a thlun lo ih, kaihruaitu dingah thlarau kawhthiam thu a ráwn. 14 Jehovah a rak sut lo, curuangah amah cu a that ih, lalram cu Jesse fapa David hnenah a ṭhawn.

11

David cu Israel zate tlunah Siangpahrang ih Tuah a Si

1 Israel zaten David hnenah Hebron ah an rakhawm, «Ngai hnik, kanmah cu na titsa le na ruh kan si. 2 Cuihtlunah cān liam cia ih Saul siangpahrang a ṭuan laiah, nangmah cu Israel hruaisuaktu le hruailuttu na si. Jehovah na Pathian in na hnenah, ‹Ka mi Israel na kilkhawi pei ih, ka mi Israel parah uktu si aw,› tiah a lo ti,» tiah an ti. 3 Curuangah Israel upapawl hmuahhmuah cu David hnenah Hebron ah an ra ih, Hebron ah Jehovah hmaiah David cun anmah thawn thukham a tuah. Cule Samuel hnenih Jehovah kamsuakthu bangtukin, David cu Israel parih siangpahrang ah hriak an thih.

David Khawpi

4 David le Israel-mi hmuahhmuah cu Jerusalem ah an feh, cucu Jebus a si, cu tawkah ram luahtu Jebus-mipawl an um. 5 Jebus luahtupawl in David hnenah, «Hi tawkah na lut lo pei!» tiah an ti. Sikhalsehla David in Zion ralhruangkulh cu a lak, cumi cu David Khawpi a si. 6 David in, «Jebus-mipawl do hmaisabiktu pauhpauh cu hotu le ralbawi ah an cang ding,» tiah a ti. Zeruiah fapa Joab cu hmaisabikah a fehso ih, anih cu hotu ah a cang. 7 David cu ralhruangkulh sungah a cêng, curuangah cumi cu David Khawpi tiah an ko. 8 Anih in Millo ihsin a kiangkap hmunram tiang khawpikulh a sak. Joab in a tāng mi khawpi cu a rĕmṭha. 9 Cutin David cu a ropi deuhdeuh, ziangahtile anih cu ralkap rualpawlih Jehovah in a umpi.

David-ih Micakpawl

10 Israel thuhla ah Jehovah kamsuakthu bangtukih David kha siangpahrang ih tuah dingih Israel hmuahhmuah thawn ṭangtlangin, a lalram hrangih ṭang zettu, David-ih neih mi micak hleicepawl cu hipawl hi an si. 11 Hihi David-ih neih mi micak um zât an si: Hakmon-miih fapa ralbawipawlih lubik Jashobeam a si. Anih cun mi 300 dokalhin a feipi a khai ih vei khat ah a that hai.

12 A sangtu ah Ahoh-mi Dodo fapa Eleazar a si ih, anih cu micak pathum lakih pakhat a si. 13 Anih cu Pasdammim hmun ah David hnenah a rak um. Cu tawkah Filisṭia-mipawl cu ral doaw dingin an fĭnkhawmaw, cule barli sangvut thawi a khat mi lóram ṭhen hrekkhat a um. Mipi cu Filisṭia-mipawl hnen ihsin an tlân. 14 Anih le David cu cuih ló sungah an ding, ló cu an hum ih, Filisṭia-mipawl cu an that. Jehovah in a nasazet mi nehnak thawn a run hai.

15 Hotu 30 lakih pathum cu lungpi ah David hnenah Adullam pûk sungah an suk, cule Filisṭia-mipawlih ralkappawl cu Refaim Phaikuam ah ṭanhmun an khuar. 16 Cu laiah David cu ralhruangkulh sungah a um ih, Filisṭia ṭanhmun kiltu ralkappawl cu Bethlehem ah an um. 17 Cule David cun ngai duahdoin, «Zo tal in si maw, kăwtka kiangih um, Bethlehem tikhur ihsin in ding tidai i pe hai sehla maw!» tiah a ti. 18 Cuih mi pathum pawl cun Filisṭia-mipawlih ṭanhmun khuarnak cu an pahtlăng, kăwtka kiangih um Bethlehem tikhur sung ihsin tidai an khai, cule an la ih David hnenah an run keng. Sikhalsehla cumi cu David in a in duh lo, Jehovah hnenah a thlebung sawn riangri. 19 Cule anih in, «Himi cu ka tuah lamlam lo ding, maw ka Pathian! An nun thāptu hipawlih thisen ka in ding maw? Ziangahtile an nun thāpin himi hi an run keng a si,» tiah a ti. Curuangah anih cun cumi cu a in duh lo. Hi thil cu micak pathum pawl ih tuah mi a si.

20 Joab-ih unaupa Abishai cu a dang mi pathum hotu lakih pakhat a si. Mi 300 dokalhin a feipi a khai ih a that hai, cule hi pathum lakah hmin a nei. 21 Amah cu an pathum lakah a dang pahnih hnakih upat mi a si. Curuangah anih cu an ralbawi ah a cang. Cutisikhalsehla anih cun a hmaisa pathum pawl cu a tluk lo.

22 Cule Kabzeel ihsi micak fapa Jehoiada fapa Benaiah in thil tampi a rak tuah. Cu pa cun kiosa bang Moab miralṭha pahnih a that. A rung suk ih, vur tlak ni ah khur sungah kiosa a that fawn. 23 Izippa, misâng zet, dawng nga sâng khal a that. Cuih Izip-miih kut ah thiamtahtuih thiam tlâng tluk feipi a um; cule anih cu Izippa hnenah cun kianghrăwl thawn a suk, cule a kut ihsin a feipi cu a lawn ih amai feipi cun amah cu a that. 24 Hi thilpawl cu Jehoiada fapa Benaiah in a tuah ih, micak pathum pawl lakah hmin a nei. 25 Ngai hnik, amah cu mi 30 pawl hnak khalin upat mi a si, asinan a hmaisa pathum pawl cu a tluk lo. Cule amah cu David in amah kiltupawl hotu ah a ret.

26 Micak ral dopawl cu Joab-ih unaupa Asahel, Bethlehem-mi Dodo fapa Elhanan, 27 Haror-mi Shammot, Pelon-mi Helez, 28 Tekoa-mi Ikkesh-ih fapa Ira, Anathoth-mi Abiezer, 29 Hushath-mi Sibbekai, Ahoh-mi Ilai, 30 Netofat-mi Maharai, Netofat-mi Baanah fapa Heled, 31 Benjamin hrin Gibeah khawmi Riba fapa Ithai, Pirathon-mi Benaiah, 32 Gaash lihăwng luannak hmun ih um mi Hurrai, Arbath-mi Abiel, 33 Baharum-mi Azimaveth, Shaalbon-mi Eliahba, 34 Gizon-mi Hashem fapapawl, Harar-mi Shageh fapa Jonathan, 35 Harar-mi Sakar fapa Ahiam, Ur fapa Elifal, 36 Mekarath-mi Hefer, Pelon-mi Ahijah, 37 Karmel-mi Hezro, Ezbai fapa Naarai, 38 Nathan-ih unaupa Joel, Hagri fapa Mibhar, 39 Ammon-mi Zelek, Beroth-mi Naharai (Zeruiah fapa Joab-ih ralthuam kengtu), 40 Ithra-mi Ira, Ithra-mi Gareb, 41 Het-mi Uriah, Ahlai fapa Zabbad, 42 Reuben-mipawl hotu Reuben-mi Shiza fapa Adina, ral do mi 30 a nei, 43 Maakah fapa Hanan, Mithni-mi Josafat, 44 Ashterath-mi Uzzia, Aroer-mi Hotham fapa Jehiel le Shama, 45 Shimri fapa Jediael, Tiz-mi Joha-ih unaupa, 46 Mahav-mi Eliel, Elnaam fapa Jeribai le Joshaviah, Moab-mi Ithmah, 47 Eliel, Obed le Mezoba-mi Jaasiel tla an si.

12

Ramṭhing ih David Thluntupawl

1 Hipawl hi Kish fapa Saul hnen ihsin David raltlân a si laiih Ziglak khua David hnenih ra thlengpawl an si, annihpawl cu doawknak ih bawmtu micakpawl lakih mi, 2 thálpawl tla thawi thuamaw, keh lam le vawrh lamih virvawm lungpawl hmangthiam le thál thawi thálfungpawl saithiam an si. Annih cu Benjamin hnám, Saul-ih sungkhatpawl an si.

3 An hotu cu Ahiezer a si, cun Gibeath-mi Shemaah fapa Joash; Azmaveth fapa Pelet le Jeziel; Anathoth-mi Berakah le Jehu; 4 Gibeon-mi Ishmaiah cu mi 30 lakih miralṭha le mi 30 hotu a si; Jeremiah, Jahaziel, Johanan le Gederah-mi Jozabad; 5 Eluzai, Jerimoth, Bealiah, Shemariah le Haruf-mi Shefatiah, 6 Korah-mi Elkanah, Jisshiah, Azarel, Joezer le Jashobeam; 7 cule Gedor khua ihsin Jeroham fapa Joelah le Zebadiah tla an si.

8 Gad-mi mi hrekkhat micak ralṭha, ral do dingih zirh mi, ralphaw le fei hmangthiampawl cun ramṭhing ih pûk ah David an kăwp; an hmel cu kiosa hmel vek an si ih, tlang ih sakhi vekin an rang zet. 9 Ezer cu a pakhatnak a si, a pahnihnak ah Obadiah, a pathumnak ah Eliab, 10 a palitnak ah Mishmannah, a pangatnak ah Jeremiah, 11 a paruknak ah Attai, a pasarinak ah Eliel, 12 a pariatnak ah Johanan, a pakuatnak ah Elzabad, 13 a pahratnak ah Jeremiah le a hleikhatnak ah Makbanai an si. 14 Hi Gad fapapawl cu ralkap hotu an si; a caklobik in 100 a uk ih, a cakbik in 1000 a uk. 15 Hipawl cu a thla khatnak, Jordan tiva a kuang hmuahhmuah a liam laiih a tánkai tupawl an si; cule annih in phaikuam ih umpawl cu nisuahnak lam le nitlaknak lamah an tlânter.

16 Cun Benjamin tefa hrekkhat le Judah tefa hrekkhat cu David hnenah pûk ah an ra. 17 Anmah hmuak dingin David cu a fehsuak, cule anih in a sâng hai ih an hnenah, «Keimah bawm dingin remdaihnak duhin ka hnenih ra nan si le, ka thinlung cu nanmah thawn pumkhat a si ding; asinan ka ralpawl hnenih in phiar dingih ra nan si ah cun, ka kutpawl ah thilsual a um lo ruangah, kan pupápawlih Pathian in zoh sehla thuṭhennak thlĕn seh,» tiah a ti. 18 Cun ralbawipawl hotu, Amasai parah Thlarau a athleng ih,

12:18a thleng: A ṭawng hrampi ah, «thuam,» ti a si.

«Maw David, kannih cu na ta kan si;
Nang Jesse fapa, kannih cu na lamṭang kan si!
Na parah remdaihnak, remdaihnak um sehla,
A lo bawmtupawl parah remdaihnak um seh!
Ziangahtile na Pathian in a lo bawm a si,»

tiah a ti.

Cun David in anmah cu a cohlang hai ih, ralkap burpi hotu ah a tuah hai.

19 Saul do dingin Filisṭia-mipawl zawngih a feh tikah, Manasseh hnen ihsin mi hrekkhat in David an kăwp; asinan annih cun Filisṭia-mipawl cu an rak bawm cuang lo, ziangahtile Filisṭia-mipawlih bawipawl cun an relkhawm ih amah cu an dawihlo, «A pu Saul lamah a kăwp ding ih kan lu kan hloh pang ding,» tiah an ti. 20 Ziklag ih David a feh tikih, a hnenih ra kăwp Manasseh-mipawl cu Adnah, Jozabad, Jediael, Maikal, Jozabad, Elihu le Zilthai an si, annih cu ralkap 1000 hotu Manasseh-mi an si. 21 Annih cun David in misîmtupawl a do tikah an bawm, ziangahtile anmah cu an zaten micak ralṭha le ralkap bawi an si. 22 Ziangahtile cuih cān ah annih cu amah bawm dingin Pathian ralkap vekih ralkap tam zet an si hlanlo, ni khat hnu ni khat David hnenah an ra thleng.

Hebron ah David-ih Ralkappawl

23 Jehovah kamsuakthu vekih Saul-ih lalram cu David hnenih pe dingah Hebron khua ah David hnenih ral do dingin ralthuam thuamawih feh zât cu hipawl hi an si: 24 ral do dingih ralphaw le fei keng, Judah tefa 6800 an si: 25 Simeon tefa ihsin raldonak hrangih tlingtlak micak ralṭha 7100 an si; 26 Levi tefa ihsin 4600 an si; 27 Aaron-mipawl hruaitu cu Jehoida a si ih, a hnenah mi 3700 an um; 28 micak ralṭha tlangval Zadok le a paih sungkua ihsin ralbawi 22 an si; 29 Benjamin tefa ihsin, Saul-ih sungkhatpawl mi 3000 an si, hi hlanah cun a tamsawn cu Saul sungza lamah an rinum; 30 Efraim tefa ihsin micak ralṭha, an pupáih sungza tluansuakih hminthang 20800 an si; 31 Manasseh hnám a hrek sung ihsin David siangpahrang ih tuah dingih hmin thiah ih ra mi 18000 an si. 32 Issakar tefa ihsin Israel in ziang a tuah a mawi ti thei dingah tikcucān theithiam, an hotupawl cu 200 an si; cule an sungkhatpawl hmuahhmuah cu an thu hnuaiih um an si. 33 Zebulun hnám ihsin ral do dingih fehsuak, raldonak hriamhrei zateih ral do thiam 50000 an si, mi bawm dingih thinlung hnget zet pu an si; 34 Naftali-mi ralbawi 1000 le a hnenih ralphaw le fei thawn mipa 37000 an um; 35 Dân hnám lakih ral do dingih tiar mipa 28600 an um; 36 Asher hnám lakih ral do dingih feh thei, ral do dingih timlam mipa 40000; 37 Jordan tiva ralkhat lamah Reuben hnám lakih mi, Gad hnám lakih mi le Manasseh hnám a hrek, raldonak hriamhrei phunkim thawi raldo dingih thuamaw tingkhat le thawngkul an si.

38 Hipawl hmuahhmuah cu ral do mi, ṭanlakthiam an si, Israel zate tlunah David cu siangpahrang ih tuah dingin rinumnak thinlung thawn Hebron ah an ra; cule a tāng mi Israel zaten David cu siangpahrang ih tuah dingin lungthin hmunkhat an nei. 39 Annih cu David hnenah ni thum sung ei le in in an um, ziangahtile an sungkhatpawl in an hrangah an timtuah. 40 Cuihtlunah anmah naihtu Issakar-mi mi hrekkhat, Zebulun-mi mi hrekkhat le Naftali-mi mi hrekkhat pawl in, lākpawl, kalaukpawl le lākrangpawl le câwcangpawl thawn sangvut ih tuah mi rawl, theipi car le sabit rah car, sabitzu le hriak le câwcangpawl le rante rual tampi an rak phur, ziangahtile Israel ram ah lungawiaipuannak a um.

13

Kirjath Jearim ihsin Kuang an Thiar

1 David in hruaitupawl a ráwn hai, cupawl cu 1000 hotu ralbawipawl le 100 hotu ralbawipawl an si. 2 David in Israel mipungkhawm hnenah, «Ṭha nan ti ih, Jehovah kan Pathian in rem a ti asile, Israel ram hmuahhmuah ih a tāng lai mi, hmun kip ih kan unaupawl cu, an khuapawl le an ran tlannak ram lawnglakpawl ih um puithiampawl le Levi-mipawl in ra kăwm dingin thu kan cah pei; 3 cule kan Pathian Kuang cu kan hnenah lakirsal uhsi, ziangahtile Saul san laiah Kuang ah Pathian kan rak hawl lo,» tiah a ti. 4 Mipungkhawm zate in cuticun, «Kan tuah ding,» tiah an ti, ziangahtile cuih thil cu mipi zate mithmuhah a dik a si.

5 Cun David in Izip ram Shihor tiva ihsin Hamath khawluhnak tiang Israel-mi hmuahhmuah cu Kirjath Jearim khua ihsin Pathian Kuang lakirsal dingin hmunkhatah a khawm. 6 David le Israel-mi hmuahhmuah cu Baalah ah, cumi cu Judah ta Kirjath Jearim a si, cherub-pawl lakih cêng Jehovah hmin phuansuahnak Pathian Kuang cu la dingin an hung so. 7 Pathian Kuang cu Abinadab inn ihsin lêng thar in an phur ih, Uzza le Ahio in lêng cu an mâwng. 8 Cun David le Israel hmuahhmuah in hla sakin, ṭingṭangpawl, cawngcingpawl, khuangtepawl, sumselpawl le tawtawrawtpawl thawn theihtawp suahin Pathian hmaiah awnmawi an tum.

9 Kidon-ih hruihhmun an thlen tikah, Uzza in Kuang kai dingin a kut a suah, ziangahtile câwcangpawl cu an bái phah rero. 10 Jehovah thinhengnak cu Uzza parah a tho, cule amah cu a vuak, ziangruangahtile Kuang parah a kut a ret; cule cu tawkah Pathian hmaiah anih cu a thi. 11 Uzza parih Jehovah aithawhnak a puakkuai ruangah David a thinheng; curuangah cuih hmun cu tuihni tiang aPerez Uzza tiah an ko. 12 Cuih ni ah cun David in Pathian a ṭih, «Ziangtin ka inn ah Pathian Kuang cu ka lakirsal thei ding?» tiah a ti.

13:11a Perez Uzza: Uzzah parih puakkuai tinak a si.

13 David khawpi sungah David in a zawngah Kuang cu ṭhawn loin, Gath-mi Obed-Edom inn sawnah a pialpi. 14 Pathian Kuang cu Obed-Edom-ih inn ah thla thum sung a um. Cule Jehovah in Obed-Edom sungkua le a neih mi hmuahhmuah cu mal a sawm.

14

Jerusalem ah David Dĭnhngeh a Si

1 Ṭaiar siangpahrang Hiram in David hnenah thuphurtu a thlah ih, inn saksak dingin sidar thingpawl, lungserthiampawl le lettamapawl a kuat. 2 Jehovah in Israel tlunah siangpahrang ah amah cu a dĭnhnget ih, a mi Israel zarah a lalram cu sâng ah a khaisâng ti David in a thei.

3 Cun David in Jerusalem ah nupi tam sinsin a neibêt ih, David cun fapa le fanu tamsin a hring. 4 Jerusalem ih a neih mi a fāte hminpawl cu Shammua, Shobab, Nathan, Solomon, 5 Ibhar, Elishua, Elpelet, 6 Nogah, Nefeg, Jafia, 7 Elishama, Beeliada le Elifelet an si.

Filisṭia-mipawl Neh an Si

8 Filisṭia-mipawl in Israel hmuahhmuah tlunah David cu siangpahrang dingin hriak thih a si zo ti hna ih an theih tikah, Filisṭia-mipawl zaten David hawl dingin an so. Cule cumi cu David in hna in a thei ih, anmah táwng dingin a fehsuak. 9 Filisṭia-mipawl cu an feh ih, Refaim Phaikuam an sîm. 10 David in Pathian a sut, «Filisṭia-mipawl do dingin ka so pei maw? Anmah cu ka kut ah i pe pei maw?» tiah a ti.

Jehovah in a hnenah, «So aw, ziangahtile anmah cu na kut ah ka lo pe a si,» tiah a ti.

11 Cutin Israel-mipawl cu aBaal Perazim ah an fehso ih, cu tawkah David in Filisṭia-mipawl cu a neh hai. Cun David in, «Ka ralpawl cu ka kut hmangin tidai ih a pahsiat vekin Pathian in a rak siatsuah a si,» tiah a ti. Curuangah cuih hmun cu a hmin ah Baal-Perazim tiah an ko. 12 Filisṭia-mipawl in cu tawkah an pathianpawl an tan ta tikah, David in thupek a pe ih, cupawl cu meisa ih ur an si.

14:11a Baal Perazim: A ṭawng hrampi ah cun, «puaksuak bawipa» ti a si.

13 Filisṭia-mipawl cun phaikuam ah an sîm lehsal. 14 Curuangah David in Pathian a sutsal ih, Pathian in a hnenah, «An dung ihsin dawi hlah, anmah hrialkûal awla, thingtheihmu kungpawl hmaiah nám hai aw. 15 Cule hitin a si ding, thingtheihmu kungpawl zimih feh thâwm na theih tikah, ral do dingin na feh pei, ziangahtile Filisṭia-mipawl ṭanhmun khuarnak vaw dingin na hmaiah Pathian a fehsuak zo a si,» tiah a ti. 16 Pathian in amah thu a pek vekin, David in a tuah, cule Gibeon ihsin Gezer tiang Filisṭia ralkappawl cu a neh hai. 17 Ram hmuahhmuah ah David-ih hmin cu a thang ih, Jehovah in miphunpawl hmuahhmuah tlunah ṭihnak a thlĕn.

15

Jerusalem ah Kuang Thiar a Si

1 David Khawpi sungah amai hrangah David in innpawl a sak; cule Pathian Kuang hrangah hmun a timlam ih, cumi hrangah puanthlam a zar. 2 Cuih cān ah David in, «Levi-mipawl siarlo zohman in Pathian Kuang an zâwn thei lo, ziangahtile Kuang zâwntu ding le a hmaiih kumkhua rawngbawl dingah Jehovah in anmah cu a hril zo a si,» tiah a ti. 3 David in Jehovah Kuang retnak ding hmun a rak timlam mi ah zawnso dingin Jerusalem ah Israel-mi hmuahhmuah cu a fĭnkhawm. 4 David in Aaron le Levi tefapawl cu a pungkhawmawter hai: 5 Kohath tefapawl lakah hotu cu Uriel a si ih, unausungkhat 120 an si; 6 Merari tefapawl lakah Asaiah cu hotu a si ih, unausungkhat 220 an si; 7 Gershom tefapawl lakah Joel cu hotu a si ih, unausungkhat 130 an si; 8 Elizafan tefapawl lakah Shemaiah cu hotu a si ih, unausungkhat 200 an si; 9 Hebron tefapawl lakah Eliel cu hotu a si ih, unausungkhat 80 an si; 10 Uzziel tefapawl lakah Amminadab cu hotu a si ih, unausungkhat 112 an si.

11 David in puithiam Zadok le Abiathar, Levi-mi Uriel, Asaiah, Joel, Shemaiah, Eliel le Amminadab pawl cu a ko hai. 12 Anih in an hnenah, «Nannih hi Levi-mipawlih pupápawl sungza lubân nan si; Israel-ih Pathian Jehovah Kuang cu a hmun ka timlam mi ih nan zawnsoh theinak dingah nannihpawl hi nan unaupawl thawn tithianghlim aw uh. 13 A hmaisa ah khan nannih in cumi cu nan rak ti lo ruangah, Jehovah kan Pathian cu kan parah a puakkuai a si, ziangruangahtile kannih in amah cu a thupek bangtukin kan rak răwn lo,» tiah a ti.

14 Israel-ih Pathian Jehovah Kuang cu zawnso dingin puithiampawl le Levi-mipawl cu an tithianghlimaw. 15 Cule Mosi in thu a rak pek vekin, Jehovah kamsuakthu bangtukin, Levi tefapawl in Pathian Kuang cu a zawnfungpawl in an liang in an zawn.

16 David in Levi-mi hotupawl hnenah an unausungkhatpawl cu awnmawi hmanruapawl, cawngcingpawl, ṭingṭangpawl, sumselpawl thawi hlasatu dingah, aw ring zet le aipuang zetih hlasa dingih ruat dingin a sim. 17 Levi-mipawl cun Joel fapa Heman, a unausungkhatpawl lak ihsin Berekiah fapa Asaf, an unausungkhat Merari fapapawl lak ihsin Kushaiah fapa Ethan pawl cu a ruat hai. 18 Cupawl zawngah an unausungkhatpawl lak ihsin a pahnihnak bur ah Zekariah, Ben, Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Elifelet, Mikneiah, kăwtkakiltu Obed-Edom le Jeiel tla a ruat; 19 Hlasaktu Heman, Asaf le Ethan cu dar sumsel awnter dingih ruat an si; 20 cun Zekariah, Aziel, Shemiramoth, Jehiel, Unni, Eliab, Maaseiah le Benaiah tepawl cu aAlamoth bangtukih cawngcingpawl tum dingih ruat an si; 21 Mattithiah, Elifeleh, Mikneiah, Obed-Edom, Jeiel le Azaziah tepawl cu bSheminith bangtukih ṭingṭang tum dingih ruat an si; 22 Levi-mipawl hruaitu Kenaniah cu hla hrangih ruat a si, a thiam tuk ruangah anih cun hla sakdān a zirh; 23 Berekiah le Elkanah cu Kuang sângka kiltu an si; 24 cun puithiam a si mi Shebaniah, Jehosafat, Nethanel, Amasai, Zekariah, Benaiah le Eliezer te cu Pathian Kuang hmaiah tawtawrawt phawtu ding an si, cule Obed-Edom le Jehiah cu Kuang sângka kiltu dingih ruat an si.

15:20a Alamoth: Hebru ṭawng a si ih, a sullam cu «fala him» asilole «nunau no» ti a si ih, nunau nopawl soprano aw an suah mi thawi bangaw awnmawi aw a sawhkhih a si men thei.

15:21b Sheminith: Hri riat nei awnmawi thilri thawi sak ding tinak.

25 Cun David, Israel upapawl le 1000 hotu ralbawipawl cu Obed-Edom inn ihsin Jehovah-ih Thukham Kuang thiarso dingin aipuang zetin an feh. 26 Cule hitin a si, Jehovah Thukham Kuang zâwnsotu Levi-mipawl cu Pathian in a băwm hai ruangah, câwpa pasarih le tuucang pasarih an hlan. 27 David, Kuang zâwntu Levi-mi hmuahhmuah, hlasatupawl le hlasatu zawngih hla hruaitu Kenaniah cu patzai fêmte ih tah mi kâwrfual an hruh. David khal in patzai fêmte ih tah mi Puithiam Kâwrcung a hruh ve. 28 Cutivekcun Israel zaten au le tuupa ki awn thawn, tawtawrawtpawl le sumselpawl thawn, cawngcingpawl le ṭingṭangpawl in awnmawi tumin Jehovah Thukham Kuang cu an thiarso.

29 Cule hitin a si, David Khawpi sungih Jehovah Thukham Kuang a thlen tikah, Saul fanu Mikal in tukvirh ihsin a rak cuan ih, Siangpahrang David cu lam le awnmawi tumin a hmu, cule a thinlungten amah cu a nautat.

16

Puanthlam sungah Kuang Ret a Si

1 Pathian Kuang cu an thiar ih, a retnak dingih David in a rak zar mi puanthlam sungah an ret. Pathian hmaiah Meiur Thilhlănpawl le Remnak Thilhlănpawl an hlan. 2 Cule David in Meiur Thilhlănpawl le Remnak Thilhlănpawl hlăn a ṭheh tikah, Jehovah hmin in mipi thlawsuah a pe. 3 Israel-mi mi tin hnenah, a nu a pa in, sang hlăwm khat, sa sem khat le sabit rah car hlawm khat ciar a zem hai.

4 Jehovah Kuang hmaiih rawngbawl ding le Israel-ih Pathian Jehovah thei ringring ding, lungawi thu sim ding le thangṭhat dingin Levi-mi mi hrekkhat cu David in a ruat hai: 5 Cupawl cu hotu ah Asaf, a sangtu ah Zekariah, cun Jeiel, Shemiramoth, Jehiel, Mattithiah, Eliab, Benaiah, Obed-Edom, cule cawngcingpawl le ṭingṭangpawl thawn a dang Jeiel tla an si ih, Asaf in sumsel in awthâwm a tuah; 6 Puithiam a si mi Benaiah le Jahaziel te in Pathian Thukham Kuang hmaiah cat loin tawtawrawt an phaw.

David-ih Lungawi Thu Sim Hla

7 Cuih ni cu David in Asaf le a unausungkhatpawl kha Jehovah hnenih lungawi thu sim dingin a ruat hmaisabik ṭum a si.

8 Aw, Jehovah hnenah lungawi thu sim uh!
A hmin ko uh;
Mipawl miphunpawl lakah a thil ti mipawl theihter uh.
9 A hnenah hla sak uh, a hnenah Sam hla sak uh;
A mangbangza thil ti mi zaten rel uh!
10 A hmin thianghlim tluangkhawnpi uh;
Jehovah hawltupawlih thinlung cu lungawiaipuangin um seh.
11 Jehovah le a cahnak hawl uh;
A mithmai hawl camcin uh!
12 A tuah mi mangbangza a hnaṭuanpawl cîng ringring uh,
A thilmakpawl le a relsuak mi thuṭhennakpawl khal,
13 Nannih a siahhlawh Israel tefapawl,
Nannih Jakob tefapawl, a hril mipawl!
14 Amah cu Jehovah kan Pathian a si;
A thuṭhennakpawl cu leilung hmuahhmuah ah a um.
15 A thukham cing kumkhua uh,
San 1000 hrangih thu a pek mi kamsuakthu,
16 Abraham hnenih a tuah mi thukham le,
Isak hnenih a thukam,
17 Cule cumi cu Jakob hnenah sakhaw dān hrangah a nĕmhnget,
Israel hnenah kumkhaw thukham hrangah,
18 «Na ro covo ah,
Na hnenah Kanaan ram ka lo pe ding,» tiin.
19 Mipum málte nan rak si,
Thungaiten mi málte nan si ih, mikhual nan si laiah khan, ka lo ti a si.
20 Miphun khat ihsin a dang phun khat ah an vâkvai ih,
Lalram pakhat ihsin mi dang hnenah.
21 Anih in anmah cu zohman ih palbĕt a siang lo;
Anmai ruangah siangpahrangpawl a kawk hai,
22 «Ka hriak thih mipawl dai hlah uhla,
Ka profetpawl tuahmawh hlah uh,» tiin.
23 Jehovah hnenah hla sak uh, leilung hmuahhmuah;
A runsuahnak thuthangṭha cu ni khat hnu ni khat phuang uh.
24 Miphunpawl lakah a ropitnak thăn uh,
Minungpawl hmuahhmuah lakah a mangbangzapawl.
25 Ziangahtile Jehovah cu a nasa ih nasazetih thangṭhat ding a si;
Amah cu pathianpawl hmuahhmuah tlunah ṭihzah ding a si.
26 Ziangahtile minungpawlih pathianpawl hmuahhmuah cu milem an si,
Asinan Jehovah cun vanpawl a tuah.
27 Ropitnak le cungnunnak cu a hmaiah a um,
Cahnak le lungawinak cu amai hmunram ah.
28 Maw miphunpawlih sungkuapawl,
Jehovah hnenah pe uh,
Jehovah hnenah sunlawihnak le cahnak pe uh.
29 Jehovah hnenah a hmin phutawk sunlawihnak pe uh;
Thilhlăn keng uhla, a hmaiah ra uh.
Thianghlimnak thawi a cungnung mi Jehovah cu bia uh!
30 A hmaiah khūr uh, leilung hmuahhmuah.
Leilung khal fek zetih dĭn a si,
A ṭhawn lo ding.
31 Vanpawl lungawiaipuangin um hai sehla, leilung hi lungawi seh,
Cule miphunpawl lakah, «Jehovah in a uk,» tiah ti hai seh.
32 Tifinriat le a sungih um hmuahhmuah hûk dumdo hai seh;
Lóram le a sungih um hmuahhmuah lungawiaipuangin um hai seh!
33 Cun tupi thingkungpawl Jehovah hmaiah lungawiaipuangin um hai seh,
Ziangahtile anih cu leilung thuṭhen dingin a ra.
34 Jehovah hnenah lungawi thu sim uh, ziangahtile anih cu a ṭha!
Ziangahtile a zahngainak cu kumkhua a hmun.
35 Cule, «Maw kan runsuahnak Pathian, in run aw;
Na hmin thianghlim ah lungawi thu sim dingin,
Tluangkhâwng zetih lo thangṭhat dingin,
Hmunkhatah in fĭn awla, miphunpawl hnen ihsin in runsuak aw,» tiah ti uh.
36 Israel-ih Pathian Jehovah cu
Kumkhuain kumkhua tiang thangṭhatin um seh!

Cule minung hmuahhmuah in, «Amen!» an ti ih, Jehovah an thangṭhat.

Pathian Biakdan

37 Cun David in Jehovah Thukham Kuang hmaiah ni tin a ṭuldān dānih rawngbawl ṭheu dingin Asaf le a unaupawl cu a tān ta, 38 cule Obed-Edom cu a unausungkhat mipum 68 thawn le kăwtkakiltu Jeduthun fapa Obed-Edom le Hosah thawn. 39 Puithiam Zadok le a unausungkhat puithiampawl cu Gibeon hmun sâng ih Jehovah-ih Biakbûk hmaiah David in a tan ta hai, 40 Jehovah hnenah Meiur Thilhlăn biakṭheng parah Meiur Thilhlănpawl zing le zan hlan ringring dingah le Jehovah in Israel thu a pek mi Jehovah Dān sungih ngan mi hmuahhmuah bangtukih tuah dingah. 41 Cule anmah thawn Heman le Jeduthun le an hmin ko ih hril mi a tāng lai mipawl cu a zahngainak kumkhua a hmun ruangah Jehovah hnenih lungawi thu sim ding an si. 42 Heman le Jeduthun cun tum dingah tawtawrawtpawl le sumselpawl an keng ih, Pathian hnenih awthâwm tuah dingah a dang awnmawi hmanruapawl khal an keng. Jeduthun fapapawl cu kăwtka ah an um. 43 Mipi zaten anmai inn cio ah an tin, cule David cu amai sungkua thlawsuah pe dingin a kir.

17

David thawi Pathian Thukham

1 Hitin a si, David cu a inn ih a cēn laiah, profet Nathan hnenah David cun, «Zoh hnik, kei cu sidar thing inn ah ka um, asinan Jehovah-ih Thukham Kuang cu puanthlam puanzar hnuai menah a um,» tiah a ti.

2 Nathan in David hnenah, «Na thinlung ih um hmuahhmuah in tuah aw, ziangahtile Pathian in a lo umpi a si,» tiah a ti.

3 Cuih zan lala ah hitin a si, Nathan hnenah Pathian kamsuakthu a thleng ih, 4 «Va feh awla ka siahhlawh David cu va sim aw, ‹Jehovah in hitin a ti, «Ka cēnnak ding inn i saksak lo pei. 5 Ziangahtile Israel ka hruaisuah ni ihsin tuihni tiang inn ah ka cêng lo, cuhnakin puanthlam ihsin puanthlam pakhat ah le cēnnak hmun pakhat in a dangah ka ṭhawn vivo sawn a si. 6 Israel zate thawi ka ṭhawn vivo nak hmun kip ah, ka mipawl câwm dingih thu ka pek mi Israel laireltupawl lakih zo hnen talah, ‹Ziangruangah sidar thing inn i saksak lo ka ti dah maw?› tiah,» a ti,› tiin.

7 «Curuangah ka siahhlawh David hnenah hitin sim aw, ‹Ralkap rualpawlih Jehovah cun hitin a ti a si, «Ka mi Israel uktu dingah ran tlannak hmun ihsin tuu na khalh laiah ka lo la. 8 Na fehsuaknak kip ah ka lo umpi ih, na hmai ihsin na ralpawl hmuahhmuah ka sâtcat ṭheh, cule leilung parih miropipawlih hmin vekin hmin ka rak lo tuahsak. 9–10 Cuihhleiah ka mi Israel hrangah hmun ka ruat ding ih, ṭhawnaw nawn loin anmai hmun ih an cēn theinak dingah anmah cu ka phun hai ding; hi hlanih ka mi Israel tlunih laireltupawl ka ruat laiih sualralnak fapapawl in an ti ṭheu vek khan an palbĕt nawn fawn lo ding. Na ralpawl hmuahhmuah khal ka duaiter hai ding. Cuihtlunah Jehovah in inn a lo saksak ding ti ka lo sim a si. 11 Cule na san a cem ih, ana pupápawl hnenih na feh tikah, hitin a si ding, nangmah hnuah na ci ka tungding ding, amah cu na fapapawl lakih pakhat a si ding ih, a lalram ka dĭnhnget ding. 12 Anih in inn i saksak ding ih, kei in a laltokham ka dĭn kumkhua ding. 13 Kei cu a Pa ka si ding ih, anih cu ka fapa a si ding; cule ka zahngainak na hlanih mi hnen ihsin ka rak laksak bangin, anih cu ka laksak lo ding. 14 Anih cu ka inn le ka lalram ah ka dĭn kumkhua ding ih, a laltokham cu kumkhua a ding ding,» a ti,› tiin,» tiah a ti.

17:11a na pupápawl hnenih na feh tikah: Na thih tikah tinak a si.

15 Hi kamsuakthupawl hmuahhmuah vekin le hi larawknak hmuahhmuah vekin Nathan in David a sim.

David Thlacam

16 Siangpahrang David cu a lut ih, Jehovah hmaiah a to. Cule anih in, «Maw Jehovah Pathian, keimah cu zo so ka si? Ka sungkua teh ziang an si ih, hi can tiang i hruai? 17 Maw Pathian, na mithmuhah himi cu thil tenau a si. Maw Jehovah Pathian, hmai lam hlatpi cān ih na siahhlawh sungkua rung umdān ding thu na rel. Mipawimawhbik vekin nang cun i ngaihsak. 18 Na siahhlawh upatnak na coter thuhla ah David in ziang a simbêt thei ding? Ziangahtile na siahhlawh cu na thei a si. 19 Maw Jehovah, na siahhlawh hlawknak hrangah le nangmai thinlung bangtukin hi ropitnak hmuahhmuah hi na tuah ih, hi thil ropi hmuahhmuah na phuanglang. 20 Maw Jehovah, kan hna ih kan theih mi hmuahhmuah vekin, nangmah vek an um lo ih, nangmah siarlo Pathian an um fawn lo. 21 Ziang miphun so na mi Israel vek um? Annih cu leilung tlunih um minung an si ih, amai hrang rori ah tlen dingin Pathian a feh. An parah na hmin na ret ih, a ropi mi le a maksak mi thil tipawl hmangin, Izip ihsi na tlen mi, na mipawl, an hmaiah miphunpawl na dawisuak. 22 Ziangahtile na mi Israel cu kumkhua na ta si dingin na rak tuah, cule nang, Jehovah cu an Pathian ah na cang.

23 «Atu ah, Maw Jehovah, na siahhlawh thuhla le a inn thuhla ih na sim mi kamsuakthu cu kumkhua dĭnhnget si sehla, na rak sim vekin tuah aw, 24 ‹Israel Pathian, ralkap rualpawlih Jehovah cu Israel Pathian a si,› tiin na hmin cawimawi kumkhua a si theinak dingah dĭnhngeh si seh. Cule na siahhlawh David-ih sungkua cu na hmaiah kumkhuain dĭnhngeh si seh. 25 Ziangahtile Maw ka Pathian, nang in na siahhlawh hnenah inn saksak dingin na rak phuanglang. Curuangah na siahhlawh in na hmaiih thlacam dingin ralṭhatnak a hmungah a si. 26 Atu ah, Jehovah, nangmah cu Pathian na si ih, na siahhlawh hnenah hi ṭhatnak hi na rak tiamkam. 27 Na siahhlawh sungkua cu na hmaiih an um kumkhua theinak dingah malsawm pe dingin na lung a hmui. Ziangahtile, Maw Jehovah, nang in mal na sawm ih, cumi cu kumkhaw malsawmnak a si ding,» tiah a ti.

18

David-ih Lalram a Kau Vivo

1 Himi hnuah hitin a si, David in Filisṭia-mipawl a do ih, a duaiter hai, cule Gath le a khawṭekpawl cu Filisṭia-mipawlih kut ihsin a lâk. 2 Anih in Moab a neh ih, Moab-mipawl cu David-ih siahhlawh ah an cang, cule ngunkhuai an rak pe.

3 David in a uknak dĭnhnget dingin Zufraṭis Tiva kiangih a feh phahah, Zobah siangpahrang Hadadezer cu Hamath ah a neh. 4 Cu pa hnen ihsin David in ránglêng 1000 le rángtothiam 7000 le ke ralkap 20000 a lâk. Cuihtlunah David in lêng 100 hrangih a zuah mi siarlo, lêng hnûktu ráng hmuahhmuah an kaiza thahri a sahcatsak ṭheh.

5 Damaskas ihsin Siria-mipawl cu Zobah siangpahrang Hadadezer bawm dingih an rat tikah, David in Siria mipa 22000 a rak that. 6 David in Siria ram Damaskas ah ṭanhmun kiltu ralkappawl a ret, cule Siria-mipawl cu David-ih siahhlawh ah an cang, cule ngunkhuai an rak pe. A fehnak kip ah David cu Jehovah in nehnak a pe. 7 Hadadezer-ih siahhlawhpawl parih um sui ralphawpawl cu David in a lâk ih, Jerusalem ah a tlunpi. 8 Cuihtlunah Hadadezer khawpi Tibhath le Kun ihsin David in dar tam zet a tlŭn, cumi thawn Solomon in dar Tikuangpi, dar ṭhuampawl le dar thilripawl a run tuah.

9 Zobah siangpahrang Hadadezer-ih ralkappawl hmuahhmuah cu David in a neh ti Hamath siangpahrang Tou in a theih tikah, 10 Hadadezer a do ih a neh ruangih cibaibûk ding le lungawipi dingin a fapa Hadoram cu David hnenah a thlah, ziangahtile Hadadezer cu Tou thawn an rak doaw ṭheu. Cule Hadoram in sui, ngun le dar ih tuah mi thilri phun zakim a rak ken. 11 Hi miphunpawl hmuahhmuah: Edom-mipawl hnen, Moab-mipawl hnen, Ammon-mipawl hnen, Filisṭia-mipawl hnen le Amalek-mipawl hnen ihsin a tlunpi mi sui le ngun phun zakip thawn cupawl cu Siangpahrang David in Jehovah hnenah a serhhran.

12 Cuihhleiah Zeruiah fapa Abishai in Cite Phaikuam ah Edom-mi 18000 a that. 13 Anih in Edom ah ṭahmun kiltu ralkappawl khal a ret, cule Edom-mipawl an zaten David-ih siahhlawh ah an cang. Cule a fehnak kip ah David cu Jehovah in nehnak a pe.

14 Israel zate tlunah David a lal, a mipi hmuahhmuah hnenah dik zet le dingfel zetin thu a ṭhen. 15 Zeruiah fapa Joab cu ralkappawl tlunih lubik a si; Ahilud fapa Jehoshafat cu thuanthu ngankhumtu a si; 16 Ahitub fapa Zadok le Abiathar fapa Abimelek cu puithiam an si; Shavsha cu cangantu a si; 17 Jehoiada fapa Benaiah cu Kereth-mipawl le Peleth-mipawl tlunah a um ih, David fapapawl cu siangpahrang hnuaiih hotu an si.

19

David in a Ralpawl a Neh

1 Himi hnuah hitin a si, Ammon-mipawlih siangpahrang Nahash a thi ih, a fapa cu a aiah a lal. 2 David in, «A pa in ka parih ngilneihnak a lăngter ruangah, Nahash fapa Hanun hnenah ngilneihnak ka langter ding,» tiah a ti. A paih thuhla ah David in cu pa cu va hnem dingin thuphurtu a thlah. David-ih siahhlawhpawl cu Ammon-mipawlih ram ah Hanun hnenah cu pa hnem dingin an va thleng.

3 Ammon-mipawlih ralbawipawl in Hanun hnenah, «Hnemtupawl na hnenih a thlah ruangah David in na pa a upat taktak tiah na ruat maw? A siahhlawhpawl cu ram zingzăwi ding le linglet ding le thlingthla dingin an ra a si lo maw?» tiah an ti.

4 Curuangah Hanun in David-ih siahhlawhpawl cu a kai hai ih, an khahmul a ziahsak, cule an tawcawr téngin an sinfenpawl cu a laiin a hlehtănsak ih a thlahhlo hai. 5 Mi hrekkhat an feh ih, a milaipawl thuhla cu David an va sim; a milaipawl an ning a zah tuk ruangah, anmah va táwng dingin mi a thlah. Cule siangpahrang in, «Nan khahmul a cerhsau hlanlo Jeriko ah cām uhla, ra tlung uh,» tiah a ti.

6 Ammon-mipawl in anmah le anmah David-ih huat mi ah an tuahaw ti an hmuh tikah, Hanun le Ammon-mipawl in Mesopotamia ram ihsin le Siria Maakah ram ihsin le Zobah ram ihsin anmai hrangih ránglêngpawl le rángtothiampawl sannak ah ngun talent 1000 an kuat. 7 Anmai hrangah ránglêng 32000 le Medeba hmaiah ra ih ṭanhmunkhuar Maakah siangpahrang le a mipi cu an ruai. Cuihtlunah Ammon-mipawl cu an khawpipawl ihsin an fĭnkhawmaw ih, ral do dingin an feh.

8 David in cumi a theih tikah, Joab le a micak ralkap zaten a kuat. 9 Ammon-mipawl an ra suak ih, khawpi kăwtsuah hmaiah ṭankhuarin ral do dingin an tlaraw, cule a ra thleng zo mi siangpahrangpawl cu anmah ten lóram ah an um.

10 Joab in a hmai lam le a dung lam ihsin an run do ding ti a hmuh tikah, Israel lakih miṭhabik bik a hril ih, Siria-mipawl do dingin a tlarawter hai, 11 cule a tāng lai mipi cu a unaupa Abishai hohatnak hnuaiah a ret, cule anmah cu Ammon-mipawl do dingin an tlaraw ve. 12 Anih in, «Ka hrangah Siria-mipawl hi an cak tuk asile, i bawm pei; asinan Ammon-mipawl cu na hrangih an cak tuk asile, ka lo bawm ding. 13 Ralṭhain um uhla, kan mipi hrangah le kan Pathian khawpipawl hrangah cak uh sila, Jehovah in a mithmuhih ṭha a ti mi tuah seh,» tiah a ti.

14 Joab le a zawngih um mipi cu ral do dingin Siria-mipawl an va naih ih, a hmaiah Siria-mipawl an zâm. 15 Ammon-mipawl in Siria-mipawl an zâm ti an hmuh tikah, annih khal Joab-ih unaupa Abishai hmaiah an zâm ve ih, khaw sungah an lut. Cutin Joab cu Jerusalem ah a tlung.

16 Siria-mipawl in Israel in a neh hai ti an hmuh tikah, thuphurtupawl an thlah ih, Tiva ralkhat ih um Siria-mipawl cu an kosuak, cule Hadadezer ralkap rualpawlih ralbawipi Shofak cu an hmaiah a feh. 17 Cuih thu cu David an sim tikah, Israel zaten a fĭnkhawm, Jordan an tánkai ih anmah cu an va fuk, cule anmah do dingin an tlaraw. Cule Siria-mipawl do dingin David in tlarawk a ṭheh tikah, Siria-mipawl cu an do. 18 Siria-mipawl cu Israel hmaiah an zâm ih, David in Siria-mi ránglêng mâwngtu 7000 le ke ralkap 40000 a that, cule ralkap rualpawlih ralbawipi Shofak a that. 19 Hadadezer-ih siahhlawhpawl in anmah cu Israel in a neh hai ti an hmuh tikah, David thawn remnak an tuah ih, a siahhlawh ah an cang. Cutin Siria-mipawl cun Ammon-mipawl băwm an duh nawn lo.

20

Rabbah cu Neh a Si

1 Hitin a si, ṭhâl a hung si tikah, siangpahrangpawl doaw dingih an suah tikcān ah, Joab in ralkap cakpawl a hruaisuak ih, Ammon-mipawlih ram a rawtsiat, cule an feh ih Rabah khawpi an kulhkhŭm. Asinan David cu Jerusalem ah a tāng ta. Cule Joab in Rabbah khawpi cu a neh ih a băl thluh. 2 David in an siangpahrang lukhum cu a lu ihsin a lâk, cule sui talent khat a rit ti a hmu, a sungah lung mankhungpawl tla an um. Cumi cu David lu parih ret a si. Khawpi ralthillawn khal a tawrih tawr a lasuak. 3 Cuih khaw sungih um mipi cu a hruaisuak ih, thingahnakpawl le thil hriam hmanruapawl le hreitlungpawl thawn hna a ṭuanter hai. David in Ammon-mipawlih khawpipawl hmuahhmuah cu cutivekin a tuah. Cule David le mipi hmuahhmuah cu Jerusalem ah an tlung.

Filisṭia Mimangkawngpawl Thahnak

4 Himi hnuah hitin a si, Filisṭia-mipawl thawn Gezer ah ral doawknak a um. Cuih cān ah Hushath-mi Sibbekai in mimangkawng fapapawl lakih pakhat a si mi Sippai a that. Cule annih cu an duai.

5 Filisṭia-mipawl thawn ral doawknak a umsal ih, Jair fapa Elhanan in Gath-mi Goliath-ih unaupa Lahmi a that, a feipi ngul cu thiam tlâng tlukih tûm a si.

6 Gath ah ral doawknak a umsal lala, cu tawkah cun misâng zet, kut khat ih kutzung paruk veve le ke khat ih kezung paruk veve nei, a zateih zung 24 nei a um ih, anih khal cu mimangkawng lakih hrin mi a si ve. 7 Anih in Israel a va hmuhsuam hai tikah, David-ih upa Shimea fapa Jonathan in amah cu a that.

8 Cupawl cu Gath khua ih mimangkawng lakih suak an si ih, annih cu David kut le a siahhlawhpawlih kut in an tlu.

21

David in Israel le Judah Mipum a Siar

1 Israel parah Setan a ding ih, Israel mipum siar dingin David a cawktho. 2 David in Joab hnen le mipi hruaitupawl hnenah, «Feh uh, Beersheba ihsin Dân tiang Israel mipum siar uhla, ka theih theinak dingah an mipum zât cu in sim uh,» tiah a ti.

3 Asinan Joab in, «Jehovah in a mipawl cu alet 100 in karhter hram seh! Asinan ka bawi siangpahrang, an zaten ka bawipaih siahhlawh hlir an si thluh lo maw? Ziangruangah so ka bawi in hi thil hi a sut? Ziangahso Israel mawhtertu ih a can ding?» tiah a sâng.

4 Sikhalsehla siangpahrang ṭawngkam in Joab a neh. Curuangah Joab cu a păwk ih Israel hmuahhmuah hrawhsuakin Jerusalem a thleng. 5 Joab in ral do mipum a siar mi cu David a pe. Israel ih a neih mi zate cu mipa ralnâm zûk thei million khat le ting khat an si ih, Judah ih a neih mi cu ralnâm zûk thei mipa ting li le thawng sawmsarih an si. 6 Asinan siangpahrang ṭawngkam cu Joab hrangah fihnungza a si ruangah Levi le Benjamin cu an lakah a siartel hai lo.

7 Hi thil ah Pathian aa lung a hmui lo, curuangah anih in Israel cu a vuak. 8 David in Pathian hnenah, «Nasa zetin thilsual ka rak tuah, ziangruangahtile hi thil hi ka rak tuah a si. Asinan atu ah ka lo dil, na siahhlawhih mawhsualnak hi lahlo aw, ziangahtile atthlak zetin ka rak tuah a si,» tiah a ti.

21:7a a lung a hmui lo: A ṭawng hrampi ah cun, «mithmuh ah thil ṭhalo a si,» ti a si.

9 Cun Jehovah in David-ih hmutu Gad hnenah, 10 «Va feh awla David sim aw, ‹Jehovah in hitin a ti, «Thil pathum ka lo pe, na parih ka tuah dingah pakhat in hril aw,» tiin,› a ti,» tiah a sim.

11 David hnenah Gad a feh ih a hnenah, «Jehovah in hitin a ti, ‹Nangmai hrangah, 12 kum thum sung mangṭam asilole, na ralpawlih ralnâm thawi man zikzikih thla thum sung hual vivo asilole, Jehovah ralnâm hmangin nathrisia ih Israel ram pumpi ni thum sung Jehovah-ih vancungmi ih lo thah ding, hril aw,› tiin. Atu ah i thlahtu hnenah ziang thu ka phurkir ding ti ruat aw,» tiah a ti.

13 David in Gad hnenah, «Nasa zetih vansanglamin ka um a si. Jehovah kut ah tlu ko ning, ziangahtile a zahngainak cu a nasatuk; asinan milai kut ah cun i tluter hlah aw,» tiah a ti.

14 Cutin Jehovah in Israel parah nathrisia a thlah ih, Israel mipa 70000 an tlu. 15 Jerusalem tisiat dingin Pathian in vancungmi a thlah. Anih in a hun tisiat tikah, Jehovah in a zoh ih cuih thil ṭhalo thuhla ah a lamlêt, cule a tisiat rero tu vancungmi hnenah, «A tawk e; na kut sūp thlang aw,» tiah a ti. Cule Jehovah-ih vancungmi cu Jebus-mi Ornan hruihhmun kiangah a ding.

16 David cu khua a tang ih, leilung le van karlakih a ding mi Jehovah-ih vancungmi, ralnâm zûk cia a kut ih Jerusalem tlun tĭn cu a hmu. Cule David le upapawl cu buri-hnipuan an hruh ih, leisin bihin an tlu. 17 David in Pathian hnenah, «Mipum siar dingih thupetu cu keimah ka si lo maw? A sualtu le thil ṭhalo tuahtu taktak cu keimah ka si; asinan hi tuupawl cun ziang an rak tuah ih? Maw Jehovah ka Pathian, zangfahten na kut cu keimah le ka paih sungza parah tla seh, na mipawl lawngte cu pulhnat tuarter si hlah hai seh,» tiah a ti.

Ornan-ih Hruih

18 Jehovah-ih vancungmi in Gad hnenah David cu hung so tahratih, Jebus-mi Ornan hruihhmun ih Jehovah hrang biakṭheng dâwl dingin David sim dingin thu a pe. 19 Gad-ih ṭawngkam vekin David cu a so, Gad in Jehovah hmin in a sim. 20 Ornan cu dung a her ih vancungmi a hmu, cule a hnenih um a fapa pali cu an relh. Ornan cu sangvut a cil rero. 21 Ornan hnenah David a ra ih, Ornan in a zoh, cule David a hmu. Cule Ornan cu hruihhmun ihsin a fehsuak ih, David hmaiah a hmai lei lam hawiin a băwk. 22 David in Ornan hnenah, «Jehovah hnenih biakṭheng ka dawl theinak dingah hi hruihhmun hi i pe aw. Mipi hnen ihsin pulhnat lakkir a si theinak dingah a man kimten i ngen aw,» tiah a ti.

23 Ornan in David hnenah, «Na hrangah cumi cu la mai awla, ka bawi siangpahrang in a mithmuhih ṭha a ti mi tuah seh. Zoh hnik, Meiur Thilhlănpawl hrangah câwpapawl, thing hrangah hruih hmanruapawl le Thlairawl Thilhlăn hrangah sangvut ka lo pebêt ding; a zaten ka lo pe a si,» tiah a ti.

24 Asinan Siangpahrang David in Ornan hnenah, «Si lo e, a man kimten ka lo lei hrimhrim ding, ziangahtile na ta a si mi cu Jehovah hrangah ka la lo ding ih, man nei lo mi Meiur Thilhlănpawl ka hlan fawn lo ding,» tiah a ti. 25 Cutin David in Ornan-ih hmunram hrangah sui shekel 600 rit a pe. 26 Cu tawkah David in Jehovah hnenah biakṭheng a dâwl ih, Meiur Thilhlănpawl le Remnak Thilhlănpawl a hlan, cule Jehovah a ko. Anih in van ihsin amah cu Meiur Thilhlăn biakṭheng parah meisa in a run sâng.

27 Jehovah in vancungmi cu thu a rak pe ih, a ralnâm cu a kawm ah a thunkir.

28 Cuih cān ah, Jehovah in Jebus-mi Ornan-ih hruihhmun ah i sâng ti David in a hmuh tikah, cu tawkah rai a thawi. 29 Ziangahtile ramṭhing ih Mosi ih a rak tuah zo mi Jehovah-ih Biakbûk le Meiur Thilhlănnak biakṭheng cu cuih cān ah cun Gibeon hmun sâng ah an um. 30 Asinan David cu Pathian sut dingin cumi hmaiah a so ngam lo, ziangahtile Jehovah vancungmi-ih ralnâm a ṭih.

22

David in Temple hrangah a Timlam

1 David in, «Himi cu Jehovah Pathian inn a si ih, himi cu Israel hrangah Meiur Thilhlănnak biakṭheng a si,» tiah a ti. 2 Cutin Israel ram ih um khawtluang mi hmuahhmuah fĭnkhawm dingin David in thu a pe; cule Pathian inn sak dingah lungtoserthiampawl cu lungto ser dingin thu a pe. 3 David cun kăwt sângka tlawngkhenpawl hrang le a pehawknak ding hrangah thir tam ngaingai a timlam, cule khīngkhai cawk lo dar tam ngaingai le, 4 sidar thing siar cawk lo a timlam, ziangahtile Sidon-mipawl le Ṭaiar-mipawl in sidar thing tam zet David hnenah an rak keng.

5 David in, «Ka fapa Solomon cu a no lai ih, tawnteh mi a nei hrih lo, cule Jehovah hrangih sak ding mi inn cu a maksak tuk ding, a hmin le a ropitdān cu ram hmuahhmuah ih thang ding a si. Curuangah cumi hrangah timlamnak ka tuah ding,» tiah a ti. Cutin a thih hlanah David in timlamawknak tam ngaingai a tuah.

6 Cun a fapa Solomon a ko ih, Israel-ih Pathian Jehovah hrangih inn sak dingin amah cu a cah. 7 David in Solomon hnenah, «Ka fapa, ka lungthin ah Jehovah ka Pathian hmin hrangih inn sak ding a um; 8 asinan, ‹Nang cun thisen tam tuk na rak suah ih, ral doawknak nasa taktak na do; ka hmin hrangah inn na sak lo pei, ziangruangahtile ka mithmuhah leilung parah thisen tam tuk na rak suah. 9 Ngai hnik, fapa na nei ding ih, anih cu cawlhahdam pa a si ding; cule a kimvelih a ral hmuahhmuah hnen ihsin amah cu cawlhhahdamnak ka pe ding. A hmin cu aSolomon a si ding, ziangahtile a san sung Israel hnenah remnak le daihnak ka pe ding. 10 Amah in ka hmin hrangah inn a sak ding ih, amah cu ka fapa a si ding, cule kei cu a Pa ka si ding; Israel tlunah a lalram laltokham ka dĭn kumkhua ding,› tiin Jehovah kamsuakthu ka hnenah a thleng. 11 Atu ah ka fapa, Jehovah in lo umpi hram sehla, hmuingil hram aw, cule na hnenih a lo sim vekin Jehovah na Pathian hrangah inn sak aw. 12 Jehovah in Israel tlunih thucah a lo pek tikah, fimnak le theihthiamnak khal lo pe seh, cutin Jehovah na Pathian Dān na thlun thei ding. 13 Cun Israel thuhla ih Jehovah in Mosi thu a cah mi sakhaw dānpawl le cīn le dānpawl tuahsuak dingih na fimkhur asile, na hmuingil ding. Cak le ralṭhain um aw; ṭih hlah, thlaphâng fawn hlah. 14 Ngai hnik, Jehovah inn hrangah harsa zetih ka rak timlam mi sui talent thawng zakhat, ngun talent million khat, dar le thir khīngkhai cawk lo a um, ziangahtile a tawrin a tawr. Thing le lungto khal ka rak timlam ih, cupawl tlunah na bêt thei. 15 Cuihtlunah na hnenah hnaṭuanthiam: thingsalhthiampawl, lungserthiampawl, themthiam hna tinkim ṭuanthiam a tawrih tawr an um, 16 sui le ngun le dar le thir khal siar cawk lo. Tho awla ṭuan thăwk mai aw, cule Jehovah in lo umpi seh,» tiah a ti.

22:9a Solomon: Hebru ṭawngfáng shelomoh ti mi awsuah vek a si ih, Hebru ṭawng «hnangamdaihnak» ihsi ra a si men thei.

17 David cun Israel hruaitupawl hmuahhmuah khal a fapa Solomon bawm dingin thu a pe, 18 «Jehovah nan Pathian in a lo umpi a si lo maw? Cule na kimvelih minungpawl hnen ihsin cawlhhahdamnak a rak lo pe a si lo maw? Ziangahtile ka kut ah ram luahtupawl i pe ih, Jehovah hmai le mipi hmaiah ram cu duaiter a si. 19 Atu ah, Jehovah nan Pathian hawl dingin nan thinlung le nan nunnak pe uh. Curuangah Jehovah hmin hrangih sak ding mi inn sungah Jehovah-ih Thukham Kuang thiar dingin le Pathian thilri thianghlimpawl thiar dingin tho uhla, Jehovah nan Pathian-ih hmun thianghlim sak uh,» tiah a ti.

23

Solomon cu Siangpahrang ih Tuah a Si

1 David cu a upa thlang ih, a tar tikah, a fapa Solomon cu Israel tlunih siangpahrang dingah a tuah.

Levi-mipawl

2 David in puithiampawl le Levi-mipawl thawn Israel hruaitupawl hmuahhmuah a fĭnkhawm. 3 Levi-mipawl cu kum 30 le a tlun mi an siar ih, mipa mipum 38000 an si. 4 David in, «Cupawl lak ihsin 24000 cu Jehovah inn hnaṭuan vilvengtu ding an si, 6000 cu hohatu ding le thuṭhentu ding an si, 5 mi 4000 cu kăwtkakiltu ding an si ih, a dang mi 4000 pawl in thangṭhatnak dingih awnmawi hmanruapawl ka tuah mi hmangin Jehovah cu an thangṭhat ding,» tiah a ti.

6 Levi fapapawl cu Gerson, Kohath le Merari an si ih, Levi fapapawl lakah David in a bur a bur in a ṭhen.

7 Gershon-mipawl lak ihsin Ladan le Shimei an si. 8 Ladan fapapawl cu hmaisabikah Jehiel a si, cun Zetham le Joel an zaten pathum an si. 9 Shimei fapapawl cu Shelomith, Heziel le Haran, an zaten pathum an si. Hipawl hi Laadan-ih pupápawlih sungza lubân an si. 10 Shimei fapapawl cu Jahath, Zina, Jeush le Bepriah an si. Hipawl hi Shemei fapa pali cu an si. 11 Jahath cu a pakhatnak a si ih, a pahnihnak ah Zizah a si. Asinan Jeush le Beriah in fapa tampi an nei lo; curuangah annih cu sungkua pakhat vekin ṭuanvo pek an si.

12 Kohath fapapawl cu Amram, Izhar, Hebron le Uzziel, an zaten pali an si. 13 Amram fapapawl cu Aaron le Mosi an si, thil thianghlimbikpawl tithianghlim dingin, Jehovah hmaiih rimhmui ur dingin, amah rian dingin le a hmin in thlawsuah pe kumkhua dingin Aaron cu serhhran a si, amah le a fapapawl cu a kumkhuain. 14 Pathian mi Mosi fapapawl cu Levi hnám ih siartelh an si. 15 Mosi fapapawl cu Gershom le Eliezer an si. 16 Gershom fapapawl lakah Sheubuel cu a pakhatnak a si. 17 Elieazer tesinfapawl lakah Rehabiah cu a pakhatnak a si. Eliezar in fapa dangpawl a nei lo, asinan Rehabiah-ih fapapawl cu an tam ngaingai. 18 Izhar fapapawl lakah Shelomith cu a pakhatnak a si. 19 Hebron fapapawl lakah Jeriah cu a pakhatnak a si, a pahnihnak ah Amariah, a pathumnak ah Jahaziel, a palitnak ah Jekameam a si. 20 Uzziel fapapawl lakah Mikah cu a pakhatnak a si ih, Jesiah cu a pahnihnak a si.

21 Merari-ih fapapawl cu Mahli le Mushi an si. Mahli fapapawl cu Eleazar le Kish an si. 22 Eleazar cu fapa nei loin a thi, asinan fanupawl tla a nei; cule an unausungkhat Kish fapapawl in cupawl cu nupi ah an ṭhi. 23 Mushi fapapawl cu Mahli, Eder le Jeremoth, an zaten pathum an si.

24 Hipawl hi Levi tesinfa, an sungkua bangtukih hmin ngan ih an siar sungkua lubân, Jehovah inn sak rawngbawlhna ṭuan, kum 20 le a tlun lam siar mipawl an si.

25 Ziangahtile David in, «Jerusalem ih an cēn kumkhua theinak dingah, Jehovah Israel Pathian in a mipawl hnenah cawlhhahdamnak a pe. 26 Curuangah Levi-mipawl in Biakbûk an zâwn nawn lo ding ih, cumi rawngbawlnak hrang thilripawl lakih ziangkhal,» tiah a ti. 27 Curuangah David-ih ṭawngkam netabik bangtukin Levi-mipawl cu kum 20 le a tlun lam mipawl an siar. 28 Ziangruangahtile an ṭuanvo cu Jehovah inn, tualrawn le pindanpawl ih Aaron fapapawl rawngbawl băwm, thil thianghlim hmuahhmuah thianfai le Pathian inn rawngbawlhna ṭuansuah a si. 29 Cuihtlunah an ṭuanvo cu Sangserh le Thlairawl Thilhlăn hrangah sangvut phŭt thawn, thilnu telh lo sangper páte le khēngdau ih kăn mi thawn, rawi mi le tah mi phun zakip thawi băwm a si. 30 Cule zing tin dingin, Jehovah hnenih lungawi thu sim le thangṭhat, cuvek thothoin zan lam tin khalah, 31 cule Sabbath-pawl ah, Thla Tharpawl ah le puaipawl ah Jehovah hnenih Meiur Thilhlănpawl hlăn a si tinten, Pathian in a ngĕn hai mi zât bangtukin, Jehovah hmaiih ding ṭheu ding an si. 32 Cule annih cun tawnawknak biakbûk ṭul mi, hmun thianghlim ṭul mi, Jehovah inn hnaṭuannak ih an unausungkhat Aaron tefapawlih ṭul mi phihru ding an si.

24

Aaron Tesinfapawl Burṭhennak

1 Hipawl hi Aaron fapapawl bur ṭhendān cu a si. Aaron fapapawl cu Nadab, Abihu, Eleazar le Ithamar an si. 2 Nadab le Abihu cu an pa hlanah an thi ih, fāte an nei lo; curuangah Eleazar le Ithamar cu puithiam vekin rawng an bâwl. 3 Cun David cun Eleazar tefapawl lakih Zadok le Ithamar tefapawl lakih Ahimelek thawn Aaron tefapawl cu an rawngbawlnak ih an ṭuanvo zulhin anmah cu a ṭhen hai.

4 Eleazar tefapawl hnakin Ithamar tefapawl in hruaitu an nei tamsawn ti hmuh a si ruangah, hitivekin annihpawl cu burṭhen an si: Eleazar tefapawl lakah an pupápawlih sungza lubân hleiruk an um ih, Ithamar tefapawl lakah an pupápawlih sungza lubân pariat an um. 5 Cutivekcun annih cu camcawhfung zûkin bur ṭhen an si, bur tin bangrepawin ṭhen an si, ziangahtile hmun thianghlim bawipawl le Pathian inn bawipawl an um, cupawl cu Eleazar tefapawl ihsin le Ithmar tefapawl ihsin an si. 6 Cangantu, Levi-mipawl lakih pakhat Nethanel fapa Shemaiah in siangpahrang le hruaitupawl, puithiam Zadok, Abiathar fapa Abimelek le puithiampawlih pupápawl sungza lubânpawl le Levi-mipawl hmaiah a ngan; pupá sungkua pakhat cu camcawhfung zûknak in a haha in Eleazar hnen ihsin pakhat, Ithamar hnen ihsin pakhat hril a si.

7 Pakhatnak camcawhfung cu Jehoiarib parah a tla, pahnihnak cu Jedaiah parah, 8 pathumnak cu Harim parah, palitnak cu Seorim parah, 9 pangatnak cu Malkijah parah, paruknak cu Mijamin parah, 10 pasarihnak cu Hakkoz parah, pariatnak cu Abijah parah, 11 pakuatnak cu Jeshua parah, pahratnak cu Shekaniah parah, 12 hleikhatnak cu Eliashib parah, hleihnihnak cu Jakim parah, 13 hleithumnak cu Huppah parah, hleilitnak cu Jeshebeab parah, 14 hleingatnak cu Bilgah parah, hleiruknak cu Immer parah, 15 hleisarihnak cu Hezir parah, hleiriatnak cu Happizzez parah, 16 hleikuatnak cu Pethahiah parah, 20-nak cu Jehezekel parah, 17 cun 21-nak cu Jakin parah, 22-nak cu Gamul parah, 18 cule 23-nak cu Delaiah parah, 24-nak cu Maaziah parah a tla.

19 Himi cu Israel-ih Pathian Jehovah in Aaron thu a rak pek vekin, an pupá Aaron kut ihsi an cīn le dān bangtukih Jehovah inn sungah lut ih an rawngbawl dān ding a si.

20 A dang Levi tefapawl cu: Amram tefapawl ihsin Shubael; Shubael tefapawl ihsin Jehdeiah a si. 21 Rehabiah thuhla ah cun Rehabiah tefapawl lak ihsin a pakhatnak cu Isshiah a si. 22 Izhar-mipawl lak ihsin Shelomoth, Shelomoth tefapawl lak ihsin Jahath a si. 23 aHebron tefapawl lak ihsin Jeriah cu a pakhatnak a si, a pahnihnak ah Amariah, a pathumnak ah Jahaziel le a palitnak ah Jekameam an si. 24 Uzziel tefapawl lak ihsin Mikah, Mikah tefapawl lak ihsin Shamir a si. 25 Mikah-ih unaupa Isshiah, Isshiah-ih tefapawl lak ihsin Zekariah a si. 26 Merari-ih tefapawl cu Mahli le Mushi an si; Jaaziah-ih fapa cu Beno a si. 27 Jaaziah hnen ihsin Merari-ih tefapawl cu Beno, Shoham, Zakkur le Ibri an si. 28 Mahli hnen ihsin fapa nei lo Eleazzar a suak. 29 Kish hnen ihsin Kish fapa Jerahmeel a si. 30 Muhsi tefapawl cu Mahli, Eder le Jerimoth an si. Hipawl hi an pupápawlih sungza bangtukih Levi-mipawlih tefa an si. 31 Annih khal an unausungkhat Aaron tefapawl vekin, Siangpahrang David, Zadok, Ahimelek le puithiampawlih pupá sungza lubânpawl le Levi-mipawl hmaiah camcawhfung an zûk ve. Pupá sungza lubân kip khal in an naulepawl vekin an tuah cio.

24:23a Hebron: Hebron hi 1San 23:19 ihsi lak mi a si, himi Bible câng ah cun a rak um lo.

25

Temple hrang Hlaremtupawl

1 Cuihtlunah David le ralkappawlih ralbawipawl in Asaf fapapawl, Heman fapapawl le Jeduthun fapapawl cu ṭingṭangpawl, cawngcingpawl le sumselpawl thawn thuphuang ih rawngbawl dingin an serhhran. An rawngbawlnak bangtukih ṭuansuaktu mithiam mipum zât cu: 2 Asaf fapapawl lak ihsin Zakkur, Joseph, Nethaniah le Asharelah an si. Asaf fapapawl cu siangpahrang thupek bangtukih thupuangtu Asaf-ih kaihhruainak hnuaiah an um.

3 Jeduthun ihsin, Jeduthun fapapawl cu: Gedaliah, Zeri, Jeshaiah, Shimei, Hashabiah le Mattithiah, paruk an si, Jehovah hnenih ṭingṭangpawl thawi lungawi thu sim le thangṭhat dingih thuphuangtu an pa Jeduthun-ih kaihhruainak hnuaiah an um. 4 Heman ihsin Heman fapapawl cu Bukkiah, Mattaniah, Uzziel, Shebuel, Jerimoth, Hananiah, Hanani, Eliathah, Giddalti, Romamti-Ezer, Joshbekashah, Mallothi, Hothir le Mahazioth an si. 5 Hipawl hmuahhmuah hi siangpahrang-ih profet Heman fapapawl an si, Pathian thutiamkam bangtukih Heman khaisângtu ding an si. Ziangahtile Pathian in Heman cu fapa hleili le fanu pathum a pe.

6 Hipawl hmuahhmuah cu Jehovah inn ah sumselpawl, cawngcingpawl le ṭingṭangpawl thawn Pathian inn ih rawngbawlnak ih an paih kaihhruainak hnuaiih hlaremtu an si. Asaf, Jeduthun le Heman cu siangpahrang thuneihnak hnuaiah an um. 7 An mipum zât cu, Jehovah-ih hla zirh cia mi an unausungkhatpawl thawn 288 an si, an zaten an thiam zet.

8 Cule a tûm le a te, zirhtu le zirlai pawl cun an ṭuanvo hrangah camcawhfung an zûk.

9 A hmaisabik camcawhfung zûknak cu Asaf fapa Joseph parah a tlu, pahnihnak cu Gedaliah parah, amah le a unausungkhatpawl le a fapapawl thawn hleihnih an si; 10 pathumnak cu Zakkur parah, a fapapawl le a unausungkhatpawl thawn hleihnih an si; 11 palitnak cu Izri parah, a fapapawl le a unausungkhatpawl thawn hleihnih an si, 12 pangatnak cu Nethaniah parah, a fapapawl le a unausungkhatpawl thawn hleihnih an si, 13 paruknak cu Bukkiah parah, a fapapawl le a unausungkhatpawl thawn hleihnih an si, 14 pasarihnak cu Jesarelah parah, a fapapawl le a unausungkhatpawl thawn hleihnih an si; 15 pariatnak cu Jeshaiah parah, a fapapawl le a unausungkhatpawl thawn hleihnih an si; 16 pakuatnak cu Mattaniah parah, a fapapawl le a unausungkhatpawl thawn hleihnih an si; 17 pahratnak cu Shimei parah, a fapapawl le a unausungkhatpawl thawn hleihnih an si; 18 hleikhatnak cu Azarel parah, a fapapawl le a unausungkhatpawl thawn hleihnih an si; 19 hleihnihnak cu Hashabiah parah, a fapapawl le a unausungkhatpawl thawn hleihnih an si; 20 hleithumnak cu Shubael parah, a fapapawl le a unausungkhatpawl thawn hleihnih an si; 21 hleilitnak cu Mattithiah parah, a fapapawl le a unausungkhatpawl thawn hleihnih an si; 22 hleingatnak cu Jeremoth parah, a fapapawl le a unausungkhatpawl thawn hleihnih an si; 23 hleiruknak cu Hananiah parah, a fapapawl le a unausungkhatpawl thawn hleihnih an si; 24 hleisarihnak cu Joshebekashah parah, a fapapawl le a unausungkhatpawl thawn hleihnih an si; 25 hleiriatnak cu Hanani parah, a fapapawl le a unausungkhatpawl thawn hleihnih an si; 26 hleikuatnak cu Mallothi parah, a fapapawl le a unausungkhatpawl thawn hleihnih an si; 27 cule kulnak cu Eliathah parah, a fapapawl le a unausungkhatpawl thawn hleihnih an si; 28 kul hluankhatnak cu Hothir parah, a fapapawl le a unausungkhatpawl thawn hleihnih an si; 29 kul hluanhnihnak cu Giddalti parah, a fapapawl le a unausungkhatpawl thawn hleihnih an si; 30 kul hluanthumnak cu Mahazioth parah, a fapapawl le a unausungkhatpawl thawn hleihnih an si; 31 kul hluanlitnak cu Romamti-Ezer parah, a fapapawl le a unausungkhatpawl thawn hleihnih an si.

26

Temple Kăwtkakiltupawl

1 Kăwtkakiltupawl bur ṭhendān cu: Korah-mipawl lak ihsin Kore fapa Meshelemiah a si, cucu Asaf fapapawl lakih mi a si. 2 Meshelemiah fapapawl cu fatir ah Zekariah, pahnihnak ah Jediael, pathumnak ah Zebadiah, palitnak ah Jatniel, 3 pangatnak ah Elam, paruknak ah Jehohanan, pasarihnak ah Eliehoenai an si.

4 Obed-Edom fapapawl cu a fatir ah Shemaiah, pahnihnak ah Jehozabad, pathumnak ah Joah, palitnak ah Sakar, pangatnak ah Nethanel, 5 paruknak ah Ammiel, pasarihnak ah Issakar, pariatnak ah Peultai tla an si; ziangahtile Pathian in Obed-Edom cu mal a sawm.

6 A fapa Shemiah hnenah fapapawl hrinsak an si, cupawl cun an pupápawlih sungza an uk, ziangruangahtile annih cu ti theinak nasazet nei mi an si. 7 Shemaiah fapapawl cu: Othni, Refael, Obed le Elzabad an si, Elzabad-ih unau Elihu le Semakiah cu ti theinak nei mi an si.

8 Hipawl hmuahhmuah hi Obed-Edom tesinfapawl an si, anmah le an fapapawl le an unausungkhatpawl cu hnaṭuan dingih micak le ti theinak nei an si, Obed-Edom in tesinfa 62 a nei.

9 Meshelemiah in fapapawl le unausungkhatpawl a nei, ti theinak nei hleiriat an si.

10 Merari tefapawl lakih Hosah khal in fapapawl a nei: a pakhatnak ah Shimri (amah cu fatir a si lo nân, a pa in a pakhatnak ah a tuah), 11 pahnihnak ah Hilkiah, pathumnak ah Tebaliah, palitnak ah Zekariah a si; Hosah fapapawl le a unausungkhatpawl an zaten hleithum an si.

12 Hi kăwtkakiltu burṭhenpawl cu, ti theinak nei an hotupawl thawn, an unausungkhatpawl zawngah, Jehovah inn ih rawngbawlhna ṭuantu ding an si. 13 A tûm siseh, a te siseh an pupápawl sungza zulhin kăwtka kip hrangah camcawhfung an zûk. 14 Nisuahnak lam kăwtka hrangih camcawhfung zûk mi cu Shelemiah parah a tlu. Cun mifim thurawnpetu a fapa Zekariah hrangah camcawhfung an zûk ih, Sak lam kăwtka cu a covo ah a tlu. 15 Obed-Edom hrangah thlang lam kăwtka, cule a fapapawl hrangah thilri retnak. 16 Shuppim le Hosah hrangah nitlaknak lam kăwtka le zinpi so kiangih Shalleketh kăwtka cu an covo ah a tlu. Kiltupawl cu hitivekih ṭhen a si: 17 nisuahnak lamah Levi-mi paruk an um ih, ni tin sak lamah pali, ni tin thlang lamah pali, thilri retnak hrangah mi pahnih veve tiin. 18 Nitlaknak lamih aParbar tualrawn hrangah zinpi ah mi pali le Parbar tualrawn ah mi pahnih tiin. 19 Hipawl hi Korah fapapawl lak le Merari fapapawl lakih kăwtkakiltu burṭhenpawl cu an si.

26:18a Parbar: Hebru ṭawng ihsi lak mi a si ih, tualrawn asilole ṭhuam thlaraw a si men thei.

20 Levi-mipawl lak ihsin Ahijah cu Pathian inn sungih hlawnthilpawl kilkhawitu le serhhran mi hlawnthilpawl kilkhawitu a si. 21 Gerson tesinfapawl lakih pakhat Laadan-ih tefapawl cu hipawl hi an si: Jehieli cu Laadan tefa lakih pakhat a si ih, Laadan pupápawlih sungza lubânpawl lakih pakhat, Gerson-mi a si. 22 Jehieli fapapawl cu Zetham le a unaupa Joel an si, anmah cu Jehovah inn sungih hlawnthilpawl kilkhawitu an si. 23 Amram-mipawl, Izhar-mipawl, Hebron-mipawl, Uzziel-mipawl lak ihsin: 24 Mosi fapa Gershom-ih fapa Shebuel cu hlawnthilpawl hohatu a si. 25 Eliezer ihsi a unausungkhatpawl cu Rehabiah a fapa a si, cuih fapa cu Jeshaiah a si, cuih fapa cu Joram a si, cuih fapa cu Zikri a si ih, cuih fapa cu Shelomith a si.

26 Hi Shelomith le a unausungkhatpawl cu cuih hlawnthil serhhran mi thil hmuahhmuah kilkhawitu an si. Siangpahrang David, an pupápawlih sungza lubânpawl, ralkap 1000 hotupawl le 100 hotupawl le ralbawipawl in cuih thilpawl cu an serhhran. 27 Raldonak ih ralthillawn hrekkhat an neh mipawl cu annih in Jehovah inn remṭhatnak dingah an serhhran. 28 Hmutu Samuel le Kish fapa Saul, Ner fapa Abner, Zeruiah fapa Joab tepawl ih an serhhran mi hmuahhmuah, thil serhhran mi kip cu Shelomith le a unausungkhatpawlih kut hnuaiah a si.

29 Izhar-mipawl lak ihsin Kenaniah le a fapapawl in Israel tlunah leng lam hna, bawi ṭuanvo le thuṭhentu ṭuanvo an nei.

30 Hebron-mipawl lak ihsin Hashabiah le a unausungkhat, miralṭha mipa 1700 pawl cu Jehovah hna hmuahhmuah hrangah le siangpahrang rawngbawlnak ah Jordan nitlaknak lam kapih um Israel kilkhawi ding ṭuanvo an nei. 31 Hebron-mipawl lakah a pupápawlih cithlahsâwngawkdān bangtukin Jerijah cu Hebron-mipawlih lubân a si. David a lal a kum 40-nak ah, annih cu hawl an si ih, anmah lakah Gilead ram ih Jazer ah micakpawl an hmusuak. 32 Jerija-ih unausungkhatpawl lakih miralṭha 2700 pawl cu an pupápawlih sungza lubân an si. Cupawl cu Siangpahrang David in Reuben-mipawl, Gad-mipawl le Manasseh hnám hrek kilvengtu ah a tuah hai. Annih cun Pathian lam thilpawl le siangpahrang thil hmuahhmuah tlunah ṭuanvo an nei.

27

Ralkap Burṭhenpawl

1 Israel tefapawl, an mipum bangtukin, an pupápawlih sungza lubânpawl, ralkap 1000 hotu le 100 hotupawl le an bawipawl cun ralkap burṭhen thuhla tinkim ah siangpahrang an rian. Cuih burṭhen kum khat sungih thla tin thlengaw ṭheu, burṭhen tin ih mi cu 24000 an si.

2 Burṭhen pakhatnak a thla khatnak ih hotu cu Zabdiel fapa Jashobeam a si ih, amai burṭhen ah mi 24000 an um; 3 Jasobeam cu Perez-ih tefapawl lakih pakhat le a thla hmaisabik hrangih ralkap bawipawl hmuahhmuah ih lubik a si. 4 A thla hnihnak burṭhen hotu cu Ahoh-mi Dodai a si ih, amai burṭhen lakih Mikloth khal hruaitu a si ve; amai burṭhen ah mi 24000 an um. 5 A thla thumnak ih ralkappawl hotu pathumnak cu puithiam lubik Jehoiada fapa Benaiah a si; amai burṭhen ah mi 24000 an um. 6 Hi pa cu micak 30 lakih tel Benaiah le mi 30 hotu kha a si; amai burṭhen ah a fapa Ammizabad a tel. 7 A thla litnak ih ralbawi a palitnak cu Joab-ih unaupa Asahel a si ih, amah hnuah a fapa Zabadaiah in ṭuanvo a run la; amai burṭhen ah mi 24000 an um. 8 A thla ngatnak ih a pangatnak ralbawi cu Izrah-mi Shamhut a si; amai burṭhen ah mi 24000 an um. 9 A thla ruknak ih a paruknak ralbawi cu Tekoah-mi Ikkesh-ih fapa Ira a si; amai burṭhen ah mi 24000 an um. 10 A thla sarihnak ih a pasarihnak ralbawi cu Efraim tefapawl lak ihsin Pelon-mi Helez a si; amai burṭhen ah mi 24000 an um 11 A thla riatnak hrangih a pariatnak ralbawi cu Zerah-mipawl lak ihsin Hushath-mi Sibbekai a si; amai burṭhen ah mi 24000 an um. 12 A thla kuatnak hrangih a pakuatnak ralbawi cu Benjamin-mipawl lak ihsin Anathoth-mi Abiezer a si; amai burṭhen ah mi 24000 an um. 13 A thla hratnak hrangih a pahratnak ralbawi cu Zerah-mipawl lak ihsin Netofat-mi Maharai a si; amai burṭhen ah mi 24000 an um. 14 A thla hleikhatnak hrangih a hleikhatnak ralbawi cu Efraim tefapawl lak ihsin Pirathon-mi Benaiah a si; amai burṭhen ah mi 24000 an um. 15 A thla hleihnihnak hrangih a hleihnihnak ralbawi cu Othniel tefa, Netofat-mi Heldai a si; amai burṭhen ah mi 24000 an um.

Hnám Hleihnih Hotupawl

16 Israel hnámpawl tlunih uktu: Reuben-mipawl tlunih uktu cu Zikri fapa Eliezer a si; Simeon-mipawl tlunih uktu cu Maakah fapa Shefatiah a si; 17 Levi-mipawl tlunih uktu cu Kemuel fapa Hashabiah a si; Aaron-mipawl tlunah Zadok; 18 Judah tlunah David-ih unaupawl lakih pakhat Elihu; Issakar tlunah Maikal fapa Omri; 19 Zebulun tlunah Obadiah fapa Ishmaiah; Naftali tlunah Azriel fapa Jerimoth; 20 Efraim tefapawl tlunah Azaziah fapa Hoshea; Manasseh hnám hrek tlunah Pedaiah fapa Joel; 21 a dang Manasseh hnám hrek tlunah Gilead ah, Zekariah fapa Iddo; Benjamin tlunah Abner fapa Jaasiel; 22 Dān tlunah Jeroham fapa Azarel cu uktu a si. Hipawl hi Israel hnámpawl hruaitu an si.

23 Asinan David in kum 20 le a hnuai lam cu mipum a rak siar lo, ziangruangahtile Jehovah in vanpawlih arsipawl vekin Israel cu ka karhzaiter ding tiah a ti. 24 Zeruiah fapa Joab in mipum siar a thăwk, asinan a rak ṭheh lo, ziangahtile Israel parah hi mipum siarnak ruangah thinlingnak a thleng; siangpahrang David-ih sansiarnak cazin khalah mipum zât ngankhum a si lo.

David-ih Bawipawl

25 Adiel fapa Azmaveth cu siangpahrang-ih hlawnthilpawl kilkhawitu a si ih, Uzziah fapa Jonathan in lóram lam, khawpipawl, khawtepawl le dawlsângpawl ih thilri retnakpawl a kilkhawi. 26 Kelub fapa Ezri cu lóram hnaṭuantu lei lettupawl hohatu a si. 27 Ramath hmun ih um mi Shimei cu sabit hmuan ṭuantupawl hohatu a si ih, Shefam hmun ih um mi Zabdi cu sabit hmuan rahsuah sabitzu ṭuantu hohatu a si. 28 Geder hmun ih um mi Baal-Hanan cu olif thingpawl le hmun niampawl ih asikamor kungpawl fingkhawitu a si ih, Joash cu hriak retkhawmnak hohatu a si. 29 Sharon hmun ih um mi Shitrai cu Sharon hmun ih ranpi rual fingkhawitu a si ih, Adlai fapa Shafat cu phaikuampawl ih ranpi rual fingkhawitu cu a si. 30 Ishmael-mi Obil cu kalaukpawl kilkhawitu a si ih, Meronoth hmun ih um mi Jehdeiah cu lākpawl fingkhawitu a si, 31 cule Hagar-mi Jaziz cu rante rual fingkhawitu a si. Hipawl hi Siangpahrang David-ih thil kiltu bawipawl an si.

27:28a sikamor: Theipi kung phun khat a si.

David-ih Bulpak Bawipawl

32 Cuihhleiah David-ih paseu Jehonathan cu thurawnpetu, mifim le cangantu a si; cule Hakmoni fapa Jehiel cu siangpahrang fapapawl zawngah a um. 33 Ahithofel cu siangpahrang thurawnpetu a si ih, Arki khawmi Hushai cu siangpahrang hawipi a si. 34 Ahitofel sangtu ah Benaiah fapa Jehoida le Abiathar an si. Siangpahrang-ih ralbawi lubik cu Joab a si.

28

Temple Sakdān ding Solomon Sim a Si

1 David in Israel hruaitupawl hmuahhmuah a fĭnkhawm: hnámpawl hotupawl le siangpahrang riantu ralkap burṭhen ralbawipawl, ralkap 1000 hotupawl le ralkap 100 hotupawl le siangpahrang le a fapapawl ih sum le neih mi thil hmuahhmuah tlunih hotupawl le an fapapawl, bawipawl, miralṭhapawl le micak ralṭha zaten Jerusalem ah a kokhawm.

2 Siangpahrang David cu a ke in a ding ih, «Ka unausungkhatpawl le ka mipawl, i ngaithla hnik uh: Jehovah-ih Thukham Kuang cawlhnak ding hrang le kan Pathian keretnak ding hrangah inn sak ding ka thinlung ah a rak um ih, cumi sak dingin timlamnakpawl khal ka rak tuah. 3 Asinan Pathian in ka hnenah, ‹Nang cun ka hmin hrangah inn na sak lo pei, ziangruangahtile nang cu ral do mi na si ih, thisen na rak suah,› tiah i ti. 4 Sikhalsehla Israel-ih Pathian Jehovah in ka pa teih sungza hmuahhmuah lak ihsin Israel tlunih kumkhua siangpahrang si dingin i hril zo, ziangahtile anih in uktu dingah Judah a rak hril. Ziangahtile Judah sungza ihsin ka pa teih sungza a hril ih, ka paih fapapawl lak ihsin Israel zate tlunih siangpahrang si dingah siangpahrang ih i tuah dingin anih cu ka parah a lung a hmui. 5 Jehovah in fapa tampi in pe ih, ka fapapawl hmuahhmuah lak ihsin ka fapa Solomon cu Israel tlunih Jehovah lalram laltokham parih to dingah a rak hril. 6 Anih in ka hnenah, ‹Na fapa Solomon hi ka inn le ka tualrawnpawl saktu ding a si; ziangahtile amah cu ka fapa si dingah ka hril ih, kei cu a Pa ka si ding. 7 Anih in tuihsun vekin, ka thupekpawl le ka cīn le dānpawl tuahsuak dingin a dinghnget asile, a lalram cu kumkhuain ka dĭnhnget ding,› tiah i ti. 8 Curuangah atu ah hi ram ṭha hi nan co ih, nan hnuih nan tefapawl hrangah kumkhaw ro ih co ta dingih nan tān vivo theinak dingah, Jehovah-ih mipungkhawm, Israel zate hmuh ah le kan Pathian hnatheihah Jehovah nan Pathian thupekpawl hmuahhmuah hi thlun uhla hawl uh.

9 «Nang, ka fapa Solomon, na paih Pathian thei awla a rinum mi thinlung thawn le duhnak lungthin thawn amah cu rian aw; ziangahtile Jehovah in thinlung hmuahhmuah a zăwisuak ih, tumtah mi ruahnakpawl hmuahhmuah tla a theithiam ṭheh. Amah na hawl asile, amah cu na táwngngah ding; asinan amah na hnawn asile, a lo thlauthla kumkhua ding. 10 Atu ah ruat aw, ziangahtile hmun thianghlim hrangih inn sak dingah Jehovah in a lo hril a si; cakin um awla cumi cu tuah aw,» tiah a ti.

11 David in a fapa Solomon hnenah hulhliap, innpawl, hlawnthil retnak, tlunta pindanpawl, sungta pindanpawl le Tlăwnlungawithawinak Hmun ruangzĭng mi cu a pe, 12 cule Thlarau thawngih a neih mi ruahmannakpawl hmuahhmuah: Jehovah inn tualrawnpawl, a kimvel hmuahhmuah ih pindanpawl, Pathian inn hlawnthil retnakpawl le serhhran thilpawl hrangih hlawnthil retnakpawl; 13 puithiampawl le Levi-mipawl bur ṭhendān ding, Jehovah inn ih rawngbawl hnaṭuan hmuahhmuah hrang le Jehovah inn ih rawngbawlnak thilripawl hrang khal. 14 Rawngbawlnak phun zakip hmanruapawl hmuahhmuah hrang, sui thilpawl hrangah sui khīngkhaiin; rawngbawlnak phun zakip hmanruapawl hrangah ngun thilpawl hrangah ngun khal khīngkhaiin; 15 sui meitoṭhuampawl hrang le an sui meitopawl hrangah khīngkhaiin, meitoṭhuam kip le a meito cio hrang khīngkhaiin; ngun meitoṭhuampawl hrangah khīngkhaiin, meitoṭhuam le a meitopawl hrang, meitoṭhuam kip ih hman ding mi bangtukin; 16 Sangserh cabuaipawl hrangah sui khīngkhaiin, cabuai kip le ngun cabuaipawl hrangah ngun a pe; 17 cule salaknak hmanruapawl, cawhtawlhpawl le sui hlir ih tuah mi thâwlpawl hrangah sui hlirhlăng a pe, cule sui khengkûmpawl hrangah khengkûm kip sui khīngkhaiin a pe; cule ngun khengkûmpawl hrangah khengkûm kip ih khīngkhaiin; 18 cule rimhmui biakṭheng hrangah er mi sui khīngkhaiin; cule an thlapawl pharh ih Jehovah Thukham Kuang hliaptu cherub-pawlih ránglêng ruangâm hrangah sui a pe. 19 David in, «Jehovah in hipawl hmuahhmuah hi ka parih a kut in thei thei ko i tuah. Hi ruahhmannak hnaṭuan hmuahhmuah hi ngan cia-in i pe,» tiah a ti.

20 David in a fapa Solomon hnenah, «Cakin um aw, ralṭhain um awla, ṭuansuak aw; ṭih hlah, lungphâng fawn hlah, ziangahtile Jehovah inn ih rawngbawlhna hnaṭuan hmuahhmuah na ṭheh hlanlo, Jehovah Pathian, ka Pathian in a lo umpi ding. A lo tlansan lo ding ih, a lo tān ta fawn lo ding. 21 Ngai hnik, burṭhen puithiampawl le Levi-mipawl cu Pathian inn rawngbawlhna hmuahhmuah hrangah an si. Cule duhnak nei zungthiam pauhpauh cu hna zate hrangah, rawngbawlhna tinkim hrangah na hnenah an um ding; hruaitupawl le minung hmuahhmuah khal na thupeknak hnuaiah an um ṭheh ding,» tiah a ti.

29

Temple Saknak ding hrang Thawhhlawm

1 Siangpahrang David in mipungkhawm hmuahhmuah hnenah, «Pathian lawngih hril mi ka fapa Solomon cu a no lai ih, hmuhtawn mi a nei hrih lo; hna le a ropi tuk, ziangruangahtile temple cu milai hrangah a si lo, Jehovah Pathian hrang sawnah a si. 2 Ka Pathian inn hrangah ka cahnak hmuahhmuah thawn sui ih tuah ding thilpawl hrangah sui, ngun ih tuah ding thilpawl hrangah ngun, dar ih tuah ding thilpawl hrangah dar, thir ih tuah ding thilpawl hrangah thir, thing ih tuah ding thilpawl hrangah thing, oniks lungpawl, bŭn dingah lungpawl, răwng phunphun nei a tle mi lungpawl, lung mankhung phun zakim le marbal lung a tawrih tawr ka rak timlam. 3 Cuihhleiah ka Pathian inn ah ka lungsinak ka ret ruangah, ka hlawnthil hleice sui le ngun cu, inn thianghlim hrangih ka rak timlam mi hmuahhmuah hleiah ka Pathian inn hrangah ka pe: 4 Sui talent 3000, cupawl lak ihsin Ofir sui le ngun er mi talent 7000 cu innpi pharpawl khût dingah; 5 sui thilpawl hrangah sui le ngun thilpawl hrangah ngun, cule zungthiampawl kut ih tuah ding mi hna phun zakip hrangah an si. Zo so tuihni ah Jehovah hnenih serhhran aw duh?

6 Pupápawlih sungza hruaitupawl, Israel hnám hruaitupawl, ralkap 1000 hotupawl le 100 hotupawl cu siangpahrang hna tlunih bawipawl thawn mai palungsuakin an pe. 7 Pathian inn hna hrangah sui talent 5000 le sui darik 10000, ngun talent 10000, dar talent 18000 le thir talent thawng zakhat an pe. 8 Lung mankhung nei pauhpauh in Jehovah inn hlawnthil retnak ah, Gershon-mi Jehiel kut ah an pe. 9 Mipi cu an ai a puang, ziangahtile siang zetin an pe, ziangruangahtile thinlung taktakin Jehovah hnenah siang zetin an pe; cule siangpahrang David khal nasazetin a ai a puang.

David-ih Pathian Thangṭhatnak

10 Mipungkhawm hmuahhmuah hmaiah David in Jehovah a thangṭhat. David in,

«Kan Pa, Israel-ih Pathian Jehovah, nangmah cu kumkhuain kumkhua thangṭhat na si.
11 Maw Jehovah, ropitnak,
Huham le sunlawihnak,
Nehnak le cungnunnak cu nangmai ta a si;
Ziangahtile van le lei ih a um mi hmuahhmuah cu nangmai ta a si;
Maw Jehovah, lalram cu nangmai ta a si ih,
Nangmah cu ziangtinkim tlunah lu ih khaisan na si.
12 Lennak le upatnak a pahnih in na hnen ihsin an ra,
Cule an zate tlunah nang in na uk,
Na kut ah huham le cahnak a um;
Na kut ah mi hmuahhmuah ropi ko tuah theinak le
Cahnak pek theinak a um.
13 Curuangah kan Pathian,
Na hnenah lungawi thu kan sim ih,
Na hmin sunglawi kan thangṭhat.
14 Asinan hitivekin siang zetih pe thei dingin,
Zo so maw ka si ih, ka mipawl cu zo so an si?
Ziangahtile thil hmuahhmuah hi na hnen ihsi ra an si,
Cule nangmai ta sung ihsin kan lo pe a si.
15 Ziangahtile kannih cu kan pupápawl hmuahhmuah vekin,
Na hmaiah khawtluang mi le mikhual kan si;
Leilung tlunih kan damsung nipawl tla cu thlahlim vek an si ih, ruahsan ding a um lo.

16 «Maw Jehovah kan Pathian, na hmin thianghlim hrangih inn lo saksak dingih kan rak timlam mi, himi a tawrih tawr hi na kut ihsin an si ih, a zaten na ta an si. 17 Ka Pathian, nang cun thinlung na hniksak ih dĭngnak ah lunghmuinak na nei ti khal ka thei. Kei lawngte cun, a ding mi thinlung thawn, hi thil hmuahhmuah hi siang zetin ka pe ih, na hnenih siang zetih petu ding hitawk ih um na mipawl cu aipuang zetin ka rak hmu. 18 Maw Jehovah, kan pupá Abraham, Isak le Israel Pathian, himi cu na mipawl thinlung ih khawruah mipawlih tĭn mi ah hngetter kumkhua awla, nangmah lamah an thinlung hawiter aw. 19 Ka fapa Solomon lawngte cu na thupekpawl, na thutheihtermipawl le na sakhaw dānpawl thlun ih, cupawl hmuahhmuah tuah dingin le ka rak timlam zo mi temple sak dingin thinlung famkim pe aw,» tiah a ti.

20 Cun David in mipungkhawm zate hnenah, «Jehovah nan Pathian thangṭhat uh,» tiah a ti. Cule mipi-umkhawm zaten an pupápawlih Pathian Jehovah cu an thangṭhat ih, siangpahrang le Jehovah hmaiah an lu an kûn ih an băwkkhup.

Siangpahrang dingah Solomon Hriak Thih a Si

21 A thaisun ah Jehovah hnenah thawinakpawl an tuah ih, Jehovah hnenah Meiur Thilhlănpawl an hlan: câwpa 1000, tuucang 1000 le tuufa no 1000 cu an Inding Thilhlănpawl thawn Israel hmuahhmuah hrangah thawinak tam ngaingai an hlan. 22 Cutin cuih ni ah Jehovah hmaiah lungawi zetin an ei ih an in. David fapa Solomon cu siangpahrang ah a vei hnihnak an tuah ih, hruaitu si dingin Jehovah hmaiah hriak an thih, cule Zadok cu puithiam dingah. 23 A pa David aiah Solomon cu Jehovah hmaiah siangpahrang dinhmun in laltokham ah a to, cule anih cu a hmuingil ih, Israel hmuahhmuah in a thu an ngai. 24 Hruaitu zate, ral do mi zate le siangpahrang David fapapawl hmuahhmuah khal siangpahrang Solomon hnenah an tlulut. 25 Jehovah in Solomon cu Israel zate hmaiah nasazetin a khaisâng ih, Israel ram ah amai hlanih siangpahrang zohman ih co dah lo siangpahrang sinak ropi zet cu a parah a pek.

David Thihnak

26 Cutivekin Jesse fapa David cu Israel hmuahhmuah tlunah a lal. 27 Israel tlunih a lal sung cu kum 40 a si, Hebron ah kum sarih sung a lal ih, Jerusalem ah kum 33 sung a lal. 28 Anih cu kum upa, tarkûnin, lian zet le upat siin a thi, cule a aiah a fapa Solomon a lal. 29 Siangpahrang David-ih căngvaihnakpawl cu a thăwk ihsin a cem tiang, ngai hnik, hmutu Samuel-ih cazual, profet Nathan-ih cazual le hmutu Gad-ih cazual sungah ngan a si, 30 a uknak thuhla le a thiltitheizia hmuahhmuah, amai par, Israel par le a uk mi ram hmuahhmuah parih thil cang mi pawl thawn.